Amashiwi ya Kubalilapo

Kuli Bonse Abatemwa Yehova:

Yesu atile: “Mukeshiba icine, ne cine cikamulenga ukuba abantungwa.” (Yohane 8:32) Ala aya mashiwi ya kukoselesha nga nshi! Ca cine, umuntu kuti aishiba icine, nangu fye ni muli shino shine “inshita ishayafya” ilyo ukubepa kufulile nga nshi. (2 Timote 3:1) Bushe mulebukisha ifyo mwaumfwile umuku wa kubalilapo ilyo mwaishibe ukuti ici e cine nge fyo Icebo ca kwa Lesa calondolola? Mufwile mwalitemenwe nga nshi!

Lelo, nangu ca kutila calicindama ukwishiba bwino bwino icine no kulabombako lyonse umulimo wa kubila imbila nsuma, tufwile no kulaikala ukulingana ne cine ico tusambilila. Pa kucita ifyo, tufwile ukwikalilila mu kutemwa kwa kwa Lesa. Ni mwi ici calola? Amashiwi Yesu alandile ubushiku ilyo ashilafwa e yasuka ici cipusho. Aebele abatumwa bakwe aba cishinka ukuti: “Nga mwakonka amafunde yandi, mukekala mu kutemwa kwandi, ifyo na ine nkonka amafunde ya kwa Tata no kwikala mu kutemwa kwakwe.”—Yohane 15:10.

Nge fyo ilembo lilandile, icalengele ukuti Yesu ekale mu kutemwa kwa kwa Lesa ni co alekonka amafunde ya kwa Wishi. E fyo na ifwe tulingile ukulacita. Nga tulekonka ifyo tusambilila mu Baibolo cila bushiku, e lyo twingekalilila mu kutemwa kwa kwa Lesa. Pali bulya bwine bushiku, Yesu atile: “Apo mwaishiba ifi fintu, mukaba ne nsansa nga muleficita.”—Yohane 13:17.

Tulesubila ukuti cino citabo cikamwafwa ukulacita ifintu ukulingana ne cine mwasambilila pa kutila mukekalilile “mu kutemwa kwa kwa Lesa, ilyo mulelolela . . . umweo wa muyayaya.”—Yuda 21.