UKUFUMA

1 Nomba abana ba kwa Israele baile ku Egupti pamo na Yakobo, cila muntu aile na ba mu ng’anda yakwe. Aya e mashina yabo:+ 2 Rubene, Simeone, Lebi na Yuda;+ 3 Isakari, Sebuluni na Benjamini; 4 Dani na Naftali; Gadi na Ashere.+ 5 Kabili bonse abatuntwike muli Yakobo* bali 70. Yosefe ena ninshi aali kale mu Egupti.+ 6 Mu kupita kwa nshita, Yosefe na bamunyina bonse e lyo na bonse aba nkulo ilya balifwile.+ 7 Kabili abena Israele* balifyalishe ica kuti balifulile sana, balefulilako fye no kukwatilako fye amaka, basukile bakumana icalo conse.+

8 Mu kupita kwa nshita imfumu iipya iishaishibe Yosefe yatendeke ukuteka mu Egupti. 9 E ico yaebele abantu baiko aiti: “Moneni! Abena Israele nabafula kabili nabakwata amaka ukutucila.+ 10 Lekeni tubapite pa mano. Pantu nga tatucitile ifi, bakulafulilako fye, kabili nga kwaima inkondo, bakailunda ku balwani besu kabili bakatulwisha, bakafume na mu calo cesu.”

11 E ico basontele bakapitao aba kuti balebabomfya mu mulimo wa busha pa kuti balebacushisha ku mulimo uwakosa,+ kabili bakuuliile Farao umusumba wa Pitomu no wa Raamsese+ umo alesungila ifintu fyakwe. 12 Lelo ilyo balebacusha sana, e lyo nabo balefyalisha kabili e lyo balefulilako ica kuti bakumene mpanga yonse. E ico abena Egupti baletiina nga nshi abena Israele.+ 13 Ici calengele abena Egupti balebomfya abena Israele buluku buluku.+ 14 Balebacushisha ku mulimo uwakosa, uwa kukandila indaka ye bumba no wa kutama injelwa, kabili balebacushisha na ku mulimo onse uwa mu mpanga. Cine cine babalengele babombe umulimo onse uwa busha kabili bababomfeshe buluku buluku.+

15 Pa numa imfumu ya Egupti yalandile na banakashi abaHebere abalepaapisha abanakashi, umo ali ni Shifra e lyo umbi ali ni Pua. 16 Yabebele aiti: “Ilyo mulepaapisha banamayo abaHebere pa mabwe ya kupaapilapo,+ nga mwamona ukuti umwana umwaume e wafyalwa, mulemwipaya; lelo nga mwanakashi, mwilamwipaya.” 17 Nangu imfumu yabebele ifi, aba banakashi baletiina Lesa wa cine, e ico tabakonkele ifyo imfumu ya Egupti yabebele, tabaleipaya abana abaume.+ 18 Imfumu ya Egupti yasukile yabeta no kubepusha aiti: “Cinshi mushipaila abana abaume?” 19 Abalepaapisha abanakashi baebele Farao abati: “Abanakashi abaHebere tababa nga banakashi abena Egupti. Bena balikosa, ilyo uuleya mu kubapaapisha afika, asanga nabapaapa kale.”

20 E ico Lesa alipaalile abalepaapisha abanakashi, kabili abantu balefulilako fye no kukoselako fye. 21 Kabili apo abalepaapisha abanakashi baletiina Lesa wa cine, alengele nabo bakwata abana. 22 Farao asukile aeba abantu bakwe bonse ati: “Abana abaume bonse aba baHebere abakulafyalwa mulebapoosa mu Mumana wa Naelo, lelo abana banakashi bena mulebaleka baba no mweo.”+

2 Pali ilya ine nshita, umwaume umo uwa mu mukowa wa kwa Lebi aupile umwanakashi wa mu mukowa wa kwa Lebi.+ 2 Kabili uyu mwanakashi alimiite afyala no mwana umwaume. Ilyo amwene ukuti umwana afyele ali umusuma sana, alimufishile pa myeshi itatu.+ 3 Ilyo amwene ukuti nomba ca-afya ukumufisa,+ abulile umuseke* wa macinda no kushingwilako amanenekela, abikamo no mwana e lyo ayaubika mu matete mu mbali ya Mumana wa Naelo. 4 Lelo nkashi+ ya uyu mwana aiminine akatalamukila pa kuti amone ifyali no kucitikila umwana.

5 Ilyo umwana mwanakashi wa kwa Farao aile ku Mumana wa Naelo mu kowa, ababomfi bakwe abanakashi bale-endela mu mbali ya Mumana wa Naelo. Lyena amwene umuseke mu matete. Ilyo line fye atumine umubomfi wakwe umukashana ukuyabuula umuseke.+ 6 Ilyo akupukwilepo, amwene umwana umwaume alelila. Alimumfwilile uluse, lelo atile: “Uyu mwana wa baHebere.” 7 Lyena nkashi ya uyu mwana aebele umwana mwanakashi wa kwa Farao ati: “Bushe njemwitila umwanakashi umuHebere uuleonsha pa kuti alemonseshako umwana?” 8 Umwana mwanakashi wa kwa Farao amwebele ati: “Kabiye!” Ilyo line fye umukashana aileita nyina+ wa mwana. 9 E lyo umwana mwanakashi wa kwa Farao amwebele ati: “Senda umwana uyu, uleng’onseshako, ndi no kukulipila.” Awe umwanakashi asendele umwana kabili alemonsha. 10 Ilyo umwana akulile, amutwele ku mwana mwanakashi wa kwa Farao, kabili aishileba umwana wakwe.+ Amwinike ati Mose* pantu atile: “Ni co namufumishe mu menshi.”+

11 Nomba muli shilya nshiku, ilyo Mose akulile,* aile kuli bamunyina pa kuti amone ifisendo fyafina ifyo balesenda,+ kabili amwene umwina Egupti aleuma umuHebere, umo pali bamunyina. 12 E ico aloleshe uku no ku kabili ilyo amwene ukuti takwali nangu umo, aipeye umwina Egupti kabili amushiikile mu mucanga.+

13 Lelo ilyo aileko ubushiku bwakonkelepo, amwene abaHebere babili balelwa. E lyo aeba uwalufyenye ati: “Cinshi uleumina munonko?”+ 14 Na o atile: “Nani akusonta ukuba intungulushi kabili kapingula pali ifwe? Bushe ulefwaya ukunjipaya nga filya waipeye umwina Egupti?”+ E ico Mose alyumfwile umwenso kabili alandile ati: “Kanshi ico nacitile nacishibikwa!”

15 Lyena Farao alyumfwile ili ilyashi, kabili afwaile ukwipaya Mose; lelo Mose alifulumwike aya na ku calo ca Midiani,+ kabili aikele mupepi ne cishima ico asangile. 16 Nomba shimapepo wa ku Midiani+ akwete abana abanakashi 7, kabili baile ku kutapa amenshi no kutapila mu mifoolo pa kuti banweshe umukuni wa kwa shibo. 17 Lelo bakacema balishile no kubatamfya nge fyo balecita lyonse. Ilyo line Mose alimine ku kupokolola abanakashi kabili alibanweseeshe no mukuni. 18 Ilyo bafikile ku ng’anda kuli shibo Reuele,*+ alipapile kabili abepwishe ati: “Cinshi lelo mwabwelela bwangu?” 19 Nabo bamwaswike abati: “Kwaciba umwina Egupti+ uwacitupokolola kuli bakacema kabili acitutapila na menshi, anwesha no mukuni.” 20 Na o aebele abana bakwe abanakashi ati: “Ali kwi? Cinshi ico mumushiliile? Kamwiteni, ese tuliile pamo nankwe.” 21 Pa numa Mose alisumiine ukwikala na ulya muntu, kabili amupeele Sipora+ umwana wakwe umwanakashi pa kuti abe umukashi wakwe. 22 Mu kupita kwa nshita afyele umwana umwaume kabili Mose amwinike ati Gershomu,*+ pantu atile: “Nomba ndi mulebeshi muli cino calo.”+

23 Ilyo papitile inshita iikalamba,* imfumu ya Egupti yalifwile,+ lelo abena Israele balitwalilile ukuteta pa mulandu wa busha kabili balelilishika, kabili inkuuta yabo pa mulandu wa busha, yaleya kuli Lesa wa cine.+ 24 Lesa asukile aumfwa ukuteta kwabo+ kabili alicitilepo cimo pa kuti afikilishe icipangano ico apangene na Abrahamu, Isaki, na Yakobo.+ 25 E ico Lesa aloleshe pa bena Israele, kabili alimwene ifyo balecula.

3 Mose aishileba kacema wa mukuni wa kwa shifyala Yetro,+ shimapepo wa ku Midiani. Ilyo aletungulula umukuni ukulola ku masamba ya matololo, asukile afika ku lupili lwa kwa Lesa wa cine, ku Horebu.+ 2 Lyena malaika wa kwa Yehova aishile kuli ena mu lubingu lwa mulilo mu kati ka cimpusa ca myunga.+ Ilyo alelolekesha, amwene icimpusa ca myunga cilebilima, lelo tacalepya. 3 E ico Mose atile: “Nalayako njemone ici cintu cakupapusha pa kuti njishibe ico ici icimpusa cishilepiila.” 4 Ilyo Yehova amwene ukuti aya mu kucimona, abilikishe mu cimpusa ca myunga ati: “Mose! Mose!” na o ayaswike ati: “Mukwai.” 5 Lyena amwebele ati: “Wipalama kuno. Fuula indyato shobe, pantu umushili wimininepo wa mushilo.”

6 Amwebele no kuti: “Nine Lesa wa kwa wiso, Lesa wa kwa Abrahamu,+ Lesa wa kwa Isaki,+ kabili Lesa wa kwa Yakobo.”+ Awe Mose e pa kufisa icinso cakwe, pantu alitiinine ukulolesha Lesa wa cine. 7 Yehova alandile no kuti: “Nimona ifyo abantu bandi balebacusha mu Egupti, kabili ning’umfwa ukulilishika kwabo pa mulandu wa babapatikisha ukubomba; ninjishiba ifyo bakalipwa.+ 8 Ndeya mu kubapokolola ku bena Egupti+ kabili ndeyabafumya muli cilya calo no kubatwala ku calo icisuma kabili icikalamba, icalo umwaba umukaka no buci,+ umwikala abena Kanaani, abena Hiti, abena Amore, abena Perisi, abena Hibi, na bena Yebusi.+ 9 Cine cine! Ning’umfwa ukulilishika kwa bena Israele, kabili nimona ne fyo abena Egupti balebacululusha.+ 10 Nomba umfwa, nalakutuma kuli Farao, kabili ukayafumya abantu bandi abena Israele mu Egupti.”+

11 Lelo Mose aebele Lesa wa cine ati: “Nine nani uwa kuya kuli Farao no kuyafumya abena Israele mu Egupti?” 12 Na o atile: “Nkaba na iwe,+ kabili ici e cishibilo ca kuti nine nkutumine: Ilyo ukafumya aba bantu mu Egupti, mukalabombela* ne Lesa wa cine pali ulu ulupili.”+

13 Lelo Mose aipwishe Lesa wa cine ati: “Nga ca kuti naya ku bena Israele nabeba no kuti, ‘Lesa wa fikolwe fyenu nantuma kuli imwe,’ e lyo banjipusha abati, ‘Nani ishina lyakwe?’+ Nkabasuke shani?” 14 E ico Lesa aebele Mose ati: “Nkaba uo Nkafwaya Ukuba.”*+ Kabili alandile no kuti: “Ifi e fyo ukebe abena Israele, ‘Nkaba nantuma kuli imwe.’”+ 15 Lyena Lesa aebele Mose na kabili ati:

“Ifi e fyo ukebe abena Israele auti, ‘Yehova Lesa wa fikolwe fyenu, Lesa wa kwa Abrahamu,+ Lesa wa kwa Isaki,+ kabili Lesa wa kwa Yakobo,+ e wantuma kuli imwe.’ Ili e shina lyandi umuyayaya,+ kabili aba mu nkulo shonse bakalanjibukishisha kuli ili ishina. 16 Nomba kabiye, uyelonganya abakalamba ba mu Israele kabili uyebeba auti, ‘Yehova Lesa wa fikolwe fyenu namoneka kuli ine, Lesa wa kwa Abrahamu, Isaki, na Yakobo, kabili anjebele ati: “Nimona ifyo abena Egupti balecita kuli imwe.+ 17 E ico ndeti, nalamulubula ku bena Egupti abamucusha+ kabili ndemutwala ku calo ca bena Kanaani, ica bena Hiti, ica bena Amore,+ ica bena Perisi, ica bena Hibi, ne ca bena Yebusi,+ icalo umwaba umukaka no buci.”’+

18 “Nangu cibe shani bakomfwa ifyo ukabeba,+ kabili ukaye na bakalamba ba bena Israele ku mfumu ya Egupti, no kuyeba ati: ‘Yehova Lesa wa baHebere+ nalanda na ifwe. E ico nomba lekeni tuye ulwendo lwa nshiku shitatu mu matololo pa kuti tukayetuulila Yehova Lesa wesu ilambo.’+ 19 Lelo ninjishiba ukuti imfumu ya Egupti tayakamuleke mukaye kano fye ukuboko kwa maka kwaipatikisha.+ 20 E ico nkatambulula ukuboko kwandi no kuumina Egupti ku fipesha amano fyandi fyonse ifyo nkacita muli ena, lyena akaleka mukaye.+ 21 Kabili nkalenga aba bantu bakatemwikwe ku bena Egupti, kabili ilyo mukalaya, tamwakaye minwe nkutwa.+ 22 Cila mwanakashi akalombe umwina mupalamano no mwanakashi uwikala mu ng’anda yakwe ifibekobeko fya silfere ne fya golde ne fya kufwala, kabili mukafwike abana benu abaume na bana benu abanakashi; kabili mukapoka ifyuma fya bena Egupti.”+

4 Lelo Mose atile: “Nkacite shani nga ca kuti bakaana ukuncetekela kabili bakaana no kumfwa ifyo nkabeba?+ Pantu bakatila, ‘Yehova tamoneke kuli iwe.’” 2 E lyo Yehova amwipwishe ati: “Cinshi cili mu minwe yobe?” Na o ayaswike ati: “Ni nkonto.” 3 Lyena amwebele ati: “Ipoose panshi.” Awe apoosele inkonto panshi, nayo yasangwike insoka;+ kabili Mose alifulumwike. 4 Yehova nomba aebele Mose ati: “Tambalika ukuboko kobe uikate ku mucila.” Awe atambalike ukuboko kwakwe no kuikata ku mucila, kabili yasangwike inkonto mu minwe yakwe. 5 Lyena Lesa atile: “Ukacite ifi pa kuti bakasumine ukuti Yehova Lesa wa fikolwe fyabo, Lesa wa kwa Abrahamu, Lesa wa kwa Isaki, kabili Lesa wa kwa Yakobo,+ alimoneke kuli iwe.”+

6 Yehova abwekeshepo ukumweba ati: “Shi bika ukuboko kobe mu ca kufwala, pa cifuba cobe.” Awe abikile ukuboko kwakwe mu ca kufwala cakwe. Ilyo akufumishe, ku kuboko kwakwe kwali ifibashi kabili kwabuutile na tuutu!+ 7 Lyena amwebele ati: “Bwesesha ukuboko kobe mu ca kufwala, pa cifuba cobe.” Awe abweseeshe ukuboko kwakwe mu ca kufwala cakwe. Ilyo akufumishe mu ca kufwala cakwe, kwalipolele kabili kwali fye ngo mubili onse! 8 Amwebele no kuti: “Nga ca kuti tabakakucetekele nelyo nga tabakasumine icipesha amano ca kubalilapo, nangu cikabe shani bakasumina icikakonkapo.+ 9 Nga bakakaana ukusumina ifi fipesha amano fibili kabili nga bakakaana ukukumfwa, ukatape amenshi mu Mumana wa Naelo no kuyetila pa mushili apauma, kabili amenshi ayo ukatapa mu Mumana wa Naelo yakasanguka umulopa pa mushili apauma.”+

10 Mose nomba aebele Yehova ati: “Iye mwe Yehova, ine nshilanda bwino ukutula fye na kale, nangu fye nili line mulelanda no mubomfi wenu, pantu ntamantama* fye pa kulanda, nalifina ululimi.”+ 11 Yehova amwipwishe ati: “Nani apeele umuntu akanwa, nelyo nani alenga umuntu aba cibulu, aba nkomamatwi, alemona bwino, nelyo aba impofu? Bushe te ine, ne Yehova? 12 E ico nomba kabiye, nkalakwafwa ilyo ukalalanda* kabili nkalakweba* ifya kulanda.”+ 13 Lelo atile: “Iye mwe Yehova, shi tumeni fye umbi, onse uo mulefwaya mwe bene.” 14 E lyo Yehova akalipiile Mose, kabili amwebele ati: “Inga Aarone+ munonko umwina Lebi? Nalishiba ukuti alalanda bwino sana. Kabili ali mu nshila aleisa mu ku kukumanya. Ilyo akakumona, akasekelela.*+ 15 E ico ukalande nankwe kabili ukamwebe ifya kulanda,+ na ine nkalamwafwa ilyo mukalalanda,+ kabili nkalamweba ifya kucita. 16 Akalakulandilako ku bantu, kabili iwe ukaba nga Lesa kuli ena.*+ 17 Kabili ukasende iyi nkonto mu minwe yobe pa kuti ukalecitilako ifipesha amano.”+

18 E ico Mose abweleele kuli Yetro shifyala+ kabili amwebele ati: “Mukwai ndefwaya ukubwelelamo kuli bamunyinane ababa mu Egupti pa kuti nkayemona nga bacili no mweo.” Yetro aebele Mose ati: “Wende umutende.” 19 Ilyo Mose ashilafuma mu Midiani, Yehova amwebele ati: “Bwelela ku Egupti, pantu bonse abalefwaya ukukwipaya* balifwa.”+

20 Lyena Mose asendele umukashi wakwe na bana bakwe abaume, abaninika na pa mpunda, kabili abweleele ku calo ca Egupti. Kabili Mose asendele inkonto ya kwa Lesa wa cine mu minwe yakwe. 21 Kabili Yehova aebele Mose ati: “Ilyo ukafika ku Egupti, ukacite ifipesha amano fyonse kuli Farao ifyo nkupeele amaka ya kucita.+ Lelo nkaleka umutima wakwe ukatalame,+ kabili takaleke abantu bakaye.+ 22 Ukebe Farao auti, ‘Yehova atile: “Israele mwana wandi umwaume, libeli lyandi.+ 23 Ndekweba nati, Leka umwana wandi umwaume aye pa kuti alemombela. Lelo nga wakaana ukumuleka, nkepaya umwana obe umwaume, ibeli lyobe.”’”+

24 Nomba ilyo afikile pa cifulo ca kutuushishapo, Yehova+ alimukumenye kabili alefwaya ukumwipaya.+ 25 Sipora+ asukile abuula ilibwe ilyakosa kabili ilyatwa no kusembulula umwana wakwe kabili alengele inkanda yakumya ku makasa yakwe e lyo atile: “Pantu uli shibwinga wa mulopa kuli ine.” 26 E ico alimulekele. E lyo Sipora atile, “uli shibwinga wa mulopa,” pa mulandu wa kusembulula.

27 Yehova nomba aebele Aarone ati: “Kabiye ukumanye Mose mu matololo.”+ E ico alile kabili akumanine nankwe pa lupili lwa kwa Lesa wa cine+ kabili alimutomwene. 28 Awe Mose aebele Aarone fyonse ifyo Yehova+ amwebele, kabili alimwebele ne fipesha amano fyonse ifyo amwebele ukucita.+ 29 Pa numa Mose na Aarone bailelonganika abakalamba bonse aba bena Israele.+ 30 Aarone alibebele fyonse ifyo Yehova aebele Mose, kabili Mose acitile ifipesha amano+ pa menso ya bantu. 31 Lyena abantu balicetekele Mose.+ Ilyo baumfwile ukuti Yehova ali no kwafwa abena Israele+ no kuti alimwene ifyo balecula,+ balikonteme, bawa no bukupeme.

5 Pa numa Mose na Aarone baile kuli Farao kabili bamwebele abati: “Yehova, Lesa wa kwa Israele atila, ‘Leka abantu bandi baye pa kuti bakayempangila umutebeto mu matololo.’” 2 Lelo Farao atile: “Nani uyo wine Yehova,+ uwa kuti ng’umfwe ishiwi lyakwe no kuleka Israele aye?+ Uyo Yehova ine nshamwishiba nakalya, kabili nshaleke Israele aye.”+ 3 Lelo balandile abati: “Lesa wa baHebere nalanda na ifwe. Shi lekeni tuye mu matololo ulwendo lwa nshiku shitatu, tuyetuulila Yehova Lesa wesu ilambo;+ epali atwipaya ku bulwele nelyo ku lupanga.” 4 Imfumu ya Egupti yabepwishe aiti: “Cinshi ico iwe Mose na Aarone mulefwaila ukuti abantu baleke ukubomba imilimo? Bweleleni ku mulimo* wenu!”+ 5 Kabili Farao abebele no kuti: “Moneni abantu ubwingi abalebomba! Mulefwaya baleke ukubomba?”

6 Bulya bwine bushiku, Farao aebele abalepatikisha abantu ukubomba na bakapitao babo ati: 7 “Muleke ukupeela abantu imisungu ya ngano iya kutamina injelwa.+ Mulebaleka baleya mu kuifwaila abene. 8 Lelo impendwa ya njelwa isho bafwile ukulatama ifwile fye ukuba imo ine nge yo baletama kale. Mwibacefeshako iyo, pantu banang’ani. E co balepamfisha abati, ‘Tulefwaya ukuya, tulefwaya ukuyatuulila Lesa wesu ilambo!’ 9 Bapeeleni imilimo na imbi pa kuti belakwata inshita ya kulakutika ku fya bufi.”

10 E ico abalepatikisha abantu ukubomba+ na bakapitao babo baile ku bantu no kubeba abati: “Farao atila, ‘Nomba naleka ukumupeela imisungu ya ngano. 11 Kabiyeni muifwaile mwe bene konse uko mwalaisanga, lelo impendwa ya njelwa yena nshacefyeko nakalya.’” 12 Awe abantu basalanganine mu calo conse ica Egupti mu kufwaya impimbili sha kupangila imisungu ya kutamina injelwa. 13 Kabili abalebapatikisha ukubomba balebacincisha abati: “Cila muntu afwile ukupwisha umulimo wakwe uwa cila bushiku nga filya fine mwalebomba ilyo balemupeela imisungu ya ngano.” 14 Na kabili abalepatikisha abantu ukubomba, balyumine+ bakapitao ba bena Israele abo basontele ukwangalila abena Israele banabo. Babepwishe abati: “Cinshi mailo mushakumanishishe impendwa ya njelwa iyo bamupimina? Na lelo tamukumanishe.”

15 E lyo bakapitao ba bena Israele baileilishanya kuli Farao abati: “Cinshi muletucitila ifi fwe babomfi benu? 16 Fwe babomfi benu tabaletupeela imisungu ya kutamina injelwa, lelo baletweba abati, ‘Tameni injelwa!’ Kabili baletuuma nangu ca kuti abantu benu e balufyanya.” 17 Lelo Farao abebele ati: “Mulecita fye ubunang’ani, mwe banang’ani mwe!+ E co mulelandila amuti, ‘Tulefwaya ukuya, tulefwaya ukuyatuulila Yehova ilambo.’+ 18 E ico nomba bwelelenimo mu kubomba! Tabakulamupeela imisungu ya kutamina injelwa, lelo mufwile ukulatama injelwa shilya shine bamupimina.”

19 E lyo bakapitao ba bena Israele bamwene ukuti ifintu fyalibabipiile pantu babebele ukuti: “Tamufwile ukucefyako impendwa ya njelwa bamweba ukutama cila bushiku.” 20 Ilyo bafumine kuli Farao basangile Mose na Aarone nabeminina balebalolela. 21 Ilyo babamwene fye, babebele abati: “Shi Yehova aloleshe pa fyo mucitile kabili amupingule, pantu namulenga Farao na babomfi bakwe batupata* nga nshi kabili namubapeela ulupanga pa kuti batwipaye.”+ 22 E lyo Mose apepele kuli Yehova ati: “Mwe Yehova, cinshi mwalekela aba bantu balecula? Cinshi mwantumina? 23 Ukutula apo nailelandila na Farao mwi shina lyenu,+ alacusha sana aba bantu,+ lelo tamwacitapo nangu cimo pa kupokolola abantu benu.”+

6 E ico Yehova aebele Mose ati: “Nomba uli no kumona ico nkacita Farao.+ Ukuboko kwandi ukwa maka kukalenga akabaleke bakaye, kabili ukuboko kwandi ukwakosa kukamupatikisha ukubafumya mu calo cakwe.”+

2 Lyena Lesa aebele Mose ati: “Nine Yehova. 3 Ilyo nalemoneka kuli Abrahamu, kuli Isaki, na kuli Yakobo, baishibe ukuti nine Lesa Wa Maka Yonse,+ lelo nshalengele baishiba ukuti Yehova+ e shina lyandi. 4 Na kabili napangene nabo icipangano ca kubapeela icalo ca Kanaani, ico balimo abalebeshi.+ 5 Nomba ning’umfwa ukulilishika kwa bena Israele, abo abena Egupti bateka ubusha, kabili naibukisha ne cipangano candi.+

6 “E ico eba abena Israele auti, ‘Nine Yehova, kabili ndi no kumulubula mu busha mu Egupti kabili nkamupokolola ku bamuteka ubusha,+ kabili nkamulubwila ku kuboko kwa maka kabili nkabakanda icine cine.+ 7 Kabili mukaba abantu bandi, na ine nkaba Lesa wenu,+ kabili mukeshiba ukuti nine Yehova Lesa wenu uulemufumya mu busha ubo abena Egupti bamuteka. 8 Nkamutwala ku calo ico nalapile* ukuti nkapeela Abrahamu, Isaki, na Yakobo; kabili nkamupeela ici icalo pa kuti cikabe icenu.+ Nine Yehova.’”+

9 Pa numa Mose aebele abena Israele aya mashiwi, lelo tabamucetekeele pa mulandu wa kuti balifuupwilwe kabili balebacusha sana pantu bali basha.+

10 E lyo Yehova aebele Mose ati: 11 “Kabiye kuli Farao, imfumu ya Egupti, umwebe ukuti aleke abena Israele bafume mu calo cakwe.” 12 Lelo Mose aebele Yehova ati: “Moneni! Apo abena Israele tabang’umfwa,+ bushe Farao ena akakutika kuli ine, ne ushilanda bwino?”*+ 13 Lelo Yehova alibwekeshepo ukweba Mose na Aarone ifyo balingile ukweba abena Israele na Farao, imfumu ya Egupti, pa kuti afumye abena Israele mu calo ca Egupti.

14 Aba e bakalamba ba mikowa ya bena Israele: Abana baume ba kwa Rubene ibeli lya kwa Israele,+ bali ni Hanoke, Palu, Hesrone na Karmi.+ Aba batuntwike muli Rubene.

15 Abana ba kwa Simeone bali ni Yemuele, Yamini, Ohadi, Yakini, Sohari na Shauli umwana mwaume wa mwanakashi umwina Kanaani.+ Aba batuntwike muli Simeone.

16 Aya e mashina ya bana baume ba kwa Lebi,+ abo indupwa sha bena Lebi shatuntwikemo: Gershone, Kohati na Merari.+ Kabili imyaka Lebi ali no mweo yali 137.

17 Abana baume ba kwa Gershone bali ni Libna na Shimei, ukulingana ne ndupwa batuntwikemo.+

18 Abana baume ba kwa Kohati bali ni Amramu, Isari, Hebrone na Usiele.+ Kohati aikele imyaka 133.

19 Abana baume ba kwa Merari bali ni Maali na Mushi.

Ishi e ndupwa sha bena Lebi, ukulingana ne ndupwa isho batuntwikemo.+

20 Nomba Amramu aupile Yokebede nkashi ya kwa wishi+ kabili afyelemo Aarone na Mose.+ Amramu aikele imyaka 137.

21 Abana baume ba kwa Isari bali ni Kora,+ Nefege na Sikri.

22 Abana baume ba kwa Usiele bali ni Mishaele, Elsafani+ na Sitri.

23 Nomba Aarone aupile Elisheba umwana mwanakashi wa kwa Aminadabu, nkashi ya kwa Naashone.+ Afyelemo Nadabu, Abihu, Eleasari na Itamari.+

24 Abana baume ba kwa Kora bali ni Asiri, Elkana na Abiasafi.+ Ishi e ndupwa isho abena Kora+ batuntwikemo.

25 Eleasari,+ umwana mwaume wa kwa Aarone, aupile umo pa bana banakashi ba kwa Putiele, kabili afyelemo Finehasi.+

Aba e bakalamba ba mu mukowa wa bena Lebi, ukulingana ne ndupwa isho batuntwikemo.+

26 Yehova aebele Aarone na Mose ati: “Fumyeni abena Israele mu calo ca Egupti mu mabumba mabumba.”+ 27 Mose na Aarone+ e balandile na Farao imfumu ya Egupti, pa kuti afumye abena Israele mu Egupti.

