AMALANGO

1 Aya e mashiwi Mose aebele abena Israele bonse ilyo bali mu matololo ya mu citungu ca Yordani, ayabela pa kati ka Parani, Tofele, Labani, Haserote na Di-sahabu, mu ciswebebe icaloshanya na Sufi. 2 Ukufuma ku Horebu ukufika ku Kadeshe-barnea+ ukupita mu nshila ya ku Lupili lwa Seiri kwendapo inshiku 11. 3 Mu mwaka walenga 40,+ mu mweshi walenga 11, pa bushiku bwa kubalilapo ubwa mweshi, Mose aebele abena Israele* fyonse ifyo Yehova amwebele ukuti abebe. 4 Abebele ifi pa numa ya kucimfya Sihone+ imfumu ya bena Amore, uwaleikala mu Heshebone, na Oge+ imfumu ya Bashani, uwaleikala mu Ashitarote, mu Edrei.+ 5 Mu citungu ca Yordani, mu calo ca Moabu, e mo Mose alondolwelele abantu aya Amafunde.+ Alandile ati:

6 “Yehova Lesa wesu atwebele mu Horebu ati, ‘Mwaikala sana muli cino citungu ca mpili.+ 7 Alukeni muye mu citungu ca mpili ica bena Amore+ na ku bena mupalamano babo bonse aba mu Araba,+ mu citungu ca mpili, mu Shefela, mu Negebu na ku lulamba lwa bemba,+ mu calo ca bena Kanaani, na mu Lebanone,*+ ukufika ku mumana ukalamba, umumana wa Yufrate.+ 8 Moneni, ici e calo ndemupeela. Ingilenimo kabili mupoke icalo ico Yehova alapile ukuti akapeela bashinwe, Abrahamu, Isaki+ na Yakobo,+ na bana* babo abakatuntuka muli bena.’+

9 “Kabili pali ilya nshita nalimwebele nati, ‘Nafilwa ukumutungulula neka.+ 10 Yehova Lesa wenu namufusha, kabili pali lelo mufulile nge ntanda.+ 11 Shi Yehova Lesa wa fikolwe fyenu amufushe+ imiku 1,000, kabili amupaale nga filya fine amulaile.+ 12 Inga kuti nasenda shani icisendo cenu ne cipe cenu neka, e lyo ne fi muilishanya?+ 13 Saleni abaume mu mikowa yenu aba mano, abeluka kabili abaishibisha imilimo, kabili nalabasonta babe intungulushi pali imwe.’+ 14 Mwanjaswike amuti, ‘Ifyo watweba ukuti tucite fili fye bwino.’ 15 E ico nabuulile intungulushi sha mu mikowa yenu, abaume ba mano kabili abaishibisha imilimo, kabili nabasontele ukuba intungulushi pali imwe, ukuba bacilolo ba mabumba ya bantu 1,000, bacilolo ba mabumba ya bantu 100, bacilolo ba mabumba ya bantu 50 na bacilolo ba mabumba ya bantu 10, kabili intungulushi sha mu mikowa yenu.+

16 “Pali ilya nshita naebele bakapingula benu nati, ‘Ilyo mulekutika umulandu wa bamunyinenwe, mulelungika pa kupingula+ umulandu wa bena Israele beka-beka nelyo umulandu wa mwina Israele no mulebeshi.+ 17 Tamufwile ukuba na kapaatulula ilyo mulepingula.+ Muleba no mulinganya ilyo mulekutika ku muntu yawe-yawe na ku wacindama.+ Mwilatiina abantu,+ pantu mwakulapingwilako Lesa;+ kabili nga kwaba umulandu uwamukosela, muleuleta kuli ine, pa kuti na ine ndekutikako uyo mulandu.’+ 18 Pali ilya nshita nalimwebele fyonse ifyo mufwile ukulacita.

19 “Lyena twafumine pa Horebu kabili twaendele mu matololo+ yonse yalya ayakalamba kabili aya kutiinya ayo mwamwene mu nshila ya mu citungu ca mpili ica bena Amore,+ nga filya fine Yehova Lesa wesu atwebele, kabili twasukile twafika ku Kadeshe-barnea.+ 20 Lyena namwebele nati, ‘Mwaisa mu citungu ca mpili ica bena Amore, ico Yehova Lesa wesu aletupeela. 21 Moneni, Yehova Lesa wenu namupeela icalo. Kabiyeni mucipoke, nga filya fine Yehova Lesa wa fikolwe fyenu amwebele.+ Mwitiina kabili mwitutuma.’

22 “Lelo imwe bonse mwaishile kuli ine kabili mwanjebele amuti, ‘Natutume abaume batutangilile pa kuti bayelengula icalo e lyo babwele bese batwebe inshila iyo tufwile ukuyamo e lyo ne misumba tukayasanga.’+ 23 Ifyo mwalandile fyali fye bwino. E ico nalisalile abaume 12. Muli cila mukowa nasalilemo umwaume umo.+ 24 Balimine baya mu citungu ca mpili+ kabili bafikile ku Mupokapoka wa Eshekole kabili bailelengula icalo. 25 Pa numa babwelele kuli ifwe ne fisabo fimo ifya muli cilya calo, kabili baishiletweba abati, ‘Icalo ico Yehova Lesa wesu aletupeela cisuma.’+ 26 Lelo mwalikeene ukuyako, kabili tamwakonkele ifyo Yehova Lesa wenu amwebele.+ 27 Mwaikalile fye ukuilishanya mu matenti yenu amuti, ‘Ico Yehova atufumiishe mu calo ca Egupti ni co alitupata kabili alefwaya abena Amore batulofye. 28 Cinshi twalaila ku calo ca musango uyu? Bamunyinefwe nabatompola imitima*+ yesu pantu batwebele abati: “Abantu ba muli cilya calo mapaka kabili batali ukutucila, kabili imisumba yabo ikalamba kabili yalikwata amalinga ayafika na mu muulu*+ kabili e ko twamwene na bena Anaki.”’+

29 “E ico namwebele nati, ‘Mwitutuma kabili mwibatiina.+ 30 Yehova Lesa wenu akaba pa ntanshi yenu kabili akamulwila+ nga filya fine amulwilileko mu Egupti ifyo mwaimwenene.+ 31 Kabili mu matololo mwali-imwenene ifyo Yehova Lesa wenu amusendele nga filya wishi asenda umwana wakwe, konse uko mwaleya mpaka mwafika na kuno.’ 32 Nomba nangu cali ifi, tamwatetekele Yehova Lesa wenu,+ 33 uwalemutangilila mu nshila pa kuti amulange icifulo ca kupangapo inkambi. Mu nshita ya bushiku alemonekela mu mulilo, e lyo akasuba alemonekela mwi kumbi pa kuti amutungulule uko mufwile ukuya.+

34 “Inshita yonse ilya Yehova aleumfwa ifyo mwaleilishanya, kabili alikalipe ica kuti alapa no kuti,+ 35 ‘Pa ba muli iyi inkulo iibifi tapali nangu umo uukamona icalo icisuma ico nalapile ukuti nkapeela bashinwe,+ 36 kano fye Kalebu umwana wa kwa Yefune, ena akacimona. Ena na bana bakwe nkabapeela icalo ico aendelemo, pantu alakonka Yehova no mutima onse.+ 37 (Na ine wine Yehova alimfuliilwe pa mulandu wenu, kabili anjebele ati, “Na iwe wine tawakengilemo.+ 38 Yoshua umwana wa kwa Nuni, uukwafwilisha,+ e ukengilamo.+ Umukoshe*+ pantu e ukengisha abena Israele mu calo.”) 39 Na kabili abana benu abo mwaleti bakabasenda+ kabili abana benu abaume abashaishiba icisuma nelyo icibi, e bakengilamo, kabili e bo nkapeela icalo pa kuti cikabe cabo.+ 40 Lelo imwe bwelulukeni, muleya ku matololo, mupite mu nshila yaya kuli Bemba Wakashika.’+

41 “Na imwe mwanjebele amuti, ‘Natubembukila Yehova. Nomba twalanina ulupili tuyelwa nabo, nga filya fine Yehova Lesa wesu atwebele!’ E ico cila muntu asendele ifyanso fyakwe ifya kulwilako, kabili mwalemona kwati calyangwike ukuninika ulupili+ no kupokolola icalo. 42 Lelo Yehova anjebele ati, ‘Bebe auti: “Tamufwile ukunina ulupili pa kuti muyelwa nabo pantu nshakabe na imwe.+ Nga mwaya mu kulwa, abalwani benu bakamucimfya.”’ 43 E ico nalimwebele lelo tamwaumfwile. Tamwakonkele ifyo Yehova alandile kabili pa mulandu ne cilumba cenu mwalininine ulupili. 44 Lyena abena Amore abaleikala muli lulya lupili balifumine mu kulwa na imwe, kabili balimufulumwine nga filya inshimu shicita, kabili bamusalanganishishe mu Seiri ukufika fye na ku Horma. 45 E ico mwalibwelele kabili mwatendeke ukulila pa cinso ca kwa Yehova, lelo Yehova takutike kuli imwe, kabili tamubikileko na mano. 46 E calengele mwikale inshita iitali mu Kadeshe.

2 “Lyena twalyalulwike no kuya ku matololo mu nshila ya kuli Bemba Wakashika, nga filya fine Yehova anjebele,+ kabili twale-endauka fye mu Lupili lwa Seiri pa nshiku ishingi. 2 Yehova asukile anjeba ati, 3 ‘Mwaendauka pa nshiku ishingi muli ulu lupili. Alukileni ku kapinda ka ku kuso. 4 Kabili eba abantu auti: “Muli no kupita mupepi no mupaka wa calo ca bamunyinenwe, abatuntuka muli Esau+ abekala mu Seiri,+ kabili bakamutiina,+ lelo mukacenjele sana. 5 Mwikalwa nabo* pantu nshakamupeele icalo cabo nangu fye pa kunyanta ulukasa, pantu nalipeela Esau Ulupili lwa Seiri pa kuti lube lwakwe.+ 6 Mufwile ukubalipila pa fya kulya ifyo mukalya na pa menshi ayo mukanwa.+ 7 Pantu Yehova Lesa wenu alimupaala muli fyonse ifyo mwacita. Alishiba bwino bwino ifyo mwenda muli aya matololo ayakalamba. Pali iyi imyaka 40, Yehova Lesa wenu aba na imwe kabili tamwabulishapo nangu cimo.”’+ 8 E ico twapitile mupepi na bamunyinefwe, abatuntuka muli Esau,+ abekala mu Seiri, twashile inshila iyaya ku Araba, ku Elati na ku Esione-gebere.+

“Lyena twalyalwike, twapita inshila ya mu matololo ya Moabu.+ 9 E lyo Yehova anjebele ati, ‘Mwikatendeka abena Moabu nelyo ukulwa nabo, pantu nshakamupeele icalo cabo, pantu abatuntuka muli Lote e bo napeela icalo ca Ari.+ 10 (Abena Emi+ e baikelemo kale, abantu aba maka kabili abengi nga nshi, kabili baali abatali nga bena Anaki. 11 Abena Refa+ nabo balebamona fye nga abena Anaki,+ kabili abena Moabu baleita abena Refa ukuti abena Emi. 12 Kale abena Hore+ e baleikala mu Seiri, lelo abatuntwike muli Esau balibapokele icalo kabili balibalofeshe, baikala na mu calo cabo,+ nga filya fine abena Israele bakapoka icalo, ico Yehova akabapeela.) 13 Nomba kabiyeni mucilinganye Umupokapoka wa Serede.’ E ico twalicilingenye Umupokapoka wa Serede.+ 14 Ukutula apo twafumiine ku Kadeshe-barnea ukushinta apo twacilinganishishe Umupokapoka wa Serede papitile imyaka 38, mpaka inkulo yonse iya baume abalelwa inkondo yaloba mu nkambi, nga filya fine Yehova alapile kuli bena.+ 15 Ukuboko kwa kwa Yehova kwalebalwisha pa kuti kubalofye mu nkambi mpaka baloba.+

16 “Ilyo fye abaume bonse abalelwa inkondo bapwile ukufwa,+ 17 na kabili Yehova anjebele ati, 18 ‘Lelo mwalapita mupepi ne calo ca bena Moabu, e kutila mu Ari. 19 Nga mwapalama ku bena Amone, tamulingile ukubacusha nelyo ukubatendeka, pantu nshakamupeele icalo ca bena Amone pa kuti cikabe icalo cenu, pantu ici calo napeela abatuntuka muli Lote.+ 20 Ici naco cali calo ca bena Refa.+ (Abena Refa e baleikalamo kale, kabili abena Amone baleita abena Refa ukuti abena Samisumi. 21 Bali bantu aba maka, abengi nga nshi kabili abatali kwati fye bena Anaki;+ lelo Yehova alengele abena Amone babacimfya, babatamfya na mu calo kabili e batendeke ukwikalamo. 22 Ifi fine e fyo acitiile na batuntwike muli Esau, abekala mu Seiri,+ ilyo alengele balofya abena Hore,+ pa kuti bapoke icalo no kwikalamo ukufika na lelo. 23 Abena Abi bena baleikala mu mishi iyafikile fye na ku Gasa,+ mpaka abena Kaftore+ abafumine ku Kaftore* baisabalofya, baikala na mu calo cabo.)

24 “‘Imeni mucilinganye Umupokapoka wa Arnone.+ Moneni, napeela Sihone+ imfumu ya Heshebone umwina Amore mu minwe yenu. E ico tendekeni ukupoka icalo cakwe, kabili lweni nankwe. 25 Buno bushiku nalalenga abantu bonse aba mwi samba lya muulu abaleumfwa ilyashi pali imwe bamutiine. Balasakamikwa kabili bakulatutuma* pa mulandu wenu.’+

26 “Lyena ilyo twali mu matololo ya Kedemote,+ natumine inkombe kuli Sihone imfumu ya Heshebone ukuyamweba amashiwi ya mutende aya kuti,+ 27 ‘Lekeni tupiteko mu calo cenu. Tukapita fye mu musebo kabili tatwakaalukile ku kulyo nelyo ku kuso.+ 28 Tukalya fye ifya kulya ifyo mukatushitisha, kabili tukanwa fye amenshi ayo mukatushitisha. Tusuminisheni fye tupitemo na makasa 29 nga filya fine abatuntwike muli Esau abekala mu Seiri na bena Moabu abekala mu Ari bacitile kuli ifwe, mpaka tukaabuke Yordani no kwingila mu calo ico Yehova Lesa wesu aletupeela.’ 30 Lelo Sihone imfumu ya Heshebone tatusuminishe ukupitamo, pantu Yehova Lesa wenu alekele umutima wakwe watalama+ kabili umutima wakwe walikosele, pa kuti amupeele mu minwe yenu, nge fyo cili lelo.+

31 “Lyena Yehova anjebele ati, ‘Mona, nintampa kale ukukupeela Sihone ne calo cakwe. Tendeka ukupoka icalo cakwe.’+ 32 Ilyo Sihone na bashilika bakwe baishile mu kulwa na ifwe mu musumba wa Yahasi,+ 33 Yehova Lesa wesu amupeele mu minwe yesu, ica kuti twalimucimfishe pamo na bana bakwe na bashilika bakwe bonse. 34 Pali ilya nshita twalipokele imisumba yakwe yonse kabili twalyonawile imisumba yonse. Twalipeye abaume, abanakashi na bana. Tatwashilepo nangu umo.+ 35 Twasendelemo fye ifitekwa ne fintu fimbi ifyali mu misumba iyo twacimfishe. 36 Ukufuma ku musumba wa Aroere+ uwabela ku mbali ya Mupokapoka wa Arnone, (kumo no musumba uwaba mu mupokapoka), ukuyafika na ku Gileadi takwali umushi uo tushacimfishe. Yehova Lesa wesu alipeele imisumba yonse mu minwe yesu.+ 37 Lelo tatwapaleme ku calo ca bena Amone,+ ku lulamba lonse ulwa Mupokapoka wa Yaboke,+ na ku misumba ya mu citungu ca mpili, kabili tatwapaleme ku ncende shonse isho Yehova Lesa wesu atukeenye.

3 “Lyena twalyalwike twaya mu Nshila ya ku Bashani. Kabili Oge imfumu ya Bashani aishile pamo na bashilika bakwe bonse mu kulwa na ifwe pa Edrei.+ 2 E ico Yehova anjebele ati, ‘Wimutiina, pantu ndepeela ena na bashilika bakwe bonse ne calo cakwe mu minwe yobe, kabili walamucimfya nge fyo wacimfishe Sihone, imfumu ya bena Amore, uwaleikala mu Heshebone.’ 3 E fyo Yehova Lesa wesu apeele Oge Imfumu ya Bashani na bashilika bakwe bonse mu minwe yesu, kabili twalibepeye bonse ica kuti takwali nangu umo uwapuswike. 4 Lyena twalipokele imisumba yabo yonse. Takwali umushi nangu umo uo tushapokele. Twapokele imisumba 60 iya mu citungu conse ica Argobe, mu bufumu bwa kwa Oge mu calo ca Bashani.+ 5 Iyi imisumba yonse yali ya malinga ayatali, kabili yalikwete impongolo ne mipindo. Twapokeele kumo ne mishi iingi nga nshi iyabula amalinga. 6 Na lyo line twalyonawile imisumba yonse kabili twalipeye+ abaume, abanakashi na bana,+ nga filya fine twaonawile imisumba yonse iya kwa Sihone Imfumu ya Heshebone. 7 Kabili twalisendele ifitekwa fyonse ne fintu fyonse ifyali mu misumba.

8 “Pali ilya nshita twapokele icalo ca mfumu shibili isha bena Amore+ ishaleikala mu citungu ca Yordani, ukufuma ku Mupokapoka wa Arnone ukufika ku Lupili lwa Hermone+ 9 (abena Sidone baleita ulu ulupili ati Sirione, lelo abena Amore bena balelwita abati Seniri), 10 imisumba yonse iyaba mu mpanga iyabatama, Gileadi yonse na Bashani yonse ukuyafika fye na ku musumba wa Saleka no wa Edrei+ iya mu bufumu bwa kwa Oge mu Bashani. 11 Pantu Oge Imfumu ya Bashani e washelepo fye pa bena Refaimu. Amacila* yakwe ya cela, kabili yacili mu Raba ya bena Amone. Yalepa imikono* 9 mu butali kabili mu bwipi yalepa imikono 4, ukulingana no mukono babomfya konse. 12 Pali ilya nshita twalipokele cino calo: ukutendekela ku Aroere,+ iyaba mupepi no Mupokapoka wa Arnone, no lubali lumo ulwa citungu ca mpili ica Gileadi, kabili nalipeela abena Rubene na bena Gadi+ imisumba ya muli ici citungu. 13 Kabili ulubali lwashala ulwa Gileadi na Bashani yonse iya mu bufumu bwa kwa Oge napeela hafu ya mukowa wa kwa Manase.+ Icitungu conse ica Argobe ica mu Bashani, bacishibe ukuti calo ca bena Refa.

14 “Yairi+ umwana wa kwa Manase apokele icitungu conse ica Argobe+ ukufika ku mupaka wa bena Geshuri na bena Maakati,+ kabili ainike ilya mishi ya mu Bashani ishina lyakwe ati, Habote-yairi,*+ kabili ifi fine e fyo bayita ukufika na lelo. 15 Kabili Makiri+ e o napeela Gileadi. 16 Kabili abena Rubene na bena Gadi+ nabapeela impanga ukufuma ku Gileadi ukufika ku Mupokapoka wa Arnone, kabili umupaka waba pa kati ka mupokapoka, ukuyafika fye na ku mupokapoka wa Yaboke, umupaka wa bena Amone, 17 na mu Araba no mumana wa Yordani no lulamba lwa uko, ukufuma ku Kinerete ukufika kuli Bemba ya mu Araba, Bemba ya Mucele,* mwi samba lya matelo ya Pisga ku kabanga.+

18 “Lyena namwebele nati: ‘Yehova Lesa wenu namupeela cino calo pa kuti cibe icalo cenu. Abaume benu bonse aba maka bakasenda ifyanso kabili bakaabuka umumana ukutangilila bamunyinenwe abena Israele.+ 19 Bakashi benu fye na bana benu ne fitekwa (Nalishiba ukuti mwalikwata ifitekwa ifingi nga nshi) e bakashala baleikala mu misumba iyo namupeela, 20 mpaka Yehova akalenge bamunyinenwe bakatuushe, nge fyo acita kuli imwe, kabili nabo bakakwate icalo ico Yehova Lesa wenu alebapeela bushilya bwa Yordani. Lyena mukabwelela cila muntu ku mpanga yakwe iyo namupeela.’+

21 “Pali ilya nshita naebele Yoshua+ nati: ‘Nauimwena ifyo Yehova Lesa wenu acitile ishi imfumu shibili. Ifi fine e fyo Yehova akacita amabufumu yonse ayo muleabukilako.+ 22 Tamufwile ukubatiina, pantu Yehova Lesa wenu e ukalamulwila.’+

23 “Pali ilya nshita napaapeete Yehova nati, 24 ‘Mwe Yehova Shikulu Mulopwe, namutendeka ukulanga umubomfi wenu ubukata bwenu no kuboko kwenu ukwa maka,+ pantu ni lesa nshi mu muulu nelyo pano isonde uucita ifipesha amano nge fyo mucita?+ 25 Shi lekeni njabuke ndeyamona icalo icisuma icili bushilya bwa Yordani, ici icalo ca mpili icisuma na Lebanone.’+ 26 Lelo na pali iyi yine nshita ninshi Yehova alimfulilwa pa mulandu wenu,+ kabili takutike kuli ine. Kabili Yehova anjebele ati, ‘Pelela apo pene! Wibwekeshapo ukunjeba pali ili lyashi. 27 Nina pa muulu wa Pisga,+ kabili uloleshe ku masamba na ku kapinda ka ku kuso na ku kapinda ka ku kulyo na ku kabanga, umone icalo, pantu tawakaabuke iyi Yordani.+ 28 Peela Yoshua+ umulimo, umukoseleshe kabili umukoshe, pantu e ukaba pa ntanshi ya bantu pa kwabuka umumana+ kabili e ukabatungulula mu calo ico walamona ico bakekalamo.’ 29 Ifi fyonse fyacitike ilyo twaleikala mu mupokapoka uwaloshanya na Bete-peore.+

4 “Nomba mwe bena Israele, umfweni amafunde no bupingushi ifyo ndemusambilisha kabili ifyo mufwile ukulakonka pa kuti mube no mweo+ na pa kuti mwingile mu calo ico Yehova Lesa wa fikolwe fyenu alemupeela. 2 Tamufwile ukulundako ku fyo ndemweba, kabili tamulingile ukufumyako,+ pa kuti mulekonka amafunde ya kwa Yehova Lesa wenu ayo ndemweba.

