Ni Kwi Bafumya Amaka?

NGA walolekesha icipelebesha cili pali ici cikope, walamone fyo ipindo limo pa mapindo ya ciko yane talikwete ncito nangu panono. Lelo, ici cipelebesha cilatwalilila ukulya no kupupuka. Uyu te mulandu waibela. Ifipelebesha filamonwa filesabantasabanta na mapindo ayasusauka ukufika ku maperesenti 70.

Mu kupalako, abantu abengi balangisha umupashi wa mupampamina. Te mulandu no kucula ku bulwele bwatapata nelyo ubwafya bwa mu nkuntu, tabanenuka.—Linganyako 2 Abena Korinti 4:16.

Umutumwa Paulo pa lwakwe ashipikishe amafya yakulisha mu nyendo shakwe isha bumishonari. Alifopawilwe, ukupumwa, ukupoolwa amabwe, no kupooswa mu cifungo. Mu kulundapo, aleculako ku bulwele bumo, napamo ubwafya bwa kukanamwensekesha kwa menso, ubwali lyonse “muunga mu mubili” kuli wene.—2 Abena Korinti 12:7-9; Abena Galatia 4:15.

Eluda wa Bwina Kristu uwe shina lya David, uwalwishenye no kupopomenwa pa myaka yafulilako, acetekelo kuti ubukose bwa kwa Yehova e bwabombele sana mu kumupuupuutula. “Inshita ishingi, nga nabako eyefilya pa numa ya kushomboka nalemoneka ukubwelela mu kupopomenwa,” e fintu alondolola. “Pa kulolenkana no kufuupulwa kwa musango yo, naleifubula fye pali Yehova, kabili mu cine cine alintungilile. Kwalebako inshita lintu nalepepa pa maawala ayengi. Nga nalanda na Yehova, ukuyumfwa kwa kutalalilwa no kuba icanangwa kwaleya. Nalishomboka ukupita mu nshita sha bunake bukalamba, lelo pa mulandu wa kwa Yehova, muli ubu bwine bunake e mwafuma ubukose—ukusanshako fye no bukose bwa kwaafwa bambi.”

Yehova Lesa alikoseshe Paulo. Muli fyo kuti atila: “Ilyo nanaka, e lyo naba na maka.” (2 Abena Korinti 12:10) Ee, ubunake bwa kwa Paulo bwamusambilishe ukushintilila pa bukose bupeela Lesa. “Ndi na maka aya kucite fintu fyonse mu ulenkoselesha,” e fyasosele uyu mutumwa. (Abena Filipi 4:13) Yehova mu cine cine alapeela ababomfi bakwe amaka.