ISAMBILILO 48

Mulesala Ifibusa Ifisuma

Ifimoneka Ulwapulintwa

Ifibusa ifisuma filalenga twaba ne nsansa ilyo ifintu fili bwino, kabili balatukosha nga tuli na mafya. Lelo Baibo ilanda ukuti te muntu fye uuli onse uwingaba cibusa umusuma. Nomba kuti mwacita shani pa kuti musale ifibusa ifisuma? Tontonkanyeni pa mepusho yakonkapo.

1. Bushe ifibusa musala kuti fyalenga mwaba ne mibele nshi?

Ilingi line tuba ne mibele iyo abantu tuba nabo bakwata, nampo nga isuma nelyo ibi. Kabili ifi fine e fyo ciba nangu tulanshanya fye nabo pa Intaneti. Baibo itila, “uwenda na ba mano akaba uwa mano, lelo uwangala na bawelewele [abashatemwa Yehova] akacula.” (Amapinda 13:20) Ifibusa abatemwa Yehova kabili abamubombela kuti bamwafwa ukupalama kuli ena no kulapingula bwino pa fintu. Lelo ifibusa abashibombela Yehova kuti balenga bucibusa bwesu na Yehova bwapwa. E mulandu wine Baibo itwebela ukulasala bwino ifibusa! Nga ca kuti ifibusa fyesu balitemwa Lesa, kuti baletwafwa kabili na ifwe kuti tulebafwa. Kabili nga filya Baibo ilanda ‘tukalasansamushanya no kukuulana.’—1 Abena Tesalonika 5:11.

2. Bushe ifibusa musala kuti fyalenga Yehova aumfwa shani?

Yehova alasala bwino ifibusa. Baibo itila: “Abalungama e baba sana ifibusa fyakwe.” (Amapinda 3:32) Bushe Yehova kuti aumfwa shani nga twasala ifibusa abashamutemwa? Kuti aumfwa ububi sana! (Belengeni Yakobo 4:4.) Lelo Yehova kuti atemwa kabili kuti aba cibusa wesu nga twasala ifibusa ifisuma ifingalenga twamutemwa no kupalama kuli ena.—Amalumbo 15:1-4.

SAMBILILENI NA FIMBI

Moneni ico cacindamina ukusala ifibusa ifisuma, ne fyo mwingacita pa kuti mukwate ifibusa ifisuma ifingalenga mwaba ne nsansa.

3. Mulecenjela pa kuti tamusalile ifibusa ababa ne mibele yabipa

Abantu abashatemwa Lesa na mafunde yakwe baliba ne mibele iyabipa. Kanshi te kuti babe ifibusa ifisuma. Tambeni VIDIO, lyena lanshanyeni icipusho cakonkapo.

VIDIO: Mwilayampana na Bakwata Imibele Yabipa (6:17)

Kuti twatendeka shani ukwangala na baba ne mibele yabipa ukwabula no kuti twiluke?

Belengeni 1 Abena Korinti 15:33, lyena lanshanyeni ici cipusho:

Bantu ba musango nshi abo mushilingile ukula-angala nabo, kabili mulandu nshi?

Belengeni Amalumbo 119:63, lyena lanshanyeni ici cipusho:

Kuti mwaishiba shani nga ca kuti umuntu mulefwaya ukuti abe cibusa wenu kuti aba cibusa umusuma nelyo iyo?

Imbale yama apele. Iapele limo ilya bola lyalenga balunshi ukwisa pa mbale kabili lyalenga nama apele yambi ukutendeka ukubola. — Iapele limo ilyabola kuti lyalenga na yatuntulu yabola. Bushe ukwangala no muntu uwaba ne mibele iyabipa kuti kwalenga mwaba ne mibele nshi?

4. Abantu aba misango yonse kuti baba ifibusa fyesu

Baibo yalilanda pali Davidi na Yonatani, abaume babili abena Israele abali ifibusa. Nangu ca kuti Yonatani ali mwana wa mfumu kabili ali mukalamba sana pali Davidi, bali ifibusa sana. Belengeni 1 Samwele 18:1, lyena lanshanyeni ici cipusho:

Mulandu nshi tushingalandila ukuti abo twingaba fye nabo ifibusa ni balya twalingana nabo umushinku nelyo abo twalingana nabo mu mikalile?

