“Nshatala Monapo ica Musango Uyu!”

MU 1993 iofesi lya Watch Tower Society mu Argentina lyalipushiwe ukutuma amakombe ikana limo ku Santiago, Chile, kwi Bungano lya Citungu ilya “Ukusambilisha kwa Bulesa” ilya nshiku shine ilya Nte sha kwa Yehova. Uyu wali e muku wa kubalilapo Inte abena Argentina balaalikwepo ukwenda nge bumba ilikalamba ukuya kwi bungano ku calo cimbi.a Baankwileko shani? Bakalata 8,500 aba kulomba ukuyako balikonkomweke, ukufuma pali abo amakombe 1,039 balisalilwe.

Amabasi 14 yalisonkelwe ku kuya ubu bulendo bwa bakilomita 1,400 ukufuma ku Buenos Aires ukuya ku Santiago. Ulu lwendo lwa maawala 26 lwalengelwe ukufukila ku mimonekele ya mpanga iyawamisha. Ilyo baleciluka impili sha Andes, amakombe bapitile apepi na Aconcagua, uwa mamita 6,960 ulupili lwalepesha kuli ulu lubali lwa Cibulungwa ulwabela ku Masamba. Ico bashakalabe ukucilisha mukunkuluko wasuluka uwa cinshoko ukwingila mu Chile. Banamutekenya balebatotela mu kutwalilila pa kupotolola babasi babo mu kulamuka muli iyi ncende yayafya!

Nangu cibe fyo, ica kutamba cawamisha, casangilwe kwi bungano iline. Mu calo ca kukangana kwa nko no kushombokana kwa mishobo, fintu cali ca kupembesula ukumona ibumba lyasangilweko ilya bantu 80,000 ukufuma ku fyalo 24 icili mu cine cine ni bumunyina bwa pa kati ka nko! Pa kuimwena abene ukwikatana pa kati ka bakubungana, bamo aba banamutekenya balumbulwile ubuseko mu kusambilila ifyafulilako pa lwa Nte sha kwa Yehova. “Nshatala monapo ica musango uyu!” e fyabilikishe umo uwa bene.

[Futunoti]