KALATA YA KUBALILAPO KU BENA KORINTI

1 Ine ne Paulo, ne o Lesa aita pa mulandu no kufwaya kwakwe pa kuti imbe umutumwa+ wa kwa Kristu Yesu, ndi pamo na Sostene munyinefwe. 2 Nalembela imwe mwe cilonganino ca kwa Lesa icaba mu Korinti,+ mwe basangululwa muli Kristu Yesu,+ abaitwa ukuba aba mushilo, pamo pene na bonse abalelilila kwi shina lya kwa Shikulwifwe, Yesu Kristu,+ Shikulwibo kabili Shikulwifwe:

3 Icikuuku icaibela no mutende ififuma kuli Lesa Shifwe na kuli Shikulwifwe Yesu Kristu fibe na imwe.

4 Lyonse ndamutashishako kuli Lesa pa cikuuku icaibela ico amulanga muli Kristu Yesu; 5 pantu Lesa alimucindamika muli fyonse ukupitila muli Kristu, mu fyo mwaishiba bwino+ ukubila icebo cakwe na muli fyonse ifyo mwaishiba, 6 ica kuti ubunte pali Kristu+ bwalikosa muli imwe, 7 kabili tamubulishapo ica bupe nangu cimo, ilyo mulelolela no kufwaisha ukuti Shikulwifwe Yesu Kristu+ akasokololwe. 8 Lesa akamukosha ukufika na ku mpela, pa kuti bekamusanga no mulandu mu bushiku bwa kwa Shikulwifwe Yesu Kristu.+ 9 Lesa uwalengele mwikatane no Mwana wakwe Yesu Kristu Shikulwifwe, tabepa.+

10 Nomba ndemukonkomesha bamunyinane, mwi shina lya kwa Shikulwifwe Yesu Kristu ukuti bonse mulelanda fimo fine, kabili pelaba amalekano pali imwe,+ muleba abaikatana mu mano yamo yene na mu fyo mutontonkanya.+ 11 Pantu bamo aba mu ng’anda ya kwa Kloe banjebele ukuti, imwe bamunyinane mulapusana. 12 Ico ndelandapo ca kuti uuli apa aleti: “Ine ndi wa kwa Paulo,” umbi na o aleti, “Ine ndi wa kwa Apolo,”+ umunankwe na o aleti, “Ine ndi wa kwa Kefasi,”* e lyo umbi na o aleti, “Ine ndi wa kwa Kristu.” 13 Bushe Kristu alyakanikana? Bushe Paulo e o baipaile pa cimuti pa mulandu wenu? Nelyo bushe mwabatishiwe mwi shina lya kwa Paulo? 14 Ndetasha Lesa ukuti nshabatishepo nangu umo pali imwe kano fye Krispi+ na Gai+ epela, 15 pa kuti peba nangu umo uwingalanda ati mwabatishiwilwe mwi shina lyandi. 16 Ca cine, nalibatishe na ba mu ng’anda ya kwa Stefanasi.+ Lelo abashala, nshileibukisha ukubatishapo nangu umo. 17 Pantu Kristu tantumine mu kubatisha abantu, lelo antumine mu kubila imbila nsuma;+ te mu kubilila mu milandile ya bucenjeshi, pa kuti icimuti ca kucushiwilwapo* ica kwa Kristu ciba ica fye.

18 Pantu abaleonaika+ bamona ukulanda pa cimuti ca kwa Yesu ica kucushiwilwapo ukuti buwelewele, lelo ifwe fwe balepusuka tumona ukuti e maka ya kwa Lesa.+ 19 Pantu Amalembo yatila: “Nkonaula amano ya ba mano, kabili ukucenjela kwa bacenjela nkakukaana.”*+ 20 Bali kwi aba mano? Bali kwi bakalemba?* Bali kwi abafikansa mu bwikashi buno?* Bushe Lesa talenga amano ya ba muli ici calo yaba ubuwelewele? 21 Pantu Lesa mu mano yakwe talekele aba muli ici calo bamwishiba+ ku mano yabo.+ Lelo alekele abatetekele imbila iyo bamo balemona ukuti buwelewele,+ bapusuke.

22 Pantu abaYuda bafwaya ukumona ifishibilo+ e lyo abaGriki bena bafwaya amano; 23 lelo ifwe tushimikila abantu ukuti Kristu bamwipaile pa cimuti. Ifyo tushimika, abaYuda bafimona ukuti fya kuipununako, lelo abena fyalo bafimona ukuti buwelewele.+ 24 Nomba kuli bonse abaYuda na baGriki abo baita, bena bamona ukuti muli Kristu e mumonekela amaka ya kwa Lesa na mano yakwe.+ 25 Pantu ifya kwa Lesa ifyo abantu bamona ukuti buwelewele, fya mano ukucila abantu kabili ifya kwa Lesa ifyo abantu bamona ukuti fyalinaka, fyalikosa ukucila abantu.+

26 Pantu moneni ifyo mwali ilyo bamwitile bamunyinane. Pali imwe banono fye abo abantu balemona+ ukuti ba mano, banono fye abakwete ififulo fya maka kabili banono fye abafumine mu ndupwa ishacindama,+ 27 lelo Lesa asalile abawelewele ba muli ici calo, pa kuti alenge aba mano bekatwe insoni; kabili Lesa asalile abanaka aba muli ici calo, pa kuti alenge abakosa bekatwe nsoni;+ 28 kabili Lesa asalile ifyo abantu bamona ukuti fya fye muli ici calo ne fyo basuula, ifimoneka nge fishabapo, pa kuti onaule ifyabapo,+ 29 pa kuti peba nangu umo uwingaitakishisha pa menso ya kwa Lesa. 30 Lelo e walenga ukuti mube muli Kristu Yesu, uwatupeele amano ya kwa Lesa. Ukupitila muli Kristu, Lesa alilenga twaba abalungama+ kabili aba mushilo,+ na kabili alitulubula ukubomfya icilubula,+ 31 pa kuti cibe nga filya fine calembwa ati: “Uuleitakisha, aitakishishe muli Yehova.”*+

2 E ico bamunyinane, ilyo naishile kuli imwe, nshaishile ne milandile ya cilumba+ nelyo iya kuilanga uwa mano ilyo nalebila kuli imwe inkaama+ ya kwa Lesa.* 2 Pantu ilyo nali na imwe nshalefwaya ukumweba* ifintu fimbi kano fye pali Yesu Kristu, na pa fyo bamwipaile pa cimuti.+ 3 Ilyo naishile kuli imwe nali uwanaka, nali uwa mwenso kabili naletutuma nga nshi; 4 kabili ilyo nalelanda na imwe ne lyo nalemushimikila, nshalebomfya amashiwi ya kunashanasha nelyo aya kulanga ukuti ndi wa mano, lelo mu mashiwi nalelanda e mwamonekeele amaka+ ya mupashi wa kwa Lesa, 5 pa kuti mwicetekela amano ya buntunse, lelo mucetekele amaka ya kwa Lesa.

6 Nomba tulanda ifya mano ku bakalamba mu fya kwa Lesa,+ lelo te mano ya bwikashi buno* nelyo aya ntungulushi sha bwikashi buno, abo impela yabo ili mupepi.+ 7 Lelo tulandila amano ya kwa Lesa mu nkaama+ yakwe, amano ayafiswa. Lesa alilingiile libela inkaama yakwe ilyo buno bwikashi tabulabako pa kuti tube no bukata. 8 Takuli nangu umo pa ntungulushi sha bwikashi buno* uwaishibe+ aya mano, pantu abayeshiba nga tabaipeye* Shikulu uwa bukata. 9 Lelo cali fye nga filya fine calembwa ati: “Ifyo Lesa apekanishisha abamutemwa,+ ilinso talyafimwene no kutwi takwafyumfwile, kabili takwali nangu umo uwafitontonkenyepo.” 10 Pantu nifwe Lesa asokolwela+ ukubomfya umupashi wakwe,+ pantu umupashi ulafwailisha muli fyonse, na mu fyashika ifya kwa Lesa.+

11 Pantu takwaba umuntu uwaishiba ifyo umuntu munankwe atontonkanya, kano umupashi uwaba muli ena. E fyo caba na kuli Lesa, takwaba uwaishiba ifyo Lesa atontonkanya, kano umupashi wakwe. 12 Nomba ifwe tatwapokelele umupashi uwa ici calo, lelo twapokelele umupashi uwafuma kuli Lesa,+ pa kuti twingeshiba ifintu ifyo Lesa atupeela pa mulandu ne cikuuku cakwe. 13 Na ifwe tulalanda pali ifi fintu, nomba tatufilanda ukubomfya amashiwi ayo abantu aba mano+ basambilisha lelo tufilanda ukubomfya amashiwi ayo umupashi+ utusambilisha, ilyo tulelondolola ifyebo fya kwa Lesa ukubomfya amashiwi ayo umupashi watusambilisha.

14 Lelo umuntu uukonkelela ififwaya umutima wakwe tapokelela ifya mupashi wa kwa Lesa, pantu afimona ukuti buwelewele; kabili te kuti afishibe, pantu umupashi e uficeeceeta. 15 Lelo umuntu uutungululwa no mupashi wa kwa Lesa alaceeceeta fyonse,+ nomba ena takuli umuntu nangu umo uumuceeceeta. 16 Pantu “nani uwaishiba ifyo Yehova* atontonkanya, pa kuti amusambilishe?”+ Lelo ifwe tutontonkanya nge fyo Kristu atontonkanya.+

3 E ico mwe bamunyinane, nshalelanda na imwe nga uulelanda na bantu abo umupashi wa kwa Lesa utungulula,+ lelo nalelanda na imwe nga uulelanda na bantu abakonka ififwaya imitima yabo, kabili nga uulelanda no tunya+ mu Bwina Kristu. 2 Namunweseshe umukaka, nshamulishishe ifya kulya ifyakosa, pantu mwali tamulakosa. Na kuba, na nomba+ mucili tamulakosa, 3 pantu mucili mulekonkelela ififwaya imitima yenu.+ Na kabili apo mwaliba na kalumwa kabili mulakansana, mulanga fye ukuti mulakonkelela ififwaya imitima yenu+ kabili mucita ifyo abantu bonse bacita. 4 Pantu ilyo umo alanda ati: “Ine ndi wa kwa Paulo,” na umbi atila: “Ine ndi wa kwa Apolo,”+ bushe ninshi tamulecita fye nge fyo na bantu bambi bacita?

