Icikapwisha Akapaatulula Umuyayaya

Ifyo tulandilepo mu fipande fifumineko fyalyafwa abantu abengi icine cine ukuleka ukuba na kapaatulula. Nomba icishinka ca kuti fwe bantu te kuti tupwishe akapaatulula umupwilapo. Nomba bushe ici calola mu kuti akapaatulula takakatale akapwa?

Ubuteko Ubukapwisha Akapaatulula

Amabuteko ya bantunse yalifilwa ukupwisha akapaatulula. Bushe ici cilepilibula ukuti takwaba ubuteko ubwingapwisha akapaatulula?

Ubuteko ubwingapwisha akapaatulula bulingile ukucita ifi

1. 1. Ukwafwa abantu ukwalula ifyo bamona abanabo.

2. 2. Ukwafwa abantu ukulaba ku fyo balecula pa mulandu na kapaatulula, pantu ilingi line abantu abo bacushapo balapata abalebacusha.

3. 3. Ukukwata abatungulula abashaba na kapaatulula.

4. 4. Ukwafwa abantu mwi sonde lyonse ukuba abaikatana.

Baibolo ilanda kuti Lesa alipanga ubuteko ubukacita fyonse ifi. Ubu ubuteko “bufumu bwa kwa Lesa.”—Luka 4:43.

Ifi e fimo ifyo ubu ubuteko bukacita.

1. Bukasambilisha Abantu Imibele Iisuma

“Abekashi ba pa calo bakasambilila ubulungami.”—ESAYA 26:9.

“Umulimo wa bulungami bwa cine ukaba umutende; no mulimo wa bulungami bwa cine ukaba tondolo no mutelelwe umuyayaya.”—ESAYA 32:17

Bushe aya amalembo yalola mwi? Ubufumu bwa kwa Lesa bukasambilisha abantu ukucita ifyalungama. Nga ca kuti abantu basambilila ukulekanya icalungama ku calubana, no kulekanya ulufyengo ku mulinganya, balaaluka mu fyo bamona abanabo. Baleshiba kuti balingile ukutemwa abantu fye bonse.

2. Bukapwisha Ulufyengo

“Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—UKUSOKOLOLA 21:4.

Bushe ili ilembo lyalola mwi? Ubufumu bwa kwa Lesa bukalenga abantu ukulaba ku fyo balebafyenga. Ici cikalenga bakaleke ukupata abantu abalebafyenga.

3. Bukakwata uwa Kutungulula Umusuma

“Takapingule ukulingana ne fyo amona fye, nangu ukukalipila ukulingana ne fyo aumfwa fye. Lelo akapingula abalanda mu bulungami, no kufunda abafuuka ba pe sonde mu bololoke.”—ESAYA 11:3, 4.

Bushe ili ilembo lyalola mwi? Yesu Kristu, Imfumu ya Bufumu bwa kwa Lesa ubwa ku muulu, akaba no mulinganya ilyo akalateka isonde. Yesu tamona abantu bamo ukuti balicindama ukucila bambi. E ico ilyo akalateka abantu mwi sonde lyonse, bonse bakalakonka amafunde ayalungama ayo akabikako.

4. Bukalenga Abantu Ukwikatana

Ubufumu bwa kwa Lesa bukalenga abantu ukuba “na mano yamo yene no kutemwa kumo kwine, umutima umo wine, ukutontonkanya kumo kwine.”—ABENA FILIPI 2:2.

Bushe ili ilembo lyalola mwi? Mu Bufumu bwa kwa Lesa abantu bakekatana ukufuma pa nshi ya mutima. Icikalenga ni co bakatemwana sana.