Kalata Waibela ku Bafyashi Babo

Abakashana babili abapungwe abena Spain nomba line balembeele abafyashi kalata wa kubatasha. Umfweniko fimo fimo ifyalimo:

Ku bafyashi abatemwikwa, Batata baPepe na Bamayo baVicenta:

Mukwai na pa kutendekela kuti pabula. Fintu tulefwaya ukumweba fingi nga nshi kabili nacafya pa kufilemba fyonse mu kusupawila. Tulemutasha pa myaka 17 na 15 intu twaikala pano calo, mulatusakamana kabili mwalitutemwisha pa myaka yonse.

Lyonse tuleluka amatontonkanyo yenu na mafunde. Inshita shimo twalefilwa ukumfwikisha umo mwalelosha pa kutubikila inshita ya kubwela pa ng’anda, nomba ino nshita lintu tuleimwena fintu abaice abaleyendela bailetelela, e lintu tuleiluka fintu amafunde yenu yatucingilila.

Ica kumwenako cenu ica kusangwa lyonse ku kulongana kwa Bwina Kristu ku Ng’anda ya Bufumu, kano fye nga kwaima ifyakakala, calitwaafwa icine cine, ukubikapo na fintu tuya capamo mu kushimikila pa Mulungu. Cila lucelo pa Mulungu, tatutwishika nampo nga tuleya mu mulimo wa mwi bala nelyo iyo. Tuleshiba ukuti tuleya!

Mwalitufunda ne cileela pa kutukusha. Abengi balesa pa mwesu, kabili lyonse mubapa ifyawamisha. Twaliimwena icileela cenu mu bwaice bwesu kabili tulatasha pa kuba na bafyashi abaibela.

Tapaba pe sonde uwatwishiba bwino bwino ukumucila. Muli fibusa fyesu ifyatemwikwa ukucila abantu bonse, kabili twalimucetekela icine cine.

Pa kulekelesha tuletila twalimutemwa. Muli bafyashi besu, takwaba uo twingapyanikapo. Ino nshita nga kwingaba abengatweba ukuti tusale abo tulefwaya bakabe abafyashi besu, e lyo no kusala imikalile, ukwabula no kutwishika kuti twamusala, no kumweba ukuti na kabili mukatukushe ifi fiine mwatukusha.

Twamucelela no kumufyompa mu citemwishi, ni fwe bakashana benu,

ESMERALDA NA YOLANDA