Bushe Lesa Akonaule Calo?

UKULINGANA na Papa John Paul II, abantunse kuti balolesha ku ntanshi mu kuba no kucetekela. Uku konse twafuma, “abantunse balitwalilila ukubembuka, nalimo ukucila fye na bantu ba pa ntanshi ya lyeshi.” Nalyo line, papa alondolwele ukuti, “mu mashiwi ya cipingo Lesa apangile na Noa kuti twamona nomba ifyo takwaba ulubembu ulwingalenga Lesa ukonaule calo cintu apangile.”

Bushe cine cine Lesa takatale onaule calo? Baibolo ilondolole fyo Lesa aebele Noa pa numa ya Lyeshi ukuti: “Takwakafitwe kabili ifya mubili fyonse ku menshi ya lyeshi, kabili takwakabe kabili ilyeshi ku konaule sonde.” (Ukutendeka 9:11) Papa asose fyo muli aya mashiwi, Lesa “abikilepo umulapo wa kukanaonaule [sonde].”

Baibolo ilondolola mu kumfwika ukuti Kabumba takaleke planeti wesu ukonaulwa. “[Isonde lyaiminina, NW] umuyayaya,” e fintu Baibolo isosa. (Lukala Milandu 1:4) Lelo fingi twingasambililako kwi Lyeshi—ifyo papa ashalandilepo.

Yesu asosele ukuti imibele pe sonde pa nshita ya kubapo kwakwe ukwa ku ntanshi yali no kuba nge “fyo inshiku sha kwa Noa shali,” ilyo abantu “tabaishibe lyasukile ilyeshi lyaisa no kusenda bonse.” (Mateo 24:37-39) Mu kupalako, umutumwa Petro alembele ukuti filya fine “pano isonde apalipo lilya, pa kuponenwe lyeshi, palyonaike,” e fyo no “bushiku bwa kusekwa kabili bwa boni bwa bantu abashipepa” busungamine calo ca lelo.—2 Petro 3:5-7.

Bushe Yesu na Petro balilabileko pa lwa cipingo Lesa apangile na Noa? Nakalya! Nge fyo alandile mu cipingo na Noa, Lesa takabomfye ilyeshi ukonawilako ino micitile ya fintu iyabipa. Mu cifulo ca ico, akabomfya amaka ya “Mfumu ya Shamfumu kabili Shikulu wa Bashikulu”, Yesu Kristu. (Ukusokolola 19:11-21) Kanshi, ukulingana na Baibolo, isonde talyakonaulwe, lelo “icalo” icapangwa na bantunse babipa ukwabulo kutwishika cikonaulwa. (Amapinda 2:21, 22; Ukusokolola 11:18) Pa numa, “abalungama bakapyaninine [sonde, NW], no kwikalamo inshiku pe.”—Ilumbo 37:29.