Ukuya ku Muulu Nelyo ku Helo?

“MASHUKO nshi mwakwata aya kuya ku muulu nelyo aya kuya ku helo?”

Mu kutendekelako, ico calipushiwe pa kufwailisha kumo ukwa mu bena America ukwa nomba line. Princeton Religion Research Center yasabankenye ifya kufumamo muli Religion in America 1992-1993.

Nga mwayaswike shani? Mashuko nshi aya mwina mwenu nelyo abatemwikwa bambi aya kuya ku muulu pa mfwa? Bushe muletontonkanya ifyo kuti cacitika ukuti imwe, nelyo bena, kuti mu kupelako baya ku helo?

Ukufwailisha kwalangile ukuti amaperesenti 78 batontonkenye ifyo amashuko yabo aya kuya ku muulu yali bwino nelyo yali ayawamisha, ukucila impendwa ya bayaswike muli iyo nshila mupepi ne myaka 40 iyapitapo. Helo? Mupepi na maperesenti 77 basosele ukuti tacapalile ifyo kuti baya kulya.

Bushe ukwankulako kwabo kwashimpilwe pa kwishiba kwalungikwa ukwa Baibolo? Kwena, mupepi na 4 pali 10 basumine ifyo balesangwa ku mapepo ya butotelo mu kucepako pa fintu balesangwako imyaka isano iyapitapo. Maperesenti fye 28 e baitungile ukwakana mu mabumba ya kusambilila Baibolo kabili amaperesenti 27 mu makalasi ya masomo ya butotelo.

Nga ca kuti mu kusakamanishisha mwasambilila Baibolo, mukasanga ifishinka fya kusungusha. Ku ca kumwenako, Baibolo mu kulungatika isoso kuti pa mfwa Yesu aile ku “helo,” nga fintu capilibulwa mu mabupilibulo yamo aya Baibolo. (Imilimo 2:31, King James Version; “Hades,” New World Translation) Icebo ca kwa Lesa na kabili cishininkisha ukuti atemwa Imfumu Davidi nelyo Yohane Kabatisha tabaile ku muulu pa mfwa. (Mateo 11:11; Imilimo 2:29) Ifyo fishinka, te mimwene fye ukufuma ku kufwailisha kumo ukwa butotelo.

Ifishinka fimbi ifingamwambukila ni fi: Baibolo isambilisha ukuti abatumwa ba kwa Yesu ne mpendwa yapimwa iya bambi bakasendwa ku muulu ku kuteka pamo na Yesu. Nangu cibe fyo, ubwingi bwa bantu abafwa baya fye ku nshishi ya munsaunte iya mutundu wa muntu. Lesa akababuusha, ukubaleta ku bumi pe sonde mu kuba ne cilolelo ca bumi bwa mwisulo, ubwa nsansa, ubushipwa muli paradise wabweshiwa uwa pe sonde.

Inte sha kwa Yehova bakaba abasekelela ukumwaafwa ukwimika icitendekelo cashintililwapo ica ilyo subilo ukufuma muli Baibolo wenu.