5 Nomba bushe Apolo nani? Paulo na o nani? Babomfi+ fye ababomba umulimo uo Shikulu atupeele, abamwafwile pa kuti mutetekele. 6 Ine nalibyele,+ Apolo alitapilile,+ lelo Lesa e walengele citwalilile ukukula. 7 Kanshi uubyala nangu uutapilila tababa kantu, kano Lesa uulenga cilekula.+ 8 Nomba uubyala no utapilila bamo bene,* lelo cila muntu akapokelela icilambu cakwe ukulingana no mulimo wakwe.+ 9 Pantu ifwe tubombela pamo na Lesa. E lyo imwe muli ibala ilyo Lesa alelima, kabili muli ng’anda iyo Lesa alekuula.+

10 Ukulingana ne cikuuku icaibela ico Lesa ampeela, nalipangile umufula+ wa kukuulapo nga filya umukalamba wa makuule uwaishiba sana ukukuula acita. Lelo umuntu umbi e ulekuulapo. Nomba cila muntu abike amano ku fyo alekuula. 11 Pantu takwaba uwingapanga umufula wa kukuulapo uwingacila uwapangwa kale, no yo mufula ni Yesu Kristu.+ 12 Nomba umuntu nga akuula pali uyu mufula ukubomfya golde, silfere, amabwe aya mutengo sana, ifimuti, icani nelyo impimbili, 13 umulimo uo cila muntu abomba ukeshibikwa pa bushiku bwa kweshiwa, pantu umulilo+ e ukasokolola fyonse kabili e ukalanga umusango wa mulimo uo cila muntu abomba. 14 Nga ca kuti ifyo umo akuula pa mufula fyashala, ninshi akapokelela icilambu; 15 nomba nga fyapya, akapelwapo fye, lelo umwine akapusuka; nomba nga apusuka, ninshi akapusuka fye kwempe kwati untu basompola mu mulilo.

16 Bushe tamwaishiba ukuti imwe muli tempele+ lya kwa Lesa, no kuti umupashi wa kwa Lesa wikala muli imwe?+ 17 Umuntu nga aonaula itempele lya kwa Lesa, Lesa akamonaula; pantu itempele lya kwa Lesa lya mushilo, kabili ili itempele+ nimwe.

18 Umuntu nangu umo elaibepa: Nga ca kuti umo pali imwe aleimona ukuti wa mano muli buno bwikashi,* lekeni abe umuwelewele, pa kuti engaba uwa mano. 19 Pantu amano ya muli ici calo, Lesa ayamona ukuti buwelewele. Pantu calembwa ukuti: “Alenga aba mano bawila mu fiteyo fyabo ifya bucenjeshi.”+ 20 Na kabili calembwa ukuti: “Yehova* aishiba ukuti amatontonkanyo ya ba mano, ya fye.”+ 21 E ico umuntu nangu umo elaitakishisha pa fyo abantunse bengacita, pantu fyonse fyenu. 22 Nampo nga ni Paulo, nelyo nga ni Apolo, nelyo nga ni Kefasi,*+ nelyo nga calo, nelyo nga mweo, nelyo nga ni mfwa, nelyo nga fintu ifyabako, nelyo nga fintu ifikesabako, ifintu fyonse fyenu; 23 na imwe muli ba kwa Kristu;+ Kristu na o, wa kwa Lesa.

4 Umuntu onse afwile ukulatumona ukuti tuli babomfi ba kwa Kristu abo asala ukula-angalila inkaama sha kwa Lesa.+ 2 E ico aba babomfi* abacetekelwa balingile ukuba aba cishinka. 3 Nomba ine nshisakamana nga mulendubulwisha nelyo nga ca kuti icilye cilendubulwisha. Na kuba na ne mwine nshi-ilubulwisha. 4 Pantu ndi wa kaele. Nomba ici tacipilibula ukuti nalilungama; lelo uumpingula ni Yehova.*+ 5 E ico mwipingula+ icintu nangu cimo ilyo inshita ishilafika, mpaka Shikulu akese. Akalenga ifyafiswa mu mfifi fikabe mu lubuuto kabili akalenga amapange ya mu mitima yakeshibikwe. Pali iyo nshita e lyo Lesa+ akatasha cila muntu.

6 Nomba mwe ba bwananyina, nalanda ifi fintu pali Apolo+ na pali ine wine pa mulandu wenu, pa kuti musambilile ifunde lya kuti: “Mulekonka ifyalembwa,” pa kuti mwilaba ne cilumba+ na kapaatulula. 7 Pantu nani alenga mupusane? Inga cinshi wakwata ico ushapokelele?+ Nomba nga ca kuti walicipokelele, cinshi uitakishisha kwati tawacipokelele?

8 Bushe kanshi imwe mwalikwata kale ifyo mukabila? Bushe muli bakankaala kale? Bushe mwalitendeka ukuteka+ ukwabula ifwe? Kuti natemwa sana nga mwalitendeka ukuteka pa kuti na ifwe twingatekela+ pamo na imwe. 9 Pantu ndemona ukuti fwe batumwa nifwe Lesa alekeleshako ukulangisha, nga bantu abo bapingula ukufwa,+ pantu aba muli ici calo,+ bamalaika na bantu balatutamba. 10 Imwe mutumona abawelewele+ pa mulandu wa kukonka Kristu, lelo mwe bene muimona aba mano pa mulandu wa kukonka Kristu; ifwe twalinaka, lelo imwe mwalikosa; imwe mwalicindikwa, lelo ifwe twalisuulwa. 11 Ukufika na ino ine nshita tulacula ku nsala+ na ku cilaka,+ tulasapula,* tulapumwa,+ tatukwata amayanda, 12 kabili tulabombesha ne minwe yesu.+ Nga batutuka, tulapaala;+ nga batucusha, tulashipikisha;+ 13 nga batuseebanya, tulaba ne cikuuku pa kubasuka.+ Ukufika fye na nomba batumona nge fisooso fya muli cino calo, kabili ifyo basuula.

14 Nshilelemba ifi fintu pa kuti inenge mumfwe insoni, lelo ni pa kuti imukonkomeshe nga bana bandi abo natemwa. 15 Pantu nangu mwingakwata abamusambilisha* pali Kristu abali 10,000, tamwakwata bashinwe abengi; lelo nine shinwe muli Kristu pantu nine namusambilishe imbila nsuma.+ 16 E ico ndemupaapaata, ndeti mulempashanya.+ 17 E mulandu wine ndetumina Timote kuli imwe, pantu ena mwana wandi uo natemwa kabili uwa cishinka muli Shikulu. Akesamwibukishako ifyo nkonka pa kubomba umulimo wa kwa Kristu Yesu,+ nge fyo nsambilisha mu filonganino fyonse.

18 Bamo pali imwe nabatampa ukuitutumuna kwati nalimo nshakese kuli imwe. 19 Lelo Yehova* nga atemwa, ndi no kwisa ili line. Nga naisa nkesaishiba amaka ya baleitutumuna, te fintu balanda. 20 Pantu Ubufumu bwa kwa Lesa tabumonekela mu fyo umuntu alanda, lelo bumonekela mu maka ya kwa Lesa. 21 Cinshi ico mulefwaya? Bushe mulefwaya nkese kuli imwe ne cikoti,+ nelyo mulefwaya nkese no kutemwa no bufuuke?

5 Na kuba calyumfwika ukuti bamo pali imwe balacita ubulalelale,*+ nabo ubwa kuti nangu fye bena fyalo tababucita, ubwa kuti umo pali imwe ekala no* mukashi wa kwa wishi.+ 2 Bushe ici ca kuitakishishapo no kuitakishishapo? Bushe tamufwile ukumfwa ububi+ sana no kufumya uwacitile icabipa ifi muli imwe?+ 3 Nangu ca kuti nshili na imwe, mu mupashi mwena ndi pamo na imwe, kabili nimpingula kale umuntu uwacita ifi, kwati fye ndi na imwe. 4 Ilyo mukalongana pamo mwi shina lya kwa Shikulu Yesu, mukeshibe ukuti na ine wine ndi pamo na imwe mu mupashi, no kuti amaka ya kwa Shikulu Yesu nayo yali pamo na imwe, 5 kabili mukapeele uyo muntu kuli Satana+ pa kuti iyi mibele yabipa ikafume mu cilonganino, pa kuti cikabe icasanguluka mu bushiku bwa kwa Shikulu.+

6 Ukuitakisha kwenu takwawama. Bushe tamwaishiba ukuti icitutumushi icinono citutumusha umufuba+ onse? 7 Fumyenimo icitutumushi ca kale, pa kuti imwe mube umufuba upya, pantu tamufwile ukuba icitutumushi muli imwe. Pantu Kristu, impaanga+ ya pa Cakucilila alipeelwa ilambo.+ 8 E ico ilyo tulesefya umutebeto+ wa Cakucilila tapafwile ukuba umukate umwaba icitutumushi ca kale, nelyo icitutumushi ca lubembu ne ca kucita ifyabipa, lelo pafwile ukuba umukate umushaba icitutumushi. E kutila umukate wa cishinka ne cine.

