“Ubushiku bwa Maipepele”

APO umukalamba we sukulu limo mu Poland alitemenwe nga nshi ifyo alanshenye ne Nte sha kwa Yehova, atile kube “Ubushiku bwa Maipepele” pe sukulu aleangalila. Atubulwile ukuti abengaitemenwa pa basambi—apali baKatolika, baBuddha, ne Nte sha kwa Yehova—bapekanye amalyashi ayepi pa kuti bebeko abasambi bambi ifyo basumina ne fyo bacita. Abapungwe batatu abali ni Nte sha kwa Yehova baliipeleshe apo pene fye.

Ilyo ubushiku bwafikile, uwali uwa ntanshi ukulanda ni Malwina uuli ne myaka 15. Fimo ifyo alandile ni fi: “Abengi mwalitwishibe na lintu fye tushilatendeka ukusambilila pali lino isukulu pantu twalimutandalile ku mwenu. Nalimo mulapapa umulandu tucitile ifyo lyonse. Ni pa mulandu wa kuti tupashanya Yesu Kristu, Uwatendeke ubuKristu. Ashimikile imbila nsuma ya Bufumu bwa kwa Lesa konse ukwalesangwa abantu. Abatumwa na Bena Kristu bambi aba kubalilapo na bo bene baleshimikila. Mu fifulo ifingi, Inte sha kwa Yehova balashipikisha amesho ya citetekelo ayaafya, lelo tulasekelela ukuti pa sukulu pa mwesu paliba umutende kabili bonse mulabombesha ukuti uyu mutende ubeko. Tulemutasha pali ici!”

Pa kupwisha ilyashi lyakwe, Malwina atile: “Kwaliba na cimbi icitulenga ukumutandalila ku mwenu. Tulamusakamana. Baibolo itila nomba line fye abantunse bakapita mu fintu fyaafya nga nshi. E co ilyo tukesa ku mwenu na kabili, shi mukakutikeko kuli ifwe. Kuti twatemwa ukumweba ifyo twingekala pamo ku ciyayaya muli paradise pe sonde.”

Uwakonkelepo ukulanda ni Mateusz, na o uuli ne myaka 15. Mateusz aebele abo alelandako ukuti imyaka iyapita, Inte sha kwa Yehova balibomfya inshila shalekanalekana ku kushimikila imbila nsuma. Ku ca kumwenako, mu 1914—ilyo kwali amafilimu yabula iciunda—Inte baletambisha “Photo-Drama of Creation,” iyali kutambisha ifikope fisela na maslaidi kabili iyakwete ne ciunda.

Mateusz alondolwele ifyo icilimba cabomfiwa ku kusalanganya ubukombe bwa Bufumu lyene alondolwele programu ya pa kompyuta iyaibela iitwa multilanguage electronic phototypesetting system (MEPS) iyapangwa ne Nte sha kwa Yehova. Alondolwele ne fyo Inte sha kwa Yehova shayafwa ku kweba badokota pa nshila sha kundapilamo ukwabula umulopa. Atile: “Badokota balumbuka kabili abacindikwa aba mu Poland balalanda bwino pa fyo twapingulapo kabili balekomaila pa cishinka ca kuti cila mwaka abantu abengi nga nshi abashili Inte balelepulwa ukwabula umulopa.”

Mateusz asondwelele pa kulanda pa kukuula Amayanda ya Bufumu no kutila: “Bushe kuti mwatemwa ukutandalila Ing’anda yesu ya Bufumu? Takwaba ukulipila pa kwingila, kabili takuba ukupitamo ukupoka indalama.” Ilyo Mateusz alelanda pa cifulo ca kulonganinamo ibungano mu Sosnowiec, atile: “Mufwile ukumona ici cifulo cikalamba icakuulwa mu nshila ya kuti cabomfiwa bwino ukulingana no bufwayo bacikuulila. Kuti twaya bonse. Pali ico tulefwaya ukulanda, kabili umunensu Katarzyna alamweba ico cintu.”

Lyene Katarzyna uuli ne myaka 15 alandile ne cimwemwe ati: “Tulemulalika ukwisa ku Sosnowiec ku kulongana kwa citungu ukwa Nte sha kwa Yehova. Kukaba amalyashi yakuma abaice.” Katarzyna alandile na pa kusefya kwacindamisha Abena Kristu bacita—e kuti Ukwibukisha imfwa ya kwa Yesu Kristu. Akoseleshe abalekutika kuli wene ati: “Uyu mwaka wapwile abantu ukucila amamilioni 14 mu calo conse balisangilweko kuli uku kusefya. Na imwe kuti mwasangwako umuku ukakonkapo.”

Ilyo balandile aya malyashi, Malwina, Mateusz, na Katarzyna bapeele bakafundisha wabo icitabo icitila Jehovah’s Witnesses—Proclaimers of God’s Kingdom pamo na matepu na mavidio yabili ayalanda pa fisumino ne milimo ya Nte sha kwa Yehova.a Bakafundisha balipokelele no kutasha no kulaya ukuti bakafibomfya pa kusambilisha amasomo ya lyashi lya kale.

Pa mpela ya uku kulanshanya, Martyna uwa myaka 12 aimbile bonse abaliko ulwimbo ulutila “Tulamutasha, Mwe Yehova.” Aba baNte bacaice ‘bapamine muli Lesa wabo’ no kushimikila bwino. (1 Abena Tesalonika 2:2) Ala kwena baba ca kumwenako cisuma ku Nte shacaice konse!

[Futunoti]

[Icikope pe bula 26]

Malwina alepekanya ilyashi ilyo kwashele inshiku ukuti akalilande ku sukulu

[Icikope pe bula 26]

Katarzyna alesala amalembo ya kulanda mu lyashi lyakwe