28 Ubushiku Yehova alandile na Mose mu calo ca Egupti, 29 Yehova aebele Mose ati: “Nine Yehova. Eba Farao imfumu ya Egupti fyonse ifyo ndekweba.” 30 Lyena Mose aebele Yehova ati: “Moneni! Nshilanda bwino,* e ico bushe Farao akakutika kuli ine?”+

7 Lyena Yehova aebele Mose ati: “Mona, ninenga waba nga Lesa* kuli Farao, kabili Aarone munonko akaba kasesema obe.+ 2 Iwe ukale-eba Aarone fyonse ifyo nakulakweba, kabili munonko Aarone e ukalalanda na Farao, kabili Farao akaleka abena Israele bakafume mu calo cakwe. 3 Ine nkaleka umutima wa kwa Farao ukatalame,+ kabili nkafusha ifishibilo fyandi ne fipesha amano fyandi mu calo ca Egupti.+ 4 Lelo Farao takakutike kuli imwe, kabili nkatambalika ukuboko kwandi pali Egupti no kufumya amabumba yandi, abantu bandi, abena Israele, mu calo ca Egupti ilyo nkakanda abena Egupti icine cine.+ 5 Kabili abena Egupti bakeshiba ukuti nine Yehova+ ilyo nkatambalika ukuboko kwandi pali Egupti, kabili nkafumya abena Israele muli bena.” 6 Mose na Aarone balicitile ifyo Yehova abebele. Bacitile filya fine fye. 7 Mose ali ne myaka 80, kabili Aarone ali ne myaka 83 ilyo balandile na Farao.+

8 Yehova nomba aebele Mose na Aarone ati: 9 “Farao nga amweba ati, ‘Citeni icipesha amano,’ ukebe Aarone auti, ‘Poosa inkonto yobe panshi pa cinso ca kwa Farao.’ Nayo ikasanguka insoka iikalamba.”+ 10 E ico Mose na Aarone baile kuli Farao kabili bacitile filya fine fye Yehova abebele. Aarone apoosele inkonto yakwe panshi pa cinso ca kwa Farao na babomfi bakwe, kabili yasangwike insoka iikalamba. 11 Lelo Farao na o aitile aba mano na ba finjelengwe, kabili bashimapepo ba finjelengwe aba mu Egupti+ nabo bacitile cimo cine.+ 12 Cila muntu apoosele inkonto yakwe panshi, nasho shasangwike insoka ishikalamba; lelo insoka* ya kwa Aarone yaminine insoka shabo. 13 Na lyo line umutima wa kwa Farao wali fye uwatalama,+ kabili takutike kuli bena, nga filya fine fye Yehova alandile.

14 Lyena Yehova aebele Mose ati: “Umutima wa kwa Farao nautalama.+ Nakaana ukuleka abantu baye. 15 Ukaye kuli Farao ulucelo. Mona! Akaya ku menshi! Kabili ukeminine mu lulamba lwa Mumana wa Naelo e mo ukamonanine nankwe; kabili ukasende inkonto iyasangwike insoka.+ 16 E lyo ukamwebe auti, ‘Yehova Lesa wa baHebere nantuma kuli iwe,+ kabili atile: “Leka abantu bandi baye pa kuti bakamombele mu matololo,” lelo iwe walikaana ukushinta na lelo. 17 Yehova atila: “Ifyo nalacita fyalalenga wishibe ukuti nine Yehova.+ Mona nalauma amenshi ya mu Mumana wa Naelo ku nkonto yandi, nayo yala-aluka umulopa. 18 Kabili isabi lya mu Mumana wa Naelo lyalafwa, kabili uyu Mumana walanunka piipi ica kuti abena Egupti tabafwaye nangu panono ukunwa amenshi ya mu Mumana wa Naelo.”’”

19 Lyena Yehova aebele Mose ati: “Eba Aarone auti, ‘Ikata inkonto yobe kabili tambalika ukuboko kobe pa menshi ya mu Egupti,+ pa mimana, pa menshi ya mu mifoolo,* pa menshi ya mu malungu,+ na pa menshi yonse ayo basungila mu fishiba, pa kuti yaluke umulopa.’ Mu calo conse ica Egupti, na mu fipe fya kusungilamo amenshi ifya fimuti ne fya mabwe mukaba umulopa.” 20 Ilyo line fye Mose na Aarone bacitile ifyo Yehova abebele. Aarone aimishe inkonto no kuuma pa menshi ya mu Mumana wa Naelo ninshi Farao na babomfi bakwe balemonako, kabili amenshi yonse aya mu mumana ya-alwike umulopa.+ 21 Ne sabi lyali mu mumana lyalifwile,+ kabili umumana watendeke ukununka piipi, kabili abena Egupti balifililwe ukunwa amenshi mu Mumana wa Naelo,+ kabili mu calo conse ica Egupti mwali umulopa.

22 Lelo bashimapepo ba finjelengwe aba mu Egupti nabo bacitile cimo cine ku finjelengwe fyabo,+ ne ci calengele Farao atwalilile fye ukutalamika umutima wakwe, kabili takutike kuli Mose na Aarone, nga filya fine fye Yehova alandile.+ 23 Lyena Farao abweleele ku ng’anda yakwe, kabili ifi ifyacitike nafyo tafyalengele ayaluka. 24 E ico abena Egupti bonse baleimba mu lulamba lwa Mumana wa Naelo pa kuti basange amenshi ya kunwa, pantu balifililwe ukunwa amenshi ya mu Mumana wa Naelo. 25 Yehova ayalwile amenshi ya mu Mumana wa Naelo yaba umulopa pa nshiku 7.

8 Lyena Yehova aebele Mose ati: “Kabiye kuli Farao kabili umwebe auti, ‘Yehova atila: “Leka abantu bandi baye pa kuti balemombela.+ 2 Nga watwalilila fye ukubakaanya ukuya, ndeleta bacula+ mu calo cobe conse. 3 Kabili mu Mumana wa Naelo mukaba bacula abengi nga nshi, kabili bakafuma mu mumana no kwingila mu ng’anda yobe, mu muputule obe uwa kulaalamo, bakanina pa busanshi bobe, bakengila mu mayanda ya babomfi bobe kabili bakaba pa bantu bobe, mu fitofu fya kupangilamo umukate, na mu fya kukashilamo umufuba fyobe.+ 4 Bacula bakesa pali iwe, pa bantu bobe, na pa babomfi bobe bonse.”’”

5 Pa numa Yehova aebele Mose ati: “Eba Aarone auti, ‘Tambalika ukuboko uko wikatiileko inkonto pa mimana, pa mifoolo iyafuma mu Mumana wa Naelo na pa malungu, pa kuti bacula bafume baye mu calo ca Egupti.’” 6 E ico Aarone atambalike ukuboko kwakwe pa menshi ya mu Egupti, kabili bacula batendeke ukufuma, balakupa ne calo ca Egupti. 7 Lelo bashimapepo ba finjelengwe nabo bacitile cimo cine ku finjelengwe fyabo, kabili balengele bacula bafuma baya na mu calo ca Egupti.+ 8 Lyena Farao aitile Mose na Aarone no kubeba ati: “Paapaateni kuli Yehova pa kuti afumye bacula pali ine na pa bantu bandi,+ pantu ndefwaya ukuleka abantu bayetuulila Yehova ilambo.” 9 E lyo Mose aebele Farao ati: “Mukwai nimwe mufwile ukunjeba ilyo ningamupaapaatilako pa kuti bacula bafume pali imwe, pa babomfi benu, pa bantu benu, na mu mayanda yenu. Bakashale fye mu Mumana wa Naelo.” 10 Farao atile: “Mailo.” Na o atile: “Cikaba ifyo fine mulefwaya pa kuti mukeshibe ukuti takwaba nangu umo uwaba nga Yehova Lesa wesu.+ 11 Bacula bakafuma pali imwe, mu mayanda yenu, pa babomfi benu, na pa bantu benu. Bakashala fye mu Mumana wa Naelo.”+

12 E ico Mose na Aarone bafumine pali Farao, kabili Mose apaapeete Yehova pa mulandu wa bacula abo aletele pali Farao.+ 13 Lyena Yehova alicitile ifyo Mose amupaapeete ukuti acite, kabili bacula batendeke ukufwa mu mayanda, mu mansa, na mu mpanga. 14 Batuulike bacula imiina iingi nga nshi, kabili icalo catendeke ukununka piipi. 15 Ilyo Farao amwene ukuti icinkunka capwa, atalamike umutima wakwe+ kabili taumfwilile Mose na Aarone, nga filya fine Yehova alandile.

16 Yehova nomba aebele Mose ati: “Eba Aarone auti, ‘Uma inkonto yobe pa mushili, kabili ulukungu lwalasanguka ifisumi* mu calo conse ica Egupti.’” 17 Kabili ifi fine e fyo bacitile. Aarone aumine inkonto yakwe pa mushili, kabili ifisumi fyaishile pa bantu na pa nama. Ulukungu lonse ulwa pa mushili lwasangwike ifisumi mu calo ca Egupti conse.+ 18 Bashimapepo ba finjelengwe baeseshe ukucita cimo cine ku finjelengwe fyabo,+ pa kuti nabo bapange ifisumi, lelo balifililwe. Kabili ifisumi fyaishile pa bantu na pa nama. 19 E ico bashimapepo ba finjelengwe baebele Farao abati: “Munwe wa kwa Lesa!”*+ Lelo Farao atwalilile ukutalamika umutima wakwe, kabili taumfwilile Mose na Aarone, nga filya fine Yehova alandile.

20 Lyena Yehova aebele Mose ati: “Ukacelele kuli Farao kabili ukayeiminina pa nshila pa kuti ilyo akalaya ku mumana ukamwebe auti, ‘Yehova alandile ati: “Leka abantu bandi baye mu kumombela. 21 Lelo nga tawabaleke baye, nkatuma ifipobe pali iwe, pa babomfi bobe, pa bantu bobe, na mu mayanda yenu; kabili mu mayanda ya bena Egupti mukesula ifipobe, na panshi ponse pakaba ifipobe. 22 Muli bulya bushiku nkacingilila icalo ca Goshene ico abantu bandi bekalamo. Tamwakabe icipobe nangu cimo,+ kabili ici cikalenga ukeshibe ukuti ne Yehova ndi mu calo.+ 23 Kabili nkapaatulula abantu bandi na bantu bobe. Ici icipesha amano cikacitika mailo.”’”

24 Kabili ifi fine e fyo Yehova acitile. Ifipobe ifingi nga nshi fyatendeke ukwingila mu ng’anda ya kwa Farao na mu mayanda ya babomfi bakwe, kabili fyali mu calo conse ica Egupti.+ Abantu baliculile sana pa mulandu wa fipobe.+ 25 Farao asukile aita Mose na Aarone no kubeba ati: “Kabiyeni, katuulileni Lesa wenu ilambo muli cino cine calo.” 26 Lelo Mose atile: “Te kuti tucite ifyo, pantu ilambo twingatuulila Yehova Lesa wesu, abena Egupti kuti balimona kwati ca bunani. Nga ca kuti ilambo twatuula lyaba ca bunani ku bena Egupti,+ kabili twalituulila pa menso yabo, bushe te kuti batupoole amabwe? 27 Tukaya ulwendo lwa nshiku shitatu mu matololo, kabili mulya e mo tukayatuulila Yehova Lesa wesu ilambo nga filya fine fye atwebele.”+

28 E lyo Farao atile: “Nkamuleka mukayetuulila Yehova Lesa wenu ilambo mu matololo. Cikulu fye mwikaya ukutali sana. Mpaapaatilako kuli Lesa obe.”+ 29 Lyena Mose atile: “Nalaya kabili nalayapaapaata Yehova, mailo ifipobe fikafuma pali imwe mwe Farao, pa babomfi benu, na pa bantu benu. Lelo mwe Farao mwikabwekeshapo ukutubepa, mukakaane no kuleka abantu bandi bakayetuulila Yehova ilambo.”+ 30 Pa numa Mose alifumine pali Farao no kuyapaapaata Yehova.+ 31 E ico Yehova alicitile ifyo Mose amupaapeete ukuti acite, kabili ifipobe fyafumine pali Farao, pa babomfi bakwe, na pa bantu bakwe. Tapashele nangu cimo. 32 Lelo Farao alitalamike umutima wakwe na kabili, e ico talekele abantu baya.

9 E ico Yehova aebele Mose ati: “Kabiye kuli Farao kabili umwebe auti, ‘Yehova Lesa wa baHebere atila: “Leka abantu bandi baye pa kuti balemombela.+ 2 Lelo nga wakaana ukubaleka baye kabili watwalilila fye ukubalesha, 3 mona! ukuboko kwa kwa Yehova+ kuleisa pa fitekwa fyobe ifili mu mpanga. Pali bakabalwe, pa mpunda, pa ngamila, pa ng’ombe na pa mpaanga pakaba icikuko icabipa nga nshi.+ 4 Kabili Yehova akapaatulula ifitekwa fya kwa Israele ku fya bena Egupti, kabili pa fitekwa fya bena Israele tapakafwe nangu cimo.”’”+ 5 Kabili Yehova alibikile inshita cali no kucitikilapo. Atile: “Mailo ine ne Yehova nkacita ifi mu calo.”

6 Awe Yehova acitile ifi ubushiku bwakonkelepo, kabili ifitekwa fyonse ifya bena Egupti fyatendeke ukufwa,+ lelo pa fitekwa fya bena Israele tapafwile nangu cimo. 7 Ilyo Farao atumine abakuyamona, basangile ukuti pa fitekwa fya bena Israele tapafwile nangu fye cimo. Na lyo line, Farao atwalilile fye ukutalamika umutima wakwe, kabili talekele abantu baya.+

8 Lyena Yehova aebele Mose na Aarone ati: “Buuleni imile ya mo bocela injelwa,* mwisushe indupi shenu shibili, kabili Mose aipoose mu muulu ninshi Farao alemonako. 9 Nayo yalasanguka ulukungu pa calo conse ica Egupti, kabili yalalenga ifipute fitumbe abantu ne nama mu calo conse ica Egupti.”

10 E ico babuulile imile ya mu cibili no kuyaiminina pa cinso ca kwa Farao, e lyo Mose aipoosa mu muulu, kabili yalengele ifipute fyatumba abantu ne nama. 11 Bashimapepo ba finjelengwe balifililwe ukuyamonana na Mose pa mulandu wa fipute, pantu ifipute fyalitumbile pa mibili yabo na pa ya bena Egupti bonse.+ 12 Lelo Yehova alekele Farao atalamika umutima wakwe, kabili taumfwilile Mose na Aarone, nga filya fine Yehova aebele Mose.+

13 Lyena Yehova aebele Mose ati: “Ukacelele ukuya kuli Farao no kuyaiminina ku cinso cakwe, kabili ukamwebe auti, ‘Yehova Lesa wa baHebere atila: “Leka abantu bandi baye pa kuti balemombela. 14 Pantu uno muku ndetuma ifinkunka fyandi fyonse kuli iwe, ku babomfi bobe, na ku bantu bobe, pa kuti wishibe ukuti takwaba uwaba nga ine pano isonde ponse.+ 15 Pantu ino nshita nga nalitambulula ukuboko kwandi no kukuuma, no kuuma abantu bobe ku cikuko kabili nga nalikulofya pano isonde. 16 Lelo ico nakulekela ube no mweo ni pa kuti umone amaka yandi, na pa kuti ishina lyandi lishibikwe mu calo conse.+ 17 Bushe ucili uleituumika kabili taulefwaya ukuleka abantu bandi baye? 18 Mona, mailo nga ino ine nshita nkalosha imfula ya mabwe iikalamba, iishatala ailokapo mu calo ca Egupti ukutula apo catendekele ukushinta na lelo. 19 E ico nomba tuma aba kuyaeba ababomfi bobe ukuti babweshe ifitekwa fyobe fyonse na fyonse ifyo wakwata mu mpanga, bese bafingishe umwakuuba. Umuntu onse uukaba panse, imfula ya mabwe ikamwipaya, kabili inama yonse iishakabe umwakuuba ikafwa ku mfula ya mabwe.”’”

20 Ababomfi ba kwa Farao bonse abaumfwile ifyo Yehova alandile, balyangufyenye ukwingisha ababomfi babo ne fitekwa fyabo mu mayanda, 21 lelo bonse abashabikile amano ku fyo Yehova alandile balekele ababomfi babo ne fitekwa fyabo mu mpanga.

22 Nomba Yehova aebele Mose ati: “Imisha ukuboko kobe mu muulu, pa kuti imfula ya mabwe iloke pa calo ca Egupti conse,+ pa bantu ne nama na pa fimenwa fyonse ifya mu mpanga.”+ 23 E ico Mose asontele inkonto yakwe mu muulu, kabili Yehova atumine inkuba, imfula ya mabwe, no mulilo* walepona panshi, kabili Yehova atwalilile ukulosha imfula ya mabwe pa calo ca Egupti. 24 Kwali imfula ya mabwe ne nkuba yalebyasha kwati mulilo ilyo imfula ya mabwe yaleloka. Yali iikalamba nga nshi. Takwatalile akuba imfula ya musango uyu mu Egupti ukutula apo abantu batendekeele ukwikalamo.+ 25 Imfula ya mabwe yaonawile conse icali mu mpanga mu calo ca Egupti, abantu ne nama, ne fimenwa fyonse, kabili yawishishe ifimuti fyonse mu mpanga.+ 26 Mu Goshene fye umo abena Israele baleikala, e mushali imfula ya mabwe.+

27 E ico Farao atumine aba kuyaita Mose na Aarone kabili aishilebeba ati: “Nomba nasumina ukuti nimembuka. Yehova alilungama, lelo ine na bantu bandi twalilufyanya. 28 Paapaateni Yehova pa kuti ukupanta kwa nkuba ne mfula ya mabwe fileke. Nga fyaleka, nalamuleka muye, kabili tamwakokole.” 29 E ico Mose amwebele ati: “Nga nafuma fye mu musumba, nalayapepa kuli Yehova.* Inkuba yalaleka ukupanta, ne mfula ya mabwe nayo yalakalika pa kuti mwishibe ukuti isonde lya kwa Yehova.+ 30 Lelo ninjishiba ukuti nangu imfula ikalike, imwe na babomfi benu tamwatiine Yehova Lesa.”

31 Nomba kolokondwe* na barle fyalyonaike, pantu barle yalifumishe imitwe na kolokondwe yalifumishe intombo. 32 Lelo ingano e lyo ne ngano ishimoneka nge shapapa fyena tafyaonaike, pantu ninshi tafilapakula.* 33 Mose nomba afumine mu musumba umwali Farao kabili ailepepa kuli Yehova, e fyo no kupanta kwa nkuba ne mfula ya mabwe fyalekele ne mfula nayo yalikalike.+ 34 Ilyo Farao amwene ukuti imfula, ne mfula ya mabwe, no kupanta kwa nkuba fyaleka, alibembwike na kabili. Alekele umutima wakwe watalama,+ kabili e fyo na babomfi bakwe bacitile. 35 Kabili Farao atwalilile ukutalamika umutima wakwe. Talekele abena Israele baya, nga filya fine Yehova alandiile muli Mose.+

10 Lyena Yehova aebele Mose ati: “Kabiye kuli Farao, pantu nalileka umutima wakwe ne mitima ya babomfi bakwe italame+ pa kuti aimwene ifi ifipesha amano ifyo ncita,+ 2 na pa kuti ukashimikile abana bobe na beshikulu bobe ifyo nakanda abena Egupti e lyo ne fipesha amano ifyo nacita pali bena;+ kabili mukeshiba ukuti nine Yehova.”

3 E ico Mose na Aarone baile kuli Farao no kumweba abati: “Yehova Lesa wa baHebere atila, ‘Ukaleka lilali ukukaana ukuunakila?+ Leka abantu bandi baye pa kuti balemombela. 4 Pantu nga watwalilila ukukaanya abantu bandi ukuya, mailo nkaleta makanta mu calo cobe. 5 Kabili ikakupa umushili ica kuti tawakamoneke. Ikalya fyonse ifyo imfula ya mabwe ishaonawile, kabili ikalya ne fimuti fyenu fyonse ifilekula mu mpanga.+ 6 Mu mayanda yenu, mu mayanda ya babomfi benu bonse, na mu mayanda ya mu Egupti yonse mukesula makanta iya kuti bashinwe na bashikulwinwe tabatalile abaimonapo ukutula apo batampiile ukwikala muli ici calo ukushinta na lelo.’”+ Lyena alifumine apali Farao, aya no kuya.

7 E lyo ababomfi ba kwa Farao bamwebele abati: “Ni lilali uyu muntu akaleka ukutuletela amacushi?* Lekeni aba bantu baye pa kuti balebombela Yehova Lesa wabo. Bushe na nomba tamulaishiba ukuti icalo ca Egupti naconaika?” 8 E ico Farao atumine abakuyaita Mose na Aarone, kabili aishilebeba ati: “Kabiyeni, kabombeleni Yehova Lesa wenu. Lelo ni bani bakaya?” 9 E lyo Mose atile: “Tukaya na balumendo na bakashana, abakote besu, abana besu abaume, abana besu abanakashi, impaanga shesu, ne ng’ombe shesu,+ pantu tukayapangila Yehova umutebeto.”+ 10 E lyo abebele ati: “Nga nalaleka muye pamo na bana benu, ninshi cine cine Yehova aba na imwe!+ Nangu cibe shani pali icabipa ico mulepanga ukucita. 11 Nshamusuminishe bonse muye! Nalasuminisha fye mwe baume pantu nimwe mulefwaya ukuyabombela Yehova.” E lyo babatamfishe apali Farao.

12 Yehova nomba aebele Mose ati: “Tambalika ukuboko kobe pa calo ca Egupti pa kuti makanta ise pa calo ca Egupti no kulya ifimenwa fyonse pa calo, fyonse ifyo imfula ya mabwe ishaonawile.” 13 Ilyo line fye Mose asontele inkonto yakwe pa calo ca Egupti, kabili Yehova alengele umwela wa ku kabanga upuupe pa calo ca Egupti akasuba konse no bushiku bonse. Ilyo bwacele, umwela wa ku kabanga waletele makanta. 14 Kabili makanta yaishile pa calo conse ica Egupti kabili yali fye mpanga yonse mu Egupti.+ Makanta yalifulile nga nshi.+ Takwatalile akuba makanta iyafulile nge yi, kabili takwakabe iikafula nge yi. 15 Yakupile umushili onse uwa mu calo, ne calo califiitile kuli makanta; kabili yaile ilelya ifimenwa fyonse ifya mu calo ne fisabo fyonse ifya ku fimuti ifyo imfula ya mabwe ishaonawile; kabili ku fimuti nelyo ku fimenwa fya mu mpanga ifya mu calo conse ica Egupti takwashele ibula nangu limo.

16 E ico bwangu bwangu Farao aitile Mose na Aarone kabili abebele ati: “Nimembukila Yehova Lesa wenu kabili nimembukila na imwe bene. 17 Nomba shi njeleleni ulubembu lwandi umuku wa kulekeleshako, kabili paapaateni Yehova Lesa wenu pa kuti afumye pali ine ici cinkunka cabipa.” 18 E ico Mose afumine pali Farao no kuyapaapaata Yehova.+ 19 Lyena Yehova ayalwile umwela nomba walafumina ku masamba, wali uwakosa icine cine ica kuti waulwile makanta no kuyaipoosa muli Bemba Wakashika. Takwashele makanta nangu umo mu calo conse ica Egupti. 20 Lelo Yehova alekele Farao atalamika umutima wakwe,+ kabili talekele abena Israele baya.

21 Lyena Yehova aebele Mose ati: “Imisha ukuboko kobe mu muulu pa kuti pa calo ca Egupti pabe imfifi, imfifi iyafiita fititi.” 22 Ilyo line fye Mose aimishe ukuboko kwakwe mu muulu, kabili imfifi iyafiita fititi yaishile pa calo conse ica Egupti pa nshiku shitatu.+ 23 Abena Egupti tabalemona nangu cimo, kabili pa nshiku shitatu takwali nangu umo uwafumine apo aali; lelo ukwaleikala abena Israele bonse kwena kwali ulubuuto.+ 24 Lyena Farao aitile Mose no kumweba ati: “Kabiyeni, kabombeleni Yehova.+ Impaanga ne ng’ombe shenu shena mushishe. Nomba abana benu kuti mwabasenda.” 25 Lelo Mose alandile ati: “Mukatupeele* ne fya kutuulila Yehova Lesa wesu ilambo,+ kabili tukafituula kuli ena. 26 Tukasenda ne fitekwa fyesu. Tatwakashepo inama* nangu imo, pantu tukatuulapo shimo pa kupepa Yehova Lesa wesu, kabili tatwishibe ifyo tukatuula pa kupepa Yehova mpaka tukafike kulya.” 27 E ico Yehova alekele Farao atalamika umutima wakwe, kabili talekele baya.+ 28 Farao amwebele ati: “Fuma apa! Wikesha ukumona icinso candi na kabili, pantu ubushiku ukamona icinso candi ukafwa.” 29 E lyo Mose atile: “Nacibe ifyo fine mwalanda. Nshakabwekeshepo ukumona icinso cenu.”

11 Lyena Yehova aebele Mose ati: “Kushele icinkunka cimo ico nalaleta pali Farao na pali Egupti. Na pa numa akaleka mukaye,+ kabili akamupatikisha ukufuma mu calo.+ 2 Nomba eba abantu ukuti abaume na banakashi bonse bafwile ukulomba ifya silfere ne fya golde+ ku bena mupalamano babo.” 3 Kabili Yehova alengele abena Egupti batemwa abena Israele. Ababomfi ba kwa Farao na bantu mu calo ca Egupti nabo balicindike sana Mose.

4 Lyena Mose alandile ati: “Yehova atila, ‘Nalimo pa kati ka bushiku ndepita mu bena Egupti,+ 5 kabili amabeli yonse aya mu calo ca Egupti yalefwa,+ ukutampila pe beli lya kwa Farao, uwikele pa cipuna cakwe ica bufumu, ukufika na kwi beli lya mubomfi mwanakashi uulepela pe libwe lya kupelelako, na mabeli yonse aya fitekwa yalefwa.+ 6 Mu calo conse ica Egupti mukaba ukuloosha ukushatala akubamo, kabili takwakatale akubamo na kabili.+ 7 Lelo nangu fye ni mbwa tayakabose abena Israele, umuntu nelyo icitekwa, pa kuti mukeshibe ukuti ifyo Yehova engacita ku bena Egupti kuti fyapusana ne fyo engacita ku bena Israele.’+ 8 Kabili ababomfi benu bonse bakesa kuli ine no kuwa ubukupeme abati, ‘Kabiye na bantu bonse abakumfwila.’+ Lyena nkafuma nkaye.” E fyo Mose afumine pali Farao ninshi nakalipa icine cine.

9 E lyo Yehova aebele Mose ati: “Farao takamumfwile+ pa kuti ifipesha amano fyandi fikafule mu calo ca Egupti.”+ 10 Mose na Aarone bacitile ifipesha amano fyonse fi pa cinso ca kwa Farao,+ lelo Yehova alekele Farao atalamika umutima wakwe, kabili talekele abena Israele bafume mu calo cakwe.+

12 Yehova nomba aebele Mose na Aarone mu calo ca Egupti ati: 2 “Uno mweshi e ukaba mweshi wenu uwa kubalilapo mu mwaka.+ 3 Ebeni abena Israele bonse amuti, ‘Pa bushiku bwalenga 10 ubwa uno mweshi, cila muntu akalebuulila aba mu ng’anda ya kwa shibo impaanga+ imo, cila ng’anda impaanga imo. 4 Lelo nga ca kuti aba mu ng’anda imo impaanga yabakulila sana, bafwile ukwita abena mupalamano pa kuti baliile pamo nabo. Ilyo baleakana impaanga bafwile ukwakana ukulingana ne fyo cila muntu engalya. 5 Iyo impaanga ifwile ukuba iilume, iya mwaka umo, kabili iyabula akalema.+ Kuti mwabuula umwana wa mpaanga nelyo umwana wa mbushi. 6 Mufwile ukumusunga mpaka pa bushiku bwalenga 14 ubwa uno wine mweshi,+ kabili cila lupwa ulwa bena Israele lukamwipaye ilyo fye akasuba kawa.*+ 7 Bafwile ukushinga umulopa umo pa muulu wa mwinshi, e lyo na ku kulyo na ku kuso kwa mwinshi wa ng’anda iyo bakaliilamo.+

8 “‘Bafwile ukulya iyi inama pali ubu bwine bushiku mu nshita ya bushiku.+ Balingile ukuyoca kabili bafwile ukuiliila pamo no mukate uushatutumuka+ no musalu uwalula.+ 9 Tamufwile ukulya inama iibishi nelyo iya kufulumya, nangu iya kwipika, lelo mulingile ukuyoca kumo no mutwe, amolu, ne fya mu mala. 10 Tamufwile ukushako inama ica kuti yafika no lucelo, lelo nga kwaba iyashalako ukufika ulucelo mulingile ukuyoca.+ 11 Mukalelya ninshi namuikaka imishipi mu misana, namufwala indyato, namwikata ne nkonto; kabili mukalelya lubilo lubilo. Cakucilila ca kwa Yehova. 12 Pantu nalapita mu calo ca Egupti lelo ubushiku no kwipaya amabeli yonse mu calo ca Egupti, amabeli ya bantu na ya nama;+ kabili nkakanda tulesa tonse utwa mu Egupti.+ Nine Yehova. 13 Umulopa uleba icishibilo ca kwishibilako amayanda ayo mwalabamo; kabili nga namona umulopa, nakulamucilila, kabili tamwafwe ku cinkunka ilyo nalakanda icalo ca Egupti.+

14 “‘Muleibukisha buno bushiku, kabili mulepangila Yehova umutebeto pali ubu bushiku mu nkulo shenu shonse. Ici cipope ca muyayaya. 15 Mu nshiku 7 mwakulalya umukate uushatutumuka.+ Pa bushiku bwa ntanshi mulefumya mu mayanda yenu umufuba umuli icitutumushi, pantu onse uwalya icilimo icitutumushi muli ishi nshiku 7, afwile ukwipaiwa mu Israele. 16 Pa bushiku bwa ntanshi mukalelongana ukulongana kwa mushilo, na pa bwalenga 7 mukalelongana ukulongana na kumbi ukwa mushilo. Tamufwile ukubomba umulimo nangu umo muli ishi nshiku.+ Ico mwingacita fye kupekanya ifyo cila muntu engalya.

