UKUSOKOLOLA UKO YOHANE APOKELELE

1 Ifyasokololwa muli lino ibuuku fintu ifyo Lesa asokolwelele Yesu Kristu+ pa kuti Yesu alange abasha bakwe+ ififwile ukucitika nomba line. Yesu Kristu na o atumine malaika wakwe, kabili abomfeshe ifishibilo pa kulanga Yohane umusha wa kwa Yesu+ ifi fintu. 2 Yohane na o ashimike fyonse ifyo Lesa amwebele. Kabili ashimike fyonse ifyo Yesu Kristu alandile, na fyonse ifyo amwene. 3 Wa nsansa uubelengela abantu na bomfwa amashiwi ayaba muli uku kusesema, kabili ba nsansa abakonka ifyalembwamo,+ pantu inshita yasalwa naipalama.

4 Ine ne Yohane, nalembela imwe mwe filonganino 7+ ifyaba mu citungu ca Asia, ndeti:

Icikuuku no mutende fibe na imwe ififuma ku “Wabako kabili uwaliko kabili uuleisa,”+ kabili ififuma ku mipashi 7+ iyaba pa ntanshi ya cipuna cakwe ica Bufumu, 5 kabili ififuma kuli Yesu Kristu, “Inte ya Cishinka,”+ “uwabalilepo ukubuuka ku bafwa,”+ kabili “Kateka wa mfumu sha pano isonde.”+

Kuli Yesu uwatutemwa+ kabili uwatulubwile ku membu shesu mu mulopa wakwe+— 6 kabili alengele tube ishamfumu,*+ kabili bashimapepo+ aba kubombela Lesa wakwe kabili Wishi—cine cine kuli ena kube ubukata na maka umuyayaya. Ameni.

7 Moneni! Akeshila mu makumbi,+ ne linso lyonse likamumona, na balya abamulashile bakamumona; ne mitundu yonse iya pano isonde ikapumapo imisowa pa mulandu wakwe.+ Cibe ifyo fine, Ameni.

8 Yehova* Lesa atila, “Nine Alifa kabili Omega,*+ Uwabako, Uwaliko kabili Uuleisa, Uwa Maka Yonse.”+

9 Ine ne Yohane ne munyinenwe, ne o tucula nenu amacushi yamo yene,+ ne o tukaba nenu mu bufumu,+ kabili ne o tushipikisha+ nenu pa mulandu wa kuba abasambi ba kwa Yesu,+ nali pa cishi iciitwa ukuti Patmo pa mulandu wa kulanda pali Lesa no kushimika ubunte pali Yesu. 10 Umupashi wa mushilo walengele naba mu bushiku bwa kwa Shikulu, kabili ku numa yandi naumfwile ishiwi ilikalamba ilyaleumfwika nge penga, 11 lileti: “Ifyo ulemona ufilembe mu cimfungwa kabili ucitume ku filonganino 7: mu Efese,+ mu Smurna,+ mu Pergamo,+ mu Tuatira,+ mu Sarde,+ mu Filadelfia+ na mu Laodikea.”+

12 Nalipilibwike pa kuti imone uwalelanda na ine, kabili ilyo napilibwike, namwene ifya kutekapo inyali ifya golde ifili 7,+ 13 kabili pa kati ka fya kutekapo inyali pali uwalemoneka ngo mwana wa muntu,+ ninshi nafwala ilaya ilitali ukufika ku makasa, kabili ninshi napisha umushipi wa nsalu uukalamba uwa golde ukucilinganya icifuba. 14 Na kabili umutwe wakwe no mushishi wakwe fyali ifyabuuta tuutu kwati masako yabuuta aya mpaanga, na menso yakwe yali kwati lubingu lwa mulilo,+ 15 amakasa yakwe yalebengeshima kwati mukuba uwaengululwa+ filya ubengeshima mwi lungu, ne shiwi lyakwe lyaleumfwika kwati cipooma ca menshi ayengi. 16 Mu lupi lwakwe ulwa ku kulyo mwali intanda 7,+ kabili mu kanwa kakwe mwalefuma ulupanga ulutali ulwatwa konse kubili,+ ne cinso cakwe cali nga akasuba akabalikishe.+ 17 Ilyo namumwene, nawilile pa makasa yakwe kwati muntu uwafwa.

Na o abikile ulupi lwakwe ulwa ku kulyo pali ine, e lyo alanda ati: “Witiina. Nine Uwa kubalilapo+ kabili Uwa kulekeleshako,+ 18 kabili uwa mweo,+ nalifwile, lelo mona! ndi uwa mweo+ kabili nkaba uwa mweo umuyayaya,+ nalikwata amakii ya mfwa na ya ku Nshiishi.*+ 19 E ico lemba ifyo wacimona, ne filecitika, e lyo ne fikacitika pa numa ya ifi. 20 Kanshi inkama ya mushilo iya ntanda 7 isho wacimona mu lupi lwandi ulwa ku kulyo, ne ya fya kutekapo inyali 7 ifya golde ni yi: Intanda 7 ni bamalaika ba mu filonganino 7, ne fya kutekapo inyali 7 filonganino 7.+

2 “Lembela malaika+ wa mu cilonganino ca mu Efese+ auti: Ifi e fyalanda uwaikata intanda 7 mu lupi lwakwe ulwa ku kulyo, kabili uwendauka pa kati ka fya kutekapo inyali 7 ifya golde:+ 2 ‘Ine nalishiba ifyo ucita, ifyo ucula ne fyo ushipikisha. Nalishiba ukuti taufwaya abantu ababipa nangu fye panono. Kabili abaitunga ukuti batumwa+ nangu ca kuti te batumwa walibesha kabili wasanga ukuti ba bufi. 3 Na kabili, ulashipikisha, ulashishimisha pa mulandu we shina lyandi+ kabili taunenuka.+ 4 Na lyo line, kuli cimo ico nshatemwa pali iwe, ica kuti pali ino nshita tawantemwa nga filya wantemenwe pa kutendeka.

5 “‘E ico ibukisha ifyalengele uwe, kabili lapila+ no kucita nge fyo walecita pa kutampa. Nga taulapiile, nkesa kuli iwe, kabili nkafumya ica kutekapo inyali cobe+ pa ncende ya ciko.+ 6 Na lyo line, cimo ico natemwako pali iwe ca kuti: walipata ificita akalibumba ka mapepo aka kwa Nikola,+ ifyo na ine napata. 7 Uuli na matwi omfwe ico umupashi ule-eba ifilonganino:+ Uwacimfya+ nkamupeela insambu sha kulya ku cimuti ca mweo,+ icaba mu paradaise ya kwa Lesa.’

8 “Lembela na malaika wa mu cilonganino ca mu Smurna auti: Ifi e fyo ‘Uwa kubalilapo kabili Uwa kulekelesha,’+ uwafwile lelo uwaishileba uwa mweo na kabili+ alanda: 9 ‘Nalishiba ubucushi bobe no bupiina bobe—lelo uli mukankaala+—nalishiba ne miponto ya bantu abatila baYuda, nangu ca kuti te baYuda, lelo lisunagoge fye lya kwa Satana.+ 10 Witiina pa macushi ayo uli no kukwata.+ Moneni! Satana Kaseebanya alatampa ukupoosa bamo pali imwe mu fifungo pa kuti mukeshiwe nga nshi, kabili mukakwate amacushi pa nshiku 10. Ube uwa cishinka ukufika na ku mfwa, na ine nkakupeela icilongwe* ca mweo.+ 11 Uuli na matwi omfwe+ ico umupashi ule-eba ifilonganino: Uwacimfya,+ imfwa ya cibili tayakamucite nangu cimo.’+

12 “Lembela malaika wa mu cilonganino ca mu Pergamo auti: Ifi e fyo uwakwata ulupanga ulutali ulwatwa konse kubili+ alanda: 13 ‘Nalishiba ukuti uko wikala, e ko Satana akwatila icipuna cakwe ica bufumu; nomba iwe walitwalilila ukuba uwa cishinka kuli ine,+ kabili tawakeene ukuntetekela+ nangu fye ni mu nshiku sha kwa Antipa, inte yandi iya cishinka,+ uo baipaile+ uko kwine ku mwenu, ukwaikala Satana.

14 “‘Lelo kuli fimo fimo ifyo nshatemwa pali iwe, ifya kuti uli na bamo uko kwine abakonka isambilisho lya kwa Balaamu,+ uwalesambilisha Balaki+ ifya kubeleleka abana ba kwa Israele, pa kuti balye ifyo baipaile utulubi na pa kuti bacite ubulalelale.*+ 15 Na kabili, naukwata abantu bamo abakonka isambilisho lya kalibumba aka mapepo aka kwa Nikola.+ 16 E ico lapila. Nga wakaana, nkangufyanya ukwisa kuli iwe, kabili nkesabomina ku lupanga ulutali ulwa mu kanwa kandi.+

17 “‘Uuli na matwi omfwe ico umupashi ule-eba ifilonganino:+ Uwacimfya+ nkamupeelapo mana iyo bafisa,+ kabili nkamupeela na kalibwe akabuuta, apalembwa ishina ilipya ilyo umuntu nangu umo ashaishiba kano fye uulepokelela aka akalibwe.’

18 “Lembela malaika wa mu cilonganino ca mu Tuatira+ auti: Ifi e fyo Umwana wa kwa Lesa, uwakwata amenso ayabeeka kwati lubingu lwa mulilo,+ na makasa ayabeeka ngo mukuba uwaengululwa alanda:+ 19 ‘Nalishiba ifyo ucita, ifyo waba no kutemwa, ifyo waba ne citetekelo, imilimo ubomba ne fyo ushipikisha. Nalishiba no kuti pali ino nshita ulebombesha ukucila ifyo walebomba pa kutampa.

20 “‘Na lyo line, kuli cimo ico nshatemwa pali iwe, ica kuti walitekelesha ulya mwanakashi Yesebele,+ uutila ni kasesema, alasambilisha no kulufya abasha bandi pa kuti balecita ubulalelale*+ no kulya ifyo baipaila utulubi. 21 Kabili nalimupeele inshita ya kuti alapile, lelo tafwaya ukulapila pa bulalelale* bwakwe. 22 Mona! Ndi no kulenga akalwale nga nshi ica kuti akalefilwa no kwima, na bacita nankwe ubucende nkalenga bakakwate ubucushi ubukalamba, kano fye nga balapila, baleka no kucita ifyabipa ifyo bacita nankwe. 23 Na kabili, nkepaya abana bakwe ku cikuko, pa kuti ifilonganino fyonse fikeshibe ukuti nine mfwayafwaya mu matontonkanyo ayashika* na mu mitima. Kabili ifyo nkacitila imwe umo umo fikalingana ne fyo cila muntu acita.+

24 “‘Lelo nde-eba mwe bashala aba mu Tuatira, bonse mwe bashikonka ili sambilisho, kabili abashaishiba ifyo batila “ifyashika ifya kwa Satana,”+ ndeti: Nshilemutwika icisendo na cimbi. 25 Lelo imwe mutwalilile ukwikatisha ifyo mwakwata mpaka nkese.+ 26 Kabili uwacimfya no kucita ifyo mfwaya ukufika na ku mpela, nkamupeela amaka ya kuteka inko,+ 27 kabili akacemena abantu ku nkonto ya cela+ no kubatobaula nge fipe fye bumba, nga filya fine na ine napokelela amaka kuli Tata. 28 Nkamupeela ulutanda lwa lucelo.+ 29 Uuli na matwi omfwe ico umupashi ule-eba ifilonganino.’

