Ilyashi lya Bakabilisha ba Bufumu

Ukufika pa Bantu ba Misango Yonse ne Cine

UMUTUMWA Paulo aali kabilisha wapimpa uwa Bufumu bwa kwa Lesa. Tasuminishe ukukaanya ukucilikila ukutumwa kwakwe ukwa kushimikila “imbila nsuma.” (1 Abena Korinti 9:16; Imilimo 13:50-52) Paulo acincishe bambi ukukonka ica kumwenako cakwe.—1 Abena Korinti 11:1.

Inte sha kwa Yehova shaishibikwa mpanga yonse ku mupampamina wa shiko uwa kushimikila. Ca cine, balanda kuli bambi mu “nshita iiyene” ne “nshita iishiyene” ku kufikilisha umulimo wabo wabishiwa na Lesa uwa ‘kupanga abasambi.’ (2 Timote 4:2; Mateo 28:19, 20) Nangu fye ni mu fyalo umo bakumanya ukukaanya, aba mitima ya bufumacumi balefikwapo no bukombe bwacindama ubwa Bufumu bwa kwa Lesa, nga fintu ifya kukumanya fikonkelepo filelangilila.

◻ Pa cishi ca mu Pacific wa ku masamba, uko umulimo wa Nte sha kwa Yehova wabindwa, kalume wa myaka ya bukulu 12 ashingulwikwe fye na ba kubishanya na bo ababipa pa sukulu. Abo alesambilila na bo abengi balepeepa fwaka lyonse, balebelenga ifitabo filangisha ifikope fya bwamba, balesaalula bakafundisha, no kwimyo lubuli. Imibele yalibipishe ica kuti kalume aipwishe wishi nga engaselela kwi sukulu limbi. Wishi, nangu cibe fyo, apelulwile no mwana wakwe ukukanasuminishanya ne tontonkanyo lya musango uyo, pantu ayumfwile ifyo imibele ya bana be sukulu taingapusanako na mu masukulu yambi ayaali mupepi. Lelo, ni shani fintu aali no kwaafwa umwana wakwe?

Wishi aibukishe ukuti alikwete icitabo ca bacaice mu ŋanda. Caali bupe ukufuma kuli lupwa uwali umo uwa Nte sha kwa Yehova. Kanshi afwailishe ici citabo, kabili lintu acisangile, acipeele ku mwana wakwe. Caali no mutwe waleti: Ifipusho Abacaice Bepusha—Ifyasuko Fibomba.a Kalume asangile maka maka icipandwa “Ni Shani Ningabomba no Kutitikisha kwa Banandi?” ukube ca kwaafwa nga nshi. Tacamusambilishe fye ubucindami bwa kusungilila umucinshi lelo camusambilishe na kabili ukukaana mu mucenjelo lintu bambi bengesha ukumutitikisha ukukonkelela inshila yabula amano. Pa kubomfye fishinte fya mu Malembo ifisangwa mu citabo, uyu mulumendo asambilile ifya kubomba bwino no kutitikisha kwalefuma ku banankwe.

Pa kumona uku kuteuluka e lyo no kwaluka kumbi ukusuma mu mwana wakwe, wishi apingwilepo ukubelenga ici citabo. Pa kwebekeshiwa no kupanda amano kubomba ukusangwa muli ici citabo, wishi alombele Inte sha kwa Yehova ukulasambilila nankwe isambililo lya Baibolo ilya mu ŋanda. Pa numa, aba mu lupwa lwakwe na bambi bailundile kuli wene mwi sambililo. Cinshi cafuminemo? Uyu kalume, umwaice wakwe, wishi, na bawishikulu babili nomba bali ni Nte sha kwa Yehova.

◻ Mu calo cimo cine, babili aba Nte sha kwa Yehova babiikilwe mu cifungo pa mulandu wa cumfwila cabo icashangila ku fishinte fya Baibolo. Nangu cibe fyo, tabalekele imibele yabo ukubacilikilo kulanda mu kushipa pa lwa Bufumu bwa kwa Lesa. Batununwike mushika wa cifungo no kupoka insambu sha kusefya Umulalilo wa kwa Shikulu mulya. Fintu baali aba nsansa lintu abafungwa 14 basekelele muli Baibolo no kuilunda ku Nte kuli ici ca kucitika cacindama! Ukukonka pa kukakulwa kwabo, bamo aba bene batwalilile ukusambilila Baibolo no kubishanya ne Nte sha kwa Yehova.

Mu fyalo ukucila pali 25, Inte sha kwa Yehova balacuula pa mulandu wa fibindo nelyo imisango yalekanalekana iya kukaanya nelyo ukupakasa. Ukupala abatumwa, nangu cibe fyo, balatwalilila “[ukwabulo kuleka, NW] ukusambilisha no kubila mwi tempele na ku myabo ukuti Yesu e Kristu.”—Imilimo 5:42.

[Futunoti]