Mulandu Nshi Inte Batwalilila Ukutandala?

‘BABWELA na kabili! Lelo milungu fye inono iyapitapo ilyo baali pano!’ Bushe ulatontonkanyapo ifyo lintu umo uwa Nte sha kwa Yehova akutandalila? Amamilioni ilelo ilingi line balatandalilwa ku Nte sha kwa Yehova. Napamo kuti waipusha auti, Mulandu nshi bakoselela ilyo balishiba ukuti abantu abengi balikwata ubutotelo bwabo nelyo tababa abasekelela? Ico cipusho cawaminwa icasuko.

Icishingamo pa Ntanshi ya kwa Lesa

Inte sha kwa Yehova shalisambilila ukufuma mu Malembo ukuti ukutula 1914, umwaka umo Inkondo ya Calo iya I yatendeke, ifya kuponako fya mu calo fifikilisha amasesemo ya Baibolo ukukuma ku mpela ya micitile ya calo iya ndakai no kuteka kuleisa ukwa Bufumu bwa kwa Lesa pali lino isonde. Mupepi no mwanda wa myaka uwa lukaakala, ukusuumyo mulopa, no lupato fimoneka ukusha umutundu wa muntu uwataluka ukucila na pali kale lyonse ukufuma ku kupikulula kwa bupolitiki ukwa mpika shabo. Inkondo no kululunkanya ifyo ficili filepuma ulupwa lwa buntunse fili bushinino bwa kuti imitekele ya buntunse yalifilwa ukwalula imitima ya bantu, imintontonkanya, ne mibele. Ukufiitwa kwashikama pa lwa fintu ifyacitike kale sana kucili kwaba malulu pa kwampana pa kati ka mabumba ya batutu, imishobo, no butotelo. Ico e fintu caba mu ncende ishatalukana nga Afghanistan, India, Middle East, Northern Ireland, South Africa, ne yali kale Yugoslavia. Cinshi, lyene, caba ukupikulula kubelelela?

Cinshi Cikunta Inte?

Inte sha kwa Yehova balishiba ukuti ukupikulula kwa kwa Lesa—ukuteka kwa Bufumu bwakwe ubwalaiwe muli Yesu Kristu—e casuko fye ceka icikatunguluka. Yesu alisanshishe fye no kupaapaatila uko kuteka kwa Bufumu mwi pepo lyakwe ilya cilangililo ilyalumbuka ukuti: “E ico imwe pepeni ifyo, amuti: Shifwe wa mu muulu, ishina lyenu libelwe akatiina. Ubufumu bwenu bwise. Ukufwaya kwenu kucitwe pano nse nga mu muulu.” Inte shasumino kuti ili pepo mu cituntulu lipusha ukucilima kwa kwa Lesa mu milandu ya mutundu wa muntu.—Mateo 6:9, 10.

E co mulandu nshi Inte sha kwa Yehova bayumfwila ukukabila kwa kuya ukufuma ku ŋanda ne ŋanda lyonse ku kwesha ukufisha ubu bukombe? Pa mulandu wa mafunde yabili ayo Yesu aebekeshe aya kuti: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse. Ifunde ili likulu kabili lya ntanshi. Ne lya cibili, ilyapala ilyo, ni ili, Uletemwo mubiyo nga we mwine.”—Mateo 22:37-39.

Inte baifwaila abene ipaalo lya kwa Lesa, kabili pa mulandu wa kutemwa kwabo ukwa bena mupalamano babo, bafwaila bene ipaalo limo line. Muli ifyo, ukukonka ica kumwenako ca kwa Yesu, bayumfwa ukukuntwa ku kutemwa kwabula akaso ukutandalila abena mupalamano babo. Bafwaya ukutambika kuli bene nelyo fye ishuko lya mu nshita ilya kwishiba fintu “Lesa wa nsansa” alaya umutundu wa muntu uwa cumfwila pe sonde lyasangululwa.—1 Timote 1:11, NW; 2 Petro 3:13.

Mishonari wa Bwina Kristu Paulo asumine mu malayo ya kwa Lesa na muli ifyo kuti alemba ati: “Paulo, umusha wa kwa Lesa, kabili umutumwa wa kwa Yesu Kristu, umwabele citetekelo ca basalwa ba kwa Lesa, no mwabelo kwishibe Cine icayana na bukapepa, pa kucetekelo mweo wa muyayaya untu Lesa, uushibepa, alaile ilyo shishilabako inshita sha muyayaya.” Ee, Lesa, “uushibepa,” “alaile” ubumi bwa muyayaya kuli abo mu kuicefya abafwaya ukumwishiba no kumubombela.—Tito 1:1, 2; Sefania 2:3.

Bushe Inte Balafola?

Mu nshita mu nshita bamo balitunga ukuti Inte balafola pa butumikishi bwabo. Ubu buli bufi bwafiita fititi! Bakatamika amashiwi ya kwa Paulo ku cilonganino ca mu Korinti aya kuti: “Tatuli nga ’ba cinabwingi, abenshe cebo ca kwa Lesa ku kumwenamo; lelo nga ’ba bufumacumi, nga ’ba kwa Lesa, tulandila muli Kristu ku cinso ca kwa Lesa.”—2 Abena Korinti 2:17.

Intungulushi sha butotelo shimo shishimikilila ukufola, nampo nga kufola pa mapepo ya butotelo nelyo ukusumbula amakampani ya bukwebo pa kubilisha kwabo ukwa pa TV. Amabutotelo ayengi yakwata bashibutotelo abafola.