9 Muli kalata namulembeele, namwebele ukuti mufwile ukuleka ukwampana na bacita ubulalelale,* 10 nshalelanda pa bantu abacita ubulalelale* aba muli cino calo+ nelyo pa bafunushi nangu pa bapuupu nelyo abapepa utulubi. Nga ca kuti e bo nalelandapo, ninshi mufwile ukufuma muli ici calo.+ 11 Lelo nomba ndemulembela ukuti, muleke ukwampana+ na onse uwaishibikwa ukuti wa bwananyina uucita ubulalelale,* nelyo umufunushi,+ nelyo uupepa utulubi, nelyo uwa miponto,* nelyo cakolwa,+ nelyo umupuupu,+ kabili te ca kwesha no kulya nankwe. 12 Pantu bushe nine mfwile ukupingula aba kunse ya cilonganino? Bushe te ba mu kati imwe mupingula, 13 e lyo Lesa apingula aba kunse?+ “Fumyeni uyo uucita ifyabipa mwi bumba lyenu.”+

6 Bushe umo pali imwe nga nakwata umulandu no munankwe,+ kuti afwaya no kuya ku cilye pa ntanshi ya bashalungama, mu cifulo ca kuya ku ba mushilo? 2 Nelyo bushe tamwaishiba ukuti aba mushilo bakapingula aba muli ici calo?+ Kabili nga ca kuti nimwe mukapingula aba muli ici calo, bushe tamwafikapo ukupingula imilandu iinono sana? 3 Bushe tamwaishiba ukuti tukapingula bamalaika?+ Nomba, cinshi mwingafililwa ukupingula imilandu iinono iya muli buno bwikashi? 4 E ico nga ca kuti mupingula+ ifya buno bwikashi, bushe abo icilonganino cimona ukuti tabafikapo e bo musonta ukuba bakapingula? 5 Ndelanda ifi pa kuti mumfwe insoni. Bushe pali imwe tapaba uwa mano nangu umo, uwingapingula bamunyina? 6 Lelo uwa bwananyina alatwala uwa bwananyina munankwe ku cilye, na ko ku bantu abashatetekela!

7 E ico ifi mutwalana ku filye mulalufyanya. Cinshi ico mushisalilapo fye ukumufyenga?+ Cinshi mushisalilapo fye ukumucenjesha? 8 Lelo mulafyenga bamunyinenwe kabili mulabacenjesha!

9 Nelyo bushe tamwaishiba ukuti abashalungama tabakapyane Ubufumu bwa kwa Lesa?+ Mwilufiwa.* Abacita ubulalelale,*+ abapepa utulubi,+ abacende,+ abaume abasuminisha abaume banabo ukulaala nabo,+ abaume abalaala na baume banabo,+ 10 abapuupu, abafunushi,+ bacakolwa,+ aba miponto,* na bacenjesha abanabo, tabakapyane Ubufumu bwa kwa Lesa.+ 11 Kabili ifi fine e fyo imwe bamo mwali. Lelo nomba mwalisambwa,+ mwalisangululwa+ kabili mwalilungamikilwa+ mwi shina lya kwa Shikulwifwe Yesu Kristu na mu mupashi wa kwa Lesa wesu.

12 Ine nalikwata insambu* sha kucita fyonse, lelo te fyonse ifingangafwa.+ Nalikwata insambu sha kucita fyonse, lelo nshakaleke icintu nangu cimo cikalentungulula. 13 Ifya kulya fiya mu mala, na mala yabelako ifya kulya, lelo Lesa akonaula+ fyonse fibili. Nomba umubili tawabelako ubulalelale,* lelo wa kwa Shikulu,+ kabili Shikulu e mwine wa mubili. 14 Nomba Lesa uwabuushishe Shikulu+ ku bafwa,+ na ifwe akatubuusha ku maka yakwe.+

15 Bushe tamwaishiba ukuti imibili yenu filundwa fya kwa Kristu?+ E ico, bushe mulefwaya mfumye ifilundwa kuli Kristu imfisuntinkanye kuli cilende? Nakalya! 16 Bushe tamwaishiba ukuti uuisuntinkanya kuli cilende, aba umubili umo na cilende? Pantu Lesa atile, “Aba babili bakaba umubili umo.”+ 17 Lelo uuisuntinkanya kuli Shikulu atontonkanya nga ena.*+ 18 Fulumukeni ubulalelale!+ Ulubembu lonse ulo umuntu engacita lwa kunse ya mubili wakwe, lelo uucita ubulalelale* abembukila umubili wakwe.+ 19 Bushe tamwaishiba ukuti umubili wenu litempele+ lya mupashi wa mushilo uwaba muli imwe, uo Lesa amupeela?+ Muli ba kwa Lesa,+ 20 pantu Lesa amushitile pa mutengo uukulu.+ E ico, mulebomfya imibili+ yenu mu nshila iingalenga Lesa acindikwa.+

7 Nomba pali filya mwalembele, ndemweba nati, kuti cawama nga ca kuti umwaume taleikata* umwanakashi; 2 lelo pa mulandu wa kuti abantu abengi balacita ubulalelale,* umwaume onse afwile ukuba no mukashi+ wakwe kabili umwanakashi onse na o afwile ukuba no mulume+ wakwe. 3 Umulume alepeela umukashi ico afwile ukumupeela, no mukashi na o alecita ifi fine ku mulume+ wakwe. 4 Umukashi takwata amaka pa mubili wakwe, kano umulume wakwe; umulume na o takwata amaka pa mubili wakwe, kano umukashi wakwe. 5 Mwilatanana, kano fye nga namusuminishanya ukwikala fye pa nshita imo, pa kuti mubomfye iyo nshita ku kupepa e lyo pa numa mube pamo, pa kuti Satana elamutunka pa mulandu wa kuti namufilwa ukuilama. 6 Kwena kuti mwacita ifi nalanda, lelo te funde namupangila. 7 Kanshi abantu bonse nga baali ifyo naba. Lelo cila muntu Lesa alimupeela ica bupe,+ uyu ica musango uyu, umbi na o ica musango umbi.

8 Nomba nde-eba abashimbe na bamukamfwilwa nati kuti cawama nga batwalilila ukuba ifyo naba.+ 9 Lelo nga bafilwa ukuilama, naboope nelyo boopwe, pantu cawamapo ukucita ifi ukucila ukulacula ne nsuuna.+

10 Nde-eba abaupana, nomba te ine lelo ni Shikulu, ukuti umukashi tafwile ukufuma ku mulume+ wakwe. 11 Nomba nga afumako, tafwile ukuupwa. Lelo nga afilwa ukushipikisha afwile ukubwelela ku mulume wakwe; kabili umulume na o talingile ukusha umukashi wakwe.+

12 Lelo bambi nabo nine ndebeba, te Shikulu+ alebeba, ndeti: Nga ca kuti uwa bwananyina alikwata umukashi uushatetekela, kabili uyo umukashi alisumina ukulaikala nankwe, tafwile ukumusha; 13 kabili nga ca kuti umwanakashi akwata umulume uushatetekela, lelo uyu umulume alisumina ukulaikala nankwe, tafwile ukumusha. 14 Pantu umukashi alalenga umulume uushatetekela aba uwa mushilo, no mulume uwatetekela alalenga umukashi uushatetekela aba uwa mushilo; nga te ifyo ninshi abana benu kuti baba abakowela, lelo nomba ba mushilo. 15 Nomba uushatetekela nga asalapo ukufuma* ku mwina mwakwe, nafumeko; nga caba ifi munyinefwe nelyo nkashi te kuti atwalilile ukwikala nankwe, lelo ninshi Lesa namwita pa kuti muleikala mu mutende.+ 16 Pantu we mukashi waishiba shani limbi niwe ukapususha umulume obe?+ Na iwe we mulume, waishiba shani limbi niwe ukapususha umukashi obe?

17 Na lyo line cila muntu atwalilile ukuba ifyo aali ilyo Yehova* amwitile.+ Kabili ifi fine e fyo nde-eba aba mu filonganino fyonse. 18 Bushe kwaliba uo baitile+ ninshi alisembululwa? Atwalilile ukuba uwasembululwa. Bushe kwaliba uo baitile ninshi tasembululwa? Tafwile ukusembululwa.+ 19 Ukusembululwa takwacindama, ukukanasembululwa na ko takwacindama;+ icacindama kulakonka amafunde+ ya kwa Lesa. 20 Cila muntu atwalilile+ ukuba ifyo aali ilyo bamwitile. 21 Bushe bakwitile ninshi uli musha? Wisakamana;+ lelo nga wamona apo wingasangila ubuntungwa, shukila ilyo ishuko. 22 Pantu onse uo Shikulu aitile ninshi musha, nomba mubomfi wa kwa Shikulu kabili muntungwa;+ ifi fine e fyo caba na ku o Shikulu aitile ninshi muntungwa, nomba musha wa kwa Kristu. 23 Bamushitile pa mutengo uukulu;+ lekeni ukuba abasha ba bantu. 24 Mwe ba bwananyina, cila muntu atwalilile ukuba ifyo aali ilyo bamwitile. Atwalilile ukuba ifi fine pa cinso ca kwa Lesa.

25 Nomba pa bashimbe,* Shikulu tampeelapo ifunde, lelo apo ku luse lwakwe alilenga naba uwa cishinka, nalamupandako amano.+ 26 E ico pa mulandu na mafya ya muli shino nshiku, kuti cawamisha umuntu atwalilila fye ukuba ifyo aba. 27 Bushe walyupa? Leka ukufwaya ukufuma ku mukashi obe.+ Bushe tawakwata umukashi? Leka ukufwaya umwanakashi wa kuupa. 28 Nomba nangu waupa, ninshi taubembwike. Kabili umushimbe nga aupa nelyo aupwa, ninshi tabembwike. Lelo umuntu nga aupa nelyo nga aupwa alakwata amafya* mu bumi bwakwe. Nomba ine ndefwaya fye ukumucenjeshako.

29 Na kabili, mwe ba bwananyina ndetila, inshita iisheleko naicepa.+ E ico, ukufuma ino nshita abaupa babe nga bashaupa, 30 abalila babe nga bashilila, abasekelela babe nga bashisekelela, abashita babe nga bashakwata nangu cimo, 31 kabili ababomfya cino calo babe nga bashicibomfya sana; pantu ifintu pano calo filealuka. 32 Cine cine ndefwaya imwe muleke ukusakamikwa. Uushaupa abika amano ku fya kwa Shikulu, pa kuti amone ifyo engalasekesha Shikulu. 33 Lelo uwaupa abika amano ku fya muli ici calo,+ pa kuti amone ifyo engalasekesha umukashi wakwe, 34 kabili alatangalikwa. Nomba umwanakashi uushaupwa na nacisungu, babika amano ku fya kwa Shikulu,+ pa kuti babe aba mushilo ku mubili na mu fyo batontonkanya. Lelo uwaupwa ena abika amano ku fya muli ici calo, pa kuti amone ifyo engalasekesha umulume wakwe. 35 Nomba ico ndelandila ifi ni pa kuti ifintu filemuwamina, te kufwaya ukumulesha fimo. Lelo ndefwaya ukuti mwishibe bwino icawama, no kuti mulebombela Shikulu ukwabula ifya kumupumfyanya.

