KALATA YA BUBILI IYA KWA PETRO

1 Ine ne Simone Petro, ne musha kabili umutumwa wa kwa Yesu Kristu, nalembela abakwata icitetekelo icisuma nge co na ifwe twakwata. Twalipokelela ici citetekelo pa mulandu wa bulungami bwa kwa Lesa wesu no bwa Mupusushi wesu Yesu Kristu, ndeti:

2 Icikuuku icaibela no mutende filefulilako pali imwe ilyo muleishibilako bwino Lesa+ na Yesu Shikulwifwe, 3 pantu pa mulandu wa maka yakwe, Lesa alitupeela ifintu fyonse ifyo tukabila pa kuti tube no mweo na bukapepa ukupitila mu kwishiba bwino bwino Lesa uwatwitile+ pa mulandu wa bukata bwakwe ne mibele yakwe iisuma. 4 Ifi fintu fyalilenga Lesa atulaye amalayo ayasuma kabili ayakalamba nga nshi,+ pa kuti ukupitila muli ifi fintu mukwateko ubukata ubo Lesa akwata.+ Pantu mwalifulumuka imibele yabipa iya muli ici calo iyo abantu baba nayo pa mulandu wa lunkumbwa.

5 Pa mulandu ne fi, mule-esha na maka yenu yonse+ ukulunda imibele iisuma ku citetekelo cenu,+ kabili ku mibele yenu iisuma mulelundako ukwishiba,+ 6 ku kwishiba nako mulelundako ukuilama, ku kuilama+ mulelundako ukushipikisha, ku kushipikisha nako mulelundako bukapepa,+ 7 na kuli bukapepa mulelundako ukutemwa aba bwananyina, e lyo ku kutemwa aba bwananyina mulelundako ukutemwa abantu bonse.+ 8 Pantu nga mwakwata iyi mibele kabili yafula nga nshi, ikalenga mwikaba abanang’ani nelyo abashitwala ifisabo+ mu cine ico mwaishiba bwino bwino pali Shikulwifwe Yesu Kristu.

9 Pantu umuntu nga takwete iyi mibele, ninshi ni mpofu, alashibata pa kuti emona ulubuuto,*+ kabili alilaba ifyo bamusangulwile ku membu+ shakwe isha kale. 10 E ico bamunyinane, mule-esha na maka pa kuti mwikapanya ubwite bwenu+ no kusalwa kwenu, pantu nga mulecita ifi tamwakafilwe nakalya.+ 11 Na kuba, nga mulecita ifi e lyo bakamupeela insambu shonse isha kwingila mu Bufumu bwa muyayaya+ ubwa kwa Shikulwifwe kabili Umupusushi Yesu Kristu.+

12 E ico ndefwaya ukuti lyonse ndemwibukishako ifi fintu nangu ca kuti mwalifishiba kabili mwalikosa mu cine ico mwasambilila. 13 Lelo apo ncili muli ili itenti,*+ ndemona ukutila nacilinga ukuti ndemwibukishako+ pa kuti ndemucincisha, 14 pantu ninjishiba ukuti nomba line fye nalafuma muli lino itenti lyandi, pantu e fyo na Shikulwifwe Yesu Kristu anangile.+ 15 Lyonse nakulaesha na maka yandi yonse ukumwibukishako pa kuti ilyo nkafumapo, mwe bene mukaleibukisha ifi fintu.*

16 Ilyo twamushimikile pa maka ya kwa Shikulwifwe Yesu Kristu na pa kubapo kwakwe, tatwalelanda pa milumbe ya kwelenganya fye iyo abantu bomina mu bucenjeshi, lelo twamushimikile ubukata bwakwe ubo twaimwenene na menso.+ 17 Pantu alipokelele umucinshi no bukata ifyafumine kuli Lesa Wishi, ilyo amashiwi yafumine mwi kumbi ilyabengeshima, aya kuti: “Uyu e mwana wandi uo natemwa, uo nsekelamo.”+ 18 Cine cine aya e mashiwi ayo twaumfwile ayafumine mu muulu, ilyo twali nankwe mu lupili lwa mushilo.

19 Ici calilenga tushininkishe sana ukuti amashiwi yaba mu busesemo ya cine, kabili mulacita bwino ifi mubika amano kuli aya mashiwi ayaba kwati ni nyali+ iileaka umwafiita, mu mitima yenu (busuke ubushiku buce no lutanda lwa lucelo lutendeke+ ukumoneka). 20 Pantu mwalishiba ici cishinka cacindama ica kuti, takwaba ubusesemo bwa mu Malembo ubo umuntu engaisesemena umwine. 21 Pantu bakasesema tabaitendekele fye abene ukusesema,+ lelo umupashi wa mushilo+ e walengele balande amashiwi ayafumine kuli Lesa.

