YOSHUA

1 Ilyo Mose umubomfi wa kwa Yehova afwile, Yehova aebele Yoshua*+ umwana wa kwa Nuni, umubomfi+ wa kwa Mose ati: 2 “Mose umubomfi wandi nafwa.+ Nomba ima wabuke umumana wa Yordani, pamo na bantu bonse aba, kabili mwingile mu calo ico ndepeela abena Israele.+ 3 Nkamupeela icifulo conse ico mukanyantapo, nga filya fine nalaile Mose.+ 4 Icalo cenu cikatendekela ku matololo ukuyafika ku Lebanone na ku mumana ukalamba uwa Yufrate, e kutila icalo conse ica bena Hiti,+ kabili cikayafika na kuli Bemba Mukalamba* ku masamba.*+ 5 Takwakabe nangu umo uukakucimfya pa nshiku shonse isho ukaba no mweo.+ Nga filya fine nali na Mose e fyo nkaba na iwe.+ Nshakakushe kabili nshakakulekeleshe.+ 6 Shipa kabili kosa,+ pantu niwe ukalenga aba bantu bakapyane icalo ico nalapile ku fikolwe fyabo ukuti nkabapeela.+

7 “Ushipe fye kabili ukose sana, ulebika amano ku kukonka Amafunde yonse ayo Mose umubomfi wandi akwebele. Taufwile ukwalukila ku kulyo nelyo ku kuso,+ pa kuti uleba na mano muli fyonse ifyo wakulacita.+ 8 Taufwile ukuleka ukulanda+ pa fyaba muli ili ibuuku lya Mafunde, kabili akasuba no bushiku ulebelenga ifyalembwamo+ mwi shiwi ilinono,* pa kuti ulebika amano ku kukonka fyonse ifyalembwamo; pantu e lyo ifintu fikalakwendela bwino kabili e lyo ukaba na mano.+ 9 Nomba ndekweba na kabili nati, ‘Shipa kabili kosa.’ Witutuma kabili witiina, pantu Yehova Lesa obe akulaba na iwe konse uko wakulaya.”+

10 Lyena Yoshua aebele bacilolo ba bantu ati: 11 “Piteni mu nkambi yonse mwebe abantu amuti, ‘Pekanyeni ifya kusenda pa bulendo, pantu kwashala fye inshiku shitatu muli no kwabuka umumana wa Yordani pa kuti mukayepoka icalo ico Yehova Lesa wenu alemupeela pa kuti cibe icalo cenu.’”+

12 Kabili Yoshua aebele abena Rubene, abena Gadi na hafu wa mukowa wa kwa Manase ati: 13 “Muleibukisha ifyo Mose umubomfi wa kwa Yehova amwebele, atile:+ ‘Yehova Lesa wenu alelenga mutuushe kabili alimupeela ici calo. 14 Abakashi benu na bana benu bakekala mu calo ico Mose amupeela, kuli luno lubali* lwa Yordani,+ pamo ne fitekwa fyenu. Lelo imwe bonse mwe bashilika+ mufwile ukwabuka no kutangilila bamunyinenwe+ ninshi namuipekanya ukulwa inkondo. Mulingile ukwafwa bamunyinenwe 15 mpaka Yehova akalenge bakatuushe nge fi fine alenga na imwe mwatuusha, kabili mpaka bakakwate icalo ico Yehova Lesa wenu alebapeela. Lyena mukabwelele ku calo ico bamupeele pa kuti mukaleikalamo, icalo ico Mose umubomfi wa kwa Yehova amupeele ku kabanga ka Yordani.’”+

16 Ba-aswike Yoshua abati: “Twakulacita fyonse ifyo watweba, kabili twakulaya konse uko watutuma.+ 17 Nga filya fine twaleumfwila Mose muli fyonse, e fyo na iwe wine twakulakumfwila. Shi Yehova Lesa obe abe na iwe nga filya fine ali na Mose.+ 18 Umuntu onse uwakaana ukukonka icipope cobe kabili uushakulakonka fyonse ifyo wamweba alingile ukwipaiwa.+ Lelo iwe ube fye uwashipa kabili uwakosa.”+

2 Lyena Yoshua umwana wa kwa Nuni atumine abaume babili mu bumfisolo ukufuma ku Shitimu+ abakuyalengula icalo. Abebele ati: “Kabiyeni kalenguleni icalo, maka maka umusumba wa Yeriko.” E ico balile kabili bailefikila ku ng’anda ya mwanakashi cilende, ishina lyakwe ni Rahabu,+ kabili e ko baikele. 2 Kabili imfumu ya Yeriko baliyebele ukuti abaume abena Israele nabesa ubushiku mu kulengula icalo. 3 E ico imfumu ya Yeriko yatumine abakuyaeba Rahabu ati: “Fumya abaume abeshile, abaleikala mu ng’anda yobe, pantu beshile mu kulengula icalo conse.”

4 Nomba Rahabu alifishile balya abaume babili. Lyena atile: “Ca cine abaume bacisa kuli ine, lelo nshacishiba uko bacifuma. 5 Nomba ilyo kwacifiita ninshi bali mupepi no kwisala impongolo, balya baume bacifuma. Nshishibe uko bele, lelo nga mwabakonka ulubilo, mwalabasanga.” 6 (Lelo abafishile pa mutenge mu tumuti balefundako ulushishi lwa kupangila insalu uto batuulike pa mutenge.) 7 E ico balibakonkele ulubilo ukulola ku fyabu fya Yordani,+ kabili ilyo fye abalebakonka bafumine, balisele impongolo.

8 Ilyo abaume bashilasendama, aile kuli bena pa mutenge. 9 Kabili abebele ati: “Ninjishiba ukuti Yehova akamupeela cino calo+ kabili tulemutiina.+ Bonse abekala muli cino calo nabasakamikwa nga nshi pa mulandu wenu,+ 10 pantu twalyumfwa ifyo Yehova akamishe amenshi ya muli Bemba Wakashika ilyo mwafumine mu Egupti,+ ne fyo mwacitile imfumu shibili isha bena Amore, Sihone+ na Oge,+ isho mwalofeshe bushilya* bwa Yordani. 11 Ilyo twaumfwile ifi, twalisakamikwe nga nshi,* kabili bonse tulamutiina sana,* pantu Yehova Lesa wenu e Lesa mu muulu na pano isonde.+ 12 Nomba lapeni kuli ine mwi shina lya kwa Yehova ukuti, apo nimulanga ukutemwa ukushipwa, na imwe mukalanga aba mu lupwa lwa kwa tata ukutemwa ukushipwa; kabili mufwile ukumpeela icishibilo ca kuti mukacita ifyo mwalalaya. 13 Tamufwile ukwipaya batata na bamayo, bandume yandi na bankashi nandi, na bantu babo bonse, lelo mufwile ukutupususha.”*+

14 Lyena balya baume bamwebele abati: “Nga tatwakacite ifyo twalalaya ninshi ni fwe tukafwilamo te imwe iyo!* Nga tamwebeleko bambi ico twishiile kuno, ninshi tukamulanga ukutemwa ukushipwa kabili tukaba aba cishinka kuli imwe ilyo Yehova akatupeela cino calo.” 15 Pa numa abekishishe ku ntambo pe windo, pantu ing’anda yakwe yalisuntinkene ne cibumba ce linga. Na kuba, aleikala pe linga.+ 16 Lyena abebele ati: “Kabiyeni ku citungu ca mpili, e ko muyebelama pa nshiku shitatu pa kuti abalemufwaya bemusanga. Abalemufwaya nga babwela, kuti mwabwelelamo uko mwafumine.”

17 Aba abaume bamwebele abati: “Tukaba fye aba kaele kuli uyu mulapo uo walenga twalapa+ 18 nga ca kuti ilyo tukesa mu calo tukasange naukaka iyi ntambo yakashika ce pe windo ilyo uletwikishishapo. Ulingile ukwingisha bawiso, banoko, bamunonko na balupwa lwa bawiso bonse mu ng’anda yobe.+ 19 Lyena onse uukafumina kunse ya ng’anda yobe, umulopa wakwe ukaba pa mutwe wakwe, lelo ifwe tukaba aba kaele. Nomba nga ca kuti icabipa cikacitikila* umo pa bo ukaba nabo mu ng’anda, ninshi umulopa wakwe ukaba pa mitwe yesu. 20 Nomba nga wasokolola ico twishiile kuno,+ tukaba aba kaele ku mulapo uo walenga ukuti tulape.” 21 Na o abebele ati: “Nacikabe ifyo fine mwalanda.”

E ico alibalekele baya. Pa numa akakile intambo yakashika ce pe windo. 22 E ico balile ku citungu ca mpili kabili baikeleko inshiku shitatu, mpaka abalebafwaya babwelako. Balibafwaile mu nshila shonse, lelo tababasangile. 23 Lyena aba abaume babili batentemwike icitungu ca mpili kabili ba-abwike umumana, babwelela na kuli Yoshua umwana wa kwa Nuni, kabili bamushimikile fyonse ifyabacitikile. 24 Lyena baebele Yoshua abati: “Yehova natupeela icalo conse.+ Na kuba, bonse abekala muli ici icalo nabasakamikwa nga nshi pa mulandu wesu.”+

3 Lyena Yoshua na bena Israele* bonse baimine lucelocelo mu Shitimu+ baya ku Yordani. Bulya bushiku baleele kulya kwine ilyo bashila-abuka.

2 Pa numa ya nshiku shitatu, bacilolo+ baile mu nkambi yonse 3 kabili baebele abantu abati: “Nga mwamona fye icipao ca cipangano ica kwa Yehova Lesa wenu nabacisenda kuli bashimapepo abena Lebi,+ mulingile ukwima no kucikonka. 4 Lelo apo mufwile ukulaendela na po cikabela palingile ukuba nalimo imikono 2,000;* mwikapalama sana kuli cena, pa kuti mukeshibe inshila umo mufwile ukuya, pantu tamwatala amupitamo muli iyi nshila.”

5 Nomba Yoshua aebele abantu ati: “Isangululeni+ pantu mailo Yehova akamucitila ifipesha amano.”+

6 Lyena Yoshua aebele bashimapepo ati: “Sendeni icipao+ ca cipangano kabili tangilileni abantu.” E ico balisendele icipao ca cipangano, batangilila na bantu.

7 Lyena Yehova aebele Yoshua ati: “Ukutendekela pali buno bushiku nalalenga abena Israele bonse+ balekucindika, pa kuti beshibe ukuti nakulaba na iwe+ nga filya fine nali na Mose.+ 8 Ulingile ukweba bashimapepo abasenda icipao ca cipangano auti: ‘Nga mwafika fye umwapelela amenshi ya Yordani, mufwile ukwiminina mu Yordani mwine.’”+

9 Kabili Yoshua aebele abena Israele ati: “Iseni mumfwe ifyo Yehova Lesa wenu alandile.” 10 Lyena Yoshua abebele ati: “Ifi fyalalenga mwishibe ukuti Lesa wa mweo ali na imwe,+ kabili mwalaishiba no kuti nangu cibe shani ali no kumutamfishako abena Kanaani, abena Hiti, abena Hibi, abena Perisi, abena Gegashi, abena Amore na bena Yebusi.+ 11 Moneni! Icipao ca cipangano ica kwa Shikulu we sonde lyonse cilemutangilila ukwingila mu Yordani. 12 Nomba saleni abaume 12 mu mikowa ya kwa Israele. Muli cila mukowa musalemo umo,+ 13 kabili ilyo fye bashimapepo abasenda icipao ca kwa Yehova, Shikulu we sonde lyonse, bakanyanta mu menshi ya Yordani, amenshi ayafuma ku muulu wa Yordani yakaleka ukupita, kabili yakeminina nga menshi ya mu cishiba.”*+

14 E ico ilyo abantu bafumine apo bapangile inkambi, ilyo bashila-abuka Yordani, bashimapepo abasendele icipao+ ca cipangano balitangilile abantu. 15 Ilyo fye abasendele Icipao bafikile ku Yordani, kabili bashimapepo abasendele Icipao banyanta na mu menshi (nomba umumana wa Yordani ulesula sana+ mu nshiku shonse isha kusombola), 16 amenshi ayalefuma ku muulu wa mumana yaliminine. Yaiminine kwati menshi ya mu cishiba* ukutali nga nshi, ku musumba wa Adamu uwabela mupepi na Saretani, lelo amenshi ayaleya kuli Bemba ya Araba, e kutila Bemba ya Mucele,* yalipitile mpaka umumana wauma. Yaliminine kabili abantu ba-abukiile apalungatana na Yeriko. 17 Ilyo bashimapepo abasendele icipao ca cipangano ca kwa Yehova baiminine shilili pa mushili uwauma,+ pa kati ka Yordani, abena Israele bonse baleabuka umumana wa Yordani apauma,+ mpaka bonse ba-abuka.

4 Ilyo fye uluko lonse lwa-abwike umumana wa Yordani, Yehova aebele Yoshua ati: 2 “Sala abaume 12, muli cila mukowa usalemo umwaume umo,+ 3 kabili ubebe auti: ‘Kabuuleni amabwe 12 pa kati ka Yordani apo bashimapepo baciminina shilili,+ muyasende kabili muyeyabika pa ncende apo muleyasendama buno bushiku.’”+

4 E ico Yoshua aitile abaume 12 abo asalile pa bena Israele, muli cila mukowa asalilemo umwaume umo, 5 kabili Yoshua abebele ati: “Mupite ku ntanshi ya Cipao ca kwa Yehova Lesa wenu, muye pa kati ka Yordani, cila muntu ayesendapo ilibwe pa kubeya, pa kuti impendwa ya mabwe ilingane ne mpendwa ya mikowa ya bena Israele, 6 kabili aya amabwe ya kulalenga muleibukisha ifyo Lesa amucitila. Ku ntanshi abana benu nga bamwipusha abati, ‘Cinshi mwasungila aya amabwe?’+ 7 mufwile ukubeba amuti: ‘Ni co amenshi ya mu Yordani yalipatukene pa mulandu wa cipao+ ca cipangano ica kwa Yehova. Ilyo bashimapepo abacisendele bapitile mu mumana wa Yordani, amenshi ya mu Yordani yalipatukene. Aya amabwe yakaba cibukisho ca muyayaya ica bena Israele.’”+

8 E ico abena Israele bacitile filya fine Yoshua abebele. Babuulile amabwe 12 pa kati ka Yordani, nga filya fine Yehova aebele Yoshua, pa kuti yalingane ne mpendwa ya mikowa ya bena Israele. Bayasendele ku ncende uko bailesendama kabili e ko bayatuulike.

9 Yoshua na o abikile amabwe 12 pa kati ka Yordani apaiminine bashimapepo abasendele icipao ca cipangano,+ kabili aya amabwe e po yaba ukushinta na lelo.

10 Bashimapepo abasendele Icipao batwalilile ukwiminina pa kati ka Yordani mpaka abantu bacita fyonse ifyo Yehova aebele Yoshua ukuti bacite, ukulingana na fyonse ifyo Mose aebele Yoshua. Ilyo ifi fyonse fyalecitika abantu balyangufyenye ukwabuka. 11 Ilyo fye abantu bonse ba-abwike, bashimapepo abasendele Icipao ca kwa Yehova balyabwike ninshi abantu balebamona.+ 12 Kabili abena Rubene, abena Gadi na hafu wa mukowa wa bena Manase balitangilile abena Israele bambi pa kwabuka ninshi nabaipangasha ukuya mu kulwa,+ nga filya fine Mose abebele.+ 13 Nalimo abashilika 40,000 abaipangeshe balyabwike pa cinso ca kwa Yehova kabili baile mu ciswebebe ca Yeriko.

14 Pali bulya bushiku Yehova alicindamike Yoshua pa cinso ca bena Israele bonse,+ kabili balimucindike* sana inshiku shonse isho ali no mweo nga filya fine bacindike sana Mose.+

15 Lyena Yehova aebele Yoshua ati: 16 “Eba bashimapepo abasendele icipao+ ca Cipangano bafume mu Yordani.” 17 E ico Yoshua aebele bashimapepo ati: “Fumeni mu Yordani.” 18 Ilyo bashimapepo abasendele icipao+ ca cipangano ica kwa Yehova bafumine pa kati ka Yordani, bafika na ku mulundu, e lyo amenshi ya mu Yordani yatendeke ukupita kabili yalipoosele+ na kabili.

19 Abantu ba-abwike Yordani pa bushiku bwalenga 10 ubwa mweshi wa ntanshi kabili bailepanga inkambi pa Gilgali+ ku mupaka wa ku kabanga ka Yeriko.

20 Amabwe 12 ayo bafumishe mu Yordani, Yoshua ayatuulike pa Gilgali.+ 21 Lyena aebele abena Israele ati: “Ku ntanshi abana benu nga bamwipusha abati, ‘Inga aya mabwe yanshi?’+ 22 mulingile ukulondolwela abana benu ukuti: ‘Abena Israele ba-abwike Yordani pa mushili uwauma+ 23 ilyo Yehova Lesa wenu akamishe amenshi ya mu Yordani pa menso yabo mpaka ba-abuka, nga filya fine Yehova Lesa wenu akamishe Bemba Wakashika pa menso yesu mpaka twa-abuka.+ 24 Ico acitiile ifi ni pa kuti abantu bonse aba pano isonde beshibe ukuti ukuboko+ kwa kwa Yehova kwa maka, na pa kuti na imwe muletiina Yehova Lesa wenu lyonse.’”