3 “Lembela malaika wa mu cilonganino ca mu Sarde auti: Ifi e fyo uwakwata imipashi 7 iya kwa Lesa+ ne ntanda 7+ alanda: ‘Nalishiba ifyo ucita, nalishiba no kuti waishibikwa ukuti uli wa mweo, lelo walifwa.+ 2 Ube uwalola,+ kabili kosha ifishelepo ifili mupepi no kufwa, pantu nimona ukuti imilimo yobe pa cinso ca kwa Lesa wandi taifikilepo. 3 E ico ibukisha ifyo wapokelela kabili ifyo waumfwa, ulefikonka, kabili lapila.+ Kwena nga taushibwike, nkesa kuli iwe nga filya umupuupu esa,+ kabili tawakeshibe ne nshita nkesa kuli iwe.+

4 “‘Na lyo line, ucili naukwata abantu bamo* mu Sarde abashakowesha amalaya yabo,+ kabili aba e bakenda na ine ninshi nabafwala amalaya ayabuuta,+ pantu nabalinga. 5 Uwacimfya+ akafwala amalaya ayabuuta,+ kabili nshakafuute ishina lyakwe mwi buuku lya mweo,+ lelo nkalumbula ishina lyakwe pa cinso ca kwa Tata na bamalaika bakwe.+ 6 Uuli na matwi omfwe ico umupashi ule-eba ifilonganino.’

7 “Lembela malaika wa mu cilonganino ca mu Filadelfia auti: Ifi e fyalanda uwa mushilo,+ uwa cine,+ uwakwata amakii ya kwa Davidi,+ uwisula ica kuti takuli uwingesalako kabili uwisala ica kuti takuli uwingesulako, atila: 8 ‘Nalishiba ifyo ucita—mona! Nalikwiswila iciibi,+ ico umuntu nangu umo ashingesala. Nalishiba ukuti tawakwata sana amaka, lelo kwena walikonka ifyo nakwebele kabili tawakaana ishina lyandi. 9 Mona! Nkalenga aba mwi sunagoge lya kwa Satana abatila baYuda, lelo abashili baYuda,+ ababepa fye—mona! nkalenga bakesefukama pa makasa yobe kabili nkalenga bakeshibe ukuti nalikutemwa. 10 Apo walikonkele ifyo nalandile pa lwa kushipikisha kwandi,*+ na ine nkakupususha mu nshita ya kwesha,+ iikesa pa bantu bonse aba pano isonde, mu kwesha abaikala pe sonde. 11 Ndeisa bwangu.+ Wikatishe ico wakwata pa kuti umuntu nangu umo e kupoka icilongwe* cobe.+

12 “‘Uwacimfya—nkalenga akabe uluceshi mwi tempele lya kwa Lesa wandi, kabili takwakabe nangu cimo icikamufumyamo, kabili nkalemba pali ena ishina lya kwa Lesa wandi+ ne shina lya musumba wa kwa Lesa wandi, e kutila Yerusalemu Iipya+ iileika mu muulu ukufuma kuli Lesa wandi. Nkalemba ne shina lyandi ilipya pali ena.+ 13 Uuli na matwi omfwe ico umupashi ule-eba ifilonganino.’

14 “Lembela malaika wa mu cilonganino ca mu Laodikea+ auti: Ifi e fyo Ameni,+ inte+ ya cishinka kabili iya cine,+ uo Lesa abalilepo ukubumba alanda:+ 15 ‘Nalishiba ifyo ucita, tawatalala kabili tawakaba. Nga caliweme auba uwatalala nelyo uwakaba. 16 E ico apo waba fye icifulefule, tawakaba+ kabili tawatalala,+ nkakufwisa. 17 Pantu utila, “Ndi mukankaala,+ nalinonka ifyuma kabili nshikabila akantu nangu kamo,” lelo tawaishiba ukuti waba fye inkumbabulili, uli mulanda, uli mupiina, uli mpofu kabili wenda fye ubwamba. 18 Kanshi ndekupandako amano ya kuti ushite kuli ine golde iyalopololwa mu mulilo pa kuti ube umukankaala. Kabili ushite ifya kufwala ifyabuuta kuli ine pa kuti wilaenda ubwamba.+ Ushite no muti wa kubika mu menso yobe+ pa kuti ulemona.+

19 “‘Bonse abo natemwa ndabafunda kabili ndabasalapula.+ E ico ube uwacincila kabili ulapile.+ 20 Mona! Ninjiminina pa ciibi kabili ndekonkonsha. Umuntu nga aumfwa ishiwi lyandi no kwisulako iciibi, ndeingila mu ng’anda yakwe no kuliila pamo nankwe umulaalilo, na o aleliila pamo na ine. 21 Uwacimfya+ nkamusuminisha ukwikala pamo na ine pa cipuna candi ica Bufumu,+ nga filya fine na ine nacimfishe no kwikala+ pamo na Tata pa cipuna cakwe ica Bufumu. 22 Uuli na matwi omfwe ico umupashi ule-eba ifilonganino.’”

4 Pa numa ya ifi naliloleshe, kabili moneni! iciibi nacisuka mu muulu, ne shiwi ilyo nabalilepo ukumfwa lyaleumfwika kwati lye penga, lyalelanda na ine aliti: “Isa kuno, kabili nalakulanga ifintu ififwile ukucitika.” 2 Apo pene napokelele umupashi wa mushilo, kabili moneni! mu muulu mwali icipuna ca Bufumu kabili pali ico icipuna ca Bufumu pali uwaikelepo.+ 3 Kabili Uwaikelepo alebeeka nge libwe lya yaspi+ kabili nge libwe lya sardi,* no mukolamfula uwalemoneka nge libwe lya emarodi+ washingulwike icipuna ca Bufumu.

4 Kabili kwali ifipuna fya bufumu 24 ifyashingulwike ici cipuna ca Bufumu, kabili namwene abakalamba 24+ abafwele amalaya yabuuta ne filongwe* fya golde nabekala pali ifi fipuna fya bufumu. 5 Ku cipuna ca Bufumu kwalefuma ukubyata kwa nkuba+ na mashiwi ne fibulukutu;+ kabili kwali inyali 7 isha mulilo ishaleaka pa ntanshi ya cipuna ca Bufumu. Ishi inyali mipashi 7 iya kwa Lesa.+ 6 Pa ntanshi ya cipuna ca Bufumu pali bemba uwalemoneka nge glasi+ kabili uwalebeeka kwati libwe lya krustali.

Pa kati mupepi ne cipuna ca Bufumu pali ifya mweo 4+ ifyakwete amenso ayengi, ku ntanshi na ku numa kabili fyashingulwike icipuna ca Bufumu. 7 Ica mweo ica kubalilapo cali kwati ni nkalamo,+ ica mweo icalenga bubili cali kwati mwana wa ng’ombe umulume,+ ica mweo icalenga butatu+ cakwete icinso kwati cinso ca muntu, ne ca mweo icalenga 4+ cali kwati ni kapumpe uulepupuka.+ 8 Ifi ifya mweo 4, cimo na cimo cakwete amapindo 6; kabili muli aya mapindo, mu kati na kunse,+ mwali amenso yeka yeka. Kabili akasuba no bushiku tafyaletuusha, fyalelanda fye afiti: “Wa mushilo, wa mushilo, wa mushilo Yehova*+ Lesa, Uwa Maka Yonse, uwaliko, uwabako kabili uukesabako.”+

9 Lyonse ifya mweo nga fyapeela Uwaikala pa cipuna ca Bufumu, Uwabako umuyayaya,+ ubukata, umucinshi, kabili fyamutootela, 10 abakalamba 24+ balefukama pa ntanshi ya Waikala pa cipuna ca Bufumu kabili balepepa Uwabako umuyayaya, balepoosa ne filongwe* fyabo pa ntanshi ya cipuna ca Bufumu, baleti: 11 “Mwalilinga mwe Yehova,* mwe Lesa wesu, ukupokelela ubukata,+ umucinshi+ na maka,+ pantu nimwe mwabumbile ifintu fyonse,+ kabili pa mulandu ne fyo mwalefwaya mwalilengele fyabako kabili fyabumbwa.”

5 Kabili namwene Uwaikala pa cipuna ca Bufumu+ naikata icimfungwa ku kuboko kwa ku kulyo ico balembapo uku no ku,* kabili ici cimfungwa cakwete ifya kukambatikilako 7. 2 Kabili namwene malaika uwakosa alebilikisha mwi shiwi ilikalamba, aleti: “Nani uwalinga ukukambatula ifyo bakambatikilako ici cimfungwa no kucifungulula?” 3 Lelo mu muulu, pano isonde na panshi ye sonde takwali nangu umo uwafikilepo ukukambatula ifyo bakambatikiileko ici cimfungwa pa kuti amonemo. 4 Nalililile nga nshi pantu takwali nangu umo uwafikilepo ukukambatula ifyo bakambatikiileko ici cimfungwa pa kuti amonemo. 5 Lelo umo pa bakalamba anjebele ati: “Leka ukulila. Mona! Inkalamo ya mukowa wa kwa Yuda,+ umushila+ wa kwa Davidi,+ nacimfya+ kabili ena kuti akambatula ifyo bakambatikilako ici cimfungwa ifili 7.”

6 Kabili namwene umwana wa mpaanga+ uwali ngo waipaiwe,+ uwali ne nsengo 7 na menso 7, aya menso e mipashi ya kwa Lesa 7+ iyatumwa mwi sonde lyonse. Namumwene naiminina pa kati ka cipuna ca Bufumu na pa kati ka fya mweo 4 kabili pa kati ka bakalamba.+ 7 Ilyo line alileko no kupoka icimfungwa ico Uwaikala pa cipuna ca Bufumu+ aikete ku kuboko kwakwe ukwa ku kulyo. 8 Kabili ilyo apokele ici cimfungwa, ifya mweo 4 na bakalamba 24+ bafukeme pa ntanshi ya Mwana wa mpaanga. Cila muntu akwete nsango kabili balikwete imbale ishafonka isha golde ishaiswilemo ububani. (ubu ububani mapepo ya ba mushilo.)+ 9 Kabili baleimba ulwimbo ulupya,+ abati: “Mwalilinga ukupoka icimfungwa no kukambatula ifyo bacikambatikilako, pantu mwalipaiwe, kabili ku mulopa wenu mwashitiile Lesa abantu+ ukufuma mu mitundu yonse, mu ndimi, mu bantu na mu nko,+ 10 kabili mwalengele baba ishamfumu+ kabili bashimapepo ba kwa Lesa wesu.+ Bakaba ishamfumu+ ishikalateka isonde.”

11 Kabili ilyo naloleshe, naumfwile amashiwi ya bamalaika abengi abashingulwike icipuna ca Bufumu, ne fya mweo na bakalamba, kabili bali iminshipendwa ne minshipendwa* kabili amakana na makana.+ 12 Balebilikisha abati: “Umwana wa mpaanga uo baipeye+ alilinga ukupokelela amaka, ubucindami, amano, ubukose, umucinshi, ubukata ne paalo.”+

13 Kabili naumfwile ifibumbwa fyonse ifyaba mu muulu na pe sonde na panshi+ ye sonde na pali bemba, na fyonse ifyabamo, fileti: “Uwaikala pa cipuna ca Bufumu+ no Mwana wa mpaanga+ balumbanishiwe kabili bapokelele umucinshi,+ ubukata na maka umuyayaya umuyayaya.”+ 14 Ifya mweo 4 fyalelanda afiti: “Ameni!” kabili abakalamba balifukeme no kupepa.