17 “‘Mulekwata Umutebeto wa Mukate Uushatutumuka,+ pantu buno bushiku nalafumya amabumba yenu mu calo ca Egupti. Kabili muleibukisha buno bushiku mu nkulo shenu shonse pantu ici cipope ca muyayaya. 18 Mu mweshi wa ntanshi, ukutendekela pa bushiku bwalenga 14 icungulo, ukufika pa bushiku bwalenga 21 ubwa uyo mweshi icungulo, mukalelya imikate iishatutumuka.+ 19 Mu mayanda yenu tamufwile ukuba umufuba uwatutumuka pa nshiku 7, pantu onse uwalya icatutumuka, nampo nga mwina fyalo nelyo nga mwana calo+ afwile ukwipaiwa pa kuti afume mu lukuta lwa bena Israele.+ 20 Tamulingile ukulalya conse icatutumuka. Mulelya umukate uushatutumuka mu mayanda yenu.’”

21 Ilyo line fye Mose aitile abakalamba bonse aba bena Israele+ no kubeba ati: “Kabiyeni kabulileni indupwa shenu abana ba mpaanga nelyo abana ba mbushi, kabili mubepaye pa kuti babe ilambo lya pa Cakucilila. 22 Lyena mulingile ukubuula icipo ca fimenwa fya husope no kucitumpika mu mulopa uuli mu mbale yafonka no kushinga umulopa pa muulu wa mwinshi, e lyo na ku kulyo na ku kuso ukwa mwinshi; kabili takuli nangu umo uufwile ukufumina panse mpaka ulucelo. 23 Nomba ilyo Yehova aleisa mu kupita mu calo pa kuti alofye abena Egupti kabili amona umulopa pa muulu wa mwinshi, e lyo na ku kulyo na ku kuso kwa mwinshi, Yehova aleisacilila uyo mwinshi, kabili taise aleke icinkunka cipaye abali mu mayanda yenu.+

24 “Imwe na bana benu muleibukisha ici Icakucilila pantu cipope ca muyayaya.+ 25 Kabili ilyo mukengila mu calo ico Yehova akamupeela nga filya fine amwebele, mukaleibukisha ici Icakucilila.+ 26 Kabili abana benu nga bamwipusha abati, ‘Bushe ifi mucita ni finshi?’+ 27 mukatile, ‘Lilambo lya Cakucilila ilyo tutuulila Yehova, uwacilile amayanda ya bena Israele mu Egupti ilyo aipeye abena Egupti, lelo taipeye aba mu mayanda yesu.’”

E lyo abantu bakonteme bawa no bukupeme. 28 E ico abena Israele balile, kabili balicitile ifyo Yehova aebele Mose na Aarone.+ Bacitile filya fine fye.

29 Lyena pa kati ka bushiku, Yehova aipeye amabeli yonse mu calo ca Egupti,+ ukutendekela pe beli lya kwa Farao uwali pa cipuna cakwe ica bufumu ukufika kwi beli lya musha uwali mu cifungo, na mabeli ya nama yonse.+ 30 Farao na babomfi bakwe bonse, kumo na bena Egupti bonse balibuukile ubushiku, kabili abena Egupti baleloosha nga nshi pantu takwali ing’anda umushali uwafwile.+ 31 Ilyo line fye Farao aitile Mose na Aarone+ ubushiku no kubeba ati: “Imeni, fumeni mu calo candi, imwe na bena Israele. Kabiyeni kabombeleni Yehova nga filya fine mwalandile.+ 32 Musende ne mpaanga shenu ne ng’ombe shenu muleya, nga filya fine mwalandile.+ Lelo na ine mufwile ukumpaala.”

33 Kabili abena Egupti batendeke ukucincisha abantu pa kuti bafume bwangu+ mu calo pantu baleti, “cimo fye no kuti bonse natufwa!”+ 34 E ico abantu basendele umufuba wabo ninshi taulatutumuka. Basendele ne fya kukashilamo umufuba pa mabeya yabo, ninshi nabafikaka mu nsalu. 35 Abena Israele balicitile ifyo Mose abebele. Balombele abena Egupti ifibekobeko fya silfere ne fya golde ne fya kufwala.+ 36 Yehova alengele abena Egupti batemwa abena Israele, e ico balibapeele ifyo balombele, kabili balisendele ifipe fya bena Egupti.+

37 Lyena abena Israele bafumine ku Raamsese+ no kuya ku Sukote.+ Abaume abale-enda panshi bali nalimo 600,000, ukufumyako abana abanono.+ 38 Abantu abengi nga nshi* nabo baile pamo nabo.+ Basendele impaanga ne ng’ombe, ne fitekwa fimbi ifingi nga nshi. 39 Batendeke ukupanga umukate uushatutumuka mu mufuba bafumine na o mu Egupti. Umufuba tawatutumwike pantu balibatamfishe bwangu mu Egupti ica kuti tabaipekanishishe ifya kulya fya pa bulendo.+

40 Imyaka yonse iyo abena Israele abafumine mu Egupti+ baikele, yali 430.+ 41 Mu bushiku imyaka 430 yakumene, e mo amabumba ya kwa Yehova yonse yafumine mu calo ca Egupti. 42 E bushiku balingile ukulaibukisha ifyo Yehova abafumishe mu calo ca Egupti. Abena Israele mu nkulo shabo shonse balingile ukulaibukisha ifyo Yehova abacitiile muli ubu bushiku.+

43 Lyena Yehova aebele Mose na Aarone ati: “Ifyo mulingile ukulakonka pa kucita Icakucilila ni ifi: Umwina fyalo tafwile ukulyako.+ 44 Lelo nga ca kuti umo alikwata umusha uo ashitile mu ndalama, alingile ukumusembulula.+ Nga amusembulula, e lyo engalyako. 45 Uushili mwana calo no ubombela amalipilo tafwile ukulyako. 46 Bonse abalelyako balingile ukuliila mu ng’anda imo. Tamufwile ukufumisha inama panse, kabili tamufwile ukukontola ifupa lyaiko.+ 47 Ulukuta lonse ulwa kwa Israele lufwile ukucita Icakucilila. 48 Nga ca kuti umulebeshi aikala pamo na imwe kabili alefwaya ukusangwa ku Cakucilila ca kwa Yehova, ninshi umwaume onse uwa mu ng’anda yakwe alingile ukusembululwa. Lyena kuti asangwako, kabili akaba ngo mwana calo. Lelo uushasembululwa ena tafwile ukulyako.+ 49 Ifi fine e fyo umwana calo no mwina fyalo uwikala na imwe balingile ukulakonka.”+

50 E ico abena Israele bonse balicitile ifyo Yehova aebele Mose na Aarone. Bacitile filya fine fye. 51 Pali ubu bwine bushiku e po Yehova afumishe abena Israele bonse* mu calo ca Egupti.

13 Na kabili Yehova aebele Mose ati: 2 “Mpaatwila umwana mwaume onse ibeli* uwa bena Israele. Umwana onse umwaume uwabalilapo ukufyalwa wandi, ne nama yonse iilume iyabalilapo ukufyalwa yandi.”+

3 Lyena Mose aebele abantu ati: “Muleibukisha buno bushiku mufumiinepo mu Egupti,+ mu ng’anda ya busha, pantu ni ku kuboko kwa maka e ko Yehova amufumiishe mu Egupti.+ E ico tamulingile ukulalya conse umuli icitutumushi. 4 Mwacifuma lelo mu mweshi wa Abibu.*+ 5 Ilyo Yehova akamutwala mu calo ca bena Kanaani, ica bena Hiti, ica bena Amore, ica bena Hibi, ne ca bena Yebusi,+ ico alapile ku fikolwe fyenu ukuti akamupeela,+ icalo umwaba umukaka no buci,+ mukalecita ifi muli uno mweshi: 6 Mu nshiku 7 mulingile ukulalya imikate iishatutumuka,+ e lyo pa bushiku bwalenga 7 e pakalaba umutebeto wa kwa Yehova. 7 Mukalelya imikate iishatutumuka pa nshiku 7;+ kabili icatutumuka ciikasangwa muli imwe,+ nangu mufuba uwatutumuka wiikasangwa mu calo cenu conse.* 8 Kabili mukebe abana benu pali bulya bushiku amuti, ‘Ico tulecitila ifi nico Yehova alitucitiile ifisuma ilyo twafumine mu Egupti.’+ 9 Kabili uyu mutebeto ukabe nge cishibilo* icalembwa pa fisansa fyenu na pa mpumi*+ shenu, pa kuti ifunde lya kwa Yehova lingaba mu tunwa twenu; pantu Yehova amufumiishe mu Egupti ku kuboko ukwakosa. 10 Cila mwaka mufwile ukulasunga ici cipope pa nshita ya ciko.+

11 “Ilyo Yehova akamutwala mu calo ca Kanaani, ico alapa kuli imwe na ku fikolwe fyenu ukuti akamupeela,+ 12 mukapeele Yehova abana benu abaume amabeli* ne nama shenu ishilume ishabalilapo ukufyalwa. Amabeli yonse ya kwa Yehova.+ 13 Ibeli lyonse ilya mpunda mukalelilubula kabili pa kulilubula mukaletuulilamo impaanga. Lelo nga tamulilubwile, ninshi mukalelifuna umukoshi. Kabili abana benu bonse abaume amabeli mulingile ukubalubula.+

14 “Abana benu nga bamwipusha abati, ‘Cinshi tucitila ifi?’ mukabasuke amuti, ‘Ni co Yehova atufumiishe mu Egupti mu ng’anda ya busha+ ku kuboko ukwakosa. 15 Ilyo Farao atalamike umutima wakwe akaana no kutuleka tuye,+ Yehova aipeye amabeli yonse mu calo ca Egupti, ukutendekela pe beli lya muntu ukufika na kwi beli lya nama.+ E co tuletuulila Yehova amabeli* yonse, kabili e co tulelubwila abana baume amabeli yesu yonse.’ 16 Ici cikabe cishibilo icalembwa pa fisansa fyenu na pa mpumi shenu,*+ pantu Yehova atufumiishe mu Egupti ku kuboko ukwakosa.”

17 Nomba ilyo Farao alekele abantu baya, Lesa talekele bapita mu nshila iyapita mu calo ca baPelishiti nangu ca kuti e yali iipi, pantu atile: “Nalimo abantu bakabwelela ku Egupti nga ca kuti kwaba abalefwaya ukulwa nabo inkondo.” 18 E ico Lesa alengele abantu bapita inshila iyashoka iya mu matololo, mupepi na Bemba Wakashika.+ Lelo abena Israele bafumine mu calo ca Egupti mu mabumba mabumba kwati bashilika. 19 Mose asendele na mafupa ya kwa Yosefe, pantu Yosefe alengele abana ba kwa Israele balapa, abebele ati: “Nangu cibe shani Lesa akamwibukisha, kabili mukasende amafupa yandi mukaye nayo.”+ 20 Bafumine ku Sukote kabili bailepanga inkambi pa Etamu mu mbali ya matololo.

21 Nomba mu nshita ya kasuba Yehova alebatangilila mu ntumba ye kumbi pa kubatungulula mu nshila,+ kabili mu nshita ya bushiku alebatungulwila ku ntumba ya mulilo, pa kuti bale-enda akasuba no bushiku.+ 22 Intumba ye kumbi tayalefuma pa ntanshi ya bantu akasuba, kabili intumba ya mulilo nayo tayalefuma pa ntanshi ya bantu ubushiku.+

14 Yehova nomba aebele Mose ati: 2 “Eba abena Israele ukuti baluluke kabili bapange inkambi pa Pihahirote, pa kati ka Migidole na bemba, mupepi na Baali-sefone.+ Mupangile iyi inkambi apalungatana ne yi incende, mu lulamba lwa bemba. 3 Lyena Farao akalanda ukuti abena Israele, ‘Bale-endauka fye mu calo pantu nabafulungana. Tabakwete kwa kuya mu matololo.’ 4 Nkaleka Farao akatalamike umutima wakwe,+ kabili akabakonka, lyena nkalenga ishina lyandi likacindikwe ilyo nkacimfya Farao na bashilika bakwe bonse;+ kabili abena Egupti bakeshiba ukuti nine Yehova.”+ E ico abena Israele bacitile ifyo babebele.

5 Pa numa kwali abaebele imfumu ya Egupti ukuti abantu balibutwike. Ilyo line Farao na babomfi bakwe bayalwile ifyo baletontonkanya,+ kabili batile: “Cinshi twalekeele abasha besu abena Israele baya?” 6 E ico apekenye amaceleta yakwe aya nkondo, kabili aile pamo na bantu bakwe.+ 7 Asendele amaceleta 600 ayo acetekele sana e lyo na maceleta yonse aya mu Egupti, kabili mu maceleta yonse mwali abashilika. 8 E fyo Yehova alekele umutima wa kwa Farao imfumu ya Egupti watalama, kabili Farao akonkele abena Israele. Nomba abena Israele bena baleya fye ukwabula ukutiina nangu cimo.*+ 9 Abena Egupti balikonkele abena Israele,+ kabili bakabalwe bonse abaletinta amaceleta ya kwa Farao na baninine pali bakabalwe bakwe na bashilika bakwe baile balepalamina apo abena Israele bapangiile inkambi mu lulamba lwa bemba, mupepi na Pihahirote apalungatana na Baali-sefone.

10 Ilyo Farao apaleme, abena Israele bainwine amenso no kumona abena Egupti balebakonka. Abena Israele batiinine nga nshi kabili batendeke ukulilila Yehova.+ 11 Baipwishe Mose abati: “Cinshi ico watuletele muno mu matololo, bushe nico mu Egupti tamwaba inshiishi?+ Cinshi watufumiishe mu Egupti? 12 Bushe ilyo twali mu Egupti tatwakwebele ukuti, ‘Utuleke fye fwe bene tulebombela abena Egupti’? Pantu cawamapo ukubombela abena Egupti ukucila ukwisafwila mu matololo.”+ 13 Lyena Mose aebele abantu ati: “Mwitiina.+ Iminineni ndi, mumone ifyo Yehova alamupususha lelo.+ Pantu abena Egupti abo mulemona lelo, tamwakabamonepo na kabili.+ 14 Yehova e walamulwila,+ imwe mwikale fye tondolo.”

15 Nomba Yehova aebele Mose ati: “Leka ukundilila. Eba abena Israele ukuti beme baleya. 16 Lelo iwe, imya inkonto yobe no kutambalika ukuboko kobe pali bemba pa kuti bemba akanikane pabili, pa kuti abena Israele bende panshi ya bemba apauma. 17 Lelo ine, nalaleka imitima ya bena Egupti italame, pa kuti babakonke; e ico nalalenga ishina lyandi licindikwe ilyo nalalofya Farao na mabumba ya bashilika bakwe bonse, amaceleta yakwe aya nkondo, na baume ba pali bakabalwe bakwe.+ 18 Kabili abena Egupti balaishiba ukuti nine Yehova ilyo nalalenga ishina lyandi licindikwe pantu nalalofya Farao, amaceleta yakwe aya nkondo, na baume ba pali bakabalwe bakwe.”+

19 Lyena malaika wa kwa Lesa wa cine+ uwaletangilila abena Israele aile ku numa yabo, ne ntumba ye kumbi iyali ku ntanshi yabo yaile ku numa yabo, yaiminina no kwiminina.+ 20 E ico yaishile pa kati ka bena Egupti na bena Israele.+ Lubali lumo yali likumbi ilyafiita. Lubali lumbi yalesanika ubushiku.+ Kanshi abena Egupti tabapaleme ku bena Israele ubushiku bonse.

21 Mose nomba atambalike ukuboko kwakwe pali bemba;+ kabili Yehova alengele umwela uwa maka uwa ku kabanga wapuupa ubushiku bonse ica kuti wasunkila amenshi ya muli bemba ku numa. Ici calengele panshi ya bemba pauma,+ kabili amenshi ya-akanikene pabili.+ 22 E ico abena Israele bapitile mu kati ka bemba pa mushili uwauma,+ ninshi amenshi nayapanga icibumba ku kulyo na ku kuso.+ 23 Abena Egupti balibakonkele, kabili bakabalwe bonse aba kwa Farao, amaceleta yakwe aya nkondo, na baume ba pali bakabalwe bakwe batendeke ukubakonka mu kati ka bemba.+ 24 Mu nshita ya bulinde bwa lucelo,* Yehova aloleshe pa bena Egupti ukufuma mu ntumba ya mulilo ne ye kumbi,+ kabili afulungenye abena Egupti. 25 Alesokola imipeto ku maceleta yabo ica kuti yalabafya ukwensha, kabili abena Egupti batendeke ukulanda abati: “Natufulumuke, pantu Yehova alelwilako abena Israele.”+

26 Lyena Yehova aebele Mose ati: “Tambalika ukuboko kobe pali bemba, pa kuti amenshi yabwelele pa bena Egupti, pa maceleta yabo aya nkondo, na pa baume ba pali bakabalwe babo.” 27 Ilyo fye Mose atambalike ukuboko kwakwe pali bemba, kabili ilyo bwaleya buleca, amenshi yalibwelele no kupuminkana nga filya fine yali kale. Cilya abena Egupti batendeka ukufulumuka pa mulandu wa kutiina amenshi, Yehova e pa kubapenwina muli bemba.+ 28 Amenshi ayabwelele yabunshishe amaceleta ya nkondo na baume ba pali bakabalwe na bashilika ba kwa Farao bonse abakonkele abena Israele muli bemba.+ Takwali nangu umo uwapuswike.+

29 Lelo abena Israele bena baendele muli bemba pa mushili uwauma,+ kabili amenshi yapangile icibumba ku kulyo na ku kuso.+ 30 E fyo Yehova apuswishe Israele ku bena Egupti pa bushiku bulya,+ kabili Israele amwene abena Egupti nabafwa mu lulamba lwa bemba. 31 Na kabili Israele alimwene amaka ayengi* ayo Yehova abomfeshe pa bena Egupti. E ico abantu batendeke ukutiina Yehova kabili batetekeele Yehova na Mose umubomfi wakwe.+

15 Pali ilya ine nshita Mose na bena Israele baimbiile Yehova ulu lwimbo abati:+

“Kanyimbile Yehova, pantu nacindikwa nga nshi.+

Kabalwe no waninapo abapoosa muli bemba.+

 2 Ubukose bwandi na maka yandi ni Jah,* pantu e wampususha.+

Uyu e Lesa wandi, na ine nkamulumbanya;+ e Lesa wa kwa tata,+ kabili nkamutatakula.+

 3 Yehova mwaume wa maka uwaishiba ukulwa inkondo.+ Yehova e shina lyakwe.+

 5 Amabimbi ya pali bemba yabafimba; baibila nge libwe muli bemba uwashika nga nshi.+

 9 Umulwani acitila: ‘Ndebakonka! Ndebasanga!

Ndeakanya ifyo nalapokolola mpaka umutima* wandi wikale!

Ndesomona ulupanga lwandi! Ukuboko kwandi kwalabalofya!’+

11 Ni lesa nshi pali balesa uwaba nga imwe, mwe Yehova?+

Nani uwaba nga imwe, mwe ba mushilo nga nshi?+

Mwe balinga ukutiina no kulumbanya, mwe bacita ifipesha amano.+

12 Mwacitambalika ukuboko kwenu ukwa ku kulyo, kabili isonde lyacibamina.+

Bonse abekala mu Kanaani bakafuupuka.+

16 Bakatiina kabili bakatutuma.+

18 Yehova akaba imfumu umuyayaya, umuyayaya.+

20 Lyena Miriamu kasesema mwanakashi, nkashi ya kwa Aarone, alishishe akaoma ka nyenjele, na banakashi bonse balimukonkele balelisha no tuoma twa nyenjele, uku ninshi balecinda. 21 Miriamu aleyankula abaume ati:

“Imbileni Yehova, pantu nacindikwa nga nshi.+

Kabalwe no waninapo abapoosa muli bemba.”+

22 Pa numa Mose na bena Israele bafumine kuli Bemba Wakashika. Abatungulwile ku matololo ya Shuri kabili baendele inshiku shitatu mu matololo, lelo tabasangile amenshi. 23 Awe bafikile ku Mara,*+ lelo balifililwe ukunwa amenshi ya ku Mara pantu yali ayalula. E co akwinikile ati Mara. 24 E ico abantu batendeke ukuilishanya kuli Mose,+ abati: “Tulenwa nshi?” 25 Mose aliliile kuli Yehova,+ kabili Yehova amutungulwile ku kamuti. Ilyo apoosele aka akamuti mu menshi, amenshi yalyalwike yaba ayasuma.

Palya pene e po Lesa abapangiile ifunde kabili e po abebeele ifya kukonka pa kupingula, kabili e po abeseshe.+ 26 Abebele ati: “Nga ca kuti mwakulakonka ifyo ne Yehova Lesa wenu nakulamweba, kabili nga mwakulacita icisuma mu menso yandi kabili nga mwakulakonka amafunde yandi ne fipope fyandi fyonse,+ nshakamuletele ubulwele nangu bumo pa malwele ayo naleteele abena Egupti;+ pantu ne Yehova nine ndemucingilila.”+

27 Pa numa bafikile ku Elimu, ukwali utumfukumfuku twa menshi 12 no tuncindu 70. E ico bapangile inkambi kulya kwine mupepi na menshi.

16 Ilyo ulukuta lonse ulwa bena Israele lwafumine ku Elimu, lwasukile lwafika ku matololo ya Sini,+ ayaba pa kati ka Elimu na Sinai, pa bushiku ubwalenga 15, mu mweshi wa bubili ukutula apo lwafumiine mu calo ca Egupti.

2 Lyena ulukuta lonse ulwa bena Israele lwatendeke ukuilishanya pali Mose na pali Aarone mu matololo.+ 3 Abena Israele bale-eba Mose na Aarone abati: “Kanshi Yehova nga atwipaile fye mu calo ca Egupti ilyo twaleikala mupepi ne nongo sha nama,+ ilyo twalelya ifya kulya fya kuti twaikuta. Nomba mwatuleta mu matololo pa kuti ulukuta lonse ulu lufwe ku nsala.”+

4 Lyena Yehova aebele Mose ati: “Mona ndemuponesha umukate ukufuma mu muulu,+ kabili cila muntu aleya mu kulonganika umukate uo engalya pa bushiku bumo,+ pa kuti nkamone nga ca kuti bakakonka amafunde yandi nangu iyo.+ 5 Nomba pa bushiku bwalenga 6+ pena bakalelonganika ifyo bengalya pa nshiku shibili.”+

6 E ico Mose na Aarone baebele abena Israele bonse abati: “Lelo icungulo mwalaishiba ukuti Yehova e wamufumishe mu calo ca Egupti.+ 7 Mailo ulucelo mukamona ubukata bwa kwa Yehova, pantu naumfwa ifyo muleilishanya pali Yehova. Cinshi muleilishanishisha pali ifwe? Na ifwe tapali ifyo tuli.” 8 Mose abebele no kuti: “Ilyo Yehova akamupeela inama ya kulya icungulo e lyo no mukate ulucelo ifya kuti mukekute, mukeshiba ukuti Yehova naumfwa ifyo muleilishanya pali ena. Ifwe tapali ico tuli. Te pali ifwe muleilishanya, lelo ni pali Yehova.”+

9 Lyena Mose aebele Aarone ati: “Eba ulukuta lonse ulwa bena Israele auti, ‘Palameni ku cinso ca kwa Yehova, pantu naumfwa ifyo muleilishanya.’”+ 10 Ilyo Aarone apwishishe fye ukulanda no lukuta lonse ulwa bena Israele, balipilibwike balolesha ku matololo, kabili bamwene ubukata bwa kwa Yehova mwi kumbi.+

11 Yehova atwalilile ukweba Mose ati: 12 “Ning’umfwa ifyo abena Israele baleilishanya.+ Bebe auti, ‘Akasuba nga kawa* fye mwalalya inama kabili ulucelo mukalya umukate mukekute no kwikuta,+ lyena mukeshiba ukuti nine Yehova Lesa wenu.’”+

13 E ico mu cungulo inkwale ishingi shalishile, shakumana inkambi yonse,+ kabili ulucelo kwali umume ukushinguluka inkambi. 14 Ilyo umume wakuntiike, mu matololo mwali utuntu utunono+ utwalemoneka kwati bungululu bwa fubefube pa mushili. 15 Ilyo abena Israele batumwene, batendeke ukulaipushanya abati, “Tunshi utu?” pantu tabatwishibe. Mose abebele ati: “Mukate uo Yehova amupeele pa kuti mulye.+ 16 Ifi e fyo Yehova alandile, ‘Cila muntu afwile ukulonganika fye ifyo engalya. Cila muntu afwile ukulonganika ukulingana ne mpendwa ya bantu akwata mwi tenti lyakwe. Cila muntu oma*+ imo.’” 17 Abena Israele batampile ukulonganika, bamo balonganike ifingi, bambi ifinono. 18 Ilyo bafipimine muli oma, uwalonganike ifingi takwete ifyapulilepo, no walonganike ifinono taabulishe.+ Balonganike ukulingana ne fyo cila muntu ali no kulya.

19 Lyena Mose abebele ati: “Takuli nangu umo uufwile ukushako ifya kulya mpaka ulucelo.”+ 20 Lelo tabakutike kuli Mose. Abantu bamo balishileko ifya kulya mpaka ulucelo, nafyo fyawilemo imititi kabili fyanunkile piipi, ica kuti Mose alikalipe. 21 Balelonganika ifya kulya cila lucelo, cila muntu ukulingana ne fyo engalya. Akasuba nga kabalika, fyalesunguluka.

22 Pa bushiku bwalenga 6, balonganike ifyo bali no kulya pa nshiku shibili,+ umuntu umo ama oma yabili. E ico intungulushi shonse isha lukuta shaile kuli Mose no kumweba ifyo abantu bacitile. 23 E lyo na o abebele ati: “E fyo Yehova alandile. Mailo bukaba bushiku bwa kutuusha* ku milimo yonse, bukaba lisabata lya mushilo ilya kwa Yehova.+ Pangeni imikate iyo mulekabila, kabili ipikeni ifyo mulekabila;+ lyena musunge ifyalashalapo mpaka ulucelo.” 24 E ico balifisungile mpaka ulucelo nga filya fine Mose abebele. Tafyanunkile nangu panono kabili tamwaishileba imititi. 25 Lyena Mose abebele ati: “Lyeni, pantu lelo lisabata lya kwa Yehova. Buno bushiku tamwafisange pa mushili. 26 Mwakulafilonganika mu nshiku 6, lelo ubushiku bwalenga 7 Lisabata,+ tafyakulabako.” 27 Lelo na pa bushiku bwalenga 7, abantu bamo balile pa kuti bafilonganike, nomba tabafisangile.

28 E ico Yehova aebele Mose ati: “Ni lilali mukatampa ukukonka ifyo mweba, kabili ni lilali mukaleka ukupula mu mafunde yandi?+ 29 Muleibukisha ukuti Yehova namupeela Isabata.+ E co pa bushiku bwalenga 6 alemupeelela umukate wa kulya inshiku shibili. Takuli uufwile ukufuma pa mwakwe. Umuntu nangu umo elaya nangu kumo pa bushiku bwalenga 7.” 30 E ico abantu balisungile Isabata* pa bushiku bwalenga 7.+

31 Abena Israele bainike uyu mukate ukuti “mana.”* Yalemoneka nge nseke ishinono ishabuuta,* kabili yaleumfwika ngo mukate wapaapaatala uo babikamo ubuci.+ 32 Lyena Mose atile: “Ifi e fyo Yehova alandile, ‘Isusheni mana muli oma imo, kabili muisunge pa kuti aba mu nkulo shenu shonse+ bakamone umukate uo namuliishishe mu matololo ilyo nalemufumya mu calo ca Egupti.’” 33 E ico Mose aebele Aarone ati: “Buula umutondo ubikemo mana iingakumana oma imo, kabili uibike ku cinso ca kwa Yehova pa kuti isungilwe aba mu nkulo shenu shonse.”+ 34 Aarone aibikile pa ntanshi ya Cipao ca Cipangano+ pa kuti isungwe nga filya fine fye Yehova aebele Mose. 35 Abena Israele baliile mana pa myaka 40,+ mpaka bafika mu calo umwali abantu.+ Balelya mana mpaka bafika ku mupaka wa calo ca Kanaani.+ 36 Nomba mwi tepe* mwaleingila ama oma 10.