Mu kupusanako, Inte sha kwa Yehova tabakwata bashibutotelo abafola, kabili ilingi line impapulo shabo isha Baibolo shitambikwa nelyo fye ukwabula ukulipilisha kuli bakafwaya ba cine abafumaluka, nangula ca kuti abengi aba bene balaseshiwa ukucita ukusangwilako kwa kuitemenwa. Iyi misangulo ibomfiwa ku kufimba pa fipooswa fya uyu mulimo wa mu kusaalala kwa calo uwa kushimikila. Mu kumfwana no kufunda kwa kwa Yesu ukwa kuti: “Mwapokele ubupe, peeleni ubupe,” Inte babomfya ubukumu bwabo apa fye, ukusanshako inshita yabo na maka, mu kupeelesha amamilioni ya maawala cila mwaka mu mulimo wa kwa Lesa. Muli ifyo, basambilisha abalesekelela ukufuma ku ŋanda ne ŋanda no kupitila mu masambililo ya Baibolo aya mu ŋanda.—Mateo 10:8; 28:19, 20; Imilimo 20:19, 20.

Ifishinka fishinina ukuti takwabako ukutuninkisha kwa fya ndalama ku Nte sha kwa Yehova ngo muntu umo umo, ku filonganino fya pa mwabo, nelyo kuli Watch Tower Society. Takwaba nangu umo uufola pa mulandu wa kuya ku ŋanda ne ŋanda. Lyene ni shani fintu umulimo wafwilishiwa mu fya ndalama? Ukupitila mu misangulo ya kuitemenwa ukufuma ku bantu batasha ukushinguluke calo conse. Takwaba ukusonkesha indalama ukucitwa.

Amaka ya Kucitilo Bunte Kwabo

Bushe icintubwingi calyumfwa amaka ya butumikishi bwa ku ŋanda ne ŋanda ubwa Nte no bwa mu lyashi? Ubushininkisho bulangisha ukuti ifya kusabankanishishamo amalyashi filasumina nga nshi kuli ubo bwipusho. Inte sha kwa Yehova balilumbulwa mu maprogramu ya pa TV na mafilimu lintu umo alangishiwa alekunkunsha pa ciibi. Utulubi twa muli bamagazini twalilumbula Inte. Ubutumikishi bwabo ubwapimpa bwalishibikwa bwino nga nshi ica kuti abalenga utulubi ukushinguluke calo balisanshamo ukuloshako ku Nte sha kwa Yehova. Ifi kuti pambi fyamoneka ukuba ifya kupumya, lelo ilingi line fyashimpwa pa cishinka ca kutendekelako icisuma—ica kuti Inte baishibikilwa ku kushimikila kwabo ukwa ku ŋanda ne ŋanda ukwa mukoosha.—Imilimo 20:20.

Akalubi kamo aka nomba line kalangishe umwaume alenina ulupili ku kuyabuusha kuli “guru.” Atile: “Sosa kuli ine ulwa fintu fisuma ifili no kwisa!” Ni shani fintu “guru” ayaswike? “Tumone . . . Kuli no kuba ifipoowe, ifikuko, ne finkukuma. Akasuba kakaaluka kakabe mfifi, no mweshi ukabo mulopa.” Uyu uwaile ku kubuusha aipwishe ukuti: “Cinshi cili imbila nsuma?” Kuli ico “guru” ayankwileko ukuti: “Lesa akafuute filamba fyonse . . . ne mfwa tayakabeko nangu ukuloosha nangu kukuuta nangu kucululuka!” Umutandashi aipwishe ukuti: “Mwaishiba shani pa lwa ifi fintu?” Icasuko? “Tapali nangu umo uufyuka ku Nte sha kwa Yehova!” Kabili ico cifwile na kabili e fintu cali ku walengele akalubi umwine!

Icishinka cakatama ica aka kaputusha ka kalubi na tumbi utwapala kene cili ca kuti kalesokolola te mute fye wa butandashi bwa Nte lelo na kabili no kumfwana kwa bukombe bwabo. Mu mashiwi fye ayanono, kalenga apeele ulubali lwa mpikwe ulwa bunte bwabo ubwa ku ŋanda ne ŋanda kabili ayambwile amalembo.—Linganyako Mateo 24:7, 29; Ukusokolola 21:3, 4.

Icishinka ca kuti abantu bafulilako balakaana ubukombe bwabo tacifuupula Inte nelyo ukucefya ukupimpa kwabo. Umutumwa Petro asokele ukuti: “Mu nshiku sha kulekelesha mukesa bakapumya ne fya kupumya fyabo, abendo mwabelo lunkumbwa lwabo lwine, no kutila, Kuli kwi ukulaya kwa kwisa kwakwe? Pantu ukufuma pa bushiku ubo ifikolwe fyaponene mu tulo, ifintu fyonse fyaikalilila filya fyali ukutula pa citendekelo ca kulenga.” Te mulandu ne ci, ukukuntwa no kutemwa, Inte batwalilila ukutandalila abena mupalamano babo kabili bakatwalilila ukucite fyo ukufikila Lesa aleta imicitile ya ndakai iyabola ku mpela.—2 Petro 3:3, 4.

Yesu atile mu nshiku sha kulekelesha, imbila nsuma ili no kubililwa kabela. Ku kubebeta kwalundwapo ukwa mulandu ne mishimikilile, mona ifipande fibili ifikonkelepo.—Marko 13:10.

[Ifikope pe bula 9]

Inte sha kwa Yehova tabakwata ibumba lya bashibutotelo abafola—bonse bene batumikishi ba kuitemenwa