2 Lelo filya fine mu Israele mwaishileba bakasesema ba bufi, e fyo na muli imwe mukesaba bakasambilisha ba bufi.+ Aba bakalasambilisha ifya kuleta amalekano, ifikalenga icitetekelo cenu cikapwe, bakakaana fye no wabashitile,*+ kabili ifi fikalenga ubonaushi bukese pali bena bwangu bwangu. 2 Kabili abengi bakalabakonkelela mu kucita ifya nsoni.*+ Ici cikalenga abantu bakalepontela inshila ya cine.+ 3 Na kabili, pa mulandu wa bufunushi bwabo bakamubelelekela ku mashiwi ya bucenjeshi. Lelo ubupingushi ubo babapingula kale+ tabwakacelwe, kabili ubonaushi bwabo tabwakashingashinge.+

4 Kabili Lesa talekelepo fye ukwabula ukukanda bamalaika ababembwike,+ lelo abapoosele mu Tartari,*+ umo abakakiile,* umwafiita fititi, umo balolela ubupingushi.+ 5 Na kabili, Lesa talekelepo fye ukwabula ukukanda abali pano calo kale,+ lelo apuswishe fye Noa, uwaleshimikila abantu pa fyalungama,+ na bantu na bambi 7+ ilyo aletele ilyeshi pa bali pano calo abashalepepa.+ 6 Kabili alipingwile+ Sodomu na Gomora ilyo aocele iyi imisumba mpaka yashala imito. Ifi acitile fyalelangilila ifyo akacita abantu abashipepa.+ 7 Lelo apuswishe Lote uwali uwalungama,+ uwaleumfwa ubulanda nga nshi pa fya nsoni* ifyo bampulamafunde balecita. 8 Ifyo ulya muntu uwali uwalungama alemona no kumfwa ifyo balya bantu abali bampulamafunde balecita fyalemucusha* cila bushiku. 9 E ico kanshi, Yehova* alishiba ifya kupususha abamupepa ku mesho,+ lelo alisunga na bantu abashalungama abo akonaula pa bushiku bwa bupingushi,+ 10 maka maka abolungana na bantu+ pa kuti babakoweshe, na basuula ubutungulushi.+

Balipama, ni bamunshebwa, kabili tabatiina no kupontela abo Lesa acindamika, 11 e lyo ninshi bamalaika bena nangu ca kuti balikosa kabili ba maka icine cine ukucila aba bakasambilisha ba bufi, tababapeela imilandu kabili tababasaalula, pa mulandu wa kuti balicindika Yehova.*+ 12 Lelo aba bantu, abapala inama ishishitontonkanya ishitungululwa fye no mununsha kabili ishifyalilwa fye ukushikata no kushonaula, bapontela ifintu ifyo bashaishiba,+ bakabonawilapo pali ifi ifyabipa ifyo bacita, 13 bakailetelela pa mulandu wa kuti balacita ifyabipa.

Bena bamona kwati nga balecita ifya kusekesha imibili yabo,+ nangu fye ni mu nshita ya kasuba ninshi baleisansamusha. Ilyo muli nabo pa mitebeto baba kwati fiko ne fibala kabili basansamukila mu kumusambilisha ifya bucenjeshi.+ 14 Baba na menso ayalembula+ aba kuti balecita nabo ubucende, tabaleka ukubembuka, kabili babeleleka abashashangila.* Imitima yabo yalicenjela ku bufunushi. Aba bantu bana abatiipwa. 15 Balibalufya pantu balisha inshila iyalungama. Bapashanya Balaamu,+ umwana wa kwa Beore, uwacitile ifyabipa pa mulandu wa kuti alefwaisha ukupoka icilambu,+ 16 lelo balimukalipiile pa fyo alufyenye.+ Impunda iishilanda yalilandile kwati muntu, kabili ifyo yaebele uyu kasesema fyalengele aleke ifya bushilu ifyo alefwaya ukucita.+

17 Aba bantu baba kwati tumfukumfuku utushakwata amenshi, kwati ni fubefube iyo umwela uukali ulula, kabili Lesa alibapekanishisha icifulo umwaba imfifi iyafiita fititi.+ 18 Ifyo balanda fyumfwika kwati fyalicindama lelo fya buwelewele. Ilyo bacita ifyo imibili yabo ifwaya+ ne fya nsoni,* balabeleleka aba kuti e lyo balekele fye ukucita ifya musango uyu.+ 19 Babalaya ubuntungwa, e lyo ninshi bena imibele yabipa icili yalibateka ubusha;+ pantu onse uo bacimfya asanguka umusha wa muntu*+ uwamucimfya. 20 Cine cine, nga ca kuti pa numa ya kuleka ukucita ifyakowela fya pali cino calo+ pa mulandu wa kwishiba bwino bwino Shikulu kabili Umupusushi Yesu Kristu, e lyo babwelela kuli ifi fine fintu ica kuti no kubacimfya fya bacimfya, imibele iyo bakwata ilabipapo pa yo bakwete kale.+ 21 Pantu nga caliweme abakanaishiba bwino bwino inshila ya bulungami ukucila ukuti ilyo baishiba, e lyo baleka ukukonka ifunde lya mushilo ilyo babapeele.+ 22 Ifyo bacita e fyo ne pinda lya cine lilanda, litila: “Imbwa naibwelela ku malushi ya iko, ne nkumba iyo basambile naibwelela mu kwalangana mu matipa.”+