17 Ulukuta lonse ulwa bena Israele lwafumine mu matololo ya Sini.+ Kabili ukulingana ne fyo Yehova alwebele,+ lwaleti lwafuma apa lwayaikala pambi, lwasuka lwayapanga inkambi pa Refidimu.+ Lelo tapaali amenshi ya kuti abantu balenwa.

2 E ico abantu batendeke ukuumanya Mose+ abati: “Tupeele amenshi tunwe.” Lelo Mose abebele ati: “Cinshi ico mulengumanishisha? Cinshi ico mwesesha Yehova?”+ 3 Lelo abantu bali ne cilaka sana, kabili baikalile fye ukuilishanya pali Mose+ abati: “Cinshi watufumiishe mu Egupti? Bushe walefwaya ifwe na bana besu ne fitekwa fyesu twise tufwe ku cilaka?” 4 Mose asukile alilila kuli Yehova ati: “Ndecita shani kuli aba bantu? Nga cacila apa balampoola amabwe!”

5 Lyena Yehova aebele Mose ati: “Tangilila aba bantu, usende na bakalamba ba bena Israele bamo uye nabo kabili usende ne nkonto iyo waumiineko pa Mumana wa Naelo.+ Uisende mu minwe e lyo uleya. 6 Mona! ndeiminina pa cilibwe mu Horebu. Ume mu cilibwe, kabili amenshi yalafuma na bantu balanwa.”+ Awe Mose acitile ifyo fine pa menso ya bakalamba ba bena Israele. 7 E ico ainike ilya ncende ati Masa*+ na Meriba*+ pa mulandu wa kuti abena Israele balyumene na Mose na pa mulandu wa kuti balyeseshe Yehova+ abati: “Bushe Yehova ali na ifwe nelyo iyo?”

8 Lyena abena Amaleke+ balishile kabili balwile na bena Israele mu Refidimu.+ 9 E lyo Mose aebele Yoshua+ ati: “Sala abaume muleya mu kulwa na bena Amaleke. Mailo nkeminina pa muulu wa lupili kabili nkekata inkonto ya kwa Lesa wa cine.” 10 Awe Yoshua acitile filya fine fye Mose amwebele,+ kabili alwile na bena Amaleke. Kabili Mose, Aarone na Huri+ baile pa muulu wa lupili.

11 E ico Mose nga atwalilila ukwimya amaboko, abena Israele baletampa ukucimfya, lelo nga aponya fye amaboko, abena Amaleke e baletendeka ukucimfya. 12 Ilyo Mose anakile ukwimya amaboko, Aarone na Huri bamuleteele ilibwe kabili alikelepo. Lyena baikete amaboko yakwe, uyu ku lubali lumo no yu ku lubali lumbi, kabili amaboko yakwe yali ndi, mpaka akasuba kawa. 13 E fyo Yoshua acimfishe Amaleke na bantu bakwe ku lupanga.+

14 Yehova nomba aebele Mose ati: “Lemba ici mwi buuku pa kuti mwikacilaba,* webe na Yoshua auti, ‘Nkalofya abena Amaleke bonse pe sonde* ica kuti takwakabe na wa kubebukisha.’”+ 15 Lyena Mose akuulile iciipailo kabili acinike ati Yehova-nisi,* 16 pantu atile: “Apo Amaleke naimina imitekele ya kwa Jah,+ Yehova akalwa nankwe mu nkulo shakwe shonse.”+

18 Nomba Yetro shimapepo wa ku Midiani, shifyala wa kwa Mose,+ alyumfwile fyonse ifyo Lesa acitiile Mose na bena Israele abantu bakwe, ifyo Yehova afumishe abena Israele mu Egupti.+ 2 Yetro shifyala wa kwa Mose, alipokelele Sipora, muka Mose, ilyo Mose amwebele ukuti abwelele ku mwabo 3 na bana bakwe abaume babili.+ Umwana umo ali ni Gershomu,*+ pantu Mose atile, “Ndi mulebeshi mu calo cimbi,” 4 e lyo umbi ali ni Eliesere* pantu atile, “Lesa wa kwa tata ni kaafwa wandi, alimpokolwele ku lupanga lwa kwa Farao.”+

5 E ico Yetro shifyala wa kwa Mose na bana ba kwa Mose abaume, na muka Mose, baile kuli Mose mu matololo umo apangile inkambi pa lupili lwa kwa Lesa wa cine.+ 6 Lyena atumine abakuyaeba Mose ati: “Ne Yetro,+ ne sofyala, ndeisa kuli iwe, ndi no mukashi obe na bana bobe abaume babili.” 7 Ilyo line fye Mose alifumine no kuyasengela shifyala, kabili alimukontamiine e lyo amutomona. Bonse babili baliposhenye, lyena baingile mwi tenti.

8 Mose ashimikile shifyala fyonse ifyo Yehova acitile kuli Farao na ku bena Egupti pa kuti afwe abena Israele.+ Alimushimikile na pa mafya yonse ayo bakwete mu nshila,+ ne fyo Yehova abapokolwele. 9 Yetro alisekelele pali fyonse ifisuma ifyo Yehova acitiile abena Israele pantu alibapokolwele ku bena Egupti.* 10 Lyena Yetro atile: “Acindikwe Yehova, uwamupokolwele ku bena Egupti na kuli Farao, kabili uwapokolwele abantu ku bena Egupti abalebacusha. 11 Nomba naishiba ukuti Yehova alicila balesa bonse+ pantu alicingilile abantu bakwe ku bena Egupti aba cilumba kabili abankalwe.” 12 Lyena Yetro shifyala wa kwa Mose, aleteele Lesa umutuulo wa koca na malambo yambi, kabili Aarone na bakalamba bonse aba bena Israele baishile mu kuliila pamo na shifyala wa kwa Mose pa cinso ca kwa Lesa wa cine.

13 Ubushiku bwakonkelepo Mose alikele pa kuti apingule abantu nga fintu alecita lyonse, kabili abantu baleisa kuli ena ukufuma ulucelo ukufika icungulo. 14 Ilyo shifyala wa kwa Mose amwene fyonse ifyo alecitila abantu, amwebele ati: “Cinshi ucitila ifi? Cinshi ubombela uyu mulimo weka ica kuti abantu bonse besa kuli iwe ukufuma ulucelo ukufika icungulo?” 15 Mose aebele shifyala ati: “Ni co abantu besa kuli ine pa kuti ndebepushishako kuli Lesa. 16 Nga kwaba umulandu, bauleta kuli ine pa kuti imone uulufyenye, kabili ndalenga baishiba ifyo Lesa wa cine apingwile kabili baishiba na mafunde yakwe.”+

17 Shifyala wa kwa Mose amwebele ati: “Ifi ucita tafyawama. 18 Ukanaka kabili ukanasha na bantu abo uli nabo, pantu uyu mulimo naukukulila kabili te kuti uubombe weka. 19 Nomba umfwa ifyo nalakweba. Nalakupandako amano, na Lesa akaba na iwe.+ Iwe uleimininako aba bantu kuli Lesa wa cine,+ kabili uletwala imilandu yabo kuli Lesa wa cine.+ 20 Ufwile ukubasambilisha ifipope na mafunde,+ kabili ufwile ukubeba ifyo balingile ukulaikala e lyo ne milimo iyo bafwile ukulabomba. 21 Lelo pali aba bantu usalepo abaume abafikapo+ abatiina Lesa, abacetekelwa, abapata ubunonshi bwa mu bufufuntungu;+ kabili ukasonte bamo bakabe intungulushi sha bantu 1,000, bambi bakabe intungulushi sha bantu 100, bambi nabo bakabe intungulushi sha bantu 50 e lyo bambi bakabe intungulushi sha bantu 10.+ 22 Bafwile ukupingula abantu nga kwaba imilandu, kabili umulandu onse uwakosa baleleta kuli iwe,+ lelo umulandu onse uunono balepingula. Uleke balekwafwa ukupingula pa kuti uyangushisheko umulimo.+ 23 Nga wacita ifi, kabili nga e fyo Lesa akweba ukucita, ninshi ukaba na maka ya ku-ubomba, kabili abantu bakalabwelela ku mwabo ninshi imitima naikala.”

24 Ilyo line fye Mose alikutike ifyalandile shifyala kabili alicitile fyonse ifyo amwebele. 25 Mose alisalile abaume bafikapo pa bena Israele bonse no kubasonta ukuba intungulushi pa bantu. Bamo bali bacilolo pa bantu amakana, bambi bacilolo pa bantu imyanda, bambi bacilolo pa bantu amakumi yasano e lyo bambi bacilolo pa bantu amakumi. 26 E ico balepingula abantu nga kwaba imilandu. Umulandu uwakosa baletwala kuli Mose,+ lelo umulandu onse uunono e balepingula. 27 Pa numa Mose ashindike shifyala,+ kabili shifyala alibwelelemo ku calo uko afumine.

19 Mu mweshi walenga butatu ukutula apo abena Israele bafumiine mu calo ca Egupti, bafikile mu matololo ya Sinai. 2 Mu bushiku bumo bwine, abena Israele bafumine mu Refidimu+ bayafika mu matololo ya Sinai, kabili bapangile inkambi mu matololo pa ntanshi ya lupili.+

3 Lyena Mose aile pa lupili+ pa kuti aye amonane na Lesa wa cine, kabili Yehova aebele Mose ati: “Eba aba mu ng’anda ya kwa Yakobo, kabili webe abena Israele auti, 4 ‘Mwali-imwena mwe bene ifyo nacitile ku bena Egupti,+ pa kuti imusendele pa mapindo ya bakapumpe no kumuleta kuli ine.+ 5 Nomba nga mwakulakonka ifyo nakulamweba kabili nga mwakulasunga icipangano candi, e lyo mukaba abantu bandi abaibela* pa bantu bonse,+ pantu isonde lyonse lyandi.+ 6 Mukaba ubufumu bwandi ubwa bashimapepo kabili uluko lwandi ulwa mushilo.’+ E fyo webe abena Israele.”

7 E ico Mose aileita abakalamba ba bena Israele kabili abebele fyonse ifyo Yehova amwebele.+ 8 Pa numa abantu bonse ba-asukile pamo abati: “Fyonse ifyo Yehova alandile twakulacita.”+ Ilyo line fye Mose aile-eba Yehova ifyo abantu balandile. 9 Kabili Yehova aebele Mose ati: “Mona! ndeisa kuli iwe mwi kumbi ilyafiita pa kuti abantu bomfwe ilyo ndelanda na iwe, na pa kuti lyonse baletetekela na iwe wine.” Lyena Mose aebele Yehova ifyo abantu balandile.

10 Lyena Yehova aebele Mose ati: “Kabiye ku bantu kabili ubasangulule lelo, ukabasangulule na mailo, kabili bafwile ukuwasha ifya kufwala fyabo. 11 Kabili bakaipekanishishe libela ku fikacitika pa bushiku bwalenga shitatu pantu pali ubu bushiku Yehova akesa pa lupili lwa Sinai pa cinso ca bantu bonse. 12 Ukapangile abantu umupaka ukushinguluka ulupili, kabili ukabebe auti, ‘Tekwesha ukupalama ku lupili, kabili tekwesha ukukumya umupaka wa luko. Umuntu onse uukakumya ulupili akepaiwe. 13 Takuli uufwile ukukumya uyo muntu, lelo alingile ukupoolwa amabwe nelyo ukumulasa.* Nampo nga ni nama nelyo muntu, takabe no mweo.’+ Intandala nga yalila,+ e lyo bengapalama ku lupili.”

14 Lyena Mose afumine pa lupili no kuya ku bantu, atendeka no kubasangulula, kabili abantu bacapile ifya kufwala fyabo.+ 15 Aebele abantu ati: “Ipekanishisheni libela ku fikacitika pa bushiku bwalenga shitatu. Mwe baupa tekwesha ukulaala* na bena mwenu.”

16 Pa bushiku bwalenga shitatu ulucelo kwali icibulukutu no kupanta kwa nkuba, kabili ikumbi ilyafiita fititi+ lyali pa lupili kabili kwaumfwikike iciunda cikalamba ica ntandala, kabili abantu bonse abali mu nkambi batendeke ukututuma nga nshi.+ 17 Mose nomba afumishe abantu mu nkambi pa kuti bayekumana na Lesa wa cine, kabili baileiminina mwi samba lya lupili. 18 Ulupili lonse ulwa Sinai lwafutumwike icushi, pantu Yehova aishile pali ulu lupili mu mulilo;+ kabili icushi ca lupili calenina fye kwati cushi ca cibili, kabili ulupili lonse lwalitentele nga nshi.+ 19 Ilyo iciunda ca ntandala calilishe, Mose atendeke ukulanda, kabili Lesa wa cine alimwaswike.*

20 E ico Yehova aishile pa muulu wa Lupili lwa Sinai. Lyena Yehova aitile Mose pa muulu wa lupili, kabili Mose aile pa muulu wa lupili.+ 21 Yehova nomba aebele Mose ati: “Tentemuka uyesoka abantu ukuti be-esha ukupula pa mupaka pa kuti bayemona Yehova, pantu nga bacita ifi abengi balefwa. 22 Kabili webe bashimapepo abapalama lyonse kuli Yehova baisangulule pa kuti Yehova e bepaya.”*+ 23 Lyena Mose aebele Yehova ati: “Abantu te kuti baciluke umupaka wa Lupili lwa Sinai, pantu mwatwebele amuti, ‘Pangeni umupaka ku lupili no kuleka lube ulwa mushilo.’”+ 24 Lelo Yehova aebele Mose ati: “Tentemuka, kabili ubwele, wise na Aarone, lelo wileka bashimapepo na bantu bapule pa mupaka bese kuli Yehova pa kuti e bepaya.”+ 25 E ico Mose alitentemwike no kuyaeba abantu.

20 Lyena Lesa alandile aya amashiwi yonse ati:+

2 “Nine Yehova Lesa wenu, uwamufumishe mu calo ca Egupti, mu ng’anda ya busha.+ 3 Mwilapepa balesa bambi, mulepepa fye ine.+

4 “Mwilapanga icimpashanya nelyo conse icapala ica mu muulu nangu icapala ica pano isonde nelyo icapala ica mu menshi.+ 5 Mwilafikontamina no kufibombela,+ pantu ne Yehova Lesa wenu ndi Lesa uufwaya ukulampepa fye neka,+ uukanda abana na beshikulu ne fishikulula pa membu sha bashibo abampata, 6 lelo uulanga ukutemwa ukushipwa ku ba mu nkulo iyalenga 1,000 iya bashibo abantemwa kabili abasunga amafunde yandi.+

7 “Mwilalumbula ishina lya kwa Yehova Lesa wenu na pashilingile+ pantu Yehova takaleke fye umuntu uulumbula ishina lyakwe na pashilingile+ ukwabula ukumukanda.

8 “Muleibukisha ubushiku bwe Sabata kabili mulebumona ukuti bwa mushilo.+ 9 Mulebomba imilimo yenu yonse mu nshiku 6,+ 10 lelo ubushiku ubwalenga 7 lisabata lya kwa Yehova Lesa wenu. Mwilabombamo umulimo nangu umo, imwe nelyo abana benu nangu ababomfi benu nelyo icitekwa cenu nelyo umulebeshi wenu uo mwikala nankwe.*+ 11 Pantu mu nshiku 6 e mo Yehova apangile umuulu ne sonde, bemba na fyonse ifyabamo, kabili atuushishe pa bushiku ubwalenga 7.+ E co Yehova apaaliile ubushiku bwe Sabata no kulenga bwaba ubwa mushilo.

12 “Mulecindika bashinwe na banyinenwe+ pa kuti mwingekala inshiku ishingi mu calo ico Yehova Lesa wenu alemupeela.+

13 “Mwilaipaya.+

14 “Mwilacita ubucende.+

15 “Mwilaiba.+

16 “Mwilaba bakambone ba bufi pa munenu.+

17 “Mwilakumbwa ing’anda ya munenu. Mwilakumbwa umukashi wa munenu,+ nelyo umubomfi wakwe umwaume nangu umubomfi wakwe umwanakashi nelyo ing’ombe yakwe nelyo impunda yakwe nangu conse ico umunenu akwata.”+

18 Nomba abantu bonse baleumfwa icibulukutu no kupanta kwa nkuba, kabili baleumfwa iciunda ca ntandala, kabili balemona ulupili lulefutumuka icushi. Ilyo bamwene ifi, balitutwime kabili baiminine akatalamukila.+ 19 E ico baebele Mose abati: “Niwe ulande na ifwe kabili twalakutika, wileka Lesa alande na ifwe pantu kuti twafwa.”+ 20 Lyena Mose aebele abantu ati: “Mwitiina, pantu Lesa wa cine eshile mu kumwesha+ pa kuti mulemutiina kabili mwilabembuka.”+ 21 E ico abantu batwalilile fye ukwiminina akatalamukila, lelo Mose aile mupepi ne kumbi ilyafiita umwali Lesa wa cine.+

22 Lyena Yehova aebele Mose ati: “Webe abena Israele auti, ‘Namuimwena mwe bene ukuti naciba ku muulu ilyo nacilalanda na imwe.+ 23 Mwilapanga balesa ba silfere aba kuti nabo mulebapepa, kabili mwilapanga balesa ba golde.+ 24 Mumpangile iciipailo ce loba, kabili e po muletuulila amalambo yenu aya koca na ya mutende, impaanga shenu ne ng’ombe shenu. Konse uko nkalenga ishina lyandi likebukishiwe,+ nkesa kuli imwe kabili nkamupaala. 25 Nga mwampangila iciipailo ca mabwe, tamufwile ukucikuulila na mabwe ayaputulwa.+ Pantu nga mwayaputula na cesulo ninshi mwacikowesha. 26 Kabili mwilaninina iciipailo candi pa matabo pa kuti ifya mfwalo fyenu* filamoneka pa ciipailo.’

21 “Aya e mafunde ayo ufwile ukubeba:+

2 “Nga washita umuHebere+ pa kuti abe umusha, akabe umusha pa myaka 6, lelo mu mwaka uwalenga 7 akalubuke ukwabula ukulipilapo nangu kamo.+ 3 Nga aishile fye umwine, no kuya akaiile fye umwine. Nga alyupa, no mukashi wakwe wine akaye nankwe. 4 Nga ca kuti shikulu wakwe amupeela umwanakashi wa kuupa kabili uyo mwanakashi amufyalila abana abaume na bana abanakashi, umukashi wakwe na bana bakaba ba kwa shikulu wakwe, lelo ena akaya fye eka.+ 5 Nomba umusha nga akosapo ukulanda ati, ‘Nalitemwa shikulu wandi, umukashi wandi, na bana bandi; nshilefwaya ukuba umuntungwa,’+ 6 shikulu wakwe akamulete ku cinso ca kwa Lesa wa cine. Lyena akamupalamike ku ciibi nelyo ku lubali lumo ulwa mwinshi, kabili shikulu wakwe akamutule ukutwi ku ca kutulilako, kabili akatwalilila ukuba umusha wakwe mpaka ne mfwa.

7 “Nga ca kuti umuntu ashitisha umwana wakwe umwanakashi pa kuti abe umusha, ifyo akalubuka fikapusana ne fyo umusha umwaume akalubuka. 8 Nga ca kuti shikulu wakwe tamutemenwe ica kuti talefwaya abe kanakashi wakwe, afwile ukumushitisha ku muntu umbi.* Talingile ukumushitisha ku bena fyalo pantu ninshi namufyenga. 9 Lelo nga amutwala ku mwana wakwe umwaume pa kuti amuupe, ninshi afwile ukumupeela insambu isho bapeela umwana umwanakashi. 10 Nomba nga aupilapo na umbi, talingile ukucefeshako umukashi wa kubalilapo ifya kulya, ifya kufwala, ne co afwile ukumupeela mu cupo.+ 11 Nga ca kuti talecita ifi fintu fitatu, ninshi akaleke umwanakashi akaye kabili tafwile ukumulipilisha indalama nangu imo.

12 “Onse uwauma umuntu ica kuti afwa no kufwa, na o wine balingile ukumwipaya.+ 13 Lelo nga ca kuti amwipaya mu kukanaishiba kabili Lesa wa cine aleka fye ukuti ici cicitike, ninshi nkamufwaila icifulo ukwa kufulumukila.+ 14 Nga ca kuti umuntu akalipa sana ica kuti aipaya no munankwe ku mufulo,+ nangu abutukile ku ciipailo candi pa kuti acingililwe, mukamufumyeko no kumwipaya.+ 15 Uwauma wishi nelyo nyina, mukamwipaye.+

16 “Onse uwaiba umuntu,+ amushitisha no kumushitisha nelyo asangwa namusunga,+ mulingile ukumwipaya.+

17 “Onse uwasaalula wishi nelyo nyina mukamwipaye.+

18 “Nga ca kuti abaume batendeka ukuumana kabili umo alasa umunankwe ilibwe nelyo amuuma ikofi* kabili tafwile, lelo alefilwa ukwima pa busanshi bwakwe, ifi e fyo cilingile ukuba: 19 Nga ca kutila kuti aima no kwendako panse ne nkonto, ninshi uwamuumine talingile ukukandwa. Afwile fye ukulamulipila pa nshita iyo ashilebomba imilimo mpaka akapolelele.

20 “Nga ca kuti shikulu auma umusha wakwe umwaume nelyo umusha wakwe umwanakashi ne nkonto ica kuti afwila na mu minwe yakwe, shikulu wakwe afwile ukukandwa.+ 21 Lelo umusha nga aikala ubushiku bumo nelyo shibili, shikulu wakwe tafwile ukukandwa pantu amushitile mu ndalama shakwe.

22 “Nga ca kuti abaume babili balelwishanya kabili umo apunka umwanakashi uuli ne fumo ica kuti no mwana wakwe afuma+ lelo takuli uufwile,* uwacimupunka akafute ukulingana ne fyo umulume wa mwanakashi akamupingula; kabili bakapingula balingile basuminisha ifyo bamupingula.+ 23 Lelo nga kwaba uwafwa, lyena uwamwipaya afwile ukufwa,*+ 24 ilinso pa linso, ilino pa lino, ukuboko pa kuboko, ulukasa pa lukasa,+ 25 ukoca pa koca, icilaso pa cilaso, impumo pa mpumo.

26 “Umuntu nga auma pa linso lya musha wakwe umwaume nelyo pa linso lya musha wakwe umwanakashi ne linso lyatulika, akamuleke akaye umuntungwa pa mulandu wa linso lyakwe.+ 27 Kabili nga akuula ilino lya musha wakwe umwaume nelyo ilya musha wakwe umwanakashi, akamuleke akaye umuntungwa pa mulandu wa lino lyakwe.

28 “Nga ca kuti ing’ombe yacena umwaume nelyo umwanakashi ku nsengo ica kuti afwa no kufwa,+ iyo ing’ombe bakaipoole amabwe mpaka ikafwe kabili bekailya; lelo umwine wa ng’ombe tabafwile ukumukanda. 29 Lelo nga ni kale yatampa ukucena abantu no mwine balimwebapo lelo alifilwa ukuisunga, kabili yaipaya umwaume nelyo umwanakashi, iyo ng’ombe balingile ukuipoola amabwe mpaka yafwa, no mwine na o akepaiwe. 30 Nga bamupingula icifuta mulandu,* akalipile fyonse ifyo bakamupingula pa kuti alubule umweo wakwe. 31 Nampo nga yacenene umulumendo nelyo umukashana ica kuti afwa no kufwa, mukapingule umwine wa ng’ombe ukulingana na aya amafunde. 32 Ing’ombe nga yacenene umusha umwaume nelyo umusha umwanakashi ica kuti afwa no kufwa, umwine wa ng’ombe akalipile shikulu wa musha amashekele* 30, kabili iyo ing’ombe ikapoolwe amabwe mpaka ikafwe.

33 “Umuntu nga afimbula pa cilindi, nelyo nga aimba icilindi, lelo tafimbilepo kabili ing’ombe nangu impunda yawilamo, 34 umwine wa cilindi alingile ukufuta.+ Afwile ukulipila umwine wa nama, lelo inama iifwile ikaba yakwe. 35 Nga ca kuti ing’ombe ya muntu umo yapunka ing’ombe ya muntu umbi kabili yafwa no kufwa, lyena bakashitishe ing’ombe ya mweo no kwakana indalama baishitishishapo; kabili balingile ukwakana inama iifwile. 36 Nga ni kale yatampa ukucena inama shimbi kabili umwine tabikako amano ya kuisunga, afwile ukufuta ing’ombe pa ng’ombe, lelo iyafwa ikaba yakwe.

22 “Umuntu nga aiba ing’ombe nelyo impaanga kabili aipaya nelyo aishitisha, akafute ing’ombe 5 pa ng’ombe imo kabili akafute impaanga 4 pa mpaanga imo.+

2 (“Umupuupu+ nga bamusanga aleingila mu ng’anda kabili bamupuma ica kuti afwa no kufwa, uwamwipaya tabakamupeele umulandu wa mulopa. 3 Lelo nga aisa mu kwiba ninshi akasuba nakatula, uwamwipaya ninshi ali no mulandu wa mulopa.)

“Uwibile* afwile ukufuta. Nga takwete ica kufuta, ninshi bakamushitishe pa fyo aibile. 4 Ico aibile nga casangwa kuli ena ninshi cicili ica mweo, nampo nga ni ng’ombe nangu impunda nelyo impaanga, alingile ukufuta inama shibili.

5 “Umuntu nga atwala ifitekwa fyakwe ku kulya mwi bala lyakwe nangu mwi bala lya myangashi kabili aleka ifitekwa fyakwe fyayalya na mwi bala lya muntu umbi, afwile ukufuta umwine we bala ifisabo ifyawamisha ifya mwi bala lyakwe nelyo imyangashi iyawamisha iya mwi bala lyakwe.

6 “Umulilo nga watampa ukupya kabili wa-ambukila ifimpusa fya myunga ne myanshi* ya ngano nelyo ingano isho bashilaseepa nangu ibala, uusonteke umulilo afwile ukufuta pa fipiile.

7 “Umuntu nga asungisha indalama nelyo ifipe ku munankwe kabili bafibila mu ng’anda yakwe, uwibile nga amoneka, afwile ukufuta ifyo ebile imiku ibili.+ 8 Uwibile nga tamoneke, ninshi umwine wa ng’anda bakamupalamike kuli Lesa wa cine+ pa kuti bakamone nga tewaibile ifipe fya munankwe. 9 Nga kwaba umuntu uuletunganya umunankwe ukuti alisunga icishili cakwe, nampo nga ni ng’ombe, impunda, impaanga, ica kufwala, nelyo conse ico alufya ico engatila, ‘Candi!’ bonse babili bakatwale umulandu wabo kuli Lesa wa cine.+ Uo Lesa akatila e uli no mulandu, akafute umunankwe fibili pali cimo.+

10 “Umuntu nga apeela umunankwe impunda nelyo ing’ombe nangu impaanga nelyo icitekwa cimbi pa kuti amusungile, kabili cafwa nelyo calemana nangu bacisenda ninshi tapali nangu umo uumweneko, 11 uo bapeele ukusunga akalape kuli Yehova ukuti tasendele ifintu fya munankwe; kabili umwine wa ifyo fintu afwile ukusumina ifyo umunankwe alanda. Uo bapeele ukusunga talingile ukufuta umunankwe.+ 12 Lelo inama nga baiba ninshi euisunga, afwile ukufuta umwine. 13 Nga ca kuti iciswango e caipeye icitekwa, alingile ukuleta ifyasheleko pa kuti umwine ashininkishe. Tafwile ukufuta pa citekwa ico iciswango caipeye.

14 “Lelo nga ca kutila umuntu ayashima icitekwa ca munankwe kabili calemanina nelyo cafwila ku wacashime, ninshi uwacashime alingile ukufuta. 15 Nomba nga calemanina nelyo cafwila ku mwine, ninshi uwacashime tafwile ukufuta. Nga ca kuti alilipile pa kwashima, ninshi talingile ukulipila shimbi pa kumufuta.

16 “Nomba nga ca kuti umwaume asembeleka nacisungu uushakobekelwa kabili alaala nankwe, afwile ukulipila impango ilyo ashilaba umukashi wakwe.+ 17 Nangu ca kuti wishi akaaninina fye ukumufya kuli ena, uwamusembeleke afwile fye ukulipila indalama isho engalipila pali nacisungu.

18 “Mwikaleka umwanakashi umuloshi akabe no mweo.+

19 “Onse uwalaala ne nama afwile ukwipaiwa.+

20 “Onse uwatuulila tulesa ilambo mu cifulo ca kutuulila Yehova, afwile ukwipaiwa.+

21 “Tamulingile ukulacusha uwafuma ku calo cimbi nelyo ukumutitikisha+ pantu mwafumine ku calo cimbi ilyo mwaleikala mu calo ca Egupti.+

22 “Tamufwile ukulacusha mukamfwilwa nelyo umwana wa nshiwa.+ 23 Nga mwamucusha ica kuti alilila kuli ine, nangu cikabe shani nkomfwa ukulila kwakwe;+ 24 kabili ubukali bwandi bukaba ngo mulilo uulebilima, kabili nkamwipaila ku lupanga, kabili abakashi benu bakaba bamukamfwilwa na bana benu bakaba abana ba nshiwa.