3 “Mwali-imwenene ifyo Yehova acitile Baali wa ku Peore; Yehova Lesa wenu alipeye bonse abapepeleko Baali wa ku Peore.+ 4 Lelo imwe mwe balambatila kuli Yehova Lesa wenu bonse mucili aba mweo ukufika na lelo. 5 Moneni, nimusambilisha amafunde no bupingushi,+ nga filya fine Yehova Lesa wandi anjebele, pa kuti mukalefikonka mu calo ico mukekalamo. 6 Mulingile ukulafikonka+ pantu nga mulecita ifi mukalanga abantu abakomfwa amafunde aya yonse ukuti muli ba mano+ kabili muleluka,+ kabili bakatila, ‘Cine cine ulu uluko ulukalamba bantu ba mano kabili baleluka.’+ 7 Pantu luko nshi ulukalamba ulwakwata balesa ababa mupepi nge fyo Yehova Lesa wesu aba mupepi lyonse ilyo twapepa kuli ena?+ 8 Kabili luko nshi ulukalamba ulwakwata amafunde ayalungama no bupingushi ifyaba nga Mafunde aya yonse ayo ndemupeela lelo?+

9 “Mufwile ukuba abacenjela pa kuti mwikalaba ifyo mwaimwena na pa kuti mukafisunge mu mitima yenu inshiku shonse isha myeo yenu. Kabili mukale-ebako na bana benu na beshikulu benu.+ 10 Pa bushiku mwaiminine pa cinso ca kwa Yehova Lesa wenu mu Horebu, Yehova anjebele ati, ‘Nonganikila abantu pa kuti bomfwe ifyo nalabeba,+ pa kuti basambilile ukuntiina+ inshiku shonse isho bakekala mu calo na pa kuti balesambilisha abana babo.’+

11 “E ico mwalipaleme mwaiminina na mwi samba lya lupili, kabili ulupili lwalepya ukufika fye na mu muulu;* kwali imfifi, ikumbi ne mfifi iyafiita fititi.+ 12 Kabili Yehova atendeke ukulanda na imwe mu mulilo.+ Mwaleumfwa fye alelanda, lelo tamwalemumona,+ mwaleumfwa fye ishiwi.+ 13 Kabili alimulondolwelele icipangano ico ali no kupangana na imwe,+ ico amwebele ukuti mulingile ukulasunga, e kutila Amafunde 10.*+ Pa numa ayalembele pa mabwe yabili ayapaapaatala.+ 14 Pali ilya nshita Yehova anjebele ukuti ndemusambilisha amafunde no bupingushi, ifyo mulingile ukulakonka mu calo ico mukengilamo kabili ico mukalaikalamo.

15 “E ico mufwile ukuba abacenjela* pantu tamwamwene nangu umo pa bushiku Yehova alelanda na imwe mu Horebu mu mulilo, 16 pa kuti mwikapanga icimpashanya ica musango onse, icapala umwaume nelyo umwanakashi+ pantu ifi kuti fyalenga mwaonaika. 17 Mwikapanga icapala inama yonse iya pano isonde nelyo icapala icuni conse icipupuka mu muulu,+ 18 icapala conse icikulika pa mushili nelyo conse icapala isabi ilya mu menshi pano isonde.+ 19 Kabili nga mwalolesha ku muulu no kumona akasuba, umweshi ne ntanda, fyonse ifya mu muulu, tamulingile ukubelelekwa ica kuti mwalafifukamina no kufibombela,+ pantu Yehova Lesa wenu alipeela abantu bonse aba mwi samba lya muulu ifi fintu. 20 Lelo nimwe Yehova abuulile pa kuti amufumye mu calo ca Egupti icali kwati lilungu lya mulilo pa kuti mube abantu bakwe,+ nge fi mwaba ukufika na lelo.

21 “Yehova alimfuliilwe pa mulandu wenu+ ica kuti alapile ukuti nshakaabuke Yordani nelyo ukwingila mu calo icisuma ico Yehova Lesa wenu alemupeela pa kuti cibe icalo cenu.+ 22 Pantu ndi no kufwila muli cino calo; nshakaabuke Yordani,+ lelo imwe mukaabuka, kabili mukalaikala muli ici calo icisuma. 23 Mukabe abacenjela pa kuti mwikalaba icipangano ico Yehova Lesa wenu apangene na imwe,+ kabili mwikaipangila icimpashanya ica musango onse ico Yehova Lesa wenu amukaanya.+ 24 Pantu Yehova Lesa wenu aba ngo mulilo uonaula,+ ni Lesa uufwaya ukumupepa fye eka.+

25 “Nga mwakwata abana na beshikulu kabili mwaikala imyaka iingi mu calo, kabili mwacita ifingalenga mwaonaika, mwapanga ne cimpashanya+ ca musango onse, kabili mwacita ne fyabipa mu menso ya kwa Yehova Lesa wenu ifingamukalifya,+ 26 nalenga imyulu ne sonde ukuti fibe bakambone pali imwe lelo. Nangu cibe shani mukaloba bwangu mu calo ico mukekalamo nga mwa-abuka Yordani. Tamwakekalemo inshiku ishingi, pantu mukaloba.+ 27 Yehova akamusalanganishisha mu nko,+ kabili banono fye pali imwe abakaba no mweo+ muli isho inko Yehova akamusalanganishisha. 28 Muli isho inko mukalabombela balesa abo abantu bapangila ne fimuti na mabwe,+ abashingamona, abashingomfwa, abashingalya kabili abashinganunsha.

29 “Nga mwafwaya Yehova Lesa wenu uko akamusalanganishisha, nangu cibe shani mukamusanga+ nga mwamufwaya no mutima wenu onse no mweo* wenu onse.+ 30 Ilyo ifi fyonse fikamucitikila kabili ilyo mukaba na macushi ayakalamba, mukabwelela kuli Yehova Lesa wenu kabili mukakutika kuli ena.+ 31 Pantu Yehova Lesa wenu ni Lesa wa luse.+ Takamulekeleshe nelyo ukumulofya kabili takalabe icipangano ico apangene ne fikolwe fyenu.+

32 “Fwailisheni pa nshiku sha kale ilyo mushilabako, ukutendekela pa bushiku Lesa abumbile umuntu pano isonde; fwailisheni ukufuma ku mpela imo iya muulu ukufika ku mpela imbi iya muulu. Bushe kwalicitikepo icintu icikalamba nge ci nelyo bushe ica musango uyu calyumfwikapo?+ 33 Bushe kwalibako abantu bambi abaumfwapo Lesa alelanda mu mulilo nge fyo imwe mwaumfwile, ukwabula ukuti mufwe?+ 34 Nelyo bushe Lesa alyeshapo ukufumya uluko mu luko lumbi ukubomfya ubupingushi, ifishibilo, ifipesha amano,+ inkondo,+ ukuboko ukwa maka,+ ukuboko ukwatambalikwa ne fya kutiinya+ nga filya Yehova Lesa wenu amucitiile mu Egupti ifyo mwaimwenene? 35 Imwe alimulanga ifi fyonse pa kuti mwishibe ukuti Yehova e Lesa wa cine;+ takwaba na umbi.+ 36 Alengele mumfwe ishiwi lyakwe ukufuma mu muulu pa kuti amulungike, kabili alengele mwamona umulilo wakwe uukalamba pano isonde, kabili mwalyumfwile na mashiwi yakwe mu mulilo.+

37 “Apo alitemenwe ifikolwe fyenu kabili alisala abana* babo,+ ali na imwe ilyo amufumishe mu Egupti ku maka yakwe ayakalamba. 38 Alimutamfiisheko inko ishikalamba kabili isha maka ukumucila, pa kuti amwingishe mu calo cabo ico amupeela pa kuti cibe icalo cenu, nge fi fine caba.+ 39 E ico pali buno bushiku mufwile ukwishiba ukuti Yehova e Lesa wa cine ku muulu na pano isonde.+ Takwaba na umbi.+ 40 Mufwile ukulakonka ifyo amweba na mafunde yakwe ifyo ndemweba lelo, pa kuti ifintu fikalemuwamina pamo na bakatuntuka muli imwe, na pa kuti mukekale inshiku ishingi mu calo ico Yehova Lesa wenu alemupeela.”+

41 Pali ilya nshita Mose apaatwilepo imisumba itatu ku kabanga ka Yordani.+ 42 Nga ca kuti umo aipaya umunankwe mu kukanaishiba, kabili tamupatile+ ilyo ashilamwipaya, alingile ukubutukila ku musumba umo pali iyi pa kuti bemwipaya.+ 43 Iyi misumba ni, Besere+ uwa bena Rubene uwaba mu matololo mu mpanga iyabatama, Ramote+ uwa bena Gadi uwaba mu Gileadi, na Golani+ uwa bena Manase uwaba mu Bashani.+

44 Nomba aya e Mafunde+ ayo Mose apeele abena Israele. 45 Aya e mafunde no bupingushi ifyo Mose aebele abena Israele ilyo bafumine mu Egupti,+ 46 ninshi bali mu citungu ca Yordani, mu mupokapoka uwaloshanya na Bete-peore,+ mu calo ca Mfumu Sihone iya bena Amore, iyaleikala mu Heshebone,+ iyo Mose na bena Israele bacimfishe ilyo bafumine mu Egupti.+ 47 Kabili balipokele icalo cakwe ne calo ca Mfumu Oge+ iya Bashani. Ishi imfumu shibili isha bena Amore shaleikala mu citungu ca ku kabanga ka Yordani, 48 ukufuma ku musumba wa Aroere,+ uwaba mu mbali ya Mupokapoka wa Arnone, ukufika ku Lupili lwa Sione, e kutila Hermone,+ 49 na Araba yonse mu citungu ca Yordani ku kabanga, no kuyafika kuli Bemba ya mu Araba* mwi samba lya matelo ya Pisga.+

5 Lyena Mose aitile abena Israele bonse kabili abebele ati: “Umfweni mwe bena Israele amafunde no bupingushi ifyo ndemweba lelo. Mufwile ukufishiba bwino kabili mulefikonka. 2 Yehova Lesa wesu apangene na ifwe icipangano mu Horebu.+ 3 Yehova tapangene ne fikolwe fyesu ici cipangano, lelo apangene na ifwe, bonse fwe bali aba mweo lelo. 4 Yehova alandile na imwe pa kanwa nkati* mu mulilo+ mu lupili. 5 Pali ilya nshita naiminine pa kati, uku Yehova uku imwe,+ pa kuti imwebe amashiwi ya kwa Yehova, pantu mwali no mwenso pa mulandu wa mulilo kabili tamwaninine ulupili.+ Atile:

6 “‘Nine Yehova Lesa wenu, uwamufumishe mu calo ca Egupti, mu ng’anda ya busha.+ 7 Tamufwile ukulapepa balesa bambi, mulepepa fye ine.+

8 “‘Mwilapanga icimpashanya+ nelyo conse icapala ica mu muulu nangu icapala ica pano isonde nelyo icapala ica mu menshi. 9 Mwilafikontamina kabili mwilafibombela,+ pantu ne Yehova Lesa wenu ndi Lesa uufwaya ukulampepa fye neka,+ uukanda abana na beshikulu ne fishikulula pa membu sha bashibo abampata,+ 10 lelo uulanga ukutemwa ukushipwa* na ku ba mu nkulo iyalenga 1,000 iya bashibo abantemwa kabili abasunga amafunde yandi.

11 “‘Mwilalumbula ishina lya kwa Yehova Lesa wenu na pashilingile+ pantu Yehova takaleke fye umuntu uulumbula ishina lyakwe na pashilingile+ ukwabula ukumukanda.

12 “‘Muleibukisha ubushiku bwe Sabata kabili mulebumona ukuti bwa mushilo, nga filya fine Yehova Lesa wenu amwebele.+ 13 Mulebomba imilimo yenu yonse mu nshiku 6,+ 14 lelo ubushiku ubwalenga 7 lisabata lya kwa Yehova Lesa wenu.+ Mwilabombamo umulimo nangu umo,+ imwe nelyo abana benu nangu ababomfi benu nelyo ing’ombe iilume nangu impunda nelyo icitekwa cenu cimbi nangu umulebeshi wenu uo mwikala nankwe mu misumba* yenu,+ pa kuti ababomfi benu abaume na babomfi benu abanakashi baletuusha nge fyo imwe mutuusha.+ 15 Muleibukisha ukuti mwali abasha mu calo ca Egupti. Muleibukisha no kuti Yehova Lesa wenu amufumishe muli ici calo ku kuboko ukwa maka na ku kuboko ukwatambalikwa. E co Yehova Lesa wenu amwebele ukulasunga Isabata.+

16 “‘Mulecindika bashinwe na banyinenwe+ pa kuti mwingekala inshiku ishingi mu calo ico Yehova Lesa wenu alemupeela na pa kuti ifintu filemuwamina, nga filya fine Yehova Lesa wenu amwebele.+

17 “‘Mwilaipaya.+

18 “‘Mwilacita ubucende.+

19 “‘Mwilaiba.+

20 “‘Mwilaba kambone wa bufi pa munenu.+

21 “‘Mwilakumbwa umukashi wa munenu.+ Kabili mwilakumbwa ing’anda ya munenu, nelyo ibala lyakwe nangu umubomfi wakwe umwaume nelyo umubomfi wakwe umwanakashi, nangu ing’ombe yakwe iilume nelyo impunda yakwe nangu conse ico akwata.’+

22 “Aya e mafunde* ayo Yehova apeele ulukuta lwenu lonse mu lupili, mu mulilo, mwi kumbi na mu mfifi iyafiita fititi,+ kabili alandile mwi shiwi ilikalamba, kabili talundilepo amafunde na yambi. Lyena ayalembele pa mabwe yabili ayapaapaatala e lyo ampeela.+

23 “Lelo ilyo mwaumfwile fye ishiwi lilefuma mu mfifi, ninshi ulupili lulepya,+ intungulushi shonse isha mikowa yenu na bakalamba bapaleme kuli ine. 24 Lyena mwalandile amuti, ‘Moneni Yehova Lesa wesu natulanga ubukata bwakwe na maka yakwe, kabili natuumfwa ishiwi lyakwe ilyacilafuma mu mulilo.+ Buno bushiku natumona ukuti Lesa kuti alanda no muntu kabili uyo muntu kuti atwalilila ukuba uwa mweo.+ 25 Nomba tatulefwaya ukufwa, pantu uyu umulilo uukalamba kuti watwipaya. Nga twatwalilila fye ukumfwa ishiwi lya kwa Yehova Lesa wesu, nangu cibe shani twalafwa. 26 Pantu takwatala akuba umuntunse uwaumfwapo Lesa wa mweo alelanda mu mulilo nge fyo twacumfwa, kabili uyo muntu atwalilila uwa mweo. 27 Iwe niwe ufwile ukupalama kuli Yehova Lesa wesu no kumfwa fyonse ifyo alalanda, e lyo wise utwebe fyonse ifyo Yehova Lesa alakweba. Twalaisaumfwa kabili tuleisacita ifyo fine.’+

28 “E ico Yehova alyumfwile ifyo mwanjebele, kabili Yehova anjebele ati, ‘Ning’umfwa ifyo aba bantu bakwebele. Fyonse ifyo balandile fili fye bwino.+ 29 Nga bakwata umutima wa kuntiina+ kabili uwa kusunga amafunde yandi yonse;+ ninshi ifintu fya kulabawamina pamo na bana babo umuyayaya!+ 30 Kabiye ubebe auti: “Bweleleni ku matenti yenu.” 31 Lelo iwe ulingile ukuba na ine pano, kabili nalakupeela amafunde yonse no bupingushi ifyo ufwile ukubasambilisha pa kuti bakalefikonka mu calo ico ndebapeela.’ 32 Nomba mulingile ukulabika amano ku kucita ifyo Yehova Lesa wenu amwebele.+ Tamufwile ukwalukila ku kwa kulyo nelyo ku kwa kuso.+ 33 Mulingile ukulakonka fyonse ifyo Yehova Lesa wenu amwebele,+ pa kuti mube no mweo, pa kuti ifintu filemuwamina kabili mukekale inshiku ishingi mu calo ico mukekalamo.+

6 “Nomba aya e mafunde no bupingushi ifyo Yehova Lesa wenu anjebele ukuti imusambilishe, pa kuti mukalefikonka mu calo ico mukalaikalamo nga mwa-abuka umumana wa Yordani, 2 na pa kuti muletiina Yehova Lesa wenu kabili mulekonka fyonse ifyo amweba e lyo na mafunde yakwe ayo ndemweba, imwe na bana benu na beshikulu benu,+ inshiku shonse isha myeo yenu, pa kuti mukekale imyaka iingi.+ 3 Kabili mufwile ukukutika mwe bena Israele, kabili mulefikonka, pa kuti ifintu filemuwamina na pa kuti mukafule nga nshi mu calo umwaba umukaka no buci, nga filya fine Yehova Lesa wa fikolwe fyenu amulaile.

4 “Umfweni mwe bena Israele: Yehova Lesa wesu ni Yehova umo.+ 5 Mulingile ukutemwa Yehova Lesa wenu no mutima wenu onse no mweo*+ wenu onse na maka yenu yonse.+ 6 Aya amashiwi ayo ndemweba lelo yafwile ukuba mu mitima yenu, 7 kabili mulingile ukulasambilisha* abana benu+ aya mashiwi, muleyalandapo ilyo mwikele mu mayanda yenu na lintu mule-enda mu musebo na pa kulaala na pa kubuuka.+ 8 Yafwile ukuba nge cishibilo ico mwakaka pa maboko yenu, kabili yafwile ukuba nge ca kukaka pa mpumi* shenu.+ 9 Mukayalembe pa nceshi sha pa miinshi ya mayanda yenu na pa mpongolo sha misumba yenu.

10 “Ilyo Yehova Lesa wenu akamwingisha mu calo ico alaile ifikolwe fyenu, Abrahamu, Isaki na Yakobo ukuti akamupeela,+ imisumba iikalamba kabili iisuma iyo mushakuulile,+ 11 amayanda umwaba ifintu ifisuma ifingi ifya misango yonse ifyo mushabombeele, ifya kusungilamo amenshi ifyo mushaimbile ne fimuti fya myangashi ne fya miolife ifyo mushalimbile, kabili mwalya no kwikuta mwaikuta,+ 12 mukacenjele pa kuti mwikalaba Yehova+ uwamufumishe mu calo ca Egupti, mu ng’anda ya busha. 13 Mufwile ukulatiina Yehova Lesa wenu+ kabili e o mufwile ukulabombela,+ kabili mulelapila mwi shina lyakwe.+ 14 Mwilapepa balesa bambi, balesa bonse abo abantu abamushinguluka bapepa,+ 15 pantu Yehova Lesa wenu uuli na imwe, ni Lesa uufwaya ukulamupepa fye eka.+ Nga mulepepa balesa bambi, Yehova Lesa wenu akakalipa+ kabili akamulofya pano isonde.+

16 “Mwilaesha+ Yehova Lesa wenu, nga filya mwamweseshe pa Masa.+ 17 Mulekonka sana amafunde ya kwa Yehova Lesa wenu ne fyo amwibukishako e lyo na fyonse ifyo amweba. 18 Mulingile ukulacita ifyalungama kabili ifisuma mu menso ya kwa Yehova, pa kuti ifintu filemuwamina na pa kuti mukengile mu calo cisuma ico Yehova alaile ukuti akapeela ifikolwe fyenu+ kabili cikabe icalo cenu, 19 ilyo akamutamfishako abalwani benu bonse, nga filya fine Yehova alaya.+

20 “Nga ca kuti ku ntanshi abana benu bamwipusha abati, ‘Cinshi Yehova Lesa wesu amupeelele aya amafunde, ubupingushi ne fya kutwibukishako?’ 21 lyena mukabasuke amuti, ‘Twaishileba abasha ba kwa Farao mu Egupti, lelo Yehova atufumishe mu Egupti no kuboko ukwa maka. 22 E ico twaleimwena ilyo Yehova alecita ifishibilo ne fipesha amano ifikalamba kabili ifyaonawile Egupti,+ Farao na ba mu ng’anda yakwe bonse.+ 23 Kabili atufumishe mu Egupti pa kuti atulete kuno, atupeele icalo ico alaile ifikolwe fyesu.+ 24 Lyena Yehova atwebele ukuti tulekonka aya mafunde yonse, kabili tuletiina Yehova Lesa wesu pa kuti ifintu filetuwamina lyonse,+ na pa kuti tutwalilile ukuba aba mweo+ nge fi fine tuli lelo. 25 Kabili tukaba abalungami, nga tulebika amano ku kukonka amafunde yonse aya pa kuti tuleumfwila Yehova Lesa wesu, nga filya fine atweba.’+

7 “Ilyo Yehova Lesa wenu akamwingisha mu calo ico muli no kulaikalamo+ kabili icikaba icalo cenu, akamucimfishako inko ishikalamba:+ abena Hiti, abena Gegashi, abena Amore,+ abena Kanaani, abena Perisi, abena Hibi na bena Yebusi,+ inko 7 ishikalamba kabili isha maka ukumucila.+ 2 Yehova Lesa wenu akalenga mukacimfye ishi inko.+ Mufwile fye ukushonaula.+ Tamufwile ukupangana nasho icipangano nangu ukushumfwila uluse.+ 3 Tamulingile ukulaufishanya nabo. Abana benu abanakashi mwikabofya ku bana babo abaume, kabili mwikaleka abana benu abaume bakope abana babo abanakashi.+ 4 Pantu bakalenga abana benu abaume bakaleke ukumombela, bakalebombela balesa bambi.+ Lyena Yehova akamufulilwa kabili akamulofya+ bwangu.

5 “Lelo ifi e fyo mukacite: Mukabongolole ifiipailo fyabo, mukatobaule ifyo baimika ifya mabwe ifyo bapepelapo,+ mukateme ne fimuti ifyo baimika ifyo bapepelapo,*+ kabili mukoce ifimpashanya fyabo.+ 6 Pantu Yehova Lesa wenu amumona ukuti muli ba mushilo, kabili Yehova Lesa wenu alimusala pa kuti mube abantu bakwe. Mwaba nge cipe cakwe icaibela* pa bantu bonse aba pano isonde.+

7 “Icalengele Yehova amutemwe no kumusala,+ te mulandu wa kuti mwalifulishe ukucila abantu bonse. Na kuba mwali abacepesha pa bantu bonse.+ 8 Lelo ni pa mulandu wa kuti Yehova alimutemenwe, na pa mulandu wa kuti alisungile umulapo alapile ku fikolwe fyenu,+ e calengele Yehova amufumishe ku kuboko ukwa maka, pa kuti amulubule mu ng’anda ya busha,+ mu minwe ya kwa Farao imfumu ya Egupti. 9 Mwalishiba bwino bwino ukuti Yehova Lesa wenu e Lesa wa cine, e Lesa wa cishinka, uusunga icipangano kabili uulanga ukutemwa ukushipwa ku ba nkulo yalenga 1,000 abamutemwa kabili abakonka amafunde yakwe.+ 10 Lelo bonse abamupata akabonaula.+ Takashingashinge ukonaula abamupata; akabakanda. 11 E ico mulebika amano ku kukonka amafunde no bupingushi ifyo ndemweba lelo ukuti mulefikonka.