5 Ilyo imfumu shonse isha bena Amore,+ ishali bushilya bwa Yordani ku masamba,* ne mfumu shonse isha bena Kanaani+ ishali mupepi na bemba, shaumfwile fye ukuti Yehova alikamishe Yordani pa menso ya bena Israele mpaka ba-abuka, shalisakamikwe nga nshi,*+ kabili shalitiinine sana* pa mulandu wa bena Israele.+

2 Pali ilya nshita Yehova aebele Yoshua ati: “Panga imyele ya mabwe ayakosa kabili usembulule+ abaume abena Israele na kabili, umuku walenga bubili.” 3 E ico Yoshua apangile imyele ya mabwe ayakosa no kusembulula abaume abena Israele pa Gibeati-haaralote.*+ 4 Icalengele Yoshua abasembulule ni co abaume bonse abafumine mu Egupti, abaume bonse abengalwa inkondo,* bafwilile mu matololo ilyo bali pa lwendo pa numa ya kufuma mu Egupti.+ 5 Abantu bonse abafumine mu Egupti bali abasembululwa, lelo bonse abafyalilwe mu matololo ilyo bali pa lwendo pa numa ya kufuma mu Egupti, tababasembulwile. 6 Abena Israele baendele imyaka 40+ mu matololo, mpaka uluko lonse ulwa baume abengalwa inkondo abafumine mu Egupti abashaumfwilile Yehova+ lwapwa ukufwa. Yehova alapile kuli bena ukuti tali no kubasuminisha ukumona icalo+ ico Yehova alapile ku fikolwe fyabo ukuti akatupeela,+ icalo umwaba umukaka no buci.+ 7 E ico apyanikishepo abana babo.+ Aba e bo Yoshua asembulwile; pantu tababasembulwile ilyo bali pa lwendo.

8 Ilyo bapwishishe ukusembulula abaume bonse aba mu luko, abantu batwalilile ukwikala mu nkambi mpaka abaume abo basembulwile bapola.

9 Lyena Yehova aebele Yoshua ati: “Buno bushiku nimfumya umuseebanya wa ku Egupti pali imwe.” E ico ilya ncende baita ukuti Gilgali*+ ukushinta na lelo.

10 Abena Israele batwalilile ukwikala mu nkambi mu Gilgali, kabili pa bushiku bwalenga 14 ubwa mweshi+ wa kubalilapo balikwete Icakucilila icungulo, mu ciswebebe ca Yeriko. 11 Ubushiku bwakonkele pa bushiku bwa Cakucilila, pali ubu bwine bushiku, e lyo batendeke ukulya ifisabo fya mu calo, umukate uushatutumuka+ ne ngano shasalulwa. 12 Kabili pali ubu bwine bushiku baliile ifisabo fimo ifya muli ici icalo, mana yalilekele ukubako; mana ya kuti abena Israele+ balelya tayatwalilile ukubako, lelo batendeke ukulya ifisabo fya mu calo ca Kanaani muli ulya mwaka.+

13 Ilyo Yoshua ali mupepi na Yeriko, ainwine amenso kabili amwene umwaume+ naiminina ku ntanshi yakwe ninshi ali no lupanga mu minwe.+ Yoshua aile kuli ena kabili amwipwishe ati: “Bushe uli ku lubali lwesu nangu uli ku lubali lwa balwani besu?” 14 Na o amwaswike ati: “Iyo, ico naishila ni co ndi mukalamba wa bashilika ba kwa Yehova.”+ E ico Yoshua awile ubukupeme panshi alatoota, e lyo amwipusha ati: “Cinshi shikulu alefwaya ukweba umubomfi wakwe?” 15 Umukalamba wa bashilika ba kwa Yehova aebele Yoshua ati: “Fuula indyato shobe, pantu apo wiminine pa mushilo.” Ilyo line fye Yoshua alifuulile indyato.+

6 Nomba umusumba wa Yeriko baliwisele bwino bwino pantu baletiina abena Israele; takwali uwalefuma kabili takwali uwaleingilamo.+

2 Lyena Yehova aebele Yoshua ati: “Mona, nakupeela umusumba wa Yeriko ne mfumu ya uko na baume ba uko aba maka.+ 3 Bonse mwe bashilika mulingile ukulashinguluka umusumba umuku umo cila bushiku. Ifi fine e fyo mufwile ukucita pa nshiku 6. 4 Ukebe bashimapepo 7 bakasende intandala 7, kabili bakatangilile Icipao. Lelo pa bushiku bwalenga 7, mulingile ukushinguluka umusumba imiku 7 kabili bashimapepo bafwile ukulalisha intandala.+ 5 Nga mwaumfwa fye ukuti intandala yalilisha, abantu bonse balingile ukuwelesha, ukuwelesha kwa nkondo iikalamba. Lyena ilinga lya musumba likabongoloka,+ kabili abantu bonse balingile ukwingila mu musumba, cila muntu alingile ukwingilila apo akabela.”

6 E ico Yoshua umwana wa kwa Nuni aitile bashimapepo kabili abebele ati: “Sendeni icipao ca cipangano, kabili bashimapepo 7 bafwile ukusenda intandala 7, batangilile Icipao ca kwa Yehova.”+ 7 Lyena aebele abantu ati: “Kabiyeni mushinguluke umusumba, kabili abashilika abaipangeshe+ balingile ukutangilila Icipao ca kwa Yehova.” 8 Kabili nga filya fine Yoshua aebele abantu, bashimapepo 7 abasendele intandala 7 pa cinso ca kwa Yehova balitangile kabili balelisha intandala. Lyena abasendele icipao ca cipangano ca kwa Yehova balebakonka pa numa. 9 Ibumba lya bashilika abaipangeshe lyatangilile bashimapepo abalelisha intandala, kabili abashilika bambi bali ku numa ya basendele Icipao, ninshi intandala shilelila.

10 Nomba Yoshua aebele abantu ati: “Tekwesha ukupunda kabili mube fye tondolo. Tamufwile ukulanda nangu cimo mpaka ubushiku nkamweba nati: ‘Pundeni!’ E lyo mukapunde.” 11 Alengele abantu abasendele Icipao ca kwa Yehova bashinguluka umusumba umuku umo, e lyo babwelela ku nkambi e ko bayalaala.

12 Ubushiku bwakonkelepo Yoshua alicelele ukubuuka, kabili bashimapepo basendele Icipao+ ca kwa Yehova, 13 na bashimapepo 7 abasendele intandala 7 balitangilile Icipao ca kwa Yehova, kabili balelisha intandala. Abashilika abaipangeshe balibatangilile, e lyo abashilika abali ku numa balekonka abasendele Icipao ca kwa Yehova ninshi ne ntandala shilelila. 14 Bashingulwike umusumba umuku umo pa bushiku bwalenga shibili, lyena babweleele ku nkambi. Ifi fine e fyo bacitile pa nshiku 6.+

15 Pa bushiku bwalenga 7 babuukile lucelocelo, lilya fye caba ku macaca, kabili bashingulwike umusumba mu musango umo wine pa miku 7. Pali ubu bushiku e po bashingulwike umusumba imiku 7.+ 16 Kabili pa muku walenga 7, bashimapepo balishishe intandala, e lyo Yoshua aeba abantu ati: “Pundeni,+ pantu Yehova namupeela umusumba! 17 Monaule+ umusumba na fyonse ifyabamo; fyonse fya kwa Yehova. Rahabu+ nabo ali nabo mu ng’anda e bo mushifwile fye ukwipaya, pantu alifishile inkombe isho twatumine.+ 18 Lelo mulingile ukutaluka ku filingile ukonaulwa,+ pantu kuti mwafikumbwa ica kuti mwafisenda,+ kabili kuti mwalenga inkambi ya bena Israele yaonaulwa.*+ 19 Nomba silfere yonse na golde yonse ne fintu fyonse ifya mukuba ne fya cela fyonse, Yehova+ afimona ukuti fya mushilo. Fifwile ukubikwa mu cipao ca kwa Yehova.”+

20 Lyena ilyo balishishe intandala,+ abantu baliweleshe. Ilyo abantu baumfwile fye intandala shalilisha kabili ilyo baweleshe ukuwelesha kwa nkondo iikalamba, ilinga lyalibongolweke.+ Pa numa abantu balingile mu musumba, kabili cila muntu aingilile apo abelele, kabili balipokele umusumba. 21 Balyonawile fyonse ifyali mu musumba ku lupanga, umwaume no mwanakashi, umwaice no mukalamba, ing’ombe, impaanga ne mpunda.+

22 Yoshua aebele abaume babili abailelengula icalo ati: “Kabiyeni mu ng’anda ya mwanakashi cilende, kabili mumufumye kumo na bantu bakwe bonse, nga filya fine mwalapile kuli ena.”+ 23 E ico aba abaile mu kulengula icalo bailefumya Rahabu, bawishi, banyina, bamunyina na bonse abo ali nabo; bafumishe balupwa lwakwe bonse,+ kabili babatwele kunse ya nkambi ya bena Israele.

24 Lyena baocele umusumba na fyonse ifyalimo. Lelo silfere, golde ne fintu fya mukuba ne fya cela, bafibikile mu cipao ca ng’anda ya kwa Yehova.+ 25 Rahabu cilende na balupwa lwa kwa wishi na bantu bakwe bonse, e bo Yoshua+ ashaipeye fye; kabili ekala mu Israele ukufika na lelo,+ pantu alifishile inkombe isho Yoshua atumine ukuyalengula Yeriko.+

26 Pali ilya nshita Yoshua alapile* ati: “Umuntu uukakuula umusumba wa Yeriko cipya cipya, akaba uwatiipwa pa cinso ca kwa Yehova. Akafwilwa umwana wakwe umwaume ibeli ilyo akapanga umufula wa kukuulapo uyu musumba, kabili akafwilwa kasuli wakwe pa kubika ifiibi fya uko.”+

27 E ico Yehova ali na Yoshua,+ kabili ululumbi lwakwe lwakumene isonde lyonse.+

7 Lelo abena Israele tabakonkele ifyo Lesa abebele pa fyali no konaulwa, pantu Akani+ umwana wa kwa Karmi, umwana wa kwa Sabdi, umwana wa kwa Sera, uwa mu mukowa wa kwa Yuda, alibuulilepo fimo pa fyali no konaulwa.+ Ifi acitile fyalengele ubukali bwa kwa Yehova ububilima ngo mulilo bwise pa bena Israele.+

2 Lyena Yoshua atumine abaume ukufuma mu Yeriko ukuya ku musumba wa Ai,+ uwaba mupepi na Bete-abene, ku kabanga ka Betele,+ kabili abebele ati: “Kabiyeni kalenguleni umusumba wa Ai ne mpanga ya uko.” E ico aba baume bailelengula umusumba wa Ai. 3 Ilyo babwelele kuli Yoshua, bamwebele abati: “Mwileka abantu bonse baye. Muleke fye abantu nalimo 2,000 nelyo abantu nalimo 3,000 e bo bayecimfya Ai. Mwileka abantu bonse bendele fye ulwisha, pantu abekala muli ulya musumba banono fye.”

4 E ico abantu nalimo 3,000 ebaile, lelo bailefulumuka abena Ai.+ 5 Abena Ai baipeye abaume 36, kabili balibafulumwine ukufuma pa mpongolo ya musumba ukuyafika na ku Shebarimu* kabili bakonkenyepo fye ukubepaya mpaka fye na ku mutentemuko. E ico imitima ya bantu yalisungulwike kabili balitiinine nga nshi.

6 E ico Yoshua alepwile ifya kufwala fyakwe kabili ena pamo na bakalamba ba mu Israele bawile panshi ubukupeme pa ntanshi ya Cipao ca kwa Yehova mpaka icungulo, kabili baleikuba ulukungu pa mitwe. 7 Kabili Yoshua atile: “Iye, mwe Shikulu Mulopwe Yehova, cinshi mwatufumishe ukwalepa filya mwatwabusha na Yordani? Bushe ni co mwalefwaya ukutupeela mu minwe ya bena Amore pa kuti batwipaye? Kanshi nga mwatulekele fye twaikala bushilya* bwa Yordani! 8 Mwe Yehova, finshi ningalanda pantu abena Israele nabafulumuka abalwani babo? 9 Ilyo abena Kanaani na bonse abekala muli ici calo bakomfwa ifi, bakatushinguluka kabili bakalofya ishina lyesu pano isonde, kabili mukacita shani pe shina lyenu ilikalamba?”+

10 E lyo Yehova aebele Yoshua ati: “Ima! Cinshi ico uwilile ubukupeme? 11 Abena Israele nababembuka. Nabapula mu cipangano candi+ ico nabebele ukuti balesunga. Nababuulapo fimo pa fyali no konaulwa,+ nabeeba+ kabili bafifishile mu fipe fyabo.+ 12 E ico abena Israele tabakacimfye abalwani babo. Bakafulumuka abalwani babo, pantu bali no konaulwa. Nshakabe na imwe na kabili kano monaule ico mwalingile ukonaula icili mu lukuta lwenu.+ 13 Ima usangulule abantu!+ Ubebe auti, ‘Isangululeni pa kuti mailo mukabe abasanguluka, pantu Yehova Lesa wa kwa Israele alandile ati: “Icilingile ukonaulwa cili mu lukuta lwenu mwe bena Israele. Tamwakacimfye abalwani benu mpaka mukafumye icilingile ukonaulwa mu lukuta lwenu. 14 Mukese ulucelo, umukowa umo umo, kabili umukowa uo Yehova akasala+ e ukapalama, lyena indupwa sha muli uyo mukowa shikaleisa lumo lumo, kabili ulupwa ulo Yehova akasala e lukapalama, kabili amayanda ya muli ulo lupwa yakaleisa imo imo, kabili ing’anda iyo Yehova akasala e ikapalama, e lyo abantu ba muli ayo amayanda bakaleisa umo umo. 15 Kabili uo mukasanga ne cifwile ukonaulwa mukamocele+ pamo na fyonse ifyo akwata, pantu napula mu cipangano+ ca kwa Yehova kabili nacita ica nsoni mu Israele.”’”

16 E ico ubushiku bwakonkelepo Yoshua alicelele ukubuuka kabili apalamike abena Israele, umukowa umo umo, kabili Lesa asalile umukowa wa kwa Yuda. 17 Lyena aebele indupwa sha mu mukowa wa kwa Yuda ukuti shipalame, kabili asalile ulupwa lwa bena Sera,+ e lyo aeba abena Sera ukuti bapalame, umuntu umo umo, kabili Lesa asalile Sabdi. 18 Na pa kulekelesha aebele aba mu ng’anda ya kwa Sabdi ukuti bapalame, umuntu umo umo, kabili Akani umwana wa kwa Karmi, umwana wa kwa Sabdi, umwana wa kwa Sera, uwa mu mukowa wa kwa Yuda, e o Lesa asalile.+ 19 Lyena Yoshua aebele Akani ati: “Mwana wandi, cindika Yehova Lesa wa kwa Israele kabili sokolola ulubembu ucitile kuli ena. Shi njeba ifyo ucitile. Wimfisa.”

20 Akani ayaswike Yoshua ati: “Ukulanda fye icishinka, nine nabembukiile Yehova Lesa wa kwa Israele, kabili ifi e fyo nacitile. 21 Ilyo namwene ica kufwala caibela ica ku Shinari+ icalemoneka bwino pa fintu ifyo twapokele, na mashekele* 200 aya silfere ne cipimfya ca golde icafina amashekele 50, nalifikumbilwe, e ico nalifisendele. Fili mwi tenti lyandi e mo nafishiika, kabili indalama shili panshi ya ca kufwala.”

22 Ilyo line fye Yoshua atumine abantu bamo kabili babutukiile kwi tenti, kabili bailesanga alifisa ica kufwala mwi tenti lyakwe ne ndalama shali panshi ya ca kufwala. 23 E ico balififumishe mwi tenti no kufitwala kuli Yoshua na bena Israele bonse, kabili bafibikile pa cinso ca kwa Yehova. 24 Lyena Yoshua pamo na bena Israele bonse basendele Akani+ umwana wa kwa Sera, na silfere ne ca kufwala caibela, icipimfya ca golde,+ kumo na bana bakwe abaume na bana bakwe abanakashi, kabili babatwele mu Mupokapoka* wa Akore,+ pamo ne ng’ombe, impunda ne mpaanga shakwe na fyonse ifyo akwete. 25 E lyo Yoshua atile: “Mulandu nshi watuletela amafya?+ Yehova alekonaula lelo.” Awe abena Israele bonse bamupoolele amabwe+ pamo no lupwa lwakwe, e lyo baboca.+ E fyo babapoolele amabwe pa kubepaya. 26 Kabili batuulike umwina wa mabwe uukalamba pali ena, kabili e po waba ukufika na lelo. Lyena ubukali bwa kwa Yehova bwalicepeleko.+ E co betila ilya ncende ukuti Umupokapoka wa Akore* ukufika na lelo.

8 Lyena Yehova aebele Yoshua ati: “Witiina kabili witutuma.+ Senda abashilika bonse muyelwisha abena Ai. Mona, nimupeela imfumu ya ku Ai, abantu ba iko, umusumba wa iko ne calo ca iko.+ 2 Muyeonaula umusumba wa Ai ne mfumu+ ya uko nga filya mwaonawile umusumba wa Yeriko ne mfumu ya uko. Lelo mu musumba wa Ai mwena kuti mwasendamo ifintu ne fitekwa. Muyebika aba kubelamina aba mu musumba ku numa ya uko.”