6 Kabili nalimwene ilyo Umwana wa mpaanga+ akambatwile ica kukambatikilako cimo pa fya kukambatikilako 7.+ Lyena naumfwile cimo pa fya mweo 4+ cilelanda ishiwi ilyaumfwikike kwati kubulukuta kwa mfula, aciti: “Isa!” 2 Kabili ilyo naloleshe, moneni! kwali kabalwe uwabuuta;+ no waikelepo ali no buta; kabili bamupeele icilongwe,*+ e lyo aile alecimfya mpaka apwishishisha ukucimfya.+

3 Ilyo akambatwile ica kukambatikilako icalenga bubili, naumfwile ica mweo icalenga bubili+ calanda aciti: “Isa!” 4 Lyena kwafumine kabalwe umbi, uwakashika, no waikelepo bamupeele amaka ya kufumya umutende pe sonde pa kuti abantu bepayane, kabili bamupeele ulupanga ulukalamba.+

5 Ilyo akambatwile ica kukambatikilako icalenga butatu,+ naumfwile ica mweo icalenga butatu+ calanda aciti: “Isa!” Kabili ilyo naloleshe, moneni! kwali kabalwe wafiita, no waikelepo ali na sekelo mu minwe yakwe. 6 Lyena naumfwile ishiwi ilyaleumfwika kwati lilefuma pa kati ka fya mweo 4 aliti: “Icipimo* cimo ica ngano mu ndalama imo iya denari,* ne fipimo fitatu ifya barle mu ndalama imo iya denari;+ kabili tekwesha ukonaula amafuta ya miolife no mwangashi.”+

7 Ilyo akambatwile ica kukambatikilako icalenga 4, naumfwile ishiwi lya ca mweo icalenga 4,+ aliti: “Isa!” 8 Kabili ilyo naloleshe, moneni! kwali kabalwe wabuutulukila, no waikelepo akwete ishina lya kuti Imfwa, kabili Inshiishi* yalemukonka pa numa. Bapeele Imfwa ne Nshiishi amaka pa ciputulwa cimo pa fiputulwa 4 ifye sonde. Aya maka ya kwipaila ku lupanga ulutali, ku cipowe,+ ku cinkunka na ku fiswango fya pe sonde.+

9 Ilyo akambatwile ica kukambatikilako icalenga 5, mwi samba lya ciipailo+ namwenemo umulopa wa* bantu+ abo baipeye pa mulandu wa cebo ca kwa Lesa na pa mulandu wa mulimo wa kushimikila abantu uo balebomba.+ 10 Babilikishe ishiwi ilikalamba abati: “Kufika lilali, mwe Shikulu Mulopwe, mwe ba mushilo kabili aba cine,+ mukaleka fye ukwabula ukupingula no kulandula abaikala pe sonde+ pa mulopa wesu?” 11 Lyena cila muntu bamupeele ilaya ilyabuuta,+ kabili babebele ukuti balolele pa nshita iinono, mpaka impendwa ikakumane iya basha banabo na bamunyinabo abo bali mu kwipaya nga filya fine nabo babepeye.+

12 Ilyo namwene Umwana wa mpaanga akambatula ica kukambatikilako icalenga 6, kwali icinkukuma icikalamba; akasuba kalifiitile fititi kwati ca kufwala ca masako* icafiita, kabili umweshi onse wakashike kwati mulopa,+ 13 ne ntanda sha mu muulu shaponene pe sonde, nga filya umukunyu ulukusha ifipompo fya uko ilyo icimwela ca maka caupukunya. 14 Kabili umuulu walifuminepo nga filya icimfungwa ciba nga bacipomba,+ ne mpili shonse, ne fishi fyonse fyalifumine pa fifulo fya fiko.+ 15 Lyena ishamfumu sha pe sonde, bashimucindikwa, abakalamba ba bashilika, abakankaala, aba maka, abasha bonse na bantungwa bonse babeleme mu ncengo na mu mabwe ya mu mpili.+ 16 Kabili bale-eba impili na mabwe abati: “Tuponeneni+ no kutufisa ku cinso ca Waikala pa cipuna ca Bufumu+ na ku bukali bwa Mwana wa mpaanga,+ 17 pantu ubushiku ubukalamba ubwa bukali bwabo nabufika,+ kabili nani engapusuka?”+

7 Pa numa ya ifi namwene bamalaika 4 nabeminina pa makoona 4 aye sonde, ninshi nabekatilila imyela 4 iye sonde, pa kuti umwela wipuupila pe sonde nelyo pali bemba nelyo pa cimuti nangu cimo. 2 Kabili namwene malaika umbi alefuma ku kabanga,* ali ne ca kufwatikilako ica kwa Lesa wa mweo; kabili abilikishe ishiwi ilikalamba kuli bamalaika 4 abo baebele ukuti bonaule isonde na bemba, 3 ati: “Mwitala konaula isonde nelyo bemba nelyo ifimuti, mpaka tufwatike icishibilo+ pa mpumi+ sha basha ba kwa Lesa wesu.”

4 Kabili naumfwile impendwa ya bafwatikwepo icishibilo, ukuti baali 144,000,+ abafumine mu mikowa yonse iya bana ba kwa Israele:+

9 Pa numa ya ifi naliloleshe, kabili, moneni! kwali ibumba ilikalamba, ilyo umuntu nangu umo ashingapenda, abafumine mu nko shonse, mu mitundu yonse, mu mishobo yonse na mu ndimi shonse,+ ninshi nabeminina pa ntanshi ya cipuna ca Bufumu na pa ntanshi ya Mwana wa mpaanga, kabili ninshi nabafwala amalaya ayabuuta;+ bali ne misambo ya tuncindu mu minwe yabo.+ 10 Kabili balebilikisha ishiwi ilikalamba abati: “Ipusukilo lyesu lyafuma kuli Lesa wesu uwaikala pa cipuna ca Bufumu,+ na ku Mwana wa mpaanga.”+

11 Bamalaika bonse baiminine ninshi nabashinguluka icipuna ca Bufumu, na bakalamba,+ ne fya mweo 4. Lyena balifukeme pa ntanshi ya cipuna ca Bufumu e lyo balapepa Lesa 12 abati: “Ameni! Amalumbo, ubukata, amano, ukutootela, umucinshi, na maka fibe kuli Lesa wesu umuyayaya umuyayaya.+ Ameni!”

13 Lyena umo pa bakalamba anjipwishe ati: “Bushe aba abafwele amalaya yabuuta+ ni bani kabili bafumine kwi?” 14 E ico ilyo line namwaswike nati: “Mwe shikulu, nimwe mwishibe.” Na o anjebele ati: “Aba e bafuma mu bucushi bukalamba,+ kabili baliwasha amalaya yabo no kuyabuutisha mu mulopa wa mwana wa mpaanga.+ 15 E mulandu wine babelele pa ntanshi ya cipuna ca Bufumu ica kwa Lesa; kabili balamubombela akasuba no bushiku mwi tempele lyakwe; no Waikala pa cipuna ca Bufumu+ akafungulwila itenti lyakwe pali bena.+ 16 Tabakomfwe insala na kabili nangu ukumfwa icilaka na kabili, na kasuba nelyo icikabilila tafyakaboce,+ 17 pantu Umwana wa mpaanga+ uuli pa kati mupepi ne cipuna ca Bufumu, akabacema,+ kabili akabatungulula ku tumfukumfuku twa menshi ya mweo.+ Kabili Lesa akakuumuna ifilamba fyonse ku menso yabo.”+

8 Ilyo akambatwile+ ica kukambatikilako icalenga 7,+ mu muulu mwalitalele tondolo nalimo pali hafu ye awala. 2 Lyena namwene bamalaika 7+ abeminina pa cinso ca kwa Lesa, kabili babapeele amapenga 7.

3 Kwalishile malaika na umbi aiminina na ku ciipailo,+ ali ne cifutumwino ca golde, kabili bamupeele ububani ubwingi+ pa kuti abutuule pa ciipailo ca golde+ icali pa ntanshi ya cipuna ca Bufumu pa nshita Lesa alekutika amapepo ya ba mushilo. 4 Lyena icushi ca bubani cafutumwike mu lupi lwa kwa malaika no kunina ukuya ku cinso ca kwa Lesa pa nshita alekutika amapepo ya ba mushilo.+ 5 Lelo apo pene malaika abuulile icifutumwino, no kubikamo umulilo wa pa ciipailo e lyo ausukusa pe sonde. Lyena kwali icibulukutu, amashiwi, ukubyata kwa nkuba+ ne cinkukuma. 6 Kabili bamalaika 7 abali na mapenga 7,+ bali-ipekenye ukuti bayalishe.

7 Uwa kubalilapo alishishe ipenga lyakwe. Lyena imfula ya mabwe no mulilo ifyasakanamo no mulopa fyalokele pe sonde;+ kabili pa fiputulwa fitatu ifye sonde palipiile cimo, na pa fiputulwa fitatu ifya fimuti palipiile iciputulwa cimo, kabili ifimenwa fyonse ifiteku fyalipiile.+

8 Malaika walenga bubili alishishe ipenga lyakwe. Lyena icapala ulupili ulukalamba icalepya ngo mulilo capooselwe muli bemba.+ Kabili pa fiputulwa fitatu ifya bemba, iciputulwa cimo casangwike umulopa;+ 9 na pa fiputulwa fitatu ifya fibumbwa fya muli bemba, iciputulwa cimo ica fya mweo califwile,+ kabili pa fiputulwa fitatu ifya mato, iciputulwa cimo calyonaike.

10 Malaika walenga butatu alishishe ipenga lyakwe. Lyena ulutanda ulukalamba ulwaleaka nge nyali lwaliponene ukufuma mu muulu, kabili lwaponeene pa ciputulwa cimo pa fiputulwa fitatu ifya mimana na pa tumfukumfuku twa menshi.+ 11 Ishina lya lutanda lulya ni, Ukulula.* Kabili pa fiputulwa fitatu ifya menshi, iciputulwa cimo ca-alwike icalula, na bantu abengi balifwile ku menshi, pantu yalilulile.+

12 Malaika walenga 4 alishishe ipenga lyakwe. Lyena iciputulwa cimo pa fiputulwa fitatu ifya kasuba, califiitile,+ ne ciputulwa cimo pa fiputulwa fitatu ifya mweshi, califiitile, e lyo ne ciputulwa cimo pa fiputulwa fitatu ifya ntanda naco califiitile, pa kutila pa ciputulwa cimo ica fiputulwa fitatu ifya kasuba peba ulubuuto,+ na pa ciputulwa cimo ica fiputulwa fitatu ifya bushiku napo peba ulubuuto.

13 Kabili ilyo naloleshe, naumfwile kapumpe alepupuka mu muulu* alepunda ati: “We bulanda, we bulanda, we bulanda+ ku baikala pe sonde pa mulandu wa ciunda ca mapenga ayo bamalaika batatu bali pa kulisha!”+

9 Malaika uwalenga 5 alishishe ipenga lyakwe.+ Lyena namwene ulutanda ulwaponeene pe sonde ukufuma mu muulu, kabili balupeele* kii ya ku cilindi icabula impela.+ 2 Lwaiswile* icilindi icabula impela, kabili mu cilindi mwafutumwike icushi kwati cushi ca mwi lungu lya mulilo ilikalamba, na kasuba no lwelele fyalifiitile,+ pa mulandu wa cushi icalefuma mu cilindi. 3 Kabili mu cushi mwafumine bamakanta abaishile pe sonde+ kabili bapeelwe amaka nga yalya ayakwatako bakaling’ongo ba pe sonde. 4 Babebele ukuti beonaula ifimenwa fya pe sonde nangu icani icili conse nangu icimuti icili conse, kano fye abantu abashafwatikwa icishibilo ca kwa Lesa pa mpumi shabo.+

5 Kabili bamakanta tababasuminishe ukwipaya aba bantu, lelo babasuminishe fye ukubacusha pa myeshi 5. Ifyo balebacusha fyali ngo bukali bwa kwa kaling’ongo+ nga asuma umuntu. 6 Muli isho nshiku abantu bakalafwaya imfwa lelo tabakaisange, kabili bakalafwaisha ukufwa lelo imfwa ikalabafulumuka.

