Ifibanda Filabepa Ukuti Abafwa Balatwalilila Ukuba aba Mweo

Baibolo itila Satana ‘alalufya aba pano isonde bonse.’ (Ukusokolola 12:9) Satana ne fibanda fyakwe tabafwaya twasumina ifyo Icebo ca kwa Lesa Baibolo cilanda. Balalenga abantu basumina ukuti abafwa balatwalilila ukuba aba mweo ku cifulo ca mipashi. Natulande pa fyo bacita.

Imipepele ya Bufi

Aba mu filonganino fya mapepo ifingi basambilisha ukuti umuntu onse nga afwa, umubili fye e ufwa, lelo umweo wakwe ulaya ku cifulo ca mipashi. Basambilisha ukuti umweo te kuti ufwe.

Nomba ifi te fyo Icebo ca kwa Lesa cisambilisha. Baibolo ilanda ukuti umweo e muntu wine, te cintu icaba mu muntu. Ku ca kumwenako, ilyo Baibolo ilanda pa fyo Adamu abumbilwe, itila: “Yehova Lesa abumbile umuntu ku lukungu lwa mu mushili kabili apuutile mu myona yakwe umupu wa bumi, no yo muntu aishileba uwa mweo.” (Ukutendeka 2:7) Kanshi Adamu tabamupeele umweo, lelo aali mweo.

Inama nasho balashita ukuti imyeo.—Ukutendeka 1:20, 21, 24, 30.

Apo ishiwi ilyo bapilibula mu Baibolo ukuti “umweo” lilosha ku muntu umwine, tatufwile ukupapa nga twamona yalanda ukuti imyeo ilafwa. Baibolo itila:

• “Umweo uwabifya e ukafwa”—Esekiel 18:4. Diocese of Mbala

Amalembo yambi nayo yalanga ukuti umweo kuti waonaulwa (Ukutendeka 17:14), kuti wafwa ku lupanga (Yoshua 10:37), kuti wapwilila (Yobo 7:15), kabili kuti wanwena (Yona 2:5). Kanshi umweo ulafwa.

Nga mwabelenga Baibolo yonse, tamwakasangemo amashiwi ya kuti “umweo taufwa.” Umweo wa muntu te mupashi. Baibolo taisambilisha ukuti umweo taufwa. Satana ne fibanda fyakwe e basambilisha ukuti umweo taufwa. Yehova alipata ifisambilisho fya bufi fyonse ifyo aba mu filonganino fya mapepo basambilisha.—Amapinda 6:16-19; 1 Timote 4:1, 2.

Abalanda Ukuti Balalanshanya na Abafwa

Inshila na imbi iyo Satana alufishamo abantu, kubomfya abantu abalanda ukuti balalanshanya na bafwa. Abantu abengi, ukubikako fye na balanda ukuti balalanshanya na bafwa, balanda ukuti amashiwi bomfwa yafuma ku mipashi ya bafwa. Lelo Baibolo ilanda ukuti, takuli umuntu uwingalanshanya na abafwa.—Lukala Milandu 9:5, 6, 10.

Nomba bushe aya amashiwi yafuma kwisa? Yafuma ku fibanda! Ifibanda filamona ifyo umuntu aali ilyo ashilafwa, e ico fileshiba ifyo alelanda, ifyo alemoneka, ifyo alecita, ne fyo aishibe. Kanshi te kuti cafye ifibanda ukupashanya abafwa.—1 Samwele 28:3-19.

Amalyashi ya Bufi

Satana alabomfya na malyashi ya bufi pa bafwa pa kuti abantu balemona ukuti abafwa balatwalilila ukuba aba mweo. Aya amalyashi yalalenga abantu balamona kwati ifyo Baibolo ilanda fya bufi.—2 Timote 4:4.

Mu Africa mwaliba amalyashi ya bufi ayengi ayo balanda pa bantu abo bamwene kwati batuntulu pa numa ya mfwa yabo. Ilingi line, aba bantu bamonekela ukutali na uko baleikala ilyo bashilafwa. Nomba yipusheni amuti: ‘Bushe umuntu nga alikwete amaka ya kubuuka ku bafwa, kuti ayabuukila ukutali no kwaba balupwa lwakwe ne fibusa?’