36 Lelo nga ca kuti umuntu asanga ukuti cilemukosela ukwikala umushimbe, e lyo nacila na pa mushinku wa bwaice, kabili ukuupa e kwamuwamina, nacite ico alefwaya; tabembwike. Naope.+ 37 Nomba nga ca kuti umo nashipa mu mutima wakwe, kabili talemona ukuti afwile fye ukuupa, lelo nakwata amaka ya kuilama pa co alefwaya, kabili napanga mu mutima wakwe ukutwalilila fye ukuba umushimbe, ninshi acita bwino.+ 38 E ico uwaupa ninshi acita bwino, lelo uushupile ninshi ena acita bwino sana.+

39 Umukashi alaba uwakakwa pa nshita yonse iyo umulume wakwe aba uwa mweo.+ Lelo umulume wakwe nga afwa, alakwata ubuntungwa bwa kuupwa kuli onse uo alefwaya. Nomba afwile ukuupilwa fye muli Shikulu.+ 40 Lelo ndemona ukutila kuti aba ne nsansa sana nga atwalilila fye ukwabula ukuupwa; kabili nalishininkisha ukutila na ine nalikwata umupashi wa kwa Lesa.

8 Nomba nalamulembela pa fya kulya ifyo batuulila utulubi.+ Natwishiba ukuti bonse twalishiba ili lyashi,+ nomba ukwishiba kulatuumika, lelo ukutemwa kulakuula.+ 2 Nga ca kuti umuntu amona ukuti alishiba icintu, ninshi acili talacishiba ifyo afwile ukucishiba. 3 Lelo umuntu nga alitemwa Lesa, ninshi Lesa na o alimwishiba.

4 Nomba ukukuma ku kulya ifya kulya ifyo batuulila utulubi, twalishiba ukuti akalubi tapali ifyo kaba,+ no kuti kwaba fye Lesa umo.+ 5 Pantu nangu kwaliba abo beta ukuti balesa, mu muulu nangu pano isonde,+ nga filya fine kwaba “balesa” abengi na “bashikulu” abengi, 6 ifwe twaishiba ukuti kwaba fye Lesa umo,+ Shifwe,+ uko fyonse fyafuma, na ifwe tuli bantu bakwe;+ kwaba na Shikulu umo, Yesu Kristu, kabili ifintu fyonse fyaishilebako+ ukupitila muli ena, na ifwe e mo twabela no mweo.

7 Lelo te bonse baishiba+ ifi. Nomba bamo pa mulandu wa kuti kale balepepa utulubi, nga balelya ifya kulya bamona kwati balelya ifyo batuulila utulubi,+ kabili pa mulandu wa kuti kampingu yabo yalinaka, ilakowela.+ 8 Lelo ifya kulya tafyakatupalamike kuli Lesa;+ nga tatuliile, tatubulisha nangu cimo, kabili nga twalya,+ tatunonkelamo nangu cimo. 9 Lelo muleba abacenjela pa kuti insambu shenu shilalenga mulepunwisha abanaka.+ 10 Pantu nga ca kuti umuntu uwaba na kampingu iyanaka akumona we waishiba ulelya mwi tempele lya tulubi, bushe takapame ica kuti akalelya ne fyo batuulila utulubi? 11 E ico pa mulandu wa kuti iwe walishiba, munonko uwanaka, uo Kristu afwilile+ aleonaika. 12 Nga mulebembukila bamunyinenwe muli iyi nshila kabili nga mulelenga kampingu+ yabo iyanaka ileonaika, ninshi mulebembukila Kristu. 13 E mulandu wine nga ca kuti ifya kulya filelenga ndepunwisha munyinane, ninshi nshakalyepo inama na kabili, pa kuti nilapunwisha+ munyinane.

9 Bushe nshili muntungwa? Bushe nshili mutumwa? Bushe nshamwene Yesu Shikulwifwe?+ Bushe te imwe mulimo wandi muli Shikulu? 2 Nangu nshingaba umutumwa kuli bambi, kuli imwe kwena ndi mutumwa, pantu icifwati ca butumwa bwandi muli Shikulu nimwe.

3 Ifyo ningaipokolola ku balendubulwisha ni ifi: 4 Bushe tatwakwata insambu sha kulya no kunwa? 5 Bushe tatwakwata insambu sha kusenda umukashi+ uwatetekela,* nge fyo abatumwa banensu na bamunyina+ ba kwa Shikulu na Kefasi*+ bacita? 6 Nelyo bushe nine fye na Barnaba+ tushakwata insambu sha kuleka ukubomba incito ya kusangilamo imikalile? 7 Bushe mushilika nshi uuilipilila ifya kubomfya mu nkondo? Nani uulima ibala lya myangashi uushilyako ifisabo fya liko?+ Nangu nani uucema umukuni wa nama uushinwako umukaka wa shiko?

8 Bushe ndelanda ifi fintu ukulingana ne fyo abantu bafimona? Nangu bushe te fyo na Mafunde yalanda? 9 Pantu calilembwa mu Mafunde ya kwa Mose ati: “Tamufwile ukukaka ing’ombe ku kanwa ilyo ilenyantaula ingano+ pa kushisokola.” Bushe ni ing’ombe sheka Lesa asakamana? 10 Nangu bushe te pa mulandu wesu alandiile ifi? Cine cine ni pa mulandu wesu Mose alembeele aya amashiwi. Pantu umuntu uulelima no ulepuma ingano, bacita ifi pa mulandu wa kuti benekela ukuti bakakwatako fimo.

11 Nga ca kuti ifwe twatandile ifya kwa Lesa muli imwe, bushe nga twasombola muli imwe+ ifyo tukabila, ninshi twacilamo? 12 Nga ca kuti abantu bambi balikwata insambu sha kulya kuli imwe, bushe ifwe insambu twakwata tashacilapo? Na lyo line tatubomfya ishi nsambu,+ lelo tulashipikisha muli fyonse, pa kuti twicilikila umulimo wa mbila nsuma ya kwa Kristu.+ 13 Bushe tamwaishiba ukuti ababomba imilimo ya kwa Lesa balya ifya mwi tempele, no kuti ababombela lyonse ku ciipailo balya ifya pa ciipailo?+ 14 Ifi fine e fyo na Shikulu alandile ukuti ababila imbila nsuma baleliila mu mbila nsuma.+

15 Lelo ine nshabomfyapo insambu nangu shimo pali ishi.+ Ico nembeele te pa mulandu wa kuti ndefwaya mulencitila ifi, pantu cawamapo ine nafwa ukucila—nshakaleke umuntu nangu umo akampoke ico njitakishishapo!+ 16 Pantu nga ca kuti nabila imbila nsuma, te ca kuitakishishapo, pantu e mulimo mfwile ukubomba. Kuti cambipila sana nga nshibilile imbila nsuma!+ 17 Nga momba uyu mulimo mu kuitemenwa, bakampeela icilambu; lelo na lintu nabomba uyu mulimo pa mulandu wa kuti mfwile fye ukuubomba, Lesa alimpeela+ umulimo uwacindama. 18 Inga icilambu candi ni cinshi? Icilambu candi kubila imbila nsuma ukwabula ukuti bandipililepo, pa kuti nilabomfya bubi bubi insambu shandi apo nine kabila wa mbila nsuma.

19 Pantu nelyo ndi muntungwa ku bantu bonse, nali-isangula umusha wa bonse, pa kuti ninganonka abantu abengi. 20 Ku baYuda naishileba ngo muYuda, pa kuti nonke abaYuda;+ ku bakonka amafunde naishileba ngo ukonka amafunde, pa kuti nonke abakonka amafunde, nangu ca kuti ne mwine nshikonka amafunde.+ 21 Ku bashakwata amafunde naishileba ngo ushakwata amafunde, pa kuti nonke abashakwata amafunde, nangu ca kuti ndakonka amafunde ya kwa Lesa, kabili ntungululwa na mafunde ya kwa Kristu.+ 22 Ku banaka naishileba uwanaka, pa kuti nonke abanaka.+ Kanshi ku bantu bonse mba fye nge fyo bali. E ico ndacita fyonse ifyo ningile ukucita, pa kuti ningapusushako bamo. 23 Ncita fyonse pa mulandu wa mbila nsuma, pa kuti ndeshimikilako abantu.+

24 Bushe tamwaishiba ukuti ababutuka ulubilo lwa kucimfyanya bonse balabutuka, lelo umo fye apoka icilambu? Mulebutuka bwino pa kuti mukapoke icilambu.+ 25 Nomba bonse ababa mu mangalo ya kucimfyanya balailama muli fyonse. Kwena ico bacitila ifi ni co bafwaya ukupoka icilongwe* iconaika.+ Lelo ico ifwe tucitila ifi ni co tufwaya ukupoka icilongwe icishingonaika.+ 26 E ico ine ifyo mbutuka, te filya uulebutuka icibutukebutuke+ abutuka; ifyo mpoosa amakofi te filya uuleuma umwela apoosa; 27 lelo ntuutaula* umubili wandi+ no ku-uteka ubusha, pa kuti ilyo nashimikila abantu, Lesa elamona ukuti nshafikapo.

10 Nomba ndefwaya mwe ba bwananyina mwishibe ukuti ifikolwe fyesu fyonse fyali mwi samba lye kumbi,+ kabili fyonse fyapitile muli bemba+ 2 kabili bonse babatishiwe muli Mose ninshi bali mwi samba lye kumbi ilyo bapitile muli bemba. 3 Bonse balelya ifya kulya+ fimo fine ifyo Lesa alebapeela, 4 kabili bonse balenwa ifya kunwa+ fimo fine ifyo Lesa alebapeela. Pantu balenwa mu cilibwe ca kwa Lesa icalebakonka, na cilya cilibwe* ni Kristu.+ 5 Lelo abengi pali aba bafwilile mu matololo,+ pantu Lesa tatemenwe ifyo bacitile.