3 E ico Yoshua na bashilika bonse balimine baya ku Ai. Yoshua asalile abashilika aba maka 30,000, kabili abatumine ubushiku. 4 Abebele ati: “Umfweni, muyebelamina aba mu musumba ku numa ya uko. Mwiyataluka sana ku musumba, kabili bonse mube abaiteyanya. 5 Ine pamo na bashilika bonse abo ndi nabo tukapalama ku musumba. Nomba nga baisa mu kutulwisha nga filya bacitile pa kubala,+ tukafulumuka. 6 Nga bafuma pa kuti batusanse, tukafulumuka pa kuti tukabatalushe ku musumba, pantu bakatila, ‘Bafulumuka na kabili.’+ Kabili tukafulumuka. 7 Lyena mulingile ukufuma apo mukabelama kabili mukapoke umusumba; Yehova Lesa wenu akamupeela uyu musumba. 8 Nga mwapoka fye umusumba, mufwile ukuoca.+ Mulingile ukucita filya fine Yehova alandile. Ifi fine namweba e fyo mukacite.”

9 Lyena Yoshua alibatumine kabili baile uko balingile ukubelamina abena Ai; bailebelama pa kati ka Betele na Ai ku masamba ya Ai, lelo Yoshua ena ashele na bashilika bambi ubushiku bonse.

10 Ilyo Yoshua abuukile lucelocelo alonganika na bashilika, ena pamo na bakalamba ba mu Israele, batungulwile abashilika ku Ai. 11 Abashilika bonse+ abo ali nabo balimine balaya, balungama pa ntanshi ya musumba. Bapangile inkambi ku kapinda ka ku kuso aka Ai, kabili umupokapoka wali pa kati ka nkambi yabo na Ai. 12 Kabili abuulilepo abashilika nalimo 5,000 kabili abebele ukubelama+ pa kati ka Betele+ na Ai, ku masamba ya Ai. 13 E ico abashilika bapangile inkambi iikalamba ku kapinda ka ku kuso aka musumba.+ Abashilika ababelamine abena Ai bena bali ku masamba ya musumba,+ kabili Yoshua aile mu mupokapoka* ubushiku.

14 Ilyo fye imfumu ya Ai yamwene ifi, lucelocelo yena na baume ba mu musumba balyangufyenye ukufuma pa kuti bayelwisha abena Israele, pa ncende imo iyalungatana ne ciswebebe. Lelo iyi mfumu tayaishibe ukuti kwali abaibelamine ku numa ya musumba. 15 Ilyo abaume abena Ai basanshile Yoshua na bena Israele, Yoshua na bantu abo ali nabo bafulumukile mu nshila ya ku matololo.+ 16 Lyena abantu bonse abali mu musumba balibetile pa kuti babakonke; kabili ilyo balekonka Yoshua, baleya baletaluka ku musumba. 17 Mu Ai na mu Betele tamwali umwaume nangu umo uushaile mu kulwisha abena Israele. Bashile umusumba ukwabula nangu umo uwa ku-ucingilila, bonse bapepeke abena Israele.

18 Nomba Yehova aebele Yoshua ati: “Sonta ifumo ilili mu minwe yobe ku Ai,+ pantu ndepeela uyu musumba mu minwe yobe.”+ E ico Yoshua asontele ifumo lyakwe kuli uyu musumba. 19 Ilyo fye asontele ifumo ku musumba, abashilika ababeleme balisokolweke babutukila na mu musumba baupoka no ku-upoka. Ilyo baupokele fye baliocele no kuoca.+

20 Ilyo abaume ba mu Ai baloleshe ku numa, bamwene icushi mu musumba cilefutumuka cileya mu muulu, kabili tabakwete kwa kufulumukila. Lyena abena Israele abalefulumukila ku matololo bayalukiile abalebapepeka. 21 Ilyo Yoshua na bena Israele bonse bamwene ukuti ababeleme nabapoka umusumba, kabili icushi cilefutumuka mu musumba, balipilibwike basansa na bena Ai. 22 Kabili abashilika bambi bafumine mu musumba pa kuti babasanse, ica kuti abena Ai baishileba pa kati ka bena Israele, bamo uku lubali, bambi ku lubali lumbi, kabili balibepeye ica kuti takwali nangu umo uwapuswike nelyo uwafulumwike.+ 23 Lelo imfumu ya Ai+ yena baikete fye baitwala na kuli Yoshua.

24 Ilyo abena Israele bapwishishe ukwipaya bonse abaleikala mu Ai ababakonkele mu matololo, kabili ilyo baipeye fye bonse ku lupanga, abena Israele bonse babwelele ku Ai kabili baipeye abashele mu musumba ku lupanga. 25 Bonse abafwile pali bulya bushiku, abaume na banakashi bali 12,000, abena Ai bonse. 26 Yoshua tabweseshe ukuboko kwakwe uko aikatiile ifumo+ ilyo asonteeleko umusumba wa Ai mpaka aipaya bonse abaleikala mu musumba.+ 27 Lelo abena Israele balisendele ifitekwa ne fintu fimbi ifyali mu musumba, nga fintu Yehova aebele Yoshua.+

28 Lyena Yoshua aocele umusumba wa Ai kabili washele fye umupili+ nge fi fine waba ukufika na lelo. 29 Yoshua akulike imfumu ya Ai pa cimuti ukufika icungulo, kabili ilyo akasuba kali mupepi no kuwa, Yoshua aebele abantu ukuti bekishe icitumbi ca iko pa cimuti.+ Lyena bacipoosele pa mpongolo ya musumba batuulikapo na mabwe ica kuti yapanga no mwina uukalamba, kabili uyu mwina e po waba ukushinta na lelo.

30 Pa numa Yoshua akuuliile Yehova Lesa wa kwa Israele iciipailo pa Lupili lwa Ebali,+ 31 nga filya fine Mose umubomfi wa kwa Yehova aebele abena Israele, kabili nga filya fine calembwa mwi buuku lya Mafunde+ ya kwa Mose ukuti: “Ukapange iciipailo ca mabwe ayatuntulu, ayo bashaputula ne cela.”+ Pali ici ciipailo batuulilepo Yehova imituulo ya koca na malambo ya mutende.+

32 Lyena alembele pa mabwe Amafunde+ ayo Mose alembele pa menso ya bena Israele.+ 33 Abena Israele bonse, e kutila abakalamba babo, bacilolo na bakapingula babo baiminine ku mbali shibili isha Cipao pa ntanshi ya bashimapepo abena Lebi, abalesenda icipao ca cipangano ca kwa Yehova. Abalebeshi nabo e po bali kumo na bena Israele.+ Ba-akanikene pabili, bamo baiminine pa ntanshi ya Lupili lwa Gerisimu e lyo bambi baiminine pa ntanshi ya Lupili lwa Ebali+ (nga filya fine Mose umubomfi wa kwa Yehova abebele kale),+ pa kuti abena Israele babapaale. 34 Pa numa abelengeele abantu amashiwi yonse ayali mu Mafunde,+ amapaalo+ ne fitiipu,+ ukulingana na fyonse ifyalembelwe mwi buuku lya Mafunde. 35 Pa mashiwi yonse ayo Mose alandile, tapali nangu limo ilyo Yoshua ashabelengeele ulukuta lwa bena Israele lonse,+ kumo na banakashi na bana na balebeshi+ abo baleikala nabo.*+

9 Ilyo imfumu sha bena Hiti, isha bena Amore, isha bena Kanaani, isha bena Perisi, isha bena Hibi ne sha bena Yebusi+ ishali ku masamba ya Yordani,+ mu citungu ca mpili, mu Shefela, mu lulamba lonse ulwa Bemba Mukalamba,*+ ne shaleikala pa ntanshi ya Lebanone shaumfwile ifyacitike, 2 shaumene akapi pa kuti shiyelwa na Yoshua na bena Israele.+

3 Abaleikala mu Gibeone+ nabo balyumfwile ifyo Yoshua acimfishe Yeriko+ na Ai.+ 4 E ico balibomfeshe amano, kabili balongele ifya kulya mu mifuko iyalepauka no kufisendela pa mpunda. Basendele ne nyambi ishaonaika ishali ishatulika kabili isho bakambike; 5 indyato bafwele nasho shali ishalepauka kabili isha fikamba, bafwele ne fya kufwala fyalepauka. Umukate onse uo basendele wali uwauma kabili uwafungauka. 6 Lyena baile kuli Yoshua pa nkambi ku Gilgali+ kabili baebele ena na bena Israele abati: “Twafuma ku calo ca kutali. Nomba panganeni na ifwe icipangano.” 7 Lelo abena Israele baebele abena Hibi+ abati: “Nalimo mwikala fye mupepi. Inga kuti twapangana shani na imwe icipangano?”+ 8 Ba-aswike Yoshua abati: “Tuli babomfi* benu.”

Lyena Yoshua abepwishe ati: “Nimwe bani, kabili mufumine kwi?” 9 Nabo bamwaswike abati: “Fwe babomfi benu tufumine ku calo ca kutali.+ Ico twishile mulandu we shina lya kwa Yehova Lesa wenu, pantu twalyumfwa ululumbi lwakwe na fyonse ifyo acitile mu Egupti+ 10 ne fyo acimfishe imfumu shibili isha bena Amore ishali kwi shilya* lya Yordani, e kutila Imfumu Sihone+ iya Heshebone ne Mfumu Oge+ iya Bashani, iyaleikala mu Ashitarote. 11 E ico intungulushi shesu na bonse abaikala mu calo cesu batwebele abati, ‘Sendeni ifya kulya fya pa bulendo, mukayemonana nabo. Mukayebeba amuti: “Tukaba ababomfi benu;+ e ico panganeni na ifwe icipangano.”’+ 12 Uyu mukate twasendele pa lwendo wali uwakaba ilyo twafumine ku mayanda. Nomba, moneni nauma kabili naufungauka.+ 13 Kabili ishi inyambi shali ishipya ilyo twabikilemo umwangashi, lelo nomba nashitulika.+ Ifya kufwala fyesu ne ndyato nafyo nafilepauka pa mulandu wa kulepesha kwa bulendo.”

14 E lyo abaume abena Israele babuulilepo ifya kulya fyabo fimo, kabili balificeeceetele, lelo tabaipwishe Yehova+ pa kuti abebe ifya kucita. 15 E ico Yoshua apangene nabo+ icipangano ca mutende kabili alanshenye nabo ukuti takabepaye. Kabili ifi fine e fyo bacilolo ba lukuta balapile kuli bena.+

16 Ilyo papitile inshiku shitatu ukutula apo bapanganine nabo icipangano, abena Israele baumfwile ukuti bali bena mupalamano babo kabili baleikala fye mupepi. 17 Lyena abena Israele balimine kabili bafikile ku misumba ya aba bantu pa bushiku bwalenga shitatu. Imisumba yabo yali ni Gibeone,+ Kefira, Beerote na Kiriati-yearimu.+ 18 Lelo abena Israele tabaipeye abena Gibeone, pantu intungulushi shalapiile umulapo muli Yehova+ Lesa wa kwa Israele. E ico ulukuta lonse lwatendeke ukuilishanya ku ntungulushi. 19 Lyena intungulushi shonse shaebele ulukuta lonse ashiti: “Apo twalapile kuli bena mwi shina lya kwa Yehova Lesa wa kwa Israele, tatulingile ukubasansa iyo. 20 Ifyo twalacita ni fi: Tatwabepaye pa kuti Lesa e tufulilwa pa mulandu wa mulapo uo twalapa kuli bena.”+ 21 Intungulushi shabebele no kuti: “Mwibepaya, lelo bakulateba inkuni no kutapila ulukuta lonse amenshi.” Ifi e fyo intungulushi shalaile abena Gibeone.

22 Nomba Yoshua alibetile kabili abepwishe ati: “Cinshi mwatubepeele ilyo mwatwebele amuti, ‘Tufumine ukutali sana,’ e lyo ninshi mwikala fye mupepi na ifwe?+ 23 Ukutula lelo mwatiipwa,+ kabili mwakulaba abasha. Mwakulateba fye inkuni no kutapa amenshi ya kubomfya pa ng’anda ya kwa Lesa wandi.” 24 Nabo bamwaswike abati: “Ni co fwe babomfi benu balitulondolwelele bwino bwino ukuti Yehova Lesa wenu aebele Mose umubomfi wakwe ukuti akamupeela icalo conse kabili akamulofeshako bonse abekalamo.+ E ico twalitiinine+ ukuti mwalalofya imyeo yesu. E co twacitiile ifi.+ 25 Nomba tuli mu minwe yenu. Ico mulemona ukuti e cisuma kabili e calungama e co mutucite.” 26 Kabili ifi fine e fyo acitile; alibapokolwele mu minwe ya bena Israele, kabili tababepeye. 27 Lelo pali bulya bushiku Yoshua abapeele umulimo wa kuteba inkuni no kutapa amenshi ya lukuta+ na ya pa ciipailo ca kwa Yehova, icikaba pa cifulo ico Lesa akasala.+ Kabili uyu e mulimo babomba ukufika na lelo.+

10 Ilyo Adoni-sedeke imfumu ya Yerusalemu aumfwile fye ukuti Yoshua napoka umusumba wa Ai kabili naonaula, no kuti filya acimfishe umusumba wa Yeriko ne mfumu ya uko,+ e fyo acimfishe no musumba wa Ai ne mfumu ya uko,+ no kuti abekala mu Gibeone balipangile icipangano ca mutende kabili abena Israele+ balibalekele balaikala nabo, 2 alitiinine nga nshi,+ pantu Gibeone wali musumba uukalamba. Wakulile kwati musumba uwaletekwa ne mfumu. Walikulile ukucila umusumba wa Ai,+ kabili abaume bonse muli uyu musumba bali bashilika. 3 E ico Adoni-sedeke imfumu ya Yerusalemu atumine amashiwi kuli Hohamu imfumu ya Hebrone,+ kuli Piramu imfumu ya Yarimuti, kuli Yafia imfumu ya Lakishi na kuli Debiri imfumu ya Egelone ati:+ 4 “Iseni kuno mungafwe, pa kuti tuyesansa Gibeone, pantu napangana icipangano ca mutende na Yoshua na bena Israele.”+ 5 E ico imfumu 5 isha bena Amore,+ e kutila imfumu ya Yerusalemu, imfumu ya Hebrone, imfumu ya Yarimuti, imfumu ya Lakishi, imfumu ya Egelone, shalongene pamo na bashilika ba shiko bonse, lyena shaile mu kulwisha abena Gibeone kabili shalibashingile.

6 Lyena abaume ba ku Gibeone batumiine Yoshua amashiwi ku nkambi ku Gilgali+ abati: “Mwilekelesha* fwe basha+ benu. Iseni bwangu, mutupusushe kabili mutwafwe! Imfumu shonse isha bena Amore ishikala mu citungu ca mpili nashitushinga.” 7 E ico Yoshua afumine ku Gilgali aya pamo na bashilika bonse e lyo na baume bonse aba maka.+

8 Lyena Yehova aebele Yoshua ati: “Wibatiina,+ pantu nimbapeela mu minwe yobe.+ Tapali nangu umo pali bena uuleyakucimfya.”+ 9 Yoshua aendele ubushiku bonse ukufuma ku Gilgali, kabili aile basansa mu kupumikisha. 10 Yehova afulungenye abena Amore ilyo bamwene abena Israele,+ kabili abo baipaile pa Gibeone bali abengi nga nshi. Balibafulumwine ukulola ku Bete-horone iyaba pa lupili kabili baile balebepaya ukufika fye na ku Aseka na ku Makeda. 11 Ilyo balefulumuka abena Israele kabili ilyo baletentemuka Bete-horone, Yehova aloseshe imfula ya mabwe ayakalamba kabili yaile ilebaloka fye mpaka bafika ku Aseka kabili balifwile. Na kuba, abafwile ku mfula ya mabwe bali abengi ukucila abo abena Israele baipeye ku lupanga.

12 Pa bushiku Yehova apeele abena Amore mu minwe ya bena Israele, e po Yoshua alandiile na Yehova pa menso ya bena Israele ati:

13 E ico akasuba kaiminine shilili, umweshi na o waiminine shilili, mpaka uluko lwalandula abalwani ba luko. Bushe tafyalembwa mwi buuku lya kwa Yashari?+ Akasuba kaiminine shilili pa kati ka muulu kabili takawile bwangu nalimo pa bushiku bumo ubutuntulu. 14 Takwatalile akuba ubushiku ubwali ngo bu, kabili ukutula lilya takwatala akuba na bumbi, ilyo Yehova akutike ku muntu,+ pantu Yehova e walelwila abena Israele.+

15 Lyena Yoshua na bena Israele bonse babwelele ku nkambi ku Gilgali.+

16 Pali iyi nshita ninshi shilya imfumu 5 nashifulumuka nashiyabelama mu lucengo mu Makeda.+ 17 Lyena abantu baebele Yoshua abati: “Shilya imfumu 5 shibeleme mu lucengo mu Makeda.”+ 18 E ico Yoshua abebele ati: “Kakunkulushisheni amabwe ayakalamba pa mwinshi wa lucengo kabili mubikepo abaume ba kulonda. 19 Lelo mwe bashala tamulingile ukwiminina, mutwalilile fye ukukonka abalwani benu, kabili mubasanshile ku numa.+ Mwibaleka bengile mu misumba yabo, pantu Yehova Lesa wenu nabapeela mu minwe yenu.”

