Ilyashi Lya Bakabilisha Ba Bufumu

Ishina lya kwa Lesa Lyafumishiwapo Umuseebanya

ICEBO ca kwa Lesa, Baibolo, citila: “Mwende bwino mu Bena fyalo; ukuti, umo bamupontelela kwati muli ncitatubi, bacindike Lesa mu bushiku bwa cipempu pa kuloleshe milimo yenu isuma.” (1 Petro 2:12) E co, Abena Kristu ba cine balatukuta ukuba ne myendele isuma pa kuti beleta museebanya pe shina lya kwa Yehova.

Mwi boma limo ilya mu Zambia ilyabela mu mpanga sana ilyo beta ati Senanga, emo kafundisha wa pa sukulu bamwibile icilimba pa ng’anda pa mwakwe. Apo Inte sha kwa Yehova shalishimikile kuli ilya ncende, uyu mwaume atile e baibile icilimba cakwe. Ailefisha uyu mulandu ku kapokola, ukutunga ba Nte ukuti e bamwibile icilimba. Pa kupeela ubushininkisho bwa kuti ba Nte baliilepo pa mwakwe, alangishe ka trakiti asangile pa nshi mu ng’anda yakwe. Lelo, bakapokola tabacetekele ubulondoloshi bwakwe. Bamwebele ukubwelela ku ng’anda no kuyafwailisha bwino.

Ba Nte ababombele muli cilya citente kafundisha ekalamo pali bulya bushiku bakoseleshiwe kuli baeluda ukuyalanshanya na ulya kafundisha pali uyu mutunganya. Bamunyina bamo balileko no kulanda na o, ukumulondolwela ukuti balefwaya ukufumya umuseebanya pe shina lya kwa Yehova. Ilyo balelanshanya, baebele kafundisha ukuti basangile umulumendo pa ng’anda pa mwakwe kabili eo bashilile trakiti. Ukulingana ne fyo balondolwele ifyo ulya mulumendo basangile pa ng’anda alemoneka, kafundisha asukile amwishiba. Na kuba, balepepa na kafundisha wine uyu ku calici cimo cine. Kafundisha aipwishe umulumendo ulwa cilimba, lelo akaninine fye ndai. Lyene kafundisha alanshenye uyu mulandu na bafyashi ba mulumendo no kubwelelamo ku mwakwe. Tapapitile ne awala limo, banyina ba ulya mulumendo babweseshe icilimba caibilwe.

Pa kumona ukuti nasekwa, kafundisha ailemona baeluda no kulombo bwelelo pa kubabepesha. Baeluda balimwelele lelo bamwebele ukuti ebeko icinabwingi ukwishiba icacitike pa kutila beshibe ukuti Inte shali isha kaele. Balibilishe pa sukulu ukuti Inte bashibepeshe fye, kabili ici cafumishepo umuseebanya pe shina lya kwa Yehova. Inte sha kwa Yehova baletwalilila ukubilisha muli ilya ncende ukwabula no wa kubasonta iminwe.

[Mapu ne Cikope pe bula 19]

(Nga mulefwaya ukumona mapu, moneni muli magazini)

AFRIKA

Zambia

[Abatusuminishe]

Mountain High Maps® Copyright © 1997 Digital Wisdom, Inc.