12 “Nga mwatwalilila ukumfwa ubu bupingushi kabili mwalabukonka, Yehova Lesa wenu akasunga icipangano no kumulanga ukutemwa ukushipwa nga filya fine alapile ku fikolwe fyenu. 13 Akamutemwa no kumupaala kabili akamufusha. Cine cine akalenga mukakwate abana abengi*+ kabili akalenga ne fisabo fya mu mushili wenu, ingano shenu, umwangashi wenu na mafuta fikafule.+ Kabili akalenga na bana ba ng’ombe shenu na bana ba mpaanga shenu bakafule mu calo ico alaile ifikolwe fyenu ukuti akamupeela.+ 14 Mukaba abapaalwa ukucila abantu bonse;+ pali imwe tapakabe umwaume nelyo umwanakashi uushakakwatepo umwana. Na pa fitekwa fyenu tapakabe icishakakwate abana.+ 15 Yehova akafumya amalwele yonse pali imwe, kabili takamuletele amalwele yonse ayabipa ayo mwaishibe mu Egupti.+ Lelo akayaleta pali bonse abamupata. 16 Mukalofye abantu bonse abo Yehova Lesa wenu alepeela mu minwe yenu.+ Tamufwile* ukubomfwila uluse,+ kabili tamufwile ukulabombela balesa babo,+ pantu ukucita ifi kukaba iciteyo kuli imwe.+

17 “Nga ca kutila mwalatontonkanya ukuti, ‘Ishi inko nashifula ukutucila. Tukashitamfya shani?’+ 18 tamufwile ukushitiina.+ Mukaleibukisha ifyo Yehova Lesa wenu acitile Farao ne calo ca Egupti conse,+ 19 ubupingushi ubukalamba* ubo mwamwene ne fishibilo, ifipesha amano,+ ukuboko ukwa maka no kuboko ukwatambalikwa uko Yehova Lesa wenu amufumiisheko.+ E fyo Yehova Lesa wenu akacita abantu bonse abo muletiina.+ 20 Yehova Lesa wenu akalenga bakasakamikwe,* mpaka bonse abasheleko+ na balefisama bakalobe. 21 Mwikabatiina pantu Yehova Lesa wenu ali na imwe,+ Lesa wa maka kabili uwa kutiinya.+

22 “Yehova Lesa wenu akulamutamfisha ishi inko panono panono.+ Takamusuminishe ukushilofya bwangu, pantu inama mpanga kuti shamufulila. 23 Yehova Lesa wenu akabapeela mu minwe yenu kabili mukalabacimfya, mpaka mukabalofye.+ 24 Akapeela imfumu shabo mu minwe yenu,+ kabili mukalofya amashina ya shiko mwi samba lya muulu.+ Takuli nangu imo iikamucila amaka,+ mpaka shonse mukashilofye.+ 25 Mufwile ukoca ifimpashanya fya balesa babo.+ Mwikakumbwa silfere na golde iyo babikako, kabili mwikaibula,+ pa kuti fikaba iciteyo kuli imwe, pantu Yehova Lesa wenu afimona ukuti fya bunani.+ 26 Tamulingile ukwingisha ica bunani mu mayanda yenu pantu Lesa kuti amonawila pamo naco. Mufwile ukucipata nga nshi kabili mulingile ukulacimona ukuti ca bunani pantu cintu icifwile ukonaulwa.

8 “Mufwile ukulabika amano ku kukonka amafunde yonse ayo ndemweba lelo, pa kuti mutwalilile ukuba no mweo+ kabili mufule nga nshi, mwingile na mu calo ico Yehova alaile ifikolwe fyenu.+ 2 Muleibukisha inshila iitali iyo Yehova Lesa wenu alengele mwaendamo pali iyi imyaka yonse 40 mu matololo,+ pa kuti amusambilishe ukuba abaiceefya, na pa kuti amweshe+ pa kutila eshibe ifyali mu mitima yenu,+ nampo nga kuti mwakonka amafunde yakwe nelyo iyo. 3 E ico alimusambilishe ukuiceefya kabili amulekele ne nsala+ kabili amuliishishe mana+ iyo mushatalile amwishiba, iyo na bashinwe bashatalile abeshiba, pa kuti mwishibe ukuti te fya kulya fyeka ifilenga umuntu atwalilila ukuba no mweo, lelo na mashiwi yonse ayo Yehova alanda.+ 4 Ifya kufwala fyenu tafyasapwike, na makasa yenu tayafimbile muli iyi imyaka 40.+ 5 Mwalishiba bwino bwino mu mitima yenu ukuti filya fine umuntu alungika umwana wakwe umwaume, e fyo Yehova Lesa wenu alemulungika.+

6 “Nomba mulingile ukulakonka amafunde ya kwa Yehova Lesa wenu. Pa kuti mulekonka amafunde yakwe mulingile ukulamumfwila no kulamutiina. 7 Pantu Yehova Lesa wenu alemwingisha mu calo icisuma,+ umwaba imimana no tumfukumfuku utufukaukila mu mpanga iyabatama na mu mpili, 8 umwaba ingano na barle, imyangashi, imikunyu ne mipomegranate,+ icalo umwaba imiolife iya kupangamo amafuta kabili umwaba ubuci.+ 9 Muli ici icalo tamwakaleba icipowe, mwaba amabwe ya cela kabili mu mpili sha ciko mukalaimbamo umukuba.

10 “Nga mwalya kabili mwaikuta, mukaletasha Yehova Lesa wenu pa calo icisuma ico akamupeela.+ 11 Mukacenjele pa kuti mwikaleka ukukonka amafunde ya kwa Yehova Lesa wenu no bupingushi bwakwe ifyo ndemweba lelo pa kuti mwikamulaba. 12 Nga mwalya kabili mwaikuta, mwakuula na mayanda ayasuma no kwikalamo,+ 13 ing’ombe shenu ne mpaanga shenu fyasanda, na silfere na golde yenu yafula, kabili fyonse ifyo mwakwata fyafula, 14 mwikaba ne cilumba+ ica kuti mukalabe na Yehova Lesa wenu, uwamufumishe mu calo ca Egupti, mu ng’anda ya busha,+ 15 uwalengele mwende mu matololo ayakalamba kabili aya kutiinya,+ umwali insoka sha busungu na bakaling’ongo kabili umwali umushili uwauma uushakwete amenshi. Alengele amenshi yafume mu cilibwe icakosa nga nshi+ 16 kabili amuliishishe mana+ mu matololo, iyo bashinwe bashatalile abeshiba, pa kuti amusambilishe ukuba abaiceefya+ kabili amweshe pa kuti akamucitile ifisuma ku ntanshi.+ 17 Nga ca kuti mu mitima yenu mwatila, ‘Icalenga tukwate ifi fyuma ni co twalikwata amaka kabili twalikosa,’+ 18 muleibukisha ukuti Yehova Lesa wenu e umupeela amaka ya kunonka icuma,+ pa kuti afikilishe icipangano ico apangene ne fikolwe fyenu, nge fi fine aacita ukufika na lelo.+

19 “Nga ca kuti mukalaba Yehova Lesa wenu kabili nga mukalakonka balesa bambi no kubabombela no kubafukamina, ndemweba icine cine lelo nati, mukaloba.+ 20 Nga tamwakalekonka ifyo Yehova Lesa wenu akulamweba,+ mukaloba nga filya fine inko isho Yehova alemucimfishako shileloba.

9 “Umfweni mwe bena Israele, lelo muleabuka Yordani+ pa kuti muyepoka icalo ku nko ishikalamba kabili isha maka ukumucila,+ imisumba iikalamba kabili iya malinga ayatali icine cine,+ 2 abantu amapaka kabili abatali, abena Anaki,+ abo mwaishiba kabili abo mwaumfwa abantu balelandapo abati, ‘Nani engalwisha abena Anaki?’ 3 E ico lelo mufwile ukwishiba ukuti Yehova Lesa wenu alemutangilila pa kwabuka.+ Lesa wenu aba ngo mulilo uonaula,+ kabili akabalofya. Akabacimfya ninshi mulemonako pa kuti mukabafumye* bwangu mu calo no kubalofya, nga filya fine Yehova amulaile.+

4 “Ilyo Yehova Lesa wenu akamutamfishako inko, mwikatila mu mitima yenu amuti, ‘Ico Yehova atupeelela ici icalo+ ni co tuli balungami.’ Lelo ico Yehova alemutamfishishako ishi inko+ ni co shilacita ifyabipa. 5 Te pa mulandu wa kuti muli balungami kabili muli bakaele e co muleshipokela icalo. Lelo ni pa mulandu wa kuti ishi inko shilacita ifyabipa e co Yehova Lesa wenu aleshitamfisha,+ na pa kuti Yehova akafikilishe ifyo alaile ifikolwe fyenu, Abrahamu,+ Isaki+ na Yakobo.+ 6 Kanshi mwishibe ukuti ico Yehova Lesa wenu alemupeelela ici calo icisuma te pa mulandu wa kuti muli balungami, pantu nimwe bacintomfwa.*+

7 “Mwikalaba ifyo mwakalifye Yehova Lesa wenu mu matololo.+ Ukutula pa bushiku mwafumine mu calo ca Egupti mpaka ne lyo mwafikile kuno, tamumfwila Yehova.+ 8 Na mu Horebu mwine mwalikalifye Yehova kabili alikalipe icine cine ica kuti kwashele fye panono Yehova nga alimulofeshe.+ 9 Ilyo naile pa lupili mu kupoka amabwe ayapaapaatala+ aya cipangano ico Yehova apangene na imwe,+ naikele pa lupili inshiku 40 akasuba no bushiku,+ nshalelya no kunwa amenshi. 10 Lyena Yehova ampeele amabwe yabili ayapaapaatala ayo Lesa alembelepo ku munwe wakwe, kabili pali aya mabwe paali amashiwi yonse ayo Yehova amwebele pa lupili mu mulilo, pa bushiku mwalongene.+ 11 Ilyo shilya inshiku 40 shapwile, Yehova ampeele amabwe yabili ayapaapaatala, aya cipangano, 12 kabili Yehova anjebele ati, ‘Ima, tentemuka bwangu, pantu abantu bobe abo wafumishe mu Egupti nabacita ifyabipa.+ Nabafuma bwangu mu nshila iyo nabebele ukulakonka. Nabaipangila icimpashanya ca cela.’*+ 13 Lyena Yehova anjebele ati, ‘Nimona aba bantu, kabili mona! Ni bacintomfwa.*+ 14 Leka mbalofye, mfuute na mashina yabo mwi samba lya muulu, kabili leka nkulenge ube uluko ulwa maka kabili ulukalamba ukubacila.’+

15 “Lyena nalyalwike natentemuka no lupili ninshi lulepya,+ kabili nasendele amabwe yabili ayapaapaatala aya cipangano mu minwe yandi.+ 16 Kabili ilyo naloleshe, namwene ukuti namubembukila Yehova Lesa wenu! Mwali-ipangiile umwana wa ng’ombe uwa cela.* Mwalifumine bwangu mu nshila iyo Yehova amwebele ukulakonka.+ 17 E ico napoosele amabwe yabili ayapaapaatala ayo nasendele mu minwe yandi panshi, kabili yalitobaike ninshi na imwe mulemonako.+ 18 Lyena nawile ubukupeme pa cinso ca kwa Yehova, nge fyo nacitile pa kubala pa nshiku 40 akasuba no bushiku. Nshalelya no kunwa amenshi+ pa mulandu wa membu shonse isho mwacitile, pantu mwalicitile ifyabipa mu menso ya kwa Yehova kabili mwalimukalifye. 19 Nalitiinine pantu Yehova alikalipe nga nshi+ pa fyo mwacitile ica kuti kwashele fye panono nga alimulofeshe. Lelo na pali ilya ine nshita Yehova alikutike kuli ine.+

20 “Yehova alifuliilwe sana Aarone ica kuti kwashele fye panono nga alimulofeshe,+ lelo na pali ilya ine inshita nalimupaapaatileko. 21 Lyena nabuulile umwana wa ng’ombe+ uo mwapangile uwalengele ukuti mubembuke kabili nalimocele, nalimushonawile kabili nalimupelele ica kuti aba fye ngo lukungu, kabili naulwilile ulo ulukungu mu kamana akafuma mu lupili.+

22 “Na kabili mwalikalifye Yehova pa Tabera,+ pa Masa+ na pa Kibrote-hataaba.+ 23 Ilyo Yehova amufumishe pa Kadeshe-barnea,+ amweba no kuti, ‘Kabiyeni muyepoka icalo ico nalamupeela!’ na pali iyi yine inshita mwalikeene ukukonka ifyo Yehova Lesa wenu amwebele,+ tamwamutetekele+ kabili tamwamumfwilile. 24 Ukutula fye apo namwishibila, mulapondokela Yehova.

25 “E ico nalelaala ubukupeme pa cinso ca kwa Yehova inshiku 40 akasuba no bushiku.+ Ico nalelaalila ubukupeme ni co Yehova alandile ukuti ali no kumulofya. 26 Natendeke ukupaapaata Yehova nati, ‘Mwe Shikulu Mulopwe Yehova, mwilofya abantu benu. Baba nge cipe cenu icaibela+ pantu mwabalubwile ku maka yenu kabili mwabafumishe mu Egupti ku kuboko kwenu ukwa maka.+ 27 Ibukisheni ababomfi benu Abrahamu, Isaki na Yakobo.+ Mwibika amano kuli bucintomfwa bwa aba bantu na ku fyabipa ifyo bacita na ku lubembu lwabo.+ 28 Pantu aba mu calo ico mwatufumishemo kuti batila: “Yehova alifililwe ukubengisha mu calo ico abalaile, kabili pa mulandu wa kuti alibapatile, abatwele mu matololo pa kuti ayebepaya.”+ 29 Pantu bantu benu kabili baba nge cipe cenu icaibela,+ abo mwafumishe ku maka yenu na ku kuboko kwenu ukwatambalikwa.’+

10 “Pali ilya nshita Yehova anjebele ati, ‘Seesa amabwe yabili yabe nga ya ntanshi,+ kabili wise kuli ine pa lupili. Kabili ufwile ukupanga icipao* ca cimuti. 2 Pa mabwe ayapaapaatala nkalembapo amashiwi ayaali pa mabwe ya ntanshi ayo watobele, kabili ulingile ukuyabika mu cipao.’ 3 E ico nalipangile icipao ca cimuti ca munganunshi kabili naseesele amabwe yabili nga ya pa kubala, e lyo naninine ulupili ninshi ninsenda na mabwe yabili mu minwe.+ 4 Lyena ailelembapo amashiwi yamo yene ayo alembele pa mabwe ya pa kubala.+ Alembelepo Amafunde 10,*+ ayo Yehova amwebele pa lupili, mu mulilo+ pa bushiku mwalongene;+ kabili Yehova alimpeele amabwe. 5 Lyena nalipilibwike natentemuka no lupili+ kabili nailebika amabwe ayapaapaatala mu cipao ico napangile umo yasungilwa, nga filya fine Yehova anjebele.

6 “Pa numa abena Israele bafumine ku Beerote Bene-yaakani baya ku Mosera. Kulya e ko Aarone afwilile kabili e ko bamushiikile.+ Lyena Eleasari umwana wakwe umwaume alimupyene pali bushimapepo.+ 7 Ilyo bafumine ku Mosera baile ku Gudigoda, kabili ilyo bafumine ku Gudigoda baile ku Yotebata,+ icalo umwaba utumana.

8 “Pali ilya inshita Yehova asalile umukowa wa kwa Lebi+ pa kuti ulesenda icipao ca cipangano ca kwa Yehova,+ kabili e o uleiminina pa cinso ca kwa Yehova, pa kuti ulemubombela kabili ulepaalila abantu mwi shina lyakwe+ nge fyo ucita ukufika na lelo. 9 E co abena Lebi bashabapeelelako impanga nangu ubupyani nge fyo bamunyinabo babapeela. Yehova e bupyani bwabo, nga filya fine Yehova Lesa wenu abebele.+ 10 Ine naikele pa lupili inshiku 40 akasuba no bushiku+ nga filya fine naikele pa kubala, kabili na pali ilya nshita Yehova alikutike kuli ine.+ Yehova talefwaya ukumonaula. 11 Lyena Yehova anjebele ati, ‘Ipekanyeni kabili utungulule abantu pa kuti bengile no kupoka icalo ico nalaile ifikolwe fyabo ukuti nkabapeela.’+

12 “Nomba mwe bena Israele, cinshi Yehova Lesa wenu afwaya mulecita?+ Afwaya mulecita ifi: muletiina Yehova Lesa wenu,+ mule-enda mu nshila shakwe shonse,+ mulemutemwa kabili mulebombela Yehova Lesa wenu no mutima wenu onse no mweo* wenu onse,+ 13 kabili mulekonka amafunde ya kwa Yehova ayo ndemweba lelo, pa kuti ifintu filemuwamina.+ 14 Moneni, imyulu ya kwa Yehova Lesa wenu, kumo ne myulu ya myulu,* pamo ne sonde na fyonse ifyabapo.+ 15 Lelo ni ku fikolwe fyenu fye e ko Yehova apaleme kabili e fyo atemenwe, ica kuti pa bantu bonse asalapo imwe mwe bana babo,+ nge fi fine mwaba abasalwa ukufika na lelo. 16 Mulingile ukusangulula* imitima+ yenu no kuleka bucintomfwa.*+ 17 Pantu Yehova Lesa wenu ni Lesa uwacila balesa bonse+ kabili ni Shikulu uwacila bashikulu bonse, Lesa mukulu, uwa maka kabili uwa kutiinya, uushaba na kapaatulula+ kabili uushaba nga bakapingula abapoka amafisakanwa. 18 Alaba no mulinganya ku mwana wa nshiwa* na kuli mukamfwilwa+ kabili alitemwa umulebeshi,+ alamupeela ifya kulya ne fya kufwala. 19 Na imwe bene mulingile ukutemwa abalebeshi, pantu mwali abalebeshi mu calo ca Egupti.+

20 “Muletiina Yehova Lesa wenu, e o mulebombela,+ mulelambatila kuli ena, kabili mulelapila mwi shina lyakwe. 21 E o mulelumbanya.+ Ni Lesa wenu, uwamucitila fyonse ifi ifikalamba kabili ifya kutiinya ifyo mwaimwena.+ 22 Ilyo abaali ifikolwe fyenu baile ku Egupti+ baali fye abantu* 70, lelo nomba Yehova Lesa wenu alilenga mwafula nge ntanda sha mu muulu.+

11 “Mulingile ukutemwa Yehova Lesa wenu+ kabili lyonse mulemumfwila, mulekonka ubupingushi bwakwe na mafunde yakwe. 2 Namwishiba ukuti lelo nde-eba imwe, nshile-eba abana benu abashaishiba kabili abashamonapo ifyo Yehova Lesa wenu asalapula,+ ubukulu bwakwe,+ ukuboko kwakwe ukwa maka+ no kuboko kwakwe ukwatambalikwa. 3 Tabamwenepo ifishibilo fyakwe ne fyo acitile mu Egupti kuli Farao imfumu ya Egupti na ku calo cakwe conse;+ 4 nelyo ifyo Yehova aonawile umupwilapo+ abashilika ba ku Egupti, bakabalwe ba kwa Farao na maceleta yakwe ifyo abunshishe muli Bemba Wakashika ilyo balemufulumuna. 5 Tabamonapo ifyo amucitila mu matololo mpaka mwafika na kuno, 6 nelyo ifyo acitile Datani na Abiramu abana ba kwa Eliabu umwana wa kwa Rubene, ilyo umushili waiswike no kubamina pamo na ba mu mayanda yabo na matenti yabo na babomfi babo bonse ababakonkele, pamo ne fitekwa fyabo fyonse ninshi na bena Israele bonse+ balemonako. 7 Mwali-imwenene imilimo yonse iikalamba iyo Yehova acitile.

8 “Mufwile ukulakonka amafunde yonse ayo ndemweba lelo, pa kuti mukose kabili mwabuke mwingile na mu calo ico mukalaikalamo, 9 na pa kuti mukekale inshiku ishingi+ mu calo ico Yehova alapile ukuti akapeela ifikolwe fyenu na bana* babo,+ icalo umwaba umukaka no buci.+

10 “Icalo ico muleya mu kwikalamo tacaba nge calo ca Egupti ico mwafuminemo, umo mwaletanda imbuto no kubombesha pa kushitapilila* kwati muletapilila amabala ya musalu. 11 Lelo icalo ico muleya mu kwikalamo nga mwayabuka mwaliba impili ne nika.+ Imfula e itapilila ici calo;+ 12 kabili Yehova Lesa wenu alicibikako amano. Yehova Lesa wenu alolesha pali ici calo umwaka onse.

13 “Kabili nga mukalakonka amafunde yandi ayo ndemweba lelo, nga mukalatemwa Yehova Lesa wenu kabili nga mukalamubombela no mutima wenu onse no mweo* wenu onse,+ 14 akalamupeela imfula pa nshita ya iko pa kuti ikaletapilila icalo cenu, imfula ya kubalilapo ne mfula ya kulekelesha, kabili mukalakwata ingano, imyangashi na mafuta.+ 15 Kabili akamesha umulemfwe mu mpanga uo ifitekwa fyenu fikalalya. Na imwe mukalakwata ifya kulya ifingi.+ 16 Mukacenjele pa kuti imitima yenu ikabelelekwa, ica kuti mukafume mu nshila kabili mukatampe ukupepa balesa bambi no kulabakontamina.+ 17 Pantu nga mwacita ifi, Yehova akamufulilwa, kabili akesala imyulu ica kuti imfula tayakaleloka+ no mushili ukaleka ukumesha ifya kulya kabili mukaloba bwangu mu calo icisuma ico Yehova alemupeela.+

18 “Mulingile ukusunga aya amashiwi yandi mu mitima yenu na mu matontonkanyo yenu kabili mufwile ukuyakaka pa maboko yenu nge cishibilo, kabili yafwile ukuba nge ca kukaka pa mpumi.*+ 19 Mulesambilisha abana benu aya mashiwi, muleyalandapo ilyo mwikele mu mayanda yenu na lintu mule-enda mu nshila na pa kulaala na pa kubuuka.+ 20 Mukayalembe pa nceshi sha pa miinshi ya mayanda yenu na pa mpongolo shenu, 21 pa kuti imwe na bana benu mukekale inshiku ishingi+ mu calo ico Yehova alapile ukuti akapeela ifikolwe fyenu,+ kulila fye imyulu yatwalilila ukuba pa muulu we sonde.

22 “Nga mwakulakonka amafunde yonse aya ayo ndemweba aya kutila, muletemwa Yehova Lesa wenu,+ mule-enda mu nshila shakwe shonse kabili mulelambatila kuli ena,+ 23 Yehova akamutamfishako+ ishi inko shonse, kabili mukapoka icalo ca ishi inko ishikalamba kabili ishafula ukumucila.+ 24 Icifulo conse ico mukanyantapo cikaba cenu.+ Ukufuma ku matololo ukufika ku Lebanone, ukufuma pa Mumana, umumana wa Yufrate, ukufika kuli bemba* wa ku masamba e ukaba umupaka wenu.+ 25 Takwakabe nangu umo uukamulwisha.+ Yehova Lesa wenu akalenga aba mu calo conse ico mukendamo+ bakamutiine, nga filya fine amulaile.

26 “Moneni, ndefwaya musalepo cimo pe paalo ne citiipu:+ 27 mukapaalwa nga ca kuti mukalakonka amafunde ya kwa Yehova Lesa wenu ayo ndemweba lelo,+ 28 lelo nga tamwakalekonka amafunde ya kwa Yehova Lesa wenu+ kabili nga mukafuma mu nshila iyo ndemweba lelo ukuti eyo mule-endamo, mukalekonka na balesa bambi abo mushaishiba, mukatiipwa.