6 Nomba ifi fintu fyaishileba fya kutusambilisha, pa kuti twilakumbwa ifyabipa, nga filya balya bafikumbilwe.+ 7 Kabili twilapepa utulubi, nga filya bamo pali aba bacitile; nga filya calembwa ukuti: “Abantu balikele balalya no kunwa, kabili balimine balasangalala.”+ 8 Na pa kuti twilacita ubulalelale,* filya bamo pali aba bacitile, ica kuti mu bushiku bumo+ fye abantu 23,000 pali aba balifwile. 9 Kabili twilaesha+ Yehova,* filya bamo pali aba bamweseshe, ica kuti insoka+ shalibepeye. 10 Kabili twilailishanya, filya bamo pali aba bailishenye,+ ica kuti malaika* alibepeye.+ 11 Nomba tufwile ukusambililako kuli ifi ifyabacitikiile, kabili fyalilembelwe pa kutusoka+ fwe baleikala mu nshiku sha kulekelesha.

12 E ico uuletila naiminina ndi, acenjele epali awa.+ 13 Takwaba ubwesho ubwamuponenapo ubushiponenako abantu bambi.+ Nomba Lesa wa cishinka, kabili takaleke mukakwate ubwesho ubo mushingashipikisha,+ lelo ilyo ubo bwesho bukesa, akafwaya na pa kuti mukafuminemo pa kuti mukabe na maka ya kubushipikisha.+

14 E ico mwe batemwikwa bandi, fulumukeni ukupepa utulubi.+ 15 Ndelanda nge fyo ningalanda ku bantu aba mano; e ico mwalamona mwe bene nga ca kuti ifyo ndelanda fishinka nelyo iyo. 16 Bushe kapu ye paalo iyo tutashishapo, taimininako umulopa wa kwa Kristu?+ Bushe umukate uo tumokaula, tawimininako umubili wa kwa Kristu?+ 17 Pantu kwaba fye umukate umo, no yu mukate nifwe bene. Nangu twaba abengi, twaba fye umubili umo,+ pantu ifwe bonse tulya umukate uyu wine umo.

18 Moneni ificita abena Israele: Bushe ababombela ku ciipailo tabalyako amalambo ayo batuula pa ciipailo?+ 19 Nomba finshi ningalanda? Bushe ntile ifyo batuulila akalubi fyalicindama, nelyo akalubi kalicindama? 20 Awe; ndetila amalambo ayo abena fyalo batuula, batuulila ifibanda, te Lesa iyo;+ nomba nshilefwaya imwe muleampana ne fibanda.+ 21 Te kuti mulenwena muli kapu ya kwa Yehova* na muli kapu ya fibanda; te kuti mulelya “ifya kulya fya kwa Yehova”*+ e lyo ne fya kulya fya fibanda. 22 Nalimo ‘bushe tulefwaya Yehova* abe no bufuba’?+ Bushe twalikosa ukumucila?

23 Nangu ca kuti amafunde yalisuminisha fyonse, te fyonse fingatwafwa. Nangu ca kuti amafunde yalisuminisha fyonse; te fyonse ifingatukuula.+ 24 Mwilafwaya fye ifingamuwamina, lelo mulefwaya ne fingawamina abanenu.+

25 Conse ico bashitisha pa maliketi ya nama mulelya. Nga mwasalapo ukulya, kampingu taifwile ukulamucusha, 26 pantu “isonde na fyonse ifyabamo+ fya kwa Yehova.”* 27 Uushatetekela nga amwita kabili mwasumina ukuya, conse ico amupeela mulelya, kabili mwilaipusha nangu cimo pa mulandu wa kampingu yenu. 28 Lelo nga ca kuti umuntu amweba ati: “Ili lilambo ilyo batuulila akalubi,” tamufwile ukulya pa mulandu wa muntu uwamweba na pa mulandu wa kampingu.+ 29 Nshilelanda pali kampingu yobe, lelo ndelanda pali kampingu ya muntu umbi. Pantu cinshi umuntu engalampingwila ukubomfya kampingu+ yakwe, e lyo ninshi imomfeshe ubuntungwa bwandi? 30 Nangu ca kuti nimpepa kuli Lesa pa fya kulya ifyo nakwata insambu sha kulya, bushe mfwile ukulya nga ca kuti filelenga abantu balalanda ifyabipa pali ine?+

31 E ico nga mulelya nelyo nga mulenwa nangu mulecita ifintu fimbi ifyashala, mulecita ifintu fyonse mu nshila iingalenga Lesa acindikwa.+ 32 Muleba abacenjela pa kuti mwilacita ifingapunwisha abaYuda, abaGriki e lyo ne cilonganino ca kwa Lesa,+ 33 nga filya fine na ine mfwaya ukucita ifintu ifingasekesha abantu bonse muli fyonse ifyo ncita. Nshifwaya fye ukucita ifingangwamina,+ lelo mfwaya ukucita ifingawamina abengi pa kuti bengapusuka.+

11 Mulempashanya, nga filya fine na ine mpashanya Kristu.+

2 Ndemutasha pantu mulanjibukisha muli fyonse kabili mulakonka fyonse* ifyo namwebele. 3 Lelo ndefwaya mwishibe ukuti umutwe wa mwaume onse ni Kristu;+ umutwe wa mwanakashi mwaume;+ no mutwe wa kwa Kristu ni Lesa.+ 4 Umwaume onse uupepa nelyo uusesema ninshi nafimba ku mutwe, aseebanya umutwe wakwe; 5 lelo umwanakashi onse uupepa nelyo uusesema+ ninshi nafimbula ku mutwe, aseebanya umutwe wakwe, pantu aba fye ngo mwanakashi uo babeya umushishi. 6 Pantu umwanakashi nga tafimbile ku mutwe, ninshi cawamapo ukumuputula umushishi; nomba apo ca nsoni umwanakashi ukuputula umushishi nelyo ukumubeya umushishi, ninshi afwile ukulafimba ku mutwe.

7 Umwaume tafwile ukufimba ku mutwe, pantu cipasho+ ca kwa Lesa kabili e bukata bwakwe, lelo umwanakashi bukata bwa mwaume. 8 Pantu umwaume tafumine mu mwanakashi, lelo umwanakashi e wafumine mu mwaume.+ 9 Na kabili umwaume tabumbilwe pa mulandu wa mwanakashi, lelo umwanakashi abumbilwe pa mulandu wa mwaume.+ 10 Pali uyu mulandu na pa mulandu wa bamalaika,+ umwanakashi afwile ukulafwala icishibilo ku mutwe ica kulanga ukuti alanakila.

11 Lelo pa basambi ba kwa Shikulu te kuti kube umwaume ukwabula umwanakashi, kabili te kuti kube umwanakashi ukwabula umwaume. 12 Pantu filya fine umwanakashi afumine mu mwaume,+ e fyo no mwaume afuma mu mwanakashi; lelo ifintu fyonse fyafuma kuli Lesa.+ 13 Pinguleni mwe bene: Bushe nacilinga umwanakashi ukupepa kuli Lesa ukwabula ukufimba ku mutwe? 14 Bushe mu cifyalilwa fye te ca nsoni umwaume ukuba no mushishi uutali? 15 Umwanakashi ena nga ali no mushishi uutali, alacindikwa. Pantu umushishi e o bamupeela, tabamupeela ica kufimba ku mutwe. 16 Lelo nga ca kuti umuntu alesuusha ifi, ifwe tatwakwata fimbi ifya kukonka ne filonganino fya kwa Lesa na fyo tafyakwata fimbi ifya kukonka.

17 Ilyo ndemweba ifyo mufwile ukulakonka, nshamutashe, pantu nga mwalongana, ifyabipa ifyo mucita filafulapo ukucila ifisuma ifyo mucita. 18 Pantu ica kubalilapo fye, nalyumfwa ukuti nga mwalongana palaba amalekano; kabili nalisumina ukuti fimo pa fyo naumfwa fya cine. 19 Pantu nangu cibe shani amalekano yena yakabako,+ pa kuti abasambi ba cine cine bengeshibikwa.

20 Nga mwalongana pa kuti mulye Umulaalilo wa kwa Shikulu,+ tamucita ifyo mufwile ukulacita pa kulya. 21 Pantu pa kulya umulaalilo wa kwa Shikulu, mubalilapo ukulya ifya kulya fya cungulo. E ico bamo baba fye ne nsala, bambi bena balakolwa. 22 Bushe tamwakwata amayanda umo mwingalaliila kabili umo mwingalanwena? Nelyo bushe mwalisuula icilonganino ca kwa Lesa pa kuti mulelenga abashakwata nangu cimo insoni? Cinshi nalamweba? Bushe imutashe? Pali ici cena nshamutashe.

23 Pantu ifyo namusambilisha fintu nasambilile kuli Shikulu, ifya kuti mu nshita ya bushiku+ pa bushiku Shikulu Yesu bali no kumufutuka, abulile umukate, 24 kabili ilyo atootele Lesa, aliumokawile e lyo alanda ati: “Uyu mukate cimpashanya ca mubili wandi+ uulepeelwa pa mulandu wenu. Mulecita ici pa kunjibukisha.”+ 25 Ifi fine e fyo acitile na kuli kapu.+ Ilyo bapwishishe ukulya umulaalilo, alandile ati: “Iyi kapu ileimininako icipangano+ cipya ica pa mulopa+ wandi. Mulecita ifi, pantu lyonse ilyo mwanwamo, ninshi mulenjibukisha.”+ 26 Pantu lyonse nga mwalya uyu mukate kabili mwanwa ifili muli iyi kapu, ninshi mulebila imfwa ya kwa Shikulu, mpaka akese.