7 Kabili bamakanta baali kwati ni bakabalwe abali pa kuya ku nkondo;+ na pa mitwe yabo pali ifyalemoneka nge filongwe* fya golde, kabili ifinso fyabo fyalemoneka nge finso fya bantu, 8 lelo bakwete umushishi ngo mushishi wa banakashi. Kabili bakwete ameno nga ya nkalamo,+ 9 bakwete ne fya kucinga icifuba ifyali nge fya kucinga icifuba ifya cela. Ne congo ca mapindo yabo caleumfwika nge congo ca maceleta ya bakabalwe abengi abalebutukila ku nkondo.+ 10 Kabili bakwete imicila iyali nge mbola sha bakaling’ongo, na mu micila yabo e mwali amaka yabo aya kucusha abantu pa myeshi 5.+ 11 Imfumu iibateka, ni malaika wa ku cilindi icabula impela.+ Mu ciHebere ishina lyakwe ni Abadone,* mu ciGriki mwena ni Apolione.*

12 Ubucushi bumo* nabupita. Moneni! Nakushala amacushi yabili+ ayakakonkapo.

13 Malaika walenga 6+ alishishe ipenga lyakwe.+ Lyena naumfwile ishiwi limo ukufuma ku nsengo sha pa ciipailo ca golde+ icaba pa cinso ca kwa Lesa 14 lile-eba malaika uwalenga 6 uwali ne penga aliti: “Kakula bamalaika 4 abo bakaka pa mumana uukalamba uwa Yufrate.”+ 15 Kabili bamalaika 4 abo bapekanishisha ukwipaya iciputulwa cimo ica bantu pa fiputulwa fitatu pa nshita imo ine, pa bushiku buno bwine, mu mweshi umo wine kabili mu mwaka umo wine balibakakwile.

16 Impendwa ya bashilika ba pali bakabalwe yali iminshipendwa ne minshipendwa;* iyi mpendwa ya bashilika naliyumfwile. 17 Kabili ifi e fyali bakabalwe abo namwene mu cimonwa na baikelepo: Bakwete ifya kucinga icifuba ifyakashika kwati mulilo ne fya bluu ne fya libwe lya mingu, kabili imitwe ya bakabalwe yalemoneka kwati mitwe ya nkalamo,+ na mu tunwa twabo mwalefuma umulilo ne cushi ne libwe lya mingu. 18 Kabili ifi ifinkunka fitatu, e kutila umulilo, icushi, ne libwe lya mingu, ifyalefuma mu tunwa twa bakabalwe, fyaipeyepo iciputulwa cimo ica bantu pa fiputulwa fitatu. 19 Pantu amaka ya bakabalwe yali mu tunwa twabo na mu micila yabo, pantu imicila yabo yalemoneka kwati ni nsoka kabili yalikwete imitwe, na kuli iyi mitwe e ko bakabalwe balecushisha abantu.

20 Lelo abantu abasheleko abo ifi ifinkunka fishaipeye, tabalapiile pa milimo ya minwe yabo; kabili tabalekele ukupepa ifibanda no tulubi twa golde, utwa silfere, utwa mukuba, utwa mabwe no twa fimuti. Utu tulubi tatumona, tatumfwa kabili tatwenda.+ 21 Kabili tabalapiile pali filya baleipaya abantu nangu pa fyo balepupa imipashi nangu pa fyo balecita ubulalelale* nangu pa fyo baleiba.

10 Kabili namwene malaika umbi uwakosa aleika mu muulu, ninshi naifimba ne kumbi, no mukolamfula wali pa mutwe wakwe, kabili icinso cakwe calebengeshima kwati kasuba,+ na molu* yakwe yali nge nceshi ishalemoneka ngo mulilo, 2 kabili ali ne cimfungwa icinono mu minwe yakwe. Kabili anyantile ulukasa lwakwe ulwa ku kulyo pali bemba, e lyo ulwa ku kuso pa mulundu, 3 lyena abilikishe ishiwi ilikalamba nga filya inkalamo ibuluma.+ Kabili ilyo abilikishe, naumfwile amashiwi ya kubulukuta 7.+

4 Nomba ilyo naumfwile amashiwi ya kubulukuta 7 nafwaile ukulemba, lelo naumfwile ishiwi mu muulu+ lileti: “Sunga inkaama ya fyo ukubulukuta 7 kulandile kabili wifilemba.” 5 Malaika uo namwene naiminina pali bemba na pa mulundu aimishe ukuboko kwakwe ukwa ku kulyo, 6 kabili alapile Uwabako umuyayaya,+ uwabumbile umuulu ne fyabamo, ne sonde ne fyabapo e lyo na bemba ne fyabamo,+ ati: “Takatwalilile ukushingashinga. 7 Lelo mu nshiku ilyo malaika walenga 7+ akaba mupepi no kulisha ipenga lyakwe,+ inkaama ya kwa Lesa*+ ukulingana ne mbila nsuma iyo abilile ku basha bakwe bakasesema+ ikafikilishiwa.”

8 Ne shiwi ilyo naumfwile+ lyalandile na ine na kabili aliti: “Kabiye, ubuule icimfungwa icinono icafungululwa icili mu minwe ya kwa malaika uwiminine pali bemba na pa mulundu.”+ 9 Naliile kuli malaika no kumweba ukuti ampeele ici cimfungwa icinono. Na o anjebele ati: “Buula ulye,+ kabili ici cimfungwa calalenga mu mala yobe mulule, lelo mu kanwa kobe mwena calalowa ngo buci.” 10 E ico nalibuulile ici cimfungwa icinono icali mu minwe ya kwa malaika, nacilya no kucilya.+ Mu kanwa kandi calilowele ngo buci,+ lelo ilyo naciminine, mu mala mwena mwalilulile. 11 Kabili banjebele abati: “Ukaseseme na kabili pa bantu aba mishobo yonse, aba nko shonse, aba ndimi shonse na pa mfumu ishingi.”

11 Kabili ilyo ampeele itete ilyapala inkonto,*+ anjebele ati: “Ima upime itempele lya kwa Lesa ne ciipailo kabili upende abantu abapepelamo. 2 Lelo ulubansa ululi kunse ye tempele, lwena ulushe wilupima, pantu Lesa alipeela abena fyalo, kabili bakanyataula umusumba wa mushilo+ pa myeshi 42.+ 3 Kabili nkalenga inte shandi shibili shikaseseme inshiku 1,260, ninshi nashifwala insamu.” 4 Aba e bo imiolife ibili+ ne fya kutekapo inyali fibili+ ifyaiminina pa cinso ca kwa Shikulu we sonde fimininako.+

5 Nga kwaba uwafwaya ukubacita icabipa, umulilo ulafuma mu tunwa twabo no koca abalwani babo. Nga kwaba umuntu uwafwaya ukubacita icabipa, ifi fine e fyo afwile ukwipaiwa. 6 Aba balikwata amaka ya kwisala umuulu+ pa kuti imfula iloka+ mu nshiku balesesema, kabili balikwata amaka ya kwalula amenshi yaba umulopa,+ na maka ya kuleta ifinkunka fya misango yonse pe sonde, pa nshita yonse iyo bafwaya.

7 Ilyo bakapwisha umulimo wabo uwa kusesema, iciswango icikafuma mu cilindi icabula impela cikalwa nabo, kabili cikabacimfya no kubepaya.+ 8 Kabili ifitumbi fyabo fikaba mu musebo uukalamba uwa mu musumba uukalamba uwitwa mu mampalanya Sodomu na Egupti, umo baipaile Shikulwibo pa cimuti. 9 Kabili abantu ba mishobo yalekanalekana, imitundu, indimi ne nko bakatamba ifitumbi fyabo pa nshiku shitatu na hafu,+ kabili tabakasuminishe ukuti ifitumbi fyabo fibikwe mu nshiishi. 10 Kabili abaikala pe sonde bakasekelela pali bena kabili bakasefya. Bakapeeleshanya ne fya bupe pa mulandu wa kuti aba bakasesema babili balicushishe abaikala pe sonde.

11 Pa numa ya nshiku shitatu na hafu, amaka ya bumi ukufuma kuli Lesa yaingile muli bena,+ kabili baliminine, na bantu abalebamona balitiinine nga nshi. 12 E lyo baumfwile ishiwi ilikalamba ukufuma mu muulu lileti: “Iseni kuno.” E ico balile ku muulu mwi kumbi, kabili abalwani babo balibamwene.* 13 Muli ilya nshita kwapitile icinkukuma icikalamba, ne ciputulwa cimo ica pa fiputulwa 10 ifya musumba calyonaike; kabili icinkukuma caipeye abantu 7,000, na basheleko balitiinine kabili balilumbenye Lesa wa mu muulu.

14 Ubucushi* bwalenga bubili+ nabupita. Moneni! Ubucushi bwalenga butatu bwala-angufyanya ukwisa.

15 Malaika walenga 7 alilishishe ipenga lyakwe.+ Lyena kwaumfwikike amashiwi ayakalamba mu muulu ayati: “Ubufumu bwa calo nomba bwaba Bufumu bwa kwa Shikulwifwe+ kabili ubwa kwa Kristu wakwe,+ kabili akateka umuyayaya.”+

16 Kabili abakalamba 24+ abaikele pa fipuna fyabo ifya Bufumu pa cinso ca kwa Lesa balifukeme bafisha ne mpumi panshi e lyo bapepa Lesa, 17 abati: “Twamutootela mwe Yehova* Lesa, Uwa Maka Yonse, uwabako+ kabili uwaliko, pantu namubuula amaka yenu ayakalamba no kutendeka ukuteka.+ 18 Nomba inko shena shakalipa, no bukali bwenu bwaisa, ne nshita ya kupingula abafwa yafika, ne ya kupeela abasha benu icilambu,+ bakasesema,+ aba mushilo, abatiina ishina lyenu, abantu yaweyawe na bashimucindikwa, ne ya konaula abaleonaula isonde.”+

19 Kabili itempele lya kwa Lesa ilya mu muulu lyaliswike, ne cipao ca cipangano cakwe calimoneke mwi tempele.+ Lyena kwali ukubyata kwa nkuba, ifibulukutu, amashiwi, icinkukuma ne mfula ya mabwe iikalamba.

12 Lyena mu muulu mwamoneke icishibilo icikalamba: Umwanakashi+ afwele akasuba, no mweshi wali mwi samba lya makasa yakwe, na pa mutwe wakwe pali icilongwe* icakwete intanda 12, 2 kabili aali ne fumo. Alelila pa mulandu wa bukali no bucushi ubukalamba ubwa pa kupaapa.

3 Icishibilo na cimbi calimoneke mu muulu. Moneni! Kwali icing’wena icikalamba icakashika,+ icakwete imitwe 7 ne nsengo 10 kabili pa mitwe ya ciko pali ifilongwe* 7; 4 kabili umucila wa ciko wakulile iciputulwa cimo pa fiputulwa fitatu+ ifya ntanda sha mu muulu, no kushiponesha pe sonde.+ Icing’wena catwalilile fye ukwiminina pa ntanshi ya mwanakashi+ uwali mupepi no kupaapa, pa kuti nga apaapa, cilye umwana wakwe.

