Bakabilisha ba Bufumu Bacita Lipoti

Ukulubuka kwa ku Mupashi mu Colombia

UKUFUMA pa nshita ya bakacimfya ba ku Spain, buKatolika bwalikwata ukulama kwakosa ukwa butotelo pa South America. Mu Colombia bwaliba pa nshita yalepa e butotelo bwa bulashi ubwa Buteko. Pa myaka yapitapo 105, Vatican yalikwata ukusuminishanya na kamfulumende ya Colombia ukwacingilile icalici no kulisuminisha amashuko yaibela mu fya masomo ne cupo.

Mu December 1990 abantu ba mu Colombia basalile akabungwe ka kupekanya constitution iipya, ukwapwishishiwe ukufika pa kati ka 1991. Constitution iipya yalula imibele ya butotelo mu Colombia. Amabutotelo yonse nomba yalikwata insambu shalingana ku cinso ce funde, kabili ukufundisha kwe calici te kuti kupatikishiwe pa bana mu masukulu ya cintubwingi. Ukusuminishanya na Vatican kuli mupepi no kupitulukwamo mu kuba no ku kwaluka kwa constitution mu muntontonkanya.

Ubu buntungwa bwakulilako ubwa butotelo bukacefyako ukusonga kwe Calici lya ciKatolika, ukucilenga icayangukilako ku ba mitima yafumaluka ukunonka ukwishiba kwa Baibolo no kufika pa buntungwa bwa ku mupashi.

Mu kwenekelwa kwa uku kulubuka kwa ku mupashi, Inte sha kwa Yehova 51,000 muli ici calo balecita amapekanyo ku kusakamana imbutushi sha ku mupashi. Umusambo wabo uupya uwapikana mu kuba ne fibombelo fyatanununwa, ulesanshamo mashini ya kupulintilako iibutukisha iya fikope fyabalabata, ulepalamina ukupwishishiwa. Bapainiya baibela aba pa nshita inono balitumwa mu matauni yanono mu kusapika impaanga shaluba isha kwa Yehova kabili balipwishishisha umulimo wa kusungusha uwa masomo ya Baibolo. Mu matauni 63, limo limo ilyakwata abekashi mupepi na 10,000, ifilonganino fipya 47 na mabumba fyalipangwa.

Ilyo mupashi wa kwa Yehova uletwalilila ukusesha abantu ba mitima yafumaluka, imisepela iingi na bo bene baleyankulako. Ulupapulo Ifipusho Abacaice Bepusha—Ifyasuko Fibomba lwalishininkisha ukuba ca kwafwilisha cakwatisho mutengo kuli bonse abacaice ba musango uyo na ku bafyashi babo. Ilintu aleya ukufuma ku mwinshi no mwinshi, Nte akumenye umwaume uwabelengele ifiputulwa fya ici citabo, kope iyaashimishiwe fye kuli wene ku mwina mupalamano. Aali uwaebekeshiwa nga nshi ku mano yabomba yantu lulangisha mu kulanshanya impika sha lupwa. Icipandwa 4, “Mulandu Nshi Tata na Mayo Bapatukanine?” ukucilisha calimwebekeshe, apantu wene no mukashi wakwe bali pa nembenembe ya kupatukana. Atile icitabo camupuswishe ukufuma ku kayofi kakalamba. Nomba wene no lupwa lwakwe balesambilila Baibolo pamo ne Nte sha kwa Yehova kabili balesangwa ku kulongana kwa cilonganino konse. Bali aba kutasha nga nshi pa mano yabomba yantu Yehova apayanya ukupitila muli Baibolo no kuteyanya kwakwe.

Ici ca kukumanya cilangilila ukulubuka kwa ku mupashi ukulecitika mu Colombia ilyo Inte sha kwa Yehova baleafwa aba nsala ya ku mupashi ukusambilila imifwaile ya kwa Yehova iyapesha amano ne calo cipya cakwe, icipaleme nga nshi nomba.—2 Petro 3:13.