Belengeni Abena Roma 1:11, 12, lyena lanshanyeni ici cipusho:

Bushe ifibusa abatemwa Yehova kuti bakoseleshanya shani?

Tambeni vidio pa kuti mumone icalengele munyinefwe umo uwacaice abe icibusa na bantu abo ashale-enekela ukutila kuti baba ifibusa fyakwe. Tambeni VIDIO, lyena lanshanyeni amepusho yakonkapo.

VIDIO: Abo Ushileenekela Kuti Baba Ifibusa Fyobe (5:06)

Muli vidio twatamba, mulandu nshi abafyashi ba kwa Akil basakamanine pa fibusa akwete ku sukulu?
Finshi fyalengele pa kubala alefwaya ukuba cibusa wabo?
Finshi acitile pa kuti aleke ukutalalilwa?

5. Ifyo mwingapanga ifibusa ifisuma

Moneni ifyo mwingacita pa kuti mukwate ifibusa ifisuma, ne fyo na imwe mwingaba cibusa umusuma. Tambeni VIDIO.

VIDIO: Bushe Cibusa wa Cine Aba Shani? (4:14)

Icikope icifumine muli vidio itila ‘Bushe Cibusa wa Cine Aba Shani?’ Uwacaice naba mushinguluka ku banankwe aba mishinku iya pusana pusana, inkanda iya pusana pusana kabili abacenjela mu fya pusana pusana.

Belengeni Amapinda 18:24 na 27:17, lyena lanshanyeni aya mepusho:

Bushe ifibusa fya cine bafwana shani?
Bushe na imwe mwalikwata cibusa wa cine? Nga tamwakwata, kuti mwacita shani pa kuti mukwate?

Belengeni Abena Filipi 2:4, lyena lanshanyeni ici cipusho:

Pa kuti mukwate ifibusa ifisuma, na imwe mufwile ukuba cibusa umusuma. Finshi mwingacita pa kuti mube cibusa umusuma?

Ifikope: Umukashana aletandalila ifibusa fyakwe fitatu. 1. Alelanda naumo pa foni. 2. Alelanda na cibusa wakwe umukoloci pa Ng’anda ya Bufumu. 3. Naya mu kutandalila cibusa wakwe uulelosha. — Pa kuti mukwate ifibusa ifisuma, mufwile *ukuba* cibusa umusuma

ABANTU BAMO BATILA: “Kuti waba cibusa no muntu fye uuli onse.”

Imwe muletipo shani?

IFYO MUSAMBILILE

Nga twasala bwino ifibusa tulalenga Yehova alesekelela kabili tulanonkelamo.

Ukupitulukamo

Mulandu nshi Yehova abikilako amano ku bo tusala ukuba ifibusa fyesu?
Bantu ba musango nshi abo tushilingile ukula-angala nabo?
Kuti mwacita shani pa kuti mukwate ifibusa ifisuma na pa kuti bucibusa bwenu bukose?

Ubushiku mwapwisha ili isambililo:

Ifyo Mwingacita

Mukeshibeko abantu abengi mu cilonganino.

Fimbi:

Your other goal

ISHIBILENIPO NA FIMBI

Belengeni ici icipande pa kuti mumone ifyo ifibusa ifisuma fingatwafwa ilyo tuli na mafya.

“Mulekosha Bucibusa Bwenu na ba Bwananyina Ilyo Impela Ishilaisa” (Ulupungu lwa kwa Kalinda, November 2019)

Moneni fimo ifyo mwingacita pa kuti mukwate ifibusa ifisuma.

“Kuti Nacita Shani pa Kuti Nkwate Ifibusa Ifisuma?” (Ifipusho Abacaice Bepusha ne Fyasuko Ifingabafwa, Ibuuku 1, icipandwa 8)

Finshi mufwile ukwishiba pa fibusa fya pa Intaneti?

Mulecenjela Ilyo Mulelanshanya na Banenu pa Intaneti (4:12)

Belengeni ilyashi ilitila “Nalefwaisha Ukukwata Batata aba Kunsakamana,” pa kuti mumone ifyo umwaume umo alekele ukwangala na bo aleangala nabo.

“Baibolo Ilaalula Abantu” (Ulupungu lwa kwa Kalinda, April 1, 2012)