Icitetekelo Cabamo Ubukose ica Bamunyinefwe Abena Rwanda
MU KUBANGILILA kwa 1994 icalo calipapushiwe ilyo amalipoti ya kwipaulula kwa pa cipimo cikalamba yalefuma mu calo ca mu Africa ica Rwanda. Inkondo ya bukatu iya bana calo yali naibuka—akalume ka myanda ya myaka iya lupato lwabipisha.
Ukulolenkana no kubongoloka kwa mupwilapo ukwe funde no muyano, Inte sha kwa Yehova 2,000 no kucilapo isha mu Rwanda shapatikishiwe ukubutuka ku kupususho bumi bwabo. Mupepi na 1,300 basangile icubo mu nkambi sha mbutushi mu Zaire wapalamako na Tanzania, lelo bamo tabali na maka ya kufyuka mu kwangufyanya. Tuli aba bulanda ukucita lipoti ukuti mupepi na 400 aba muli bamunyinefwe ne nkashi—abakalamba na bana banono, bonse kwena abashaba mu mulimo wa fita—baliloba mu lukaakala lwa bucipena. Abena Kristu apapele calo baleloosha ukulufya kwa aba bakasunga ba bumpomfu aba bukose kabili balesansamushiwa mu bulayo bwa Baibolo ubwa kubuuka.—Yohane 11:25.
Ni shani fintu bamunyinefwe abena Rwanda abashele abomi bekala? Baeluda balituminwe ukufuma mu fyalo fyafulilako ku kufwailisha imilandu mu kuimwena na menso. Lipoti umo atile bamunyina abena Rwanda balolenkene ne mibele “mu kuba no bucindami bukalamba no bukose.” Ku ca kumwenako, kumo ukwa kulomba kwa kubalilapo bamunyina bacitile kwali kwa mpapulo sha Baibolo. ‘Balemoneka ukucishapo kwangwa pa lwa kupokelela ica kulya ca ku mupashi ukucila pa kwaafwa kwa fya ku mubili, nangu cingati bali mu kukabila kwacishamo ukwa fintu ifingi,’ e fyasondwelela lipoti. Kabili nangu cingati imibele mu nkambi yaba iyafumfulila, ‘ulubali lwacishapo kubo lwa busaka ni kuntu bamunyinefwe bekala.’
Watch Tower Society yalipayanya indalama ku kushitamo ifya kulya, amalangeti, ifya kufwala, insapato, no muti. Bamunyinefwe mu France balisangwilileko muli bukapekape, kabili ukufika mu kubangilila kwa June, mupepi na matani yabili aya fipe yali nayatumwa kuli bamunyinefwe abena Rwanda abali mu kukabila.
Mu kukanasunguka, iyi mibele yafumamo ubunte bushaiwamina. Aba kutambako balikuntwa ku cishinka ca kuti bamunyinefwe abena Rwanda balipokelele ukwaafwa kwa musango yo no kutungilila ukufuma ku Nte shinabo, kabili caliba icingacitikako ukwakana uku kwaafwa na bambi. Bamo balilandapo ukuti Inte e beka fye mu nkambi abatandalilwapo ne filundwa fya butotelo bwabo!
Imibele ya bulanda iilimo bamunyinefwe abena Rwanda itucinkulako ukuti muli shino “nshiku sha kulekelesha,” abantu bakaba “abankalwe” kabili “aba lukaakala.” (2 Timote 3:1-5; Today’s English Version) Kabili ilintu Yehova talaya abantu bakwe ukucingililwa kwa mu cipesha amano ukufuma ku masanso ya ku mubili, alilaya ukubakilila bumupashi bwabo no kwampana kwabo na wene kabili, mu kati ka kuteka kwa kwa Kristu ukwa Myaka Ikana, ukubuusha abo abaleloba nomba. (Ilumbo 91:1-10) Shi amapepo yesu aya kuti Yehova ekashe no kwafwilisha bamunyinefwe abena Rwanda abashele abomi mu kati ka iyi nshita ya ca kwesha yatwalilile ukupeelwa mu kwimininako bene.—Ilumbo 46:1.