Kalata Ukufuma kwi Bumba Litungulula

Ku batemwa Yehova Lesa ne Cebo cakwe, Baibolo:

Yesu atile: “Mukeshiba icine, ne cine cikamulenga ukuba abantungwa.” (Yohane 8:32) Bushe mwaumfwile shani ilyo mwaumfwile icine ca mu Baibolo pa muku wa kubalilapo? Mwalitemenwe ilyo mwaishibe ukuti nangu ca kuti muli cino calo mwalifula ubufi, kuti twasambilila icine.—2 Timote 3:1.

Yehova Lesa afwaya twaishiba icine. Kabili apo twalitemwa abantu, tulafwaya ukubebako ici icine. Lelo kwaliba na fimbi ifyo tulingile ukucita pa kuti tulebombela Lesa. Tufwile ukubombesha pa kuti tuleikala ifyo Abena Kristu balingile ukulaikala pantu twalicindika sana amafunde ya kwa Yehova. Yesu alilondolwele inshila iikalamba iyo twingalangilamo Lesa ukuti twalimutemwa. Atile: “Nga mwakonka amafunde yandi, mukekala mu kutemwa kwandi, ifyo na ine nkonka amafunde ya kwa Tata no kwikala mu kutemwa kwakwe.”—Yohane 15:10.

Yesu alitemwa sana Wishi, kabili alacita fyonse ifyo Wishi amweba. Nga tulemupashanya mu fyo tucita cila bushiku, Yehova akatutemwa kabili tukaba ne nsansa sha cine cine. Yesu atile, “apo mwaishiba ifi fintu, mukaba ne nsansa nga muleficita.”—Yohane 13:17.

Tulesubila ukuti cino citabo cikamwafwa ukusambilila ifyo mwingalakonka icine ca mu Baibolo mu mikalile yenu no kuba ifibusa fya kwa Lesa. Tulepepa ukuti mukatwalilila ukutemenwako Lesa no kwikalilila “mu kutemwa kwa kwa Lesa . . . [ukwalola] ku mweo wa muyayaya.”—Yuda 21.