Ukubombela Uwaishibisho Kulenga Uwakulisha Pali Bonse

LINTU nali umukashana uwa myaka ya bu- kulu cinelubali, natendeke ukuipusha ukuti: ‘Mulandu nshi mfwile ukufwila? Bushe kuti cacitika ukusengauka imfwa?’ Naebelwe ukuti Lesa alasenda abantu abasuma pantu afwaya ukuba na bo mu mulu. Ncili ndebukisha umo uwa banandi ba mu kalasi ukupapo kuti: “Cawamishapo ukubo muntu mubi pantu abasuma e babalilapo ukufwa!”

Nalitemenwe ifya kushilashila, e co natendeke ukusambilila ukulenga. Pa sukulu, nshakwete ishuko lya mu nshita ukulanguluke imilandu ya butotelo, nelyo inshita ya kubuula buseko muli yene. Na kuba, naleeba ifibusa fyandi nati pa kuba uwa butotelo, umo akabile ukubo wa cipimo calinga ica kulamuka. Lintu napwile amasambililo yandi aya kulenga, napeelwe icifulo ca bukafundisha bwa kulenga mwi sukulu lya ku sekondari.

Nalitemenwe umulimo wandi kabili nali uwasekelela mu fitabo fya ciItalian ne fya cilendo, inyimbo ne nyimbo sha mapenga, ne fisela. Icintu fye cimo pa lwa butotelo nasambililepo muli ilya nshita cali milandu ya kulenga fikope ifya bakalenga bapusanapusana aba lyashi lya kale. Lyene nasambilile cintu ukuba ica kutontapo kwali, ifyo ukulangisha imilimo ya umo kwapalile, ifyo capilibwile ukubo wacindikwa, ukutashiwa, no kukumbwiwa nga kalenga.

Pali ilya nshita, icalo ca kulenga capilibwile ifingi kuli ine, apantu cali ni mulya e mo nasangile umulandu wa lubali lukalamba uwa kubako kwandi. Lelo ifipusho naimishe lintu nali ne myaka cinelubali fyali ficili mu muntontonkanya wandi. Ukwabulo kunaka nasapike pa lwa cintu cimo mu kushika nga nshi, icintu cimo ico na nomba nshingalondolola. Nali kabelenga wa mute kabili naipwishe aba maele ku bulondoloshi. Pa mutengo uuli onse, nalefwaya icasuko cakumanina ku kutwishika kwandi.

Nali ncili ninkwate ci cimfulumfulu lintu naupilwe. Pa numa ya kufyalwa kwa mwana wandi umwanakashi, ukusapika kwandi ku cine kwabele ukwacililako ukukosa. Naeseshe ukusanga ukupitila mu kulenga, ukulembe mishikakulo, ukukutika ku nyimbo, ukubelenge fitabo. Ilili lyonse naile ku cila no kukutika ku tunyimbo twa kwiswila icila, umuntontonkanya wandi apo pene waile kuli Lesa, ku Wabako Uwasumbuka untu nshaishibe, kabili nalimutootele. Mu kati ka ilya nshita, libili libili naletootela Lesa pa fintu fyayemba nalekumbwa—ukulaala kwa mwana wandi, imisango ya kumoneka kwa fikope fya mpanga. “We nsoni we,” e fintu nalepapa, “uko kulenga, ukwingakwata ukuyembo kwa fintu ifingi nge lyashi lya kuko, kulingile ukubomfiwa apakalamba ku kulondolola imfwa mu cifulo ca bumi!” Fimo ifya fiputulwa fyacilishapo ukupapusha ifya mishikakulo ne milimo ya fisela fyaba nakalimo ifiunda fya nyimbo ifya kwenekela kwabipa nelyo utuyofi; fimo ifya milimo yawamisha iya kulenga fisumbula imfwa ukucila pa bumi no kuyemba kwa buko. Mulandu nshi?

Uku kuyumfwa kwapusanapusana kwalimfuupwile apakalamba, kabili panono panono natendeke ukwalukila ku lupato. Cali ni pali iyo nshita e lintu Nte sha kwa Yehova baishile pa mwinshi wandi. Ilintu nalekutika kuli bene, camoneke nga balelanda kuli ine mu lulimi ulupya. Ubulayo bwa kwa Lesa ukulenge sonde paradise caumfwikilwe kwati lwimbo ulwalowa mu matwi yandi. Natendeke ukubelenga Baibolo. Mulya mu kupelako nasangile ifyasuko ku fipusho ifyo nshalekele ukuipusha ukutula lintu nali ne myaka cinelubali iya bukulu. Lesa tafwaya muntu ukufwa lelo afwaya ukupaala ababomfi bakwe aba citetekelo pa kubapeela ubumi bwa muyayaya pe sonde!

Ico cali mu 1973. Umwaka wakonkelepo nacitile ukuipeela kuli Yehova kabili nalibatishiwe. Tacali icayanguka ukupyanika imibele yandi iya kukuntukilwa no kuyumfwa mu kuba no mupashi uwa kutemwa kwa bumunyina ukwa cine, bumano kuikwatila bwandi na kaso, no kwikushiwa mu kuba no mupashi wa bulilambo! Nali no kuikaana. Inte sha kwa Yehova balingafwilisha apakalamba, nge fyacito kulongana mu Ŋanda ya Bufumu.

Kalenga Uwakulisha alifumyapo ukutwishika kwandi no kupelenganya. Fintu nabo wa kutasha kuli wene! E mulandu wine, ukutula September 1984, nalibuula umulimo wa bupainiya bwa nshita yonse, ukupoosa amaawala 90 cila mweshi ukushimikila imbila nsuma iya Bufumu bwa kwa Lesa.

Ukubombela Kalenga Uwakulisha kabili Kabumba, Yehova, mu kuba no lupwa lwandi cili mu cine cine ica kwikusha. Mu kufwaisha tulelolela inshita lintu akalenga icikope cacilishapo ukubalabata; lintu mu kupelako afumyapo imicitile ibifi iya fintu, iyakokola iyo ikantanya no kukupilishe ili sonde. Imfwa tayakabeko kabili iyo, kabili ukulenga kukaba kuipeelesha kwa mupwilapo ku bumi. Lyene, ukuyemba fye kweka kukalangishiwa, pantu ukupitila mu micitile ipya iyalungama, amalanda no kukalipwa fikaba nafifumishiwapo kuli pe na pe.—Casangwilwako.