20 Yoshua na bena Israele balipeye abantu abengi nga nshi, nicikanga balofye bonse, kwapuswike fye abanono abafulumukiile mu misumba ya malinga. 21 Pa numa abantu bonse babwelele kuli Yoshua ku nkambi ku Makeda, mu mutende. Takwali nangu umo uwalepontela abena Israele. 22 Lyena Yoshua atile: “Isuleni ulucengo mufumye isho imfumu 5 ishilimo kabili mushilete kuno.” 23 E ico balishifumishe mu lucengo bashitwala na kuli ena. Bafumishe imfumu ya Yerusalemu, imfumu ya Hebrone, imfumu ya Yarimuti, imfumu ya Lakishi ne mfumu ya Egelone.+ 24 Ilyo batwele ishi mfumu kuli Yoshua, aitile abaume bonse aba mu Israele kabili aebele abakalamba ba bashilika abaile nankwe mu kulwa ati: “Palameni. Nyanteni pa numa ya mikoshi ya ishi mfumu.” E ico balipaleme kabili banyantile pa numa ya mikoshi ya shiko.+ 25 Lyena Yoshua abebele ati: “Mwitiina kabili mwitutuma.+ Shipeni kabili koseni, pantu ifi e fyo Yehova akacita abalwani benu bonse abo mukalwa nabo.”+

26 E lyo Yoshua ashipeye, ashikulika na pa fimuti 5, kabili shali pa fimuti mpaka icungulo. 27 Ilyo akasuba kawile Yoshua aebele bamo ukuti bayeikisha imfumu pa fimuti,+ kabili bayeshipoosa mu lucengo umo shabeleme. Lyena babikile amabwe ayakalamba pa mwinshi wa lucengo kabili e po yaba ukufika na lelo.

28 Pali bulya bushiku Yoshua apokele umusumba wa Makeda+ kabili alipeye bonse abaleikalamo ku lupanga. Alipeye ne mfumu ya uko, pamo na bantu bonse* abalimo ica kuti takwali nangu umo uwapuswike.+ Aipeye imfumu ya Makeda+ nga filya fine aipeye imfumu ya Yeriko.

29 Lyena Yoshua na bashilika bonse abena Israele bafumine ku Makeda baya ku Libna kabili balwile na bena Libna.+ 30 Na kabili Yehova apeele umusumba wa Libna ne mfumu ya uko+ mu minwe ya kwa Israele, kabili balyonawile uyu musumba kabili balipeye na bonse* abalimo ku lupanga ica kuti takwali nangu umo uwapuswike. E ico baipeye imfumu ya uko nga filya fine baipeye imfumu ya Yeriko.+

31 Lyena Yoshua na bashilika bonse abena Israele bafumine ku Libna baya ku Lakishi+ kabili e ko bapangile nkambi kabili balwile na bena Lakishi. 32 Yehova apeele umusumba wa Lakishi mu minwe ya kwa Israele kabili baupokele pa bushiku bwalenga shibili. Balipeye bonse* abaleikala muli uyu musumba ku lupanga,+ nga filya fine baonawile umusumba wa Libna.

33 Lyena Horamu imfumu ya Gesere+ aile mu kwafwa abena Lakishi, lelo Yoshua aipeye iyi imfumu pamo na bantu ba iko ica kuti takwali nangu umo uwapuswike.

34 Lyena Yoshua na bashilika bonse abena Israele bafumine ku Lakishi baya ku musumba wa Egelone,+ e ko bapangile nkambi kabili balwile na baleikalamo. 35 Balipokele umusumba wa Egelone pali bulya bushiku kabili balipeye bonse abalimo ku lupanga. Pali bulya bushiku balipeye bonse* abali mu musumba nga filya fine baipeye abali mu musumba wa Lakishi.+

36 Lyena Yoshua na bashilika bonse abena Israele bafumine ku Egelone baya ku Hebrone,+ kabili balwile na baleikala muli uyu musumba. 37 Balipokele umusumba wa Hebrone kabili baipeye abantu abaleikalamo, imfumu ya uko, abaleikala mu misumba ya uko yonse iinono kabili baipeye bonse* abali muli uyu musumba ku lupanga, kabili takwali nangu umo uwapuswike. Filya fine aipeye abaleikala mu Egelone e fyo aipeye na bonse* abaleikala mu Hebrone.

38 Na pa kulekelesha, Yoshua na bashilika bonse abena Israele baile ku musumba wa Debiri,+ kabili balwile na baleikala muli uyu musumba. 39 Alipokele uyu musumba, kabili alipeye imfumu ya uko na bonse*+ abaleikala mu misumba ya uko yonse iinono ku lupanga kabili takwali uwapuswike.+ Nga filya fine aipeye abaleikala mu musumba wa Hebrone no wa Libna ne mfumu yabo, e fyo aipeye na baleikala mu musumba wa Debiri ne mfumu yabo.

40 Yoshua alicimfishe bonse abaleikala mu citungu ca mpili, mu Negebu, mu Shefela+ na mu mitentemuko ne mfumu shabo shonse, ica kuti takwali nangu umo uwapuswike. Alipeye abantu bonse,+ nga filya fine Yehova Lesa wa kwa Israele amwebele.+ 41 Yoshua alicimfishe bonse ukufuma ku Kadeshe-barnea+ ukufika ku Gasa+ na ba mu calo conse ica Goshene+ ukuyafika fye na ku Gibeone.+ 42 Yoshua acimfishe ishi mfumu shonse ne calo ca shiko mu nshita imo ine, pantu ni Yehova Lesa wa kwa Israele alelwilako Israele.+ 43 Lyena Yoshua na bashilika bonse abena Israele babwelele ku nkambi ku Gilgali.+

11 Ilyo fye Yabini imfumu ya Hasore yaumfwile ifyacitike, atumine amashiwi kuli Yobabu imfumu ya Madone,+ ku mfumu ya Shimrone na ku mfumu ya Akishafi,+ 2 ku mfumu shali mu citungu ca mpili ku kapinda ka ku kuso, ku shali mu malungu* ku kapinda ka ku kulyo aka Kinerete, ku shali mu Shefela na mu mutentemuko wa Dore+ ku masamba, 3 ku bena Kanaani+ ku kabanga na ku masamba, ku bena Amore,+ ku bena Hiti, ku bena Perisi, ku bena Yebusi mu citungu ca mpili na ku bena Hibi+ mwi samba lya Lupili lwa Hermone+ mu calo ca Mispa. 4 E ico balimine na bashilika babo bonse abengi kwati mucanga wa ku lulamba lwa bemba, kabili bali na bakabalwe abengi na maceleta ya nkondo. 5 Imfumu shonse ishi shalipangene ukukumana, kabili shailepanga inkambi mupepi no tumilonga twa Meromu pa kuti shilwe na bena Israele.

6 E ico Yehova aebele Yoshua ati: “Wibatiina,+ pantu mailo nga ino ine nshita nkalenga abena Israele bakepaye aba bantu. Mufwile ukulemanika bakabalwe babo,+ kabili mulingile ukoca amaceleta yabo.” 7 Lyena Yoshua na bashilika bonse basanshile abalwani babo mu kupumikisha mupepi no tumilonga twa Meromu. 8 Yehova abapeele mu minwe ya bena Israele,+ balibacimfishe kabili balibafulumwine ukuyafika ku Sidone+ ukwaleikala abantu abengi na ku Misirefotemaimu+ ukuyafika fye na ku Mupokapoka wa Mispa ku kabanga, kabili batwalilile ukubepaya ica kuti takwali nangu umo uwapuswike.+ 9 Lyena Yoshua acitile ifyo Yehova amwebele; alemanike bakabalwe babo kabili alyocele na maceleta yabo.+

10 Na kabili Yoshua alibwelele no kupoka umusumba wa Hasore kabili alipeye imfumu ya uko ku lupanga,+ pantu kale Hasore e wali umusumba uukalamba uwa mabufumu yonse yalya. 11 Baipeye abantu bonse* ku lupanga.+ Takwali umuntu nangu umo uwapuswike.+ Lyena aocele umusumba wa Hasore. 12 Yoshua alipokele imisumba yonse iya ishi mfumu kabili acimfiishe mfumu sha iko shonse ku lupanga.+ Aipeye abantu bonse,+ nga filya fine Mose umubomfi wa kwa Yehova amwebele. 13 Lelo abena Israele tabaocele imisumba yonse iyali pa tupili, kano fye umusumba wa Hasore e o Yoshua aocele. 14 Abena Israele balisendele ifintu fyonse ne fitekwa ifyali muli iyi imisumba.+ Lelo balipeye abantu bonse ku lupanga mpaka balofya bonse.+ Tabashilepo nangu umo.+ 15 Ifyo Yehova aebele Mose umubomfi wakwe, e fyo Mose na o aebele Yoshua,+ kabili e fyo Yoshua acitile. Takwali ico ashacitile pali fyonse ifyo Yehova aebele Mose.+

16 Yoshua acimfishe ici calo conse, icitungu ca mpili, Negebu+ yonse, icalo conse ica Goshene, Shefela,+ Araba+ ne citungu ca mpili ica bena Israele ne ncende ya ciko iya tupili iya Shefela, 17 ukufuma ku Lupili lwa Halaki, ulwafika ku Seiri, ukufika na ku Baali-gadi+ mu Mupokapoka wa Lebanone mwi samba lya Lupili lwa Hermone,+ kabili aikete imfumu shabo shonse no kushipaya. 18 Yoshua alwile inkondo ne shi imfumu shonse pa nshiku ishingi. 19 Takwali umusumba nangu umo uwapangene icipangano ca mutende na bena Israele kano fye abena Hibi abaleikala mu Gibeone.+ Pa kucimfya imisumba yonse iyashala, abena Israele balwile inkondo.+ 20 Yehova e walengele ukuti batalame+ ica kuti balwile na Israele pa kuti abalofye ukwabula ukubomfwila uluse.+ Balingile ukuloba nga filya fine Yehova aebele Mose.+

21 Pali ilya nshita Yoshua alilofeshe abena Anaki+ abaleikala mu citungu ca mpili, mu Hebrone, mu Debiri, mu Anabu na mu citungu ca mpili conse ica Yuda ne ca Israele. Yoshua abonawilile pamo ne misumba yabo.+ 22 Takwali umwina Anaki uwashele+ mu calo ca bena Israele. Abena Anaki bashele fye mu Gasa,+ mu Gati+ na mu Ashdode.+ 23 E ico Yoshua apokele icalo conse, nga filya fine Yehova alaile Mose.+ Lyena Yoshua ayakenye abena Israele ici calo mu mikowa+ pa kuti cibe cabo. Kabili mu calo mwali umutende, tamwali inkondo.+

12 Nomba ishi e mfumu isho abena Israele bacimfishe kabili isho bapokele ifyalo fya shiko ku kabanga ka Yordani, ukutendekela pa Mupokapoka wa Arnone+ ukuyafika na ku Lupili lwa Hermone+ ne ncende yonse iya ku kabanga ka Araba:+ 2 Imfumu Sihone+ iya bena Amore, iyaleikala mu Heshebone, kabili iyaletekela mu musumba wa Aroere,+ uwali mu mbali ya Mupokapoka wa Arnone,+ kabili incende yonse iyo yaleteka yatendekele pa kati ka mupokapoka, na hafu wa Gileadi ukufika fye na ku Mupokapoka wa Yaboke, uwali umupaka wa bena Amone. 3 Na kabili yaleteka incende ya ku kabanga ka Araba ukuyafika kuli Bemba wa Kinerete*+ ukuyafika fye na kuli Bemba wa Araba, Bemba ya Mucele,* ku kabanga ukulola ku Bete-yeshimote, na ku kapinda ka ku kulyo mu mitentemuko ya Pisga.+

4 Imfumu na imbi iyo bacimfishe ni Oge+ imfumu ya Bashani, uwali pa bena Refaimu+ abashelepo, uwaleikala mu Ashitarote na mu Edrei 5 kabili uwaleteka mu Lupili lwa Hermone, mu Saleka, na mu Bashani+ monse, ukuyafika fye na ku mupaka wa bena Geshuri na bena Maakati,+ na hafu ya Gileadi, ukuyafika ku mupaka wa Mfumu Sihone iya Heshebone.+

6 Mose umubomfi wa kwa Yehova na bena Israele e bashicimfishe.+ Lyena Mose umubomfi wa kwa Yehova apeele abena Rubene, abena Gadi na hafu wa mukowa wa kwa Manase+ icalo pa kuti cibe icalo cabo.

7 Ishi e mfumu isho Yoshua na bena Israele bacimfishe ku masamba ya Yordani, ukutampila ku Baali-gadi+ mu Mupokapoka wa Lebanone+ ukuyafika fye na ku Lupili lwa Halaki,+ ulwafika ku Seiri.+ Pa numa Yoshua ayakenye abena Israele ifyalo fya ishi mfumu ukulingana ne mikowa yabo.+ 8 Pali ifi ifyalo pali icitungu ca mpili, Shefela, Araba, incende ya mitentemuko, amatololo, ne calo ca Negebu,+ umwaleikala abena Hiti, abena Amore,+ abena Kanaani, abena Perisi, abena Hibi na bena Yebusi:+

13 Nomba Yoshua alikotele+ kabili ali mupepi no kufwa. E ico Yehova amwebele ati: “Naukota kabili uli mupepi no kufwa; lelo kucili incende iikalamba nga nshi iya calo iyo mulingile ukupoka.* 2 Incende iisheleko ni iyi:+ ifitungu fyonse ifya baPelishiti ne fya bena Geshuri bonse+ 3 (impanga yatendekela pa mumana wafuma mu Naelo* ku kabanga* ka Egupti ukuyafika ku mupaka wa Ekrone ku kapinda ka ku kuso, iyali mu calo ca bena Kanaani)+ ukubikako ne mpanga ya bakateka 5 aba baPelishiti,+ e kutila impanga ya bena Gasa, iya bena Ashidode,+ iya bena Ashikelone,+ iya bena Giti+ ne ya bena Ekrone;+ ne mpanga ya bena Abi+ 4 ku kapinda ka ku kulyo; icalo conse ica bena Kanaani; icitungu ca Meara ica bena Sidone,+ ukuyafika ku Afeke, ku mupaka wa bena Amore; 5 icalo ca bena Gebali+ na Lebanone yonse lwa ku kabanga, ukufuma ku Baali-gadi mwi samba lya Lupili lwa Hermone ukuyafika ku Lebohamati;*+ 6 abaleikala mu citungu ca mpili bonse, ukufuma ku Lebanone+ ukufika ku Misirefotemaimu;+ na bena Sidone bonse.+ Nkacimfishako abena Israele.+ Iwe umulimo ukakwata fye wa kwakanya abena Israele icalo pa kuti cikabe icalo cabo, nga filya fine nakweba.+ 7 Nomba ufwile ukwakanya imikowa 9 na hafu ya mukowa wa kwa Manase+ ici calo pa kuti cikabe icalo cabo.”

8 Lyena hafu imbi iya mukowa wa kwa Manase, abena Rubene na bena Gadi babuulile impanga iyo Mose abapeele ku kabanga ka Yordani, nga filya fine Mose umubomfi wa kwa Yehova abapeele:+ 9 ukufuma ku musumba wa Aroere,+ uwaba mu mbali ya Mupokapoka wa Arnone,+ no musumba uwaba pa kati ka uyu umupokapoka, ne ncende yonse iyabatama iya Medeba ukufika fye na ku Dibone; 10 ne misumba yonse iya Mfumu Sihone iya bena Amore, iyaleteka mu Heshebone, ukuyafika fye na ku mupaka wa bena Amone;+ 11 na Gileadi ne citungu ca bena Geshuri ne ca bena Maakati+ no Lupili lwa Hermone lonse na Bashani+ yonse ukuyafika fye na ku Saleka;+ 12 no bufumu bonse ubwa kwa Oge mu Bashani, uwaleteka mu Ashitarote na mu Edrei. (Ali pa bena Refaimu abashelepo.)+ Mose alibacimfishe kabili alibapokele icalo.+ 13 Lelo abena Israele tabatamfishe+ abena Geshuri na bena Maakati, pantu abena Geshuri na bena Maakati bekala na bena Israele ukushinta na lelo.

14 Kano fye umukowa wa bena Lebi e o ashayakenyeko impanga.+ Imituulo ya koca iya kwa Yehova Lesa wa kwa Israele e yali ubupyani bwabo,+ nga filya fine Mose abalaile.+

15 Lyena Mose ayakenye abena Rubene impanga ukulingana ne ndupwa shabo, 16 kabili icitungu cabo catendekeele ku musumba wa Aroere, uwaba mu mbali ya Mupokapoka wa Arnone, no musumba uwaba pa kati ka uyu mupokapoka, ne ncende yonse iyabatama iya Medeba; 17 Heshebone ne misumba ya uko yonse iinono+ iyaba apabatama, Dibone, Bamote-baali, Bete-baali-meone,+ 18 Yahasi,+ Kedemote,+ Mefaati,+ 19 Kiriataimu, Sibma,+ Sereteshahari pa lupili mupepi no mupokapoka, 20 Bete-peore, mu mitentemuko ya Pisga+ na Bete-yeshimote,+ 21 imisumba yonse iyaba apabatama no bufumu bonse ubwa Mfumu Sihone iya bena Amore, iyaleteka mu Heshebone.+ Mose acimfishe iyi mfumu+ na bacilolo ba mu Midiani, Ebi, Rekemu, Suri, Huri na Reba.+ Ishi shali ni mfumu ishinono isho Sihone aleteka mu calo cakwe. 22 Balaamu+ umwana wa kwa Beore uwalebuka,+ abena Israele balimwipeye ku lupanga pamo na bantu bambi. 23 Umupaka wa bena Rubene wali ni Yordani; kabili iyi e mpanga ne misumba ne mishi iyo abena Rubene babapeele ukulingana ne ndupwa shabo.

