Ifya Kusungilila Ukusekelela mu Mulimo wa Nshita Yonse

UKUFIKILISHIWA kwa busesemo bwa Baibolo kulelanga mu kulengama ukuti tuleikala mu nshiku sha kulekelesha isha ino micitile yabula bukapepa. Apo ababomfi ba kwa Yehova Lesa baliibukila ulwa ici, balapoosako inshita iikalamba ukufika pantu bengapesha mu kwananya imbila nsuma ya Bufumu bwakwe. Inte sha kwa Yehova ukucila pali 600,000 balitantika imibombele yabo mu bumi mu nshila ya kuti balebombako umulimo wa nshita yonse. Bamo aba bene ni bakabilisha ba nshita yonse aba Bufumu abetwa bapainiya. Bambi babomfi ba kuitemenwa aba pa Bethel pa amaofesi yakalamba aya Watch Tower Society nelyo amaofesi ya iko ayanono. Bambi na bo ni bamishonari na bakangalila benda.

Baibolo ilangililo kuti mu nshiku sha kulekelesha, kuli no kuba “inshita ishayafya.” (2 Timote 3:1-5) Icipande ca muli Baibolo wa ciGriki cibomfya inumbwilo iyo ingapilibula “inshita shasontwa ishinkalwe.” E ico, takuli nangu umo uulingile ukwenekela ubumi bwabulamo amafya mu kasuba kesu. Ku batumikishi bamo aba Bwina Kristu, amafya kuti pambi yamoneka ayakalamba nga nshi ica kuti pambi balaipusha abene ukuti, ‘Bushe kuti natwalilila mu mulimo wa nshita yonse, nelyo bushe mfwile ukuleka?’

Mibele nshi iingalenga umo ukufwayo kulapimununa umulimo wakwe nga painiya, uwa kuitemenwa uubomba pa Bethel, kangalila wenda nelyo mishonari? Kuti nakalimo caba bwafya bwakakala ubwa kulwalilila. Nakalimo lupwa umo umukalamba nelyo uwanakuka alekabila ukusakamanwa lyonse. Kuti pambi caba ukuti abaupana baletendeka ukukwata abana. Uuli onse uuleleka umulimo wa nshita yonse pa milandu ya musango yo na pa mulandu wa kukakililwako kwa mu Malembo talekabila ukuyumfwa uwa nsoni pa kuleko mulimo.

Nangu cibe fyo, ni shani nga ca kuti umo alepanga ukuleka umulimo wa nshita yonse pa mulandu wa kukanakwato kusekelela? Nalimo painiya alemona ukuti ukwankulako mu butumikishi bwakwe kuli ukunono kabili aleipusho kuti, ‘Mulandu nshi ndetwalilila mu mibele ya bumi iya kuipusula ilyo abalekutikako bali fye abanono?’ Nakalimo uwa kuitemenwa uubombela pa Bethel taasekelela sana no mulimo aapeelwa. Kuti napamo caba bumi bwa kulwalilila, ilintu kwena tabulelesha umulimo wa bupainiya, bwasuka bwasendelo muntu insansa. Ni shani fintu abantu ba musango yo bengasungilila ukusekelela kwabo? Natulanguluke fintu abatumikishi bamo abakokole basosa.

Ukwansha Ukufulunganishiwa

Anny, umwina Switzerland, asangilwe ku Isukulu lya Baibolo Ilya Gileadi Ilya Watchtower mu 1950. Aalesubila sana ukupeelwa umulimo wa bumishonari ku fyalo fimbi. Lintu atuminwe ukulabombela pa Bethel mu Bulaya, Anny alifulunganishiwe. Nangu ni fyo, alipokelele umulimo untu apeelwe mu Dipartimenti wa Bakapilibula kabili e mulimo untu acili alebomba. Ni shani fintu acimfishe ukufulunganishiwa kwakwe? Anny alondolola ati: “Kwali ifya kucita ifingi kabili na nomba ficiliko. Ukuyumfwa kwandi ne fyo natemwa tafyabe fyacindama ukucila pa mulimo.”

Nga ca kuti twafulunganishiwa no mulimo twapeelwa, kuti cawama twayumfwa nga Anny. Ifyo twingatemwa te fili ifyacindamisha. Icacindama sana ca kuti ifishingamo fyonse ifyalekanalekana ifyayampana ku kusalanganya ubukombe bwa Bufumu filebombwa bwino. Amapinda 14:23 yatwebo kuti “mu kucucutika konse mwaba akantu.” Te mulandu no mulimo untu twapeelwa, ukuubomba mu busumino kulasangwila ku kupwilikisha umulimo wa Bufumu. Kabili kuti mwafumo kwikushiwa kukalamba—ee, kuti mwafumo kusekelela—mu mulimo wapeelwa na Lesa uwa musango yo.—Linganyeniko 1 Abena Korinti 12:18, 27, 28.