29 “Ilyo Yehova Lesa wenu akamwingisha mu calo ico muli no kupoka, mukapaale abantu pa Lupili lwa Gerisimu, lelo mukatiipe abantu pa Lupili lwa Ebali.+ 30 Ishi impili shaba bushilya bwa Yordani ku masamba,* mu calo ca bena Kanaani abekala mu Araba, iyalungatana na Gilgali, mupepi ne fimuti ifikalamba ifya kwa More.+ 31 Pantu muleabuka Yordani pa kuti mwingile no kupoka icalo ico Yehova Lesa wenu alemupeela.+ Nga mwacipoka no kwikalamo, 32 mufwile ukuba abacenjela pa kuti mukalebika amano ku kukonka amafunde no bupingushi ifyo ndemweba lelo.+

12 Aya e mafunde no bupingushi ifyo mulingile ukubikako amano pa kuti mulefikonka mu nshiku shonse isho mukaba no mweo mu calo ico Yehova Lesa wa fikolwe fyenu akamupeela. 2 Mulingile ukonaula ififulo fyonse ifyo inko mulepoka icalo shipepelapo balesa+ ba shiko, nampo nga ni pa mpili ishitali nelyo nga ni pa tupili nangu mwi samba lya cimuti conse icalelema. 3 Mufwile ukubongolola ifiipailo fyabo, mukatobaule amabwe ayo baimika ayo bapepelapo,+ mukoce ifimuti ifyo baimika* ifyo bapepelapo kabili mukaputaule balesa babo+ abo bapanga, pa kuti mukalofye amashina ya balesa babo muli ifi ififulo.+

4 “Ifi te fyo+ mufwile ukulapepa Yehova Lesa wenu. 5 Lelo pa cifulo ico Yehova Lesa wenu akasala ukubikapo ishina lyakwe mu mikowa yenu yonse kabili apo akalaikala, epo mukaleya mu kupepela.+ 6 Kuli ico cine icifulo e ko mukaletwala imituulo yenu iya koca,+ amalambo yenu, conse icalenga 10,+ imisangulo ya mu minwe yenu,+ imituulo ya mulapo wenu, imituulo yenu iya kuitemenwa+ na mabeli ya ng’ombe shenu na ya mpaanga shenu ne mbushi.+ 7 Imwe na ba mu mayanda yenu, mukaleliila pali ico icifulo pa cinso ca kwa Yehova Lesa wenu+ kabili mukalesekelela mu mulimo wenu onse,+ pantu Yehova Lesa wenu alimupaala.

8 “Tamufwile ukulacita nge fi tucita pali lelo, ica kuti cila muntu acita fye ifyo alefwaya,* 9 pantu tamulaingila mu cifulo ca kutuushishamo+ kabili icalo ico Yehova Lesa wenu alemupeela. 10 Ilyo mukaabuka Yordani,+ mukekale na mu calo ico Yehova Lesa wenu alemupeela, akamucingilila ku balwani benu bonse abamushinguluka, kabili mukekala ku matwi tondolo.+ 11 Mukaletwala fyonse ifyo ndemweba pa cifulo ico Yehova Lesa wenu akasala apakaba ishina lyakwe,+ imituulo yenu iya koca, amalambo yenu, conse ica pe kumi,+ imisangulo ya mu minwe yenu ne mituulo ya milapo yenu iyo mukalalapa ukutuulila Yehova. 12 Mukalasekelela pa cinso ca kwa Yehova Lesa wenu,+ imwe na bana benu abaume, abana benu abanakashi na babomfi benu abaume na babomfi benu abanakashi na bena Lebi abakalaikala mu misumba* yenu, pantu tabakabapeele impanga nelyo ubupyani nge fyo imwe bakamupeela.+ 13 Mukacenjele pa kuti mwikalatuulila imituulo ya koca pa cifulo conse ico mwamona.+ 14 Pa cifulo ico Yehova akasala mu citungu ca mukowa wenu umo, epo mukaletuulila imituulo yenu iya koca, kabili epo mukalecitila fyonse ifyo ndemweba.+

15 “Nga mwafuluka ukulya inama, kuti mwaipaya, kabili mukalelya inama+ ukulingana ne fyo Yehova Lesa wenu amupaala mu misumba yenu.* Uwakowela no wasanguluka kuti alyako, nga filya fine mwingalya impombo nelyo insebula. 16 Lelo umulopa+ wena tamufwile ukulalya; mulingile ukulaupongolwela panshi kwati menshi.+ 17 Tabakamusuminishe ukuliila mu misumba* yenu icalenga 10 ica ngano, ica mwangashi, ica mafuta yenu, amabeli ya ng’ombe shenu na ya mpaanga shenu na ya mbushi,+ imituulo yonse iya milapo yenu iyo mukalalapa, imituulo yenu iya kuitemenwa nelyo umusangulo wa mu minwe yenu. 18 Mukaleliila ifi pa cinso ca kwa Yehova Lesa wenu pa cifulo ico Yehova Lesa wenu akasala.+ Mukaleliila pamo na bana benu abaume, abana benu abanakashi, ababomfi benu abaume na babomfi benu abanakashi na bena Lebi abakalaikala mu misumba* yenu; kabili mukalasekelela pa cinso ca kwa Yehova Lesa wenu mu milimo yenu yonse. 19 Tecakwesha ukulekelesha abena Lebi+ inshiku shonse isho mukekala mu calo cenu.

20 “Yehova Lesa wenu nga akusha icalo cenu,+ nga filya fine amulaya,+ kabili mwatila, ‘Ndefwaya ukulya inama,’ pantu namufuluka* ukulya inama, kuti mwalya inama lyonse ilyo mwafuluka ukuilya.+ 21 Nga ca kuti icifulo ico Yehova Lesa wenu akasala ukubikapo ishina lyakwe+ cikaba ukutali, lyena nga mwafuluka ukulya inama, mulingile ukulaipayapo ing’ombe shenu shimo nelyo impaanga shenu shimo isho Yehova amupeela, nga filya fine namweba, kabili mufwile ukuliila mu misumba* yenu. 22 Nga filya fine mwingalya impombo nelyo insebula+ e fyo mukalelya ne shi shine inama; uwakowela no wasanguluka kuti alyako. 23 Mukapampamine fye pa kukanalya umulopa,+ pantu umulopa e bumi*+ kabili tamulingile ukuliila ubumi* kumo ne nama. 24 Tamufwile ukulalya umulopa. Mukaleupongolwela pa mushili kwati menshi.+ 25 Tamulingile ukulalya umulopa pa kuti ifintu fikalemuwamina pamo na bakatuntuka muli imwe, pantu ninshi mukalacita ifisuma mu menso ya kwa Yehova. 26 Lyonse ilyo muleya ku cifulo ico Yehova akasala, mulingile ukulasenda fye ifya mushilo fyenu ne mituulo yenu iya mulapo. 27 Pali ici icifulo e po mukaletuulila imituulo ya koca, iminofu no mulopa,+ pa ciipailo ca kwa Yehova Lesa wenu, kabili umulopa wa malambo yenu mukaleupongolwela pe samba lya ciipailo+ ca kwa Yehova Lesa wenu, lelo iminofu yena kuti mwalya.

28 “Mukacenjele pa kuti mukalekonka fyonse ifyo ndemweba, pa kuti ifintu fikalemuwamina pamo na bakatuntuka muli imwe, pantu ninshi mukalacita ifisuma mu menso ya kwa Yehova Lesa wenu.

29 “Yehova Lesa wenu akalofya inko isho muli no kupoka+ icalo, kabili mukalaikala mu calo ca shiko. 30 Ilyo akamulofeshako ishi inko, mukacenjele pa kuti mwikalacita ifyo shalecita. Mwikalaipusha pali balesa ba shiko amuti, ‘Bushe ishi inko shalebombela shani balesa ba shiko? Na ifwe bene e fyo twakulacita.’+ 31 Ifi te fyo mulingile ukulapepa Yehova Lesa wenu, pantu ifya bunani ifyo ishi inko shicita pa kupepa balesa ba shiko, Yehova Lesa wenu alifipata. Shiloca na bana ba shiko abaume na bana ba shiko abanakashi pa kubatuula kuli balesa ba shiko.+ 32 Amashiwi yonse ayo ndemweba eyo mufwile ukulakonka.+ Tamulingile ukulundako nelyo ukufumyako.+

13 “Nga ca kuti umo pali imwe aba kasesema nelyo umo pali imwe atampa ukulota ifikacitika ku ntanshi, kabili amulanga icishibilo nelyo asobela icipesha amano, 2 kabili icishibilo nelyo icipesha amano ico amwebele cacitika uku ninshi aleti, ‘Natukonke balesa bambi,’ balesa abo mushaishiba, ‘kabili natulebabombela,’ 3 mwikakutika kuli uyo kasesema nelyo ku muntu uulota ifiloto,+ pantu Yehova Lesa wenu alemwesha+ pa kuti amone nga mwalitemwa Yehova Lesa wenu no mutima wenu onse no mweo* wenu onse.+ 4 Mufwile ukulakonka Yehova Lesa wenu, mulemutiina, mulekonka amafunde yakwe, mulemumfwila; e o mulebombela, kabili mulingile ukulambatila kuli ena.+ 5 Lelo mulingile ukwipaya+ uyo kasesema nelyo umuntu uulota ifiloto uwalengele mufume mu nshila iyo Yehova Lesa wenu amweba ukwendamo, pantu alengele mwapondokela Yehova Lesa wenu, uwamufumishe mu calo ca Egupti kabili uwamulubwile mu ng’anda ya busha. E ico mufwile ukufumya ifyabipa muli imwe.+

6 “Nga ca kuti munonko uo mwafyalwa nankwe inda imo, nelyo umwana obe umwaume nangu umwana obe umwanakashi nelyo umukashi obe uo watemwa nangu umunobe uo watemwisha,* akutunka mu bumfisolo ati, ‘Natuleya mu kubombela balesa bambi,’+ abo imwe ne fikolwe fyenu mushaishiba, 7 pali balesa ba bantu abamushinguluka, nampo nga ba mupepi nelyo nga ba kutali, ukufuma apo icalo catampila ukufika apo capelela, 8 wikamukonkelela, wikakutika kuli ena,+ wikamumfwila uluse, wikamulangulukilako kabili wikamucingilila; 9 lelo ufwile ukumwipaya.+ Niwe ufwile ukubalilapo ukumupoola amabwe pa kumwipaya, e lyo abantu bonse bakakonkepo.+ 10 Kabili ukamupoole amabwe mpaka akafwe,+ pantu alefwaya ukukufumya kuli Yehova Lesa obe, uwakufumishe mu calo ca Egupti, mu ng’anda ya busha. 11 Lyena abena Israele bonse bakomfwa kabili bakatiina, tabakatale ababwekeshapo ukucita icabipa ica musango uyu.+

12 “Nga ca kuti mwaumfwa abantu mu musumba umo pa misumba ya kwikalamo iyo Yehova Lesa wenu alemupeela balelanda abati, 13 ‘Abaume ifinangwa baleongola abekala mu musumba wabo, balebeba abati: “Natuleya mu kubombela balesa bambi,” balesa abo mushaishiba,’ 14 mulingile ukufwailisha sana pali ilyo lyashi;+ kabili nga mwashininkisha ukuti ca cine bamo pali imwe balicita ica bunani, 15 mufwile ukwipaya abekala muli uyo musumba ku lupanga.+ Mukaonaule na conse icabamo, kumo ne fitekwa, fyonse mukafyonawile+ ku lupanga. 16 Lyena mulingile ukulonganika ifintu fyonse ifya muli uyo musumba ifyo mukapoka pa kati ka lubansa lwa uko, kabili mukoce uyo musumba, kabili ifyo mukapoka fikabe ngo mutuulo wa koca uwa kwa Yehova Lesa wenu. Uyo musumba ukabe icitantaala umuyayaya. Tamufwile uku-ukuula cipya cipya. 17 Tamulingile ukusendapo nangu cimo pa fifwile ukonaulwa,*+ pa kuti Yehova abweshemo ubukali bwakwe ububilima ngo mulilo, amubelele uluse, amulangulukileko kabili amufushe nga filya fine alapile ku fikolwe fyenu.+ 18 Pantu mufwile ukulakonka amafunde yonse aya kwa Yehova Lesa wenu ayo ndemweba lelo pa kuti mulemumfwila,* na pa kuti mulecita icalungama mu menso ya kwa Yehova Lesa wenu.+

14 “Muli bana ba kwa Yehova Lesa wenu. Mwilaiteetaula+ nelyo ukubeya ifikumbi fya menso* yenu ilyo muleloosha uufwile.+ 2 Pantu Yehova Lesa wenu amumona ukuti muli ba mushilo,+ kabili Yehova alimusala pa kuti mube abantu bakwe. Mwaba nge cipe cakwe icacindama* pa bantu bonse aba pano isonde.+

3 “Tamulingile ukulya conse ica bunani.+ 4 Ishi e nama isho mwingalya:+ ing’ombe, impaanga, imbushi, 5 insebula, impombo, sele, imbushi mabwe, impelembe, impaanga ya mu mpanga ne mpaanga ya mu mpili. 6 Inama yonse iya mabondo ayalepuka pabili kabili iibukula insaku, kuti mwalya. 7 Lelo inama ishibukula insaku nelyo isha mabondo ayalepuka pabili isho mushifwile ukulya ni shi: ingamila, kalulu na pati, pantu shilabukula insaku lelo tashalepuka amabondo pabili. Muleshimona ukuti shalikowela.+ 8 Inkumba nasho mwilalya pantu nangu shalilepuka amabondo pabili, tashibukula insaku. Muleshimona ukuti shalikowela. Tamufwile ukulya ishi inama, kabili mwilakumya na ku fitumbi fya shiko.

9 “Ifya mu menshi ifyo mwingalya ni fi: Conse icakwata utulebelebe na mamba kuti mwalya.+ 10 Lelo tamulingile ukulya conse icishakwata utulebelebe na mamba. Mulecimona ukuti calikowela.

11 “Icuni conse icasanguluka kuti mwalya. 12 Lelo ifi fyena mwilalya: kapumpe, inkwashi, ikubi lyafiita,+ 13 pungwa wakashika, bapungwa bafiita aba misango yonse, 14 bamwankole ba misango yonse, 15 mwakatala, icipululu, katotwe, inkoshi sha misango yonse, 16 akapululu, icipululu ca matwi ayatali, ishipi, 17 mukanga, ikubi, inondo, 18 kabaso, imisango yonse iya nkooba, puupuute na kasusu. 19 Ifisenya* ifyakwata amapindo nafyo mulefimona ukuti fyalikowela. Tamulingile ukulafilya. 20 Icipupuka conse icasanguluka kuti mwalya.

21 “Tamufwile ukulya inama iyaifwila.+ Kuti mwapeela umulebeshi uo mwikala nankwe mu misumba* kabili kuti alya, nelyo kuti mwaishitisha ku mulebeshi. Pantu Yehova Lesa wenu amumona ukuti muli ba mushilo.

“Tamulingile ukwipikila akana ka mbushi mu mukaka wa kwa nyina.+

22 “Mufwile ukulapeela icalenga 10 pa fisabo fyonse ifyo mwasombola mu mabala yenu cila mwaka.+ 23 Mukaleliila icalenga 10 ica pa ngano shenu, ica pa mwangashi wenu, ica pa mafuta yenu na mabeli ya ng’ombe shenu na ya mpaanga shenu pa cinso ca kwa Yehova Lesa wenu, pa cifulo akasala ukuti e po pabe ishina lyakwe,+ pa kuti mukasambilile ukutiina Yehova Lesa wenu inshiku shonse.+

24 “Lelo nga ca kuti icifulo ico Yehova Lesa wenu akasala ukubikapo ishina lyakwe+ cikaba ukutali sana ica kuti mwafilwa ukusenda icalenga 10 (pantu Yehova Lesa wenu akamupaala), 25 lyena kuti mwacishitisha, kabili mukasende indalama shenu, mukaye ku cifulo Yehova Lesa wenu akasala. 26 Lyena muli isho indalama kuti mwashitamo conse ico mukafwaya,* pamo nga ing’ombe, impaanga, imbushi, umwangashi no bwalwa na conse ico mukafwaya; kabili pali ico cifulo e po mukaliile pa cinso ca kwa Yehova Lesa wenu kabili mukasekelele, imwe na ba mu mayanda yenu.+ 27 Kabili mwikalekelesha abena Lebi abo mwikala nabo mu misumba yenu,+ pantu tababapeela impanga nelyo ubupyani nge fyo imwe bamupeela.+

28 “Lyonse nga papita imyaka itatu mulingile ukulafumyapo icalenga 10 pali fyonse ifyo mwasombola mu mwaka walenga butatu wine, kabili mukalecisungila mu misumba yenu.+ 29 Lyena abena Lebi abo bashapeela impanga nelyo ubupyani nge fyo imwe bamupeela, abalebeshi, abana ba nshiwa na bamukamfwilwa abo mwikala nabo mu misumba yenu, bakesa bakalye kabili bakekute,+ pa kuti Yehova Lesa wenu engamupaala muli fyonse ifyo mucita.+

15 “Lyonse imyaka 7 nga yapwa, mukalesuulako ku nkongole.+ 2 Ifi e fyo mukalecita: Onse uwakongwesha umunankwe akalesuulako ku nkongole isho umunankwe akongwele. Tafwile ukupinda umunankwe nelyo munyina, pantu ni Yehova e upingwile ukuti mufwile ukulasuulako kuli ishi inkongole.+ 3 Umulebeshi ena kuti wamupinda,+ lelo ulingile ukusuulako fye ku nkongole isho wakongwesha munonko. 4 Na lyo line, pali imwe tapafwile ukuba umupiina, pantu nangu cibe shani Yehova akamupaala+ mu calo ico Yehova Lesa wenu alemupeela pa kuti cibe icalo cenu, 5 kulila fye muleumfwila Yehova Lesa wenu kabili mulekonka amafunde yonse ayo ndemweba lelo.+ 6 Pantu Yehova Lesa wenu akamupaala nga filya fine amulaile, kabili mukakongwesha inko ishingi, lelo imwe tamwakakongole;+ kabili mukateka inko ishingi, lelo imwe tashakamuteke.+

7 “Nga ca kuti munyinenwe uo mukalaikala nankwe mu misumba ya mu calo ico Yehova Lesa wenu alemupeela aba umupiina, mwikalakosha imitima yenu kabili mwikalatana munyinenwe umupiina.+ 8 Pantu mufwile ukuba bakapekape kuli ena+ kabili mulingile ukumukongwesha conse ico alekabila nelyo ico ashikwete. 9 Mukacenjele pa kuti mwikalatontonkanya ifyabipa mu mitima yenu amuti, ‘Umwaka walenga 7, umwaka wa kusuulako ku nkongole naupalama,’+ kabili mukaletana munyinenwe umupiina, ica kuti mwakaana no kumupeela nangu cimo. Nga ailishanya kuli Yehova pali imwe, ninshi namubembuka.+ 10 Mulingile ukumupeela,+ kabili mwikalamupeela na mutimako, pantu e co Yehova Lesa wenu akamupaalila muli fyonse ifyo mukalacita.+ 11 Pantu mu calo tamwakatale amubula abapiina.+ E co ndemwebela nati, ‘Mulefumbatula iminwe yenu kuli munyinenwe uwacula kabili umupiina uuli mu calo cenu.’+

12 “Nga ca kuti washita munonko umuHebere umwaume nelyo umwanakashi, kabili akubombela pa myaka 6, mu mwaka walenga 7 ulingile ukumuleka akabe umuntungwa.+ 13 Kabili nga wamuleka aba umuntungwa, wikamuleka akaye minwe nkutwa. 14 Ulingile ukumupeelako impaanga nelyo imbushi shimo, ifisabo fimo, amafuta yamo no mwangashi umo. Ulingile ukumupeela ukulingana ne fyo Yehova Lesa obe akupaala. 15 Muleibukisha ukuti ilyo mwali mu calo ca Egupti mwaishileba abasha no kuti Yehova Lesa wenu alimulubwile. E co ndemwebela lelo ukuti mulecita ifi.

16 “Lelo nga akweba ati, ‘Nshilefwaya ukuya!’ pa mulandu wa kuti alikutemwa pamo na ba mu ng’anda yobe, kabili alitemwa ukwikala na iwe,+ 17 ninshi ukabuule ica kutulilako ukutwi kabili ukamushintilishe ukutwi ku ciibi e lyo ukamutule, lyena akatwalilila ukuba umusha obe. Ifi fine e fyo ufwile ukucita na ku musha obe umwanakashi uushilefwaya ukuya. 18 Ulingile ukuitemenwa ukumuleka abe umuntungwa kabili aye, pantu imilimo iyo akubombeele pa myaka 6 yalicilile pa miku ibili imilimo iyo bengalipililapo umuntu uo baingisha incito, kabili Yehova Lesa obe alikupaala muli fyonse.

19 “Mulingile ukupaatwila Yehova Lesa wenu+ amabeli yonse ayalume aya ng’ombe, aya mpaanga na ya mbushi. Tamufwile ukulabomfya amabeli ya ng’ombe* shenu ku mulimo nangu umo nelyo ukulabeya amabeli ya mpaanga shenu. 20 Imwe na ba mu ng’anda yenu mukaleliila amabeli pa cinso ca kwa Yehova Lesa wenu cila mwaka pa cifulo ico Yehova akasala.+ 21 Lelo ibeli nga lyalilemana, lilasunta nelyo lyalipofula nangu lyaliba na kalema kambi, mwikalituulila Yehova Lesa wenu.+ 22 Mulingile ukuliliila mu misumba* yenu, kabili uwakowela no wasanguluka kuti alyako nga filya fine mwingalya impombo nelyo insebula.+ 23 Lelo tamufwile ukulya umulopa+ wa liko; mukaleupongolwela panshi nga menshi.+

16 “Mukaleibukisha umweshi wa Abibu,* kabili mukalesefya Icakucilila ca kwa Yehova Lesa wenu,+ pantu mu mweshi wa Abibu e mo Yehova Lesa wenu amufumishe mu Egupti ubushiku.+ 2 Kabili mukaletuulila Yehova Lesa wenu+ ilambo lya Cakucilila, impaanga ne ng’ombe,+ pa cifulo ico Yehova akasala ukuti pabe ishina lyakwe.+ 3 Tamufwile ukuliila ilambo pamo no mukate uwatutumuka.+ Pa nshiku 7 mulingile ukulalya umukate uushatutumuka, umukate wa bucushi, pantu mwafumine lubilo lubilo+ mu calo ca Egupti. Mukalecita ifi pa kuti mukaleibukisha ubushiku mwafumine mu calo ca Egupti inshiku shonse isho mukaba aba mweo.+ 4 Takuli nangu umo uufwile ukusunga umufuba umuli icitutumushi mu calo cenu conse pa nshiku 7,+ kabili inama iyo mukalatuula ilambo icungulo pa bushiku bwa kubalilapo, tamufwile ukulaishako ica kuti yafika no lucelo.+ 5 Tabakamusuminishe ukulatuulila ilambo lya Cakucilila mu musumba uuli onse fye pa misumba iyo Yehova Lesa wenu alemupeela. 6 Lelo mulingile ukulatuulila ilambo lya Cakucilila pa cifulo ico Yehova Lesa wenu akasala ukuti pabe ishina lyakwe. Mukalelituula icungulo ilyo fye akasuba kawa,+ ukulingana ne nshita ilya ine mwafumiinepo mu calo ca Egupti. 7 Mulingile ukulalyocela no kulaliliila+ pa cifulo ico Yehova Lesa wenu akasala,+ lyena ulucelo kuti mwabwelela ku matenti yenu. 8 Pa nshiku 6 mukalelya umukate uushatutumuka, kabili pa bushiku bwalenga 7 mukalelongana ukulongana kwacindamisha ukwa kwa Yehova Lesa wenu. Pali ubu bushiku tamufwile ukulabomba umulimo nangu umo.+

9 “Mukalependa imilungu 7. Mukaletendekela ukupenda imilungu 7 ilyo mwatampa ukupisha icikwakwa mu ngano ishili mu mabala.+ 10 Lyena mulingile ukusefya Umutebeto wa Milungu uwa kwa Yehova Lesa wenu,+ kabili mukaletwala umutuulo wa kuitemenwa ukulingana ne fyo Yehova Lesa wenu amupaala.+ 11 Kabili mukalesekelela pa cinso ca kwa Yehova Lesa wenu, imwe na bana benu abaume, abana benu abanakashi, abasha benu abaume, abasha benu abanakashi, abena Lebi abo mukalaikala nabo mu misumba* yenu, abalebeshi, abana ba nshiwa na bamukamfwilwa abo mwikala nabo. Mukalesekelela pa cifulo ico Yehova Lesa wenu akasala ukuti pabe ishina lyakwe.+ 12 Muleibukisha ukuti mwaishileba abasha mu Egupti,+ kabili mulingile ukulakonka aya amafunde.

