Ulelaalikwa mu Kukaba

Imfwa ya muntu Yesu Kristu ukucila pa myaka 1,900 Iyapitapo yaali ca kucitika cacilishapo ukucindama mu lyashi lya kale ilya buntunse. Yaiswile icilolelo ca kukwata ubumi bwa muyayaya pe sonde lya paradise. Mu kati ka kusefya kwayanguka, Yesu abomfeshe umukate ushatutumuka no mwangashi nge fimpashanya fye lambo lyakwe lya buntunse ilya kutemwa. Lyene aebele abasambi bakwe ukuti: “CIteni ici ku kunjibukisha.” (Luka 22:19) Bushe ukebukisha ici ca kucitika cacindama? Inte sha kwa Yehova balekulaalika mu kukaba ukuilunda kuli bene ukubaka kuno kusefya kwa Cibukisho. Cikaba pa numa ya kuwa kwa kasuba pa bushiku bwalinganako kuli Nisani 14 pali kalenda wa Baibolo uwa kubalika no kwililwa kwa mweshi. Kuti wasangwako pa Ŋanda ya Bufumu iyapalamisha ku mobe. Bebeta ne Nte sha kwa Yehova mu cifulo ca cikaya ulwa nshita yalinga ne cifulo. Ubushiku bwa kusefya mu 1995 bukaba ni pali Cisano, April 14.