25 “Nga wakongwesha umupiina* pa bantu bandi, wikacita nga filya abakongwesha kaloba bacita. Wikamupingula isha kulundapo.+

26 “Nga wapoka ica kufwala ca munobe pa kuti cibe iciikatilo pa ndalama akongola,*+ ufwile ukumubwesesha ilyo akasuba takalawa. 27 Pantu e ca kufwala fye akwata, e ca kufimba umubili* wakwe. Cinshi akaifimba pa kulaala?+ Nga alilila kuli ine, nangu cikabe shani nkomfwa, pantu ndi wa luse.*+

28 “Mwilapontela Lesa kabili mwilasaalula*+ intungulushi* ya bantu benu.+

29 “Mwilashimunuka ukupeelapo fimo pa fingi ifyo mwasombola na pa mwangashi uwingi na pa mafuta aya mu fya kukaminamo fyenu.+ Abana benu abaume amabeli mulempeela.+ 30 Ifi e fyo mulecita ku ng’ombe yenu na ku mpaanga yenu:+ Pa nshiku 7 yakulaba na nyina. Lelo pa bushiku bwalenga 8 muleipeela kuli ine.+

31 “Mufwile ukuba aba mushilo kuli ine,+ kabili mwilalya nangu cimo ica mu mpanga ico iciswango caipaya.+ Mulepoosela imbwa.

23 “Mwilatandanya ilyashi lya bufi.+ Mwilaba kambone wa lufyengo pa kuti mube ku lubali lwa mubifi.+ 2 Mwilakonkelela icinabwingi icilecita ifyabipa, kabili mwilalanda ifya bufi pa kuti mufyenge umuntu pa mulandu fye wa kukonkelela icinabwingi. 3 Ilyo mulepingula umulandu wa mulanda, mwilawila ku lubali lwakwe pa mulandu fye wa kuti mulanda.+

4 “Nga wasanga ing’ombe ya mulwani obe nelyo impunda yakwe iilubile, ukaibweseshe kuli ena.+ 5 Nga wamona impunda ya wakupata naikala ninshi ili ne cipe icafina pa numa, wikaisha. Ufwile ukumwafwako ukuikakula icipe.+

6 “Wilafyenga umulanda pa kupingula umulandu wakwe.+

7 “Wilabepesha umuntu umulandu uo ashicitile, kabili wilaipaya uwa kaele no mulungami pantu nshakatile uwacita ica musango uyu nalungika.*+

8 “Wilapoka amafisakanwa, pantu amafisakanwa yafiisha pa menso ya bamona bwino kabili kuti yafulunganya amashiwi ya balungami.+

9 “Mwilatitikisha abalebeshi. Mwalishiba ifyo cumfwika ukuba umulebeshi,* pantu mwali abalebeshi mu calo ca Egupti.+

10 “Mulebyala imbuto mu mabala yenu kabili mulesombola ifisabo mu myaka 6.+ 11 Lelo mu mwaka walenga 7 mwikalalima amabala yenu, mukaleyaleka fye, pa kuti abapiina abo mwaba nabo bakalelyamo; kabili ifyo bakalashamo inama sha mu mpanga shikalalya. Ifi fine e fyo mufwile ukucita na ku mabala yenu aya myangashi na ku mabala yenu aya miolife.

12 “Mulebomba imilimo yenu mu nshiku 6, lelo pa bushiku bwalenga 7 mwilabomba, pa kuti ing’ombe shenu ne mpunda shenu shiletuusha, na pa kuti abana baume ba basha benu abanakashi na balebeshi baletuusha.+

13 “Mulekonka fyonse ifyo mwebele;+ kabili mwilalumbula amashina ya tulesa tumbi. Mwilayalanda mu tunwa twenu.+

14 “Mulekwata umutebeto wandi imiku itatu mu mwaka.+ 15 Mukalekwata Umutebeto wa Mukate Uushatutumuka.+ Ilyo fye inshita yafika mu mweshi wa Abibu,*+ mukalelya umukate uushatutumuka pa nshiku 7 ukulingana fye ne fyo namweba, pantu pali iyi inshita e po mwafumine mu Egupti. Takuli uulingile ukwisa minwe nkutwa ku cinso candi.+ 16 Na kabili mukalekwata Umutebeto wa Kuseepa,* uwa fisabo ifya balilapo ukupya ifya milimo yenu, ifyo mwalimine mwi bala;+ kabili mukalekwata Umutebeto wa Kulonganika* pa mpela ya mwaka, ilyo mwalonganika ifyo mwalimine.+ 17 Abaume benu bonse bakalemonekela kuli Shikulu wa cine, Yehova,+ imiku itatu mu mwaka.

18 “Mwilatuulila umulopa we lambo lyandi pamo ne fyatutumuka. Na mafuta mutuula pa mitebeto yandi yelaikala ubushiku bonse ukufika ulucelo.

19 “Mukaleleta ifisabo ifyawamisha pa fyabalilapo ukupya ifya mu mushili ku ng’anda ya kwa Yehova Lesa wenu.+

“Mwilaipikila akana ka mbushi mu mukaka wa kwa nyina.+

20 “Ndetuma malaika uwa kuba pa ntanshi yenu+ pa kuti alemucingilila ilyo muleya kabili akamutwala ku cifulo ico namupekanishisha.+ 21 Mukalekutika kuli ena kabili mukalemumfwila. Mwikamupondokela pantu takamwelele imembu shenu,+ pantu aleishila mwi shina lyandi. 22 Lelo nga mwakulamumfwila kabili nga mwakulacita fyonse ifyo nkalamweba, nkaba umulwani wa balwani benu kabili nkalalwisha abakalamulwisha. 23 Pantu malaika wandi akaba pa ntanshi yenu kabili akamutwala ku bena Amore, ku bena Hiti, ku bena Perisi, ku bena Kanaani, ku bena Hibi, na ku bena Yebusi, kabili nkabalofya.+ 24 Mwilakontamina balesa babo nelyo ukutunkwa ukubabombela,+ kabili mwilacita ifyo bacita. Lelo mulingile ukonaula balesa babo kabili mufwile ukutobaula ifyaimikwa fyabo ifya mabwe.+ 25 Mukalebombela ne Yehova Lesa wenu,+ kabili nkalamupaala, mukalakwata ifya kulya na menshi.+ Nkamucingilila ku malwele.+ 26 Amafumo ya banakashi ba mu calo cenu tayakaleonaika kabili tamwakabe uushakulakwata abana,+ kabili nkalenga mukaleikala imyaka iingi.*

27 “Ilyo mushilafika nkalenga abantu bakalentiina,+ kabili nkalenga bonse abo mukalakumanya bakaleba mu cimfulumfulu, kabili nkalenga abalwani benu bonse bakafulumuke.+ 28 Ilyo mushilafika nkalenga abantu bakafuupuke,*+ kabili nkalenga abena Hibi, abena Kanaani, na bena Hiti, bakafulumuke.+ 29 Nshakabatamfye mu calo mu mwaka umo, pa kuti icalo cikashala icibolya ica kuti ne fiswango fikafule sana.+ 30 Nkalabatamfya panono panono, mpaka mukafule ne calo cikabe icenu.+

31 “Nkabika umupaka wenu ukufuma kuli Bemba Wakashika ukufika kuli bemba wa baPelishiti kabili ukafuma ku matololo ukafike ku Mumana;*+ pantu nkalenga mukacimfye abekala muli ico calo kabili mukabatamfyamo.+ 32 Mwikapangana nabo icipangano kabili mwikapangana na balesa babo.+ 33 Tabafwile ukwikala mu calo cenu, pa kuti bekalenga mukamembukile. Nga mukalabombela balesa babo, nangu cikabe shani mukailetela amafya.”+

24 Lyena Yehova aebele Mose ati: “Nina ulupili, iwe na Aarone, Nadabu na Abihu+ na bakalamba 70 aba bena Israele, kabili munkontamine apatali. 2 Kabili iwe Mose niwe fye upalame kuli ne Yehova; lelo aba bambi bepalamako, kabili abantu bonse abashala tabafwile ukunina ulupili.”+

3 Lyena Mose alibwelele kabili alondolwelele abantu fyonse ifyo Yehova alandile e lyo na mafunde abapeele.+ Kabili abantu bonse ba-asukiile pamo abati: “Fyonse ifyo Yehova alandile twakulacita.”+ 4 E ico Mose alembele fyonse ifyo Yehova amwebele.+ Lyena acelele ukukuula iciipailo mwi samba lya lupili. Aimike na mabwe 12 ayaleimininako imikowa 12 iya kwa Israele. 5 Pa numa atumine abalumendo abena Israele, kabili batuuliile Yehova umutuulo wa koca na malambo ya mutende,+ ing’ombe ishilume. 6 Lyena Mose ayakenye umulopa pa kati, umo aubikile mu mbale, e lyo umbi ausanshile pa ciipailo. 7 Lyena abuulile ibuuku lya cipangano no kubelengela abantu.+ Kabili abantu batile: “Fyonse ifyo Yehova alandile twakulacita kabili twakulamumfwila.”+ 8 E ico Mose abuulile umulopa, asansa abantu+ e lyo abeba ati: “Uyu e mulopa wa cipangano ico Yehova apangene na imwe ukulingana na mashiwi yonse aya.”+

9 Mose na Aarone, Nadabu na Abihu na bakalamba 70 aba bena Israele baninine ulupili, 10 kabili bamwene Lesa wa kwa Israele.+ Mwi samba lya makasa yakwe mwalemoneka kwati pantu bakubatila na mabwe ya safiri kabili mwali umwalengama nge myulu.+ 11 Taipeye bashimucindikwa ba bena Israele,+ kabili balimwene icimonwa ca kwa Lesa wa cine ilyo balelya no kunwa.

12 Yehova nomba aebele Mose ati: “Nina ulupili wise kuli ine kabili wikale pa lupili. Nalakupeela amabwe ayapaapaatala apo nalalemba amafunde ne fipope ifyo abantu balingile ukulakonka.”+ 13 E ico Mose na Yoshua+ umubomfi wakwe balimine, kabili Mose aninine ulupili lwa kwa Lesa wa cine.+ 14 Lelo aebele abakalamba ati: “Shaleni pano mpaka tukabwele kuli imwe.+ Mwalashala na Aarone na Huri.+ Onse uwakwata umulandu, aleya kuli bena.”+ 15 Lyena Mose aninine ulupili ninshi ikumbi lilekupa ulupili.+

16 Ubukata bwa kwa Yehova+ bwatwalilile ukuba pa Lupili lwa Sinai,+ kabili ikumbi lyafimbile ulupili pa nshiku 6. Pa bushiku bwalenga 7 Lesa mwi kumbi aitile Mose. 17 Abena Israele abaletamba, balemona ubukata bwa kwa Yehova kwati mulilo uulebilima pa muulu wa lupili. 18 Lyena Mose aingile mwi kumbi kabili aile pa muulu wa lupili.+ Kabili Mose ali pa lupili inshiku 40 akasuba no bushiku.+

25 Lyena Yehova aebele Mose ati: 2 “Eba abena Israele bandetele umusangulo; umpokele umusangulo wandi ku muntu onse uwalaitemenwa ukusangula.+ 3 Uyu e musangulo uo ufwile ukupoka kuli bena: golde,+ silfere,+ umukuba,+ 4 ubushishi bwa bluu, ubushishi bwa masako ya mpaanga ubwakashikila, insalu iya kashika ce, insalu iisuma, insalu ya masako ya mbushi, 5 impapa sha mpaanga ishilume ishatumpikwa mu fyakashika, impapa sha basilu,* ifimuti fya munganunshi,+ 6 amafuta ya mu nyali,+ amafuta ya balsamu aya kubika mu mafuta ya kusubilako+ na mu bubani ubwanunkila,+ 7 no tumabwe twa shohamu no tumabwe tumbi utwa kubika pali efode+ na pe tumba lya pa cifuba.+ 8 Bakampangile umwa kumpepela kabili nkekala nabo.+ 9 Itenti lya mushilo ne fipe fya liko fyonse mukafipange ukulingana ne fyo nalakulanga.+

10 “Bakapange icipao,* bakacipangile ne fimuti fya munganunshi, cikabe imikono* ibili na hafu mu butali, kabili umukono umo na hafu mu bwipi, kabili cikasansame umukono umo na hafu.+ 11 Lyena ukabikeko golde iyalopololwa.+ Ukaibike mu kati na kunse, kabili lwa pa muulu, ukashingulusheko utwa golde utwa kuyemfya icipao.+ 12 Kabili ukabikeko utwa kupishamo imitembo utwa golde utuli 4 pa muulu wa moolu 4 aya ciko. Tubili ku lubali lumo na tumbi tubili ku lubali lumbi. 13 Kabili imitembo ukaipangile ne fimuti fya munganunshi ukabikeko na golde.+ 14 Ukapishe imitembo mu twakupishamo utuli mu mbali ya Cipao pa kuti eyo mukalesendelako Icipao. 15 Imitembo ikaleikala mu twakupishamo utwa Cipao; tamufwile ukuisolomonamo.+ 16 Ndi no kukupeela Amabwe ya Cipangano ayapaapaatala,+ ukayabike mu Cipao.

17 “Ukapange inkupiko ya golde iyalopololwa, ikabe imikono ibili na hafu mu butali no mukono umo na hafu mu bwipi.+ 18 Ukapange bakerubi babili aba golde; ukabomfye sando pa kubapanga kabili ukababike ku mpela shibili isha nkupiko.+ 19 Ukabike kerubi umo ku mpela imo iya nkupiko na kerubi umbi ku mpela imbi. 20 Bakerubi bakafungulwile amapindo yabo yabili mu muulu pa kuti yakacinge inkupiko,+ kabili bakaloshanye. Ifinso fya bakerubi fikaloshe pa nkupiko. 21 Ukabike inkupiko+ pa muulu wa Cipao, kabili mu Cipao ukabikemo Amabwe ya Cipangano ayapaapaatala ayo ndi no kukupeela. 22 Pa muulu wa nkupiko+ e po nkamonekela kuli iwe kabili e po nkalandila na iwe. Pa kati ka bakerubi babili abali pa cipao ca Cipangano, e po nkakwebela amafunde yonse ayo ufwile ukweba abena Israele.

23 “Ukapange ne tebulo+ lya fimuti fya munganunshi, likabe imikono ibili mu butali no mukono umo mu bwipi kabili likasansame umukono umo na hafu.+ 24 Ukabikeko golde iyalopololwa, kabili mu mbali ye tebulo ukashingulushemo golde iya kuyemfya itebulo. 25 Ukabikeko ipulanga ilili ulupi lumo* mu bwipi ukushinguluka itebulo, kabili kwi samba ye pulanga ukashingulusheko golde iya kuyemfya itebulo. 26 Ukapangileko utwakupishamo imitembo utwa golde tune, kabili ukatubike pa makoona yane apo amoolu yane yasuntinkanina ne tebulo. 27 Tukapalame kwi pulanga kabili e mo mukalepisha imitembo pa kusenda itebulo. 28 Ukapange imitembo ya fimuti fya munganunshi no kubikako golde, kabili eyo mukalesendelako itebulo.

29 “Pe tebulo ukapangilepo ne mbale, amakapu, imitondo ne mbale shafonka umwa kwitulwila umutuulo wa mwangashi. Ukafipangile na golde iyalopololwa.+ 30 Kabili lyonse ukalebika umukate+ wa kutuula ku cinso candi pe tebulo.

31 “Ukapange ica kutekapo inyali+ ica golde iyalopololwa. Ukabomfye sando pa kucipanga. Cifwile ukukwata ishinte, umukonso, imisambo, utumabula,* intombo, na maluba.+ 32 Ica kutekapo inyali cikakwate imisambo 6, imisambo itatu ikabe ku lubali lumo na imbi itatu ikabe ku lubali lumbi. 33 Kuli cila musambo wa ku lubali lumo ukapangileko utumabula tutatu utwaba nga maluba ya mualmonde, ukapangileko ne ntombo na maluba kabili fikatobenkane. Na kuli cila musambo wa ku lubali lumbi ukapangileko utumabula tutatu utwaba nga maluba ya mualmonde, ukabikeko ne ntombo na maluba kabili fikatobenkane. Ifi e fyo imisambo 6 ikafume ku mukonso wa ca kutekapo inyali. 34 Ku mukonso wa ca kutekapo inyali ukapangileko utumabula 4 utwaba nga maluba ya mualmonde, ukabikeko ne ntombo na maluba kabili fikatobenkane. 35 Ukabike ulutombo lumo panshi ya misambo ibili iya kubalilapo iikafuma ku mukonso, ulutombo na lumbi ukalubike panshi ya misambo ibili iikakonkapo, kabili ulutombo lumbi ukalubike panshi ya misambo ibili iya kulekeleshako. Ifi e fyo imisambo 6 iikafuma ku mukonso ikabe. 36 Ica kutekapo inyali conse kumo ne ntombo ne misambo ukafipangile na golde iyalopololwa kabili ukabomfye sando pa kupanga.+ 37 Ukacipangile inyali 7, kabili inyali nga shayaka, shikalasanika pa ncende iili pa ntanshi ya ciko.+ 38 Utwa kumanikilako twa ici ica kutekapo inyali ne fya kuponenamo ifilefuma ku ciku icilepya fikabe ifya golde iyalopololwa.+ 39 Ica kutekapo inyali pamo ne fipe fyonse ukafipangile na golde iyalopololwa iyafina italanti* limo. 40 Ufwile ukufipanga ukulingana ne fyo wamona pa lupili.+

26 “Ukapange itenti lya mushilo.+ Ukalipangile no tumatenti 10 utwapangilwa no bushishi ubusuma ubwapyatwa bwino, no bushishi bwa bluu, no bushishi bwakashikila no bwakashika ce. Pa tumatenti ukapikwilepo bakerubi.+ 2 Akalitenti kamo na kamo kakalepe imikono* 28 kabili mu bwipi kakabe imikono 4. Utumatenti tonse tukalingane.+ 3 Ukasuntinkanye utumatenti 5 kamo ku kanankwe, no tumatenti tumbi 5 ukatusuntinkanye kamo ku kanankwe. 4 Ukapange utwa kukofyamo utwa bushishi bwa bluu pa mpela ya tumatenti uto usuntinkenye, ifyo fine e fyo ukacite na pa mpela ya tumatenti tumbi apo tukasuntinkanina no tumatenti tumbi utusuntinkene. 5 Ukapange utwa kukofyamo utuli 50 pa mpela ya tumatenti uto usuntinkenye, no twa kukofyamo utuli 50 pa mpela ya tumatenti tumbi uto usuntinkenye pa kuti tukaloshanye apo tukasuntinkanina. 6 Ukapange utwa kukofeshako utwa golde utuli 50 kabili eto ukabomfye pa kusuntinkanya imbali shibili ishe tenti pa kuti likabe fye itenti lya mushilo limo.+

7 “Kabili ukapange utumatenti twa masako ya mbushi+ utwa kufimba pe tenti lya mushilo. Ukapange utumatenti 11.+ 8 Akalitenti kamo na kamo kakalepe imikono 30 kabili mu bwipi kakabe imikono 4. Utu utumatenti 11 tukalingane. 9 Ukasuntinkanye utumatenti 5 tweka no tumatenti 6 nato tweka, kabili akalitenti kalenga 6 akali pa ntanshi ye tenti lya mushilo ukakapete pa kati. 10 Kabili ukapange utwa kukofyamo utuli 50 pa mpela ya tumatenti uto usuntinkenye, no twa kukofyamo utuli 50 pa mpela ya tumatenti tumbi apo imbali shibili ishe tenti shikasuntinkanina. 11 Ukapange utwa kukofeshako utwa mukuba utuli 50 no kutukofya mu twa kukofyamo, e lyo ukalundanye imbali shibili ishe tenti pa kuti likabe fye limo. 12 Hafu ye tenti ilikashalako likakopokele ku numa ye tenti lya mushilo. 13 Itenti ilikashalako e likakopokela mu mbali ye tenti lya mushilo, kabili ku lubali lumo kukabe umukono umo na ku lubali lumbi umukono umo, pa kuti likafimbe imbali shonse shibili.

14 “Kabili ukapange ica kufimba pe tenti ica mpapa sha mpaanga ishilume ishatumpikwa mu fyakashika e lyo ne ca kufimba pa muulu ica mpapa sha basilu.+

15 “Ukapange amafulemu+ ye tenti lya mushilo aya fimuti fya munganunshi aya kwimika.+ 16 Ifulemu limo na limo likasansame imikono 10 kabili mu bwipi likabe umukono umo na hafu. 17 Kwi fulemu limo na limo kukabe utwa kushimpilako tubili, kamo ku lubali lumo kambi ku lubali lumbi. E fyo ukapange amafulemu yonse aye tenti lya mushilo. 18 Ukapange amafulemu 20 aye tenti lya mushilo, yakabele ku kapinda ka ku kulyo.

19 “Ukapange amashinte ya silfere 40 apakwiminina+ amafulemu 20: amashinte yabili apakwiminina ifulemu limo na mashinte yabili yakabe pe fulemu limo na limo ilyakonkapo ilili no twa kushimpilako tubili.+ 20 Ku lubali lumbi ulwe tenti lya mushilo, ku kapinda ka ku kuso, ukapangileko amafulemu 20 21 na mashinte ya yako aya silfere 40, amashinte yabili apakwiminina ifulemu limo na mashinte yabili yakabe pe fulemu limo na limo ilyakonkapo. 22 Ku numa ye tenti lya mushilo, ku masamba, kwena ukapangileko amafulemu 6.+ 23 Ukapange amafulemu yabili yakabe pa makoona ku numa ye tenti lya mushilo. 24 Ukapangile ifulemu ne fimuti fibili ifyalingana kabili fikekatane pa muulu ukufika pa kakupishamo ulubango lwa kubalilapo. Ifi fine e fyo ne fulemu lya ku lubali lumbi likabe. E yakaba amakoona yabili. 25 Kabili kukabe amafulemu 8 na mashinte ya yako aya silfere 16, amashinte yabili apakwiminina ifulemu limo na mashinte yabili yakabe pe fulemu limo na limo ilyakonkapo.

26 “Ukapange imango sha fimuti fya munganunshi, 5 isha ku mafulemu ya ku lubali lumo ulwe tenti lya mushilo+ 27 ne mango 5 isha ku mafulemu ya ku lubali lumbi ulwe tenti lya mushilo, ne mango 5 isha ku mafulemu ya ku numa ye tenti lya mushilo, ku masamba. 28 Ulubango lwa pa kati lukafume ku mpela ukufika ku mpela.

29 “Ku mafulemu ukabikeko golde,+ kabili ukapange utwa kupishamo imango utwa golde, kabili ku mango ukabikeko golde. 30 Ukemike itenti lya mushilo ukulingana ne fyo nakulangile pa lupili.+

31 “Ukapange insalu ya kucingilako.+ Ukaipangile no bushishi bwa bluu, no bushishi ubwakashikila, no bwakashika ce, no bushishi ubusuma ubwapyatwa. Mu nsalu ukapikwilemo bakerubi. 32 Ukaikobeke ku nceshi 4 isha cimuti ca munganunshi isho babikako golde. Utwa kukobekako tufwile ukuba utwa golde. Inceshi shikeminine pa mashinte ya silfere 4. 33 Ukakobeke insalu ya kucingilako ku twa kukofeshako kabili ukalete icipao ca Cipangano+ ku numa ya nsalu ya kucingilako. Insalu ya kucingilako ikalekanya Umuputule wa Mushilo+ no Muputule wa Mushilo Nga Nshi.+ 34 Ukabike inkupiko pa cipao ca Cipangano icikaba mu Muputule wa Mushilo Nga Nshi.

35 “Ukabike itebulo kunse ya nsalu ya kucingilako, ne ca kutekapo inyali+ ukacibike ku kapinda ka ku kulyo ake tenti lya mushilo, cikaloshanye ne tebulo; kabili ukabike itebulo ku kapinda ka ku kuso. 36 Ukapikule ica kucinga pa mwinshi we tenti lya mushilo. Ukacipikwile no bushishi bwa bluu, no bushishi ubwakashikila, no bwakashika ce no bushishi ubusuma ubwapyatwa bwino.+ 37 Ukapange inceshi 5 isha cimuti ca munganunshi, ukwa kukobeka ica kucingilako kabili kuli ishi inceshi ukabikeko golde. Utwa kukofeshako tukabe utwa golde, kabili inceshi ukashipangile amashinte 5 aya mukuba.

27 “Ukapange iciipailo ica fimuti fya munganunshi;+ cikabe imikono* 5 mu mbali shonse kabili cikasansame imikono itatu.+ 2 Pa makoona ya ciko 4 ukapangilepo ulusengo+ lumo lumo; insengo shikabe ku ciipailo, kabili ku ciipailo ukabikeko umukuba.+ 3 Ukapange imbeketi sha kupoosamo imito,* na mafosholo, ne mbale shafonka, ne fya kutunkwilako, ne fya kubikamo umulilo, kabili ifipe fya ciko fyonse ukafipangile no mukuba.+ 4 Ukapange ica mukuba icaba nge sumbu, kabili pa makoona ya ciko 4 ukapangilepo utwa kupishamo imitembo utwa mukuba kamo kamo. 5 Ukabike ica mukuba icaba nge sumbu panshi ya mung’ong’o, kabili cikabele pa kati ukufuma pa muulu wa ciipailo. 6 Ukapange imitembo ya ciipailo. Ukaipangile ne fimuti fya munganunshi, kabili ukabikeko umukuba. 7 Ukapishe imitembo mu twa kupishamo pa kuti imitembo ikaleba mu mbali shibili isha ciipailo pa kucisenda.+ 8 Iciipailo ukacipange nge cibokoshi ca mapulanga. Ukacipange nga filya fine nakulangile pa lupili.+

9 “Itenti lya mushilo likakwate ulubansa.+ Ku kapinda ka ku kulyo aka lubansa ukacingeko insalu iisuma iyapyatwa. Ikalepe imikono 100 kuli ulu lubali.+ 10 Kukabe ifya kukobekako insalu ifya mukuba 20 na mashinte ya fiko aya mukuba 20. Utwa kukofeshako utwa ifi ifya kukobekako insalu no twa kukofyamo tukabe utwa silfere. 11 Insalu ya kucingila ku kapinda ka ku kuso nayo ikalepe imikono 100, ne fya kukobekako insalu ifya mukuba fikabe 20 na mashinte ya fiko aya mukuba 20. Utwa kukofeshako utwa ifi ifya kukobekako insalu no twa kukofyamo tukabe utwa silfere. 12 Lelo mu bwipi bwa lubansa ku masamba ukabikeko insalu iya kucingako, ikalepe imikono 50, ne fya kukobekako insalu ifya mukuba 10 na mashinte ya fiko 10. 13 Ku kabanga ukutulila akasuba, ulubansa lukabe imikono 50 mu bwipi. 14 Insalu ya kucinga ku lubali lumo ulwa mpongolo ikalepe imikono 15, ifya kukobekako insalu ifya mukuba fikabe fitatu na mashinte ya fiko yakabe yatatu.+ 15 Kabili ku lubali lumbi ulwa mpongolo insalu ya kucingako ikalepe imikono 15, ifya kukobekako insalu fikabe fitatu na mashinte ya fiko yakabe yatatu.

16 “Pa mpongolo ya lubansa pakabe ica kucingapo ica mikono 20, icapangilwa no bushishi bwa bluu, no bwakashikila, no bwakashika ce, no bushishi ubusuma ubwapyatwa, ifyapikwilwa pamo,+ kabili pakabe ifya kukobekako insalu 4 na mashinte ya fiko 4.+ 17 Ifya kukobekako insalu fyonse ifikashinguluka ulubansa fikabe no twa kukakilako utwa silfere no twa kukofeshako utwa silfere, lelo amashinte ya fiko yena yakabe aya mukuba.+ 18 Ulubansa lukabe imikono 100 mu butali,+ na mu bwipi lukabe imikono 50, kabili insalu ya kucingilako ulubansa ikalepe ukulola mu muulu imikono 5, kabili ikabe insalu iisuma iyapyatwa bwino, na mashinte ya fya kukobekako insalu yakabe aya mukuba. 19 Ifipe fyonse ifikaba mwi tenti lya mushilo ne fibombelo fimbi, ne mpoopo shonse isha liko, ne mpoopo shonse isha mu lubansa, fikabe ifya mukuba.+

20 “Ukebe abena Israele ukuti bakakuletele amafuta ya muolife ayasuma nga nshi aya kusanikila pa kuti inyali shikaleaka lyonse.+ 21 Mwi tenti lya kukumaninamo na Lesa, kunse ya nsalu ya kucingilako iili mupepi ne cipao ca Cipangano,+ Aarone na bana bakwe abaume bakaleteyanya inyali pa kuti shikaleaka icungulo ukufika ulucelo pa cinso ca kwa Yehova.+ Abena Israele bakalekonka ici icipope mu nkulo shabo shonse.+

28 “Pa bena Israele ubulepo Aarone+ munonko na bana bakwe abaume,+ Nadabu na Abihu,+ Eleasari na Itamari+ pa kuti babe bashimapepo bandi.+ 2 Ukabilile Aarone munonko ifya kufwala fya mushilo, ifikalenga akabe uwacindama kabili uwayemba.+ 3 Ukebe bonse abaishiba sana imilimo* kabili abo nalenga baba aba mano,+ bakabilile Aarone ifya kufwala ifikalenga akabe uwa mushilo, pa kuti akabe shimapepo wandi.