13 “Mufwile ukulasefya Umutebeto wa Nsakwe+ pa nshiku 7 nga mwalonganika ingano isho mupumine, kabili nga mwalonganika amafuta ayo mukamine no mwangashi uo mukamine. 14 Mukalesekelela pa nshita ya mutebeto wenu,+ imwe pamo na bana benu abaume, abana benu abanakashi, abasha benu abaume, abasha benu abanakashi, abena Lebi, abalebeshi, abana ba nshiwa na bamukamfwilwa, abo mukalaikala nabo mu misumba yenu. 15 Mukalesefya umutebeto+ wa kwa Yehova Lesa wenu pa nshiku 7 pa cifulo ico Yehova akasala, pantu Yehova Lesa wenu akamupaala muli fyonse ifyo mukalasombola na muli fyonse ifyo mukalacita,+ kabili mukalasekelela nga nshi.+

16 “Imiku itatu mu mwaka abaume benu bonse bakaleiminina pa cinso ca kwa Yehova Lesa wenu pa cifulo ico akasala: pa nshita ya Mutebeto wa Mukate Uushatutumuka,+ pa nshita ya Mutebeto wa Milungu,+ na pa nshita ya Mutebeto wa Nsakwe,+ kabili tabafwile ukuyaiminina pa cinso ca kwa Yehova minwe nkutwa. 17 Ubupe ubo cila muntu akalaleta bufwile ukulingana ne fyo Yehova Lesa wenu amupaala.+

18 “Mu mukowa umo na umo mulingile ukusontamo bakapingula+ na bacilolo mu misumba* yonse iyo Yehova Lesa wenu alemupeela, kabili tabafwile ukulafyenga abantu ilyo balebapingula. 19 Mwikalanyonganya ubupingushi.+ Mwikaba na kapaatulula+ kabili mwikalapoka amafisakanwa, pantu amafisakanwa yalapofwisha amenso ya ba mano+ kabili yalenga bapingula bubi bubi. 20 Mufwile ukuba no mulinganya,+ pa kuti mukatwalilile ukuba no mweo kabili mukekale mu calo ico Yehova Lesa wenu alemupeela.

21 “Mwikalimba icimuti ca kupepelapo*+ nangu cimo mupepi ne ciipailo ca kwa Yehova Lesa wenu ico mukapanga.

22 “Kabili mwikemika ica mabwe ica kupepelapo+ pantu Yehova Lesa wenu alicipata.

17 “Tamulingile ukulatuulila Yehova Lesa wenu ing’ombe iilume nelyo impaanga iyaba na kalema ka musango onse; pantu Yehova Lesa wenu+ amona ilambo lya musango uyu ukuti lya bunani.

2 “Nga ca kuti mu musumba umo pa misumba iyo Yehova Lesa wenu alemupeela mwasangwa umwaume nelyo umwanakashi uwapula mu cipangano+ ca kwa Yehova Lesa wenu pa mulandu wa kuti alecita ifyabipa, 3 kabili afuma mu nshila alapepa na balesa bambi kabili alabakontamina nelyo alakontamina akasuba nangu umweshi nelyo ifya mu muulu fyonse,+ ifyo nshamwebele ukuti e fyo mulecita.+ 4 Nga bamweba ili lyashi nelyo mwalyumfwa fye, lyena mufwile ukufwailisha bwino bwino. Nga mwashininkisha ukuti ca cine,+ ica bunani ca musango yu calicitika mu Israele, 5 ninshi mukafumishe uyo mwaume nelyo uyo mwanakashi uwacita ici icabipa kunse ya mpongolo ya musumba wenu, kabili uyo umwaume nelyo umwanakashi mufwile ukumupoola amabwe mpaka afwa.+ 6 Mulingile ukumwipaya fye nga ca kuti bakambone babili nelyo batatu+ e bamushinina.* Tamufwile ukumwipaya nga ca kuti kambone umo fye+ e wamushinina. 7 Bakambone e bafwile ukubalilapo ukumupoola amabwe pa kumwipaya, e lyo abantu bonse bakakonkepo. Mulingile ukufumya ifyabipa muli imwe.+

8 “Nga ca kuti mu musumba umo mwaba umulandu uwamwafya ukupingula, nampo nga mulandu wa kwipaya umuntu,+ nelyo mulandu wa kuilishanya ukuti umo nabamufyenga, nangu mulandu wa kucena umuntu, nelyo imilandu imbi iya kukansana, mufwile ukuya ku cifulo ico Yehova Lesa wenu akasala.+ 9 Mukaye kuli bashimapepo abena Lebi, na ku ukaba kapingula+ pali iyo nshita, kabili mukabatuulile umulandu, kabili bakapingula uyo umulandu.+ 10 Lyena mulingile ukukonka ifyo fine bakamweba pa cifulo ico Yehova akasala. Mukacite fyonse ifyo bakamweba. 11 Mufwile ukukonka amafunde ayo bakamweba ne fyo bakapingula umulandu.+ Mukacite fye ukulingana ne fyo bakapingula.+ 12 Uwakaana ukukutika kuli shimapepo uubombela Yehova Lesa wenu nelyo kuli kapingula pa mulandu wa kuti naituntumba, uyo muntu mufwile ukumwipaya.+ Mulingile ukufumya ifyabipa mu Israele.+ 13 Lyena abantu bonse bakomfwa kabili bakatiina, kabili tabakatale abaituntumbapo.+

14 “Ilyo mukafika mu calo ico Yehova Lesa wenu alemupeela, mwacipoka kabili mwalaikalamo, e lyo mwatila, ‘Natusonte imfumu ya kututeka nge fyo caba ku nko shonse ishatushinguluka,’+ 15 ninshi mufwile ukusonta uo Yehova Lesa wenu akasala.+ Uo mulingile ukusonta ukuba imfumu afwile ukuba munyinenwe. Tekwesha ukusonta umulebeshi pantu te munyinenwe. 16 Lelo imfumu tailingile ukukwata bakabalwe abengi,+ nangu ukutuma abantu bamo ku Egupti pa kuti bayeiletela bakabalwe+ abengi, pantu Yehova amwebele ati, ‘Tamulingile ukubwelela ku Egupti.’ 17 Kabili ikoopa abanakashi abengi pa kuti umutima wa iko wikafuma kuli ine;+ kabili ikakwata silfere na golde iingi nga nshi.+ 18 Umuntu nga aba imfumu, alingile ukukopolwela mwi buuku* lyakwe amafunde ayo bashimapepo abena Lebi+ basunga.

19 “Alingile ukusunga ilyo ibuuku, kabili akalebelengamo inshiku shonse isho akaba no mweo,+ pa kuti akasambilile ukutiina Yehova Lesa wakwe kabili akalekonka aya Amafunde yonse.+ 20 Lyena takaleitutumuna pali bamunyina kabili akalakonka amafunde lyonse, pa kuti akateke inshiku ishingi, ena na bana bakwe mu Israele.

18 “Bashimapepo abena Lebi, na bonse aba mu mukowa wa bena Lebi tabakabapeele impanga nelyo ubupyani nge fyo abena Israele bambi bakabapeela. Bakalalya imituulo ya kwa Yehova iya pa mulilo, e kutila ubupyani bwabo.+ 2 E ico tabafwile ukukwata ubupyani nge fyo bamunyinabo bakakwata. Yehova e bupyani bwabo, nga filya fine abeba.

3 “Nomba ifi e fyo abantu bakalapeela bashimapepo: Onse uwatuula ing’ombe iilume nelyo impaanga afwile ukupeela shimapepo ukuboko, imibango ne cifu. 4 Mukalemupeela+ ingano shenu ishabalilapo ukupya, umwangashi wenu uupya, amafuta yenu ayo mwabalilapo ukupanga na masako ya mpaanga shenu ayo mwabalilapo ukubeya. 5 Yehova Lesa wenu alimusala na bana bakwe abaume pa mikowa yenu yonse pa kuti balebombela mwi shina lya kwa Yehova inshiku shonse.+

6 “Lelo nga ca kuti umwina Lebi afuma mu musumba umo pa misumba ya mu Israele umo aleikala,*+ kabili afwaya ukuya ku cifulo ico Yehova akasala,*+ 7 kuti alabombela mwi shina lya kwa Yehova Lesa wakwe kuli ico cine icifulo nga filya fine fibomba bamunyina bonse abena Lebi, abeminina pa cinso ca kwa Yehova+ kuli ico cifulo. 8 Mukalemupeela ifya kulya ifikalalingana ne fyo mukalabapeela,+ ukulunda pa ndalama akasangamo nga ashitisha ifyo ifikolwe fyakwe fikasha.

9 “Ilyo mukengila mu calo ico Yehova Lesa wenu alemupeela, mwikesha ukulacita ifya bunani ifyo inko mukasanga shicita.+ 10 Pali imwe tapafwile ukuba nangu umo uoca* umwana wakwe umwaume nelyo umwana wakwe umwanakashi,+ onse uubuka imbuko,+ uucita ifinjelengwe,+ onse uusobela ifya ku ntanshi,+ indoshi,+ 11 uulowa, uuya mu kubukisha+ nelyo uuya ku usobela+ nelyo onse uulanda na bafwa.+ 12 Pantu onse uucita ifi fintu Yehova amumona ukuti wa bunani, kabili ni pa mulandu wa ifi fine ifya bunani, Yehova Lesa wenu aletamfisha ishi inko. 13 Mulingile ukulaba ababula akalema pa cinso ca kwa Yehova Lesa wenu.+

14 “Pantu ishi inko mulepokolola icalo shalekutika ku ba finjelengwe+ na ku babuka imbuko,+ lelo Yehova Lesa wenu tamusuminisha ukulacita ifya musango yu. 15 Pali bamunyinenwe Yehova Lesa wenu akamusontelapo kasesema uukaba nga ine. Mukalemumfwila.+ 16 Ifi e fyo cali ilyo mwaebele Yehova Lesa wenu mu Horebu pa bushiku mwalongene.+ Mwatile, ‘Tatulefwaya ukutwalilila ukumfwa ishiwi lya kwa Yehova Lesa wesu, nelyo ukutwalilila ukumona uyu umulilo uukalamba, pantu kuti twafwa.’+ 17 Lyena Yehova anjebele ati, ‘Ifyo balanda fili fye bwino. 18 Nkabapeela kasesema ukufuma pali bena, uukaba nga iwe,+ kabili nkalabika amashiwi yandi mu kanwa kakwe,+ kabili akulabeba fyonse ifyo nakulamweba.+ 19 Onse uushakalekonka amashiwi yandi ayo uyu kasesema akulalandila mwi shina lyandi,+ nkamulubulwisha.

20 “‘Nga ca kuti kwaba kasesema uwaituntumba ukulandila mwi shina lyandi, amashiwi ayo nshamwebele ukulanda nelyo uwalandila mwi shina lya balesa bambi, uyo kasesema afwile ukufwa.+ 21 Nomba nga ca kuti mu mitima yenu mwatila: “Tukalaishiba shani ukuti te Yehova alandile?” 22 Nga ca kuti kasesema alandila mwi shina lya kwa Yehova kabili ifyo alandile taficitike, ninshi Yehova te walandile ayo mashiwi. Uyo kasesema aituntumbile fye ukulanda ayo mashiwi. Tamulingile ukumutiina.’

19 “Yehova Lesa wenu nga alofya inko sha mu calo ico Yehova Lesa wenu alemupeela kabili nga mwashipoka icalo, mwaikala na mu misumba ya shiko na mu mayanda ya shiko,+ 2 mufwile ukupaatulapo imisumba itatu mu calo cenu ico Yehova Lesa wenu alemupeela.+ 3 Mulingile ukwakanya icalo ico Yehova Lesa alemupeela mu fiputulwa fitatu, kabili mukapange imisebo pa kuti uwaipaya umuntu akalebutukila kuli iyo misumba.

4 “Nomba ifi e fyo cifwile ukuba nga ca kuti uwaipaya umuntu abutukila kuli iyo imisumba pa kuti bemwipaya: Nga ca kuti aipaya umuntu munankwe mu kukanaishiba, lelo tamupatile+ ilyo ashilamwipaya; 5 nga ca kuti aya no munankwe mu mpanga mu kuteba inkuni, kabili aimya isembe pa kuti ateme icimuti, lelo isembe lyasokoka mu mupini kabili lyakoma umunankwe afwa no kufwa, uwamwipaya afwile ukufulumukila ku musumba umo pali iyi misumba pa kuti bemwipaya.+ 6 Pantu uwa kulandula pa mulopa+ kuti apepeka uwipeye lupwa wakwe kabili pa mulandu wa kuti umusumba ubelele ukutali, kuti amusanga amwipaya no kumwipaya pantu ninshi umutima wakwe naukalipa.* Lelo talingile ukufwa pantu ilyo ashilamwipaya tamupatile.+ 7 E co ndemwebela nati: ‘Mulingile ukupaatulako imisumba itatu.’

8 “Nga ca kuti Yehova Lesa wenu akusha icalo cenu nga filya fine alaile ifikolwe fyenu+ kabili amupeela ne calo conse ico alaile ifikolwe fyenu+ 9 (kulila fye mulekonka amafunde yonse ayo ndemupeela lelo, aya kuti muletemwa Yehova Lesa wenu kabili lyonse mule-enda mu nshila shakwe),+ lyena kuti mwalundapo imisumba na imbi itatu pali iyi itatu.+ 10 Nga mwacita ifi ninshi tamwakasuumye umulopa wa muntu wa kaele+ mu calo cenu ico Yehova Lesa wenu alemupeela, kabili tamwakabe no mulandu wa kwipaya umuntu.+

11 “Nomba nga ca kuti umuntu alipata umunankwe+ kabili amubelamina pa kuti amusanse, e lyo amuma ica kuti afwa no kufwa kabili uyu muntu abutukila ku musumba umo pali iyi misumba, 12 lyena abakalamba ba mu musumba wakwe bafwile ukumubwesha, no kumutwala ku wa kulandula pa mulopa pa kuti amwipaye.+ 13 Tamufwile ukumumfwila uluse,* kabili mulingile ukufumya uwaipaya umuntu wa kaele mu Israele,+ pa kuti ifintu fikalemuwamina.

14 “Nga bamupeela impanga mu calo ico Yehova Lesa wenu alemupeela, tamufwile ukulasesha icishibilo ca mupaka+ wa mpanga ya munenu ico ifikolwe fyenu fyabikilepo.

15 “Kambone umo te ufwile ukushinina* umuntu pa mulandu nelyo ulubembu ulo acitile.+ Bakambone babili nelyo batatu nga bashinina umuntu e lyo mwingashininkisha ukuti nacita umulandu.+ 16 Nga ca kuti kambone afyenga fye umuntu kabili amubepesha ukuti nacita umulandu,+ 17 ninshi babili abalekansana bakeminine pa cinso ca kwa Yehova, pa ntanshi ya bashimapepo na bakapingula abakabapo muli isho inshiku.+ 18 Bakapingula bakafwailishe bwino bwino umulandu,+ kabili nga basanga ukuti ni kambone wa bufi kabili alebepesha fye umunankwe, 19 kambone wa bufi mufwile ukumucita ifyo alefwaya ukucita umunankwe,+ kabili mufwile ukufumya ifyabipa muli imwe.+ 20 Abashala bakomfwa kabili bakatiina, kabili pali imwe tapakatale apaba uukacita icabipa ica musango yu.+ 21 Tamulingile ukumumfwila uluse:*+ Umweo pa mweo, ilinso pa linso, ilino pa lino, ukuboko pa kuboko, ulukasa pa lukasa.+

20 “Nga ca kuti mwaya mu kulwa inkondo na balwani benu, kabili mwamona ukuti bakabalwe na maceleta yabo nafifula ukucila ifyenu, kabili na bashilika babo nabafula ukucila abenu, mwikabatiina, pantu Yehova Lesa wenu uwamufumishe mu calo ca Egupti ali na imwe.+ 2 Ilyo muli mu kuya ku nkondo, shimapepo afwile ukwisalanda na bashilika.+ 3 Alingile ukubeba ati, ‘Umfweni mwe bena Israele, muli mu kuya mu kulwa na balwani benu. Mwileka imitima yenu isunguluke ku mwenso. Mwitiina kabili mwitutuma pa mulandu wabo, 4 pantu Yehova Lesa wenu aleya na imwe pa kuti amulwishisheko abalwani benu no kumupususha.’+

5 “Bacilolo nabo balingile ukweba abashilika abati, ‘Nani uukuulile ing’anda, nomba talatendeka ukwikalamo? Abwelele ku ng’anda yakwe. Pantu kuti ayafwila mu nkondo kabili umuntu umbi kuti atendeka ukwikalamo. 6 Kabili nani uwalima ibala lya myangashi, nomba talatendeka ukusombola ifisabo? Abwelele ku ng’anda yakwe. Pantu kuti ayafwila mu nkondo kabili umuntu umbi kuti atendeka ukusombola ifisabo fyakwe. 7 Kabili bushe pali uwakobekela, nomba talaupa? Abwelele ku ng’anda.+ Pantu kuti ayafwila mu nkondo kabili umwaume umbi kuti aupa uo akobekela.’ 8 Kabili bacilolo balingile ukwipusha abashilika abati, ‘Bushe pali uuli no mwenso?+ Abwelele ku ng’anda, pa kuti eyatompola imitima ya bamunyina nge fyo umutima wakwe utompweke.’*+ 9 Bacilolo nga bapwisha ukulanda na bashilika, balingile ukusonta abakalamba ba mabumba ya bashilika aba kutungulula abashilika.

10 “Nga mwaya mu kulwa na ba mu musumba, ilyo mushilatendeka ukulwa nabo mufwile ukubeba ukuti mulefwaya umutende.+ 11 Nga ca kuti batila balefwaya umutende kabili bamwiswila ne mpongolo, ninshi abantu bonse aba muli uyo musumba bakaba abasha benu, kabili bakalamubombela.+ 12 Lelo abena musumba nga bakaana ukuti tabalefwaya umutende, kabili bamulwisha, ninshi mufwile ukushinga uyo musumba, 13 kabili nangu cikabe shani Yehova Lesa wenu akalenga mukacimfye aba muli uyo musumba, kabili mukepaye abaume bonse ku lupanga. 14 Lelo mukasheko fye abanakashi, abana, ifitekwa na fyonse ifikaba muli uyo musumba. Ifipe fyonse ifyo mukapoka fikaba fyenu,+ kabili mukalalya ifyo mukapoka ku balwani benu, abo Yehova Lesa wenu akalenga mukacimfye.+

15 “Ifi fine e fyo mukacite imisumba yonse iyaba ukutali sana iishaba pa misumba ya ishi inko ishaba mupepi. 16 Lelo mufwile ukwipaya conse ica mweo+ mu misumba ya aba bantu iyo Yehova Lesa wenu alemupeela pa kuti ibe yenu. 17 Mufwile ukulofya abena Hiti, abena Amore, abena Kanaani, abena Perisi, abena Hibi na bena Yebusi,+ nga filya fine Yehova Lesa wenu amwebele; 18 pa kuti bekamusambilisha ifya bunani ifyo bacita pa kupepa balesa babo. Ifyo bacita kuti fyalenga mwabembukila Yehova Lesa wenu.+

19 “Nga mwashinga umusumba pa kuti mu-upoke kabili mwalwa na bekala musumba pa nshiku ishingi, tamulingile ukutemaula ifimuti fya uko. Kuti mwalalyako, kanshi tamufwile ukufitemaula.+ Bushe kuti mwasansa icimuti kwati mulesansa abantu? 20 Kuti mwatema fye ifimuti ifyo mwishibe ukuti te kuti mulyeko. Kuti mwafitema kabili kuti mwafibomfya pa kupindilila umusumba wa bantu abo mulelwa nabo, mpaka mwapoka uyo musumba.

21 “Nga ca kuti mwasanga umuntu nabamwipaila mu mpanga mu calo ico Yehova Lesa wenu alemupeela pa kuti cibe icalo cenu, kabili uumwipeye teshibikwe, 2 abakalamba ba mu Israele na bakapingula+ balingile ukuyapima intamfu ukufuma apali icitumbi ukufika ku misumba iili mupepi ne citumbi. 3 Lyena abakalamba ba musumba uuli mupepi sana ne citumbi balingile ukusenda ing’ombe iyana iyo bashabala ababomfyapo ku mulimo kabili iyo bashatala ababikapo kwi koli, 4 kabili abakalamba ba uyo musumba bafwile ukutwala ing’ombe iyana ku mupokapoka uulepisha amenshi uo bashalimamo nelyo uo bashabyalamo imbuto, kabili balingile ukufunina umukoshi wa iyi ing’ombe muli uyo umupokapoka.+

5 “E lyo bashimapepo abena Lebi bakapalame, pantu e bo Yehova Lesa wenu asala pa kuti balemubombela+ kabili balepaalila abantu mwi shina lya kwa Yehova.+ E bafwile ukupingula+ imilandu yonse iikumine uo basanshile. 6 Lyena abakalamba bonse aba uyo musumba uuli mupepi sana ne citumbi bafwile ukusambila iminwe yabo+ pa ng’ombe iyana iyo bafuniine umukoshi mu mupokapoka, 7 kabili bakalande abati, ‘Iminwe yesu teyasuumishe uyu mulopa, kabili amenso yesu tayamwene ulesuuma. 8 Mwipeela abantu benu abena Israele umulandu, abo mwalubwile+ mwe Yehova, kabili mulubule abantu benu abena Israele ku mulandu wa mulopa.’+ Lyena takabapeele umulandu wa mulopa. 9 Nga mwacita ifi, mukafumya umulandu wa mulopa muli imwe, pantu ninshi namucita icalungama mu menso ya kwa Yehova.

