“Mwashibukeni! Bushe Mwalishiba Ishina lya kwa Lesa?”
PE OFESI lya musambo ilya Nte sha kwa Yehova mu Brazil, kalata yakonkapo yalipokelelwe ukufuma kuli bampundu babili abanakashi aba myaka ya bukulu 12 mu musumba wa Fortaleza:
“Ku numa mu 1990 lintu twali mwi gredi lyalenga busano, isukulu lyesu lyateyenye ubulangisho bwa sayansi, ifya kulengalenga, ne fya ntambi. Twalondolwele kuli kafundisha ukuti twalefwaya ukulangisha kwesu ukubo kwapusanako ukufuma ku fyo abasambi bambi baletontonkanyo kupekanya. Apantu aali naumfwa ifwe tulelanda pa lwa kwa Yehova na pa lwa Baibolo kale, atubulwile ukuti: ‘Lyene kuti mwalemba pa lwa kwa Lesa wenu!’
“Twamwene ili nge shuko lya mu nshita ilya kupeelo bunte kabili twapingwilepo ukubika ubulangisho mu kuba ne mpapulo sha Baibolo ishasanikile pe shina lya kwa Yehova. Twapekenye ukupulinta cipya cipya ukwa filembo fyakushiwa ifya mashiwi ya pe Ilumbo 83:18 no kukambatika yene ku cikope ca Baibolo yaiswike. Na kabili, twabikile pe tebulo amabupilibulo ya Baibolo ayalekanalekana ayakwetemo ishina lya kwa Yehova. Pe tebulo limo line, twalangishe impapulo shalekanalekana isha Baibolo. Pa mpela ye tebulo, twabikile video na TV ku kulanga abatandashi ica kumwenako cimo uko ishina Yehova lyalebomfiwa mu fikope fisela ifyalumbuka.
“Mu kati ka bulangisho, lintu umuntu aishile kwi tebulo lyesu, twali no kusoso kuti: ‘Mwashibukeni! Bushe mwalishiba ishina lya kwa Lesa?’ Pa numa ya kupeelo mutandashi ishuko lya mu nshita ukwankulako, twatwalilile ukuti: ‘Moneni pano! Amabupilibulo yafulilako aya Baibolo yalanga ukuti ishina lyakwe ni Yehova,’ ukusonta kwi shina mu maBaibolo yapusanapusana, pamo nga ilya iya kwa João Ferreira de Almeida, The Jerusalem Bible, na New World Translation. Lyene twataambishe ukumoneka uko imibele ikalamba iya cikope caseeka yebekesha Yehova nge shina lya kwa Lesa. Lintu abantu balangile ubuseko, twabapeele magazini nelyo trakiti mu kuba ne fyebo fyalundwako.
“Umo uwa mu misepela uwaishile kwi tebulo lyesu aipwishe icitabo ca Ifipusho Abacaice Bepusha—Ifyasuko Fibomba. Kafundisha wesu abebetele citabo ca Ukulenga Ubumi bwa Lupwa Lobe ubwa Nsansa no kupundo kuti: ‘Yangu! We citabo ulawama!’ Ukufika ku mpela ya bulangisho, twashalike ifitabo 7, amatrakiti 18, na bamagazini 67. Twapeelwe icilambu ca butatu pa bulangisho. Lelo ukucila pali fyonse, twali aba nsansa pe shuko lya kulengo kwishibikwa kwe shina lya bulesa, Yehova.”