Bakabilisha ba Bufumu Bacita Lipoti

“Icishawasha ca Mupashi wa Kubombela Pamo”

MUPEPI na ku musoso wabesha ku kapinda ka ku kuso aka Spain kwalulubala icaimikwa cikalamba ica nswakala icaishibikwa nga Rock of Gibraltar. Pa myanda ya myaka, ici cilibwe caba bunte bwa mu mutalalila ku fikansa fya bupolitiki no kukanasuminishanya kwa pa kati ka nko. Mu kupusanako, Rock of Gibraltar pali nomba line yali mimonekele ya kubombela pamo na buumo ifishimonaika mu calo ilelo.

Bakilomita fye batatu ukufuma pali iyi Rock paba itauni lya La Línea, Spain. Kulya ubukuule bwa Ŋanda ya Bufumu iya Nte sha kwa Yehova bwaletele imyanda ya bakabomba ba kuitemenwa abafwaisha ukusangwilako inshita yabo na maka. Ilyo balebomba ku kwimika icifulo calinga ica kupepelapo Kabumba, Yehova Lesa, nangu ni ilya mimonekele ya bukata iya Rock of Gibraltar yalifubalile mu kucindama ukulinganishiwa ku mulimo uwali palya.

Bakabilisha ba Bufumu muli cilya ciputulwa ca calo batuma lipoti wakonkapo:

“Aba kuitemenwa bacincimuka imyanda pabula babombele akasuba no bushiku, ukutendeka pali Cisano akasuba, September 24, 1993. Ukufika pa 19:00 hrs pa Mulungu icungulo bushiku, icipampa cipya ica kwishibisha icikuulwa pamo nge Ŋanda ya Bufumu iya Nte sha kwa Yehova cali nacimikwa, kabili icikuulwa cipya icayemba calebomfiwa ku kulongana kwa kubalilapo kwine ukwa cintubwingi.

“Inte shingi ukufuma mu Gibraltar wabela mupepi balicilwike umupaka ku kwafwilisha bamunyinabo abena Spain. ‘Amalekano ya bupolitiki tayatalalika bumunyina bwesu ubwa pa kati ka nko,’ e fyalondolwele umo uwa bakabomba ba kuitemenwa, umukaya wa ku Gibraltar. Alundilepo kuti: ‘Imyaka iingiko iyapita, inte shinensu ukufuma ku La Línea balishile ku kutwaafwa ukukuula Iŋanda ya Bufumu iyesu mu Gibraltar, e co nomba tuli aba nsansa ukubweseshapo bubile.’

“Ku kongesha pa kubombesha kwabulo kushako ukwa filonganino fibili ifya Nte sha kwa Yehova ne myanda ya bakaafwa bakwato kulamuka abafumine mu citungu ca Andalusia, umusumba wa La Línea wapingwilepo ukupeelo bupe impanga yalinga. ‘Mu cishilano, amabulashi ya cikaya aya mu Spain lyonse balapeela impanga ya kukuulapo amacalici ya ciKatolika,’ e fyalondolwele mwine mushi wa mu La Línea mu kati ka kutandalila icifulo ca bukuule. ‘Mulandu nshi te kucitila cimo cine ku fyakaniko fimbi ifya butotelo? Ninjebekeshiwa apakalamba ku kubulwa kaso ukwa ba kuitemenwa, kabili ndeyumfwe fyo baliwamina ukutungilila kwesu. Tulekabila mu kucilapo uyu musango wa mupashi mu calo ca lelo icayakanikana.’

“Aloseshe ku Ŋanda ya Bufumu pamo nga ‘icishawasha ca mupashi wa kubombela pamo.’ Mu cituntulu, ulubali lwacililepo kwebekesha tacali atemwa ni plani wa mikuulile nelyo ubukulu bwa cikuulwa. Ukucila, icaebekeshe abengi mu bwikashi cali cishinka ca kuti yakuulilwe na ba kuitemenwa beka beka kabili yaimikwe mu maawala fye 48 epela!”

Cili icamonekesha ukuti Inte sha kwa Yehova mu La Línea ne ncende sha uko ishashingulukako baliba aba cishinka ku mashiwi ya pa Abena Galatia 6:10. Palya umutumwa Paulo akonkomeshe abasumina banankwe ukuti: “E ico cena, lyonse ilyo twaba ne nshita, tubombe icisuma kuli bonse, no kucishamo ku ba bwananyina bwa mu citetekelo.”