10 “Nga ca kuti mwaya mu kulwa na balwani benu kabili Yehova Lesa wenu amucimfishako abo abalwani, mwabasenda na mu kuyaba bankole,+ 11 kabili pali bankole wamonapo umwanakashi umusuma, kabili wamutemwa kabili ulefwaya ukumusenda pa kuti abe umukashi obe, 12 kuti wamwingisha mu ng’anda yobe. Lyena afwile ukubeya umushishi onse ku mutwe, ukusemba amaala yakwe, 13 kabili afwile ukufuula ifya kufwala fya bunkole no kwikala mu ng’anda yobe. Lyena akaloosha wishi na nyina pa mweshi umo uutuntulu,+ pa numa kuti walaala nankwe; ukaba umulume wakwe kabili na o akaba umukashi obe. 14 Lelo nga takusekeshe, ufwile ukumuleka aya+ konse uko alefwaya.* Nomba taulingile ukumushitisha ne ndalama nelyo ukumucusha pantu ninshi walimuseebanya.

15 “Nga ca kuti umwaume aupa abanakashi babili, kabili alitemwapo umukashi umo ukucila umukashi umbi,* kabili bonse babili balimufyalila abana abaume, lelo umwana mwaume ibeli afyalwa mu mukashi uo ashatemwa sana,+ 16 pa bushiku akalapeela abana bakwe abaume ifyo balingile ukupyana, tabakamusuminishe ukupeela umwana wakwe umwaume uo afyala mu mukashi uo atemwa ifyo alingile ukupeela umwana wakwe umwaume ibeli uo afyala mu mukashi uo ashatemwa sana. 17 Afwile ukupeela ibeli lyakwe ilyo afyala mu mukashi uo ashatemwa sana ifiputulwa fibili pali fyonse ifyo akwata, pantu uyu e ntendekelo ya maka ya bufyashi bwakwe. Insambu sha bubeli shakwe.+

18 “Nga ca kuti umuntu alikwata umwana umwaume cintomfwa kabili uwatalama, kabili tomfwila wishi nelyo nyina,+ kabili balyesha ukumulungika lelo tabomfwila,+ 19 ninshi wishi na nyina balingile ukumwikata no kumutwala ku bakalamba pa mpongolo ya mu musumba ekalamo, 20 kabili bakebe abakalamba ba musumba ekalamo abati, ‘Uyu umwana wesu ni cintomfwa kabili alitalama, tatumfwila. Muliili+ kabili ni cakolwa.’+ 21 Lyena abaume bonse aba mu musumba ekalamo bakamupoole amabwe mpaka akafwe. E fyo mulingile ukucita pa kufumya ifyabipa muli imwe, kabili bonse mu Israele nga baumfwa, bakatiina.+

22 “Umuntu nga acita ulubembu lwa kufwilapo, kabili bamwipaya,+ e lyo mwamukobeka pa cimuti,+ 23 icitumbi cakwe tacifwile ukulaala pa cimuti+ ubushiku bonse. Lelo mulingile ukumushiika ubo bwine bushiku, pantu uo bakobeka pa cimuti Lesa amumona ukuti alitiipwa,+ kabili tamufwile ukukowesha icalo cenu ico Yehova Lesa wenu alemupeela pa kuti cibe icalo cenu.+

22 “Nga ca kuti wamona ing’ombe ya mwina Israele munobe nelyo impaanga yakwe iilubile, taufwile ukuileka fye,+ ulingile ukuibwesesha ku mwine. 2 Lelo nga ca kuti umwine ekala ukutali nelyo nga taumwishibe, ufwile ukuisenda ku mobe, kabili ukaisunge mpaka umwine akaisange. Lyena ukamubweseshe.+ 3 Ifi fine e fyo ufwile ukucita nga wasanga impunda yakwe, ifya kufwala fyakwe, na conse ico umwina Israele munobe alufishe. Taulingile ukucileka fye.

4 “Nga ca kuti wamona impunda ya mwina Israele munobe nelyo ing’ombe yakwe yawila mu nshila, taulingile ukuileka fye. Ufwile ukumwafwa ukuimya.+

5 “Umwanakashi tafwile ukufwala ifya kufwala fya baume, umwaume na o tafwile ukufwala ifya kufwala fya banakashi. Pantu onse uucita ifi, Yehova Lesa wenu amumona ukuti wa bunani.

6 “Nga ca kuti wasanga icinsa ca cuni mu nshila, nampo nga cili ku cimuti nelyo panshi, muli no twana nelyo amani, kabili nyina ali pa twana nelyo pa mani, taulingile ukusenda nyina kumo no twana.+ 7 Ukatamfyepo nyina, lyena kuti wasenda utwana. Ifi e fyo mukalecita pa kuti ifintu fikalemuwamina, kabili mukaleikala inshiku ishingi.

8 “Nga wakuula ing’anda, ulingile no kukuula icibumbili mu mbali ya mutenge,+ pantu nga taucitile ifi, iwe na ba mu ng’anda yobe mukaba no mulandu wa mulopa nga ca kuti umo apona pa mutenge.

9 “Mu mabala yenu aya myangashi tamufwile ukulabyalamo umusango umbi uwa mbuto.+ Nga mwabyalamo ninshi ifisabo fyonse ifya myangashi ne fisabo fya mbuto shimbi fikaba fya kubomfya pa cifulo ca mushilo.

10 “Tamufwile ukubika ing’ombe ne mpunda kwi koli limo line+ pa kulima.

11 “Tamulingile ukulafwala ifya kufwala ifyo bapangila ne misango ibili iya bushishi,+ ubwa masako ya mpaanga no bwa nsalu.

12 Ku mpela 4 isha fya kufwala mufwala+ mulepangilako insenkebele.

13 “Umuntu nga aupa umwanakashi kabili alaala nankwe e lyo pa numa amupata* 14 kabili amupeela umulandu wa bucintomfwa, lyena pa kumubifisha ishina atila: ‘Uyu e mwanakashi naupile, nomba ilyo naleele nankwe, nasangile ukuti te nacisungu.’ 15 Lyena wishi wa mukashana e lyo na nyina bakasende icishibilo ca kuti umukashana ali ni nacisungu, bakacitwale ku bakalamba pa mpongolo ya musumba. 16 Wishi wa mukashana akebe abakalamba ati, ‘Naufishe umwana wandi kuli uyu umwaume, nomba alimupata* 17 kabili alemupeela umulandu wa bucintomfwa, aleti: “Ninsanga ukuti umwana wenu taali ni nacisungu.” Nomba ici e cishibilo ca kuti umwana wandi aali ni nacisungu.’ Lyena bakaanshike insalu pa ntanshi ya bakalamba ba musumba. 18 Abakalamba ba musumba+ bakasende uyo mwaume no kumukanda.+ 19 Bakamupingule amashekele* 100 aya silfere kabili akalipile wishi wa mukashana, pantu uyu mwaume aliseebenye nacisungu wa mu Israele,+ kabili akatwalilila ukuba umukashi wakwe. Tabakamusuminishe ukumuleka inshiku shonse isho akaba no mweo.

20 “Lelo nga ca kuti ifyo umwaume alelanda fya cine, kabili tapali ifilelanga ukuti umukashana aali ni nacisungu, 21 ninshi bafwile ukufumisha umukashana pa mwinshi wa ng’anda ya kwa wishi, kabili abaume ba mu musumba ekala bakamupoole amabwe mpaka akafwe, pantu nacita icamuseebanya+ mu Israele pa mulandu wa kucita ubulalelale mu ng’anda ya kwa wishi.+ E ico mulingile ukufumya ifyabipa muli imwe.+

22 “Umwaume nga bamusanganisha nalaala na muka mwine, bonse babili mufwile ukubepaila pamo, umwaume uwaleele na muka mwine e lyo no mwanakashi wine uo aleele nankwe.+ E ico mulingile ukufumya ifyabipa mu Israele.

23 “Nga ca kuti nacisungu alikobekelwa, e lyo umwaume umbi akumana nankwe mu musumba kabili alaala nankwe, 24 mufwile ukufumisha bonse babili ku mpongolo ya musumba kabili mukabapoole amabwe mpaka bakafwe. Umukashana akafwila pa mulandu wa kuti tapundile mutuule mu musumba, e lyo umwaume ena akafwila pa mulandu wa kuti alileele na muka mwine.+ E ico mulingile ukufumya ifyabipa muli imwe.

25 “Lelo nga ni mu mpanga umwaume akumenye umukashana uwakobekelwa, kabili amucila amaka e lyo alaala nankwe, ninshi mukepaye fye umwaume eka, 26 lelo umukashana mwikamucita nangu cimo. Umukashana tacitile ulubembu lwa kufwilapo. Uyu mulandu taupusene no mulandu umwaume akwata nga asansa umwaume munankwe no kumwipaya amwipaya.+ 27 Pantu umwaume uwaleele nankwe amukumanishe mu mpanga, kabili umukashana uwakobekelwa alipundile mutuule, lelo takwali nangu umo uwa kumupokololako.

28 “Umwaume nga akumanya umukashana nacisungu uushakobekelwa, e lyo amwikata alaala nankwe, kabili abantu baishiba,+ 29 umwaume uwaleele nankwe afwile ukulipila wishi wa mukashana amashekele 50 aya silfere, kabili umukashana akaba umukashi wakwe.+ Pa mulandu wa kuti alimuseebenye, tabakamusuminishe ukumuleka inshiku shonse isho akaba no mweo.

30 “Takuli umwaume nangu umo uufwile ukuupa muka wishi, pantu kuti aseebanya wishi.*+

23 “Umwaume onse uo batungula nelyo uo baputula ubwaume tafwile ukuba mu lukuta lwa kwa Yehova.+

2 “Umwana umwaume onse uwa kupula talingile ukuba mu lukuta lwa kwa Yehova.+ Nangu fye bantu abakatuntuka muli ena tabafwile ukuba mu lukuta lwa kwa Yehova.

3 “Umwina Amone onse nelyo umwina Moabu talingile ukuba mu lukuta lwa kwa Yehova.+ Nangu fye bantu abakatuntuka muli bena tabalingile ukuba mu lukuta lwa kwa Yehova, 4 pantu balimutanine ifya kulya na menshi ilyo mwalefuma ku Egupti,+ kabili baitile Balaamu mwana Beore uwa ku Petore mu Mesopotamia pa kuti ese amutiipe.+ 5 Nomba Yehova Lesa wenu takutike kuli Balaamu.+ Lelo Yehova Lesa wenu ayalwile icitiipu caba ipaalo,+ pantu Yehova Lesa wenu alimutemenwe.+ 6 Tamufwile ukucita nangu cimo icingalenga balaikala umutende nelyo icingalenga ifintu fyalabawamina mu nshiku shonse isho mukaba no mweo.+

7 “Tamufwile ukupata abena Edomu, pantu ni bamunyinenwe.+

“Tamufwile ukupata abena Egupti, pantu mwali abalebeshi mu calo cabo.+ 8 Abana abakafyalwa mu beshikulu babo kuti baba mu lukuta lwa kwa Yehova.

9 “Nga mwapangila abalwani benu inkambi pa kuti mulwe nabo, tamulingle ukucita icabipa* nangu cimo.+ 10 Nga ca kuti umwaume akowela pa mulandu wa kufumya amalumina+ ubushiku, afwile ukufumina kunse ya nkambi, kabili talingile ukubwelela mu nkambi. 11 Nga caba icungulo alingile ukusamba umubili onse, lyena kuti abwelela mu nkambi akasuba nga kawa.+ 12 Kunse ya nkambi kukaleba incende iyabelama,* kabili e ko mukaleya. 13 Mufwile ukukwata ica kwimbilako. Nga mwapaasukila kunse ya nkambi, mufwile ukwimba icilindi, e lyo pa numa mwashiika ubusali. 14 Pantu Yehova Lesa wenu ale-enda mu nkambi yenu+ yonse pa kuti amupusushe kabili apeele abalwani benu mu minwe yenu. Kabili inkambi yenu ifwile ukuba iya mushilo,+ pa kuti elamonamo nangu cimo icishawama ica kuti aleka ukuba na imwe.

15 “Umusha nga afyuka shikulu wakwe kabili aisa kuli imwe, tamufwile ukumubwesesha kuli shikulu wakwe. 16 Kuti aikala na imwe pa ncende ponse apo akasala mu musumba umo pa misumba yenu, konse uko akatemwa. Mwikalamucusha.+

17 “Takuli umwana mwanakashi mu Israele uufwile ukuba cilende+ wa pe tempele, kabili takuli umwana umwaume mu Israele uulingile ukulacita bucilende pe tempele.+ 18 Indalama* sha muli bucilende ubo umwanakashi acita nelyo isha muli bucilende ubo umwaume acita,* tamulingile ukulashitwala mu ng’anda ya kwa Yehova Lesa wenu pa kuti mufikilishe umulapo, pantu Yehova Lesa wenu ashimona ukuti sha bunani.

19 “Nga mwakongwesha umwina Israele munenu fimo, tamufwile ukumupingula ifya kulundapo,+ nampo nga ca kulunda pa ndalama, pa fya kulya, nangu conse ico umuntu engafwaya bamupelelapo ica kulundapo. 20 Umwina fyalo ena kuti mwamupingula ica kulundapo,+ lelo umwina Israele munenu tamulingile ukumupingula ica kulundapo,+ pa kuti Yehova Lesa wenu alemupaala muli fyonse ifyo mwakulacita mu calo ico muleya mu kwikalamo.+

21 “Nga mwalapa umulapo kuli Yehova Lesa wenu,+ tamufwile ukushingashinga uku-ufikilisha.+ Pantu Yehova Lesa wenu akafwaya ukuti mufikilishe uyo umulapo, nomba nga tamufikilishe ninshi mwabembuka.+ 22 Lelo nga tamulapile umulapo, ninshi tamubembwike.+ 23 Imilapo mulapa kuli Yehova Lesa wenu+ yaba ngo mutuulo wakuitemenwa. E ico mufwile ukulafikilisha ifyo mwalapa.+

24 “Nga waingila mwi bala lya myangashi ilya mwina Israele munobe, kuti walyamo imyangashi mpaka waikuta,* lelo taufwile ukusenda imo mu cipe cobe.+

25 “Nga waingila mwi bala lya ngano ilya mwina Israele munobe, kuti watimpulamo imitwe ya ngano iyapya, lelo taufwile ukupisha icikwakwa mu ngano sha mwina Israele munobe.+

24 “Umwaume nga aupa, nomba umukashi wakwe talemusekesha pa mulandu wa kuti nasanga icishawama muli ena, afwile ukulemba icipepala ca kupwishishapo icupo,+ akamupeele ico icipepala e lyo akamutamfye pa ng’anda.+ 2 Nga afuma pa ng’anda, kuti ayaupwa ku mwaume umbi.+ 3 Nga ca kuti umwaume uo ayaupwako amupata* kabili alemba icipepala ca kupwishishapo icupo, amupeela ne co icipepala kabili amutamfya pa ng’anda, nelyo nga ca kuti uyo umwaume uwamuupa afwa, 4 umwaume uwamutamfishe pa kubala tabakamusuminishe ukumuupa na kabili pantu ninshi alikowela, pantu Yehova amona ica musango uyu ukuti ca bunani. Tamulingile ukulacita imembu sha musango yu mu calo ico Yehova Lesa wenu alemupeela.

5 “Nga ca kuti umwaume e lyo aupa fye, tafwile ukubomba ubushilika, kabili tamulingile ukumupeela imilimo imbi. Talingile ukubomba ubushilika pa mwaka umo, lelo alingile ukulaikala pa ng’anda pa kuti alesekesha umukashi wakwe.+

6 “Takuli nangu umo uulingile ukupoka umunankwe ilibwe lya kupelelapo nangu ilibwe lya kupelelako pa kuti fibe iciikatilo,+ pantu ninshi apoka ico umunankwe aliilamo* e caba iciikatilo.

7 “Nga ca kuti mwasanga uwaibile umwina Israele munankwe,* alimucusha kabili alimushitisha,+ uwaibile umunankwe mufwile ukumwipaya.+ Mulingile ukufumya ifyabipa muli imwe.+

8 “Nga kwapona icikuko ca fibashi,* mukacenjele sana pa kuti mukalekonka fyonse ifyo bashimapepo abena Lebi bakalamweba.+ Mukalekonka fyonse ifyo nabebele. 9 Mukaleibukisha ifyo Yehova Lesa wenu acitile Miriamu ilyo mwalefuma ku Egupti.+

10 “Nga ca kuti mwakongwesha umwina Israele munenu+ fimo, tamulingile ukwingila mu ng’anda yakwe mu kusenda ico atile e ciikatilo. 11 Mufwile ukwiminina panse, kabili uo mwakongweseshe fimo alingile ukumufumisha iciikatilo. 12 Kabili nga ca kuti uyo muntu mupiina, tamufwile ukusunga+ iciikatilo cakwe mpaka mwaya mu kulaala. 13 Mulingile ukumubwesesha iciikatilo ilyo fye akasuba kawa, kabili akaya mu kulaala ninshi nafwala ica kufwala cakwe,+ kabili akamupaala. Lyena Yehova Lesa wenu akamumona ukuti muli balungami.

14 “Tamufwile ukulacenjesha uo mwaingisha incito uwacula kabili umupiina, nampo nga mwina Israele munenu nelyo nga mulebeshi uo mwikala nankwe mu calo cenu, mu misumba* yenu.+ 15 Mufwile ukumupeela amalipilo yakwe pali ubo bwine bushiku+ ilyo akasuba kashilawa, pantu alicula kabili mu malipilo e mo aliila. Nga tamumulipiile e lyo alilila kuli Yehova pa co mwacita, ninshi mwabembuka.+

16 “Bashibo tabafwile ukufwila pa lubembu lwa bana babo, kabili abana nabo tabalingile ukufwila pa lubembu lwa bashibo.+ Cila muntu afwile ukufwila pa lubembu lwakwe.+

17 “Tamulingile ukufyenga umulebeshi nelyo umwana wa nshiwa+ ilyo mulepingula umulandu, kabili tamufwile ukupoka mukamfwilwa ica kufwala cakwe pa kuti cibe iciikatilo.+ 18 Muleibukisha ukuti mwali abasha mu Egupti, kabili Yehova Lesa wenu alimulubwile.+ E co ndemwebela ukuti mulecita ifi.

19 “Nga mwasombola ifilimwa mu mabala yenu, kabili mwalaba umwanshi* mwi bala, tamufwile ukuyausenda. Mukashiile abalebeshi, abana ba nshiwa na bamukamfwilwa,+ pa kuti Yehova Lesa wenu akalemupaala muli fyonse ifyo mukalacita.+

20 “Nga mwakunta imisambo ya miolife yenu, mwikalaikunta na kabili. Ifisabo ifikalashalako mukaleshiila abalebeshi, abana ba nshiwa na bamukamfwilwa.+

21 “Nga mwasombola imyangashi mu mabala yenu, tamulingile ukuyasenda iyashalamo. Mufwile ukushiila abalebeshi, abana ba nshiwa na bamukamfwilwa. 22 Muleibukisha ukuti mwali abasha mu calo ca Egupti. E mulandu wine ndemwebela ukuti mulecita ifi.

25 “Abantu babili nga batendeka ukukansana, kuti batwala umulandu wabo kuli bakapingula+ pa kuti bayebapingula, kabili uushilufyenye bakamweba ukuti wa kaele e lyo uulufyenye bakamweba ukuti ali no mulandu.+ 2 Nga ca kuti uuli no mulandu balingile ukumulopola,+ kapingula akebe aba kumulaalika panshi ubukupeme kabili bakamulopole ifikoti pa menso ya kwa kapingula. Impendwa ya fikoti ifwile ukulingana no bukulu bwa mulandu acitile. 3 Kuti bamulopola ifikoti 40,+ tabafwile ukucishapo. Nga bamulopola ifikoti ukucila pali ifi, munyinenwe kuti aseebana pa menso yenu.

4 “Tamufwile ukukaka ing’ombe ku kanwa ilyo ilenyantaula ingano pa kushisokola.+

5 “Nga ca kuti bamunyina bekala pamo kabili umo afwa ukwabula ukufyalapo umwana umwaume, mukamfwilwa talingile ukuupwa ku mwaume uushili wa muli ulo lupwa. Mulamu wakwe afwile ukuyamuupa icupo ca pali bumulamu.+ 6 Ibeli akafyala e lyo bakenika ishina lya kwa munyina uwafwa,+ pa kuti ishina lyakwe likaloba mu Israele.+

7 “Nomba umwaume nga talefwaya ukuupa muka munyina, uyo mukamfwilwa afwile ukuyaeba abakalamba pa mpongolo ya musumba ati, ‘Munyina wa mulume wandi nakaana ukusungilila ishina lya kwa munyina mu Israele. Talefwaya ukungupa icupo ca pali bumulamu.’ 8 Abakalamba ba mu musumba balingile ukumwita no kulanda nankwe. Nga akaninina fye ukuti, ‘Nshilefwaya ukumuupa,’ 9 lyena mukamfwilwa akapalame kuli ena pa cinso ca bakalamba kabili akamufuule indyato+ no kumufwishila amate pa menso e lyo akatile, ‘Ifi e fyo bafwile ukucita umwaume uwakaana ukufyalila munyina umwana umwaume.’ 10 Lyena ulupwa* lwakwe mu Israele bakalalwita ukuti ‘Ing’anda ya muntu uo bafuulile indyato.’

11 “Nga ca kuti abaume babili batampa ukulwa, kabili umukashi wa mwaume umo apalama pa kuti apokolole umulume wakwe ku ulemuuma, kabili amwikata ku fya mfwalo, 12 mufwile ukumuputula ukuboko. Tamulingile* ukumumfwila uluse.

13 “Tamufwile ukukwata amabwe yabili aya kupiminako ukufina ayapusana mu mifuko yenu,+ ilikalamba ne linono. 14 Tamulingile ukukwata ifipe* fya kupiminako fibili+ mu mayanda yenu, icikalamba ne cinono. 15 Mufwile ukukwata ifya kupiminako ukufina ifya cine, ne fipe fya kupiminako ifya cine, pa kuti mukekale inshiku ishingi mu calo ico Yehova Lesa wenu alemupeela.+ 16 Pantu onse uucenjesha abanankwe, Yehova Lesa wenu+ amumona ukuti wa bunani.

17 “Mukaleibukisha ifyo abena Amaleke bamucitile ilyo mwalefuma ku Egupti,+ 18 ifyo bamukumenye mu nshila ne fyo basanshile bonse abale-enda panono panono ku numa yenu, ninshi namunaka nga nshi kabili namutompoka. Tabatiinine Lesa. 19 Ilyo Yehova Lesa wenu akalenga mukatuushe ku balwani benu bonse abamushinguluka mu calo ico Yehova Lesa wenu alemupeela pa kuti cibe icalo cenu,+ mufwile ukulofya abena Amaleke bonse ica kuti kwikaba uukalabebukisha mwi samba lya muulu.+ Mwikalaba ukucita ifi.