5 Kabili umwanakashi afyele umwana umwaume,+ uukacemena inko shonse ku nkonto ya cela.+ Lelo umwana balimusompwele no kumutwala kuli Lesa uwali pa cipuna cakwe ica Bufumu. 6 Umwanakashi ena afulumukiile ku matololo, ku ncende iyo Lesa amupekanishishe, uko bali no kulamuliishisha pa nshiku 1,260.+

7 Kabili ku muulu kwabuukile inkondo: Mikaele*+ na bamalaika bakwe balilwile ne cing’wena, e lyo icing’wena na bamalaika ba ciko nafyo fyalilwile nabo. 8 Lelo tafyacimfishe,* kabili tafyakwete apa kwikala ku muulu. 9 E ico icing’wena icikalamba+ balicipoosele panshi, icisoka ca pa kutendeka,+ iciitwa Kaseebanya+ kabili Satana,+ icilufya aba pano isonde bonse;+ balicipoosele pe sonde,+ kabili bamalaika ba ciko nabo babapoosele pamo naco. 10 Naumfwile ishiwi ilikalamba mu muulu lileti:

“Nomba ipusukilo,+ amaka, Ubufumu bwa kwa Lesa wesu,+ na maka ya kwa Kristu wakwe fyaisa, pantu uubepesha bamunyinefwe nabamupoosa panshi, uubabepesha akasuba no bushiku pa cinso ca kwa Lesa wesu!+ 11 Nabo bamucimfiishe+ ku mulopa wa Mwana wa mpaanga+ na ku mashiwi ya bunte bwabo,+ kabili tabatemenwe imyeo* yabo+ ica kuti bali-ipeleshe no kufwa. 12 E ico sansamukeni mwe myulu na mwe baikalamo! Nomba we bulanda kuli imwe mwe sonde na bemba,+ pantu Satana Kaseebanya naikila pali imwe, ali ne cipyu icikalamba, pantu naishiba ukuti ashele fye ne nshita iinono.”+

13 Nomba ilyo icing’wena camwene ukuti nabacipoosa pe sonde,+ catampile ukucusha umwanakashi+ uwafyele umwana umwaume. 14 Lelo umwanakashi bamupeele amapindo yabili aya kwa kapumpe umukalamba,+ pa kuti apupukile ku matololo ku cifulo cakwe, uko bali no kulamuliishisha pa nshita imo ne nshita shibili e lyo na hafu ya nshita,*+ pa kuti bamupusushe ku cisoka.+

15 Kabili icisoka calukile amenshi ayali ngo mumana ku numa ya mwanakashi, pa kuti anwene muli uyu mumana. 16 Lelo isonde lyalyafwile umwanakashi, kabili lya-asamwine akanwa no kumina umumana uo icing’wena calukile. 17 E ico icing’wena calikalipe no kufulilwa umwanakashi, kabili caile ku kulwa na bana*+ ba mwanakashi abasheleko, abakonka amafunde ya kwa Lesa kabili abakwata umulimo wa kushimikila abantu pali Yesu.+

13 Kabili icing’wena caiminine shilili pa mucanga wa pali bemba.

Lyena namwene iciswango+ cilefuma muli bemba,+ cakwete insengo 10 ne mitwe 7, kabili pa nsengo 10 pali ifilongwe* 10, lelo pa mitwe ya ciko pali amashina ya kupontela Lesa. 2 Nomba iciswango ico namwene calemoneka kwati ni mbwili, lelo cakwete amakasa kwati ya kwa bere, na kanwa ka ciko kali kwati kanwa ka nkalamo. Kabili icing’wena+ capeele iciswango amaka ya ciko, icipuna ca ciko ica bufumu e lyo na maka ya kuteka ayengi.+

3 Namwene umutwe umo uwa ciswango uwalemoneka kwati untu baceneene imfwila, lelo icilonda ico baucenene calipolele,+ kabili abantu bonse aba pe sonde balekonka ici ciswango ninshi nabapapa. 4 Kabili bapepele icing’wena pantu capeele iciswango amaka, bapepele ne ciswango, abati: “Nani uwaba nge ciswango, kabili nani uwingalwa naco?” 5 Icing’wena capeele iciswango akanwa pa kuti cilelanda ifya kuitumika ne fya kupontela ifya mushilo, kabili cacipeele amaka ya kucita ifyo cilefwaya pa myeshi 42.+ 6 Catampile no kupontela Lesa,+ ukupontela ishina lyakwe no ko ekala, kabili caliponteele na bekala ku muulu.+ 7 Balicisuminishe ukulwa na ba mushilo no kubacimfya,+ kabili bacipeele amaka pa mitundu yonse, pa bantu bonse, pa ba ndimi shonse na pa nko shonse. 8 Kabili bonse abaikala pe sonde bakacipepa. Ukutula fye ilyo icalo caishilebako, tapaba nangu umo pali aba uo balemba ishina mu cimfungwa ca mweo+ ica Mwana wa mpaanga uo baipeye.+

9 Uuli na matwi, naomfwe.+ 10 Onse uuli no kwikatwa, bakamwikata. Onse uukepaila ku lupanga,* na o wine bafwile ukumwipaila ku lupanga.+ Apa e po aba mushilo+ balekabila ukushipikisha+ no kuba ne citetekelo.+

11 Lyena namwene iciswango cimbi cilefuma mu mushili, kabili cali ne nsengo shibili kwati mwana wa mpaanga, lelo catendeke ukulanda nge cing’wena.+ 12 Calebomfya amaka yonse aya kuteka ayo iciswango+ ca kubalilapo cacipeele, ninshi iciswango ca kubalilapo cilemonako. Kabili calengele isonde na baikalapo balapepa iciswango ca kubalilapo, icapolele icilonda ico baciceneene imfwila.+ 13 Kabili calecita ifipesha amano ifikalamba. Calelenga fye no mulilo wafuma ku muulu no kuponena pe sonde ninshi na bantu balemonako.

14 Calelufya abaikala pe sonde, pa mulandu wa fipesha amano ifyo bacisuminishe ukucita pa ntanshi ya ciswango, ninshi cile-eba abaikala pe sonde ukupanga icimpashanya+ ca ciswango, ico bakomene no lupanga lelo icapolele.+ 15 Kabili bacisuminishe ukupuuta umupu wa mweo* mu cimpashanya ca ciswango, pa kuti icimpashanya ca ciswango cilande kabili cilenge bonse abalekaana ukupepa icimpashanya ca ciswango babepaye.

16 Calepatikisha abantu bonse—abantu yaweyawe na bashimucindikwa, abakankaala na bapiina, abantungwa na basha—pa kuti bababike icishibilo pa fisansa fyabo ifya ku kulyo nelyo pa mpumi shabo,+ 17 na pa kuti umuntu nangu umo eshita nelyo ukushitisha kano fye nga nakwata icishibilo, e kutila ishina+ lya ciswango nelyo inamba ya ciko.+ 18 Apa e palefwaikwa ukuba na mano: Uwiluka eshibe umwalola inamba ya ciswango, pantu ni namba ya muntu, kabili inamba ya ici ciswango ni 666.+

14 Lyena naliloleshe, kabili, moneni! Umwana wa mpaanga+ aiminine pa Lupili lwa Sione,+ kabili ali pamo na bantu 144,000.+ Aba bantu pa mpumi shabo palembelwe ishina lya Mwana wa mpaanga ne shina lya kwa Wishi.+ 2 Naumfwile iciunda ukufuma mu muulu icaleumfwika nge ciunda ca menshi ayengi kabili nge ciunda ca cibulukutu icikalamba; kabili iciunda naumfwile cali nge ca bakemba abaleimba ninshi balelisha ne nsango shabo. 3 Kabili baleimba ulwimbo ulwaleumfwika kwati lwimbo ulupya+ pa ntanshi ya cipuna ca Bufumu na pa ntanshi ya fya mweo 4+ na bakalamba,+ kabili takwali uwaishibe lulya lwimbo, kano fye balya 144,000+ abashitilwe pe sonde. 4 Aba e bashatala abaikowesha ku banakashi; na kuba, bashimbe.*+ Aba e bakonka Umwana wa mpaanga konse uko aya.+ Aba bashitilwe+ mu bantu pa kuti babe ifisabo fya kubalilapo+ ukupeela Lesa no Mwana wa mpaanga, 5 na mu tunwa twabo tamwasangilwe ubufi nangu bumo; kabili tabakwata akalema.+

6 Kabili namwene malaika umbi alepupuka mu muulu.* Uyu malaika ali ne mbila nsuma ya muyayaya iya kubila ku baikala pe sonde, na ku nko shonse, na ku mitundu yonse, na ku ba ndimi shonse na ku bantu bonse.+ 7 Alelanda ne shiwi ilikalamba ati: “Tiineni Lesa no kumupeela umucinshi, pantu inshita ya bupingushi bwakwe naifika,+ e ico pepeni Uwabumbile umuulu ne sonde na bemba+ no tumfukumfuku twa menshi.”

8 Lyena pakonkele malaika umbi uwalenga bubili, alelanda ati: “Nawa! Babiloni Mukalamba+ nawa,+ uwalengele inko shonse ukunwako umwangashi uulenga alafwaisha ukucita ubulalelale!”*+

9 Lyena pakonkele malaika uwalenga butatu, uwalelanda ne shiwi ilikalamba ati: “Umuntu nga apepa iciswango+ ne cimpashanya ca ciko, kabili apokelela icishibilo pa mpumi yakwe nelyo pa cisansa cakwe,+ 10 akanwako no bukali bwa kwa Lesa ubushasunduka ubo bapongolwela muli kapu ya bukali bwakwe,+ kabili bakamucushisha ku mulilo na ku libwe lya mingu+ pa menso ya bamalaika ba mushilo na pa menso ya Mwana wa mpaanga. 11 Ne cushi ca kucululuka kwabo cikalafutumuka umuyayaya,+ kabili abapepa iciswango ne cimpashanya ca ciko, na bonse abapokelela icishibilo ce shina lya ciko+ tabakaletuusha akasuba no bushiku. 12 Apa e po aba mushilo,+ abakonka amafunde ya kwa Lesa kabili abatetekela Yesu,+ balekabila ukushipikisha.”

13 Kabili naumfwile ishiwi ukufuma mu muulu lileti, “Lemba auti: Ba nsansa abakulafwila muli Shikulu+ ukufuma pali ino nshita. Umupashi watila, cine cine lekeni batuushe ku milimo yabo, pantu imilimo babombele ilebakonka.”

14 Lyena naliloleshe, kabili moneni! kwali ikumbi ilyabuuta, no waikele pe kumbi alemoneka ngo mwana wa muntu,+ ninshi nafwala ne cilongwe* ca golde kabili ali ne cikwakwa icatwa mu minwe yakwe.

15 Kwali malaika umbi uwafumine mwi tempele, kabili alebilikisha mwi shiwi ilikalamba ku waikele pe kumbi ati: “Pishamo icikwakwa cobe kabili akuseepa, pantu inshita ya kusombola naifika, ne fya kusombola pe sonde nafipya sana.”+ 16 Kabili uwaikele pe kumbi apishishe icikwakwa cakwe pe sonde, ne fyali pe sonde fyaliseepelwe.

17 Kwali malaika na umbi uwafumine mwi tempele lya ku muulu, na o wine ali ne cikwakwa icatwa.

18 Lyena malaika umbi afumine ku ciipailo kabili ali na maka pa mulilo. Uyu malaika abilikishe ishiwi ilikalamba ku wali ne cikwakwa icatwa, ati: “Pishamo icikwakwa cobe icatwa, no kuputula ifisansangu fya mwangashi wa pe sonde, pantu imyangashi ya uko naipya.”+ 19 Malaika apishishe icikwakwa cakwe mwi sonde no kuputula imyangashi ya pe sonde, kabili aipoosele mu ca kukaminamo imyangashi icikalamba ica bukali bwa kwa Lesa.+ 20 Bakabalwe balinyantawile mu ca kukaminamo imyangashi icali kunse ya musumba, na mu ca kukaminamo imyangashi mwafumine umulopa uwafikile fye na ku mikobelo ya bakabalwe, kabili walikonkolweke pa ntamfu iingalingana ne fibansa 1,600.*

15 Kabili namwene icishibilo cimbi mu muulu, icikalamba kabili ica kupapa, mwali bamalaika 7+ abali ne finkunka 7. Ifi ifinkunka e fya kulekeleshako, pantu ifi nga fyapita ninshi ubukali bwa kwa Lesa bwapwa.+

2 Kabili namwene icalemoneka kwati ni bemba we glasi+ uwasakanamo no mulilo, ninshi na bacimfishe+ iciswango ne cimpashanya+ ca ciko kabili abakeene inamba ya ciko+ nabeminina mupepi na bemba iyalemoneka kwati li glasi, kabili ninshi nabekata insango sha kwa Lesa. 3 Baleimba ulwimbo lwa kwa Mose+ umusha wa kwa Lesa no lwimbo lwa Mwana wa mpaanga,+ abati:

“Imilimo yenu mwe Yehova* Lesa, mwe ba Maka Yonse,+ ikalamba kabili yalipesha amano.+ Inshila shenu,+ mwe Mfumu ya muyayaya,+ shalilungama kabili sha cine. 4 Nani uushakamutiine, mwe Yehova,* no kucindika ishina lyenu, apo nimwe fye mweka mwe ba cishinka?+ Pantu inko shonse shikesa kabili shikapepa pa cinso cenu,+ pantu ifipope fyenu ifyalungama nafisokololwa.”