4 “Ifi e fya kufwala ifyo bakabile: itumba lya pa cifuba,+ efode,+ ica kufwala cabula amaboko,+ umwingila uo bapikwilamo utubokoshi, insalu ya kupomba ku mutwe+ no mushipi wa nsalu uukalamba;+ bakabilile Aarone munonko na bana bakwe abaume ifi ifya kufwala fya mushilo, pa kuti alemombela umulimo wa bushimapepo. 5 Pa kubila ifi ifya kufwala, abaishiba sana imilimo bakabomfye golde, ubushishi bwa bluu, ubushishi bwakashikila, ubwakashika ce no bushishi ubusuma.

6 “Pa kubila efode bakabomfye ubushishi bwa bluu, ubushishi bwakashikila, ubwakashika ce no bushishi ubusuma ubwapyatwa, kabili bakapikwilemo golde.+ 7 Iyi efode ikakwate utwa pa mabeya tubili apo ikalundinkanina. 8 Umushipi uukalamba+ uwa kukakilako efode uwapikulwa kabili uwabililwa kuli efode, na o wine bakaupikwile na golde, ubushishi bwa bluu, ubwakashikila, ubwakashika ce no bushishi ubusuma ubwapyatwa.

9 “Ukabuule utumabwe twa shohamu tubili+ kabili ukalembepo amashina ya bana ba kwa Israele,+ 10 amashina 6 pa kalibwe kamo na mashina yambi 6 pa kalibwe kambi ukulingana ne fyo bakonkana ukufyalwa. 11 Uulemba pa mabwe akalembe pa tumabwe tubili amashina ya bana ba kwa Israele, nga filya fine engalemba pa ca kufwatikilako.+ Lyena ukafyantike utu utumabwe mu twa kufyantikamo utwa golde. 12 Ukabike utumabwe tubili pa twa pa mabeya ya pali efode pa kuti tukabe utwa kwibukishishako abana ba kwa Israele,+ kabili Aarone afwile ukulasendela amashina yabo ku cinso ca kwa Yehova pa twa pa mabeya yakwe pa kuti tukabe utwa kwibukishishako. 13 Ukapange utwa golde utwa kufyantikamo utumabwe 14 e lyo no twapala imyando tubili utwa golde iyalopololwa,+ kabili ukakake uto tumyando ku twa pa mabeya.+

15 “Ukebe kapikula akapange itumba lya pa cifuba ilya bupingushi.+ Akapikule itumba nge fyo akapikula insalu ya efode. Akabomfye golde, ubushishi bwa bluu, ubwakashikila, ubwakashika ce no bushishi ubusuma ubwapyatwa.+ 16 Ili tumba likabe ne mbali 4 ishalingana nga lyapetwa, kabili likalepe nge cisansa* mu mbali shonse. 17 Ukabikepo utumabwe mu mitande 4. Mu mutande wa kubalilapo mukabe rubi, topasi na emarodi. 18 Mu mutande wa bubili mukabe tokwasi, safiri na yaspi. 19 Mu mutande wa butatu mukabe leshemu, agate na ametusti. 20 Mu mutande walenga 4 mukabe krusoliti, shohamu na yade. Bakatufyantike mu twa kufyantikamo utwa golde. 21 Utumabwe tulingile ukuba 12 ukulingana na mashina ya bana abaume aba kwa Israele. Pa kalibwe kamo na kamo bakalembepo nga filya bengalemba pa ca kufwatikilako. Ishina limo na limo likeminineko umukowa umo pa mikowa 12.

22 “Pe tumba lya pa cifuba ukapangilepo utwapala utumyando twa golde iyalopololwa.+ 23 Pe tumba lya pa cifuba ukapangilepo utwa kukofyamo tubili utwa golde, kabili ukatubike pa mpela shibili isha pe tumba lya pa cifuba. 24 Ukakake utumyando tubili utwa golde ku twa kukofyamo tubili utuli pa mpela ye tumba lya pa cifuba. 25 Ukakake ulubali lumbi ulwa tumyando tubili ku twa kukofyamo utwa pa mabeya ya pali efode ku ntanshi. 26 Ukapange utwa kukofyamo tubili utwa golde no kutubika pa mpela shibili mu ca mu kati ce tumba lya pa cifuba.+ 27 Ukapange utwa kukofyamo na tumbi tubili utwa golde no kutubika ku ntanshi ya efode, pe samba lya twa pa mabeya tubili utwa pali efode, mupepi na apo bakalundanishisha efode, pa muulu wa mushipi uukalamba uwapikulwa uwa kuli efode.+ 28 Ututambo twa bluu tukekashe itumba lya pa cifuba kabili bakatukakile ku twa kukofyamo utwa kuli efode, pa kuti itumba lya pa cifuba likalasela pali efode, lelo likaleba pa muulu wa mushipi uukalamba uwapikulwa.

29 “Aarone akalefwala itumba lya pa cifuba ilya bupingushi apakaba amashina ya bana ba kwa Israele pa mutima wakwe pa kwingila mu Muputule wa Mushilo, pa kuti yaleba ica kwibukisha inshiku shonse ku cinso ca kwa Yehova. 30 Ukabike Urimu na Tumimu+ mwi tumba lya pa cifuba ilya bupingushi, kabili fikaleba pa mutima wa kwa Aarone ilyo aisa ku cinso ca kwa Yehova. Kabili lyonse Aarone akalesendela pa mutima wakwe ifya kwishibilako ubupingushi pa bena Israele ku cinso ca kwa Yehova.

31 “Ukabile ica kufwala cabula amaboko ica kufwalila pali efode, ica bushishi bwa bluu bweka bweka.+ 32 Cikakwate umukoshi apa kupushisha umutwe. Mu mukoshi wa ciko mukapikwilwe ica ku-ukosha icapikulwa na kapikula. Umukoshi wa ciko ukabe nga filya umukoshi wa ca kufwala ca mushilika waba, pa kuti wikalepuka. 33 Ku mufukilo ukapangileko utwa kuyemfya utwapala amapomegranate utwa bushishi bwa bluu, ubwakashikila no bwakashika ce, ukushinguluka umufukilo, kabili mukabike inyenjele sha golde pa kati ka twapala amapomegranate. 34 Pa kubika ukaleti apa wabikapo inyenjele ya golde apa wakonkeshapo utwapala umupomegranate ukushingulusha umufukilo wa ca kufwala cabula amaboko. 35 Aarone akalecifwala pa kubomba, kabili iciunda ico cikalapanga cifwile ukumfwika ilyo aingila mu muputule wa mushilo ku cinso ca kwa Yehova na lintu afumamo pa kuti ekafwa.+

36 “Ukapange akalilata akabeeka aka golde iyalopololwa kabili ukalembepo nga filya bengalemba pa ca kufwatikilako, ukalembepo ifilembo fya kuti: ‘Yehova e mwine wa mushilo.’+ 37 Ukakakakile pa nsalu ya kupomba ku mutwe+ kabili ukakakakile na kamwando ka bluu; akalilata akabeka kakaleba pa ntanshi ya nsalu ya kupomba ku mutwe. 38 Kakaleba pa mpumi ya kwa Aarone, kabili umo nga abembuka, Aarone e ukaba no mulandu pa lubembu ulo abena Israele bakacita ku fya mushilo+ ifyo bakalatuula. Lyonse kakaleba pa mpumi yakwe pa kuti Yehova engabapokelela.

39 “Ukapikule umwingila wa tubokoshi uwa nsalu iisuma, ukapange ne ca kupomba ku mutwe ica nsalu iisuma, kabili ukapikule no mushipi uukalamba.+

40 “Abana ba kwa Aarone+ nabo ukabapikwile imingila, imishipi, e lyo ne fya kupomba ku mitwe ifikalenga bakacindame kabili bakalemoneka bwino.+ 41 Ukafwike ifi Aarone munonko na bana bakwe abaume abo ali nabo, kabili ukabasube+ no kubapeela amaka+ no kulenga bakabe aba mushilo, kabili bakalemombela bushimapepo. 42 Ukababilile no tuputula twa mu kati utwa nsalu utwa kufimba ifya mfwalo.+ Tukalepe ukufuma mu musana ukufika mu matanta. 43 Aarone na bana bakwe abaume bakaletufwala ilyo baingila mu cikuulwa ca kukumaninamo na Lesa nelyo ilyo bapalamina ku ciipailo ku kubombela mu muputule wa mushilo, pa kuti bekapeelwa umulandu kabili bekafwa. Aarone na bakatuntuka muli ena bakalekonka ili ifunde umuyayaya.

29 “Ifi e fyo ukacite pa kubasangulula pa kuti bakalemombela bushimapepo: Ukabuule ing’ombe iyana iilume, impaanga ishilume shibili ishishalemana,+ 2 umukate uushatutumuka, umukate uushatutumuka uwasubwako amafuta+ no mukate uwapaapaatala uushatutumuka uwasubwako amafuta. Iyi imikate ukaipangile no buunga bwa ngano ubwapeleka 3 kabili ukaibike mu museke no kuituula umutuulo ninshi ili mu museke mwine,+ ukaituulile pamo ne ng’ombe iilume ne mpaanga ishilume shibili.

4 “Ukatwale Aarone na bana bakwe abaume pa mwinshi we tenti lya kukumaninamo+ na Lesa, kabili ukabasambe mu menshi.+ 5 Lyena ukabuule ifya kufwala+ kabili ukafwike Aarone umwingila, ica kufwala icabula amaboko ica kufwalilapo efode, efode ne tumba lya pa cifuba, kabili ukamukake mu musana+ umushipi uukalamba uwapikulwa uwa kuli efode. 6 Ukamupombe insalu ku mutwe kabili ukabikeko icishibilo ca kuipeela ica mushilo;+ 7 kabili ukabuule amafuta ya kusubilako,+ ukayapongolwele pa mutwe wakwe pa kuti akabe shimapepo.

8 “Lyena ukapalamike abana bakwe abaume kabili ukabafwike imingila+ 9 kabili ukakake Aarone na bana bakwe imishipi, ukabapombe ne fya kufwala ku mitwe; kabili aba na bakatuntuka muli bena e bakalaba bashimapepo, ili ifunde talyakatale alyaluka.+ Ifi e fyo ukacite pa kupeela Aarone na bana bakwe abaume amaka ya kuba bashimapepo.+

10 “E lyo ukalete ing’ombe iilume kwi tenti lya kukumaninamo na Lesa, kabili Aarone na bana bakwe abaume bakabike iminwe yabo pa mutwe wa ng’ombe.+ 11 Ukepaile ing’ombe iilume pa cinso ca kwa Yehova, pa mwinshi we tenti lya kukumaninamo na Lesa.+ 12 Ukatumpike umunwe obe mu mulopa wa ng’ombe iilume e lyo ukaushinge ku nsengo sha ciipailo,+ kabili umulopa uukashala ukaupongolwele apatekwa iciipailo.+ 13 Lyena ukabuule amafuta yonse+ ayafimba amala, na mafuta ya kwi libu, ne mfyo shibili na mafuta ya shiko, kabili ukafifutumwine pa ciipailo.+ 14 Lelo umunofu wa ng’ombe no mukupo wa iko na mafi ya iko ukafyocele kunse ya nkambi. Ing’ombe iilume ikaba mutuulo wa pa lubembu.

15 “Lyena ukabuule impaanga iilume imo, kabili Aarone na bana bakwe abaume bakabike iminwe yabo pa mutwe wa mpaanga iilume.+ 16 Ukepaye impaanga iilume kabili ukabuule umulopa wa iko no ku-usansa ku mbali shonse isha ciipailo.+ 17 Ukaputaule impaanga iilume fipimfya fipimfya, kabili ukasamfye amala ya iko+ na molu ya iko no kubika pamo ifipimfya fya iko kumo no mutwe wa iko. 18 Ukafutumwine impaanga iilume yonse pa ciipailo. Mutuulo wa koca uwa kwa Yehova, uwa kacena akasuma.*+ Mutuulo wa pa mulilo uwa kwa Yehova.

19 “Lyena ukabuule impaanga iilume imbi, kabili Aarone na bana bakwe abaume bakabike iminwe yabo pa mutwe wa mpaanga iilume.+ 20 Ukepaye impaanga iilume kabili ukabuulepo umulopa wa iko no ku-ushinga pa kalebelebe ka kutwi kwa ku kulyo ukwa kwa Aarone na pa tulebelebe twa matwi ya ku kulyo aya bana bakwe abaume na pa fikumo fyabo ifya ku maboko ya ku kulyo na pa fikondo fikalamba ifya ku makasa yabo aya ku kulyo, kabili ukasanse umulopa ku mbali shonse isha ciipailo. 21 Lyena ukabuulepo umulopa uukaba pa ciipailo na mafuta ya kusubilako,+ e lyo ukasanse Aarone ne fya kufwala fyakwe na bana bakwe abaume ne fya kufwala fyabo, pa kuti Aarone na bana bakwe abaume bakabe aba mushilo ne fya kufwala fyabo nafyo fikabe ifya mushilo.+

22 “Lyena ukabuule amafuta ya mpaanga iilume, e kutila amafuta ya ku mucila, amafuta ayafimba amala, amafuta ya kwi libu, imfyo shibili na mafuta ya shiko+ no kuulu kwa ku kulyo, pantu iyi impaanga ya kutuula pa kubika Aarone na bana bakwe pali bushimapepo.+ 23 Ukabuule no mukate uwabulungana no mukate uwasubwako amafuta no mukate uwapaapaatala mu museke wa mikate iishatutumuka iili pa cinso ca kwa Yehova. 24 Ukapeele Aarone na bana bakwe abaume fyonse ifi mu minwe, kabili ukafisunshe uku no ku, uyu mutuulo wa kusunsha ku cinso ca kwa Yehova. 25 Lyena ukafibuule mu minwe yabo no kufifutumwina pa ciipailo pa muulu wa mutuulo wa koca. Uyu mutuulo ukaba wa kacena akasuma* kuli Yehova. Mutuulo wa pa mulilo uwa kwa Yehova.

26 “Lyena ukabuule icisao* ca mpaanga iilume iya kutuula pa kubika Aarone na bana bakwe pali bushimapepo,+ kabili ukacisunshe uku no ku pa kuti cikabe umutuulo wa kusunsha ku cinso ca kwa Yehova, kabili ici e cikaba inama yobe. 27 Ukasangulule icisao ca mutuulo wa kusunsha pamo no kuulu kwa mutuulo wa mushilo uko wasunshishe kabili uko wafumishe ku mpaanga iilume iya kutuula pa kubika Aarone na bana bakwe pali bushimapepo+ iyo watuuliile Aarone na bana bakwe abaume. 28 Ifi fikabe fya kwa Aarone na bana bakwe abaume. Ili ifunde talyakatale alyaluka kabili abena Israele bakalelikonka. Fikaba e musangulo wabo uwa mushilo+ uo bakalapeela Yehova ukufuma pa malambo yabo aya mutende.+

29 “Ifya kufwala fya mushilo+ ifya kwa Aarone fikaba fya bana bakwe abaume+ abakamupyana nga babasuba kabili nga bababika pali bushimapepo. 30 Shimapepo onse uwamupyana pa bana bakwe abaume kabili uwaingila mwi tenti lya kukumaninamo na Lesa mu kubombela mu muputule wa mushilo, akafifwale pa nshiku 7.+

31 “Ukabuule impaanga iilume iya kutuula pa kubika Aarone na bana bakwe pali bushimapepo, kabili ukepikile iyi nama mu muputule wa mushilo.+ 32 Aarone na bana bakwe abaume bakaliile+ impaanga iilume no mukate uuli mu museke pa mwinshi we tenti lya kukumaninamo na Lesa. 33 Bakalye umutuulo wa kubelelwapo uluse pa membu uo bakatuula ilyo bakababika pali bushimapepo na pa kubasangulula. Lelo uushili shimapepo* tafwile ukulyako pantu fya mushilo.+ 34 Nga kwashalako inama ya kutuula pa kubika Aarone na bana bakwe pali bushimapepo no mukate ukufika ulucelo, ukafyoce.+ Tabafwile ukufilya pantu fya mushilo.

35 “Ifi e fyo ukacite kuli Aarone na ku bana bakwe abaume ukulingana na fyonse ifyo nakweba. Cikakusendela inshiku 7 pa kubapeela amaka ya kuba bashimapepo.+ 36 Cila bushiku ukaletuula ing’ombe iilume iya kuba umutuulo wa pa lubembu pa kuti imembu shikale-elelwa, na pa kuti iciipailo cikaleba icasanguluka, kabili ukalepongolwela amafuta pa ciipailo pa kuti cikaleba ica mushilo.+ 37 Cikakusendela inshiku 7 pa kuti ukasangulule iciipailo, kabili ukacisangulule pa kuti cikabe ica mushilo nga nshi.+ Onse uufwile ukukumya ku ciipailo afwile ukuba uwa mushilo.

38 “Ifi e fyo ukalatuula pa ciipailo cila bushiku: utwana twa mpaanga tubili utwa mwaka umo.+ 39 Ukaletuula akana ka mpaanga kamo ulucelo, na kana ka mpaanga kambi ukalekatuula ilyo fye akasuba kawa.*+ 40 Akana ka mpaanga aka kubalilapo ukakatuulile pamo na oma imo* iya buunga bwapeleka ubo basaakanya na mafuta ya muolife ayasuma nga nshi aya mu makapu yatatu aya hini,* no mutuulo wa mwangashi amakapu yatatu aya hini. 41 Ukaletuula akana ka mpaanga akalenga bubili ilyo fye akasuba kawa.* Ukalekatuulila pamo ne ngano no mwangashi nge fyo ukalatuula ulucelo. Ukabe mutuulo wa kacena akasuma,* uyu mutuulo wa koca uwa kwa Yehova. 42 Mu nkulo shenu shonse mukaletuula umutuulo wa koca pa mwinshi we tenti lya kukumaninamo ku cinso ca kwa Yehova, apo nkamoneka kuli imwe pa kulanda na iwe.+

43 “E po nkamoneka ku bena Israele, kabili ubukata bwandi bukalenga pakabe apa mushilo.+ 44 Nkasangulula itenti lya kukumaninamo kumo ne ciipailo, kabili nkasangulula Aarone na bana bakwe abaume+ pa kuti bakalemombela bushimapepo. 45 Nkekala na bena Israele, kabili nkaba Lesa wabo.+ 46 Kabili bakeshiba ukuti nine Yehova Lesa wabo, uwabafumishe mu calo ca Egupti pa kuti ndeikala nabo.+ Nine Yehova Lesa wabo.

30 “Ukapange iciipailo ica kocelapo ububani;+ ukacipangile ne fimuti fya munganunshi.+ 2 Cikabe umukono umo* mu mbali shonse, kabili cikasansame imikono ibili. Insengo sha ciko shikapangilwe kumo ne ciipailo.+ 3 Ukabike golde iyalopololwa: pa muulu wa ciko, mu mbali ya ciko shonse na ku nsengo sha ciko; kabili ukashingulusheko umung’ong’o wa golde mu mbali pa muulu. 4 Kabili ukapangileko utwa kupishamo imitembo tubili utwa golde. Ukatubikile mwi samba lya mung’ong’o wa golde mu mbali, uku tubili no ku tubili, umwa kupisha imitembo ya kucisendelako. 5 Imitembo ukaipangile ne fimuti fya munganunshi kabili ukabikeko golde. 6 Ukacibike pa ntanshi ya nsalu ya kucingilako iikaba mupepi ne cipao ca Cipangano+ ne nkupiko ya pa cipao ca Cipangano, apo nkamoneka kuli iwe.+

7 “Cila lucelo Aarone+ akaleocelapo ububani ubwanunkila+ nga awamya inyali.+ 8 Kabili Aarone nga ayasha inyali ilyo fye akasuba kawa,* akaleoca ububani. Mutuulo wa bubani uukalatuulwa lyonse kuli Yehova mu nkulo shenu shonse. 9 Mwikocelapo ububani bumbi+ nelyo umutuulo wa koca nelyo umutuulo wa ngano, kabili mwiketulwilapo umutuulo wa mwangashi. 10 Aarone akalesangulula insengo sha ciko umuku umo mu mwaka.+ Akaleshisangulwila no mulopa wa pa mutuulo wa pa lubembu+ umuku umo mu mwaka mu nkulo shenu shonse. Yehova amona ukuti iciipailo ca mushilo nga nshi.”

11 Lyena Yehova aebele Mose ati: 12 “Lyonse ilyo wapenda abana baume ba kwa Israele bonse,+ cila muntu akalepeela Yehova icilubula pa mweo wakwe ilyo ulebapenda, pa kuti icikuko ciikesa pali bena ilyo ulebapenda. 13 Ifi e fyo bonse abo bakalapenda balingile ukupeela: hafu we shekele* ukulingana ne cipimo ce shekele ilya pa cifulo ca kupepelapo.*+ Amagera* 20 yalingene ne shekele limo. Umusangulo wa kupeela Yehova+ ni hafu we shekele. 14 Onse uuli ne myaka 20 no kucilapo uwapendwa akapeele Yehova umusangulo.+ 15 Abakankaala bekalapeela ifikacila pali hafu we shekele,* kabili abapiina bekalapeela ifinono pali hafu we shekele, pa kupeela Yehova umusangulo wa kulubula imyeo yenu. 16 Ukapoke indalama sha silfere ku bena Israele isha kulubwilako imyeo yabo kabili ukashibomfye ku milimo ya mwi tenti lya kukumaninamo na Lesa, pa kuti shikalelenga Yehova akaleibukisha abena Israele, kabili shikabe sha kulubwilako imyeo yenu.”

17 Kabili Yehova aebele Mose ati: 18 “Ukapange ica kubikamo amenshi ya kusamba ica mukuba ne ca kucitekapo ica mukuba;+ lyena ukacibike pa kati, uku itenti lya kukumaninamo na Lesa e lyo uku iciipailo, kabili ukabikemo amenshi.+ 19 Apa e po Aarone na bana bakwe abaume bakalasambila ku minwe na ku makasa.+ 20 Pa kwingila mwi tenti lya kukumaninamo na Lesa, nelyo ilyo baleya mu kubombela pa ciipailo na mu kufutumwina Yehova imituulo ya pa mulilo, bakalesamba mu menshi pa kuti bekafwa. 21 Bakalesamba ku minwe na ku makasa pa kuti bekafwa, kabili bakalekonka ili funde mu nkulo shabo shonse, ena na bana bakwe.”+

22 Yehova aebele Mose no kuti: 23 “Ukabuule ifi ifyacilapo ukununkila: muri iyatikama amashekele 500, kinamone iyanunkila ikabe hafu ya cipimo ca muri, amashekele 250, na kalamosi uwanunkila amashekele 250, 24 na kasia amashekele 500 ukulingana ne cipimo ce shekele ilya pa cifulo ca kupepelapo,*+ na hini* imo iya mafuta ya miolife. 25 Lyena ukapangemo amafuta ya mushilo aya kusubilako; ukayasaakanye bwino bwino.*+ Yakabe amafuta ya mushilo aya kusubilako.

26 “Ukasube itenti lya kukumaninamo na Lesa+ e lyo ne cipao ca Cipangano, 27 itebulo ne fipe fya liko fyonse, ica kutekapo inyali ne fipe fya ciko, iciipailo ca kocelapo ububani, 28 iciipailo ca mutuulo wa koca ne fipe fya ciko fyonse, ne ca kubikamo amenshi ya kusamba ne ca kucitekapo. 29 Ukafipeele kuli ine pa kuti fikabe ifya mushilo nga nshi.+ Onse uulingile ukufikatako afwile ukuba uwa mushilo.+ 30 Kabili ukasube Aarone+ na bana bakwe abaume,+ kabili ukabapeele kuli ine pa kuti bakalemombela bushimapepo.+

31 “Ukebe abena Israele auti, ‘Aya yakatwalilile ukuba amafuta yandi aya mushilo aya kusubilako mu nkulo shenu shonse.+ 32 Te ya kusuba pa mubili wa muntu, kabili mwikapanga ayaba nga aya. Ya mushilo. Lyonse mukaleyamona ukuti ya mushilo. 33 Onse uukapanga amafuta ayaba nga aya, no ukasuba umwaume uushili wa mu lupwa lwa kwa Aarone, akepaiwe.’”+

34 Kabili Yehova aebele Mose ati: “Buula ifyanunkila ifi:+ natafu, onuki, kelebena uwanunkila no bubani ubwabuuta ubusuma nga nshi. Fyonse fikabe ifya cipimo cimo cine. 35 Ukapangemo ububani;+ pa kubupanga, ukasakaanye bwino bwino ifyanunkila, ukalungemo umucele,+ bukabe ubusuma nga nshi kabili ubwa mushilo. 36 Ukatwepo bumo mpaka bukabe ubwapeleka kabili ukabike bumo mupepi ne cipao ca Cipangano mu cikuulwa ca kukumaninamo na Lesa umo nkamoneka kuli iwe. Mukalebumona ukuti bwa mushilo nga nshi. 37 Tamufwile ukupanga ububani ubo basakaanyamo ifi ifyanunkila+ ubwa kubomfya mwe bene, pantu Yehova abumona ukuti bwa mushilo. 38 Onse uukapanga ubu ububani pa kuti alenunshako, bakamwipaye.”

31 Yehova aebele Mose no kuti: 2 “Mona, ninsala* Besalele+ mwana Uri, umwana wa kwa Huri, uwa mu mukowa wa kwa Yuda.+ 3 Nkamupeela umupashi wa kwa Lesa pa kuti akabe na mano, akaleiluka no kwishiba ifya kupanga ifyalekanalekana, 4 ifya kupanga ifintu ifisuma, ifya kupanga ifintu ukubomfya golde, silfere no mukuba, 5 ifya kuputula utumabwe+ ne fya kupanga umwakutufyantika, ne fya kubasa ifintu ifya misango yonse.+ 6 Na kabili ninsonta Oholiabu+ umwana wa kwa Ahisamaki uwa mu mukowa wa kwa Dani uwa kumwafwa, kabili ndelenga abantu bonse abaishiba sana imilimo* babe na mano, pa kuti bakapange fyonse ifyo nkwebele:+ 7 itenti lya kukumaninamo na Lesa,+ icipao ca Cipangano+ ne nkupiko ya ciko,+ ifipe fyonse ifya ili itenti, 8 itebulo+ ne fipe fya liko, ica kutekapo inyali ica golde iyalopololwa ne fipe fya ciko fyonse,+ ica kocelapo ububani,+ 9 iciipailo ca mutuulo wa koca+ ne fipe fya ciko fyonse, ica kubikamo amenshi ya kusamba ne ca kucitekapo,+ 10 ifya kufwala ifyapikulwa bwino icine cine, ifya kufwala fya mushilo ifya kwa Aarone shimapepo, ifya kufwala fya bana bakwe abaume ifya kubombelamo bushimapepo,+ 11 amafuta ya kusubilako no bubani bwanunkila ifya pa cifulo ca mushilo.+ Bakacita fyonse ifyo nkwebele.”