Ukumfwana na Bambi

Umulimo wa nshita yonse ubimbamo ukupalamana na bantu ba misango misango—e kuti mu butumikishi bwa mwi bala, pa Bethel, mu ng’anda ya bamishonari, nelyo pa kutandalila ifilonganino fyalekanalekana pamo nga kangalila wenda. E ico, ukusekelela kushintilila sana pa kumfwana bwino na bambi. Nangu cibe fyo, ‘inshita ishinkalwe’ ishasobelwe ukubako muli shino nshiku sha kulekelesha shilelenga ukumfwana na bambi ukwafya apakalamba. Ni shani fintu umutumikishi engasengauka ukulufyo kusekelela, nangu ni lintu umo amukalifya? Nakalimo kuti twasambililako cimo kuli Wilhelm.

Wilhelm asangwike icilundwa ca lupwa lwa Bethel mu Bulaya mu 1947. Pa numa, apoosele inshita mu mulimo wa bupainiya no kubomba nga kangalila wenda. Wilhelm alondolola ati: “Ine no mukashi wandi nga twamona ifintu ifyo tuletontonkanyo kuti tafilungeme nelyo ifiletusakamika pa lwesu, tuleba Yehova fintu tuleyumfwa no kushiila wene ukuti e o apikulule.”—Ilumbo 37:5.

Nakalimo imwe bene mwalicushiwapo ku Mwina Kristu munenu uwalandile kuli imwe mu musaalula nelyo mu kususwa. Ibukisheni ukuti ifwe bonse tulaipununa apengi mu misosele. (Yakobo 3:2) E co mulandu nshi mushingabomfesha imibele ya musango yo ukupalamina ku “umfwo kupepa”? (Ilumbo 65:2) Landeni kuli Yehova pa lwa uyo mulandu, no kuushila mu maboko yakwe. Nga Lesa alefwaya ukwalule fintu, akafyalula. Abo abekala mu ng’anda ya bamishonari kuti bakabila ukulaibukishe ci nga kwabako ubwafya bwa musango yu, pantu e cikabaafwa ukusungilila ukusekelela kwabo mu mulimo wa kwa Yehova.

Nga Mulalwalilila

Banono abenda fye ukwabulo kulwalapo. Nangu fye ni abo abengaba mu myaka ya pa kati kuti bapopomenwa nelyo ukulwala. Ukulwalilila kulafwaya bamo ukuti baleke umulimo wa nshita yonse, lelo pa numa balabomba bwino sana pamo nga bakasabankanya ba Bufumu. Bambi, nangu cibe fyo, balaba na maka ya kutwalilila mu mulimo wa nshita yonse ukukanasakamana no kulwalilila. Ku ca kumwenako, langulukeni Hartmut na Gislind.

Hartmut na Gislind bantu baupana abaapoosa imyaka 30 muli bupainiya, bumishonari, na mu mulimo wa kwenda. Bonse babili balipita mu kulwala kwabipisha uko pa nshita imo kwalebasha abapomponteka ku mubili na mu nkuntu. Nangu ni fyo, balabomba bwino sana kabili balaba na maka ya kukoseleshako bambi abakumanya ifya kwesha fyapalako. Kupanda amano nshi kuntu bapeela? “Lolesheni ku ntanshi te ku numa. Bomfyeni bwino imibele iili yonse mulimo. Ubushiku bumo na bumo kuti pambi bwaleta fye ishuko limo ilya kulumbanya Yehova. Bomfyeni ilyo ishuko lya mu nshita, kabili ipakisheni.”

Langulukeni imibele ya kwa Hannelore. Aalilwalilila mu myaka 30 iyo aaba painiya, mishonari, mu mulimo wa kwenda pamo no mulume wakwe, na mu mulimo wa pa Bethel. Hannelore atila: “Ntontomesha pa fikansa fyaimishe Satana—ukuti abantu babombela Yehova lyeka fye lintu ukumubombela kwabangukila. Pa kushipikishe fya kwesha, na ine kuti nashininako Satana ukuti aaliluba.” Ico kuti caba ca kukunta ica maka. Ibukisheni ukuti bucishinka bwa pa lwenu kuli Yehova lintu muleeshiwa bwalicindama nga nshi kuli wene.—Yobo 1:8-12; Amapinda 27:11.

