‘Mwiba na Bulanda Filya Baba na Bambi’
BUSHE walimona ifyo iluba limoneka ilyakompama pa numa ya nkuuka iilukusha mabula? Mu nshila imo ciba ca kumoneka ca kukumbamo. Na kuba, cipungufula wa kupumikisha mu kupalishako nalenga inama shishaifulila na bantu—ifyakosa nga nshi ukucila pa maluba ayali yonse—ukuconcomokela ku cubo. Lelo, iluba naliminina palya, ilyalimbe mishila, ukulolenkana ne cifukushi cituntulu ica kwaluka kwa miceele. Nomba, ili epo lili umo lyabela, ilyakompama lelo ilyabulo kukontoka, ukulanga amaka ayapusana ne mimonekele ya liko iyanakanaka. Kuti pambi watwishika, ilyo ulelikumbwa, nga lili no kubwesha amaka ya liko no kusumbwila umutwe wa liko uwayemba mu muulu na kabili.
Caba cimo cine na ku bantu. Muli shino nshita sha macushi, tulalolenkana ne nkuuka sha misango yalekanalekana. Amafya ya mu fya bunonshi, ukupopomenwa, ubutuntulu bwa bumi ubulebotelela, ukulufya uwatemwikwa mu mfwa—ifipuupu fya musango yo filasansa ifwe bonse pa nshita imo nelyo iinankwe, kabili inshita shimo tatwingafisengauka kwati fye ni fintu iluba lishingainukula no kubutukila ku kufisama. Caliba ica kukumbamo ukumona abantu umo umo abamoneka abanakuka nga nshi ukulanga ubukose bwa kupapusha no kushipikisha ukusansa kwa musango yo. Ni shani bacita cene? Ilingi line ulufungulo lwaba citetekelo. Munyina citika uwa kwa Yesu Kristu Yakobo alembele ati: “Mwalishibo kuti lintu icitetekelo cenu catunguluka mu kulolenkana ne fya kwesha fya musango yo, ica kufumamo ciba maka ya kushipikisha.”—Yakobo 1:3, Today’s English Version.
Ulufungulo lumbi lwaba lisubilo. Lintu imfwa yaponena uwatemwikwa, ku ca kumwenako, isubilo kuti lyaletako ukwaluka kukalamba ku bashele. Umutumwa Paulo alembele ku Bena Kristu pa Tesalonika ukuti: “Tatulefwaya imwe ukukanaishibo lwa balaala utwa mfwa; ukuti mwiba na bulanda, filya baba na bambi abashaba [ne subilo, NW].” (1 Abena Tesalonika 4:13) Ilintu Abena Kristu mu cine cine balaba no bulanda pa mulandu wa mfwa, palabapo ubupusano. Balikwata ukwishiba kwalungikwa pa lwa mibele ya bafwa na pa lwe subilo lya kubuuka.—Yohane 5:28, 29; Imilimo 24:15.
Uku kwishiba kubapeela isubilo. Kabili ilyo isubilo, mu kukonkapo, panono panono lilanashako ubulanda bwabo. Lilabaafwa ukushipikisha, no kucishapo. Mu kupita kwa nshita, ukupala iluba pa numa ya nkuuka, kuti pambi bainuna imitwe yabo ukufuma mu bulanda no kusanga ukusekelela no kwikushiwa mu bumi na kabili.