3 Mwe batemwikwa, iyi nomba e kalata yalenga bubili iyo ndemulembela, nga filya fine namulembeele muli kalata ya kubalilapo e fyo ndemwibukishako+ na muli iyi ine kalata pa kuti mulebikako amano, 2 pa kuti muleibukisha amashiwi ayo bakasesema ba mushilo balandile kale* na mafunde ya kwa Shikulu kabili Umupusushi ayo abatumwa benu bamupeele. 3 Ica kubalilapo, mwishibe ukuti mu nshiku sha kulekelesha mukesaba abantu abakalapumya, kabili bakalacita fye ifyo balefwaya+ 4 kabili bakalalanda abati: “Bushe filya alaile ukuti akabapo, e po aba?+ Pantu ukufuma fye pa bushiku ifikolwe fyesu fyafwila, ifintu fyonse fyaba fye filya fine fyali ukufuma apo icalo capangiilwe.”+

5 Pantu ku mufulo fye tababika amano ku cishinka ca kuti, kale Lesa apangile imyulu kwi shiwi lyakwe, na kabili kwi shiwi line alengele isonde lyamoneka ukufuma mu menshi. Alengele na menshi yambi yaba pa muulu we sonde;+ 6 kabili kuli ifi fine e ko Lesa aonawilile aba muli cilya calo ilyo abunshishe icalo mu menshi.+ 7 Lelo kwi shiwi limo line Lesa alisunga imyulu ne sonde ifyabapo pali ino nshita pa kuti fikesepya, kabili alitwalilila ukufisunga mpaka ubushiku bwa bupingushi kabili ubwa konaula abantu abashipepa bukafike.+

8 Nomba mwe batemwikwa, mwilaba icishinka ica kuti Yehova* amona ubushiku bumo nge myaka 1,000 ne myaka 1,000, aimona ngo bushiku bumo.+ 9 Yehova* tashingashinga ukufikilisha ifyo alaya,+ nangu ca kuti bamo batila alashingashinga, lelo alamutekanishisha pantu tafwaya umuntu nangu umo akonaike, lelo afwaya ukuti bonse bakalapile.+ 10 Nomba ubushiku bwa kwa Yehova*+ bukesa ngo mupuupu,+ ilyo imyulu ikapita+ ne ciunda icikalamba. Lelo ilyo ifintu fikakaba se fikasunguluka, kabili isonde ne milimo iyabamo fikasokololwa.+

11 Apo ifi fyonse fikasunguluka umusango uyu, imwe mufwile ukulacita ifilanga ukuti muli ba mushilo kabili muli ba cishinka kuli Lesa, 12 ilyo mulelolela kabili ilyo muletontonkanya sana* pa bushiku bwa kwa Yehova,*+ lintu imyulu ikapya+ mu mulilo kabili ilyo ifya mu muulu ne fya pano isonde fikakaba se no kusunguluka! 13 Lelo tulelolela imyulu ipya ne sonde ilipya ifyo Lesa alaya,+ umukaba ubulungami.+

14 E ico mwe batemwikwa, apo mulelolela ifi fintu, ibikilisheniko pa kuti akamusange ababula akabi, ababula akalema kabili mu mutende.+ 15 Kabili mulemona ukutekanya kwa kwa Shikulwifwe ukuti lipusukilo, nga filya fine munyinefwe watemwikwa Paulo amulembeele ukulingana na mano ayo Lesa amupeela.+ 16 Ifi fine e fyo alanda mu makalata yakwe yonse nga alemba pali ifi fintu. Lelo mu makalata yakwe mulaba ifintu fimo ifyakosa ukumfwa, ifyo abashaishiba* kabili abashakosa mu citetekelo banyonganya pa kulondolola, nga filya fine banyonganya na Malembo yambi ayashala, kabili ifi bacita fikalenga bakonaulwe.

17 E ico mwe batemwikwa, apo mwalishibila ifi fintu libela, mulecenjela pa kuti mwikasendelwa pamo na ba bantu mu filubo fya bampulamafunde ica kuti mukaleke no kuba abashangila mu citetekelo cenu.+ 18 Lelo mulecita ifingalenga mulepokelela sana icikuuku icaibela kabili muleishibilako Shikulwifwe kabili Umupusushi wesu Yesu Kristu. Kuli ena kube ubukata pali ino nshita no muyayaya. Ameni.