Ukulamuka—Ica Bupe ca Bukapekape Ukufuma Kuli Lesa
YEHOVA alasekelela mu milimo yakwe. (Ilumbo 104:31) Ukwikushiwa kwashika uko afumya mu ncitilo ya kubumba kwalumbululwa pa Ukutendeka 1:31 ukuti: “Lesa amwene conse ico acitile, kabili, moneni, naciwamisha.”
Yehova tasungilile fye ubu buseko ku mwine eka. Apeele Yesu ishuko lya kuba icibombelo, nelyo icisolobelo, ukupitila muli uyo ifintu fyonse fyabumbilwe. (Yohane 1:3; Abena Kolose 1:16, 17) Pamo nga “kabomba mukalamba,” Yesu na kabili aali “uwa nsansa pa ntanshi ya kwa [Yehova] inshita yonse.”—Amapinda 8:30, 31, NW.
Lelo ukulamuka takwaba fye mu muulu mweka. “Kwaba mu bantunse balekanalekana,” e fyalemba Eugene Raudsepp mu citabo cakwe How Creative Are You? Ici tacaba mankumanya, pantu umuntu apangilwe mu cata ca kwa Lesa. (Ukutendeka 1:26) Muli fyo Yehova alipeela umutundu wa muntu ukulamuka ukwa kwikusha.—Yakobo 1:17.
Kanshi te kuti tupape umulandu Baibolo ilumbilishisha ubusuma bwa kwimba, ukucinda, ukupikula, ukwipika, ubutukushi, no kulamuka kumbi. (Ukufuma 35:25, 26; 1 Samwele 8:13; 18:6, 7; 2 Imilandu 2:13, 14) Besalele, intukushi, abomfeshe ukulamuka kwakwe mu “kwelenganye finjelengwe” ku kwaafwa ukukuula ihema. (Ukufuma 31:3, 4) Kacema Yabali pambi e wabalilepo ukupanga amatenti, ico cilenga abekala ubumi bwa kululumba ukwangukilwa. (Ukutendeka 4:20) Davidi tali fye kemba na kashika wa nyimbo, lelo na kabili aali kapanga wa filimba fipya. (2 Imilandu 7:6; Ilumbo 7:17; Amose 6:5) Miriamu pambi alitungulwile ukucinda kwa kulubuka uko kwasefeshe abena Israele pa kulubulwa mu cipesha amano ukupula muli Bemba Wakashika.—Ukufuma 15:20.
Ukulamuka ilingi line kwaba ukwakatama mu kutwala pa ntanshi ukupepa kwa cine. Yesu mu kulamuka abomfeshe ifilangililo na masambililo yaumfwika ku kupisha ubukombe bwakwe. Abakonshi bakwe mu kupalako bacincishiwa ‘ukucucutikile cebo ne sambilisho.’ (1 Timote 5:17) Ee, ukushimikila kwabo takwaba fye cibelesho. Kwaba mulimo uyo ufwaya inshila sha kusambilishishamo ishabamo kulamuka. (Abena Kolose 4:6) Ici ukucilisha caliba icakatama lintu umo alesambilisha abana bakwe.—Amalango 6:6, 7; Abena Efese 6:4.
Muli fyo, Yehova alakana na bambi ubuseko ubo ukulamuka kwakwe kumuletela. Mwandi bupe bwa bukapekape!