Ifipusho Ukufuma ku Babelenga

Mibele nshi ilingile ukulangwa pa lubatisho lwa Bwina Kristu?

Ici cipusho ca kulengo buseko, apantu nelyo ca kuti abengi aba bakabelenga besu kale kale balibatishiwa, nabasanshiwamo, pamo pene fye na abo abalebatishiwa. Lekeni tutale tulande pali abo abalebatishiwa, ukwibishiwa umupwilapo. Bushe imibele yabo ilingile ukuba shani?

Pali Mateo 28:19, 20, Yesu aebele abakonshi bakwe ukuyalenga abantu ukuba abasambi, ukubasambilisha no kubabatisha. Talondolwele ulubatisho nge ca kukumanya ca kulengo kusakatuka, incitilo ituntuka mu kucilimushiwa kwa pa kashita akepi. Lwaba lutampulo lwakatama, nga fintu tumona ukufuma ku ca kumwenako ca kwa Yesu. Luka 3:21 atila: “Yesu abatishiwe, no kupepa alepepa, umuulu waliceneme.” Ee, Ica Kumwenako cesu asendele ulubatisho mu kukatama, mu kubamo ipepo. Te kuti twelenganye wene ukusumbula iminwe ibili ku kulangisha icishibilo ca kucimfya pa numa ya lubatisho, ukwimya amaboko mu muulu, nelyo ukupyeta kwa kucimfya, nangu ca kuti bamo mu nshita sha nomba line balicita ifintu fya musango yo. Iyo, mu kuba fye na Yohane Kabatisha, Yesu apilibukile kuli Wishi mwi pepo.

Nangula ni fyo, Baibolo taitubulula ukuti ulubatisho lufwile ukuba ca kucitika ca cintefwila nelyo icaundalila, ukufwaya imimininine yaibela nelyo amashiwi ya kulanda mu kubwekeshabwekeshapo, nga fintu amacalici yamo mu Kristendomu yafwaya ilelo. Elenganya fye ulwa bushiku bwa Pentekoste, lintu amakana ya baYuda ne nsangu babatishiwe nga Abena Kristu. Kale kale baali nabasambilila Ifunde lya kwa Lesa no kwisa mu kwampana na wene. E co bakabile fye ukwishiba no kupokelela Mesia, Yesu. Pa numa ya kucite co, baali no kubatishiwa.

Pa Imilimo 2:41 paba lipoti wa kuti: “Abapokelele icebo cakwe balibatishiwe.” Ukulembwa kwa Baibolo kuli Weymouth kubelengwa ukuti: “Abo, muli ifyo, mu buseko abapokelele icebo cakwe balibatishiwe.” Basangile ubuseko mu mbila ya kucincimusha pa lwa kwa Mesia, kabili mu kushininkisha ubo buseko bwasempaukile ukufika na ku lubatisho kwine, ulubatisho ulo lwacitilwe pa menso ya myanda ne myanda iya ba kutambako ba nsansa. Nelyo fye ni bamalaika mu muulu baletamba no kusekelela. Ibukisha amashiwi ya kwa Yesu aya kuti: “Ndetila kuli imwe, ni ’fyo fine kubo kusekelela pa cinso ca bamalaika ba kwa Lesa pa mubembu umo uwalapila.”—Luka 15:10.

Kwaliba inshila shalekanalekana isho umo na umo uwa ifwe engabeleseshamo fyonse fibili ukukatama no buseko bwa lubatisho. Mu macalici yamo abo abalebatishiwa bafwala imingila yabuuta atemwa iyafiita. Takwaba ukutungililwa kwa mu Malembo ukwa cifwaikwa ca musango yo. Nalyo line, ifya kufwala ifipi nelyo ifya lubeebeelu te kuti fibe ifyalinga nakalya, ku baume nelyo ku banakashi. Kabili nga fintu cilandilwepo, ilyo alefuma mu menshi, Umwina Kristu mupya talingile ukucita ukulangisha kwa maboko ukwaibela nelyo ukucishamo ukucincimuka kwati nacimfya ukucimfya kukalamba. Aba bwananyina bwa Bwina Kristu balaba aba nsansa ukuti umupya nabatishiwa. Alingile ukwiluka ukuti uku kulangisha kwa citetekelo kwaba fye lutampulo lwa mu kubangilila ulwa nshila yalepa iya bumpomfu ku kunonka ukusuminisha kwa kwa Lesa.—Mateo 16:24.

Ifwe, fwe batambako ulubatisho lwa pa cintubwingi, tulaakana mu buseko bwa aka kashita, maka maka nga ca kuti ni lupwa nelyo umuntu umo twasambilile Baibolo na wene e ulebatishiwa. Ku kwakanamo mu kukumanina, nangu cibe fyo, tulekabila ukukutika ku lyashi lyonse capamo na baleya ku lubatisho, ukumfwa bene ukwasuka apabuuta ifipusho, no kuilundako mwi pepo. Ukucite fyo kukatwaafwa ukusungilila ulubatisho lwine mu cilolwa; tukakwata imimwene ya kwa Lesa iya lwene. Pa numa ya lubatisho, ubuseko bwesu tabufwaya ukuti tupange umulongo wa kucimfya, icipo ca maluba, nelyo umutebeto mu kucindika uubatishiwe. Lelo kuti twabinga munyinefwe mupya nelyo nkashi ku kulumbulula ubuseko pa lutampulo lwawamisha ulo abuulile no kumusengela mu cikabilila muli bumunyina bwesu ubwa Bwina Kristu.

Mu kusupawila, lyene, ifwe bonse, ukusanshako abo abaleibishiwa mu menshi, tulingile ukumona ulubatisho ngo lwakatama nga nshi. Tayaba ni nshita ya ciwowo, iya mutebeto, nelyo ukwaula kwacishamo. Lelo kabili tayaba ni nshita ya cintefwila nelyo iyaundalila. Kuti twaba aba nsansa mu kulungika ukuti abapya nabailunda kuli ifwe pa nshila ya ku bumi bwa muyayaya. Kabili mu buseko kuti twasengela bamunyinefwe bapya ne nkashi.

[Icikope pe bula 31]