Lintu muleesha ukupingulapo mu kushikatala pa bumi bwenu, langulukeni pa fintu fibili ifyaba mu busesemo bwa kwa Yesu Kristu pa lwa kusondwelela kwa micitile ya fintu. Yesu asobele ifikuko mumo mumo. Na kabili atile: “Imbila nsuma iyi ya bufumu ikabilwa ku fyalo fyonse.” (Mateo 24:3, 14; Luka 21:11) Yesu alishibe ukuti mu nshiku sha kulekelesha, abakonshi bakwe baali no kulashomboka na malwele. Lelo aalishibe ukuti umulimo wa kushimikila wali no kubombwa te kuli abo baipakisha ubumi ubusuma beka lelo na bo abalwala icabipisha. Nga twatwalilila mu mulimo wa nshita yonse te mulandu no kulwalilila, Yehova takalabe ukutemwa tulanga kwi shina lyakwe.—AbaHebere 6:10.

Ukusungilila Ukusekelela Te Mulandu no Kukanayangwako kwa Cintubwingi

Ifyo abantu bankula ku mulimo wa kushimikila kuti cayambukila imibele yesu iya mutima. Umutumikishi umo umukokole atile: “Nangu fye ni bapainiya cilabakosela ukutendeka ukulanshanya na mwine ng’anda.” “Ifwe bonse tulakabila ukulwisha pa kuti tusungilile ukusekelela.” Ee, ukukanayangwako kwa cintubwingi kuti kwabotelesha ukusekelela kwesu mu mulimo wa mwi bala. E co ni shani fintu painiya uyo akumanya lyonse abantu abashipoosako mano engasungilila ukusekelela? Abatumikishi abakokole balatubululako inshila ishili pano isho baeshapo kabili shalibomba bwino.

Ukukanayangwako kwaba bwafya, lelo takulekabila ukutucimfya. Ukukanapoosako amano ukwa bantu ukuli ukwayanana, mu kwine fye kweka tauli mulandu wa kulekelapo umulimo wa nshita yonse. Kuti twasungilila ukusekelela kwesu ilyo tulekumanya ukukanayangwako nga twapaatulako inshita ya kusambilila Amalembo mu mukoosha. Amalembo ‘yalatuteyanishisha ku kubombo mulimo onse uusuma,’ kabili ico cisanshamo ukulanda kuli abo bashifwaya kukutikako ku mbila nsuma. (2 Timote 3:16, 17) Nangu cingatila abantu tabafwaile ukukutika kuli kasesema Yeremia, ico tacamulengele ukuleka. (Yeremia 7:27) Lintu tulesambilila Baibolo mu kuba no kwaafwa kwa mpapulo sha Bwina Kristu, kuti twanonkelamo apakalamba nga tulemwensekesha amatontonkanyo ayakoshe citetekelo cesu no kutwaafwa ukubomba na bantu abashangwako.

Nga twasumino kuti ukukanayangwako bwaba bwafya, natulanguluke ifyo tuyumfwa ukulola kuli abo tushimikilako. Mulandu nshi bashipooselako amano? Umulandu umo uo ukukanayangwako kwasalanganina mpanga yonse mu Bulaya, ku ca kumwenako, ni co fintu ukupepa kwa bufi kwacita fya makankamike. Abantu tabayumfwa na kabili ukuti imipepele ifwile ukwambukila ubumi bwabo, kabili tabafwaya fye no kulabishanya na yene. Tulakabila ukuteuluka, ukulanda ku bantu pa lwa milandu iibakuma, pamo nga ubulofwa, ubutuntulu bwa bumi, bumpulamafunde, ukukanatekelesha imfundo sha bantu bambi, ifyatushinguluka, ne cintiinya ca nkondo.

Mu mashiwi yesu aya kutendekelako ukulanda kuli mwine ng’anda, kuti pambi twalumbulapo icintu cimo icikumine ubwikashi. E fyo Dietmar aeseshe ukucita lintu aaleshimikila mu mushi muntu ashaletunguluka mu mibombele. Umwikashi umo alandile ukuti mu mushi mwaliponene ubusanso ubushiku bwafumineko. Nomba pa mwinshi onse apo Dietmar alefika, mu kufumaluka aalelanga icililishi pali ubo busanso. Atila: “Mu kupumikisha, abantu balitendeke ukulalanshanya na ine. Bulya busanso e bo abantu bonse baletontonkanyapo. Nalilanshenye bwino nga nshi na bantu abengi ubo bushiku pa mulandu wa kuti nalangishe ukuti ninsekelela mu myeo yabo.”