27 E ico onse uwalya umukate nelyo uwanwa ifili muli iyi kapu ya kwa Shikulu e lyo ninshi naishiba ukuti talingile, ninshi abembukila umubili no mulopa wa kwa Shikulu. 28 Umuntu atale aimone nga nalinga,+ e lyo engalyako umukate no kunwa ifili muli kapu. 29 Pantu umuntu nga alya no kunwa ukwabula ukwishiba bwino bwino uyu mubili, ninshi aleiletela ubupingushi. 30 E mulandu wine abengi pali imwe babela abanaka kabili abalwala, e lyo bambi bena balifwa.*+ 31 Nomba nga natubikako amano pa kuti tumone nga natulinga, te kuti tupingulwe. 32 Lelo nga twapingulwa, ninshi Yehova*+ atusalapula, pa kuti twikakandilwa pamo na ba muli ici calo.+ 33 E ico mwe bamunyinane, ilyo mwalongana pa kuti mulye Umulaalilo wa kwa Shikulu, mulepembelana. 34 Umuntu nga ali ne nsala, alye ku mwakwe, pa kuti mwipingulwa+ nga mwalongana pamo. Nomba ifyashala nkesalungika nga naisa.

12 Nomba bamunyinane, ine nshilefwaya ukuti mwi-ishibapo nangu cimo pa fya bupe+ ifyo umupashi upeela. 2 Mwalishiba ukuti ilyo mwali abena fyalo,* mwalepepa utulubi+ utushilanda kabili mwaletukonka konse uko twalemutungulula. 3 Nomba ndefwaya mwishibe ukuti takuli umuntu uutungululwa no mupashi wa kwa Lesa uwingalanda ati: “Yesu alitiipwa!” kabili takuli uwingalanda ati: “Yesu e Shikulu!” nga ca kuti tatungululwa no mupashi wa mushilo.+

4 Nomba kwaba ifya bupe ifyalekanalekana, lelo umupashi+ wena waba fye umo; 5 kabili kwaliba imilimo+ iyapusanapusana, lelo kwena kwaba fye Shikulu umo; 6 kabili kwaliba ifya kucita ifyalekanalekana, lelo Lesa uulenga ukuti bonse+ baleficita ni umo wine. 7 Nomba umupashi umonekela mu muntu umo umo pa kuti ifintu filewamina bonse.+ 8 Pantu umupashi ulapeela umuntu amaka ya kulanda ifilanga ukuti alikwata amano. Umupashi umo wine ulapeela umuntu umbi amaka aya kulanda ifintu ifilanga ukuti alishiba ifintu, 9 e lyo umuntu umbi, umupashi umo wine wamupeela icitetekelo,+ na umbi wamupeela ica bupe ca kundapa,+ 10 umbi na o wamupeela ica bupe ca kucita ifipesha amano,+ umbi wamupeela ica bupe ca kusesema,+ e lyo umbi wamupeela ica bupe ca kwiluka nampo nga mashiwi yafumine kuli Lesa, umbi na o wamupeela ica bupe ca kulanda indimi ishapusanapusana,+ e lyo umbi wamupeela ica bupe ca kwilula indimi.+ 11 Lelo iyi milimo yonse umupashi umo wine e ubomba, e upeela umuntu umo umo ifyo uwine ulefwaya.

12 Nangu ca kutila ifilundwa fya muntu fyaba ifingi, umubili wena waba fye umo, ne filundwa fyonse ifya uyo mubili,+ nangu ca kuti fyaba ifingi, fyaba fye umubili umo, ifi fine e fyo na Kristu aba. 13 Pantu ku mupashi umo wine e ko ifwe bonse twabatishiwilwe pa kuti tube umubili umo, nampo nga tuli baYuda nelyo tuli baGriki, nampo nga tuli basha nelyo tuli bantungwa, kabili ifwe bonse twapokelele umupashi umo.

14 Pantu cine cine no mubili wine tawakwata fye icilundwa cimo, lelo wakwata ifilundwa ifingi.+ 15 Ulukasa nga lwatila, “Ifi nshili minwe, ninshi nshili cilundwa ca mubili,” te kutila ninshi ulukasa te cilundwa ca mubili. 16 Kabili ukutwi nga kwatila, “Ifi nshili linso, ninshi nshili cilundwa ca mubili,” te kutila ninshi ukutwi te cilundwa ca mubili. 17 Bushe umubili onse auba ilinso, umuntu nga omfwila kwi? Bushe umubili onse auba kutwi, umuntu nga anunshisha kwi? 18 Lelo Lesa abikile ifilundwa mu mubili, cimo cimo ukulingana ne fyo alefwaya.

19 Ifilundwa fyonse ifya mubili afiba icilundwa cimo, bushe nga kwaliba umubili? 20 Nomba kwaliba ifilundwa ifingi, lelo umubili wena waba fye umo. 21 Ilinso te kuti lyebe iminwe aliti, “Nshilemukabila.” Umutwe na o teti webe amakasa auti, “Nshilemukabila.” 22 Nangu fye filundwa ifimoneka ifyanaka filakabilwa, 23 kabili ifilundwa fya mubili ifyo tumona ukuti tafyacindama sana, e fyo tucindika sana,+ ne filundwa fya mubili ifishimoneka bwino sana e fyo tusunga bwino sana, 24 lelo ifilundwa ifimoneka bwino tafikabila no kufisakamana sana. Na lyo line, Lesa alundinkenye umubili mu nshila ya kuti tulesakamana sana ifilundwa ifikabila ukufisakamana, 25 pa kuti mu mubili mwilaba amalekano, lelo cila cilundwa cilesakamana icilundwa cinankwe.+ 26 Icilundwa cimo nga cacula, ifilundwa fyonse ficulila pamo naco;+ icilundwa cimo nga cacindikwa, ifilundwa fyonse fisekelela pamo naco.+

27 Nomba imwe muli mubili wa kwa Kristu,+ kabili cila muntu cilundwa+ ca mubili wa kwa Kristu. 28 Kabili Lesa alibika mu cilonganino abantu abalekanalekana: aba kubalilapo batumwa;+ abalenga bubili ni bakasesema;+ abalenga butatu ni bakasambilisha;+ e lyo pakonka abacita ifipesha amano;+ e lyo pakonka ababa ne ca bupe ca kundapa;+ ababomfi abaishiba ukutungulula;+ na balandila mu ndimi ishapusanapusana.+ 29 Bushe bonse batumwa? Bushe bonse ni bakasesema? Bushe bonse ni bakasambilisha? Bushe bonse balacita ifipesha amano? 30 Bushe bonse balikwata ica bupe ca kundapa? Bushe bonse balalandila mu ndimi?+ Bushe bonse balelula* indimi?+ 31 Lelo muleba no mukoosha wa kufwaisha* ifya bupe+ ifikalamba. Kabili nalamulanga inshila iyawamisha.+

13 Nga ca kuti nandila mu ndimi sha bantu ne sha bamalaika lelo ukutemwa nshakwata, ninshi naba fye kwati cela ca mukuba icilelilalila fye nelyo nga malimba ya nyenjele. 2 Kabili nga nalikwata ica bupe ca kusesema, nangu nga nalishiba umwalola inkaama sha kwa Lesa, nalishiba ne fingi,+ kabili nga nalikwata icitetekelo icakosa ica kutila kuti nasesha ne mpili, lelo ukutemwa nshakwata, ninshi tapali ico naba.*+ 3 Kabili nga napeela fyonse ifyo nakwata pa kuti ndiishe abantu,+ nangu nga naipeela ukufwilapo pa mulandu wa cilumba, lelo nshakwata ukutemwa,+ ninshi tapali ico nkamwenamo.

4 Mu kutemwa+ mwaba ukutekanya*+ ne cikuuku.+ Mu kutemwa tamwaba akalumwa,+ tamwaba ukuitakisha, nangu ukuituumika.+ 5 Tamwaba ukucita ifishawama,+ tamwaba ukucita ifya kuisekesha fye,+ tamwaba ukukalifiwa.+ Tamwaba ukusunga ifilubo.+ 6 Tamwaba ukusekelela pa fishalungama,+ lelo mwaba ukusekelela pa cine. 7 Mu kutemwa mwaba ukusuulako ku fyabipa fyonse,+ mu kutemwa mwaba ukusumina fyonse,+ ukusuubila fyonse+ no kushipikisha fyonse.+

8 Ukutemwa takupwa. Lelo nangu kwaba ifya bupe fya kusesema, ifya kulandila mu ndimi,* nangu ifya kwishiba ifintu mu cipesha amano, fyonse ifi fikapwa. 9 Pantu tatwaishiba fyonse+ kabili tatusesema fyonse, 10 lelo ilyo tukeshiba fyonse, kabili ilyo tukasesema fyonse, tukaleka ukwishiba fye fimo nelyo ukusesema fye fimo. 11 Ilyo nali umwaice, nalelanda ngo mwaice, naletontonkanya ngo mwaice kabili nalepelulula ngo mwaice; lelo apo nomba ndi mukalamba, nalileka ifya bwaice. 12 Pantu pali ino nshita tumwena mu cilola* ca cela icishilenga ifintu filemonekesha, lelo pali ilya nshita cikaba kwati tulemonana icinso ne cinso. Pali nomba nshaishiba fyonse, lelo pali ilya nshita nkeshiba bwino bwino* nga filya fine fye Lesa anjishiba bwino. 13 Nomba ifi fintu fitatu e fyashala: icitetekelo, isubilo no kutemwa, lelo icikalamba pali ifi fyonse kutemwa.+

14 Mule-esha apo mwingapesha ukulanga ukutemwa, lelo mule-esha na maka yenu yonse ukucita ifintu ifingalenga mwapokelela ifya bupe fya mupashi, maka maka ica bupe ca kusesema.+ 2 Pantu uulandila mu lulimi lumbi talanda ku bantu, lelo alanda na Lesa, pantu tapaba nangu umo uumfwa ifyo alanda,+ alandila inkaama+ sha kwa Lesa mu mupashi. 3 Lelo uusesema alakosha, alakoselesha kabili alasansamusha abantu mu fyo alanda. 4 Uulandila mu lulimi lumbi aikosha fye umwine, lelo uusesema akosha icilonganino. 5 Kuti natemwa nga ca kuti imwe bonse mulelandila mu ndimi shimbi,+ nomba ndefwaya mulesesema.+ Cine cine, uusesema alicila uulandila mu ndimi shimbi, lelo uulandila mu ndimi shimbi nga ailula* ifyo alelanda, aba mu cilonganino balakuulwa. 6 Bamunyinane, nga ca kuti naishile kuli imwe ndelandila mu ndimi ukwabula ukumusokolwela ifyo ndelanda,+ nelyo ukwabula ukulenga mufishibe+ nangu ukwabula ukufilandila muli bakasesema, nelyo ukwabula ukumusambilisha, bushe ninshi nimwafwa?

