Kalata wa Bubili uwa kwa Petro

1 Ine ne Simone Petro, umusha+ kabili umutumwa+ wa kwa Yesu Kristu, nalembela abapokelela icitetekelo, ico bonse twashukila,+ pa mulandu wa bulungami+ bwa kwa Lesa wesu no Mupusushi wesu Yesu Kristu:+

2 Icikuuku ca kwa Lesa no mutende fileba na imwe+ ilyo muleishibilako+ bwino bwino Lesa na Yesu Shikulwifwe, 3 pantu amaka ya kwa Lesa yalitupeela ifintu fyonse ifyakuma umweo+ e lyo na fyonse ifyakuma bukapepa,+ ukupitila mu kwishiba bwino bwino uwatwitile+ ku bukata+ na ku mibele isuma. 4 Muli ifi e mo atulaile ifintu ifyacindama kabili ifisuma nga nshi,+ pa kutila muli ifi fine e mo mukapalanine+ na Lesa,+ apo mwalitalukako ku mibele yabipa iya pano calo+ iifuma mu lunkumbwa.

5 Kanshi apo ifi fintu fyaba ifi, na imwe mufwile ukubombesha+ ukulundako imibele iisuma+ ku citetekelo cenu, kabili ku mibele yenu iisuma mufwile ukulundako ukwishiba,+ 6 ku kwishiba na ko mulundeko ukuilama, na ku kuilama+ kwine mulundeko ukushipikisha, ku kushipikisha na ko mulundeko bukapepa,+ 7 na kuli bukapepa kwine mulundeko ukutemwa aba bwananyina, e lyo ku kutemwa aba bwananyina mulundeko ukutemwa abantu bonse.+ 8 Pantu ifi fintu nga fyaba muli imwe no kufulisha, fikamulenga ukukanaba abanang’ani nelyo abashitwala+ ifisabo mu kwishiba bwino bwino Shikulwifwe Yesu Kristu.

9 Pantu umuntu nga takwete ifi fintu, ninshi ni mpofu, tafwaya ukumona ulubuuto,+ kabili nalaba+ ukuti alisangululwa+ ku membu shakwe isha kale. 10 E ico, mwe bamunyinane, bombesheni pa kutila mwipanya ubwite+ bwenu no kusalwa+ kwenu; pantu nga mulecita ifi fintu tamwakafilwe nakalya.+ 11 Na kuba, e lyo bakamusengela pa kwingila+ mu bufumu bwa muyayaya+ ubwa kwa Shikulwifwe kabili Umupusushi Yesu Kristu.+

12 E ico nakulabika umutima lyonse pa kumwibukishako+ ifi fintu, nangu ca kutila mwalifishiba kabili mwalikosa mu cine+ icaba muli imwe.+ 13 Lelo nacilinga kuli ine, ilyo ncili muli lino itenti,+ ukumucincisha pa kumwibukishako.+ 14 Pantu ine ninjishiba ukuti nalaswa mfume muli lino itenti lyandi,+ pantu e fyo na Shikulwifwe Yesu Kristu anangile.+ 15 E ico nakulaesha nga nshi inshita yonse, ukuti ilyo nkafumapo,+ mwe bene mukaleibukisha ifi fintu.

16 Awe, ilyo twamushimikile pa maka ya kwa Shikulwifwe Yesu Kristu+ na pa kubapo kwakwe, tatwabomfeshe imilumbe+ ya bufi iyo abantu bomina mu bucenjeshi, lelo twamushimikile ubukata bwakwe ubo twaimwenene na menso yesu.+ 17 Pantu apokelele umucinshi no bukata kuli Lesa Wishi,+ ilyo amashiwi pamo nga ya yalandilwe kuli ena ukufuma mwi kumbi ilyabengeshima, ayati: “Uyu e mwana wandi, uo natemwa, uo nsekelamo.”+ 18 Kabili, aya e mashiwi ayalandilwe ukufuma mu muulu ayo twaumfwile+ ilyo twali nankwe mu lupili lwa mushilo.+

19 E ico calenga no kuti tucilileko ukushininkisha ukuti amashiwi+ ya kusesema ya cishinka;+ kabili mulecita bwino ukubika amano ku mashiwi ya kusesema ayaba kwati ni nyali+ iileaka umwafiita, mu mitima yenu, busuke ubushiku buce no lutanda lwa lucelo+ lutule. 20 Ica kwibukisha pali fyonse ni ci ica kuti takwaba nangu umo uwingalondolola umwine ukusesema kwa mu Malembo.+ 21 Pantu bakasesema tabaitendekele+ fye abene ukulanda amashiwi ya kusesema, lelo umupashi+ wa mushilo e walengele ukuti balande ayo mashiwi ayafumine kuli Lesa.+

