IFYO BAIBOLO ISAMBILISHA

Paradaise

Bushe Paradaise Cinshi?

IFYO ABANTU BALANDA Bamo batila Paradaise tayaliko, lushimi fye. Bambi nabo batila paradaise libala ilyakwelenganya fye umo abantu abasuma bekala umuyayaya no kubomba imilimo iibaletala insansa.

IFYO BAIBOLO ILANDA Mu Baibolo, ishiwi lya kuti “paradaise” lilabomfiwa nga balelanda pa cifulo abantunse ba kubalilapo babalilepo ukwikala icaleitwa Edeni. (Ukutendeka 2:7-15) Baibolo itila, cilya cifulo eko cali, kabili e mwaleikala abantunse ba kubalilapo abashalelwala kabili tabalefwa. (Ukutendeka 1:27, 28) Lelo pa mulandu wa kuti balibembwike, balibatamfishe mu paradaise. Nalyo line, mu Baibolo mwaliba amasesemo ayengi ayalanda pa fyo abantu bakaipakisha ubumi mu Paradaise na kabili.

MULANDU NSHI CACINDAMINA UKWISHIBA PA LWA PARADAISE? Nga ca kuti Lesa alitutemwa, ninshi kuti twaenekela ukuti akalenga ababomfi bakwe bonse aba cishinka ukuba no bumi ubusuma mu Paradaise. E lyo na kabili afwile aleba abantu ifyo bafwile ukucita pa kuti akabapaale. Baibolo itila Lesa kuti amupaala nga ca kuti mwamwishiba e lyo no kukonka amfunde yakwe.—Yohane 17:3; 1 Yohane 5:3.

“Yehova Lesa alimine ibala mu Edeni, . . . abikilemo no muntu uo abumbile.”—Ukutendeka 2:8.

Bushe Paradaise yaba kwi?

IFYO ABANTU BALANDA Bamo basumina ukuti Paradaise yaba ku muulu, e lyo bambi nabo batila ikaba pano pene pa calo.

IFYO BAIBOLO ILANDA Paradaise ya kubalilapo, yali pano calo. Lesa apangile icalo ukuti e mo abantunse baleikala lyonse. Baibolo itila, Lesa apangile icalo ukuti cikekale umuyayaya. (Amalumbo 104:5) Kabili itila: “Imyulu yena, myulu ya kwa Yehova, Lelo icalo apeela ku bana ba bantu.”—Amalumbo 115:16.

Kanshi te kuti tupape ifyo Baibolo yalaya ukuti Paradaise ikaba pa calo. Mu Paradaise, Lesa akapeela abantu umweo wa muyayaya. Abantu bakalaumfwana kabili kukaba umutende. Takwakabe ukukalipwa no kucula. Kabili abantu bakaipakisha ifintu ifingi pa calo.—Esaya 65:21-23.

“Itenti lya kwa Lesa lili pamo na bantunse, . . . ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:3, 4.

Ni bani abakaba mu Paradaise?

IFYO ABANTU BALANDA Ifilonganino fya mapepo ifingi fisambilisha ukuti abantu abasuma fye e bakaba mu Paradaise. Lelo abengi tabaishiba ifyo umuntu afwile ukucita pa kuti batile muntu ‘umusuma.’ Bamo batontonkanya ukuti, kuti baba abantu abasuma cikulu fye balesefyako ifya mapepo e lyo no kupepa amapepo ya kusungila ku mutwe.

IFYO BAIBOLO ILANDA Baibolo isambilisha ukuti “abalungama” e bakekala mu Paradaise. Lelo bushe uwalungama kuli Lesa, muntu wa musango nshi? Te muntu uucita fye ifya mapepo e lyo akaana ukubika amano ku fyo Lesa afwaya. Baibolo itila: “Bushe Yehova alitemwa imituulo ya koca na malambo ukucila ukunakila ishiwi lya kwa Yehova? Mona! Ukunakila kwawama ukucila ilambo.” (1 Samwele 15:22) Kanshi kuti twatila, ‘abalungami’ abakekala umuyayaya mu Paradaise, bantu abakonka amafunde ya kwa Lesa ayaba mu Baibolo.

IFYO MWINGACITA Ukumfwila amafunde ya kwa Lesa takupilibula fye ukucitako ifya mapepo. Ifyo mucita cila bushiku e fingasekesha Lesa nelyo ukumufulwisha. Pa kuti mwishibe ifyo Lesa afwaya, mufwile ukulabelenga Baibolo lyonse. Tacayafya ukusekesha Lesa. Baibolo itila “amafunde yakwe taya-afya.” (1 Yohane 5:3) Nga muleumfwila Lesa, akamupeela ishuko lya kuba mu Paradaise.

“Abalungama e bakekala mu calo, kabili bakekalamo umuyayaya.”—Amalumbo 37:29.