Ifyo Icilonganino ca Bwina Kristu Cateyanishiwa

ILINTU ifilonganino fya Bwina Kristu ifya kwa Lesa fyaimikwe mu ncende shalekanalekana, tafyalebomba muli bucaibela. Na lelo line tafibomba muli bucaibela. Mu cifulo ca ico, bonse baishibe ubulashi bwe bumba litungulula ilya Bwina Kristu mu Yerusalemu. Ili bumba litungulula lyapangilwe na batumwa na bakalamba ba mu cilonganino ca mu Yerusalemu, kabili takwaliko amabumba yambi ayalecimfyanya nalyo ukuli konse kumbi ukufwaya ukwangalila icilonganino. Cali ni kwi bumba litungulula ilya Bwina Kristu ilya busumino ilya mu mwanda wa myaka uwa kubalilapo C.E. eko umulandu wa kusembululwa watwelwe ku kulangulukwapo. Lintu ibumba litungulula lyacitile ukupingulapo kwa liko, nga fintu lyatungulwilwe no mupashi wa mushilo, kulya kupingulapo kwalipokelelwe kabili kwaikashiwe pa filonganino fya Bwina Kristu fyonse, ifyanakile kuli kwene mu kuitemenwa. Tukonka icipasho ca mu mwanda wa myaka uwa kubalilapo ice bumba litungulula.—Imilimo 15:22-31.

Ibumba lya Bwina Kristu mu Yerusalemu lyaletuma abeminishi benda. Muli ifyo, Paulo na bambi batwele ukupingulapo kwe bumba litungulula ukulumbwilwe pa muulu, ukulondololwa ukuti: “Awe ilyo baleya balapita mu mishi, bapeela abantu ifipope ifyapingwilwe ku batumwa na bakalamba mu Yerusalemu ku kufibaka.” Ukukuma ku ca kufumamo, casoswa ukuti: “E ico inkuta shalakoshiwa mu citetekelo, shalasanduluka impendwa ubushiku no bushiku.” (Imilimo 16:4, 5) Mu musango umo wine, bakangalila benda ilelo, ukupala mu mwanda wa myaka uwa kubalilapo, balaafwa ukubika ukupingulapo na makambisho ye Bumba Litungulula mu kubomba. Bunonshi nshi bwabako? Ukushikatala kwa ku mupashi no kusanduluka!

Icilonganino cimo na cimo cakakatile mu kupalamisha ku kutungulula kwe bumba litungulula ilya Bwina Kristu, ilyaangalile ukusontwa kwa bakalamba. (Tito 1:1, 5) E co cali ukuti, nga fintu batungulwilwe ne bumba litungulula ilya Bwina Kristu pe samba lya kusongwa no mupashi wa mushilo, bakangalila pamo na bakaafwa babo, ababomfi batumikila, balisontelwe mu cilonganino cimo na cimo. Abaume babikilwe muli ifi fifulo fya kuseekeshiwa ne cishingamo baali no kufika pa milingo ya kulungatika imo. (1 Timote 3:1-13; Tito 1:5-9) Abeminishi benda abe bumba litungulula, pamo nga Paulo, bakonkele Kristu kabili baimike ica kumwenako cishaiwamina ica kupashanya. (1 Abena Korinti 11:1; Abena Filipi 4:9) Na kuba, bonse abo abaali mu cifulo ca bucemi bwa ku mupashi baali no kube “ca kumwenako ku mukuni” (1 Petro 5:2, 3), baali no kulangisha ukwangwako kwabamo ukutemwa ku muntu umo umo mu kati ka cilonganino (1 Abena Tesalonika 2:5-12), kabili baali no kuba aba kwaafwa kwa cine cine kuli abo abalwala lwa ku mupashi.—Abena Galatia 6:1; Yakobo 5:13-16.

E co, kwati fye fintu Yehova ateyenye icilonganino ca kwa Israele pe samba lya bakalamba, bakasomo, bapingushi, na bacilolo (Yoshua 23:2), Ashininkishe ukwangalilwa kwa cilonganino ca Bwina Kristu pa kukwata abakalamba ukusontwa mu fifulo fya kuseekeshiwa mu kati ka ciko. (Imilimo 14:23) Kabili, pamo nga fintu abaume bashingamwa inshita shimo babombele mu kwimininako icilonganino conse ica kwa Israele, pamo nga mu milandu ya bupingushi (Amalango 16:18), Lesa atantikile icilonganino cimo na cimo ica Bwina Kristu ukwimininwako mu nshila yapalako mu milandu ya musango yo ku baume bashingamwa ababikwa mu fifulo fya bulashi ku mupashi wa mushilo. (Imilimo 20:28; 1 Abena Korinti 5:1-5) Nangu cibe fyo, nga ca kuti amafya yaimako pa kati ka filundwa fya cilonganino ca kwa Lesa ica Bwina Kristu, amashiwi ya kwa Yesu Kristu ayalembwa pali Mateo 18:15-17 (ayalandilwe pa ntanshi icilonganino ca ciYuda ica kwa Lesa tacilakaanwa kuli Yehova na muli ifyo ayalebomba mu kutendekelako kuli cene) yabombele nge cishinte ca kupwishishapo nelyo ukupikulwilapo impika sha musango yo.

Ku kunonsha icilonganino ukufuma mu “fya bupe ku bantu,” Yehova Lesa alimika ifilundwa fya “mubili” wa kwa Kristu “ifyo atemenwe.” Kabili Paulo alondolwele ukuti: “Lesa abikile bamo mu lukuta, aba ntanshi batumwa, aba cibili ni bakasesema, aba citatu ni bakasambilisha, e lyo pakonka aba fisunguko, e lyo pakonka aba fya bupe ifya kuundapila, bakaafwa, bakateka, abasosela mu ndimi sha misango misango.” Te bonse babombele imilimo imo ine, lelo icilonganino ca Bwina Kristu cakabile bonse. (1 Abena Korinti 12:12-31) Paulo alondolwele ukuti ukuletwako kwa batumwa, bakasesema, bakabila, abacemi, na bakasambilisha aba cilonganino ca Bwina Kristu cali “ku kuwamya abashila, ku mulimo wa kupyungila, ku kukuulo Mubili wa kwa Kristu; tusuke tufike bonse kuli buumo bwa kutetekela na ku kwishibo Mwana wa kwa Lesa, ukufika na ku bukalamba, ku mulingo wa mushinku wa mwisulo wa kwa Kristu.”—Abena Efese 4:11-16.