24 Na kabili Mose apeele umukowa wa bena Gadi impanga, ukulingana ne ndupwa shabo, 25 kabili impanga abapeele ni Yasere+ ne misumba yonse iya mu Gileadi na hafu ya calo ca bena Amone+ ukuyafika fye na ku musumba wa Aroere, uwalungatana na Raba;+ 26 kabili ukufuma ku Heshebone+ ukuyafika ku Ramati-mispe na ku Betonimu, kabili ukufuma ku Mahanaimu+ ukuyafika ku mupaka wa Debiri; 27 kabili mu mupokapoka mwali,* Bete-haramu, Bete-nimra,+ Sukote+ na Safone. Iyi e mpanga ya bufumu bwa kwa Sihone imfumu ya Heshebone,+ kabili umupaka wafumine ku kabanga ka Yordani ukuyafika pa mpela ya Bemba ya Kinerete.*+ 28 Iyi e mpanga ne misumba ne mishi iyo abena Gadi babapeele ukulingana ne ndupwa shabo.

29 Na kabili Mose apeele hafu ya mukowa wa kwa Manase impanga ukulingana ne ndupwa shabo.+ 30 Kabili impanga yabo yali ni Mahanaimu+ ukubikako na Bashani yonse, iyali ubufumu bonse ubwa kwa Oge imfumu ya Bashani, ne mishi ya matenti yonse iya kwa Yairi+ iya mu Bashani, imisumba iinono yonse pamo yali 60. 31 Kabili hafu ya Gileadi, na Ashitarote na Edrei,+ imisumba ya bufumu bwa kwa Oge mu Bashani, eyo bapeele abena Makiri+ umwana wa kwa Manase, e kutila hafu ya bena Makiri ukulingana ne ndupwa shabo.

32 Iyi e mpanga Mose abapeele pa kuti ibe yabo, mu ciswebebe ca Moabu kwi shilya lya Yordani, ku kabanga ka Yeriko.+

33 Lelo abena Lebi bena, Mose tabakenyeko impanga.+ Yehova Lesa wa kwa Israele e bupyani bwabo, ukulingana ne fyo Mose abalaile.+

14 Nomba iyi e mpanga iyo Eleasari shimapepo na Yoshua umwana wa kwa Nuni ne ntungulushi sha mikowa ya bena Israele bapeele abena Israele+ mu calo ca Kanaani. 2 Pa kwakanya imikowa 9 na hafu impanga,+ balipendwile,+ nga filya fine Yehova alandile ukupitila muli Mose. 3 Mose ayakenye imikowa imbi ibili na hafu impanga kwi shilya* lya Yordani,+ lelo abena Lebi bena tabapeeleko impanga.+ 4 Abatuntwike muli Yosefe balebapenda ukuti bali imikowa ibili,+ umukowa wa kwa Manase no wa kwa Efraimu;+ ifyo iyi mikowa yapeele fye abena Lebi misumba+ ya kwikalamo ne mpanga ya mulemfwe wa fitekwa fyabo ne ya kusungilapo ifintu fyabo.+ 5 E ico abena Israele bayakenye icalo nga filya fine Yehova aebele Mose.

6 Lyena abaume bamo aba mu mukowa wa kwa Yuda baile kuli Yoshua mu Gilgali,+ kabili Kalebu+ umwana wa kwa Yefune umwina Kenisi amwebele ati: “Walishiba bwino ifyo Yehova aebele+ Mose umuntu wa kwa Lesa wa cine+ pali ine na pali iwe ilyo twali ku Kadeshe-barnea.+ 7 Nali ne myaka 40 ilyo Mose umubomfi wa kwa Yehova antumine ukufuma ku Kadeshe-barnea pa kuti njelengula icalo,+ kabili ilyo nabwelele namwebele ifyo namwene kabili ifya cine.*+ 8 Nangu ca kuti bamunyinane abo naile nabo balisakamike* abantu, ine nalyumfwilile Yehova Lesa wandi no mutima wandi onse.+ 9 Pali bulya bushiku Mose alapile ati: ‘Icalo ico wailenyantamo amakasa cikaba cobe na bana bobe umuyayaya, pantu ulomfwila Yehova Lesa wandi no mutima obe onse.’+ 10 Nomba nga filya fine andaile,+ Yehova alinsunga uwa mweo+ pali iyi imyaka 45 ukutula apo Yehova alaile Mose ifi, ilyo abena Israele baendawike mu matololo;+ na nomba ncili uwa mweo, ndi ne myaka 85. 11 Kabili ncili uwakosa nge fyo nali pa bushiku Mose antumine. Ifyo nali na maka ya kulwa inkondo na ya kubomba imilimo imbi pali ilya nshita, e fyo ndi na maka na pali ino ine nshita. 12 E ico mpeela ici icitungu ca mpili ico Yehova andaile pali bulya bushiku. Nangu ca kuti pali bulya bushiku walyumfwile ukuti kwaleikala abena Anaki+ kabili imisumba yabo yali iikalamba iya malinga ayakosa,+ ukwabula no kutwishika* Yehova akaba na ine,+ kabili nkabacimfya,* nga filya fine Yehova andaile.”+

13 E ico Yoshua alipaalile Kalebu umwana wa kwa Yefune kabili amupeele umusumba wa Hebrone pa kuti ube umusumba wakwe.+ 14 E mulandu wine umusumba wa Hebrone wabela musumba wa kwa Kalebu umwana wa kwa Yefune umwina Kenisi ukufika na lelo, pantu alyumfwilile Yehova Lesa wa kwa Israele no mutima wakwe onse.+ 15 Umusumba wa Hebrone kale balewita ukuti Kiriati-arba+ (Arba ali muntu uwacindama ukucila abena Anaki bonse). Kabili mu calo tamwali inkondo.+

15 Impanga iyo bapeele*+ umukowa wa kwa Yuda iya kwakanya indupwa sha uko yafikile ku mupaka wa Edomu,+ ku matololo ya Sini, ukuyafika fye na ku mpela ya kapinda ka ku kulyo aka Negebu. 2 Umupaka wabo uwa ku kapinda ka ku kulyo wafumine ku mpela ya Bemba ya Mucele,*+ apo bemba yashokela apaloshanya na kapinda ka ku kulyo. 3 Kabili wailepita ku kapinda ka ku kulyo ku nshila iyaya pa muulu iya Akrabimu,+ wapitile ku Sini, e lyo wayapita ku kapinda ka ku kulyo wayafika ku Kadeshe-barnea,+ wapitile ku Hesrone ukuyafika ku Adari, e lyo washoka waya ku Karka. 4 Lyena wailepita ku Asmone+ ukuyafika fye na ku Mupokapoka wa Egupti,+ kabili umupaka wapelele pali Bemba.* Uyu e wali umupaka wabo uwa ku kapinda ka ku kulyo.

5 Umupaka wa ku kabanga wali ni Bemba ya Mucele* ukuyafika pa mpela ya Yordani, kabili umupaka wa pa koona ya ku kapinda ka ku kuso watampiile apo bemba yashokela, apapelela Yordani.+ 6 Umupaka wailepita ku Bete-hogla+ kabili wapitile ku kapinda ka ku kuso aka Bete-araba,+ wayafika ku libwe lya kwa Bohani,+ umwana wa kwa Rubene. 7 Uyu umupaka wailepita ku Debiri mu Mupokapoka wa Akore+ kabili walolele ku kapinda ka ku kuso ku Gilgali,+ iyalungatana ne nshila yaya pa muulu iya Adumimu, ku kapinda ka ku kulyo aka mupokapoka, kabili wapitile pa tumfukumfuku twa Ene-shemeshe,+ kabili wapelelele pa Ene-rogele.+ 8 Umupaka wailefika ku Mupokapoka wa Mwana wa kwa Hinomu+ ku mutentemuko wa musumba wa bena Yebusi+ ku kapinda ka ku kulyo, e kutila ku Yerusalemu,+ kabili wailefika pa muulu wa lupili ulwalungatana no Mupokapoka wa Hinomu ku masamba, ulwaba ku mpela ya Mupokapoka wa Refaimu ku kapinda ka ku kuso. 9 Kabili umupaka watendekele pa muulu wa lupili wayafika ku kamfukumfuku ka Nefitoa,+ kabili wailefika ku misumba iyali mu Lupili lwa Efrone; kabili wailefika ku Baala, e kutila Kiriati-yearimu.+ 10 Umupaka walishingulwike ukufuma ku masamba ya Baala ukuya ku Lupili lwa Seiri, kabili wapitile mu mutentemuko wa Lupili lwa Yearimu ku kapinda ka ku kuso, e kutila Kesalone, kabili waile ku Bete-shemeshe+ e lyo waya ku Timuna.+ 11 Kabili umupaka wailefika ku mutentemuko wa Ekrone+ ku kapinda ka ku kuso, kabili wailefika ku Shikerone e lyo wapita pa Lupili lwa Baala wayafika ku Yabineele, e lyo wapelela pali bemba.

12 Umupaka wa ku masamba watampiile mu lulamba lwa Bemba Mukalamba.*+ Uyu e wali umupaka uwashingulwike impanga ya batuntwike muli Yuda ukulingana ne ndupwa shabo.

13 Kabili apeele Kalebu+ umwana wa kwa Yefune impanga imo pa mpanga ayakenye abatuntwike muli Yuda nga filya fine Yehova aebele Yoshua. Amupeele umusumba wa Kiriati-arba (Arba ali e wishi wa kwa Anaki), e kutila umusumba wa Hebrone.+ 14 E ico Kalebu atamfishemo abana ba kwa Anaki+ batatu, e kutila Sheshai, Ahimani na Talmai,+ abatuntwike muli Anaki. 15 Lyena ailesansa abaleikala mu Debiri.+ (Debiri kale baleita ukuti Kiriati-sefere.) 16 Lyena Kalebu atile: “Uukacimfya umusumba wa Kiriati-sefere no ku-upoka, nkamupeela Aksa, umwana wandi umwanakashi pa kuti akabe umukashi wakwe.” 17 Oteniele+ umwana wa kwa Kenasi,+ munyina Kalebu, ailepoka uyu musumba. E ico Kalebu amupeele Aksa+ umwana wakwe umwanakashi pa kuti abe umukashi wakwe. 18 Nomba ilyo Aksa aleya ku ng’anda, aebele umulume wakwe ukuti alombe impanga kuli Kalebu wishi. Lyena Aksa alikiile pa mpunda.* Kalebu amwipwishe ati: “Cinshi ulefwaya?”+ 19 Aksa aebele wishi ati: “Ndefwaya mumpaale, pantu namumpeela impanga ku kapinda ka ku kulyo;* ndefwaya mumpeele ne mpanga ya Gulote-maimu.”* E ico amupeele Gulote yabela pa muulu na Gulote yabela pe samba.

20 Iyi e mpanga bapeele aba mu mukowa wa kwa Yuda ukulingana ne ndupwa shabo.

21 Imisumba ya mukowa wa kwa Yuda iyali mupepi no mupaka wa Edomu+ ku kapinda ka ku kulyo yali ni: Kabseele, Edere, Yaguri, 22 Kina, Dimona, Adada, 23 Kedeshe, Hasore, Itinani, 24 Sifi, Telemu, Bealote, 25 Hasore-hadata, Keriote-heserone, e kutila, Hasore, 26 Amamu, Shema, Molada,+ 27 Hasari-gada, Heshemone, Bete-pelete,+ 28 Hasari-shauli, Beere-sheba,+ Bisiotia, 29 Baala, Imu, Esemu, 30 Eletoladi, Kesili, Horma,+ 31 Siklagi,+ Madimana, Sansana, 32 Lebaote, Shilihimu, Aini na Rimone.+ Imisumba yonse yali 29 kumo ne mishi ya iko.

33 Mu Shefela mwali:+ Esh-taole, Sora,+ Ashina, 34 Sanoa, Ene-ganimu, Tapua, Enamu, 35 Yarimuti, Adulamu,+ Soko, Aseka,+ 36 Shaaraimu,+ Aditaimu, Gedera na Gederotaimu.* Imisumba yonse yali 14 kumo ne mishi ya iko.

37 Senani, Hadasha, Migdaligadi, 38 Dileani, Mispa, Yoketeele, 39 Lakishi,+ Bosekati, Egelone, 40 Kabone, Lamamu, Kitilishi, 41 Gederote, Bete-dagone, Naama na Makeda.+ Imisumba 6 ne mishi ya iko.

42 Libna,+ Etere, Ashani,+ 43 Ifta, Ashina, Nesibu, 44 Keila, Aksibu na Maresha. Imisumba 9 ne mishi ya iko.

45 Ekrone ne misumba ya uko iinono ne mishi ya uko; 46 ukufuma ku masamba ya Ekrone, incende yonse iya ku Ashidode ne mishi ya iko.

47 Ashidode,+ imisumba ya uko iinono ne mishi ya uko; Gasa,+ imisumba ya uko iinono ne mishi ya uko, ukufika na ku Mupokapoka wa Egupti, kuli Bemba Mukalamba* ne ncende yabela mu lulamba.+

48 Kabili mu citungu ca mpili mwali: Shamiri, Yatiri,+ Soko, 49 Dana, Kiriati-sana, e kutila Debiri, 50 Anabu, Eshetemo,+ Animu, 51 Goshene,+ Holone na Gilo.+ Imisumba 11 ne mishi ya iko.

52 Arabia, Duma, Eshani, 53 Yanimu, Bete-tapua, Afeka, 54 Humita, Kiriati-arba, e kutila Hebrone+ na Siore. Imisumba 9 ne mishi ya iko.

55 Maone,+ Karmele, Sifi,+ Yuta, 56 Yesreele, Yokedeamu, Sanoa, 57 Keni, Gibea na Timuna.+ Imisumba 10 ne mishi ya iko.

58 Halihuli, Betsuri, Gedore, 59 Maarati, Bete-anote na Eletekone. Imisumba 6 ne mishi ya iko.

60 Kiriati-baali, e kutila Kiriati-yearimu+ na Raba. Imisumba ibili ne mishi ya iko.

61 Mu matololo mwali Bete-araba,+ Midini, Sekaka, 62 Nibishani, Umusumba wa Mucele na Ene-gedi.+ Imisumba 6 ne mishi ya iko.

63 Lelo abaume abena Yuda balifililwe ukutamfya abena Yebusi+ abaleikala mu Yerusalemu.+ E ico abena Yebusi balitwalilila ukwikala na ba mu mukowa wa kwa Yuda+ mu Yerusalemu ukushinta na lelo.

16 Kabili impanga iyo ba-akenye abatuntwike muli Yosefe+ pa numa ya kupendula+ yatendekeele ku Yordani pa Yeriko yayafika ku tumfukumfuku no tumilonga twa mu Yeriko ku kabanga, e lyo yapita mu matololo ukufuma ku Yeriko, kabili yafikile ku citungu ca mpili ica Betele.+ 2 Yafumine ku Betele iya mu Lusi kabili yailefika ku mupaka wa bena Ariki mu Atarote, 3 lyena yaile ku masamba ku mupaka wa bena Yafleti ukuyafika fye na ku mupaka wa Bete-horone+ ya kwi samba na ku Gesere,+ kabili yapelelele kuli bemba.