2 Lelo, filya kwaishileba bakasesema ba bufi mu bena Israele, e fyo na muli imwe mukesaba bakasambilisha ba bufi.+ Aba bene e bakalafunda ifya bufi ifya kuleta amalekano aya kumonaula kabili bakakaana na cibinda wabo uwabashitile,+ no kuiletelela ubonaushi bwangu bwangu. 2 Kabili, abengi bakakonka+ imibele yabo iya kuilekelesha,+ na pa mulandu wabo ukupepa kwa cine kukapontelwa.+ 3 Na kabili, pa mulandu wa lunkumbwa lwabo bakamushukila ku mashiwi yabo aya bucenjeshi.+ Lelo bulya bupingushi bwa kale+ tabuleshingashinga, no konaulwa kwabo takuleshimba.+

4 Lesa cine cine talekele fye ukwabula ukukanda bamalaika+ ababembwike, lelo abapoosele mu Tartari,+ mu filindi umwafiita fititi, ku kulolela ubupingushi.+ 5 Na kabili Lesa talekele fye ukwabula ukukanda aba pano calo aba ku kale,+ lelo apuswisheko fye Noa, uwaleshimikila abantu pa fyalungama,+ kabili apuswishe na bambi+ cinelubali (7) ilyo aletele ilyeshi+ pa ba pano calo abashipepa. 6 Kabili apingwile+ imisumba ya Sodomu na Gomora no kuyoca mu mulilo mpaka yaba imito. Acitile ifyo kuli iyi misumba pa kuti ibe icilangililo ca fyo akacita ku bantu abashipepa.+ 7 Lelo apuswishe Lote umulungami,+ uwalengelwe ubulanda nga nshi ku mibele ya kuilekelesha iya bampulamafunde.+ 8 Ifyo ulya mulungami alemona no kumfwa ilyo aikele na ba bantu inshiku shonse fyalelungulusha umweo wakwe pa mulandu wa micitile yabo iya bumpulamafunde. 9 E ico kanshi, Yehova alishiba ukupokolola bakapepa ku fya kwesha,+ na bashalungama na bo alibabikila ubushiku bwa bupingushi ilyo akabakanda,+ 10 maka maka abolungana na bambi pa kuti babakoweshe+ kabili abasuula ubutungulushi.+

Balipama, ni bamunshebwa, tabatiina abakata, lelo balabapontela,+ 11 nomba nangu ca kutila bamalaika balikosa kabili ba maka icine cine, tababasoselela mu musaalula,+ pa mulandu wa kuti balicindika Yehova.+ 12 Lelo aba bantu, abapala inama ishishaba na mano ishifyalilwa ukwikatwa no konaulwa, bapontela+ ifintu ifyo bashaishiba, kabili bakabonawilapo pali ifi fintu ifyo bacita, 13 bailetelela+ ububi pa mulandu wa kucita ifyabipa.+

Bena batila ukucita ifya kusansamusha imibili yabo mu nshita ya kasuba e kuipakisha.+ Ilyo muli na bo pa mitebeto, baba kwati fiko ne fibala kabili basansamukila mu kumusambilisha ifya bufi.+ 14 Baba na menso ayalembula+ abanakashi pa kuti bacite na bo ubupulumushi kabili tabaleka ukubembuka,+ kabili babeleleka abashashangila. Baba ne mitima iyacenjela mu kukonkelela ulunkumbwa.+ Aba bantu bana abatiipwa.+ 15 Balilufiwa pa kusha inshila yalungama. Bapashanya ifyacitile Balaamu,+ mwana Beore, uwafwaile ukupoka icilambu pa kucita icabipa,+ 16 lelo asukile akalipilwa pa cilubo cakwe.+ Impunda iishilanda, yalandile kwati muntu+ no kweba uyu kasesema ukuti aleke ifya bushilu ifyo alefwaya ukucita.+

17 Aba bantu baba kwati tumfukumfuku utushaba na menshi,+ kabili kwati ni fubefube uo umwela uukali ulula, kabili Lesa alibapekanishisha icifulo ca mfifi icafiita fititi.+ 18 Pantu balanda amashiwi ya cilumba kabili aya buwelewele, kabili ku fya lunkumbwa lwa mubili+ na ku mibele ya kuilekelesha babeleleka+ abalefwaya ukufuma+ ku bantu abacita ifyabipa. 19 Babalaya ubuntungwa,+ ilyo bena bacili basha ba mibele yabipa.+ Pantu onse uo bacimfya asanguka umusha wa wamucimfya.+ 20 Nga cine cine, pa numa ya kusha ifya kukowesha fya pano calo+ ilyo baishiba bwino bwino Shikulu kabili Umupusushi Yesu Kristu, na kabili babwelela kuli ifi fine fintu no kucimfiwa,+ imibele yabo iya kulekelesha ilabipisha ukucila iya kubalilapo.+ 21 Pantu nga caliweme abakanaishiba bwino bwino inshila ya bulungami+ ukucila ukuti ilyo baishiba, e lyo ba-alukila ifunde lya mushilo ilyo bapeelwe.+ 22 Ifyo bacita e fyasosa ne pinda lya cine, aliti: “Imbwa+ ibwelela ku malushi ya iko, ne nkumba iisambilwe ibwelela ku kwalangana mu matipa.”+