Nalimo uyo muntu bamwene apalene fye no muntu uwafwa. Ku ca kumwenako, ilyo Abena Kristu babili balebila imbila nsuma mu mushi umo, balimwene shikulubantu alebakonka pa maawala ayengi. Ilyo bamwipwishe ico alebakonkela, basangile ukutila alemona kwati umo pali bena aali ni ndume nankwe uwafwile kale. Kwena ifyo uyu shikulubantu aletontonkanya fyali fya bufi, lelo tasumiine ukuti uo amwene te ndume nankwe. Nomba tontonkanyeni pa lyashi aileshimikila ifibusa na bena mupalamano bakwe.

Ifimonwa, Ifilooto na Mashiwi

Tatuletwishika ukuti mwalyumfwapo fimo ifyo abantu bamona, ukumfwa nelyo ukuloota ifilenga balamona kwati imipashi ya bafwa e ko yaba. Ifintu fya musango uyu filatiinya abantu abo ficitikila. Ba Marein abaleikala ku West Africa, baleumfwa ishiwi lya banakulu lilebeta ubushiku. Ba Marein baletiina ica kuti balepunda no kubuusha abantu bonse mu ng’anda. Mu kuya kwa nshita, balipenene.

Nomba nga ca kuti abafwa balatwalilila ukuba aba mweo, bushe kuti balatiinya abantu abo batemwa? Awe. Ifibanda e filenga ifya musango uyu filecitika.

Inga ifyebo ifyo batila fifuma ku bafwa lelo ifyafwa no kusansamusha aba mweo, bushe na fyo fyalibipa? Ku ca kumwenako, ilyo ba Gbassay abekala ku Sierra Leone balwele, balilootele icilooto umo bamwene bawishi abafwa. Babebele ukuya ku muti umo, ukusabako ibula, no kulyabikila mu menshi e lyo balenwa yalya menshi. Babebele ukuti tabalingile ukulanda no uuli onse ilyo bashilacita ifi. Balicitile ifyo babebele kabili balipolele.

Abanakashi na bambi batile, abena mwabo balimonekeele kuli bena ubushiku pa numa ya kufwa. Batile balimoneke bwino kabili balifwele ifya kufwala ifisuma.

Amashiwi ya musango uyu ne fimonwa fimoneka kwati fyaliba fye bwino kabili filaafwa abantu, nomba bushe fifuma kuli Lesa? Awe, te ko fifuma. Yehova ni “Lesa wa cishinka.” (Amalumbo 31:5) Te kuti atubeleleke nelyo ukutubepa. Ifibanda e fingacita fye ifi.

Nomba bushe kwaliba ifibanda ifisuma? Takwaba. Nangu ca kuti ifibanda limo ficita kwati fileyafwa abantu, ifibanda fye fyonse fyalibipa. Ilyo Satana Kaseebanya alandile na Efa, alecita kwati alefwaya ukumwafwa. (Ukutendeka 3:1) Nomba finshi fyacitike ilyo Efa aumfwilile no kucita ifyo Satana amwebele? Alifwile.

Abantu ababipa balitemwa sana ukucita kwati balefwaya ukwafwa umuntu pa kuti bamubepe nelyo ukumwibila. Ipinda limo litila: “Ameno mafupa.” E lyo Icebo ca kwa Lesa na co citila: “Satana umwine alaifungushanya kwati ni malaika wa lubuuto.”—2 Abena Korinti 11:14.

Pali ino nshita, Lesa talanda na bantu pano calo ukubomfya ifilooto, ifimonwa, nelyo amashiwi ayafuma ku cifulo ca mipashi. Alanda na bantu ukubomfya Baibolo iilenga umuntu ukuba “uwaipangasha icine cine ukubomba umulimo onse uusuma.”—2 Timote 3:17.

Apo Yehova alitutemwa, alatusoka ku micenjelo ya kwa Satana Kaseebanya. Alishiba ukuti ifibanda balwani ababipa icine cine.