4 E ico aba mu mukowa wa kwa Manase no wa kwa Efraimu abatuntwike muli Yosefe,+ baikele muli iyi mpanga.+ 5 Umupaka wa batuntwike muli Efraimu ukulingana ne ndupwa shabo wali ifi: Umupaka wa mpanga yabo ku kabanga wali ni Atarote-adari,+ ukuyafika na ku Bete-horone+ ya pa muulu, 6 kabili umupaka wailefika kuli bemba. Watampiile pa Mikimetati+ ku kapinda ka ku kuso, kabili washingulwike ku kabanga e lyo waya ku Taanati-shilo, kabili wailepita ku Yanoa ku kabanga kwine. 7 Lyena wafumine ku Yanoa waya ku Atarote na ku Naara e lyo waya ku Yeriko+ kabili wailefika fye na ku Yordani. 8 Ukufuma ku Tapua+ umupaka waile ku masamba ku Mupokapoka wa Kana, kabili wailepelela pali bemba.+ Iyi e mpanga ya ba mu mukowa wa kwa Efraimu ukulingana ne ndupwa shabo; 9 abatuntwike muli Efraimu balikwete ne misumba imbi ne mishi ya iko iyali mu mpanga iyo bayakenye umukowa wa kwa Manase.+

10 Lelo tabatamfishe abena Kanaani abaleikala mu Gesere,+ kabili abena Kanaani bekala na bena Efraimu ukufika na lelo,+ kabili balibacita abasha.+

17 Lyena icipendwilo+ caponeene pa mukowa wa kwa Manase,+ pantu Manase e wali ibeli lya kwa Yosefe.+ Apo Makiri+ uwali ibeli lya kwa Manase kabili wishi wa kwa Gileadi ali mwaume wa nkondo, bamupeele icitungu ca Gileadi ne ca Bashani.+ 2 Kabili icipendwilo caponeene pa batuntwike muli Manase abasheleko ukulingana ne ndupwa shabo, impanga iya bana ba kwa Abiesere,+ iya bana ba kwa Heleke, iya bana ba kwa Asriele, iya bana ba kwa Shekemu, iya bana ba kwa Hefere ne ya bana ba kwa Shemida. Aba e bana abaume abatuntwike muli Manase umwana wa kwa Yosefe, ukulingana ne ndupwa shabo.+ 3 Lelo Selofehadi+ umwana wa kwa Hefere, umwana wa kwa Gileadi, umwana wa kwa Makiri, umwana wa kwa Manase, ena takwete abana abaume, akwete fye abanakashi. Amashina ya bana bakwe abanakashi ni aya: Maala, Noa, Hogla, Milka na Tesa. 4 E ico baile kuli Eleasari+ shimapepo na Yoshua mwana Nuni na bacilolo, kabili babebele abati: “Yehova e waebele Mose ukuti atupeele impanga nge fyo bapeela bamunyinefwe.”+ E ico alibapeele impanga nge fyo apeele bamunyina ba kwa shibo,+ nga fintu Yehova alandile.

5 Kwali incende na shimbi 10 isho bapeele Manase ukulunda pa citungu ca Gileadi ne ca Bashani, ifyali bushilya* bwa Yordani,+ 6 pantu abana banakashi ba kwa Manase babapeele impanga pamo na bana bakwe abaume, kabili icitungu ca Gileadi caishileba ca batuntwike muli Manase abasheleko.

7 Kabili umupaka wa kwa Manase wafumine ku Ashere wayafika ku Mikimetati,+ iyalungatana na Shekemu,+ kabili wailefika fye na ku kapinda ka ku kulyo* ku baleikala ku Ene-Tapua. 8 Icalo ca Tapua+ cali ca kwa Manase, lelo umusumba wa Tapua uwali pa mupaka wa calo ca kwa Manase wali wa batuntwike muli Efraimu. 9 Kabili umupaka waile ku kapinda ka ku kulyo aka Mupokapoka wa Kana. Mu misumba ya kwa Manase mwali imisumba ya kwa Efraimu, kabili umupaka wa kwa Manase+ wali ku kapinda ka ku kuso aka mupokapoka, kabili wapelelele pali bemba.+ 10 Impanga ya ku kapinda ka ku kulyo yali ya kwa Efraimu, iya ku kapinda ka ku kuso yali ya kwa Manase, kabili bemba e yali umupaka wa kwa Manase,+ kabili ku kapinda ka ku kuso Manase apakene na Ashere, e lyo ku kabanga apakene na Isakari.

11 Mu citungu ca kwa Isakari ne ca kwa Ashere, Manase bamupeelemo umusumba wa Bete-sheani ne misumba ya uko iinono, umusumba wa Ibleamu+ ne misumba ya uko iinono, umusumba wa Dore+ na baleikalamo ne misumba ya uko iinono, pamo ne misumba itatu umwali sana impili, e kutila umusumba wa En-dore+ na baleikalamo ne misumba ya uko iinono, umusumba wa Taanaki na baleikalamo+ ne misumba ya uko iinono, no musumba wa Megido na baleikalamo ne misumba ya uko iinono.

12 Lelo abatuntwike muli Manase balifililwe ukupoka iyi imisumba; abena Kanaani balikaninine fye ukufuma muli ici calo.+ 13 Ilyo abena Israele bakwatileko amaka, bacitile abena Kanaani abasha,+ lelo tababatamfishe* bonse mu calo.+

14 Abatuntwike muli Yosefe baebele Yoshua abati: “Cinshi mwatupendwilila fye iciputulwa cimo+ kabili cinshi mwatupeelela* fye impanga imo? Ifwe twalifula, pantu Yehova alitupaala ukufika na lelo.”+ 15 Yoshua abebele ati: “Imwe nga muli bengi, kabiyeni muyetema ifimuti mu mutengo wa calo ca bena Perisi+ na bena Refa+ pa kuti e mo muye mu kwikala, apo icalo ca mpili ica Efraimu+ nacimucepela nga nshi.” 16 Lyena abatuntwike muli Yosefe batile: “Icitungu ca mpili te kuti citukumane, kabili abena Kanaani bonse abekala mu mupokapoka,* e kutila abekala mu musumba wa Bete-sheani+ ne misumba ya uko iinono na bekala mu Mupokapoka* wa Yesreele+ bonse balikwata amaceleta+ ayakwata ifyela ifyatwa.” 17 E ico Yoshua aebele aba mu ng’anda ya kwa Yosefe, e kutila Efraimu na Manase ati: “Imwe muli bengi, kabili muli ba maka sana. Tamufwile ukukwata impanga imo iyo,+ 18 lelo ne citungu ca mpili naco cikaba cenu.+ Nangu ca kuti citungu ca mutengo, mukatemamo ifimuti, kabili uko capelela e kukaba umupaka wa calo cenu. Pantu mukatamfyamo abena Kanaani, nangu ca kuti ba maka kabili bakwata amaceleta ayakwata ifyela ifyatwa.”+

18 Lyena ulukuta lonse ulwa bena Israele lwalongene pa Shilo,+ kabili bapangile itenti lya kukumaninamo na Lesa,+ pantu nomba Lesa alibacimfiisheko icalo.+ 2 Lelo kwali imikowa 7 iya bena Israele iyali taila-akana impanga. 3 E ico Yoshua aebele abena Israele ati: “Ni lilali mukaleka ukulalikisha ukuyapoka icalo ico Yehova Lesa wa fikolwe fyenu amupeela?+ 4 Saleni abaume batatu mu mukowa umo umo, pa kuti mbatume bayepita mu calo conse kabili bayepanga imipaka ukulingana ne mpanga iyo cila mukowa ulingile ukukwata. Pa numa bafwile ukubwela kuli ine. 5 Balingile ukuputaula icalo mu fiputulwa 7.+ Yuda akatwalilila ukuba mu citungu cakwe ku kapinda ka ku kulyo,+ kabili aba mu ng’anda ya kwa Yosefe nabo bakatwalilila ukuba mu citungu cabo ku kapinda ka ku kuso.+ 6 Lelo imwe kabiyeni muyeshila imipaka ya calo mu fiputulwa 7, e lyo mundetele ifyo mwalayashila, kabili ndeisamupendwilako+ pa cinso ca kwa Yehova Lesa wesu pa kumwakanya icalo. 7 Lelo abena Lebi tababapeela impanga ya bupyani nge fi imwe bamupeela,+ pantu bushimapepo bwa kwa Yehova e bupyani bwabo;+ kabili Gadi, Rubene na hafu ya mukowa wa kwa Manase+ balikwata kale impanga ya bupyani ku kabanga ka Yordani iyo Mose umubomfi wa kwa Yehova abapeele.”

8 Abaume bali-ipekenye pa kuti baleya mu kushila imipaka mu calo, kabili Yoshua abebele ati: “Kabiyeni mupite mu calo conse no kushila imipaka ya ciko, e lyo mubwele kuli ine, kabili ndeisamupendwilako pa cinso ca kwa Yehova mu Shilo.”+ 9 E ico abaume balile mu calo conse kabili baciputawile mu fiputulwa 7, e lyo balemba imisumba iyali muli ifi fiputulwa mwi buuku. Pa numa balibweleele kuli Yoshua ku nkambi mu Shilo. 10 Lyena Yoshua alibapendwilileko mu Shilo pa cinso ca kwa Yehova.+ Mu Shilo mwine e mo Yoshua ayakanishishe abena Israele icalo ukulingana ne mpanga iyo bapeele cila mukowa.+

11 Inshita yalifikile iya kupendwila indupwa sha mu mukowa wa kwa Benjamini, kabili impanga yabo yaishileba pa kati ka mpanga ya batuntwike muli Yuda+ ne ya batuntwike muli Yosefe.+ 12 Umupaka wabo uwa ku kapinda ka ku kuso watendekeele pa Yordani, kabili wailefika ku mutentemuko wa Yeriko+ ku kapinda ka ku kuso kabili wapitile pa lupili ku masamba, e lyo wayafika fye na ku matololo ya Bete-abene.+ 13 Kabili umupaka walitwalilile wayafika ku Lusi, ku mutentemuko wa ku kapinda ka ku kulyo aka Lusi, e kutila ku Betele;+ kabili umupaka waile ku Atarote-adari+ pa lupili lwa ku kapinda ka ku kulyo aka Bete-horone ya kwi samba.+ 14 Kabili umupaka watampiile ku masamba e lyo wayashinguluka ku kapinda ka ku kulyo ukufuma ku lupili ulwalungatana na Bete-horone ku kapinda ka ku kulyo; wapelelele ku Kiriati-baali, e kutila ku Kiriati-yearimu,+ umusumba wa kwa Yuda. Uyu e wali umupaka wa ku masamba.

15 Umupaka wa ku kapinda ka ku kulyo wafumine ku mpela ya Kiriati-yearimu, kabili waile ku masamba; wailefika ku kamfukumfuku ka Nefitoa.+ 16 Lyena wailefika ku mpela ya lupili ulwalungatana no Mupokapoka wa Mwana wa kwa Hinomu,+ uwaba mu Mupokapoka* wa Refaimu+ ku kapinda ka ku kuso, kabili waile ku Mupokapoka wa Hinomu, ku mutentemuko wa Yebusi+ ku kapinda ka ku kulyo, kabili wailefika ku Ene-rogele.+ 17 Kabili wapitile ku kapinda ka ku kuso wayafika ku Ene-shemeshe, lyena waile ku Gelilote, iyalungatana ne nshila iyaya pa muulu iya Adumimu,+ kabili waile ku libwe+ lya kwa Bohani+ umwana wa kwa Rubene. 18 Kabili walipitilile waya ku mutentemuko wa ku kapinda ka ku kuso uwalungatana na Araba, e lyo wayafika ku Araba. 19 Kabili umupaka walitwalilile wayafika ku mutentemuko wa ku kapinda ka ku kuso aka Bete-hogla,+ e lyo wayapelela apo Bemba ya Mucele*+ yashokela ku kapinda ka ku kuso, ku mpela ya Yordani ku kapinda ka ku kulyo. Uyu e wali umupaka wa ku kapinda ka ku kulyo. 20 Kabili Yordani e yali umupaka wa ku kabanga. Iyi e yali impanga ya bupyani bwa ndupwa sha batuntwike muli Benjamini, ne mipaka yonse iya mpanga yabo.

21 Kabili imisumba ya ndupwa sha ba mu mukowa wa kwa Benjamini ni iyi: Yeriko, Bete-hogla, Emeke-kesisi, 22 Bete-araba,+ Semaraimu, Betele,+ 23 Avimu, Para, Ofra, 24 Kefari-amone, Ofni na Geba.+ Imisumba 12 ne mishi ya iko.

25 Gibeone,+ Rama, Beerote, 26 Mispa, Kefira, Mosa, 27 Rekemu, Iripeele, Tarala, 28 Sela,+ Ha-elefe, Yebusi, e kutila Yerusalemu,+ Gibea+ na Kiriati. Imisumba 14 ne mishi ya iko.

Iyi e yali impanga ya ndupwa sha batuntwike muli Benjamini.

19 Lyena bapendwile umuku walenga bubili+ kabili icipendwilo caponene pali Simeone, e kutila pa ba mu mukowa wa kwa Simeone+ ne ndupwa shabo. Kabili impanga babapeele yali mu mpanga ya kwa Yuda.+ 2 Impanga babapeele yali ni Beere-sheba+ na Sheba, Molada,+ 3 Hasari-shauli,+ Bala, Esemu,+ 4 Eletoladi,+ Betuli, Horma, 5 Siklagi,+ Bet-markabote, Hasari-susa, 6 Bete-lebaote+ na Sharuhene. Imisumba 13 ne mishi ya iko. 7 Aini, Rimone, Etere na Ashani.+ Imisumba 4 ne mishi ya iko; 8 e lyo ne mishi yonse iyashingulwike iyi misumba ukuyafika fye na ku Baalati-beere, e kutila umusumba wa Rama uwabelele ku kapinda ka ku kulyo. Iyi e yali mpanga ya mukowa wa kwa Simeone iyo ba-akenye indupwa shabo. 9 Impanga iyo bapeele abatuntwike muli Simeone baiputwile ku mpanga ya kwa Yuda, pantu impanga ya ba mu mukowa wa kwa Yuda yalibakulile sana. E ico abatuntwike muli Simeone babapeele impanga mu mpanga ya kwa Yuda.+

10 E lyo bapendwile umuku walenga butatu+ kabili icipendwilo caponene pa ndupwa sha batuntwike muli Sebuluni,+ kabili umupaka wa mpanga yabo wafikile fye na ku Saridi. 11 Umupaka wabo walolele ku masamba ku Marala kabili wafikile ku Dabeshete, wafikile na ku mupokapoka uwalungatana na Yokeneamu. 12 Kabili waile ku Saridi ku kabanga, ku mupaka wa Kisilote-tabore, waile na ku Daberati+ e lyo wayafika ku Yafia. 13 Kabili watwalilile ukulola ku kabanga, ku Gati-hefere,+ ku Ete-kasini, e lyo waya ku Rimone kabili wailefika ku Nea. 14 Kabili uyu mupaka walishingulwike ku kapinda ka ku kuso waya ku Hanatone, kabili wapelelele pa Mupokapoka wa Ifitahele, 15 kwali no musumba wa Katati, uwa Nahalali, uwa Shimrone,+ uwa Idala no wa Betelehemu.+ Imisumba 12 ne mishi ya iko. 16 Iyi e mpanga iyo bapeele indupwa sha batuntwike muli Sebuluni.+ Iyi e yali imisumba ne mishi ya iko.

17 Ilyo bapendwile umuku walenga 4,+ icipendwilo caponene pali Isakari,+ e kutila indupwa sha batuntwike muli Isakari. 18 Kabili umupaka wabo wafikile ku Yesreele,+ ku Kesulote, ku Shunemu,+ 19 ku Hafaraimu, ku Shione, ku Anaharati, 20 ku Rabiti, ku Kishione, ku Ebese, 21 ku Remete, ku Ene-ganimu,+ ku Ene-hada na ku Bete-pasese. 22 Kabili umupaka wafikile ku Tabore+ na Shahasuma na Bete-shemeshe, kabili wapelelele ku Yordani. Imisumba 16 ne mishi ya iko. 23 Iyi e mpanga iyo bapeele indupwa sha batuntwike muli Isakari,+ imisumba ne mishi ya iko.

24 Lyena balipendwile umuku walenga 5+ kabili icipendwilo caponene pa ndupwa sha batuntwike muli Ashere.+ 25 Kabili umupaka wabo wali mu Helkati,+ e lyo waya ku Hali, ku Betene, ku Akishafi, 26 ku Alamaleke, ku Amadi na ku Mishali. Wafikile ku masamba ku Karmele+ na ku Shihore-libinati, 27 kabili wabwelele ku kabanga ku Bete-dagone kabili wafikile ku Sebuluni na ku Mupokapoka wa Ifitahele ku kapinda ka ku kuso, ku Bete-emeke na ku Neiele, kabili wailefika ku Kabuli ku kuso, 28 na ku Ebrone, ku Rehobu, ku Hamone na ku Kana ukuyafika fye na ku Sidone ukwaikele abantu abengi.+ 29 Kabili umupaka wabwelele ku Rama kabili wailefika fye na ku musumba wa malinga ayakosa uwa Turi.+ Lyena wabwelele ku Hosa, kabili wapelelele pali bemba mu citungu ca Aksibu, 30 Uma, Afeke+ na Rehobu+ nayo yali misumba yabo. Imisumba yonse yali 22 ne mishi ya iko. 31 Iyi e mpanga iyo bapeele indupwa sha batuntwike muli Ashere.+ Iyi e yali imisumba ne mishi ya iko.

32 Ilyo bapendwile umuku walenga 6,+ icipendwilo caponene pa ndupwa sha batuntwike muli Naftali. 33 Umupaka wabo wafumine ku Helefe, pa cimuti icikalamba mu Saananimu,+ waya ku Adamu-nekebu na ku Yabineele e lyo wayafika ku Lakumu; kabili wapelelele pa Yordani. 34 Umupaka wabwelele ku masamba ku Asinote-tabore kabili wafikile ku Hukoke e lyo wayafika ku Sebuluni ku kapinda ka ku kulyo, na ku Ashere ku masamba e lyo wayafika ku Yuda ku kabanga ka Yordani. 35 Kabili imisumba ya malinga ayakosa yali ni Sidimu, Sere, Hamati,+ Rakati, Kinerete, 36 Adama, Rama, Hasore,+ 37 Kedeshe,+ Edrei, Ene-hasore, 38 Irone, Migdalele, Horemu, Bet-anati na Bete-shemeshe.+ Imisumba 19 ne mishi ya iko. 39 Iyi e mpanga iyo bapeele indupwa sha batuntwike muli Naftali,+ imisumba ne mishi ya iko.