26 “Ilyo mukengila mu calo ico Yehova Lesa wenu alemupeela pa kuti cibe icalo cenu, kabili mwacipoka mwatampa no kulaikalamo, 2 mulingile ukubuulapo ifisabo fimo pa fikabalilapo ukupya pa fisabo fyonse ifyo mukasombola mu calo ico Yehova Lesa wenu alemupeela. Mukafibike mu museke no kufitwala pa cifulo ico Yehova Lesa wenu akasala ukuti e po ishina lyakwe likabe.+ 3 Mufwile ukuya kuli shimapepo uukabapo pali iyo nshita kabili mukamwebe amuti, ‘Lelo nde-eba Yehova Lesa wenu ukuti nalingila mu calo ico Yehova alapile ku fikolwe fyesu ukuti akatupeela.’+

4 “Lyena shimapepo akapoka umuseke mu minwe yenu kabili akaubika pa ntanshi ya ciipailo ca kwa Yehova Lesa wenu. 5 Kabili mukalande pa cinso ca kwa Yehova Lesa wenu amuti, ‘Tata ali mwina Aramu+ uwale-endauka* fye, kabili aile ku Egupti+ uko aileba umulebeshi, kabili aile fye na bantu abanono.+ Lelo ilyo ali kulya aishileba uluko ulukalamba, ulwa maka kabili ulwa bantu abengi.+ 6 Kabili abena Egupti baletucusha, baletutitikisha kabili batutekele ubusha.+ 7 E ico twatampile ukulilila kuli Yehova, Lesa wa fikolwe fyesu, kabili Yehova alyumfwile ukulilishika kwesu kabili alimwene ifyo twalecula, amafya twakwete e lyo ne fyo baletutitikisha.+ 8 Yehova asukile atufumya mu Egupti no kuboko kwakwe ukwa maka kabili ukwatambalikwa,+ alicitile ifya kutiinya ifikalamba, ifishibilo ne fipesha amano.+ 9 Lyena atuletele kuno no kutupeela cino calo umwaba umukaka no buci.+ 10 Nomba naleta ifisabo fyabalilapo ukupya pa fisabo fya mu mushili uo Yehova ampeela.’+

“Mufwile ukufibika pa ntanshi ya kwa Yehova Lesa wenu kabili mulingile ukufukama pa ntanshi ya kwa Yehova Lesa wenu. 11 Lyena imwe, abena Lebi e lyo na balebeshi abo mwikala nabo, mukasekelele pa fisuma fyonse ifyo Yehova Lesa wenu amupeela pamo na ba mu mayanda yenu.+

12 “Nga mwapwisha ukulonganika ifya pe kumi+ ifya fisabo fyenu mu mwaka walenga butatu, umwaka wa kupeelelamo icalenga 10, mukapeele abena Lebi, abalebeshi, abana ba nshiwa na bamukamfwilwa, kabili bakalye bakekute mu misumba* yenu.+ 13 Lyena mukalanda pa cinso ca kwa Yehova Lesa wenu amuti, ‘Nimfumya ifya mushilo fyonse mu ng’anda yandi kabili nimpeela abena Lebi, abalebeshi, abana ba nshiwa na bamukamfwilwa,+ nga filya fine mwanjebele. Nshapula mu mafunde yenu kabili nshayasuula. 14 Nshaliilepo ilyo naleloosha, kabili nshafumishepo ilyo nali uwakowela, kabili nshapeelepo uwafwa. Nalikonka ifyo Yehova Lesa wandi anjebele kabili nalicita fyonse ifyo mwanjebele. 15 Nomba lolesheni panshi ukufuma uko mwikala ukwa mushilo, ku muulu, kabili paaleni abantu benu abena Israele ne calo ico mwatupeela,+ nga filya fine mwalaile ifikolwe fyesu+ ukuti mukapaala icalo umwaba umukaka no buci.’+

16 “Buno bushiku Yehova Lesa wenu alemweba ukuti mulekonka aya mafunde no bupingushi. Mufwile ukulafikonka no mutima wenu onse+ no mweo* wenu onse. 17 Ubushiku bwa lelo Yehova namweba ukuti akaba Lesa wenu nga mwakulaenda mu nshila shakwe kabili nga mwakulakonka ifyo akulamweba,+ amafunde yakwe+ e lyo no bupingushi bwakwe,+ kabili nga mwakulamumfwila. 18 Kabili lelo mwaeba Yehova ukuti mukaba abantu bakwe, ababa nge cipe cakwe icaibela,*+ nga filya fine amulaile. Namumweba no kuti mwakulakonka amafunde yakwe yonse 19 kabili akalenga mukacile inko shimbi isho abumba,+ akalamutasha kabili akalenga mukalumbuke no kucindama, nga mwaba aba mushilo kuli Yehova Lesa wenu,+ nga filya fine amulaya.”

27 Lyena Mose na bakalamba ba mu Israele baebele abantu abati: “Mulekonka amafunde yonse ayo ndemweba lelo. 2 Kabili pa bushiku mukaabuka Yordani mukengile na mu calo ico Yehova Lesa wenu alemupeela, mukemike amabwe ayakalamba kabili mukayashingule.*+ 3 Lyena mukalembepo amashiwi yonse ayali muli aya mafunde, pa kuti mukengile mu calo ico Yehova Lesa wenu alemupeela, icalo umwaba umukaka no buci, nga filya fine Yehova Lesa wa fikolwe fyenu amulaya.+ 4 Ilyo mukaabuka Yordani, mukemike aya amabwe pa Lupili lwa Ebali+ kabili mukayashingule,* nge fi fine ndemweba lelo. 5 Na kabili mukakuulile Yehova Lesa wenu iciipailo ca mabwe. Tamufwile ukubomfya icela pa kuseesa aya mabwe.+ 6 Mulingile ukukuulila Yehova Lesa wenu iciipailo ca mabwe ayatuntulu, kabili e po mukatuulile Yehova Lesa wenu imituulo ya koca. 7 Mukatuule amalambo ya mutende+ no kuyaliila palya pene+ pa lupili, kabili mukasekelela pa cinso ca kwa Yehova Lesa wenu.+ 8 Kabili mukalembe bwino sana amashiwi yonse ayali muli aya Amafunde+ pa mabwe.”

9 Lyena Mose na bashimapepo abena Lebi baebele abena Israele bonse abati: “Mwe bena Israele, ikaleni tondolo kabili kutikeni. Buno bushiku namuba abantu ba kwa Yehova Lesa wenu.+ 10 Mufwile ukulaumfwila Yehova Lesa wenu kabili mulekonka amafunde yakwe+ na mashiwi yakwe ayo ndemweba lelo.”

11 Pali bulya bushiku Mose aebele abantu ati: 12 “Nga mwa-abuka Yordani, iyi e mikowa iikeminina pa Lupili lwa Gerisimu+ pa kupaala abantu: umukowa wa kwa Simeone, uwa kwa Lebi, uwa kwa Yuda, uwa kwa Isakari, uwa kwa Yosefe no wa kwa Benjamini. 13 Kabili imikowa iikeminina pa Lupili lwa Ebali+ pa kulumbula ifitiipu ni iyi: umukowa wa kwa Rubene, uwa kwa Gadi, uwa kwa Ashere, uwa kwa Sebuluni, uwa kwa Dani no wa kwa Naftali. 14 Kabili abena Lebi bakala-ankula abaume bonse abena Israele ninshi nabasansula amashiwi+ abati:

15 “‘Abe uwatiipwa umuntu uwapanga icimpashanya+ nelyo uwaenga icimpashanya,+ icintu ico Yehova amona ukuti ca bunani,+ ico uwaishibisha ukupanga ifintu* apanga, kabili uwacifisa.’ (E lyo abantu bonse bakatile, ‘Ameni!’*)

16 “‘Abe uwatiipwa uwasaalula wishi nelyo nyina.’+ (E lyo abantu bonse bakalande abati, ‘Ameni!’)

17 “‘Abe uwatiipwa uwasesha icishibilo ca mupaka wa munankwe.’+ (E lyo abantu bonse bakatile, ‘Ameni!’)

18 “‘Abe uwatiipwa uwalenga impofu yafuma mu nshila.’+ (E lyo abantu bonse bakatile, ‘Ameni!’)

19 “‘Abe uwatiipwa uufyenga umulebeshi, umwana wa nshiwa na mukamfwilwa+ pa kupingula umulandu.’+ (E lyo abantu bonse bakatile, ‘Ameni!’)

20 “‘Abe uwatiipwa uwalaala no mukashi wa kwa wishi, pantu ninshi aseebanya wishi.’*+ (E lyo abantu bonse bakatile, ‘Ameni!’)

21 “‘Abe uwatiipwa uwalaala ne nama ya musango onse.’+ (E lyo abantu bonse bakatile, ‘Ameni!’)

22 “‘Abe uwatiipwa uwalaala na nkashi yakwe, umwana wa kwa wishi nelyo umwana wa kwa nyina.’+ (E lyo abantu bonse bakatile, ‘Ameni!’)

23 “‘Abe uwatiipwa uwalaala na nafyala.’+ (E lyo abantu bonse bakatile, ‘Ameni!’)

24 “‘Abe uwatiipwa uwabelamina umunankwe no kumwipaya.’+ (E lyo abantu bonse bakatile, ‘Ameni!’)

25 “‘Abe uwatiipwa uwapoka amafisakanwa pa kuti epaye uwa kaele.’*+ (E lyo abantu bonse bakatile, ‘Ameni!’)

26 “‘Abe uwatiipwa uushibika amano ku kukonka+ amashiwi ya muli aya Mafunde.’ (E lyo abantu bonse bakatile, Ameni!’)

28 “Kabili nga mukalabika amano ku kukonka amafunde yonse ayo ndemweba lelo, pa kuti mukaleumfwila Yehova Lesa wenu, nangu cikabe shani Yehova Lesa wenu akalenga mukacile inko shonse isha pano isonde.+ 2 Mukapaalwa nga nshi kabili mukakwata ifi ifisuma fyonse,+ pantu mulomfwila Yehova Lesa wenu:

3 “Mukaba abapaalwa mu misumba, kabili mukaba abapaalwa na mu mpanga.+

4 “Abana benu*+ bakapaalwa kumo ne fikafuma mu mushili wenu na bana ba fitekwa fyenu, ing’ombe shenu ishana no twana twa mpaanga shenu.+

5 “Umuseke wenu+ ne ca kukashilamo umufuba+ fikapaalwa.

6 “Mukapaalwa konse uko mukalaya kabili mukapaalwa muli fyonse ifyo mukalacita.

7 “Yehova akalamucimfishako abalwani benu abakalamwimina.+ Pa kwisa mu kumusansa bakalafuma ku ntunga imo, lelo pa kumubutuka bakalabutukila mu ntunga+ 7. 8 Yehova akabikako icipope ca kupaala amatala yenu+ na fyonse ifyo mukalacita, kabili nangu cikabe shani akamupaala mu calo ico Yehova Lesa wenu alemupeela. 9 Yehova akalenga mukabe abantu bakwe+ aba mushilo, nga filya fine amulaile,+ pantu mulasunga amafunde ya kwa Yehova Lesa wenu, kabili mulenda mu nshila shakwe. 10 Abantu bonse pano isonde bakamona ukuti mwitilwa+ kwi shina lya kwa Yehova, kabili bakamutiina.+

11 “Yehova akalenga mukakwate abana abengi ne fitekwa ifingi ne fisabo fya mu mushili+ ifingi mu calo ico Yehova alapile ku fikolwe fyenu ukuti akamupeela.+ 12 Yehova akamwiswila ubutala bwakwe ubusuma, imyulu, pa kuti imfula ikaleloka mu calo pa nshita ya iko+ kabili akamupaala muli fyonse ifyo mukalacita. Mukakongwesha inko ishingi, lelo imwe tamwakakongoleko nangu cimo.+ 13 Yehova akalenga mukabe ngo mutwe te mucila iyo; kabili mukaba pa muulu,+ te panshi iyo, kulila fye mwatwalilila ukukonka amafunde ya kwa Yehova Lesa wenu, ayo ndemweba lelo ukuti muleyakonka. 14 Mufwile ukubika amano ku kukonka+ amashiwi yonse ayo ndemweba lelo, kabili tamulingile ukulakonka balesa bambi pa kuti mulebabombela.+

15 “Lelo nga tamwakalekonka amafunde yonse ayo ndemweba lelo pa kuti mukaleumfwila Yehova Lesa wenu, ukwabula no kutwishika mukatiipwa kabili fyonse ifi ifyabipa fikamucitikila:+

16 “Mukaba abatiipwa mu misumba, kabili mukaba abatiipwa mu mpanga.+

17 “Imiseke yenu+ ne fya kukashilamo umufuba+ fikaba ifyatiipwa.

18 “Abana abo mukafyala*+ bakaba abatiipwa kumo ne fisabo fya mu mushili wenu, na bana ba ng’ombe shenu no twana twa mpaanga shenu.+

19 “Mukatiipwa konse uko mukalaya kabili mukatiipwa muli fyonse ifyo mukalacita.

20 “Yehova akamutumina icitiipu, icimfulumfulu kabili akamukanda muli fyonse ifyo mukalacita, mpaka mukonaulwe no kuloba bwangu, pa mulandu wa micitile yenu iyabipa na pa mulandu wa kumusuula.*+ 21 Yehova akalenga ubulwele bwikafuma pali imwe mpaka akamulofye mu calo ico muleya mu kwikalamo.+ 22 Yehova akamulwalika icifuba ca ntanda-bwanga,* ubulwele bwa kukaba umubili,+ ifilundwa fya mubili fikalafiimba, umubili ukalakaba sana, akalenga abalwani benu bakamwipaye no lupanga,+ ifilimwa fikalapapa pa mulandu no mwela wakaba kabili fikalauma.+ Ifi fyonse fikamucitikila mpaka mukalobe. 23 Umuulu ukaba ngo mukuba, kabili umushili ukaba nge cela.+ 24 Yehova akaalula imfula ya mu calo cenu ikabe ulufukutu kabili ulukungu. Ifi e fikalafuma mu muulu fikaleponena pali imwe mpaka mukalobe. 25 Yehova akalenga abalwani benu bakamucimfye.+ Pa kubasansa mukafumina ku ntunga imo, lelo pa kubafulumuka, mukafulumukila mu ntunga 7; kabili aba mu mabufumu+ yonse aya pano isonde bakatiina pa fyabipa ifikamucitikila. 26 Kabili ifitumbi fyenu fikaba e fya kulya fya fyuni fya mulwelele ne nama sha mu mpanga, kabili takwakabe nangu umo uukalafitamfya.+

27 “Yehova akamulwalika ifipute fya ku Egupti, fimumena pabi, impele ne fya kufuluma pa mubili, ifya kuti te kuti fipole. 28 Yehova akamulwalika ubushilu kabili akalenga mukabe impofu+ kabili akamufulunganya amano. 29 Mukalapampanta fye e lyo ninshi akasuba kali pa kati, nga filya fine impofu ipampanta mu mfifi,+ kabili fyonse ifyo mukalacita tafyakale-enda bwino. Bakalamucenjesha fye lyonse no kumwibila, takwakabe nangu umo uukamupususha.+ 30 Mukakobekela umwanakashi, lelo umwaume umbi akolungana nankwe. Mukakuula ing’anda, lelo tamwakekalemo.+ Mukalima ibala lya myangashi, lelo tamwakalyemo.+ 31 Bakamwipaila ing’ombe pa menso yenu, lelo tamwakalyeko. Bakamwibila impunda ninshi mulemonako, lelo tabakamubweseshe. Bakapeela abalwani benu impaanga shenu, lelo tamwakakwate nangu umo uwa kumupususha. 32 Abana benu abaume na bana benu abanakashi bakabasenda ku bantu bambi+ ninshi mulemonako kabili mukalabafuluka lyonse, lelo tapali ifyo mukacitapo. 33 Abantu abo mushaishiba+ e bakalalya ifisabo fya mu mushili wenu na fyonse ifyo mukalasombola, kabili lyonse bakalamucenjesha no kumutitikisha. 34 Ifyo mukalamona fikalamupenya.

35 “Yehova akamulwalika ifipute pa makufi yenu na ku molu yenu ifikalakalipa sana kabili ifishakapole, fikatampila ku makasa fikayafika fye na ku mutwe. 36 Yehova akamutwala pamo ne mfumu iyo mukasonta ku luko ulo imwe mushaishiba+ kabili ulo ifikolwe fyenu fishaishibe, kabili uko kwine e ko mukalabombela balesa bambi, balesa ba fimuti na ba mabwe.+ 37 Kabili abantu bonse abo Yehova akamutwalako+ nga baumfwa ifikamucitikila bakatiina, bakalamuseka* kabili bakalamutumfya.

38 “Mukalabyala imbuto ishingi mu mabala, lelo mukalasombola utunono,+ pantu makanta akalafilya. 39 Mukalima imyangashi lelo tamwakanwe umwangashi, kabili tamwakasombole nangu cimo,+ pantu ifinsenda fikalya imyangashi. 40 Mu calo cenu mukaba imiolife, lelo tamwakalekwata amafuta ya kusuba, pantu imiolife ikalalukuta. 41 Mukakwata abana abaume na bana abanakashi, lelo tabakatwalilile ukuba abenu, pantu bakabasenda mu kuba bankole.+ 42 Ifishiishi fikalaonaula ifimuti fyenu fyonse ne fisabo fyenu ifya mu mushili. 43 Abalebeshi abo mwikala nabo bakalakwatilako fye amaka, lelo amaka yenu yakalacepelako fye. 44 Bakalamukongwesha, lelo imwe tamwakabakongweshepo nangu cimo.+ Bakaba ngo mutwe, lelo imwe mukaba ngo mucila.+

45 “Nangu cikabe shani ifitiipu+ fyonse ifi fikesa pali imwe ne fi fyonse ifyabipa fikamucitikila mpaka mukalobe,+ pantu tamwakonkele amafunde na fyonse ifyo Yehova Lesa wenu amwebele+ pa kuti mulemumfwila. 46 Kabili fikatwalilila ukuba pali imwe na pa bana benu nge cishibilo kabili nge cakusokelako bonse,+ 47 pa mulandu wa kuti tamwalesekelela kabili tamwali ne nsansa ilyo mwalebombela Yehova Lesa wenu ilyo mwakwete ifintu ifingi.+ 48 Yehova akamutumina abalwani benu kabili mukalababombela+ ninshi muli ne nsala+ ne cilaka kabili ninshi mufwele fye insamu kabili tamukwete nangu cimo. Akabika ikoli lya cela mu mikoshi yenu mpaka akamulofye.

49 “Yehova akamwimisha uluko ulwa kutali,+ ulwa ku mpela ye sonde, lukesamufookela nga kapumpe,+ uluko ulukalalanda ululimi ulo mushakaleumfwa,+ 50 uluko ulunkalwe, ulushakalangulukileko umukote nelyo ukumfwila umulumendo+ uluse. 51 Bakalya utwana twa fitekwa fyenu ne fisabo fya mu mushili wenu mpaka mukalobe. Tabakamushiilepo ingano, umwangashi nelyo amafuta, nangu abana ba ng’ombe, nelyo utwana twa mpaanga mpaka bakamulofye.+ 52 Bakamushinga ica kuti tamwakalefuma mu misumba* yenu mu calo cenu conse mpaka amalinga yenu ayatali kabili ayakosa ayo mwacetekelamo yakawe. Nangu cikabe shani bakamushinga ica kuti tamwakalefuma mu misumba yenu yonse mu calo cenu ico Yehova Lesa wenu amupeela.+ 53 Lyena mukalalya abana benu* abaume na bana abanakashi+ aba kuifyalila abo Yehova Lesa wenu amupeela, pa mulandu wa kuti ifintu fikabipa sana ilyo bakamushinga na pa mulandu wa macushi ayo abalwani benu bakalenga mukakwate.

54 “Nangu fye mwaume uwanakilila sana kabili uo batentemba, takomfwile munyina uluse nelyo umukashi wakwe uo atemwa sana nangu fye bana bakwe abaume abakashalapo, 55 kabili takapeelepo nangu umo umunofu wa bana bakwe abo akalalya, pantu tapali nangu cimo ico akashala naco pa mulandu wa kuti ifintu fikabipa sana ilyo bakamushinga, na pa mulandu wa macushi ayo abalwani benu bakalenga mukakwate mu misumba yenu.+ 56 Kabili umwanakashi uwanakilila kabili uo batentemba uushingatontonkanya na pa kwenda na makasa pa mulandu wa kuti balamutentemba,+ takomfwile umulume wakwe uo atemwa sana uluse nangu fye mwana wakwe umwaume nelyo umwana wakwe umwanakashi, 57 nangu fye fintu fikafuma pa kati ka molu yakwe pa numa ya kupaapa nangu bana bakwe abo akafyala, pantu akabalya mu bumfisolo pa mulandu wa kuti ifintu fikabipa sana ilyo bakamushinga na pa mulandu wa macushi ayo abalwani benu bakalenga mukakwate mu misumba yenu.

58 “Nga tamwakabike amano ku kukonka Amafunde ayalembwa muli ili ibuuku+ kabili nga tamwakaletiina ishina lya lulumbi kabili ilya kutiinya+ ilya kuti Yehova,+ Lesa wenu, 59 Yehova akaleta ifikuko fyabipisha pali imwe na pa bana benu, ifikuko+ ifikalamba kabili ifishakapwe bwangu, na malwele ayabipisha kabili ayakakokola. 60 Akamuletela amalwele yonse aya mu Egupti ayo mwaletiina, kabili tayakapwe. 61 Yehova akamuletela na malwele nelyo ifikuko ifishalembwa muli ili ibuuku lya Mafunde mpaka mukalobe. 62 Nangu ca kuti mwalifula nge ntanda sha mu muulu,+ mukashala+ abanono sana, pantu tamwaumfwilile Yehova Lesa wenu.

63 “Kabili nga filya fine Yehova atemenwe ukumucitila ifisuma no kumufusha, e fyo Yehova akatemwa no kumonaula no kumulofya; kabili akamufumya mu calo ico muli no kulaikalamo.

64 “Yehova akamusalanganishisha mu nko shonse, ukufuma ku mpela ye sonde+ ukufika ku mpela imbi iye sonde, kabili uko kwine e ko mukalabombela balesa ba fimuti na ba mabwe, abo mushaishiba kabili abo ifikolwe fyenu fishaishibe.+ 65 Tamwakekale umutende muli isho inko,+ kabili tamwakakwate na pa kutuushisha amakasa yenu. Yehova akalenga imitima yenu ikasakamikwe+ kabili amenso yenu yakanaka kabili tamwakakwate isubilo.*+ 66 Mukaba na mafya ayakalamba, kabili mukalaba no mwenso ubushiku na kasuba; kabili tamwakeshibe nampo nga mukapusuka nelyo iyo. 67 Ulucelo mukalati, ‘Kanshi nga cungulo!’ ne cungulo mukalati, ‘Kanshi nga lucelo!’ pa mulandu wa kuti mukaba no mwenso sana e lyo na pa mulandu wa fyo amenso yenu yakalamona. 68 Kabili Yehova akamubwesesha ku Egupti mu bwato mu nshila iyo namwebele nati, ‘Tamwakatale amuimona na kabili,’ kabili kulya kwine e ko mukalafwaya ukulaishitisha ku balwani benu pa kuti mube abasha babo abaume na basha babo abanakashi, lelo takwakabe nangu umo uwa kumushita.”