5 Pa numa ya ifi naliloleshe, kabili namwene umuputule wa mushilo* uwa mwi tenti lya fyo Lesa alanda+ waisuka mu muulu,+ 6 na bamalaika 7 abali ne finkunka 7+ bafumine mu muputule wa mushilo, ninshi nabafwala insalu sha busaka, ishabuuta tuutu, kabili ninshi nabacilinganya ne mishipi ya nsalu iikalamba iya golde pa fifuba fyabo. 7 Cimo pa fya mweo 4 capeele bamalaika 7 imbale shafonka ishili 7 isha golde ishaiswilemo ubukali bwa kwa Lesa,+ uwabako umuyayaya. 8 Kabili mu muputule wa mushilo mwaliswile icushi pa mulandu wa bukata bwa kwa Lesa+ na pa mulandu wa maka yakwe, kabili takwali nangu umo uwaingile mu muputule wa mushilo mpaka ifinkunka 7+ ifya bamalaika 7 fyapwa.

16 Kabili naumfwile ishiwi ilikalamba ukufuma mu muputule wa mushilo*+ lile-eba bamalaika 7 aliti: “Kabiyeni kapongolweleni ubukali bwa kwa Lesa ubuli mu mbale shafonka 7 pe sonde.”+

2 Uwa kubalilapo alile no kupongolwela ifyali mu mbale yakwe iyafonka pe sonde.+ E ico bonse abali ne cishibilo ca ciswango+ kabili abalepepa icimpashanya ca ciko+ balilwele ifilonda ifyabipisha,+ kabili ifyalekalipa nga nshi.

3 Uwalenga bubili apongolwelele ifyali mu mbale yakwe iyafonka muli bemba.+ Na bemba yalyalwike yaba kwati mulopa+ wa muntu uufwile, ne fya mweo fyonse fyalifwile, e kutila ifya muli iyi bemba.+

4 Uwalenga butatu apongolwelele ifyali mu mbale yakwe iyafonka mu mimana na mu tumfukumfuku twa menshi.+ Lyena imimana no tumfukumfuku fyasangwike umulopa.+ 5 Naumfwile malaika uwakwata amaka pa menshi aleti: “Mwe babako kabili abaliko,+ Mwe ba cishinka,+ mwalilungama, pantu namupingula ifi,+ 6 pantu basuumishe umulopa wa ba mushilo no wa bakasesema,+ kabili na imwe namubalenga banwa umulopa;+ kanshi nacilinga ukubacita ifi fine.”+ 7 Kabili naumfwile iciipailo cileti: “Cine cine, mwe Yehova* Lesa, Uwa Maka Yonse,+ ubupingushi bwenu+ bwa cine kabili bwalilungama.”

8 Uwalenga 4 apongolwelele ifyali mu mbale yakwe iyafonka pa kasuba,+ kabili akasuba bakapeele amaka ya kuti kabe ngo mulilo kabili koce abantu. 9 Kabili abantu balipiile nga nshi ku cikabilila ca kasuba, lelo baponteele ishina lya kwa Lesa, uwakwata amaka pali ifi finkunka. Tabalapiile kabili tabamucindike.

10 Uwalenga 5 apongolwelele ifyali mu mbale yakwe iyafonka pa cipuna ca bufumu ica ciswango. Ne mfifi yakupile ubufumu bwa ciko,+ kabili batendeke ukuisumaula indimi pa mulandu wa kumfwa ubukali, 11 lelo baponteele Lesa wa mu muulu pa mulandu wa kumfwa ubukali na pa mulandu wa filonda fyabo, kabili tabalapiile pa fyo balecita.

12 Uwalenga 6 apongolwelele ifyali mu mbale yakwe iyafonka pa mumana ukalamba uwa Yufrate,+ kabili amenshi ya uko yalikamine,+ pa kuti ishamfumu+ sha ku kabanga* shipitemo.

13 Kabili namwene ifyebo fyakowela fitatu ifya mupashi* ifyalemoneka kwati ni bacula filefuma mu kanwa ka cing’wena+ na mu kanwa ka ciswango na mu kanwa ka kwa kasesema wa bufi. 14 Na kuba, ifi e fyebo ififuma ku fibanda kabili e ficita ifipesha amano.+ Fyaile ku mfumu sha ba pano isonde bonse, mu kushilonganya ukwisa ku nkondo+ ya bushiku ubukalamba ubwa kwa Lesa Wa Maka Yonse.+

15 “Moneni! Ndeisa ngo mupuupu.+ Wa nsansa uulola+ kabili uusunga ifya kufwala fyakwe, pa kuti e-enda ubwamba na bantu bemutambila.”+

16 Kabili fyashilonganike ku cifulo ico beta mu ciHebere ukuti Armagedone.*+

17 Uwalenga 7 apongolwelele ifyali mu mbale yakwe iyafonka mu mwela. Lyena ishiwi ilikalamba lyafumine ku cipuna ca Bufumu icali mu muputule wa mushilo*+ aliti: “Nomba capwa!” 18 Kabili kwali ukubyata kwa nkuba, amashiwi ne fibulukutu, kwapitile ne cinkukuma icikalamba icishatala acibako ukutula apo abantu babela pe sonde.+ Ici cali cinkukuma icikalamba nga nshi. 19 Umusumba uukalamba+ walyakanikene patatu, ne misumba ya uko yaliwile; kabili Lesa aibukishe Babiloni Mukalamba,+ amupeele na kapu ya mwangashi wa bukali bwakwe.+ 20 Na kabili, ifishi fyonse fyalifulumwike, ne mpili shalubile na po shaile.+ 21 Lyena imfula ya mabwe iikalamba iyafumine ku muulu yalokele abantu.+ Ilibwe limo lyalingene ukufina ne talanti,* kabili abantu baponteele Lesa pa mulandu wa cinkunka ca mfula ya mabwe,+ pantu ici cinkunka cali icikalamba nga nshi.

17 Umo pali bamalaika 7 abakwete imbale shafonka 7+ aishile kuli ine no kunjeba ati: “Isa, nalakulanga ifyo cilende mukalamba uwaikala pa menshi ayengi+ akapingulwa, 2 uo ishamfumu sha pe sonde shacitile nankwe ubulalelale,*+ kabili uo aba pe sonde bakolelwe umwangashi wa mu bulalelale* bwakwe.”+

3 Kabili ansendeele mu mupashi no kuntwala mu matololo. Awe naishilemona umwanakashi naikala pa ciswango icakashika ce icakwete amashina ya kupontela ifya mushilo umubili onse, kabili icakwete imitwe 7 ne nsengo 10. 4 Umwanakashi afwele ifyakashikila+ ne fyakashika ce, kabili aiyemfeshe ne fya golde, ifya mabwe aya mutengo sana ne fya margariti,+ kabili mu minwe yakwe akwete kapu ya golde iyaiswilemo ifya bunani ne fyakowela ifya mu bulalelale* bwakwe. 5 Pa mpumi yakwe palembelwe ishina lya nkama ilya kuti: “Babiloni Mukalamba, nyina wa bacilende+ kabili umwine wa fya bunani ifya pe sonde.”+ 6 Kabili namwene ukuti uyu mwanakashi alikolelwe umulopa wa ba mushilo no wa nte sha kwa Yesu.+

Ala ilyo namumwene, nalipapile nga nshi. 7 E ico malaika anjebele ati: “Cinshi wacipapila? Leka nkwebe inkama ya uyu mwanakashi+ ne ciswango icimusendele icili ne mitwe 7 ne nsengo 10:+ 8 Cilya ciswango wacimona e po cali, lelo tacilipo, kabili cili no kufuma mu cilindi icabula impela,+ kabili cili no konaulwa. Kabili ilyo abaikala pe sonde—abo amashina yabo yashalembwa mwi buuku lya mweo+ ukufuma pa kutendeka kwa calo—bakamona ukuti iciswango icalipo, lelo tacilipo, e lyo cikesebapo na kabili, cikabapesha amano.

9 “Apa palekabila ukucenjela no kuba na mano: Imitwe 7+ ni mpili 7 apaikala umwanakashi. 10 Kabili kuli imfumu 7: Ishili 5 shaliwa, imo e po icili, imbi icili tailaisa; lelo ilyo ikesa, ifwile ukwikala fye inshita iinono. 11 Kabili iciswango icalipo lelo tacilipo,+ naco cine ni mfumu yalenga 8, nomba catuntuka muli ishi 7, kabili cili mukonaulwa.

12 “Insengo 10 isho wacimona ni mfumu 10 ishishilapokelela ubufumu, lelo shikapokelela amaka ya kuba ishamfumu pamo ne ciswango pe awala fye limo. 13 Ishi shakwata amapange yamo yene, aya kupeela iciswango amaka ya shiko no bufumu bwa shiko. 14 Shikalwa no Mwana wa mpaanga,+ lelo apo ni Shikulu wa bashikulu kabili ni Mfumu ya shamfumu,+ Umwana wa mpaanga akashicimfya.+ Kabili abaitwa, abasalwa, kabili aba cishinka, nabo bakacimfisha pamo nankwe.”+

15 Malaika anjebele ati: “Amenshi ayo wacimona apaikala cilende, bantu ba mishobo yonse, mabumba ya bantu, ni nko shonse kabili bantu ba ndimi shonse.+ 16 Kabili insengo 10+ ne ciswango+ ifyo wacimona, fikapata cilende+ kabili fikamupokolola fye fyonse ifyo akwata no kumusha ubwamba, fikalya no mubili wakwe kabili fikamoca fye onse mu mulilo.+ 17 Pantu ni Lesa walenga ukuti imitima ya fiko icite ifyo umwine alefwaya,+ no kuti fifikilishe amapange ya fiko aya kupeela iciswango+ ubufumu bwa fiko, mpaka amashiwi ya kwa Lesa yakafikilishiwe. 18 No mwanakashi+ uo wacimona, musumba uukalamba uuteka ishamfumu shonse isha pe sonde.”

18 Pa numa ya ifi namwene malaika umbi aleika ukufuma ku muulu, alikwete amaka sana, kabili pe sonde palibuutile pa mulandu wa bukata bwakwe. 2 Kabili abilikishe mwi shiwi ilikalamba ati: “Nawa! Babiloni Mukalamba nawa,+ kabili nomba e mo ifibanda fileikala, e mulefisama ne mipashi yonse iyakowela* ne fyuni fyonse ifyakowela kabili ifyo abantu bapata!+ 3 Pantu inko shonse shalinwako umwangashi uulenga alefwaya* sana ukucita ubulalelale,*+ ne mfumu sha pe sonde shalecita nankwe ubulalelale,+ kabili bashimakwebo* ba pe sonde balinonkele ifyuma pa mulandu wa fyuma ifingi ifyo anonkela mu kucita ifya nsoni.”

4 Kabili naumfwile ishiwi limbi ukufuma ku muulu lileti: “Fumenimo muli ena, mwe bantu bandi,+ nga tamulefwaya ukuwila mu membu shakwe, kabili nga tamulefwaya ifinkunka fyakwe na imwe fikamuponene.+ 5 Pantu imembu shakwe nashituulumana ukufika fye na ku muulu,+ kabili Lesa naibukisha ulufyengo lwakwe.*+ 6 Mumucite ukulingana ne fyo acitile abantu bambi,+ kabili mumufushishe imiku ibili impendwa ya fyo acitile;+ muli kapu+ iyo asakanishishemo, mumusakanishishemo imiku ibili ifyo asakenyemo.+ 7 Filya fine aicindamike no kunonka ifyuma ifingi pa mulandu wa kucita ifya nsoni, e fyo na imwe mumucululushe no kumulenga aleloosha. Pantu mu mutima wakwe atila: ‘Ine ndi namfumu, nshili mukamfwilwa, kabili nshakabaleloosha nakalya.’+ 8 E mulandu wine ifinkunka fyakwe e kutila, imfwa, ukuloosha ne cipowe, fikeshila pali ena mu bushiku fye bumo, kabili akapya fye onse mu mulilo,+ pantu Yehova* Lesa uwamupingula wa maka.+

9 “Ne mfumu sha pe sonde ishacitile nankwe ubulalelale,* kabili ishanonkeele mu fyuma fyakwe ifingi ifyo anonkele mu kucita ifya nsoni, shikalila no kumuloosha nga nshi ilyo shikamona icushi icikafutumuka ilyo akalapya. 10 Shikeminina akatalamukila pa mulandu wa kutiina ukushicululusha nge fyo ena akalacuula, shikalati: ‘Owe ifyo cabipa, ifyo cabipila we musumba uukalamba,+ Babiloni we musumba wa maka, pantu bakonaula fye mwi awala limo!’