3 Mwe batemwikwa, uyu nomba e kalata wa bubili namulembela. Muli uyu kalata, nga filya namulembele muli kalata wa ntanshi,+ ndemwibukishako+ ifi fintu pa kuti mubikeko amano, 2 pa kuti muleibukisha amashiwi ayalandilwe kale kuli bakasesema+ ba mushilo, na mafunde ya kwa Shikulu kabili Umupusushi ayo abatumwa+ benu bamupeele. 3 Ica kubalilapo, mwalishiba ici ica kuti mu nshiku+ sha kulekelesha mukesa bakapumya+ no kupumya kwabo, abakalakonkelela fye ulunkumbwa lwabo+ 4 no kusosa abati:+ “Bushe filya alaile ukuti akabapo, e po aba?+ Pantu ukufuma pa bushiku ifikolwe fyesu fyafwila,* ifintu fyonse fyaba fye filya fine fye fyali ukufuma apo icalo capangiilwe.”+

5 Aba bantu tabafwaya fye ukwibukisha ukuti kale Lesa apangile imyulu+ kwi shiwi lyakwe. Lesa kabili kwi shiwi alengele isonde limoneke ukufuma mu menshi+ kabili alengele amenshi+ yambi yabe pa muulu we sonde. 6 Kabili Lesa aonawile aba cilya calo ku menshi ilyo acibunshishe mu lyeshi.+ 7 Lelo kwi shiwi limo line imyulu+ ne sonde+ ifya nomba fyasungilwa umulilo+ kabili fyasungilwa ubushiku bwa bupingushi+ kabili ubwa konaula abantu abashipepa.+

8 Lelo, mwe batemwikwa, mwiluba ici ica kuti ubushiku bumo kuli Yehova bwaba nge myaka ikana limo (1,000), ne myaka ikana limo yaba ngo bushiku bumo.+ 9 Yehova tashingashinga ku kufikilisha ubulayo bwakwe,+ filya bamo batila alashingashinga, lelo alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.+ 10 Awe ubushiku+ bwa kwa Yehova bukesa ngo mupuupu,+ ilyo imyulu ikapita+ waa,+ lelo ifintu ilyo fikakaba se fikasunguluka,+ ne sonde+ ne milimo iyabamo fikasokoloka.+

11 Apo ifi fyonse fikasunguluka umusango yu, imwe mufwile ukuba ne mibele ya mushilo ne milimo ya bukapepa, 12 abalolela+ kabili abafulukisha ukubapo kwa bushiku bwa kwa Yehova,+ ilyo imyulu ikapya no konaika+ ne fya mu muulu fikakaba se no kusunguluka! 13 Lelo tulelolela imyulu+ ipya ne sonde+ lipya ifyo Lesa alaya, umukaba ubulungami.+

14 E ico, mwe batemwikwa, apo mulelolela ifi fintu, ibikilisheniko ukuti akamusange ababula akabi,+ ababula akalema, kabili mu mutende.+ 15 Kabili, mulemona ukutekanya kwa kwa Shikulwifwe ukuti lipusukilo, ifyo na munyinefwe watemwikwa Paulo amulembeele ukulingana na mano+ ayo apeelwe.+ 16 Ifi fine e fyo alanda mu makalata yakwe yonse ilyo alemba pali uyu mulandu. Lelo, mu makalata yakwe mwaba ifintu fimo ifya-afya ukwiluka, ifyo abashafundwa kabili abashakosa mu citetekelo balufyanya ukulondolola, nga filya fine balufyanya ukulondolola na Malembo yambi,+ no kuiletelela ubonaushi.

17 E ico, mwe batemwikwa, pa kwishibila libela ifi fintu,+ mulecenjela pa kuti mwikasendelwa pamo na bo mu filubo fya aba bantu bampulamafunde no kufuma ku citetekelo cenu.+ 18 Lelo mulekulilako mu cikuuku na mu mano ya kwishiba Shikulwifwe kabili Umupusushi wesu Yesu Kristu.+ Kuli ena kube ubukata pali nomba na pe na pe.+