40 Ilyo bapendwile umuku walenga 7,+ icipendwilo caponene pa ndupwa sha batuntwike muli Dani.+ 41 Kabili umupaka wa mpanga yabo wali ni Sora,+ e lyo waya ku Esh-taole, ku Irishemeshe, 42 ku Shaalabini,+ ku Ayalone,+ ku Itla, 43 ku Elone, ku Timuna,+ ku Ekrone,+ 44 ku Elteke, ku Gibetone,+ ku Baalati, 45 ku Yehudi, ku Bene-beraki, ku Gati-rimone,+ 46 ku Meyarkone na ku Rakone, kabili uyu umupaka wapitile apalungatene na Yopa.+ 47 Lelo impanga ya batuntwike muli Dani yalibacepeele nga nshi.+ E ico baile mu kulwa na baleikala mu Leshemu+ kabili balibacimfishe, babepaya na ku lupanga. Lyena balipokele umusumba, batampa no kwikalamo, kabili balekele ukuwita ukuti Leshemu, batendeke ukuwita ukuti Dani, ilyali ishina lya cikolwe cabo.+ 48 Iyi e mpanga iyo bapeele indupwa sha batuntwike muli Dani. Iyi e yali imisumba ne mishi ya iko.

49 E ico balipwishishe ukwakanya imikowa icalo ukulingana ne mipaka. E lyo abena Israele bapeeleko Yoshua umwana wa kwa Nuni impanga pa mpanga yabo. 50 Bamupeele umusumba uo alombele, e kutila Timnati-sera,+ mu calo ca mpili ica kwa Efraimu, ukulingana ne fyo Yehova alandile, kabili akuulile uyu musumba atendeka no kwikalamo.

51 Ishi e mpanga sha bupyani isho Eleasari shimapepo, Yoshua umwana wa kwa Nuni ne ntungulushi sha mayanda ya bashibo isha mikowa ya bena Israele bapendwile pa kwakanya+ icalo pa cinso ca kwa Yehova mu Shilo,+ pa mwinshi we tenti lya kukumaninamo na Lesa.+ E ico balipwishishe ukwakanya icalo.

20 Lyena Yehova aebele Yoshua ati: 2 “Eba abena Israele auti, ‘Saleni imisumba ya kufulumukilako+ iyo namwebele ukupitila muli Mose, 3 pa kuti onse uwaipaya umuntu* mu kukanaishiba e ko akalebutukila. Kabili e ko uwaipaya umuntu mu kukanaishiba pali imwe akalebutukila nga bamukonka ku wa kulandula pa mulopa.+ 4 Alingile ukubutukila ku musumba umo pali iyi imisumba+ kabili afwile ukwiminina pa mpongolo ya musumba+ no kulondolwela abakalamba ba uyo musumba. Lyena balingile ukumwingisha mu musumba no kumupeela incende apakwikala, kabili akalaikala nabo. 5 Nga ca kuti uwa kulandula pa mulopa amupepeka, tabafwile ukumuleka aipaya uwaipeye umuntu, pantu amwipeye mu kukanaishiba, kabili tamupatile ilyo ashilamwipaya.+ 6 Alingile ukwikala muli ulya musumba mpaka bakapingula ba lukuta* bakamulubulwishe,+ kabili afwile ukutwalilila ukwikala mu musumba mpaka shimapepo mukalamba uukabapo pali iyo nshita akafwe.+ Lyena uwaipeye umuntu kuti abwelela ku musumba uko afulumwike, kabili kuti abwelela na mu ng’anda yakwe.’”+

7 E ico bapaatwilile Lesa umusumba wa Kedeshe+ mu Galili mu citungu ca mpili ica kwa Naftali, umusumba wa Shekemu+ mu citungu ca mpili ica kwa Efraimu, no musumba wa Kiriati-arba,+ e kutila Hebrone, mu citungu ca mpili ica kwa Yuda. 8 Mu citungu ca Yordani, ku kabanga ka Yeriko, basalile umusumba wa Besere+ mu matololo mu mpanga yabatama iya mukowa wa kwa Rubene, umusumba wa Ramote+ mu Gileadi uwa mu mukowa wa kwa Gadi, no musumba wa Golani+ mu Bashani uwa mu mukowa wa kwa Manase.+

9 Iyi e misumba basaliile abena Israele bonse na balebeshi abo baleikala nabo, pa kuti onse uwaipaya umuntu mu kukanaishiba alebutukilako,+ na pa kuti uwa kulandula pa mulopa e mwipaya ilyo bakapingula ba lukuta bashilamulubulwisha.+

21 Intungulushi sha ndupwa sha bena Lebi shaile kuli Eleasari shimapepo+ na Yoshua umwana wa kwa Nuni na ku ntungulushi sha ndupwa sha bena Israele, 2 kabili shabebele mu Shilo+ mu calo ca Kanaani ashiti: “Yehova alandile ukupitila muli Mose ukuti bakatupeele imisumba ya kwikalamo, pamo ne mpanga sha iko isha mulemfwe isha fitekwa fyesu.”+ 3 E ico abena Israele bapeele abena Lebi imisumba+ ne mpanga sha iko isha mulemfwe, pa mpanga sha bupyani bwabo, nga fintu Yehova abebele.+

4 Ilyo bapendwile, icipendwilo caponene pa ndupwa sha bena Kohati+ na bena Lebi abatuntwike muli Aarone shimapepo, kabili babapeele imisumba 13 pa mpanga ya mukowa wa kwa Yuda,+ uwa kwa Simeone+ no wa kwa Benjamini.+

5 Kabili pa numa ya kupendula, abena Kohati abasheleko babapeele imisumba 10, pa misumba ya ndupwa sha mukowa wa kwa Efraimu,+ umukowa wa kwa Dani na hafu ya mukowa wa kwa Manase.+

6 Na kabili ilyo bapendwile, abena Gershone+ babapeele imisumba 13 pa misumba ya ndupwa sha mukowa wa kwa Isakari, uwa kwa Ashere, uwa kwa Naftali na hafu ya mukowa wa kwa Manase mu Bashani.+

7 Indupwa ishatuntwike muli Merari+ bashipeele imisumba 12 pa misumba ya mukowa wa kwa Rubene, uwa kwa Gadi no wa kwa Sebuluni.+

8 E ico pa numa ya kupendula, abena Israele bapeele abena Lebi imisumba ne mpanga sha iko isha mulemfwe, nga fintu Yehova abebele ukupitila muli Mose.+

9 E ico aba mu mukowa wa kwa Yuda no wa kwa Simeone babapeele iyi misumba,+ 10 kabili abo bapeele bantu batuntwike muli Aarone aba mu ndupwa sha bena Kohati abena Lebi, pantu icipendwilo ca kubalilapo caponene pali bena. 11 Babapeele Kiriati-arba+ (Arba e wali wishi wa kwa Anaki), e kutila umusumba wa Hebrone+ mu citungu ca mpili ica kwa Yuda, kumo ne mpanga ya mulemfwe iyashingulwike uyu musumba. 12 Lelo impanga ya uyu musumba ne mishi ya uko bapeele Kalebu umwana wa kwa Yefune.+

13 Kabili abatuntwike muli Aarone shimapepo babapeele umusumba wa kufulumukilako uwaipaya umuntu,+ e kutila babapeele umusumba wa Hebrone+ ne mpanga ya uko iya mulemfwe. Babapeele no musumba wa Libna+ ne mpanga ya uko iya mulemfwe, 14 umusumba wa Yatiri+ ne mpanga ya uko iya mulemfwe, umusumba wa Eshtemoa+ ne mpanga ya uko iya mulemfwe, 15 umusumba wa Holone+ ne mpanga ya uko iya mulemfwe, umusumba wa Debiri+ ne mpanga ya uko iya mulemfwe, 16 umusumba wa Aini+ ne mpanga ya uko iya mulemfwe, umusumba wa Yuta+ ne mpanga ya uko iya mulemfwe, no musumba wa Bete-shemeshe ne mpanga ya uko iya mulemfwe. Imisumba 9 pa misumba iya iyi imikowa ibili.

17 Kabili pa misumba ya mukowa wa kwa Benjamini, babapeelepo umusumba wa Gibeone+ ne mpanga ya uko iya mulemfwe, umusumba wa Geba ne mpanga ya uko iya mulemfwe,+ 18 umusumba wa Anatote+ ne mpanga ya uko iya mulemfwe, no musumba wa Alimone ne mpanga ya uko iya mulemfwe. Imisumba 4.

19 Imisumba yonse iyo bapeele bashimapepo abatuntwike muli Aarone, yali 13 ne mpanga sha iko isha mulemfwe.+

20 Kabili pa numa ya kupendula, bapeele indupwa sha bena Kohati, abena Lebi abasheleko imisumba mu mukowa wa kwa Efraimu. 21 Babapeele umusumba wa kufulumukilako uwaipaya umuntu,+ e kutila umusumba wa Shekemu,+ ne mpanga ya uko iya mulemfwe mu citungu ca mpili ica kwa Efraimu. Babapeele no musumba wa Gesere+ ne mpanga ya uko iya mulemfwe, 22 umusumba wa Kibsaimu ne mpanga ya uko iya mulemfwe, no musumba wa Bete-horone+ ne mpanga ya uko iya mulemfwe. Imisumba 4.

23 Kabili pa misumba ya mu mukowa wa kwa Dani, babapeelepo umusumba wa Elteke ne mpanga ya uko iya mulemfwe, umusumba wa Gibetone ne mpanga ya uko iya mulemfwe, 24 umusumba wa Ayalone+ ne mpanga ya uko iya mulemfwe, no musumba wa Gati-rimone ne mpanga ya uko iya mulemfwe. Imisumba 4.

25 Kabili pa misumba ya hafu ya mukowa wa kwa Manase, babapeelepo umusumba wa Taanaki+ ne mpanga ya uko iya mulemfwe, no musumba wa Gati-rimone ne mpanga ya uko iya mulemfwe. Imisumba ibili.

26 Imisumba yonse ne mpanga sha iko isha mulemfwe iyo bapeele indupwa sha bena Kohati abasheleko yali 10.

27 Kabili aba muli hafu ya mukowa wa kwa Manase bapeele abena Gershone+ aba mu ndupwa sha bena Lebi umusumba wa kufulumukilako uwaipaya umuntu, e kutila umusumba wa Golani+ mu Bashani ne mpanga ya uko iya mulemfwe. Babapeele no musumba wa Beeshetera ne mpanga ya uko iya mulemfwe. Imisumba ibili.

28 Kabili pa misumba ya mukowa wa kwa Isakari,+ babapeelepo umusumba wa Kishione ne mpanga ya uko iya mulemfwe, umusumba wa Daberati+ ne mpanga ya uko iya mulemfwe, 29 umusumba wa Yarimuti ne mpanga ya uko iya mulemfwe, no musumba wa Ene-ganimu ne mpanga ya uko iya mulemfwe. Imisumba 4.

30 Kabili pa misumba ya mukowa wa kwa Ashere,+ babapeelepo umusumba wa Mishali ne mpanga ya uko iya mulemfwe, umusumba wa Abdone ne mpanga ya uko iya mulemfwe, 31 umusumba wa Helkati+ ne mpanga ya uko iya mulemfwe, no musumba wa Rehobu+ ne mpanga ya uko iya mulemfwe. Imisumba 4.

32 Kabili pa misumba ya mukowa wa kwa Naftali, babapeelepo umusumba wa kufulumukilako+ uwaipaya umuntu, e kutila umusumba wa Kedeshe+ mu Galili ne mpanga ya uko iya mulemfwe. Babapeele no musumba wa Hamote-dore ne mpanga ya uko iya mulemfwe no musumba wa Kartani ne mpanga ya uko iya mulemfwe. Imisumba itatu.

33 Imisumba yonse iyo bapeele indupwa sha bena Gershone yali 13 ne mpanga sha iko isha mulemfwe.

34 Kabili aba mu mukowa wa kwa Sebuluni+ bapeele indupwa sha bena Merari,+ abena Lebi abasheleko, umusumba wa Yokeneamu+ ne mpanga ya uko iya mulemfwe, umusumba wa Karta ne mpanga ya uko iya mulemfwe, 35 umusumba wa Dimna ne mpanga ya uko iya mulemfwe no musumba wa Nahalali+ ne mpanga ya uko iya mulemfwe. Imisumba 4.

36 Kabili pa misumba ya mukowa wa kwa Rubene, babapeelepo umusumba wa Besere+ ne mpanga ya uko iya mulemfwe, umusumba wa Yahasi ne mpanga ya uko iya mulemfwe,+ 37 umusumba wa Kedemote ne mpanga ya uko iya mulemfwe, no musumba wa Mefaati ne mpanga ya uko iya mulemfwe. Imisumba 4.

38 Kabili pa misumba ya mukowa wa kwa Gadi,+ babapeelepo umusumba wa kufulumukilako uwaipaya umuntu, e kutila umusumba wa Ramote mu Gileadi+ ne mpanga ya uko iya mulemfwe. Babapeele no musumba wa Mahanaimu+ ne mpanga ya uko iya mulemfwe, 39 umusumba wa Heshebone+ ne mpanga ya uko iya mulemfwe, no musumba wa Yasere+ ne mpanga ya uko iya mulemfwe. Imisumba yonse yali 4.

40 Pa numa ya kupendula, imisumba yonse iyo bapeele indupwa sha bena Merari abena Lebi abasheleko, yali 12.

41 Imisumba yonse iyo abena Israele bapeele abena Lebi pa misumba yabo, yali 48 pamo ne mpanga sha iko isha mulemfwe.+ 42 Cila musumba pali iyi misumba yonse walikwete impanga ya mulemfwe iyaushingulwike.

43 E ico Yehova apeele abena Israele icalo conse ico alapile ukuti ali no kupeela ifikolwe fyabo,+ kabili balipokele ici calo, batendeka no kwikalamo.+ 44 Kabili Yehova alengele baikala mu mutende mu calo conse, nga filya fine alapile ku fikolwe fyabo,+ kabili takwali umulwani wabo nangu umo uwabacimfishe.+ Yehova alengele bacimfya abalwani babo bonse.+ 45 Takwali ubulayo* nangu bumo ubo Yehova ashafikilishe pa malayo yonse ayasuma ayo alaile aba mu ng’anda ya kwa Israele; alifikilishe yonse.+

22 Lyena Yoshua aitile abena Rubene, abena Gadi na ba muli hafu ya mukowa wa kwa Manase 2 kabili abebele ati: “Mwalicita fyonse ifyo Mose umubomfi wa kwa Yehova amwebele,+ kabili mwalekonka fyonse ifyo nalemweba.+ 3 Tamwalekelesha bamunyinenwe pali ishi nshiku shonse ukufika na lelo;+ kabili mwalikonka amafunde ya kwa Yehova Lesa wenu.+ 4 Nomba Yehova Lesa wenu nalenga bamunyinenwe batuushe, nga filya fine abalaile.+ E ico nomba kuti mwabwelela ku matenti yenu mu calo ico Mose umubomfi wa kwa Yehova amupeele kwi shilya* lya Yordani.+ 5 Kulila fye mukalebika sana amano ku kukonka fyonse ifyo Mose umubomfi wa kwa Yehova amwebele mu Mafunde ayo amupeele+ pa kuti muletemwa Yehova Lesa wenu,+ mule-enda mu nshila shakwe shonse,+ mulekonka amafunde yakwe,+ mulelambatila kuli ena+ kabili mulemubombela+ no mutima wenu onse no mweo* wenu onse.”+

6 Lyena Yoshua alibapaalile kabili alibalekele baya, kabili balile ku matenti yabo. 7 Kabili Mose apeele hafu ya mukowa wa kwa Manase impanga ya mu Bashani.+ Yoshua apeele hafu imbi iya uyu mukowa impanga ku masamba ya Yordani+ pamo na bamunyinabo. Na kabili ilyo Yoshua abalekele ukuti babwelele ku matenti yabo, alibapaalile 8 kabili abebele ati: “Bweleleni ku matenti yenu ne fyuma ifingi, ifitekwa ifingi, silfere na golde, umukuba ne fyela ne fya kufwala ifingi nga nshi.+ Sendenipo ifintu ifyo mwapokele+ abalwani benu muyeakanyako bamunyinenwe.”

9 Lyena abena Rubene, abena Gadi na ba muli hafu ya mukowa wa kwa Manase bashile abena Israele banabo ku Shilo mu calo ca Kanaani, kabili babwelelemo ku calo ca Gileadi,+ ku calo ico babapeele pa kuti baleikalamo nga fintu Yehova alandile ukupitila muli Mose.+ 10 Ilyo abena Rubene, abena Gadi na ba muli hafu ya mukowa wa kwa Manase bafikile mupepi na Yordani mu calo ca Kanaani, bakuulile iciipailo icikalamba nga nshi mupepi no mumana wa Yordani. 11 Pa numa abena Israele bambi baumfwile+ ukuti: “Abena Rubene, abena Gadi na ba muli hafu ya mukowa wa kwa Manase nabakuula iciipailo pa mupaka wa calo ca Kanaani mupepi na Yordani kuno lubali.” 12 Ilyo aba abena Israele baumfwile ifi, ulukuta lonse ulwa bena Israele lwalongene pa Shilo+ pa kuti luye mu kulwa nabo.