11 “Kabili bashimakwebo ba pe sonde balelila no kumuloosha, pantu takuli uuleshita na kabili fyonse ifyo bakwete, 12 ifipe fyonse ifya golde, ifya silfere, ifya mabwe aya mutengo sana, ifya margariti, ifya nsalu ishisuma, ishakashikila, ishabeka sana,* ne shakashika ce; ne fintu fyonse ifyo bapangila ne mbao sha kacena akasuma, na fyonse ifyo bapangila na meno ya nsofu, na fyonse ifyo bapangila ne mbao sha mutengo nga nshi, na fyonse ifya mukuba ne fya cela ne fya marbele; 13 na kinamone, amomo,* ububani, amafuta ya kacena akasuma, ububani ubwabuuta,* umwangashi, amafuta ya miolife, ubuunga ubwapeleka, ingano, ing’ombe, impaanga, bakabalwe, amaceleta, abasha, na bantu.* 14 Cine cine, ifisabo ifisuma ifyo walefwaisha* nafiloba, ne fintu ifisuma e lyo ne fyabalabata nafiloba, kabili tawakabale aufikwatapo na kabili.

15 “Bashimakwebo abali ne fyuma pa mulandu wa kushitisha ifi fintu kuli ena, bakeminina akatalamukila pantu bakalatiina ukucululukila pamo nankwe, kabili bakalalila no kuloosha. 16 Bakalati: ‘Owe ifyo cabipa, ifyo cakubipila we musumba uukalamba, we walefwala insalu ishisuma, ishakashika, ne shakashika ce kabili we walefwala ifya golde, ifya mabwe aya mutengo sana ne fya margariti,+ 17 pantu mwi awala limo ifyuma fyonse ifi fyaonaika!’

“Kabili umukalamba onse uwa bensha amato, umuntu onse uwenda pali bemba, abensha amato na bonse abacita amakwebo pali bemba, baiminine akatalamukila 18 kabili balibilikishe ilyo bamwene icushi icalefutumuka ilyo alepya, abati: ‘Musumba nshi uwingalingana no musumba uyu uukalamba?’ 19 Baikubile ulukungu pa mitwe e lyo balabilikisha, ninshi balelila no kuloosha abati: ‘Owe ifyo cabipa, ifyo cabipila umusumba uukalamba, umo bonse abakwete amato pali bemba banonkeele pa mulandu wa fyuma fyakwe ifingi, pantu mwi awala fye limo e mo bamonaula!’+

20 “Sansamukeni mwe ba mu muulu,+ mwe ba mushilo,+ mwe batumwa na mwe bakasesema pa fyacitikila Babiloni, pantu Lesa amupingwilako+ Babiloni!”

21 Kabili malaika uwakosa aimishe ilibwe ilyali kwati libwe lya kupelelako ilikalamba no kulifubula muli bemba, e lyo alanda ati: “Ifi fine e fyo na Babiloni umusumba uukalamba bakaufubula, kabili tawakatale aumoneka na kabili.+ 22 Kabili iciunda ca bakemba abalisha insango, abalisha ifilimba, abalisha imitolilo na balisha amapenga tafyakatale afyumfwika na kabili muli iwe, kabili muli iwe tamwakasangwe abapanga ifya kupangapanga, ne congo ca libwe lya kupelelako tacakomfwike na kabili muli iwe, 23 Ulubuuto lwa nyali talwakasanike na kabili muli iwe, kabili muli iwe tamwakomfwike ishiwi lya kwa shibwinga ne lya kwa nabwinga; pantu bashimakwebo bobe baali ni bashimucindikwa ba pe sonde, kabili pa mulandu wa kupupa imipashi+ walilufishe inko shonse. 24 Cine cine, muli Babiloni e mwasangilwe umulopa wa bakasesema, uwa ba mushilo+ no wa bantu bonse abo baipeye pe sonde.”+

19 Pa numa ya ifi naumfwile amashiwi ayaleumfwika nga mashiwi ayakalamba aya bantu abengi mu muulu. Balelanda abati: “Lumbanyeni Jah!*+ Ipusukilo no bukata na maka fya kwa Lesa, 2 pantu ubupingushi bwakwe bwa cishinka kabili bwalilungama.+ Pantu napingula cilende mukalamba uwakoweseshe isonde ku bulalelale* bwakwe, kabili nalandula pa mulopa wa basha bakwe uuli mu minwe ya kwa uyu cilende.”+ 3 Kabili apo pene balandile umuku walenga bubili abati: “Lumbanyeni Jah!*+ Ne cushi icilefuma ku musumba wa Babiloni cakulafutumuka fye umuyayaya umuyayaya.”+

4 Kabili abakalamba 24+ ne fya mweo 4+ balifukeme no kupepa Lesa uwaikala pa cipuna ca Bufumu, abati: “Ameni! Lumbanyeni Jah!”*+

5 Kabili ishiwi lyafumine ku cipuna ca Bufumu aliti: “Lumbanyeni Lesa wesu, mwe basha bakwe bonse,+ mwe bamutiina, mwe bantu yaweyawe na mwe bashimucindikwa.”+

6 Kabili naumfwile amashiwi ayaleumfwika kwati mashiwi ye bumba ilikalamba kabili ayaleumfwika kwati kupooma kwa menshi ayengi kabili ngo kupanta kwa nkuba ukwa maka nga nshi. Balelanda abati: “Lumbanyeni Jah,*+ pantu Yehova* Lesa wesu, Uwa Maka Yonse,+ natendeka ukuteka!+ 7 Natusekelele no kwanga, kabili natumucindike, pantu yafika inshita ya bwinga bwa Mwana wa mpaanga, kabili umukashi wakwe naipekanya. 8 Cine cine bamupeele insalu ishabuuta tuutu, isha busaka, kabili ishisuma isha kuti afwale—pantu insalu ishisuma shimininako imilimo yalungama iya ba mushilo.”+

9 Kabili anjebele ati: “Lemba auti: Ba nsansa abaitwa ku mulaalilo wa bwinga bwa Mwana wa mpaanga.”+ Anjebele no kuti: “Aya e mashiwi ya cine aya kwa Lesa.” 10 Awe nafukeme pa makasa yakwe pa kuti imupepe. Lelo anjebele ati: “Awe! Wiesha ukucita ifyo!+ Na ine ndi musha fye nga iwe, kabili nga bamunonko abakwata umulimo wa kubila pali Yesu.+ Ulepepa Lesa!+ Pantu umulimo wa kubila pali Yesu ewalenga kube ukusesema.”+

11 Namwene umuulu waisuka, kabili moneni! kwali kabalwe uwabuuta.+ No wanininepo bamwita ati Uwa Cishinka+ kabili Uwa Cine,+ kabili mu bulungami+ e mo apingwila no kulwila. 12 Amenso yakwe yaba ngo lubingu lwa mulilo+ kabili pa mutwe wakwe paba ifilongwe* ifingi. Alikwata ishina ilyalembwa ilyo umuntu nangu umo ashaishiba kano fye umwine, 13 kabili afwala ica kufwala ca kunse icakantaikwako* umulopa, kabili ishina bamwita ni Cebo+ ca kwa Lesa. 14 Na kabili, abashilika ba ku muulu balemukonka ninshi nabanina pali bakabalwe ababuuta, kabili ninshi nabafwala insalu ishabuuta, isha busaka, kabili ishisuma. 15 Na mu kanwa kakwe mwalefuma ulupanga ulutali ulwatwa,+ pa kuti omineko inko, kabili akashicemena ku nkonto ya cela.+ Na kabili, anyantaula mu ca kukaminako imyangashi ica bukali bwa kwa Lesa Uwa Maka Yonse.+ 16 Na pa ca kufwala cakwe ica kunse, lwa pe tanta lyakwe, palilembwa ishina lya kuti, Imfumu ya shamfumu kabili Shikulu wa bashikulu.+

17 Namwene na malaika naiminina mu kasuba, kabili abilikishe mwi shiwi ilikalamba, no kweba ifyuni fyonse ifipupuka mu muulu,* ati: “Iseni kuno, longaneni ku mulaalilo uukalamba uwa kwa Lesa,+ 18 pa kuti mulye imibili ya mfumu, imibili ya bakalamba ba bashilika, imibili ya ba maka,+ imibili ya bakabalwe ne ya bale-endelapo,+ ne mibili ya bantu bonse, iya bantungwa pamo na basha, iya bantu yaweyawe ne ya bashimucindikwa.”

19 Kabili namwene iciswango ne mfumu sha pe sonde na bashilika bashiko nabalongana pa kuti balwe no waikala pali kabalwe na bashilika bakwe.+ 20 Kabili iciswango balicikete pamo na kasesema wa bufi+ uwacitile ifishibilo ninshi ne ciswango+ cilemonako, ifyo alufiishemo abapokelele icishibilo ca ciswango na bapepeleko icimpashanya ca ciko.+ Ilyo fyali ficili ifya mweo, fyonse fibili bafipoosele muli bemba wa mulilo umwaba amabwe ya mingu ayabilima umulilo.+ 21 Lelo abashala babepaile ku lupanga ulutali ulwafumine mu kanwa ka waikele pali kabalwe.+ Kabili ifyuni fyonse fyaikwite imibili yabo.+

20 Kabili namwene malaika aleika mu muulu ninshi ali na makii ya pa cilindi icabula impela+ na ceni iikalamba mu minwe yakwe. 2 Aikete icing’wena,+ icisoka ca pa kutendeka,+ e kutila Kaseebanya+ kabili Satana,+ no kucikaka pa myaka 1,000. 3 Kabili acipoosele mu cilindi icabula impela,+ aisalapo akomenena na pa muulu wa ciko, pa kuti citwalilila ukulufya inko mpaka imyaka 1,000 ikapwe. Pa numa ya ifi bakacikakula pa nshita iinono.+

4 Kabili namwene ifipuna fya bufumu, na baikelepo babapeele amaka ya kupingula. Nalimwene na bo baipeye pa mulandu wa kushimikila abantu pali Yesu na pa mulandu wa kulanda pali Lesa, na bo baipeye* pa mulandu wa kuti tabapepeleko iciswango nangu icimpashanya ca ciko, na bashapokelele icishibilo pa mpumi shabo na pa fisansa fyabo.+ Kabili baishileba aba mweo no kuteka pamo na Kristu+ pa myaka 1,000. 5 (Abashelepo pa bafwa+ tabaishileba no mweo mpaka imyaka 1,000 yapwa.) Uku e kubuushiwa kwa kubalilapo.+ 6 Wa nsansa kabili wa mushilo onse uukabuuka mu kubuushiwa kwa kubalilapo;+ pali aba imfwa ya cibili+ taikwetepo amaka,+ lelo bakaba bashimapepo+ ba kwa Lesa kabili aba kwa Kristu, kabili bakateka pamo na Kristu pa myaka 1,000.+

7 Nomba ilyo fye imyaka 1,000 ikapwa, Satana bakamufumya mu cifungo, 8 kabili akaya mu kulufya inko sha mu tupinda 4 utwe sonde, e kutila Goge na Magoge, pa kuti ashilonganike ku kulwa inkondo. Kabili bafula ngo mucanga wa pali bemba. 9 Basalanganine pano isonde ponse no kushinguluka inkambi ya ba mushilo kumo no musumba uwatemwikwa. Lelo umulilo wafumine ku muulu no kuboca ica kuti baloba no kuloba.+ 10 Kabili Satana Kaseebanya uwalebalufya bamupoosele muli bemba wa mulilo umwaba na mabwe ya mingu, umwali iciswango+ na kasesema wa bufi;+ kabili muli uyu mulilo e mo bakalacululuka* akasuba no bushiku umuyayaya umuyayaya.