29 Aya e mashiwi ya cipangano ico Yehova aebele Mose ukupangana na bena Israele mu calo ca Moabu ukulunda pa cipangano ico apangene nabo mu Horebu.+

2 Lyena Mose aitile abena Israele bonse kabili abebele ati: “Mwali-imwena fyonse ifyo Yehova acitile mu calo ca Egupti, ifyo acitile Farao na babomfi bakwe bonse ne calo cakwe conse,+ 3 ne fyo abakandile nga nshi, mwalimwene ne fishibilo ifikalamba ne fipesha amano.+ 4 Nomba Yehova tamupeela umutima wa kwishiba na menso ya kumona na matwi ya kumfwa, ukufika na lelo.+ 5 ‘Ilyo nalemutungulula mu matololo+ pa myaka 40, ifya kufwala fyenu tafyasapwike, kabili indyato shenu tashapwile.+ 6 Tamwaliilepo umukate, kabili tamwanwenepo umwangashi nangu ubwalwa, pa kuti mwingeshiba ukuti nine Yehova Lesa wenu.’ 7 Mwasukile mwafika kuno, kabili Sihone imfumu ya Heshebone+ na Oge imfumu ya Bashani+ baishile mu kulwa na ifwe, lelo twalibacimfishe.+ 8 Lyena twalibapokele icalo no kupeela abena Rubene, abena Gadi na hafu ya mukowa wa bena Manase+ pa kuti cibe icalo cabo. 9 E ico mulesunga amashiwi ayali muli ici cipangano kabili muleyakonka, pa kuti fyonse ifyo mukalacita fikale-enda bwino.+

10 “Imwe bonse mwiminine pa cinso ca kwa Yehova Lesa wenu buno bushiku, e kutila intungulushi sha mikowa yenu, abakalamba benu, bacilolo benu, abaume bonse aba mu Israele, 11 abana benu, abakashi benu,+ abalebeshi benu+ abo mwikala nabo mu nkambi, ukutampila pa bamutebela inkuni ukufika na ku bamutapila amenshi. 12 Ico mubelele pano ni pa kuti mulape umulapo wa kupangana icipangano na Yehova Lesa wenu, ico Yehova Lesa wenu alepangana na imwe lelo+ 13 pa kuti alenge mube abantu bakwe+ buno bushiku, na pa kuti abe Lesa wenu,+ nga filya fine amulaya kabili nga filya fine alapile ku fikolwe fyenu, Abrahamu,+ Isaki+ na Yakobo.+

14 “Nomba te imwe mweka ndepangana na imwe ici cipangano kabili te imwe mweka mulelapa uyu mulapo, 15 lelo ndepangana na bonse abeminine pano pamo na ifwe lelo, pa cinso ca kwa Yehova Lesa wesu, kumo na bashili na ifwe pano lelo. 16 (Pantu mwalishiba bwino ifyo twaikele mu Egupti ne fyo twapitile mu nko ishalekanalekana pa lwendo lwesu.+ 17 Kabili mwalemona ifintu fya bunani ifya ishi nko, utulubi+ twa shiko utwa bunani* utwa fimuti no twa mabwe, utwa silfere no twa golde, uto shakwete.) 18 Mufwile ukuba abacenjela pa kuti pali imwe lelo peba umwaume nelyo umwanakashi nangu ulupwa nelyo umukowa abo imitima yabo ilefuma kuli Yehova Lesa wesu no kutendeka ukubombela balesa ba isho inko,+ kabili peba umushila uuletwala ifisabo fya busungu kabili ifyalula.+

19 “Lelo nga ca kuti umuntu aumfwa amashiwi ya uyu mulapo, kabili aituumika mu mutima wakwe e lyo atila, ‘Nkekala umutende nangu ndecita fye ifyo umutima wandi ulefwaya,’ kabili calenga ayonaula, aonaula na bali mupepi nankwe,* 20 Yehova takamwelele.+ Lelo ubukali bwa kwa Yehova ubukalamba ububilima ngo mulilo bukesa pali uyo muntu, kabili ifitiipu fyonse ifyalembwa muli ili ibuuku fikaba pali ena,+ kabili nangu cikabe shani Yehova akafuuta ishina lyakwe mwi samba lya muulu. 21 Lyena Yehova akamufumya mu mikowa yonse iya kwa Israele pa kuti ifitiipu fyonse ifyalembwa muli ili ibuuku lya Mafunde ya cipangano fikese pali ena.

22 “Ilyo abakatuntuka mu bana benu na balebeshi abakafuma ku calo ca kutali bakamona ifikuko na malwele ifyo Yehova akaleta muli ici calo 23 ne fyo amabwe ya mingu no mucele no mulilo fikonaula icalo conse ica kuti tabakabyalemo nangu cimo, tamwakapuke nangu cimo kabili tamwakamene umulemfwe nangu umo, kabili nga bamona ukuti cilemoneka nga Sodomu na Gomora,+ Adma na Seboimu,+ ifyo Yehova aonawile mu cipyu cakwe na mu bukali bwakwe, 24 bena na ba mu nko shonse bakatila, ‘Cinshi Yehova aonawilile ici calo muli uyu musango?+ Cinshi calengele akalipe umusango yu?’ 25 Lyena bakatila, ‘Ni co tabasungile icipangano ca kwa Yehova,+ Lesa wa fikolwe fyabo, ico apangene nabo ilyo abafumishe mu calo ca Egupti.+ 26 Lelo batampile ukubombela balesa bambi no kubakontamina, balesa abo bashaishibe kabili abo ashabasuminishe ukulapepa.*+ 27 Lyena ubukali bwa kwa Yehova ububilima ngo mulilo bwaishile pali cilya calo ilyo aletele ifitiipu fyonse ifyalembwa muli ili ibuuku+ pali cena. 28 E ico Yehova abanukwile mu calo cabo mu bukali+ na mu cipyu, kabili mu cifukushi icikalamba kabili abatwele ku calo cimbi uko baba pali lelo.’+

29 “Ifyafiswa fya kwa Yehova Lesa wesu,+ lelo ifyasokololwa fyesu na bakatuntuka muli ifwe umuyayaya, pa kuti tulekonka aya Amafunde+ yonse.

30 “Ilyo ifi fyonse ifyo nalanda fikamucitikila, e kutila amapaalo ne fitiipu ifyo mulingile ukusalapo cimo,+ kabili nga mwayafibukisha*+ mu nko shonse umo Yehova Lesa wenu akamusalanganishisha,+ 2 mwabwelela na kuli Yehova Lesa wenu,+ kabili imwe na bana benu mwalamumfwila no mutima wenu onse no mweo* wenu onse+ kabili mwalacita na fyonse ifyo ndemweba lelo, 3 lyena Yehova Lesa wenu akamufumya mu calo umo mukaba bankole+ kabili akamubelela uluse,+ akamulonganya na kabili ukufuma mu nko shonse isho Yehova Lesa akamusalanganishishamo.+ 4 Nangu fye Yehova Lesa wenu akamusalanganishishe ku mpela ya muulu, akamulonganya uko kwine e lyo akamubweshe.+ 5 Yehova Lesa wenu akamubwesha ku calo ico bashinwe bapokele, kabili cikaba icenu; kabili akamucitila ifisuma no kulenga mukafule ukucila bashinwe.+ 6 Yehova Lesa wenu akasangulula* imitima yenu ne mitima ya bana benu,+ pa kuti mukatemwe Yehova Lesa wenu no mutima wenu onse no mweo* wenu onse na pa kuti mukabe no mweo.+ 7 Lyena Yehova Lesa wenu akaleta ifi ifitiipu fyonse pa balwani benu abamupatile kabili abamucushishe.+

8 “Lyena mukatendeka ukulaumfwila Yehova nge fyo mwalecita kale kabili mukalakonka amafunde yakwe yonse ayo ndemweba lelo. 9 Yehova Lesa wenu akamupaala nga nshi mu milimo yenu yonse iyo mukalabomba,+ akalenga mukakwate abana abengi ne fitekwa ifingi ne fisabo fya mu mushili wenu ifingi, pantu Yehova akatemwa ukumucitila ifisuma na kabili, nga filya fine atemenwe ukucitila ifikolwe fyenu+ ifintu ifisuma. 10 Pantu pali iyi nshita mukalaumfwila Yehova Lesa wenu kabili mukalakonka amafunde yakwe na fyonse ifyalembwa muli ili ibuuku lya Mafunde, kabili mukabwelela kuli Yehova Lesa wenu no mutima wenu onse no mweo* wenu onse.+

11 “Nomba ili ifunde ilyo ndemweba lelo talikosele sana ica kuti mwafilwa ukulikonka, kabili talili ukutali.+ 12 Talili mu muulu, ica kuti mwatila, ‘Nani akaya ku muulu pa kuti akatuletele, pa kuti tukalyumfwe kabili tukalelikonka?’+ 13 Kabili talili bushilya bwa bemba, ica kuti mwatila, ‘Nani akaabuka bemba, akayetuletela ili ifunde, pa kuti tukalyumfwe kabili tukalelikonka?’ 14 Pantu ici icebo cili fye mupepi na imwe, cili mu tunwa twenu na mu mitima yenu,+ pa kuti mulecikonka.+

15 “Moneni, mulingile ukusalapo cimo pali ifi, pa mweo no busuma, na pa mfwa ne fibi.+ 16 Nga mwakulatemwa Yehova Lesa wenu, nga mwakulaenda mu nshila shakwe, kabili nga mwakulakonka amafunde yakwe no bupingushi bwakwe, ninshi mwakulasunga amafunde ya kwa Yehova Lesa wenu+ ayo ndemweba lelo. Nga mwalacita ifi, mukaba no mweo+ kabili mukafula, kabili Yehova Lesa wenu akamupaala mu calo ico muleya mu kwikalamo.+

17 “Lelo imitima yenu nga yataluka kuli Lesa wenu+ kabili mwakaana ukumfwa kuli ena, kabili nga mwabelelekwa, mwalakontamina na balesa bambi no kulababombela,+ 18 ndemweba lelo nati nangu cibe shani mukaloba.+ Tamwakekale inshiku ishingi mu calo ico muleya mu kwikalamo nga mwa-abuka Yordani. 19 Nalenga umuulu ne sonde fibe bakambone pali imwe lelo, musalepo cimo pa mweo ne mfwa, pe paalo ne citiipu;+ kabili mufwile ukusala umweo pa kuti mube no mweo,+ imwe pamo na bakatuntuka muli imwe.+ 20 Mukaba no mweo nga mukalatemwa Yehova Lesa wenu,+ nga mukalamumfwila kabili nga mukalambatila kuli ena,+ pantu ena e mweo wenu kabili e ukalenga mukekale inshiku ishingi mu calo ico Yehova alapile ukuti akapeela ifikolwe fyenu, Abrahamu, Isaki na Yakobo.”+

31 Lyena Mose aile-eba abena Israele bonse aya amashiwi, 2 abebele ati: “Ine nomba nimfisha imyaka 120.+ Nshatwalilile ukumutungulula,* pantu Yehova anjebele ati, ‘Tawakaabuke uyu umumana wa Yordani.’+ 3 Yehova Lesa wenu e ulemutangilila pa kwabuka, kabili akamulofeshako ishi inko. Lyena mukatendeka ukwikala mu calo ca shiko.+ Yoshua e ukamutungulula pa kwabuka,+ nga filya fine Yehova alandile. 4 Yehova akabalofya nga filya fine alofeshe Sihone+ na Oge,+ imfumu sha bena Amore, kabili akonaula ifyalo fyabo nga filya fine aonawile ifyalo fya ishi imfumu.+ 5 Yehova akamucimfishako ishi inko, kabili mukashicite ukulingana ne fyo amafunde yonse ayo namupeela yalanda.+ 6 Shipeni kabili koseni.+ Mwibatiina kabili mwitutuma,+ pantu Yehova Lesa wenu aleya pamo na imwe. Takamushe kabili takamulekeleshe.”+

7 Lyena Mose aitile Yoshua kabili amwebele pa menso ya bena Israele bonse ati: “Shipa kabili kosa,+ pantu niwe ukengisha aba bantu mu calo ico Yehova alaile ifikolwe fyabo ukuti akabapeela, kabili niwe ukabapeela pa kuti cibe icalo cabo.+ 8 Yehova e ulekutangilila, kabili akulaba na iwe.+ Takakushe kabili takakulekeleshe. Witiina kabili witutuma.”+

9 Lyena Mose alembele aya Amafunde+ no kupeela bashimapepo abena Lebi, abasenda icipao ca cipangano ica kwa Yehova, kabili apeele na bakalamba bonse aba mu Israele. 10 Mose abebele ati: “Lyonse pa mpela ya myaka 7, ilyo inshita ya mwaka wa kusuulako inkongole+ yafika, pa nshita ya Mutebeto wa Nsakwe,+ 11 ilyo abena Israele bonse bakalamoneka pa cinso ca kwa Yehova+ Lesa wenu pa cifulo ico akasala, mulingile ukulababelengela aya Amafunde pa kuti bakaleyomfwa.+ 12 Longanyeni abantu,+ abaume, abanakashi, abana* na balebeshi abo mwikala nabo mu misumba,* pa kuti bakutike kabili basambilile pali Yehova Lesa wenu kabili balemutiina no kulabika amano ku kukonka fyonse ifyalembwa muli aya Amafunde. 13 Lyena abana babo abashaishiba aya Amafunde bakakutika+ kabili bakasambilila ukutiina Yehova Lesa wenu inshiku shonse isho mukekala mu calo ico mukekalamo+ nga mwa-abuka Yordani.”

14 Lyena Yehova aebele Mose ati: “Mona! Inshiku sha kuti ufwe+ shapalama. Ita Yoshua, kabili muyeiminina pe tenti lya kukumaninamo, pa kuti imupeele umulimo wa kuba intungulushi.”+ E ico Mose na Yoshua baileiminina pe tenti lya kukumaninamo. 15 Lyena Yehova amoneke mu ntumba ye kumbi pe tenti lya kukumaninamo, kabili intumba ye kumbi yaiminine mupepi no mwinshi we tenti lya kukumaninamo.+

16 Nomba Yehova aebele Mose ati: “Mona! Uli mu kufwa,* kabili aba bantu tabakabe aba cishinka kuli ine, bakatampa ukupepa balesa bambi aba mu calo ico baleyamo.+ Bakansuula+ kabili tabakasunge icipangano ico napangana nabo.+ 17 Pali ilya nshita ubukali bwandi ububilima ngo mulilo bukabemina,+ kabili nkabalekelesha,+ nkafisa icinso candi+ mpaka bakabonaule. Kabili ilyo bakakwata amafya ayengi na macushi,+ bakatila, ‘Icalenga tukwate aya amafya+ ni co Lesa taba na ifwe.’ 18 Lelo nkafisa icinso candi pali ubo bushiku pa mulandu wa fyabipa ifyo bacita, pantu balitampa ukupepa balesa bambi.+

19 “Nomba lembeni ulu lwimbo+ kabili musambilishe* abena Israele.+ Mubebe basambilile ulu ulwimbo pa kuti lukabe kambone wandi pa bena Israele.+ 20 Ilyo nkabengisha mu calo ico nalaile ifikolwe fyabo,+ icalo umwaba umukaka no buci,+ kabili nga balya baikuta ne fintu fyabawamina,*+ bakatampa ukupepa balesa bambi. E bo bakalabombela, bakansuula kabili tabakasunge icipangano candi.+ 21 Ilyo bakakwata amafya ayengi na macushi,+ ulu ulwimbo lukaba nga kambone uwa kubashinina, (pantu abakatuntuka muli bena tabalingile ukulaba ulu lwimbo), pantu nimona kale uko umutima wabo walemenena+ na lintu nshilabengisha mu calo ico nabalaile.”

22 E ico Mose alembele ulu lwimbo pali ubu bwine ubushiku, kabili alisambilishe abena Israele.

23 Lyena Lesa apeele Yoshua+ umwana wa kwa Nuni umulimo wa kuba intungulushi kabili amwebele ati: “Shipa kabili kosa,+ pantu niwe ukengisha abena Israele mu calo ico nabalaile+ ukubapeela, kabili nkatwalilila ukuba na iwe.”

24 Ilyo Mose apwile fye ukulemba Amafunde yonse aya muli ili ibuuku,+ 25 aebele abena Lebi abasenda icipao ca cipangano ica kwa Yehova ati: 26 “Sendeni ili ibuuku lya Mafunde+ muyelibika lubali lwa cipao ca cipangano+ ica kwa Yehova Lesa wenu, kabili lyakulaba kambone pali imwe. 27 Pantu nalishiba bwino bucipondoka bwenu+ na bucintomfwa bwenu.*+ Apo mulapondokela Yehova ilyo ncili uwa mweo, pali bufi nga nafwa! 28 Nonganikileni abakalamba bonse aba mikowa yenu na bacilolo benu, pa kuti mbebe aya amashiwi, kabili nalalenga imyulu ne sonde fibe bakambone pali bena.+ 29 Pantu ninjishiba bwino bwino ukuti ilyo nkafwa mukalacita ifyabipa,+ kabili mukafuma mu nshila iyo namweba. Kabili nangu cikabe shani mukakwata amafya ku ntanshi,+ pantu mukalacita ifyabipa mu menso ya kwa Yehova kabili ifyo mukalacita fikalamukalifya.”

30 Na kabili Mose aebele ulukuta lonse ulwa bena Israele amashiwi yonse aya ulu lwimbo ukufuma pa ntendekelo ukufika pa mpela ya luko:+

 3 Pantu nkalenga ishina lya kwa Yehova likeshibikwe.+

Lengeni Lesa wesu+ eshibikwe ukuti mukalamba!

 5 Ebalufyenye.+

Te bana bakwe, cilubo cabo.+

Ni nkulo+ iyabipa kabili iya bucenjeshi!

15 Ilyo Yeshuruni* ainine, apondokeele shikulu wakwe.

Nawina, naukula, nawikutisha.+

29 Nga balikwata amano+ kuti batontonkanyapo sana pali ifi.+

Kuti batontonkanya na pa fikabacitikila.+

Nabeme bamwafwe.

Nababe icubo cenu.

Ndepaya, kabili ndalenga umuntu aba no mweo.+

44 E fyo Mose aishile no kweba abantu+ amashiwi yonse aya ulu lwimbo, ninshi ali na Hoshea*+ umwana wa kwa Nuni. 45 Ilyo Mose aebele abena Israele bonse amashiwi yonse aya, 46 abebele no kuti: “Amashiwi yonse ayo ndemweba lelo+ pa ku musoka, muyasunge mu mitima yenu, pa kuti mule-eba abana benu ukuti balebika amano ku kukonka aya Amafunde+ yonse. 47 Pantu aya amashiwi ayo ndemweba nayacindama sana, pantu kuti yalenga mwaba no mweo,+ kabili kuti yalenga mwaikala inshiku ishingi mu calo ico muleya mu kwikalamo nga mwa-abuka Yordani.”

48 Yehova aebele Mose pali ubu bwine ubushiku ati: 49 “Nina ulu ulupili lwa Abarimu,+ Ulupili lwa Nebo,+ ulwa mu calo ca Moabu, ulwalungatana na Yeriko, kabili umone icalo ca Kanaani, ico ndepeela abena Israele pa kuti cibe icalo cabo.+ 50 Lyena walafwila pa lupili ulo walanina, nge fyafwa abantu bobe, nga filya fine munonko Aarone afwile pa Lupili lwa Hore+ nge fyafwa abantu bakwe, 51 pantu bonse babili tamwali aba cishinka kuli ine pa menso ya bena Israele pa menshi ya Meriba+ ku Kadeshe mu matololo ya Sini, pa mulandu wa kuti tamwancindike pa bena Israele.+ 52 Ukamwena icalo akatalamukila, lelo tawakengile muli ici icalo ico ndepeela abena Israele.”+

33 Nomba ili e paalo ilyo Mose umuntu wa kwa Lesa wa cine apaalile abena Israele ilyo ashilafwa.+ 2 Atile:

 7 E lyo apaalile Yuda+ ati:

 8 Lebi amwebele ati:+

12 Benjamini amwebele ati:+

13 Yosefe amwebele ati:+

18 Sebuluni amwebele ati:+

19 Baketa abantu abengi ku lupili.

E ko bakatuulila amalambo ya bulungami.

20 Gadi amwebele ati:+

“Abe uwapaalwa uulekusha imipaka ya kwa Gadi.+

Intungulushi sha bantu shikalongana pamo.

22 Dani amwebele ati:+

“Dani mwana wa nkalamo.+

Akaciluka ukufuma mu Bashani.”+

23 Naftali amwebele ati:+

Ikala ku masamba na ku kapinda ka ku kulyo.”

24 Ashere amwebele ati:+

“Lesa alipaala Ashere na bana abengi.

29 Walipaalwa, we Israele!+

34 Lyena Mose afumine mu ciswebebe ca Moabu, aya ku Lupili lwa Nebo+ pa muulu wa Pisga+ iyalungatana na Yeriko.+ Kabili Yehova amulangile icalo conse, ukufuma ku Gileadi ukufika ku Dani,+ 2 ne calo conse ica kwa Naftali, ne ca kwa Efraimu na Manase, ne calo conse ica kwa Yuda ukuyafika fye na kuli bemba wa ku masamba,*+ 3 na mu Negebu+ na mu Citungu+ ca Yordani, kumo ne mpanga iyabatama iya mu Yeriko, umusumba wa tuncindu, ukuyafika fye na ku Soari.+

4 Lyena Yehova aebele Mose ati: “Ici e calo ico nalapile kuli Abrahamu, Isaki na Yakobo nati, ‘Nkapeela+ abana* benu.’ Naleka umone ici calo, lelo tawakabuuke Yordani no kwingilamo.”+

5 Pa numa, Mose umubomfi wa kwa Yehova alifwile mu calo ca Moabu nga filya fine Yehova alandile.+ 6 Amushiikile mu mupokapoka wa mu calo ca Moabu uwalungatana na Bete-peore, kabili takwaba nangu umo uwaishiba inshiishi yakwe ukufika na lelo.+ 7 Mose ali ne myaka 120 ilyo afwile.+ Lelo alemona fye bwino kabili na maka yali tayalapwa. 8 Abena Israele balooseshe Mose mu ciswebebe ca Moabu pa nshiku 30.+ Lyena inshiku sha kuloosha Mose shalipwile.

9 Yoshua umwana wa kwa Nuni aiswilemo umupashi wa mano, pantu Mose alibikile iminwe yakwe pali ena;+ kabili abena Israele batendeke ukulamumfwila, kabili balecita fyonse ifyo Yehova aebele Mose.+ 10 Lelo mu Israele tamwatala amuba kasesema uwaba nga Mose,+ uo Yehova aishibe icinso ne cinso.+ 11 Alicitile ifishibilo fyonse ne fipesha amano ifyo Yehova amutumine ukuyacita kuli Farao na ku babomfi bakwe bonse na ku calo ca Egupti conse,+ 12 kabili Mose alilangile abena Israele+ bonse ukuboko kwakwe ukwa maka e lyo na maka ayakalamba ayo akwete.