Icalo Cipya Umwabela Ubulayo Bwa Kwa Lesa

BAIBOLO, Icebo ca kwa Lesa icalembwa, itupeela isubilo ilyo itila: “Lelo kuli imyulu ipya ne sonde lipya ifyo tulelolela umwabela ubulayo bwakwe, na muli fyene e mukekala ubulungami.”—2 Petro 3:13.

Bushe “imyulu ipya” e cinshi? Baibolo yampanya umuulu no kuteeka. (Imilimo 7:49) “Imyulu ipya” buteeko bupya ubuli no kuteke sonde. Ipya pantu ikapyana pa mitekele ya ndakai; na kabili cintu cipya mu kufishapo ubufwayo bwa kwa Lesa. E Bufumu ubo Yesu atusambilishe ukupepela. (Mateo 6:10) Apo Intulo ya buko ni Lesa uwikala mu muulu, bwitwa “ubufumu bwa mu muulu.”—Mateo 7:21.

Bushe “isonde lipya” e cinshi? Te Sonde limbi ilipya, pantu Baibolo ilondolola bwino bwino ukuti lino isonde likekalwapo umuyayaya. “Isonde lipya” bwikashi bupya ubwa bantu. Bukaba bupya pantu ababifi bakaba nabalofiwa. (Amapinda 2:21, 22) Bonse abakabako iyo nshita bakacindika no kulaumfwila Kabumba kabili bakekala ukulingana ne fyo afwaya. (Amalumbo 22:27) Abantu ba mu nko shonse baleitwa ukuti basambilile ifyo Lesa afwaya no kwalula imikalile yabo ukuti ilingane ne fyo fintu nomba. Bushe mulecite fyo?

Mu calo cipya ica kwa Lesa, onse akacindika ukuteeka Kwakwe. Bushe ukutemwa mwatemwa Lesa kumulenga mulemunakila? (1 Yohane 5:3) Bushe ico cilamoneka ilyo muli pa ng’anda? ku ncito nelyo ku sukulu? mu fyo mucita mu bumi bwenu?

Muli co calo cipya, abantunse bakekatana mu kupepa Lesa wa cine. Bushe mulapepa Kabumba wa muulu ne sonde? Bushe imipepele yenu ilamwikatanya na bakapepa banenu aba mu nko shonse, imikowa, ne ndimi?—Amalumbo 86:9, 10; Esaya 2:2-4; Sefania 3:9.

[Akabokoshi pe bula 17]

Lesa Uwalaya Ifi Fintu

E Kabumba wa muulu ne sonde tumona. E ulya Yesu Kristu aishibishe ati ‘Lesa wa cine eka.’—Yohane 17:3.

Abantunse abengi bacindika balesa baipangila abene. Imintapendwa bapepa ifilubi fishaba na mweo. Bambi bapeela ubukata utubungwe twa bantu, amano ya ku calo, nelyo fye ifya lunkumbwa fyabo. Nangu fye ni balya baitunga ukubomfya Baibolo, te bonse bacindika ishina lya untu ishibisha ati “e Lesa.”—Amalango 4:35.

Kabumba alandile ulwa mwine ati: “Ine ndi Yehova, e shina lyandi.” (Esaya 42:5, 8) Ili shina limoneka mupepi na 7,000 muli Baibolo mu ndimi yalembelwemo pa kubala. Yesu Kristu asambilishe abakonshi bakwe ukupepa ati: “Shifwe wa mu muulu, ishina lyenu lishishiwe.”—Mateo 6:9.

Bushe Lesa wa cine akwata imibele nshi? Ailondolola ati “wa nkumbu kabili uusenamina, uukokolo kukalipa, kabili uwafulisho luse ne cishinka” no kuti talekapo fye lelo alakanda abatoba amafunde yakwe ku mumbo. (Ukufuma 34:6, 7) Imibombele yakwe ku bantunse ku kale ilanga ukuti ubo bulondoloshi bwa cine.

Ili shina lilingile ukushishiwa kumo no mwine we shina, e kuti ukumonwa ifya mushilo. Apo e Kabumba kabili Mulopwe wa Bubumbo bonse, wena eka fye e walinga ukumfwila no kupepa. Bushe pa lwenu mulamumfwila no kumupepa?

[Akabokoshi ne Cikope pe bula 18]

Kwaluka Nshi “Imyulu Ipya ne Sonde Lipya” Fikaleta?

Isonde likasangulwa Paradaise Luka 23:43

Umulimo wa kwikusha, ifya kulya ifingi Esaya 25:6; 65:17, 21-23

[Akabokoshi ne Fikope pe bula 19]

Bushe Mukanonkelamo?

Lesa te kuti abepe!—Tito 1:2.

Yehova abilisha ati: “Icebo candi . . . tacakabwelele ibusha kuli ine, kano cacite co natemwa, no kushuka muli ico nacitumina.”—Esaya 55:11.

Kale kale Yehova alelenga “imyulu ipya ne sonde lipya.” Ubuteeko bwalyamba kale ukuteeka. Icitendekelo ce “sonde lipya” na co kale kale e po caba.

Pa numa ya kulanda pa fintu fimo ifyawamisha ifyo “imyulu ipya ne sonde lipya” fikaletela abantunse, mwi buuku lya Ukusokolola mwa-ambulwa ifyasosa Lesa umwine, Mulopwe wa Bubumbo bonse, ati: “Moneni! Ndelenga ifintu fyonse fibe ifipya.” Kabili, atila: “Lemba, pantu ifi fyebo fya cishinka kabili fya cine.”—Ukusokolola 21:1, 5.

Ilipusho lyakakala lya kuti, Bushe ifwe umo umo tulealula imicitile yesu pa kuti tukamonwe abalinga ukuba mwi “sonde lipya” ilikalatekwa ne “myulu ipya”?