12 Kabili Yehova aebele Mose ati: 13 “Eba abena Israele auti, ‘Mulesunga maka maka amasabata yandi,+ pantu e cishibilo cili pali ine na imwe mu nkulo shenu e pa kuti mwishibe ukuti ine ne Yehova nine ndemusangulula. 14 Mulesunga Isabata pantu lya mushilo kuli imwe.+ Uwalisuula afwile ukwipaiwa. Umuntu* onse uwabomba umulimo pali ubu bushiku, alingile ukwipaiwa.+ 15 Mu nshiku 6 e mo mulebomba imilimo, lelo ubushiku bwalenga 7 lisabata lya kutuusha ku milimo yonse.+ Bushiku bwa mushilo ubwa kwa Yehova. Onse uwabomba umulimo mu bushiku bwe Sabata alingile ukwipaiwa. 16 Abena Israele bafwile ukulasunga Isabata; bakaleibukisha Isabata mu nkulo shabo shonse. Ici cipangano ca muyayaya. 17 Cishibilo ca muyayaya icili pali ine na pa bena Israele,+ pantu mu nshiku 6 e mo Yehova abumbile imyulu ne sonde kabili mu bushiku bwalenga 7 e mo alekele ukubomba kabili e mo atendeke ukutuusha.’”+

18 Nomba ilyo Lesa apwishishe fye ukulanda na Mose pa Lupili lwa Sinai, amupeele amabwe yapaapaatala yabili aya Cipangano,+ amabwe apo Lesa alembele no munwe wakwe.+

32 Awe abantu bamwene ukuti Mose akokola ukutentemuka ulupili.+ E ico bailekunga Aarone no kumweba abati: “Tupangile lesa uwa kututungulula,+ pantu tatwishibe icicitikiile uyu Mose, uwatutungulwile ilyo twalefuma mu Egupti.” 2 E lyo Aarone abebele ati: “Fuuleni amasikiyo ya golde ayali ku matwi+ ya bakashi benu, ku matwi ya bana benu abaume na bana benu abanakashi kabili muyalete kuli ine.” 3 E ico abantu bonse batendeke ukufuula amasikiyo ya golde ayali ku matwi yabo kabili bayatwele kuli Aarone. 4 Lyena apokele golde kuli bena kabili apangilemo icimpashanya ca mwana wa ng’ombe+ ukubomfya cesulo. Nabo batendeke ukulanda abati: “Uyu e Lesa obe, we Israele, uwakutungulwile ilyo walefuma mu calo ca Egupti.”+

5 Ilyo Aarone amwene ifi, akuulile iciipailo pa ntanshi ya mwana wa ng’ombe. Lyena abilikishe ati: “Mailo kukaba umutebeto wa kwa Yehova.” 6 E ico ubushiku bwakonkelepo balicelele ukubuuka kabili batampile ukutuula imituulo ya koca na malambo ya mutende. Pa numa abantu balikele balalya no kunwa. Kabili balimine balasangalala.+

7 E lyo Yehova aebele Mose ati: “Tentemuka ulupili ubwelelemo pantu abantu bobe abo wafumishe mu calo ca Egupti nabayonaula.+ 8 Nabangufyanya ukuleka ukukonka amafunde yandi.+ Nabapanga icimpashanya ca mwana wa ng’ombe kabili balecifukamina no kucituulila amalambo kabili baleti, ‘Uyu e Lesa obe, we Israele, uwakutungulwile ilyo walefuma mu calo ca Egupti.’” 9 Kabili Yehova aebele Mose ati: “Nimona ukuti aba bantu ni bacintomfwa.*+ 10 E ico nomba leka mbalofye ku bukali bwandi ububilima ngo mulilo, kabili nkulenge ube uluko ulukalamba.”+

11 Lyena Mose apaapeete* Yehova Lesa wakwe+ ati: “Mwe Yehova, cinshi mulefwaila ubukali bwenu ububilima ngo mulilo bonaule abantu benu abo mwafumishe mu calo ca Egupti ku maka ayakalamba na ku kuboko ukwakosa?+ 12 Bushe abena Egupti tabakalande abati, ‘Ali na mapange ayabipa pali bena ilyo abafumishe mu Egupti. Alefwaya ukubepaila mu mpili kabili abalofye pano isonde’?+ Mwicita ifyo mulefwaya ukucita kabili mwileka ubukali bwenu ububilima ngo mulilo bulofye abantu benu. 13 Ibukisheni Abrahamu, Isaki na Israele ababomfi benu, abo mwailapileko mwe bene amuti, ‘Nkafusha abakatuntuka mu mwana* obe nge ntanda sha mu muulu+ kabili nkabapeela icalo conse ici ico nasalile pa kuti cikabe cabo umuyayaya.’”+

14 E ico Yehova taletele ububi ubo alefwaya ukuleta pa bantu bakwe.+

15 Lyena Mose alipilibwike atentemuka no lupili ninshi naikata+ amabwe yabili ayapaapaatala aya Cipangano.+ Aya amabwe yalilembelwepo konse kubili. 16 Lesa e wapangile aya amabwe kabili e walembelepo amashiwi yakwe.+ 17 Ilyo Yoshua aumfwile abantu balepunda, aebele Mose ati: “Mu nkambi muleumfwika kwati muli inkondo.” 18 Lelo Mose atile:

19 Ilyo Mose apaleme ku nkambi, amona no mwana wa ng’ombe+ na bantu balecinda, alikalipe kabili ilyo line fye apoosele amabwe ayapaapaatala ayali mu minwe yakwe kabili ayatobeele mwi samba lya lupili.+ 20 Abuulile umwana wa ng’ombe uo bapangile no kumoca kabili alimushonawile asuka aba ulukungu;+ lyena aulwilile ulo lukungu pa menshi no kweba abena Israele ukuti banwe ayo menshi.+ 21 Kabili Mose aipwishe Aarone ati: “Bushe aba bantu bakubeleleke shani pa kuti ulete ulubembu ulukalamba pali bena?” 22 Aarone ayaswike ati: “Mwe shikulu mwikalipa. Mwalishiba bwino ukuti aba bantu balemenena ku kucita ifyabipa.+ 23 E ico banjebele abati, ‘Tupangile lesa uwa kuti aletutungulula pantu tatwishibe icicitikiile uyu Mose uwatutungulwile ilyo twalefuma mu calo ca Egupti.’+ 24 E ico nabebele nati, ‘Onse uukwete golde afuule kabili alete kuli ine.’ E fyo naisungulwile mu mulilo, mwafuma no yu umwana wa ng’ombe.”

25 Mose alimwene ukuti abantu balecita ifyo balefwaya abene pantu Aarone tabaleseshe, e ico bali-iseebenye ku balwani babo. 26 Lyena Mose aiminine pa mpongolo ya nkambi no kutila: “Nani ali ku lubali lwa kwa Yehova? Ese kuli ine!”+ Awe abena Lebi bonse baile ukwali Mose. 27 E lyo abebele ati: “Yehova Lesa wa kwa Israele atila, ‘Cila muntu asende ulupanga lwakwe no kupita mu nkambi ukufuma ku mpongolo imo no kuya ku mpongolo imbi kabili epaye munyina, umwina mupalamano na cibusa wakwe.’”+ 28 Awe abena Lebi balicitile ifyo Mose abebele. E ico bulya bwine bushiku abaume nalimo 3,000 balibepeye. 29 Lyena Mose atile: “Ipeelesheni ukubombela Yehova lelo, pantu cila muntu nalwisha umwana wakwe umwaume na munyina;+ buno bushiku Lesa alemupaala.”+

30 Ubushiku bwakonkelepo Mose aebele abantu ati: “Mwalicita ulubembu ulukalamba, e ico nomba nalayamupaapaatilako kuli Yehova pa kuti amubelele uluse pa lubembu lwenu.”+ 31 E ico Mose abweleele kuli Yehova no kumweba ati: “Ala aba bantu nabacita ulubembu ulukalamba! Baipangiile kalesa ka golde!+ 32 Nomba nga mulefwaya babeleleni uluse pa lubembu lwabo;+ lelo nga tamulefwaya ninshi mumfuute mwi buuku lyenu ilyo mwalemba.”+ 33 Lelo Yehova aebele Mose ati: “Uumembukiile e o ndefuuta mwi buuku lyandi. 34 Nomba kabiye uyetungulula abantu ku cifulo uko nakwebele. Mona! Malaika wandi akakutangilila,+ kabili pa bushiku nkalubulwisha abantu, nkabakanda pa lubembu lwabo.” 35 Lyena Yehova atampile ukukanda abantu pantu Aarone alibapangiile umwana wa ng’ombe uo bamwebele ukuti abapangile.

33 Kabili Yehova aebele Mose ati: “Kabiye pamo na bantu abo watungulwile ilyo mwalefuma mu calo ca Egupti. Kabiyeni ku calo ico nalapile kuli Abrahamu, kuli Isaki na kuli Yakobo nati, ‘Nkapeela abana benu.’*+ 2 Nkatuma malaika uwa kumutangilila+ kabili nkatamfya mu calo abena Kanaani, abena Amore, abena Hiti, abena Perisi, abena Hibi na bena Yebusi.+ 3 Kabiyeni ku calo ukwaba umukaka no buci.+ Lelo ine nshaye na imwe pantu muli bacintomfwa*+ kabili kuti namulofesha mu nshila.”+

4 Ilyo abantu baumfwile aya mashiwi ayaluma, batampile ukuloosha, kabili takwali nangu umo uwafwele utwa kuiyemfya. 5 Yehova aebele Mose ati: “Eba abena Israele auti, ‘Muli bacintomfwa.*+ Mu nshita fye iinono kuti napita mu nkambi yenu no kumulofya.+ E ico nomba fuuleni utwa kuiyemfya ilyo nshilapingula ifya kumucita.’” 6 Kanshi ukufuma fye pa Lupili lwa Horebu, abena Israele tabatalile abafwalapo* utwa kuiyemfya.

7 Nomba Mose abuulile itenti kabili alitanike akatalamukila kunse ya nkambi, kabili alinike ati itenti lya kukumaninamo na Lesa. Onse uwalefwaya ukwipusha Yehova+ fimo aleya kuli ili itenti ilyali kunse ya nkambi. 8 Lyonse Mose nga afuma aya kwi tenti, abantu bonse baleima no kwiminina cila muntu pa mwinshi we tenti lyakwe, kabili balemulolesha mpaka aingila mwi tenti. 9 Mose nga aingila mwi tenti, intumba ye kumbi+ yaleikila yaiminina na pa mwinshi we tenti ninshi Lesa alelanda na Mose.+ 10 Abantu bonse nga bamona intumba ye kumbi naiminina pa mwinshi we tenti, cila muntu aleima e lyo akontama pa mwinshi we tenti lyakwe. 11 Yehova alelanda na Mose icinso ne cinso,+ nga filya fine umuntu engalanda no muntu munankwe. Mose nga abwelela ku nkambi, Yoshua+ mwana Nuni umubomfi wakwe kabili uwalemwafwa,+ ena talefuma mwi tenti.

12 Nomba Mose aebele Yehova ati: “Mwamona, mulenjeba amuti, ‘Tungulula aba bantu,’ lelo tamunjebele uo mukantuma nankwe. Kabili mwatila, ‘Nalikwishiba ishina* kabili nalikutemwa.’ 13 Nga mwalintemwa, shi nengeni njishibe ifyo mucita pa kuti imwishibe,+ kabili mutwalilile ukuntemwa. Ibukisheni no kuti ulu luko bantu benu.”+ 14 E ico amwebele ati: “Ine wine* nkaya na iwe,+ kabili nkalenga ukatuushe.”+ 15 Lyena Mose amwebele ati: “Nga tamwakaye* na ifwe, mwitufumya pano. 16 Bushe abantu bakeshiba shani ukuti ine na bantu benu mwalitutemwa? Nga mwaya na ifwe,+ e lyo abantu bakamona ukuti ine na bantu benu twalipusana na bantu bambi aba pano isonde.”+

17 Kabili Yehova aebele Mose ati: “Ne ci cine ulefwaya nalacita, pantu nalikutemwa kabili nalikwishiba ishina.” 18 Lyena atile: “Mukwai nengeni imone ubukata bwenu.” 19 Lelo atile: “Nalalenga umone ubusuma bwandi bonse, kabili nalabilisha ishina lya kwa Yehova+ kuli iwe; kabili nkapaala uo nkafwaya ukupaala, kabili nkabelela uluse uo nkafwaya ukubelela uluse.”+ 20 Lelo atile: “Te kuti umone icinso candi, pantu takuli umuntu nangu umo uwingamona icinso candi no kuba no mweo.”

21 Kabili Yehova atile: “Wiminine pa cilibwe icili mupepi na apo ndi. 22 Ilyo ndepita no bukata bwandi, ndekubika mu lucengo lwa mu cilibwe, kabili ndekucingilila no kuboko kwandi mpaka mpite. 23 Nga napita, nalafumyapo ukuboko kwandi, kabili walamona fye inuma yandi. Lelo te kuti umone icinso candi.”+

34 Lyena Yehova aebele Mose ati: “Seesa amabwe yabili yabe ayapaapaatala nga ya kubalilapo,+ kabili ine nkalemba pali aya mabwe amashiwi ayaali pa mabwe ya kubalilapo+ ayo watobele.+ 2 Ukaipekanye ulucelo pantu ufwile ukunina Ulupili lwa Sinai ulucelo kabili ukayaiminina mupepi na ine pa muulu wa lupili.+ 3 Lelo umuntu nangu umo ekanina ulupili kano fye iwe, kabili wikaleka umuntu nangu umo akabe mu lupili lonse. Nangu fye ni mpaanga nelyo ing’ombe shikaliila mwi samba lya lupili.”+

4 E ico Mose aseesele amabwe yabili yaba ayapaapaatala nga filya aya ntanshi yaali, kabili acelele ukunina ulupili lwa Sinai nge fyo Yehova amwebele, asendele na mabwe yabili ayapaapaatala mu minwe yakwe. 5 Lyena Yehova atentemwike+ mwi kumbi no kwiminina nankwe palya kabili Yehova abilile ishina lyakwe.+ 6 Yehova apitile pa ntanshi yakwe uku ninshi alebilisha ati: “Yehova, Yehova, Lesa wa luse+ kabili uwa nkumbu,+ uukokola ukukalipa+ kabili uwaba sana no kutemwa ukushipwa*+ ne cine,*+ 7 uulanga aba makana ukutemwa ukushipwa,+ uwelela abantu pa filubo fyabo na pali bumpulamafunde bwabo na pa lubembu,+ lelo uushakafilwe ukukanda abafwile ukukandwa,+ uukandila abana, abeshikulu ne fishikulula+ pa membu sha bashibo.”

8 Awe Mose alyangufyenye ukukontamina panshi, awa no bukupeme. 9 Lyena atile: “Nomba mwe Yehova nga mwalintemwa, ninshi tuye na imwe+ mwe Yehova nangu ca kuti tuli bacintomfwa,*+ kabili mutwelele pa filubo fyesu na pa membu shesu,+ kabili tubuuleni tube abantu benu.” 10 Na o atile: “Mona ndepangana na imwe icipangano: Nkacita ifya kupapusha pa ntanshi ya bantu bobe bonse ifishatala aficitikapo pano isonde ponse nelyo mu nko shonse,+ kabili abantu bonse abo wikala nabo bakamona umulimo wa kwa Yehova, pantu ndemucitila ifya kupapusha.+

11 “Bikeni amano ku fyo ndemweba buno bushiku.+ Moneni ndemutamfishako abena Amore, abena Kanaani, abena Hiti, abena Perisi, abena Hibi na bena Yebusi.+ 12 Mukacenjele pa kuti mwikapangana icipangano na baikala mu calo ico muleyako,+ pantu nga mwacita ifi, cikaba citeyo kuli imwe.+ 13 Lelo mukabongolole ifiipailo fyabo, mukatobaule ne fyaimikwa fyabo ifya mabwe ifyo bapepelapo, kabili mukateme ne fimuti fyabo ifyaimikwa ifyo bapepelapo.*+ 14 Tamufwile ukukontamina lesa umbi+ pantu Yehova aishibikwa ukuti afwaya abantu bakwe balemupepa fye eka.* Ni Lesa uufwaya ukumupepa fye eka.+ 15 Mukacenjele pa kuti mwikapangana icipangano na baikala muli ico calo, pantu ilyo bakalacita ubucende na balesa babo+ no kubepaila amalambo, bamo bakamwita kabili mukayalyako ifya kulya ifyo bakalatuula.+ 16 Lyena nangu cikabe shani mukofya abana benu abaume+ ku bana babo abanakashi, kabili abana babo abanakashi bakacita ubucende na balesa babo kabili bakalenga abana benu abaume bakacite ubucende na balesa ba bakashi babo.+

17 “Mwikapanga balesa abakwenga.+

18 “Mukalekwata Umutebeto wa Mukate Uushatutumuka.+ Mukalelya umukate uushatutumuka pa nshiku 7, ukulingana ne fyo namweba; mukalecita ifi pa nshita yalinga mu mweshi wa Abibu,*+ pantu mu mweshi wa Abibu e mo mwafumine mu Egupti.

19 “Umwaume onse ibeli,* wandi,+ kumo na mabeli ayalume aya fitekwa fyenu fyonse, nampo nga libeli lya ng’ombe nelyo nga lya mpaanga.+ 20 Ibeli lya mpunda mukalelilubula kabili pa kulilubula mukaletuulilamo impaanga. Lelo nga tamulilubwile, ninshi mukalelifuna umukoshi. Abana benu bonse abaume amabeli mulingile ukubalubula.+ Takuli uufwile ukwisa kuli ine minwe nkutwa.

21 “Mukalebomba imilimo mu nshiku 6, lelo pa bushiku bwalenga 7 mukaletuusha.*+ Nangu fye ni mu nshita ya kulima nangu mu ya kusombola, mukaletuusha.

22 “Mukalekwata Umutebeto wa Milungu kabili mukaletuula ifisabo fyabalilapo ukupya nga mwasombola ingano, mukalekwata no Mutebeto wa Kulonganya* pa kwaluka kwa mwaka.+

23 “Abaume benu bonse bakalemonekela kuli Shikulu wa cine, Yehova, Lesa wa kwa Israele+ imiku itatu mu mwaka. 24 Pantu nkatamfya inko mu calo, kabili nkakusha imipaka yenu,+ kabili takwakabe nangu umo uukalafwaya ukumupoka icalo cenu ilyo mukalaya mu kumonekela kuli Yehova Lesa wenu imiku itatu mu mwaka.

25 “Mwilatuulila umulopa we lambo lyandi pamo ne fyatutumuka.+ Kabili tamufwile ukusunga ifyashala pe lambo lya mutebeto wa Cakucilila mpaka ulucelo.+

26 “Mukaleleta ifisabo ifyawamisha pa fyabalilapo ukupya ifya mu mushili ku ng’anda ya kwa Yehova Lesa wenu.+

“Mwikalaipikila akana ka mbushi mu mukaka wa kwa nyina.”+

27 Kabili Yehova aebele Mose ati: “Ufwile ukulemba aya amashiwi,+ pantu ndepangana icipangano na iwe na bena Israele+ ukulingana na aya amashiwi.” 28 Kabili atwalilile ukuba na Yehova pa lupili inshiku 40 akasuba no bushiku. Talelya ifya kulya kabili talenwa amenshi.+ Kabili pa mabwe ayapaapaatala alembelepo* amashiwi ya cipangano, e kutila Amafunde 10.*+

29 Lyena Mose atentemwike ulupili lwa Sinai ninshi nasenda amabwe yabili ayapaapaatala aya Cipangano mu minwe yakwe.+ Ilyo atentemwike ulupili taishibe ukuti icinso cakwe calebengeshima pa mulandu wa kuti afumine mu kulanda na Lesa. 30 Ilyo Aarone na bena Israele bonse baloleshe Mose, bamwene ukuti icinso cakwe calebengeshima kabili balitiinine ukupalama kuli ena.+

31 Lelo Mose alibetile. E ico Aarone na bacilolo bonse aba mu lukuta baile kuli ena, kabili Mose alilandile nabo. 32 Pa numa abena Israele bonse balipaleme kuli Mose kabili abebele amafunde yonse ayo Yehova amupeele pa Lupili lwa Sinai.+ 33 Lyonse ilyo Mose aleleka ukulanda nabo, aleifimba icifimbo ku menso.+ 34 Lelo lyonse ilyo Mose alemonekela kuli Yehova ku kulanda nankwe, alefuula icifimbo mpaka afuma.+ Lyena alebwelela ku bena Israele no kubeba amafunde ayo Lesa alemupeela.+ 35 Kabili abena Israele bamwene ukuti icinso ca kwa Mose calebengeshima; lyena Mose abweseeshe icifimbo pa menso mpaka ilyo aingile na kabili ku kulanda na Lesa.+

35 Pa numa Mose alonganike ulukuta lonse ulwa bena Israele kabili abebele ati: “Ifi e fyo Yehova atwebele ukuti e fyo tulecita:+ 2 Mulebomba imilimo mu nshiku 6, lelo ubushiku bwalenga 7 bukaleba ubwa mushilo, lisabata lya kwa Yehova ilya kutuusha ku milimo yenu yonse.+ Onse uwabomba umulimo pali ubu bushiku akepaiwe.+ 3 Pa bushiku bwe Sabata mwikalakosha umulilo konse uko mukalaikala.”

4 Kabili Mose aebele ulukuta lonse ulwa bena Israele ati: “Yehova alandile ati, 5 ‘Leteleni Yehova umusangulo.+ Lekeni onse uwaitemenwa+ aletele Yehova umusangulo: golde, silfere, umukuba, 6 ubushishi bwa bluu, ubushishi bwa masako ya mpaanga ubwakashikila, insalu iya kashika, insalu iisuma, ubushishi bwa masako ya mbushi,+ 7 impapa sha mpaanga ishilume ishatumpikwa mu fyakashika, impapa sha basilu, ifimuti fya munganunshi, 8 amafuta ya mu nyali, amafuta ya balsamu aya kubika mu mafuta ya kusubilako na mu bubani ubwanunkila,+ 9 utumabwe twa shohamu no tumabwe tumbi utwa kubika pali efode+ na pe tumba lya pa cifuba.+

10 “‘Bonse abaishibisha imilimo*+ pali imwe bese bapange fyonse ifyo Yehova alandile, 11 e kutila, itenti lya mushilo kumo na matenti ya liko ne ca kufimbapo, utwa kukofeshako twa liko na mafulemu ya liko, imango sha liko, inceshi sha liko na mashinte ya liko; 12 Icipao+ ne mitembo ya ciko,+ inkupiko+ ne nsalu ya kucingilako;+ 13 itebulo+ ne mitembo ya liko ne fipe fya liko fyonse no mukate wa kutuula;+ 14 ica kutekapo inyali+ sha kusanika ne fipe fya ciko ne nyali sha ciko na mafuta ya kusanikila;+ 15 iciipailo ca kocelapo ububani+ ne mitembo ya ciko; amafuta ya kusubilako no bubani bwanunkila;+ ica kucingilako pa mwinshi we tenti lya mushilo; 16 iciipailo ca kutuulilapo umutuulo wa koca+ ne ca mukuba icaba nge sumbu ica ciko, imitembo ya ciko ne fipe fya ciko fyonse; ica kubikamo amenshi ya kusamba ne ca kucitekapo;+ 17 insalu sha kucingilako ulubansa,+ ifya kukobekako insalu na mashinte ya fiko, ica kucingilako pa mpongolo ya lubansa; 18 impoopo she tenti lya mushilo ne mpoopo sha mu lubansa ne myando ya shiko;+ 19 ifya kufwala fyapikulwa bwino+ ifya kufwala pa kubombela pa cifulo ca mushilo, ifya kufwala fya mushilo ifya kwa Aarone+ shimapepo ne fya kufwala fya bana bakwe abaume ifya kubombelamo bushimapepo.’”

20 Lyena ulukuta lonse ulwa bena Israele lwafumine apaali Mose. 21 E lyo bonse abo umutima wakuntile,+ na bonse abo umutima walengele baitemenwe ukupeela, baletele umusangulo wa kwa Yehova uwa kubomfya pa kupanga itenti lya kukumaninamo na Lesa, ku milimo yaliko yonse no wa kubomfya pa kupanga ifya kufwala fya mushilo. 22 Abaume na banakashi baleleta fye imisangulo, bonse bali-itemenwe. Baletele utwa kuiyemfeshako utwa banapini, amasikiyo, inindaminwe ne fya kuiyemfya fimbi, e lyo no musango onse uwa fya golde. Bonse baleteele Yehova umutuulo* wa golde.+ 23 Kabili bonse abakwete ubushishi bwa bluu, ubushishi bwa masako ya mpaanga ubwakashikila, insalu iya kashika ce, insalu iisuma, insalu ya masako ya mbushi, impapa sha mpaanga ishilume ishatumpikwa mu fyakashika ne mpapa sha basilu, baliletele. 24 Bonse abalefwaya ukusangula silfere no mukuba baletele umusangulo wa kwa Yehova, kabili bonse abakwete ifimuti fya munganunshi ifya kubomfya ku mulimo onse balifiletele.

25 Abanakashi bonse abaishibishe ukupanga ubushishi+ baletele ubushishi bapangile: ubwa bluu, ubwa kashikila, ubwa kashika ce no bwa buuta ubusuma. 26 Na banakashi bonse abaishibishe ukupanga ubushishi abo imitima yakuntile bapangile ubushishi bwa masako ya mbushi.

27 Kabili bacilolo baletele utumabwe twa shohamu no tumabwe tumbi utwa kubika pali efode na pe tumba lya pa cifuba,+ 28 na mafuta ya balsamu na mafuta ya kusanikila inyali na ya kusubilako+ kabili aya kubika mu bubani ubwanunkila.+ 29 Abaume bonse na banakashi abo imitima yabo yalengele baitemenwe ukupeela, baliletele ifya kubomfya ku mulimo uo Yehova alandiile muli Mose ukuti walingile ukubombwa; abena Israele baleteele Yehova umutuulo wa kuitemenwa.+

30 Lyena Mose aebele abena Israele ati: “Moneni, Yehova nasala Besalele umwana wa kwa Uri, umwana wa kwa Huri uwa mu mukowa wa kwa Yuda.+ 31 Namupeela umupashi wa kwa Lesa pa kuti abe na mano, aleiluka no kwishiba ifya kupanga ifintu ifyalekanalekana 32 ifisuma, ifya kupanga ifintu ukubomfya golde, silfere no mukuba, 33 ifya kuputula utumabwe ne fya kupanga umwakutufyantika, ne fya kubasa ifintu fya misango yonse. 34 Kabili nabika amano ya kusambilisha mu mutima wakwe na mu wa kwa Oholiabu+ umwana wa kwa Ahisamaki uwa mu mukowa wa kwa Dani. 35 Abapeele amano ya kubomba imilimo yonse+ iya fya kupangapanga, aya kuyemfya insalu, aya kupikula ukubomfya ubushishi bwa bluu, ubwa kashikila, ubwa kashika ce, ubwa nsalu iisuma, na ya kupikula insalu. Aba baume bakabomba umulimo onse kabili bakapekanya fyonse ifilefwaikwa ukupanga.

36 “Besalele akabombela pamo na Oholiabu na bantu bonse abaishibisha imilimo* abo Yehova apeela amano no kwiluka pa kuti beshibe ifya kubomba imilimo yonse iya mushilo nga filya fine Yehova alanda.”+

2 Lyena Mose aitile Besalele na Oholiabu na bantu bonse abaishibishe imilimo abo Yehova abikile amano mu mitima yabo,+ bonse abo imitima yalengele baipeeleshe ukubomba umulimo.+ 3 E lyo Mose abapeele umusangulo onse+ uo abena Israele basangwile uwa kubomfya ku mulimo wa mushilo. Lelo abena Israele batwalilile fye ukutwala umutuulo wa kuitemenwa kuli Mose cila lucelo.

4 Nomba ilyo batampile ukubomba umulimo wa mushilo, bonse abaishibishe imilimo batendeke ukulaisa fye 5 kabili bale-eba Mose abati: “Ifyo abantu baleleta fyafula fyacila na pa filefwaikwa ku mulimo Yehova atweba ukubomba.” 6 E ico Mose alandile ukuti babile imbila mu nkambi yonse abati: “Mwe bena Israele, lekeni ukuleta umusangulo wa mushilo.” E fyo abantu babaleseshe ukuletelapo ifintu. 7 Ifyo baletele fyalikumene ukulingana no mulimo onse uwali no kubombwa, kabili fyalipulilenapo.

8 E ico bonse abaishibishe imilimo+ bapangile itenti lya mushilo.+ Babomfeshe utumatenti 10 utwa bushishi ubusuma ubwapyatilwe, utwa bushishi bwa bluu, ubwakashikila no bwakashika ce; kabili apikwililemo* na bakerubi.+ 9 Akalitenti kamo na kamo kalepele imikono* 28, kabili mu bwipi kali imikono 4. Utumatenti tonse twalilingene. 10 Lyena asuntinkenye utumatenti 5, e lyo asuntinkanya na tumbi 5. 11 E lyo apangile utwa kukofyamo utwa bushishi bwa bluu pa mpela ya tumatenti uto asuntinkenye. Ifi fine e fyo acitile na pa mpela ya tumatenti tumbi apo twali no kusuntinkanina no tumatenti tumbi utwasuntinkene. 12 Apangile utwa kukofyamo utuli 50 pa mpela ya tumatenti uto asuntinkenye, kabili apangile utwa kukofyamo utuli 50 pa mpela ya tumatenti tumbi uto asuntinkenye, pa kuti tukaloshanye apo tukasuntinkanina. 13 Na pa kulekelesha apangile utwa kukofeshako utwa golde utuli 50 no kusuntinkanya imbali shibili ishe tenti pa kuti libe fye itenti lya mushilo limo.

14 Lyena apangile utumatenti twa masako ya mbushi utwa kufimba pe tenti lya mushilo. Apangile utuli 11.+ 15 Akalitenti kamo na kamo kalepele imikono 30, kabili mu bwipi kali imikono 4. Utumatenti tonse 11 twalilingene. 16 Kabili alundenye utumatenti 5 tweka no tumatenti 6 nato tweka. 17 Lyena apangile utwa kukofyamo utuli 50 pa mpela ya tumatenti uto asuntinkenye, kabili apangile utwa kukofyamo na tumbi 50 pa mpela ya tumatenti tumbi apo imbali shibili ishe tenti shasuntinkanine. 18 Kabili apangile utwa kukofeshako utwa mukuba utuli 50 utwa kulundanishishako imbali shibili ishe tenti pa kuti libe fye itenti limo.

19 Apangile ica kufimba pe tenti ica mpapa sha mpaanga ishilume ishatumpikwa mu fyakashika e lyo ne ca kufimba pa muulu ica mpapa ya basilu.+

20 E lyo apangile amafulemu ye tenti lya mushilo aya fimuti fya munganunshi+ kabili aliyemike.+ 21 Ifulemu limo na limo lyasanseme imikono 10 kabili mu bwipi lyali umukono umo na hafu. 22 Kwi fulemu limo na limo kwali utwa kushimpilako tubili, kamo ku lubali lumo kambi ku lubali lumbi. Ifi fine e fyo apangile amafulemu yonse aye tenti lya mushilo. 23 E fyo apangile amafulemu ye tenti lya mushilo, apangile ayali 20 ku lubali lwa ku kapinda ka ku kulyo. 24 Lyena apangile amashinte ya silfere 40 apakwiminina amafulemu 20, amashinte yabili apakwiminina ifulemu limo na mashinte yabili pe fulemu limo na limo ilyakonkelepo ilyali no twa kushimpilako tubili.+ 25 Ku lubali lwa ku kapinda ka ku kuso ulwe tenti lya mushilo, apangiileko amafulemu 20 26 na mashinte ya yako aya silfere ayali 40, amashinte yabili apakwiminina ifulemu limo na mashinte yabili apakwiminina ifulemu limo na limo ilyakonkelepo.

