Ukwishiba Icine pa lwa Mweo Kwalicindama
“Mukeshibe cine, ne cine cikamulenga abantungwa.”—YOHANE 8:32.
1. Mulandu nshi cacindamina ukubebeta ifyo twasuminamo pa lwa mweo ne mfwa?
IFISUMINO pa lwa bafwa no bumi bwa mu Calo ca bafwa fishintilila maka maka pa mipepele no lutambi fintu umuntu akulilamo. Nga fintu tumwene, fisanshamo ukushininwa kwa kuti pa kuti fye umweo uye ufike ku buyo bwa uko ubwa kupelako ninshi naufyalwa cipya cipya imiku iingi e lyo bambi batila inshila waikalilamo ubumi fye bumo e ipima icikacitika mu kupelako. Mu kukonkapo, umo kuti pambi acetekele fyo nga afwa akayakumbinkana no wapulamo, umbi na o kuti pambi acetekelo kuyafika kuli Nirvana, e lyo umbi na o kuti acetekele fyo akapoke cilambu ca ku muulu. Cinshi kanshi caba e cine? Apantu ifyo twasuminamo filambukila imibele yesu iya mutima, incitilo shesu, ne fyo tupingula pa fintu, bushe tatulingile ukuyumfwa abayangwako pa lwa kusanga ubwasuko kuli ubo bwipusho?
2, 3. (a) Mulandu nshi twingacetekelela cintu Baibolo isosa pa lwa mweo? (b) Nga fintu calondololwa muli Baibolo, cinshi caba e cine pa lwa mweo?
2 Ibuuku lyakokwesha mu calo, Baibolo, lilalanda ifyacitikila umuntu ukuyafika fye na ku kubumbwa kwa mweo wa buntunse uwa ntanshi. Ifisambilisho fya iko tafyabamo amano ya buntunse ne fishilano fya bantu. Baibolo mu kulengama ilalande cine pa lwa mweo ukuti: Umweo obe ni we wine, abafwa balaleko kubako umupwilapo, kabili abo baba mu cibukisho ca kwa Lesa bakabuushiwa pa nshita yakwe iyalingwa. Cinshi cintu ukwishibe ci cishinka kwingamucitila?
3 Yesu aebele abakonshi bakwe ati: “Mukeshibe cine, ne cine cikamulenga abantungwa.” (Yohane 8:32) Ee, icine cilalubula. Lelo bushe icine pa lwa mweo cikatulubula kuli cinshi?
Ukulubuka ku Mwenso no Kupelelwa
4, 5. (a) Ukwishibe cine pa lwa mweo kufumyapo umwenso wa cinshi? (b) Ni shani fintu isubilo lya kubuuka lyakoseshe umupungwe umo uwalwele ubwa kufwa?
4 Icitabo ca The World Book Encyclopedia citila: “Abantu abengi balatiine mfwa kabili tabafwaya kulandapo.” Kalemba umo uwa lyashi lya kale atila: “Ishiwi fye lya kuti ‘imfwa’ mu fyalo fya ku Masamba lilesungamina ku kuba ilishilumbulwa.” Kabili mu ntambi shimo shimo amashiwi ya manshoko yamo pamo nga “nabatangilako” e lyo kuti “nabatusha” e yabomfiwa ilingi ukulangililo kuti umuntu nafwa. Uyu mwenso wa kutiine mfwa waba fye mwenso wa cintu icishaishibikwa, apantu ku bengi imfwa yaba ni nkaama. Ukwishibe cine pa lwa cicitika nga twafwa kukacefyako uyu mwenso.
5 Ku ca kumwenako, langulukeni ukutontonkanya kwa kwa Michaelyn uwa myaka 15. Alilwele kansa wa mu mulopa kabili ali apepi no kufwa imfwa yabipisha. Banyina baPaula, bebukisho kuti: “Michaelyn taasakamikwe pa lwa kufwa pantu alishibe ukuti imfwa yali ya pa nshita inono. Twalelanda sana pa calo cipya ica kwa Lesa na pali bonse abakabuukila muli cene. Michaelyn alikwete icitetekelo icikalamba nga nshi muli Yehova Lesa na mu kubuuka—takwali kutwishika nangu fye panono.” Isubilo lya kubuuka lyakakwile uyu mukashana ku mwenso ukalamba uwa kutiine mfwa.
6, 7. Icine pa lwa mweo citulubula ku kupelelwa kwa musango nshi? Langilileni.
6 Ni shani fintu icine cayambukile abafyashi ba kwa Michaelyn? Bawishi baJeff batile: “Imfwa ya kakashana kesu e cakalipishapo pali fyonse ifyatucitikila. Lelo twalicetekela umupwilapo mu bulayo Yehova alaya ubwa kubuuka, kabili tuleenekela ukwisakumbatila Michaelyn wesu watemwikwa na kabili. Fintu cikawama ukulundana cipya cipya!”
7 Ee, icine pa lwa mweo kuti calubula umuntu ku kupelelwa kwabipisha uko imfwa ya mutemwikwa iletako. Kwena, takuli icingafumyapo ukukalipwa konse fye no bulanda ifiisako lintu umutemwikwa afwa. Nangu cibe fyo, isubilo lya kubuuka lilalenga ubulanda ukunakako e lyo no kukalipwa ukubako eyefilya.
8, 9. Ukwishibe cine pa fyo abafwa baba kutulubula ku mwenso nshi?
8 Icine ca mu Malembo pa lwa fintu abafwa baba cilatulubula na ku kutiina abafwa. Pa numa ya kusambilila ici cine, abengi abo kale bafyantikwe mu kusefya kwa ntambi ukwa kutiine mipashi ya bafwa nomba tabasakamikwa na kabili pa lwa fisomo, imiiko, ifipuuta, ne mikana, kabili tabapeela amalambo yakoso mutengo ku kutalalika ifikolwe fyabo ukuti filabwela ku kuloloosha aba mweo. Cine cine apo abafwa “bantu abashaishiba kantu nangu kamo,” ifibelesho fya musango yo kanshi tafingabomba.—Lukala Milandu 9:5.
9 Icine pa lwa mweo, icisangwa muli Baibolo cine cine cilalubula kabili calicetekelwa. Lelo na kabili langulukeni icilolelo caibela cintu Baibolo yatambika kuli imwe.
[Amashiwi pe bula 29]
Ukwishibe cine pa lwa mweo kulamulubula ku kutiine mfwa, ukutiina abafwa, no kupelelwa pa mfwa ya untu twatemwa