Ubusuma bwa Mbila Nsuma mu Ncende Mwikala

MU CALO ilelo tulomfwa uko abantu ilingi balanda ukuti: “Amafunde ya Bwina Kristu tayabomba. Tayakatale ayabomba muli buno bwikashi bwayafya.” Lelo, mu kulanshanya ukwashimikwa ukwali pa kati ka kwa Mohandas K. Gandhi intungulushi ya baHindu na Lord Irwin uwali umwiminishi wa calo ca Britain ku calo ca India kwalangilile icapusanako. Casoswa ukuti Lord Irwin aipwishe Gandhi ico aletontonkanya ukuti e cingapikulula amafya ya calo ca Great Britain ne calo ca India. Gandhi abulile Baibolo no kukupukula pa cipandwa 5 ica kwa Mateo no kusosa ukuti: “Lintu icalo cobe ne candi fikekatanishiwa capamo ku fisambilisho fyaimikwe na Kristu muli ili Lyashi lya pa Lupili, tukaba natupikulula amafya te ya fyalo fyesu fye lelo na ya calo conse.”

Lilya ilyashi lilanda pa lwa kufwaya bumupashi no kuba abafuuka, aba mutende, aba luse, abatemwa ubulungami. Talisosa fye ati ubukomi bubi, lelo litila no kupata bambi kubi. Litila ubucende bwalilubana kumo fye na matontonkanyo ya lunkumbwa. Litila no kulekana kwa pa milandu ya cabe cabe fye ukonaula indupwa no kulenga abana ukuculilamo, kubi. Litweba ukuti: ‘Temweni na bamupata, peeleniko ababulwa, mwilapingula bambi ukwabula uluse, citileni bambi ifyo mwingatemwa na imwe bamucitile.’ Nga ca kuti ukupanda amano konse ku kwalikonkelwe, ifintu kuti fyawama nga nshi. Nga ca kuti abengi balecita fi uko mwikala, no kwikala kuti muleikala bwino sana!

Ificita Inte sha kwa Yehova muli fi fintu filakuma na bambi. Baibolo ibasambilisha ukucindika icupo. Abana babo balasambilishiwa amafunde yasuma. Ubucindami bwa lupwa bulakomailwapo. Indupwa shaikatana nga shali mu ncende mwikala, ne calo cenu cine, kuti cawama. Mu fyalecitika kale mwaba ifya kumwenako ifingi pa lwa kuwa kwa fyalo fyakwatisha amaka pa mulandu wa kukanaikatana kwa ndupwa no kufula kwa bucilalelale. Nga ca kuti ku ncende mwikala umuntu umo umo ne ndupwa abo Inte sha kwa Yehova basambilisha baleikala umwabela ifishinte fya Bwina Kristu, ubuulungani kuti bwacepa, bucilalelale kuti bwacepa, ukusanshako fye na bumpulamafunde.

Ubwafya bumo pa mafya yakalamba abantu baleshingwana na yo abekala mu ncende shapusanapusana, bwa mpatila ya mushobo. Lelo, umutumwa Petro asosele ukuti: “Ninkutuluka ukuti Lesa taba na kapaatuluIa ka bantu, lelo uwa mu luko lonse uwamutiina no kubombo kulungama asekelelwa kuli wene.” Paulo na o alembele ukuti: “Tamuli muYuda nangu mwina Hela, tamuli musha nangu muntungwa, tamuli mwaume nangu mwanakashi; pantu imwe bonse muli bamo muli Kristu Yesu.” (Imilimo 10:34, 35; Abena Galatia 3:28) E fyo Inte sha kwa Yehova basumina. Imishobo yonse na bantu bapusana inkanda bonse babombela capamo pa maofeshi yabo ayakalamba aya Watch Tower, na pa maofeshi yanono, na mu filonganino fyabo mwine.

Mu Afrika imikowa imo taingekala pamo ukwabula ukukangana. Lelo, lintu Inte sha kwa Yehova bakwata ukulongana kukalamba, abantu ba mikowa yalekanalekana baliila capamo, tabaipatulula ukuti abankanda imo balale kumbi e lyo abankanda imbi nabo kumbi, kabili bapepela capamo mu kumfwana no kubishanya kusuma. Abalashi ba buteko cilabapapusha lintu bamona ica musango yu. Ica kumwenako ca fyo Ubwina Kristu bwa cine bwikatanya calilandilwepo mu nyunshipepala ya ku New York iya Amsterdam News iya pa August 2, 1958. Icalengele uku kulandapo cintu camwenwe pe bungano lya pa kati ka nko ililandilwepo kale ukwasangilwe Inte ukucila pali 250,000 abalongene ku New York City.

“Konse konse Abafiita, ababuuta na bena Asia, na bonse fye abasumbuka na babusu , babishenye capamo mu nsansa ukwabula ukuisoobolola. . . . Inte ukufuma mu fyalo 120 baikele no kupepela pamo mu mutende, ukulangilila abena Amerika ifyo cayanguka ukubombela pamo. . . . Ibungano lili ca kumwenako cisuma ica fyo abantu bengabombela pamo no kwikala pamo.”

Abengi kuti batila amafunde ya Bwina Kristu tayabomba pali ndakai. Lelo, mafunde nshi yambi ayabomba nelyo ayakabomba? Amafunde ya Bwina Kristu kuti yamwafwa nga nshi nga ca kuti yalekonkwa lelo line uko kwine mwikala, kabili e yakalenga ‘inko, imikowa, na bantu bonse’ ukwikatana ilyo Ubufumu bwa kwa Lesa bukateka isonde lyonse.—Ukusokolola 7:9, 10.

[Amashiwi pe bula 23]

Imishobo yonse na bantu bapusana inkanda babombela capamo

[Amashiwi pe bula 24]

Ifisambilisha ubuKristu filabomba. Fisambilisho nshi fimbi ifyabomba?