Twalilileni Ukulola ku Buyo!
Ifishinka Fikalamba Ukufuma mu Abena Filipi
UMUTUMWA Paulo afwaile Abena Kristu mu Filipi ukutwalilila ukulola ku buyo bwa mwaala wa bumi bwa muyayaya. E ico, alembele kuli bene mupepi na 60 nelyo 61 C.E., mu kati ka kubikwa kwakwe mu cifungo ukwa kubalilapo mu Roma. Kalata yakwe yatuminwe ku cilonganino ico aimike imyaka imo ikumi mu kubangilila mu Filipi, umusumba uwasangilwe na Filipi umwina Makedonia (wishi wa kwa Alekesandere Mukalamba). Ukufika mu mwanda wa mwaka uwa kubalilapo C.E., wabele “umushi uwapulamo mu calo ca Makedonia,” nomba waba ulubali lwa kapinda ka ku kuso aka Greece na kapinda ka ku kulyo aka Yugoslavia.—Imilimo 16:11, 12.
Abasumina ba mu Filipi bali abapiina lelo bakapekape. Ukucila pa muku umo, batumine fimo ku kukabila kwa kwa Paulo. (Abena Filipi 4:14-17) Lelo kalata yakwe yalicilile fye na pali kakalata kanono aka kutasha. Na kabili yapeele ukukoselesha, yaebekeshe ukutemwa, kabili yapayenye ukufunda.
Imibele ya Bwina Kristu Yamonekesha
Kalata ya kwa Paulo yaiswilwe mu kuba no kumonekesha kwa kutemwa kwakwe ku basumina abena Filipi. (1:1-30) Atashishe Yehova ku kusangwilako kwabo ku kutwalwa pa ntanshi ukwa mbila nsuma no kupepa ukuti ukutemwa kwabo kwingilishiweko. Paulo aali uwa buseko ukuti ukubikwa kwakwe mu cifungo kwabalengele ukulanga ‘ukushipo kulande cebo ca kwa Lesa ukwabulo mwenso.’ Afwaishe ukuba na Kristu lelo ayumfwile ifyo aali no kubatumikila na kabili. Paulo na kabili afwaile bene ukuba “abakoshanya umutima umo ku citetekelo ca mbila nsuma.”
Mu kukonkapo kwaishile ukufunda pa mibele ne myendele. (2:1-30) Abena Filipi bakoseleshiwe ukulanga ubuseko bwa pa lwabo no kulangisha ukuicefya ukupala uko ukwa kwa Kristu. ‘Balebeeka nge fyengelo pano isonde’ kabili bacincishiwe ‘ukwikatishe icebo ca mweo.’ Paulo asubile ukutuma Timote kuli bene kabili aali uwashininwa ukuti umwine wine aali no kubwela mu kwangufyanya. Ku kubebekesha pa lwa kwa Epafroditi, uwalwele nga nshi, Paulo aali no kutuma uyu mubomfi wa cishinka.
Twalilileni Ukulola ku Buyo
Umutumwa mu kukonkapo alangile uko abena Filipi bali no kubika ukucetekela kwabo ilintu batwalilile ukulola ku buyo. (3:1-21) Kulingile ukubikwa muli Yesu Kristu, te mu fya ku mubili nelyo mu kusembululwa nge fyo bamo balecita. Paulo alangulwike ifya kwishibikilwako kwakwe ifya ku mubili ngo busali pa mulandu wa “cuma icapulamo ica kwishiba Kristu.” Umutumwa ‘atwalilile ukulola ku buyo, ku mwaala wa bwite bwa mu mulu bwa kwa Lesa muli Kristu Yesu’ kabili akoseleshe abena Filipi ukukwata imibele imo ine iya muntontonkanya.
Ukubomfya ukufunda kwa kwisalila ukwa kwa Paulo kuti kwaafwa abena Filipi ukusungilila ubuyo no mwaala mu kumoneka. (4:1-23) Abacincishe ukubika amasakamika yabo kuli Lesa mwi pepo no kwisusha imintontonkanya yabo na matontonkanyo ayasuma. Paulo na kabili abatashishe pa mulandu wa bukapekape bwabo no kusondwelela mu kuba no kuposha no kubafwaila icikuku ca pa fye ica kwa Shikulu Yesu Kristu ukuba no mupashi balangishe.
Kalata ya kwa Paulo ku bena Filipi isumbula bukapekape, ukutemwa, no kuicefya. Ikoselesha ukucetekela muli Kristu ne pepo lya kufuma ku mutima kuli Lesa. Kabili amashiwi ya kwa Paulo mu kushininkisha yaafwa Inte sha kwa Yehova ukutwalilila ukulola ku buyo ku mwaala wa bumi bwa muyayaya.
[Akabokoshi ne Cikope pe bula 25]
Ukulola ku Buyo: “Pa kulaba ifya ku numa, no kusupile fya ku ntanshi,” e fyalembele Paulo, “nkonkelela ukulola ku buyo, ku mwaala wa bwite bwa mu mulu bwa kwa Lesa muli Kristu Yesu.” (Abena Filipi 3:13, 14) Umutumwa alepilikita ukupala umo muli nakatango. Taonawile inshita na maka mu kulolesha ku numa lelo atwalilile ukulola ku buyo bwakwe—ukupala kabutuka uuleibikilishako ukucilinganya umupelwa wa kupwishishisha. Kuli Paulo na Bena Kristu bambi abasubwa, umwaala wali bumi bwa mu myulu pa kubuushiwa pa numa ya kupwisha umulimo wa pe sonde uwa busumino kuli Lesa. Nampo nga amasubilo yesu ya mu myulu nelyo ya pe sonde, natusungilile bumpomfu kuli Yehova no kutwalilila ukulola ku buyo nge Nte shakwe.—2 Timote 4:7.