“Mulimo wa kwa Yehova”

Uyo wali e mutwe wa cipande cimo muli El Norte, inyunshipepala ya ku Monterrey City, Mexico. Icipande calelanda pa lwa Ciyanda ca Kulonganinamo icipya ica Nte sha kwa Yehova.

Monterrey musumba uwakwata abantu 2,300,000 (ukusanshako na makomboni ya mu mbali) ku ciputulwa ca ku kapinda ka ku kuso aka Mexico, kabili wakwata bakasabankanya ba Bufumu 19,200. Mupepi no mwaka umo na hafu, Inte bauminkene capamo ku kukuula Iciyanda ca Kulonganinamo icayemba kabili ica muno nshiku mu kuba ne fipuna fishaiwamina 3,000 ne fya kutalalika umwela. Inte sha cikaya shalisekelele lintu icilundwa ce Bumba Litungulula ilya Nte sha kwa Yehova apeele ilyashi lya kupeela. Programu asanshishemo ubulondoloshi ubwipi pa fyo umulimo watendeke mu Monterrey, kabili kwaliko ukulanshanya kwa kwipusha abo abaakenemo mu bukuule. Lyene abasangilwe kuli uku kulongana abaali 4,500 baipakishe ilyashi lya kupeela.

Ici ciyanda e calenga butatu pa Fiyanda fya Kulonganinamo ifyakuulilwe nomba line mu Mexico mu nshila yalondololwa nga kampeni wa “Amayanda ya Bufumu ne Fiyanda fya Kulonganinamo Ifyafulilako, Ifikalamba, Kabili Ifyawaminako.”

Mu kuba na bakasabankanya abacila pali 443,000 mu Mexico, na basangilwe ku Cibukisho mu 1995 abaali 1,492,500, Ifiyanda fya Kulonganinamo ifipya, pamo nga cilya ica mu Monterrey, mu kushininkisha fikabomba imifwaile ya bulesa.