Tulekabila ukushimikila abantu ulwa Bufumu ukuli konse twabasanga. Mu bunte bwa mu lyashi kuti mwafume fisabo, kabili kuti twaikansha fwe bene muli iyi mibombele pa kubomfya imitubululo iipeelwa mu mpapulo shashimpwa pali Baibolo. Kuti mwafumo kusekelela mu mashiwi yanono aya bucibusa nelyo mu kushalika bamagazini ba Ulupungu lwa kwa Kalinda na Loleni! ku mwine ng’anda. Nga twalibwelelako kabili twalitendeka ukutungulula isambililo lya Baibolo no ulesekelela, kuti pambi twafwaya ukumutumikisha pa kwipusho kuti: “Bushe namwishibako abali bonse bambi abengafwaya ukusambilila Baibolo?” Ici kuti catungulula ku kwimika isambililo lya Baibolo ilya mu ŋanda na limbi. Nangu ni fyo natulekosapo, ukushintilila pali Yehova mwi pepo, ukukanaleka ukukanayangwako kwa bantu ukutufuupula.

Ukukoselesha Ukufuma Kuli Bambi

Jürgen na Christiane balibomba bupainiya kabili baliba mu mulimo wa kwenda ukucila pa myaka 30. Inshita imo bapeelwe umulimo uwalebimbamo ukushimikila mu ncende muntu abantu abengi bashaleangwako no kumoneka abatalama. Fintu Jürgen no mukashi wakwe balefwaisha ukubakoselesha! Pa mulandu uushaishibikwa, nangu ni fyo, bambi mu cilonganino tababakoseleshe.

E co ukufuma ku co apitilemo Jürgen alishibo kuti “bapainiya bamo balapita mu bwafya. Bakabila ukukoseleshiwa ukwingi ukufuma kuli baeluda na bakasabankanya bambi.” Lesa aebele Mose ukuti akoseleshe Yoshua no kumulenga ukutalila. (Amalango 3:26-28) Kabili Abena Kristu balingile ukuba abakoseleshanya. (Abena Roma 1:11, 12) Bakasabankanya ba Bufumu kuti bakoselesha aba mu mulimo wa nshita yonse mu mashiwi ya kukuulilila no kulabashindika mu butumikishi mu nshita mu nshita.

Ukusekelela Muli Yehova—Amaka Yesu

Abena Kristu abaikala ubumi bwabo pamo nga bapainiya nelyo nga bamishonari, ukubombela pa Bethel, nelyo ukulatandalila ifilonganino mu mulimo wa kwenda balisango kuti amafya ayengi tayakokola, lelo yamo yalatwalilila. Nangu fye amafya ayanono ayamoneka ukukanapwa tayalingile ukutupoka ukusekelela. Ramon, uwabomba mu mulimo wa ku fyalo fimbi ukucila pa myaka 45, atubulula ukuti ilyo lyonse amafya yatuletelo bulanda, “tulingile ukutontonkanya pa lwa mapaalo ubwingi yantu twakwata e lyo na pa makana ya bantu bambi abacushiwa ukucilapo.” Mu cine cine, abasumina banensu mwi sonde lyonse balepita mu fya kucula, kabili Yehova mu cine cine alatusakamana ifwe bonse.—1 Petro 5:6-9.

E co, kanshi, nga imibele ya pa lwesu yatusuminisha ukubombako umulimo wa nshita yonse no kutwalilila muli wene, natusungilile ukusekelela kwesu no kushintilila pali Shifwe wa ku muulu. Alakosha ababomfi bakwe, kabili ifwe bonse tulingile ukwibukisho kuti ‘ukusekelela muli Yehova e maka yesu.’—Nehemia 8:10.

[Icikope pe bula 21]

“Ukuyumfwa kwandi ne fyo natemwa tafyabe fyacindama ukucila pa mulimo”

[Icikope pe bula 22]

“Tuleba Yehova fintu tuleyumfwa no kushiila wene”

[Ifikope pe bula 23]

“Bomfyeni bwino imibele iili yonse mulimo. Ubushiku bumo na bumo kuti pambi bwaleta fye ishuko limo ilya kulumbanya Yehova”

[Icikope pe bula 23]

“Pa kushipikishe fya kwesha, na ine kuti nashininako Satana ukuti aaliluba”

[Ifikope pe bula 24]

“Bapainiya bamo balapita mu bwafya. Bakabila ukukoseleshiwa ukwingi ukufuma kuli baeluda na bakasabankanya bambi”

[Icikope pe bula 24]

“Tulingile ukutontonkanya pa lwa mapaalo ubwingi yantu twakwata”