13 Lyena abena Israele batumine Finehasi+ umwana wa kwa Eleasari shimapepo ku bena Rubene, abena Gadi na ba muli hafu ya mukowa wa kwa Manase abali mu calo ca Gileadi, 14 kabili aile na baume 10. Cila muntu aleimininako umukowa wa bena Israele kabili bonse bali ni ntungulushi sha mayanda ya bashibo aya makana* ya bena Israele.+ 15 Ilyo bafikile ku bena Rubene, abena Gadi na ba muli hafu ya mukowa wa kwa Manase mu calo ca Gileadi, babebele abati:

16 “Ulukuta lonse ulwa kwa Yehova lulandile aluti: ‘Cinshi calenga mupondokele+ Lesa wa kwa Israele? Buno bushiku namuleka ukukonka Yehova pantu namuikuulila iciipailo, ica kuti namupondokela Yehova.+ 17 Bushe ulubembu twacitile pa Peore lwalicepele? Tucili tulacula pa mulandu wa lulya lubembu, nangu ca kuti icinkunka caliponeene ulukuta lwa kwa Yehova.+ 18 Kabili mubikepo no kuleka ukukonka Yehova lelo! Nga mwapondokela Yehova lelo, ninshi mailo akafulilwa ulukuta lwa kwa Israele lonse.+ 19 Nomba nga mulemona ukutila Lesa alemona ukuti impanga yenu naikowela, abukileni ku mpanga ya kwa Yehova+ ukwaba itenti lya mushilo ilya kwa Yehova,+ kabili mukaleikala na ifwe, lelo tamufwile ukupondokela Yehova, kabili mwilenga tupondoke pa mulandu wa kuti mwaikuulila iciipailo e lyo ninshi twalikuula kale iciipailo ca kwa Yehova Lesa wesu.+ 20 Ilyo Akani+ umwana wa kwa Sera aibile ifyali no konaulwa, bushe Lesa tafuliilwe ulukuta lonse ulwa bena Israele?+ Kabili te Akani fye eka afwilile pa lubembu lwakwe.’”+

21 Lyena abena Rubene, abena Gadi na ba muli hafu ya mukowa wa kwa Manase ba-aswike intungulushi sha makana* ya kwa Israele abati:+ 22 “Lesa uwacila balesa, Yehova!* Lesa uwacila balesa, Yehova!+ Alishiba icalengele tukuule iciipailo, kabili Israele na o alaishiba. Nga ca kuti twalipondweke kabili tatwali ne cishinka kuli Yehova, ninshi etulekapo fye buno bushiku. 23 Nga ca kuti ico twakuulile iciipailo ni pa kuti tuleke ukukonka Yehova, na pa kuti tuletuulilapo imituulo ya koca, imituulo ya ngano na malambo ya mutende, Yehova alatupingula.+ 24 Ifi te fyalengele tukuule iciipailo, lelo icalengele ni co twatile, ‘Ku ntanshi abana benu bakeba abana besu abati: “Bushe mwalikwata insambu sha kupepela Yehova Lesa wa kwa Israele pamo na ifwe? 25 Yehova alibika umumana wa Yordani pa kuti ube umupaka pa kati ka ifwe na imwe, mwe bena Rubene na bena Gadi. Tamwakwata insambu sha kupepa Yehova.” Kabili abana benu bakalenga abana besu bakaleke ukupepa* Yehova.’

26 “E ico twatile, ‘Tufwile fye ukucitapo cimo, natukuule iciipailo, te ca kutuulilapo imituulo ya koca nelyo amalambo, 27 lelo ca kuti cibe kambone pa kati ka ifwe na imwe+ na bakatuntuka muli ifwe, ica kulanga ukuti tukalabombela Yehova pa cinso cakwe kabili tukalatuula imituulo ya koca, amalambo ya mutende na malambo yambi,+ pa kuti ku ntanshi abana benu bekeba abana besu abati: “Imwe tamwakwata insambu sha kupepa Yehova.”’ 28 E ico twatile, ‘Nga ca kuti ku ntanshi bakeba ifwe na bakatuntuka muli ifwe ifi, lyena tukabeba atuti: “Moneni icipasho ca ciipailo ca kwa Yehova ico ifikolwe fyesu fyapangile, te ca kutuulilapo imituulo ya koca nangu amalambo yambi, lelo ca kuba kambone pa kati ka ifwe na imwe.”’ 29 Te kuti tukuule iciipailo ca kutuulilapo imituulo ya koca, imituulo ya ngano na malambo yambi ukucila ukulatuulila pa ciipailo ca kwa Yehova Lesa wesu icaba pa ntanshi ye tenti lya mushilo,+ pantu nangu cingaba shani te kuti tupondokele Yehova ica kuti twaleka no kukonka Yehova!”+

30 Ilyo abatuntwike muli Rubene, muli Gadi na muli Manase balondolwele icalengele bakuule iciipailo, Finehasi shimapepo, intungulushi sha lukuta ne ntungulushi sha makana* ya bena Israele abali nankwe, balyumfwile.+ 31 E ico Finehasi umwana wa kwa Eleasari shimapepo aebele abatuntwike muli Rubene, muli Gadi na muli Manase ati: “Lelo twaishiba ukuti Yehova aba na ifwe, pantu tamwapondokela Yehova. Nomba mwapokolola abena Israele mu minwe ya kwa Yehova.”

32 Lyena Finehasi umwana wa kwa Eleasari shimapepo ne ntungulushi bafumine ku bena Rubene na bena Gadi mu calo ca Gileadi, kabili babwelele ku calo ca Kanaani ku bena Israele abashele, babashimikila ne fyo cali. 33 Kabili abena Israele balyumfwile ifyo babashimikile. Lyena abena Israele bacindike Lesa, kabili tabalandile na kabili pa kuya mu kulwa na bena Rubene na bena Gadi na pa kuya mu konaula icalo ico baleikalamo.

34 E ico abena Rubene na bena Gadi bainike cilya ciipailo,* pantu “ni kambone pa kati ka ifwe bonse ukuti Yehova ni Lesa wa cine.”

23 Ilyo papitile inshiku ishingi ukutula apo Yehova alengeele abena Israele batuusha+ ku balwani babo bonse ababashingulwike, ninshi Yoshua alikota,+ kabili ali mupepi no kufwa, 2 Yoshua aitile abena Israele bonse,+ e kutila abakalamba babo, intungulushi shabo, bakapingula babo na bacilolo babo,+ kabili abebele ati: “Ine ninkota kabili ndi mupepi no kufwa. 3 Kabili mwali-imwena fyonse ifyo Yehova Lesa wenu acitile pa kumucimfishako ishi inko shonse, pantu Yehova Lesa wenu e walemulwila.+ 4 Moneni, nalipendwile+ pa kumwakanya icalo ca ishi inko pa kuti cibe icalo ca mikowa yenu,+ nalimwakenye ne calo ca nko shonse isho naonawile+ ukufuma ku Yordani ukufika kuli Bemba Mukalamba* ku masamba.* 5 Kabili Yehova Lesa wenu e walemutamfishako inko+ no kumucimfishako inko,* kabili mwatampile ukwikala mu calo ca shiko, nga filya fine Yehova Lesa wenu amulaile.+

6 “Nomba mufwile ukuba abashipa sana pa kuti mulekonka no kucita fyonse ifyalembwa mwi buuku lya Mafunde+ ya kwa Mose. Mulingile ukulakonka fyonse ifyalembwa mu Mafunde,+ 7 kabili tamulingile ukula-ampana ne nko ishi+ isho mwashala nasho. Tamufwile fye no kulalumbula amashina ya tulesa twa shiko+ nangu ukulalapila mu mashina ya tuko, kabili tamulingile ukulatubombela nelyo fye ukulatukontamina.+ 8 Lelo mulingile ukulalambatila kuli Yehova Lesa wenu,+ nge fi fine mwaacita ukushinta na lelo. 9 Yehova akamutamfishako inko ishikalamba kabili isha maka,+ pantu takwaba umuntu nangu umo uwamucimfyapo ukufika na lelo.+ 10 Umuntu fye umo pali imwe akafulumuna abantu 1,000,+ pantu ninshi Yehova Lesa wenu e ulemulwila,+ nga fintu fye amulaile.+ 11 E ico muleba abacenjela+ pa kuti muletemwa Yehova Lesa wenu+ lyonse.

12 “Lelo nga mwasha Lesa, mwayalambatila kuli ishi inko mushele nasho,+ kabili nga mwalaufishanya nasho+ no kwampana nasho, 13 mufwile ukwishiba ukuti nangu cikabe shani Yehova Lesa wenu takatwalilile ukumucimfishako* ishi inko.+ Shikaba nge citeyo kabili ulukose kabili icikoti ca kumuuminako mu mbafu,+ kabili shikaba nge myunga mu menso yenu mpaka mukalobe muli ici calo icisuma ico Yehova Lesa wenu amupeela.

14 “Nomba umfweni! Ndi mu kufwa,* kabili mwalishiba bwino bwino* ukuti pa fisuma fyonse ifyo Yehova Lesa wenu amulaile, tapaba nangu cimo ico ashafikilisha. Alifikilisha fyonse, tapaba nangu cimo ico ashacita.+ 15 Nomba nga filya fine Yehova Lesa wenu afikilishe ifisuma fyonse ifyo amulaile,+ e fyo Yehova akamuletela ifyabipa fyonse* ifyo alanda kabili akamulofya muli ici icalo icisuma ico Yehova Lesa wenu amupeela.+ 16 Nga mwapula mu cipangano ca kwa Yehova Lesa wenu ico amwebele ukuti mulesunga, kabili nga mwalabombela balesa bambi no kubakontamina, ubukali bwa kwa Yehova ububilima ngo mulilo bukesa pali imwe,+ kabili mukaloba bwangu bwangu muli ici calo icisuma ico amupeela.”+

24 Lyena Yoshua alongenye imikowa yonse iya bena Israele pa Shekemu kabili aitile abakalamba ba bena Israele, intungulushi shabo, bakapingula babo na bacilolo babo,+ kabili baiminine pa cinso ca kwa Lesa wa cine. 2 Yoshua aebele abantu bonse ati: “Ifi e fyo Yehova Lesa wa kwa Israele alanda, ‘Ifikolwe fyenu+ kumo na Tera wishi wa kwa Abrahamu kabili wishi wa kwa Nahore, kale fyaikele+ kwi shilya lya Mumana wa Yufrate, kabili fyalebombela balesa bambi.+

3 “‘Nomba ilyo papitile inshita naebele Abrahamu icikolwe cenu+ ukuti afume kwi shilya lya Mumana wa Yufrate kabili endauke mu calo ca Kanaani conse, kabili nalengele abana* bakwe bafule.+ Namupeele Isaki;+ 4 lyena Isaki namupeele Yakobo na Esau.+ Pa numa napeele Esau Ulupili lwa Seiri pa kuti lube ulupili lwakwe;+ kabili Yakobo na bana bakwe baile ku Egupti.+ 5 Pa numa natumine Mose na Aarone,+ kabili naleteele abena Egupti ifinkunka,+ lyena nalimufumishe mu Egupti. 6 Ilyo nalefumya bashinwe mu Egupti+ kabili ilyo bafikile kuli bemba, abena Egupti abali na maceleta na bali pali bakabalwe balekonka bashinwe ukufika fye na kuli Bemba Wakashika.+ 7 Batendeke ukulilila kuli ine ne Yehova,+ e ico nabikile imfifi pa kati kenu na bena Egupti kabili nabweseeshe bemba pali bena kabili yalibafimbile,+ kabili mwali-imwenene ifyo nacitile mu Egupti.+ Lyena mwaikele imyaka* iingi mu matololo.+

8 “‘Kabili namuletele mu calo ca bena Amore abaleikala kwi shilya* lya Yordani, kabili balwile na imwe.+ Lelo nabapeele mu minwe yenu pa kuti mupyane icalo cabo, kabili nalimulofesheko abena Amore.+ 9 Lyena Balaki umwana wa kwa Sipore, imfumu ya Moabu, aishile mu kulwa na imwe. E ico aitile Balaamu umwana wa kwa Beore pa kuti amutiipe.+ 10 Lelo nshalekutika kuli Balaamu.+ E ico alimupaalile pa miku iingi,+ kabili nalimupokolwele kuli ena.+

11 “‘Lyena mwa-abwike Yordani+ mwafika na ku Yeriko.+ Kabili intungulushi* sha mu Yeriko, abena Amore, abena Perisi, abena Kanaani, abena Hiti, abena Gegashi, abena Hibi na bena Yebusi balwile na imwe, lelo nabapeele mu minwe yenu.+ 12 Nalengele imfumu shibili isha bena Amore shibe no mwenso,* e ico shalimubutwike.+ Te lupanga lwenu nelyo ubuta bwenu+ fyalengele shifulumuke. 13 E ico namupeele icalo ico mushaculile ne misumba iyo mushakuulile,+ kabili mwatendeke ukwikalamo. Mulelya imyangashi ne miolife ifyo mushalimbile.’+

14 “E ico muletiina Yehova, muleba aba kaele*+ ilyo mulemubombela kabili muleba aba cishinka; monaule na balesa abo ifikolwe fyenu fyabombeele kwi shilya lya Mumana wa Yufrate na mu Egupti,+ kabili mulebombela Yehova. 15 Nomba nga tamulefwaya ukulabombela Yehova, salenipo mwe bene lelo uo mwakulabombela,+ nampo nga ni balesa abo ifikolwe fyenu ifyali kwi shilya lya Mumana wa Yufrate+ fyalebombela nelyo balesa ba bena Amore abene ba calo ico muleikalamo.+ Lelo ine na ba mu ng’anda yandi twakulabombela Yehova.”

16 E lyo abantu ba-aswike abati: “Nangu cingaba shani te kuti tushe Yehova no kutendeka ukubombela balesa bambi. 17 Yehova Lesa wesu e watufumishe mu calo ca Egupti,+ mu ng’anda ya busha+ pamo na bashifwe, kabili e wacitile ifipesha amano ifikalamba ifyo twaimwenene+ kabili e waletucingilila mu nshila monse umo twaendele na mu bantu bonse abo twapitilemo.+ 18 Yehova alitutamfiisheko abantu bonse, kumo na bena Amore abaleikala muli cino calo. E ico na ifwe bene twakulabombela Yehova, pantu e Lesa wesu.”

19 Lyena Yoshua aebele abantu ati: “Te kuti mubombele Yehova iyo, pantu ni Lesa wa mushilo;+ ni Lesa uufwaya abantu balemupepa fye eka.+ Takamubelele uluse pa filubo fyenu* na pa membu shenu.+ 20 Nga mwasha Yehova no kutendeka ukubombela balesa bambi, akamwalukila no kumulofya nangu ca kuti kale alemucitila ifisuma.”+

21 Lelo abantu baebele Yoshua abati: “Awe, ifwe twakulabombela Yehova!”+ 22 E ico Yoshua aebele abantu ati: “Mwe bene muli bakambone ba kuishinina ukuti namuisalila ukulabombela Yehova.”+ Lyena abantu batile: “Tuli bakambone.”

23 “E ico onauleni balesa ba bufi abali mu calo cenu, kabili mulebombela Yehova Lesa wa kwa Israele ne mitima yenu yonse.” 24 Abantu baebele Yoshua abati: “Yehova Lesa wesu e o twakulabombela, kabili twakulamumfwila!”

25 E ico pali bulya bushiku Yoshua apangene na bantu icipangano kabili alibikileko ifunde ilyo bali mu Shekemu. 26 Lyena Yoshua alembele aya mashiwi mwi buuku lya Mafunde ya kwa Lesa,+ kabili abuulile ilibwe ilikalamba+ alibika mwi samba lya cimuti icikalamba icaba mupepi ne ncende ya mushilo iya kwa Yehova.

27 Kabili Yoshua aebele abantu ati: “Moneni! Ili ilibwe e likaba kambone pali ifwe,+ pantu nalyumfwa amashiwi yonse ayo Yehova atwebele, kabili likaba kambone pali imwe, pa kuti mwikakaana Lesa wenu.” 28 E ico Yoshua aebele abantu ukuti baleya, cila muntu ku mpanga iyo bamupeele.+

29 Pa numa ya ifi, Yoshua umwana wa kwa Nuni, umubomfi wa kwa Yehova, alifwile ninshi ali ne myaka 110.+ 30 E ico bamushiikile mu mpanga yakwe mu Timnati-sera,+ iyaba mu citungu ca mpili ica kwa Efraimu, ku kapinda ka ku kuso aka Lupili lwa Gaashi. 31 Abena Israele balitwalilile ukubombela Yehova mu nshiku shonse isho Yoshua ali no mweo, na mu nshiku shonse isha bakalamba abashele aba mweo ilyo Yoshua afwile kabili abamwene fyonse ifyo Yehova acitiile abena Israele.+

32 Amafupa ya kwa Yosefe+ ayo abena Israele bafumishe mu Egupti, bayashiikile mu Shekemu mu mpanga iyo Yakobo ashitile ku bana ba kwa Hamore,+ wishi wa kwa Shekemu, mu ndalama 100;+ kabili iyi mpanga yaishileba ya batuntwike muli Yosefe.+

33 Eleasari umwana wa kwa Aarone na o alifwile.+ E ico bamushiikile mu Kapili ka kwa Finehasi umwana wakwe,+ ako bamupeele mu citungu ca mpili ica kwa Efraimu.