7 Ifi fine e fyo caba na ku filimba, nampo nga mutoolilo nelyo ni nsango. Nga tafilelekaanina pa kulila, bushe iciunda icilefuma ku mutoolilo nelyo kuli nsango, kuti caishibikwa shani? 8 Pantu nga ca kuti ipenga lyalila icililelile, nani engaipekanya ukuya ku nkondo? 9 Na imwe bene nga ca kuti mulelandila mu ndimi isho abantu bashileumfwa, abantu kuti baumfwa shani ifyo mulelanda? Na kuba ninshi mulelandila fye mu mwela. 10 Kwena pano calo paba indimi ishalekanalekana, lelo shonse shalikwata umo shalola. 11 Nga ca kuti umuntu alelanda ululimi ulo nshaishiba, kuti naba ngo mwina fyalo kuli uyo muntu, kabili uulelanda na o kuti aba ngo mwina fyalo kuli ine. 12 E ico apo na imwe mulafwaisha ifya bupe fya mupashi, mulefwaisha ukukwata ifya bupe ifingalenga mwalakosha icilonganino.+

13 E ico uulelandila mu lulimi lumbi afwile ukupepa pa kuti eshibe ifya kwilula* ifyo alelanda.+ 14 Pantu nga ndepepela mu lulimi lumbi, ninshi umupashi e ulepepa, lelo amano yandi yena ninshi tayaliko. 15 Nomba cinshi mfwile ukucita? Nga napepela mu mupashi, ningile no kwishiba ifyo ndepepa. Nga naimbila inyimbo sha malumbo mu mupashi, pa kwimba ningile no kubomfya amashiwi ayo njishibe. 16 Lelo nga wapepa ipepo lya kulumbanya Lesa mu lulimi lumbi, umuntu yaweyawe kuti alandako shani ati “Ameni” pa kusuminisha ifyo wacilalanda, apo teshibe ifyo wacilalanda? 17 Ca cine, ukutootela kwena uletootela fye bwino, lelo taulekuula umunobe. 18 Ndetootela Lesa pantu nalikwata ica bupe ca kulanda indimi ishingi ukucila imwe bonse. 19 Lelo mu cilonganino cawamapo nalanda amashiwi 5 ayo njishibe, pa kuti nsambilisheko na bambi, ukucila ukulanda amashiwi 10,000 mu lulimi lumbi+ ayo nshishibe.

20 Mwe ba bwananyina, mwilatontonkanya+ nga baice. Mu kucita ifyabipa+ e mo mube nga baice; lelo muletontonkanya+ nga bakalamba. 21 Mu Mafunde mwalembwa ukuti: “‘Mu ndimi sha bena fyalo e mo nkalandila na ba bantu kabili mu ndimi sha bantu bambi bambi e mo nkalandila nabo, lelo tabakang’umfwe,’ e fyo Yehova* alanda.”+ 22 E ico ukulandila mu ndimi cishibilo ku bashatetekela,+ te cishibilo ku batetekela. Nomba ukusesema cishibilo ku batetekela, te cishibilo ku bashatetekela. 23 E ico icilonganino conse nga calongana pamo kabili bonse balalandila mu ndimi shimbi, e lyo abantu yaweyawe nelyo abashatetekela baisamo, bushe te kuti batile mwalipena? 24 Lelo nga ca kuti bonse mulesesema, kabili uushatetekela nelyo umuntu yaweyawe aisamo, amashiwi ayo mwingalanda kuti yamulungika kabili kuti yamushinina. 25 Lyena ifyafisama mu mutima wakwe kuti fyaishibikwa, ica kuti awa ubukupeme alapepa na Lesa, aleti: “Cine cine Lesa aba na imwe.”+

26 Nomba finshi mwe bamunyinane mulingile ukulacita? Ilyo mwalongana mu kupepa, umo asamune ulwimbo, umbi asambilishe, umbi ashimike ifyo Lesa amusokolwelele, umbi alandile mu lulimi lumbi, e lyo pabe no wa kwilula.+ Mulecita fyonse ifi pa kuti mulekuula icilonganino. 27 Kabili nga kuli abalelandila mu ndimi shimbi, bafwile ukuba fye babili nelyo batatu, kabili bafwile ukulalekanina pa kulanda, e lyo pafwile ukuba no wa kwilula.*+ 28 Nomba nga tapali uwa kwilula, uulefwaya ukulandila mu lulimi lumbi afwile ukwikala tondolo mu cilonganino, kabili afwile ukulandila mu mutima ilyo alelanda na Lesa. 29 Muleleka bakasesema+ babili nelyo batatu balelanda, e lyo bambi baleiluka umulolele ifyo balelanda. 30 Lelo nga ca kuti kwaba uo Lesa asokolwela fimo, uwacilalanda afwile ukwikala tondolo. 31 Pantu bonse kuti mulelekanina pa kusesema, pa kuti bonse bengasambililako kabili bengakoseleshiwa.+ 32 Bakasesema e bakwata amaka pa ca bupe ca kusesema ico umupashi wabapeela. 33 Pantu Lesa te wa cimfulumfulu, lelo ni Lesa wa mutende.+

Nga filya fine caba mu filonganino fyonse ifya ba mushilo, 34 abanakashi balingile ukulaikala tondolo mu filonganino, pantu tabasuminishiwa ukulanda,+ lelo bafwile ukulanakila,+ nga filya fine na Mafunde yalanda. 35 Nga ca kuti pali ifyo balefwaya ukwishiba, bafwile ukwipusha abalume babo ku ng’anda, pantu ca nsoni umwanakashi ukulanda mu cilonganino.

36 Bushe ni kuli imwe icebo ca kwa Lesa cafumine, nelyo ni kuli imwe mweka cafikile?

37 Nga ca kuti umuntu atila ni kasesema, nelyo nga atila umupashi walimupeela ica bupe, ninshi afwile ukusumina ukuti ifi ndemulembela mafunde ya kwa Shikulu. 38 Lelo nga ca kuti kuli uulesuula ifi, ninshi na o Lesa akamusuula.* 39 E ico mwe ba bwananyina, mulefwaisha ukukwata ica bupe ca kusesema,+ lelo kwena tamufwile ukubinda ukulandila mu ndimi.+ 40 Nomba fyonse fifwile ukulacitika bwino bwino kabili ukwabula icimfulumfulu.+

15 Nomba mwe ba bwananyina, ndefwaya ukumwibukishako pa mbila nsuma iyo nabilile kuli imwe,+ iyo na imwe mwapokelele, kabili iyo mukonka. 2 Mukapusukila mu mbila nsuma iyo nabilile kuli imwe, nga muleikonka sana. Nga tamuleikonka ninshi filya mwatetekele mwaicushishe fye.

3 Pa fintu ifyacindama ifyo nabalilepo ukumweba, paba ne co napokelele ica kuti Kristu afwilile pa membu shesu ukulingana ne fyo Amalembo+ yalanda; 4 no kuti balimushiikile+ kabili pa bushiku bwalenga shitatu+ alibuushiwe+ ukulingana ne fyo Amalembo+ yalanda; 5 no kuti alimoneke kuli Kefasi,*+ e lyo na ku batumwa 12.+ 6 Pa numa amoneke ku ba bwananyina bonse pamo+ abacilile 500, kabili abengi pali aba na nomba e po baba, lelo bamo balifwa. 7 Lyena amoneke kuli Yakobo,+ e lyo amoneka na ku batumwa+ bonse. 8 Lelo mu kulekelesha amoneke kuli ine,+ ne wali ngo mwana uwafyalwa ilyo inshita ya kuti afyalwe ishilafika.

9 Pantu nine nacepesha pa batumwa bonse, kabili nshalinga no kulaitwa ukuti umutumwa, pa mulandu wa kuti nalecusha icilonganino ca kwa Lesa.+ 10 Nomba icikuuku icaibela ica kwa Lesa e calenga ukuti mbe fino ndi. Kabili icikuuku icaibela ico Lesa anangile tacali ca fye, lelo calengele ndebombesha ukucila bonse. Kwena te maka yandi yalelenga ndebombesha, lelo cikuuku icaibela ica kwa Lesa ico anangile. 11 Nampo nga nine namusambilishe nelyo ni bambi, iyi e mbila iyo tubila kabili ifi fine e fyo mwatetekele.

12 Nomba nga ca kuti tubila ukuti Kristu alibuushiwa ku bafwa,+ cinshi bamo pali imwe balandila ukuti abafwa tabakabuushiwe? 13 Nga cine cine abafwa tabakabuushiwe, ninshi na Kristu wine tabuushiwe. 14 Lelo Kristu nga tabuushiwe, ninshi ne fyo tubila fya fye, kabili ninshi ne citetekelo cesu na co ca fye. 15 Te ico ceka, lelo ninshi na ifwe tubepesha fye Lesa.+ Pantu ifwe tulanda ukuti ca cine Lesa alibuushishe Kristu ku bafwa. Nomba nga cine cine abafwa tabakabuushiwe, ninshi na Kristu+ wine Lesa tamubuushishe. 16 Pantu abafwa nga tabakabuushiwe, ninshi na Kristu tabuushiwa. 17 Kabili nga ca kuti Kristu tabuushiwa, ninshi ne citetekelo cenu ca fye; ninshi mucili mu membu.+ 18 Kabili na basambi ba kwa Kristu abafwa ninshi baliloba.+ 19 Nga ca kuti isubilo lyesu muli Kristu lya muli buno bwikashi fye, ninshi pa bantu bonse nifwe balingile ukulalilila sana ubulanda.