27 Ku numa ye tenti lya mushilo ku masamba, apangiileko amafulemu 6.+ 28 Apangile amafulemu yabili aya kubika pa makoona ku numa ye tenti lya mushilo. 29 Aya amafulemu yabili yalilingene kabili yalikatene pa muulu ukufika pa kakupishamo ulubango lwa kubalilapo. Ifi fine e fyo apangile na mafulemu ayali ku lubali lumbi pa makoona yabili. 30 E ico amafulemu yonse pamo yali 8 na mashinte ya yako aya silfere yali 16, pe fulemu limo na limo paleba amashinte yabili.

31 Lyena apangile imango 5 isha fimuti fya munganunshi isha ku mafulemu ya ku lubali lumo ulwe tenti lya mushilo+ 32 ne mango 5 isha ku mafulemu ya ku lubali lumbi ulwe tenti lya mushilo, ne mango 5 isha ku mafulemu ya ku numa ye tenti lya mushilo, ku masamba. 33 Apangile ulubango lwa pa kati ulwafumine ku mpela imo ukufika ku mpela imbi. 34 Abikile golde ku mafulemu, kabili apangile utwa kupishamo imango utwa golde, kabili ku mango alibikileko golde.+

35 Lyena apangile insalu ya kucingilako.+ Aipangile no bushishi bwa bluu, ubwakashikila, ubwakashika ce no bushishi ubusuma ubwapyatwa. Mu nsalu alipikwililemo+ bakerubi.+ 36 Kabili apangile inceshi 4 isha cimuti ca munganunshi isha kukobekako iyi nsalu kabili abikile golde ku nceshi. Apangiileko no twa kukobekako utwa golde, kabili apangile amashinte ya silfere 4 aya ishi nceshi. 37 Lyena apangile insalu ya kucingilako pa mwinshi we tenti iya bushishi bwa bluu, ubwakashikila, ubwakashika ce no bushishi ubusuma ubwapyatwa bwino, abupikwilile pamo,+ 38 apangile ne nceshi 5 isha kukobekako insalu no twa kukobekako twa shiko. Ku muulu wa nceshi na ku fya kwikashishako fya shiko abikileko golde, lelo amashinte ya shiko 5 yena yali aya mukuba.

37 Lyena Besalele+ apangile Icipao+ ica fimuti fya munganunshi. Mu butali cali imikono* ibili na hafu, mu bwipi cali umukono umo na hafu, kabili casanseme umukono umo na hafu.+ 2 Abikileko golde iyalopololwa mu kati na kunse kabili ashingulwisheko utwa golde utwa kuyemfya icipao.+ 3 Pa numa abikileko utwa kupishamo imitembo utwa golde utuli 4, pa muulu wa moolu 4 aya ciko. Abikile tubili ku lubali lumo na tumbi tubili ku lubali lumbi. 4 Kabili apangile imitembo ya fimuti fya munganunshi no kubikako golde.+ 5 Lyena apishishe imitembo ya kusendelako Icipao mu twa kupishamo utwali ku mbali ya Cipao.+

6 Apangile inkupiko ya golde iyalopololwa.+ Mu butali yali imikono ibili na hafu, kabili mu bwipi yali umukono umo na hafu.+ 7 Kabili apangile bakerubi babili+ aba golde. Abomfeshe sando pa kubapanga kabili ababikile ku mpela shibili isha nkupiko.+ 8 Kerubi umo aali ku mpela imo iya nkupiko e lyo kerubi umbi aali ku mpela imbi. Apangile bakerubi ku mpela shonse shibili isha nkupiko. 9 Aba bakerubi babili bafungulwilile amapindo yabo mu muulu pa kuti bacinge inkupiko ku mapindo yabo.+ Baliloshenye kabili baloseshe ifinso fyabo pa nkupiko.+

10 Lyena apangile itebulo ku fimuti fya munganunshi.+ Mu butali lyali imikono ibili, mu bwipi lyali umukono umo, kabili lyasanseme umukono umo na hafu.+ 11 Kabili abikileko golde iyalopololwa kabili mu mbali ashingulwishemo golde ya kuyemfya itebulo. 12 Lyena abikileko ipulanga ilyali ulupi lumo* mu bwipi ukushinguluka itebulo, kabili kwi samba ye pulanga ashingulwisheko golde ya kuyemfya itebulo. 13 Kabili abikileko utwa kupishamo imitembo utwa golde utuli 4, atubikile pa makoona 4 apo amoolu 4 yasuntinkanine ne tebulo. 14 Utwa kupishamo imitembo twalipaleme kwi pulanga, kabili e mo balepisha imitembo pa kusenda itebulo. 15 Lyena apangile imitembo ya fimuti fya munganunshi iya kusendelako itebulo kabili abikileko golde. 16 Pa numa apangile ifipe fya pe tebulo ifya golde iyalopololwa, imbale, amakapu, imbale shafonka ne mitondo umwa kwitulwila umutuulo wa mwangashi.+

17 Awe apangile ica kutekapo inyali+ ica golde iyalopololwa. Abomfeshe sando pa kucipanga. Ica kutekapo inyali calikwete ishinte, umukonso, utumabula, intombo na maluba.+ 18 Imisambo 6 yafumine ku mukonso wa ca kutekapo inyali, imisambo itatu yafumine ku lubali lumo ulwa mukonso, imisambo imbi itatu yafumine ku lubali lumbi. 19 Utumabula tutatu utwali nga maluba ya mualmonde twali ku lubali lumo ulwa cila musambo, kabili alibikileko intombo na maluba ifyatobenkene, kabili utumabula tutatu utwali nga maluba ya mualmonde twali ku lubali lumbi ulwa cila musambo, kabili alibikileko intombo na maluba ifyatobenkene. Ifi e fyo apangile imisambo 6 iyafumine ku mukonso wa ca kutekapo inyali. 20 Kabili ku mukonso wa ca kutekapo inyali kwali utumabula 4 utwali nga maluba ya mualmonde, kwali ne ntombo na maluba kabili fyalitobenkene. 21 Panshi ya misambo ibili iya kubalilapo iyafumine ku mukonso wa ca kutekapo inyali pali intombo imo, intombo na imbi yali panshi ya misambo imbi ibili iyakonkelepo, kabili intombo imbi yali panshi ya misambo ibili iya kulekeleshako, pantu imisambo 6 yafumine ku mukonso wa ca kutekapo inyali. 22 Ica kutekapo inyali conse kumo ne ntombo ne misambo afipangiile na golde iyalopololwa kabili abomfeshe sando pa kufipanga. 23 Lyena apangile inyali sha ciko 7+ no twa kumanikilako twa ciko ne fya kuponenamo ifilefuma ku ciku icilepya. Fyonse ifi afipangiile na golde iyalopololwa. 24 Ica kutekapo inyali ne fipe fya ciko fyonse afipangiile na golde iyalopololwa iyafinine italanti* limo.

25 Nomba apangile iciipailo ca kocelapo ububani+ ica fimuti fya munganunshi. Cali umukono umo mu mbali shonse kabili casanseme imikono ibili. Insengo sha ciko shapangiilwe kumo ne ciipailo.+ 26 Abikileko golde iyalopololwa pa muulu na mu mbali shonse na ku nsengo sha ciko, kabili ashingulwisheko utwa golde utwa kuyemfya iciipailo. 27 Apangiileko utwa kupishamo imitembo tubili utwa golde mwi samba lya mung’ong’o wa golde, uku tubili no ku tubili, umwakupisha imitembo ya kucisendelako. 28 Pa numa apangile imitembo ya fimuti fya munganunshi kabili abikileko golde. 29 Kabili apangile amafuta ya mushilo aya kusubilako+ no bubani bwanunkila,+ aliyatobenkenye bwino bwino.*

38 Apangile iciipailo ca fimuti fya munganunshi ica kutuulilapo amalambo ya koca. Cali imikono* 5 mu mbali shonse 4 kabili casanseme imikono itatu.+ 2 Lyena pa makoona ya ciko 4 apangiilepo ulusengo lumo lumo. Insengo ashipangiile ku ciipailo kwine kabili alibikileko umukuba.+ 3 Pa numa apangile ifipe fyonse ifya pa ciipailo, imbeketi sha kupoosamo imito, amafosholo, imbale shafonka, ifya kutunkwilako ne fya kubikamo umulilo. Ifipe fya ciko fyonse afipangiile no mukuba. 4 Kabili mu ciipailo apangiilemo ica mukuba icaba nge sumbu panshi ya mung’ong’o kabili cabelele pa kati ukufuma pa muulu wa ciipailo. 5 Aocelele utwa kupishamo imitembo 4 pa makoona 4 mupepi ne ca mukuba icaba nge sumbu. 6 Pa numa apangile imitembo ya fimuti fya munganunshi kabili abikileko umukuba. 7 Apishishe imitembo ya kucisendelako mu twa kupishamo imitembo ku mbali ya ciipailo. Apangile iciipailo kwati cibokoshi kabili acipangiile na mapulanga.

8 Kabili apangile ica kubikamo amenshi ya kusamba ica mukuba+ ne ca kucitekapo ica mukuba; abomfeshe ifilola* fya banakashi abo bapeele umulimo wa kubombela pa mwinshi we tenti lya mushilo.

9 Lyena abikileko ulubansa.+ Ku kapinda ka ku kulyo aka lubansa acingileko insalu iisuma iyapyatwa iyalepele imikono 100.+ 10 Kwali ifya kukobekako insalu 20 ifya mukuba na mashinte ya fiko 20 aya mukuba, kabili utwa kukofeshako utwa ifi ifya kukobekako insalu no twa kukofyamo twali utwa silfere. 11 Insalu ya kucingila ku kapinda ka ku kuso nayo yalepele imikono 100. Ifya kukobekako insalu 20 na mashinte ya fiko 20 fyali ifya mukuba. Utwa kukofeshako utwa ifi ifya kukobekako insalu no twa kukofyamo twali utwa silfere. 12 Lelo ku lubali lwa ku masamba insalu ya kucingako yalepele imikono 50. Kwali ifya kukobekako insalu ifya mukuba 10 na mashinte ya fiko 10. Utwa kukofeshako utwa ifi ifya kukobekako insalu no twa kukofyamo twali utwa silfere. 13 Ku kabanga ukutulila akasuba, ulubansa lwali imikono 50 mu bwipi. 14 Insalu ya kucinga ku lubali lumo ulwa mpongolo yalepele imikono 15, kabili ifya kukobekako insalu fyali fitatu na mashinte ya fiko yali yatatu. 15 Kabili ku lubali lumbi ulwa mpongolo ya lubansa, insalu ya kucingako yalepele imikono 15, kabili ifya kukobekako insalu fyali fitatu na mashinte ya fiko yali yatatu. 16 Insalu shonse isha kucingilako ulubansa shali isha kolokondwe umusuma uwapyatwa. 17 Amashinte ya fya kukobekako insalu yali ya mukuba. Utwa kukofeshako utwa ifi ifya kukobekako insalu no twa kukofyamo twali utwa silfere. Pa muulu wa fya kukobekako insalu abikilepo silfere, kabili ku fya kukobekako insalu fyonse ifya mu lubansa kwali utwa kukakilako utwa silfere.+

18 Ica kucinga pa mpongolo ya lubansa bacipikwile no bushishi bwa bluu, ubwakashikila, ubwakashika ce no bushishi ubusuma ubwapyatwa. Mu butali cali imikono 20, kabili casanseme imikono 5 nge nsalu ya kucingilako ulubansa.+ 19 Ifya kukobekako insalu 4 na mashinte ya fiko 4 fyali ifya mukuba. Utwa kukofeshako utwa ifi ifya kukobekako insalu no twa kukofyamo twali utwa silfere, kabili pa muulu wa fiko abikilepo silfere. 20 Impoopo shonse ishe tenti lya mushilo ne sha mu lubansa lonse shali isha mukuba.+

21 Ifi e fyo babomfeshe pa kupanga itenti lya mushilo umwali icipao ca Cipangano.+ Mose aebele abena Lebi+ abo Itamari+ mwana Aarone shimapepo aletungulula, ukuti bapende fyonse ifyo babomfeshe. 22 Besalele+ mwana Uri, umwana wa kwa Huri uwa mu mukowa wa kwa Yuda alicitile fyonse ifyo Yehova aebele Mose. 23 Abombeele pamo na Oholiabu+ umwana wa kwa Ahisamaki uwa mu mukowa wa kwa Dani, uwaishibishe ifya kupangapanga kabili uwaishibishe ukuyemfya insalu no kupikula ubushishi bwa bluu, ubwakashikila, ubwakashika ce no bwa kolokondwe umusuma.

24 Golde yonse iyo babomfeshe pa kupanga icifulo ca mushilo yalingene na golde ya mutuulo wa kusunsha.+ Yali amatalanti* 29 na mashekele* 730 ukulingana ne cipimo ce shekele ilya pa cifulo ca kupepelapo.* 25 Kabili silfere iyo abaume ba mu lukuta abo bapendele baletele yali amatalanti 100 na mashekele 1,775 ukulingana ne cipimo ce shekele ilya pa cifulo ca kupepelapo.* 26 Cila muntu aletele hafu ye shekele ilyalingana ne cipimo ca hafu ye shekele lya pa cifulo ca kupepelapo,* kabili abaume bonse abo bapendele abali ne myaka 20 ukuya pa muulu,+ bali 603,550.+

27 Pa kupanga amashinte ya pa cifulo ca kupepelapo na mashinte ya ku fya kukobekako insalu ya kucingilako babomfeshe amatalanti ya silfere 100; amashinte 100 yalingene na matalanti 100, mwi talanti limo balepangamo ishinte limo.+ 28 Abomfeshe amashekele 1,775 pa kupanga utwa kukofeshako utwa fya kukobekako insalu kabili pa muulu apo fyalundanine abikilepo silfere.

29 Umukuba uo batuulile* wali amatalanti 70 na mashekele 2,400. 30 Muli uyu umukuba apangilemo amashinte ya pa mwinshi we tenti lya kukumaninamo na Lesa, iciipailo ne caba nge sumbu ca ciko, ifipe fyonse ifya ciipailo, 31 amashinte ya lubansa lonse, amashinte ya pa mpongolo ya lubansa, ne mpoopo shonse ishe tenti lya mushilo ne mpoopo shonse ishe tenti+ lya lubansa lonse.

39 Mu bushishi bwa bluu, ubwakashikila no bwakashika ce,+ bapikwilemo ifya kufwala ifisuma sana ifya kufwala pa kubomba pa cifulo ca mushilo. Bapikwilemo ifya kufwala fya mushilo ifya kwa Aarone,+ ukulingana ne fyo Yehova aebele Mose.

2 Pa kupanga efode+ abomfeshe golde, ubushishi bwa bluu, ubwakashikila, ubwakashika ce e lyo no bushishi ubusuma ubwapyatwa. 3 Bapaapaatalike golde kabili aputwilemo insale sha kupikwila pamo no bushishi bwa bluu, ubwakashikila, ubwakashika ce no bushishi ubusuma. 4 Bapangiileko utwa pa mabeya, kabili batubikile apo efode yalundanine. 5 Kabili umushipi uukalamba uwapikulwa uo babiliile kuli efode uwa kukaka mu musana pa kuti efode ilaselasela,+ baupikwilile no bushishi bumo bwine. Baupikwilile na golde, ubushishi bwa bluu, ubwakashikila, ubwakashika ce no bushishi ubusuma ubwapyatwa. Bacitile ukulingana ne fyo Yehova aebele Mose.

6 Lyena bafyantike utumabwe twa shohamu mu twa kufyantikamo utwa golde, kabili balembelepo amashina ya bana ba kwa Israele nga filya fine uulemba pa mabwe engalemba pa ca kufwatikilako.+ 7 Atubikile pa twa pa mabeya ya pali efode pa kuti tube utwa kwibukishishako abana ba kwa Israele,+ ukulingana ne fyo Yehova aebele Mose. 8 Lyena apikwile itumba lya pa cifuba+ nge fyo apikwile efode. Apikwilile na golde, ubushishi bwa bluu, ubwakashikila, ubwakashika ce no bushishi ubusuma ubwapyatwa.+ 9 Itumba nga balipeta lyaleba ilyalingana mu mbali shonse 4, kabili nga balipeta lyalelepa nge cisansa* mu mbali shonse 4. 10 Babikilepo utumabwe mu mitande 4. Mu mutande wa kubalilapo mwali rubi, topasi na emarodi. 11 Mu mutande wa bubili mwali tokwasi, safiri na yaspi. 12 Mu mutande wa butatu mwali leshemu, agate na ametusti. 13 Kabili mu mutande walenga 4 mwali krusoliti, shohamu na yade. Bafyantike utu utumabwe mu twa kufyantikamo utwa golde. 14 Utumabwe twali 12 ukulingana na mashina ya bana abaume aba kwa Israele, kabili amashina yabo yalembelwe nga filya fine bengalemba pa ca kufwatikilako. Ishina limo na limo lyaleimininako umukowa umo pa mikowa 12.

15 Lyena pe tumba lya pa cifuba bapangiilepo utwapala imyando utwa golde iyalopololwa.+ 16 Kabili bapangile utwa kufyantikamo tubili utwa golde no twa kukofyamo tubili utwa golde kabili abikile utwa kukofyamo tubili pa makoona yabili aya pe tumba lya pa cifuba. 17 Pa numa bakakile utumyando tubili utwa golde mu twa kukofyamo utwali pa makoona yabili aya pe tumba lya pa cifuba. 18 Lyena bakakile ulubali lumo ulwa tumyando tubili ku twa kukofyamo utwa pa mabeya ya pali efode ku ntanshi. 19 Kabili bapangile utwa kukofyamo tubili utwa golde no kutubika pa mpela shibili mu ca mu kati ce tumba lya pa cifuba.+ 20 Lyena bapangile utwa kukofyamo na tumbi tubili utwa golde no kutubika ku ntanshi ya efode, pe samba lya twa pa mabeya tubili utwa pali efode, mupepi na apo balundanishishe efode, pa muulu wa mushipi uukalamba uwapikulwa uwa kuli efode. 21 Na pa kulekelesha bakakile ututambo twa bluu ku twa kukofyamo utwa kwi tumba lya pa cifuba na ku twa kukofyamo utwa kuli efode pa kuti itumba lya pa cifuba lilasela pali efode lelo lileba pa muulu wa mushipi uukalamba uwapikulwa, ukulingana ne fyo Yehova aebele Mose.

22 Lyena abilile ica kufwala icabula amaboko ica bushishi bwa bluu bweka bweka+ ubo kapikula apikwile ica kufwalila pali efode. 23 Ica kufwala cabula amaboko calikwete umukoshi uwali nga filya umukoshi wa ca kufwala ca mushilika waba. Mu mukoshi wa ciko bapikwililemo ica ku-ukosha pa kuti wikalepuka. 24 Ku mufukilo wa ca kufwala cabula amaboko babikileko utwapala amapomegranate utwa bushishi bwa bluu, ubwakashikila no bwakashika ce, ubo bapyatiile pamo. 25 Kabili bapangile inyenjele ukubomfya golde iyalopololwa no kushibika pa kati ka twapala amapomegranate ukushingulusha umufukilo wa ca kufwala cabula amaboko; 26 baleti apa babikapo inyenjele imo apa bakonkeshapo akapala umupomegranate, ukushingulusha umufukilo wa ca kufwala cabula amaboko ico balefwala pa kubomba. Bacitile ukulingana ne fyo Yehova aebele Mose.

27 Kabili babiliile Aarone na bana bakwe abaume+ imingila ya nsalu iisuma iyo kapikula apikwile, 28 ne ca kupomba ku mutwe,+ ifya kufwala ku mutwe+ ifya nsalu iisuma ifyo bayemfya, utuputula twa mu kati+ utwa bushishi ubusuma ubwapyatwa, 29 no mushipi uukalamba uo bapikwiliile no bushishi ubusuma ubwapyatwa, ubushishi bwa bluu, ubwakashikila no bwakashika ce. Bacitile ukulingana ne fyo Yehova aebele Mose.

30 Pa kulekelesha bapangile akalilata akabeeka aka golde iyalopololwa akali icishibilo ca mushilo ica kuipeela, kabili balembelepo ifilembo nga filya fine bengalemba pa ca kufwatikilako. Balembelepo ukuti: “Yehova e mwine wa mushilo.”+ 31 Bakakileko akamwando ka bluu pa kuti akalilata kabeeka kabe pa muulu wa nsalu ya kupomba ku mutwe. Bacitile ukulingana ne fyo Yehova aebele Mose.

32 E ico umulimo onse uwa pe tenti lya mushilo, e kutila itenti lya kukumaninamo na Lesa walipwile, kabili abena Israele balicitile fyonse ifyo Yehova aebele Mose.+ Bacitile filya fine fye.

33 Lyena baletele ifya kupangila itenti lya mushilo+ fyonse kuli Mose, amatenti+ ya liko ne fipe fya liko fyonse: utwa kukofeshako twa liko,+ amafulemu ya liko,+ imango sha liko+ ne nceshi sha liko na mashinte ya liko;+ 34 ica kufimbapo ica mpapa sha mpaanga ishilume icakashika,+ ica kufimbapo ica mpapa sha basilu, insalu ya kucingilako;+ 35 icipao ca Cipangano ne mitembo ya ciko+ ne nkupiko;+ 36 itebulo, ifipe fya liko fyonse+ no mukate wa kutuula; 37 ica kutekapo inyali ica golde iyalopololwa, inyali sha ciko+ ishali mu mutande, ne fipe fya ciko fyonse+ na mafuta ya kusanikila;+ 38 iciipailo+ ca golde, amafuta ya kusubilako,+ ububani bwanunkila,+ ica kucingilako+ pa mwinshi we tenti lya mushilo; 39 iciipailo+ ca mukuba ne caba nge sumbu ica mukuba, imitembo ya ciko,+ ifipe fya ciko fyonse,+ ica kubikamo amenshi ya kusamba ne ca kucitekapo;+ 40 insalu sha kucingilako ulubansa, ifya kukobekako insalu na mashinte ya fiko,+ ica kucingilako+ pa mpongolo ya lubansa, imyando ya ciko ne mpoopo sha ciko+ ne fipe fyonse ifya kubomfya mwi tenti lya mushilo, e kutila itenti lya kukumaninamo na Lesa; 41 ifya kufwala ifyapikulwa bwino ifya kufwala pa kubombela pa cifulo ca mushilo, ifya kufwala fya mushilo ifya kwa Aarone shimapepo+ ne fya kufwala fya bana bakwe abaume ifya kubombelamo bushimapepo.

42 Abena Israele babombele umulimo onse ukulingana ne fyo Yehova aebele Mose.+ 43 Ilyo Mose aceeceetele umulimo onse uo babombele, amwene ukuti baubombele nga filya fine Yehova alandile; kabili Mose alibapaalile.

40 Lyena Yehova aebele Mose ati: 2 “Pa bushiku bwa kubalilapo ubwa mweshi wa ntanshi, e po ukatanike itenti lya mushilo, e kutila itenti lya kukumaninamo na Lesa.+ 3 Ukabike icipao ca Cipangano mu kati+ kabili ukacinge Icipao ne nsalu.+ 4 Ukengishe itebulo+ kabili ukabikepo ifipe fya liko. Ukengishe ne ca kutekapo inyali+ kabili ukasanike inyali sha ciko.+ 5 Lyena ukabike pa ntanshi ya cipao ca Cipangano iciipailo ca golde ica kocelapo ububani+ kabili ukakobeke ica kucinga pa mwinshi we tenti lya mushilo.+

6 “Ukabike iciipailo ca kutuulilapo umutuulo wa koca+ pa ntanshi ya mwinshi we tenti lya mushilo, e kutila itenti lya kukumaninamo na Lesa, 7 kabili ukabike ica kubikamo amenshi ya kusamba pa kati, uku itenti lya kukumaninamo na Lesa e lyo uku iciipailo, ukabikemo na menshi.+ 8 Lyena ukabikeko ulubansa+ ukushingulusha itenti lya kukumaninamo na Lesa, kabili ukakobeke ica kucinga+ pa mpongolo ya lubansa. 9 Ukabuule na mafuta ya kusubilako+ kabili ukasube itenti lya mushilo ne fipe fya liko fyonse,+ kabili ukalisangulule pamo ne fipe fya liko fyonse, pa kuti likabe ilya mushilo. 10 Ukasube iciipailo ca kutuulilapo umutuulo wa koca ne fipe fya ciko fyonse kabili ukasangulule iciipailo pa kuti cikabe iciipailo ca mushilo nga nshi.+ 11 Ukasube ne ca kubikamo amenshi ya kusamba ne ca kucitekapo kabili ukacisangulule.

12 “Lyena ukapalamike Aarone na bana bakwe abaume ku mwinshi we tenti lya mushilo e lyo ukabasambe mu menshi.+ 13 Kabili ukafwike Aarone ifya kufwala fya mushilo,+ ukamusube+ no kumusangulula pa kuti akamombele bushimapepo. 14 Pa numa ukapalamike abana bakwe abaume kabili ukabafwike imingila.+ 15 Ukabasube nga filya fine ukasuba shibo,+ pa kuti bakamombele bushimapepo, kabili nga wabasuba bakaba bashimapepo mu nkulo shabo shonse.”+

16 Mose alicitile fyonse ifyo Yehova amwebele.+ Filya fine fye e fyo acitile.

17 Mu mweshi wa ntanshi mu mwaka walenga bubili, pa bushiku bwa ntanshi muli uyo mweshi, e mo itenti lya mushilo lyatanikwe.+ 18 Ilyo Mose aletanika itenti lya mushilo, abikile amashinte ya liko+ panshi, abikapo amafulemu ya liko,+ abikako ne mango+ e lyo aimika inceshi sha liko. 19 Akupile itenti+ pa muulu wa mafulemu ye tenti lya mushilo kabili abikilepo ica kufimba+ pa muulu wa liko. Acitile ukulingana ne fyo Yehova amwebele.

20 Pa numa abuulile amabwe ya Cipangano+ no kuyabika mu Cipao+ kabili abikile imitembo+ ku Cipao, abika ne nkupiko+ pa muulu wa Cipao.+ 21 Aingishe Icipao mwi tenti lya mushilo e lyo akobeka insalu ya kucingilako+ kabili yacingile icipao ca Cipangano.+ Acitile ukulingana ne fyo Yehova amwebele.

22 Kabili abikile itebulo+ ku kapinda ka ku kuso ake tenti lya kukumaninamo na Lesa, kunse ya nsalu ya kucingilako, 23 kabili apampikenyepo imikate+ ku cinso ca kwa Yehova, ukulingana ne fyo Yehova amwebele.

24 Abikile ica kutekapo inyali+ ku kapinda ka ku kulyo ake tenti lya kukumaninamo na Lesa kabili caloshenye ne tebulo. 25 Asanike ne nyali+ ku cinso ca kwa Yehova nga fintu Yehova amwebele.

26 Kabili abikile iciipailo ca golde+ mwi tenti lya kukumaninamo na Lesa pa ntanshi ya nsalu ya kucingilako, 27 pa kuti cibe ca kocelapo+ ububani bwanunkila+ nga fintu Yehova amwebele.

28 Lyena akobeke ica kucinga+ pa mwinshi we tenti lya mushilo.

29 Abikile iciipailo ca mutuulo wa koca+ pa ntanshi ya mwinshi we tenti lya mushilo, e kutila itenti lya kukumaninamo na Lesa pa kuti atuule umutuulo wa koca+ no mutuulo wa ngano, ukulingana ne fyo Yehova amwebele.

30 Lyena abikile ica kubikamo amenshi ya kusamba pa kati, uku itenti lya kukumaninamo na Lesa e lyo uku iciipailo, kabili abikilemo amenshi ya kusamba.+ 31 Palya e po Mose na Aarone na bana bakwe abaume basambiile ku minwe na ku makasa. 32 Lyonse pa kwingila mwi tenti lya kukumaninamo na Lesa nelyo ilyo bashilapalama ku ciipailo balesamba,*+ ukulingana ne fyo Yehova aebele Mose.

33 Pa kulekelesha abikileko ulubansa+ ukushingulusha itenti lya mushilo ne ciipailo kabili akobeke ica kucinga pa mpongolo ya lubansa.+

E fyo Mose apwishishe umulimo. 34 E lyo ikumbi lyakupile itenti lya kukumaninamo na Lesa, kabili itenti lya mushilo lyaiswilemo ubukata bwa kwa Yehova.+ 35 Mose alifililwe ukwingila mwi tenti lya kukumaninamo na Lesa pantu ikumbi talyaselele pa muulu we tenti kabili itenti lya mushilo lyaiswilemo ubukata bwa kwa Yehova.+

36 Ikumbi nga lyafuma pe tenti lya mushilo, abena Israele baleima baya. Ifi fine e fyo balecita mu lwendo lwabo lonse.+ 37 Lelo ikumbi nga talimine, tabaleya nangu kumo mpaka ubushiku lyaima.+ 38 Pantu mu lwendo lwabo lonse abena Israele bonse balemona ikumbi lya kwa Yehova lili pe tenti lya mushilo akasuba, kabili ubushiku balemona umulilo eulipo.+