11 Kabili namwene icipuna ca Bufumu icikalamba icabuuta e lyo no Waikelepo.+ Isonde no muulu fyalimufulumwike,+ kabili tafyakwete apa kuti fikale. 12 Lyena namwene abafwa, bashimucindikwa na bantu yaweyawe, nabeminina pa ntanshi ya cipuna ca Bufumu, ne fimfungwa fyalifungulwilwe. Lelo kwali icimfungwa na cimbi icafungulwilwe; icimfungwa ca mweo.+ Abafwa babapingwilile ku fyalembelwe muli ifi fimfungwa ukulingana ne fyo balecita.+ 13 Bemba alekele abafwa abalimo, ne mfwa yalekele abafwa abo yakwete, Inshiishi* nayo yalekele abafwa abalimo, kabili bonse babapingwile ukulingana ne fyo balecita.+ 14 Kabili imfwa ne Nshiishi* bafipoosele muli bemba wa mulilo.+ Uyu bemba wa mulilo,+ ni mfwa yalenga bubili.+ 15 Na kabili, bonse abashalembelwe mwi buuku lya mweo+ babapoosele muli bemba wa mulilo.+

21 Kabili namwene umuulu uupya ne sonde ilipya;+ pantu umuulu wa kubalilapo ne sonde lya kubalilapo ninshi nafipita,+ na bemba+ ninshi talipo. 2 Namwene no musumba wa mushilo, Yerusalemu Mupya, ninshi uleika mu muulu ukufuma kuli Lesa+ kabili ninshi nabaupekanya kwati ni nabwinga uo bayemfeshe pa kuti asengele umulume wakwe.+ 3 Lyena naumfwile ishiwi ilikalamba ukufuma ku cipuna ca Bufumu lileti: “Moneni! Itenti lya kwa Lesa lili pa bantunse, kabili akekala pamo nabo, nabo bakaba abantu bakwe. Na Lesa umwine akaba pamo nabo.+ 4 Kabili akakuumuna ifilamba fyonse ku menso yabo,+ ne mfwa tayakabeko na kabili,+ takwakabe no kuloosha nangu ukuteta nangu ukukalipwa na kabili.+ Ifya kale nafipita.”

5 Kabili Uwaikele pa cipuna ca Bufumu+ atile: “Mona! Ndelenga ifintu fyonse fibe ifipya.”+ Alandile no kuti: “Lemba, pantu aya mashiwi ya cishinka* kabili ya cine.” 6 Kabili anjebele ati: “Fyonse naficitika kale! Nine Alifa kabili Omega,* nine intendekelo kabili impela.+ Onse uuli ne cilaka nkamupeela amenshi ya bupe ukufuma mu kamfukumfuku ka menshi ya mweo.+ 7 Onse uwacimfya akapyana ifi fintu, kabili nkaba Lesa wakwe na o akaba umwana wandi. 8 Lelo bakuuwe, abashatetekela,+ abasali kabili abaselausha, abepaya abantu,+ aba bulalelale,*+ abapupa imipashi, abapepa utulubi, na ba bufi bonse,+ bakabapoosa muli bemba wa mulilo umwaba na mabwe ya mingu.+ Iyi ni mfwa yalenga bubili.”+

9 Umo pali ba malaika 7 abali ne mbale ishafonka 7 umwaiswile ifinkunka 7 ifya kulekelesha,+ aishile kuli ine e lyo anjeba ati: “Isa kuno nkulange nabwinga, umukashi wa Mwana wa mpaanga.”+ 10 E ico ansendeele mu mupashi antwala na ku lupili ulukalamba kabili ulutali, e lyo ananga umusumba wa mushilo Yerusalemu ninshi uleika mu muulu ukufuma kuli Lesa+ 11 kabili walebengeshima ku bukata bwa kwa Lesa.+ Ukubengeshima kwa uko kwali ngo kwa libwe ilya mutengo sana, nge libwe lya yaspi ilyabeeka kwati libwe lya krustali.+ 12 Wali ne linga ilikalamba kabili ilitali, kabili wali ne mpongolo 12, na pa mpongolo pali bamalaika 12. Pali ishi impongolo palembelwe amashina ya mikowa 12 iya bana ba kwa Israele. 13 Ku kabanga kwali impongolo shitatu, na ku kapinda ka ku kuso kwali impongolo shitatu, na ku kapinda ka ku kulyo kwali impongolo shitatu, na ku masamba nako kwali impongolo shitatu.+ 14 Ilinga lya musumba nalyo lyalikwete amabwe aya mufula ayali 12, kabili pali aya mabwe pali amashina 12 aya batumwa 12+ aba Mwana wa mpaanga.

15 Nomba uwalelanda na ine aikete itete lya golde ilya kupiminako, pa kuti apime umusumba, impongolo sha uko ne linga lya uko.+ 16 No musumba wakwete imbali 4 ishalingana, kabili mu butali na mu bwipi shalilingene. Apimine umusumba kwi tete, kabili wali nge fibansa 12,000;* mu butali na mu bwipi no kuya mu muulu fyalilingene. 17 Apimine ne linga lya uko, kabili lyali imikono 144,* ukulingana no kupima kwa bantunse, no kwa kwa malaika. 18 Nomba ilinga balikuulile na mabwe ya yaspi,+ e lyo umusumba wakuulilwe na golde iisuma sana iyalemoneka kwati li glasi ilyabeeka. 19 Imifula ye linga lya musumba yapangilwe na mabwe aya mutengo sana aya misango yonse: umufula wa kubalilapo wali wa yaspi, uwalenga bubili wali wa safiri, uwalenga butatu wali wa kalkedone, uwalenga 4 wali wa emarodi, 20 uwalenga 5 wali wa sardonukisi, uwalenga 6 wali wa sardi, uwalenga 7 wali wa krusoliti, uwalenga 8 wali wa beruli, uwalenga 9 wali wa topasi, uwalenga 10 wali wa krusoprashi, uwalenga 11 wali wa yakinti, no walenga 12 wali wa ametusti. 21 Kabili ifibi fya mpongolo 12 fyali ni margariti 12; iciibi ca pa mpongolo cimo na cimo capangilwe na margariti imo imo. No musebo uukalamba uwa musumba wali uwa golde iisuma sana, iyalemoneka kwati li glasi.

22 Nshamwenemo itempele, pantu Yehova* Lesa Uwa Maka Yonse+ e tempele lya uko, pamo no Mwana wa mpaanga. 23 Kabili umusumba taukabila ulubuuto lwa kasuba nangu ulwa mweshi, pantu ubukata bwa kwa Lesa bwaliubuutisha,+ ne nyali ya uko Mwana wa mpaanga.+ 24 No lubuuto lwa uko lukasanika mu nshila umukenda inko,+ kabili ishamfumu sha pe sonde shikaletamo ubukata bwa shiko. 25 Impongolo sha uko tabakatale abashisala akasuba, pantu tabwakulaila.+ 26 Kabili bakaletamo ubukata bwa nko no mucinshi wa nko.+ 27 Lelo icakowela conse tacakengile muli uyu musumba, no muntu onse uucita ifya bunani kabili uubepa ubufi takengilemo nakalya;+ kano fye abalembwa mu cimfungwa ca mweo ica Mwana wa mpaanga.+

22 Kabili anangile umumana wa menshi ya mweo,+ uwalengama kwati libwe lya krustali, kabili walefuma ku cipuna ca Bufumu ica kwa Lesa ne ca Mwana wa mpaanga,+ 2 ulepita pa kati ka musebo uukalamba uwa mu musumba. Kabili kuli cila bushilya bwa mumana kwali ifimuti fya mweo ifitwala ifisabo imiku 12, e kutila ifitwala ifisabo cila mweshi. Kabili amabuula ya ifi fimuti yali ya kundapilako inko.+

3 Kabili tamwakabe icitiipu nangu cimo. Lelo icipuna ca Bufumu ica kwa Lesa ne ca Mwana wa mpaanga+ fikaba mu musumba, na basha ba kwa Lesa bakalamubombela umulimo wa mushilo; 4 kabili bakamona icinso cakwe,+ ne shina lyakwe likaba pa mpumi shabo.+ 5 Na kabili, tabwakaleila nakalya,+ kabili tabakalekabila ulubuuto lwa nyali nelyo ulubuuto lwa kasuba, pantu Yehova* Lesa akalababalikila,+ kabili bakateka umuyayaya.+

6 Anjebele ati: “Aya amashiwi ya cishinka* kabili ya cine;+ cine cine Yehova* Lesa uwapeele bakasesema amashiwi ayo balandile,+ natuma malaika wakwe mu kulanga abasha bakwe ififwile ukucitika nomba line. 7 Mona! Ndeangufyanya ukwisa.+ Wa nsansa onse uukonka amashiwi ya busesemo ayaba muli cino icimfungwa.”+

8 Nomba ine ne Yohane, nine naleumfwa no kumona ifi fintu. Ilyo naumfwile no kumona ifi fintu, nafukeme pa makasa ya kwa malaika uwalenanga ifi fintu pa kuti imupepe. 9 Lelo anjebele ati: “Awe! Wiesha ukucita ifyo! Ine ndi musha fye nga iwe wine kabili nga bamunonko bakasesema na bakonka amashiwi yaba muli ici cimfungwa. Ulepepa Lesa.”+

10 Anjebele no kuti: “Wifisa amashiwi ya busesemo ayali muli ici cimfungwa, pantu inshita naipalama. 11 Leka uulecita ifishalungama atwalilile ukucita ifishalungama, no musali atwalilile ukuba umusali; lelo uwalungama atwalilile ukucita ifyalungama, no wa mushilo atwalilile ukuba uwa mushilo.

12 “‘Mona! Ndeangufyanya ukwisa, kabili ninkwata ne cilambu ico nkapeela, ica kupeela cila muntu ukulingana ne fyo acita.+ 13 Nine Alifa kabili Omega,*+ uwa kubalilapo kabili uwa kulekeleshako, nine intendekelo kabili impela. 14 Ba nsansa abawasha amalaya yabo,+ pa kuti bakwate insambu sha kuya ku fimuti fya mweo+ na pa kuti babasuminishe ukupita pa mpongolo ukwingila mu musumba.+ 15 Kunse kwaba imbwa,* abapupa imipashi, abacita ubulalelale,* abepaya abantu, abapepa utulubi, na bonse abatemwa ukubepa mu fyo balanda na mu fyo bacita.’+

16 “‘Ine ne Yesu, nalitumine malaika wandi pa kuti ese amusokolwele fyonse ifi, ifyo icilonganino cifwile ukwishiba. Ine ndi mushila, ndi mwana wa kwa Davidi,+ kabili ndi lutanda lwa lucelo+ ulubalika.’”

17 Kabili umupashi na nabwinga+ balelanda abati: “Iseni!” Na onse uuleumfwa, nalande ati: “Iseni!” Kabili onse uuli ne cilaka ese;+ onse uulefwaya ese anwepo amenshi ya mweo aya bupe fye.+

18 “Nde-eba umuntu onse uuleumfwa amashiwi ya busesemo ayali muli cino icimfungwa, ndeti: Nga ca kuti umuntu alundapo pali ifi,+ Lesa akamulundilapo ifinkunka ifyalembwa muli cino cimfungwa;+ 19 kabili nga ca kuti umuntu afumyapo amashiwi yamo aya busesemo ayali muli cino cimfungwa, Lesa takamusuminishe ukukwata fyonse ifyalembwa muli cino cimfungwa, e kutila takamuleke ukulyako ifisabo ku fimuti fya mweo+ kabili akamutamfya na mu musumba wa mushilo.+

20 “Uuleshimika ifi fintu atila, ‘Cine cine ndeangufyanya ukwisa.’”+

Ameni! Iseni mwe Shikulu Yesu.

21 Icikuuku icaibela ica kwa Shikulu Yesu cibe na ba mushilo.