20 Lelo nomba Kristu alibuushiwa ku bafwa, e cisabo ca kubalilapo pa bafwa.+ 21 Pantu filya fine imfwa yaishiile mu mwaume umo,+ e fyo no kubuushiwa kwaishila mu mwaume umo.+ 22 Pantu filya fine bonse bafwa+ pa mulandu wa kwa Adamu, e fyo na bonse bakabela aba mweo+ pa mulandu wa kwa Kristu. 23 Lelo onse akabuushiwa ukulingana ne bumba abamo: Kristu e cisabo ca kubalilapo,+ e lyo pakakonke aba kwa Kristu mu nshita Kristu akabapo.+ 24 Na mu kulekelesha impela ikesa. Lyena akabwesesha Lesa wakwe kabili Wishi Ubufumu, ilyo akonaula ubuteko bonse, insambu sha kuteka shonse na maka yonse.+ 25 Pantu ali no kuteka mpaka Lesa akabike abalwani bonse pe samba lya makasa yakwe.+ 26 No mulwani akalekeleshako ukonaula+ ni mfwa. 27 Pantu Lesa “abikile fyonse pe samba lya makasa yakwe.”*+ Lelo ilyo kemba wa malumbo alanda ati ‘alenga aletungulula+ fyonse,’ naci-ilanga fye apabuuta tuutu ukuti tabikileko uwalengele aletungulula fyonse.+ 28 Nomba ilyo Lesa akalenga fyonse filenakila Umwana, Umwana na o akanakila Lesa, uwalengele ukuti aletungulula fyonse,+ e lyo Lesa akaba kateka wa fintu fyonse.+

29 Nomba cikaba shani ku babatishiwa ulubatisho ulwingalenga bafwa?+ Nga ca kuti abafwa tabakabuushiwe, cinshi bengabatishiwilwa ulubatisho lwa musango uyu? 30 Mulandu nshi na ifwe tuibikila mu busanso cila nshita?+ 31 Cila bushiku imfwa yandi iba fye mupepi. Mwe ba bwananyina nalishininkisha ici pa mulandu wa kuti ndasekelela pali imwe, pantu muli basambi ba kwa Shikulwifwe Kristu Yesu. 32 Pantu nga nalilwile ne fiswango mu Efese,+ nga filya abantu bambi bacita,* cinshi ningamwenamo? Abafwa nga tabakabuushiwe ninshi “natulye no kunwa, pantu mailo tukafwa.”+ 33 Mwilufiwa. Ukwampana pamo na bantu babipa kulonaula imibele isuma.+ 34 Mwiluke kabili mulecita ifyalungama, mwilabembuka pantu bamo tabaishiba Lesa. Ndelanda ifi pa kuti mumfwe insoni.

35 Lelo umo kuti aipusha ati: “Bushe abafwa bakabuushiwa shani? Mubili wa musango nshi bakakwata nga babuushiwa?”+ 36 We mbulwa mano we! Ico ubyala cisa mu kuba fye ica mweo nga cabala cafwa. 37 Kabili taubyala icilimwa icakula kale,* lelo ubyala uluseke, nampo nga lwa ngano nelyo lwa cilimwa cimbi; 38 lelo Lesa e ulenga lumene ukulingana ne fyo alefwaya, kabili nga lwakula taluba cimo cine. 39 Ifintu fyonse ifyakwata iminofu tafyakwata iminofu imo ine. Kwaba iminofu ya bantu, kwaba iminofu ya ng’ombe, kwaba iminofu ya fyuni, ne minofu ye sabi. 40 Kabili kwaliba imibili ya ku muulu,+ ne mibili+ ya pano isonde; lelo ubukata bwa mibili ya ku muulu bwalipusana no bukata bwa mibili ya pano isonde. 41 Ubukata bwa kasuba bwalipusana+ no bukata bwa mweshi, kabili ubukata bwa ntanda nabo bwali-ibela; na kuba ubukata bwa lutanda lumo bwalipusana no bukata bwa lutanda lumbi.

42 Ifi fine e fyo caba na ku kubuuka kwa bafwa. Babashiika no mubili uubola, lelo babuushiwa no mubili uushibola.+ 43 Babashiika* mu museebanya, lelo babuushiwa mu bukata.+ Babashiika no mubili uwanaka, lelo babuushiwa no mubili uwa maka.+ 44 Babashiika no mubili wa pano isonde, lelo babuushiwa no mubili wa ku muulu. Apo kwaliba umubili wa pano isonde, ninshi kwaliba no mubili wa ku muulu. 45 E ico calembwa ukuti: “Umuntu wa kubalilapo Adamu aishileba uwa mweo.”+ Adamu wa kulekelesha ena aishileba umupashi+ uupeela umweo. 46 Lelo umubili wa ku mupashi, te wabalilepo. Umubili wa muntunse, e wabalilepo e lyo pakonka umubili wa ku mupashi. 47 Umuntu wa kubalilapo afumine pano isonde kabili abumbilwe ku lukungu;+ umuntu wa bubili ena afumine ku muulu.+ 48 Ifyo uwabumbilwe ku lukungu aali, e fyaba na bonse ababumbwa ku lukungu; kabili ifyo uwafumine ku muulu aba, e fyaba na ba ku muulu.+ 49 Kabili filya fine twapala uwabumbilwe ku lukungu,+ e fyo tukapala no wafumine ku muulu.+

50 Lelo mwe bamunyinane ico ndemweba ca kuti, imibili ya munofu no mulopa te kuti ibe mu Bufumu bwa kwa Lesa, kabili icibola te kuti cipyane icishibola. 51 Moneni! Ndemweba inkaama ya kwa Lesa iya kuti: Tatwakapwe bonse ukufwa, lelo bonse tukaalulwa,+ 52 mu kashita fye akanono, mu kukapakapa kwa linso, ilyo ipenga lya kulekelesha likalila.+ Pantu ipenga likalila. Lyena abafwa bakabuushiwa ne mibili iishibola, na ifwe tukaalulwa. 53 Pantu uyu mubili uubola ufwile ukwaluka, waba umubili uushibola,+ kabili uyu mubili uufwa ufwile ukwaluka, waba umubili uushifwa.+ 54 Lelo ilyo uyu mubili uubola ukaaluka ukabe umubili uushibola na lintu uyu umubili uufwa ukaaluka ukabe umubili uushifwa, e lyo ilembo likafikilishiwa ilitila: “Imfwa naiminwa umuyayaya.”+ 55 “We mfwa, amaka yobe aya kucimfya yali kwi? We mfwa, ulubola lobe luli kwi?”+ 56 Ulubola ululeta imfwa lubembu,+ kabili Amafunde+ e yalenga ulu lubembu lukwate amaka.* 57 Lelo tuletootela Lesa, pantu alalenga tulecimfya ukupitila muli Shikulwifwe Yesu Kristu!+

58 E ico mwe bamunyinane abatemwikwa, beni abashangila,+ abashitelententa, kabili lyonse mulekwata ifya kucita ifingi+ mu mulimo wa kwa Shikulu, pantu namwishiba ukutila ukubombesha kwenu mu mulimo wa kwa Shikulu te kwa fye.+

16 Nomba pa kusangwila aba mushilo,+ kuti mwakonka filya naebele aba mu filonganino fya mu Galatia. 2 Pa bushiku bwa kubalilapo ubwa cila mulungu, onse alepaatulapo fimo mu ng’anda mu mwakwe ukulingana ne fyo engakumanisha, pa kuti ilyo nkesa kwikaba ukusangula. 3 Lelo ilyo nkafika, abaume abo mukasuminisha mu makalata,+ e bo nkatuma ukutwala ubupe bwenu ubwa kwafwilisha ku Yerusalemu. 4 Nomba nga cikamoneka ukuti na ine mfwile ukuya, ninshi nkaya pamo nabo.

5 Lelo nkesa kuli imwe ilyo nkapita mu Makedonia,+ pantu e mo nkapita; 6 kabili nalimo nkekala na imwe nelyo nkapwisha fye ne nshita ya mpepo yonse na imwe, pa kuti mukanshindikeko uko nkaya. 7 Nshilefwaya ukumumwena fye mu lupita, pantu ndesubila ukuti nkekalako na imwe+ pa nshita iinono, nga ca kuti Yehova* asuminisha. 8 Lelo ndetwalilila ukwikala muno mwine mu Efese+ mpaka umutebeto wa Pentekoste ukafike, 9 pantu ninkwata+ ishuko ilikalamba* ilya kuti mombeshe, lelo kuli abantu abengi abalendwisha.

10 Nomba Timote+ nga aisa uko, mukamupokelele bwino pa kuti ekalatiina nangu cimo, pantu alebomba umulimo wa kwa Yehova,*+ nge fi fine na ine ndebomba. 11 E ico mwikaleka umuntu nangu umo akamusuule. Lelo mukamushindikeko, pa kuti akese kuno, pantu ine na ba bwananyina tulemulolela.

12 Nomba munyinefwe Apolo,+ nalimupaapeete sana ukuti ese uko na ba bwananyina. Lelo umwine talefwaya ukwisa pali ino nshita, akesa nga akwata inshita.

13 Beni abalola,+ iminineni ndi mu citetekelo,+ mube abashipa nga baume,+ mube abakosa.+ 14 Lekeni fyonse ifyo mulecita, muleficita pa mulandu wa kutemwa.+

15 Mwalishiba ukuti aba mu ng’anda ya kwa Stefana e fisabo fyabalilepo ukupya mu Akaya, kabili bali-ipeeleshe nga nshi mu kubombela aba mushilo. E ico mwe bamunyinane ndemupaapaata ukuti, 16 na imwe mulenakila ababa ifi na bonse ababombela pamo na imwe kabili ababombesha.+ 17 Lelo ndesekelela pantu Stefana,+ Fortunati na Akaiki nabesa, pantu nabamwimininako mwe bashishile. 18 Ine na imwe nabatusansamusha sana. E ico mulecindika ababa ifi.

19 Aba bwananyina mu filonganino fya ku Asia bamuposha. Akula na Priska pamo na bonse abalonganina mu ng’anda+ yabo bamuposha nga nshi muli Shikulu. 20 Bamunyinefwe bonse kuno bamuposha. Poshanyeni kabili tomonaneni.*

21 Ine ne Paulo, ne mwine nine nalemba aya mashiwi ya kumuposha.

22 Nga kuli umuntu uushatemwa Shikulu, abe uwatiipwa. Mwe Shikulu, iseni! 23 Icikuuku icaibela ica kwa Shikulu Yesu cibe na imwe. 24 Nalimutemwa bonse mwe baba muli Kristu Yesu.