“Ukunjafwa Kufuma Kuli Yehova”

Ilyo Ubukote Buba “Icilongwe Cayemba”

BAMURIEL abaali ne myaka ya bukulu 101 balandile kuti: “E mikalile yawamisha pali yonse.” BaTheodoros abali ne myaka 70 basondolwele ukuti: “Lishuko ilishaikulila icine cine.” BaMaria pa myaka ya bukulu 73 balandile ukuti: “Kuli ine e mikalile yangwamine epela.” Aba bonse balibomfya inshita ya bumi bwabo bonse ukubombela Yehova Lesa.

E fyaba na bakapepa abengi aba kwa Yehova abapimpa mwi sonde lyonse. Te mulandu no bukote, ukulwalilila, na fimbi ifibaponena, bacili balabombela Lesa no mweo wabo onse. Mu cilonganino ca Bwina Kristu, abakalamba ba busumino nga aba, baba ifya kumwenako ifisuma nga nshi fya kuipeelesha kwa bukapepa. Yehova alicindamika nga nshi umulimo wa bakoloci, nangu line kuti bapelebela pa mulandu wa mibele imo.a—2 Abena Korinti 8:12.

Ibuuku lya Amalumbo lilalanda bwino pa musango wa mikalile abakoloci ba busumino bafwile ukusubila. Kuti baba ngo muti wa kale na kale kabili uwalulubala uutwalilila ukutwale fisabo. Ukukuma ku bakoloci ba busumino, kemba wa malumbo aimbile ati: “Bacili baletwala mu bukote, baisulamo amenshi kabili balelema.”—Amalumbo 92:14.

Bamo nalimo kuti basakamikwa abati bakalekeleshiwa no kusuulwa ilyo amaka yabo yacepa pa mulandu wa bukote. Davidi apaapaatile Lesa ukuti: “Mwimpoosa ku nshita ya bukote; ku kupwa kwa maka yandi mwindekelesha.” (Amalumbo 71:9) Cinshi cilenga ukuti umuntu enakuka lelo aletemfuma mu bukote? Mibele ya bulesa iya bulungami. Kemba wa malumbo aimbile ati: “Uwalungama akalemba nga kancindu.”—Amalumbo 92:12.

Ababomfya imyaka yabo yonse mu mulimo wa busumino kuli Lesa batwalilila ukutwale fisabo na mu bukote. Na kuba ifintu ifingi baicitila abene mu bumi nelyo ifyo bacitila bambi filatumbukamo ifisuma, ukupala imbuto ishipuka no kutwalisha. (Abena Galatia 6:7-10; Abena Kolose 1:10) Lelo, abaonaula imyaka yabo mu fikonkelelo fya bukaitemwe ifisuula inshila sha kwa Lesa ilingi line tabasanga ifintu finenene ifyo bengasontako ilyo bakota.

Na mwi buuku lya mu Baibolo ilya Amapinda na mo, ubulungami bwalikomailwapo nge cisamo ca bukote. Mulya tubelengamo ukuti: “Umutwe wa mfwi cilongwe icayemba, cisangwa mu mibele ya bulungami.” (Amapinda 16:31) Ca cine, ubulungami busokolola ukuyemba kwa lwa nkati. Ukukonkelela ubulungami pa nshita ntali kulacindamika. (Ubwina Lebi 19:32) Uwa mfwi nga ali na mano ne mibele isuma alacindikwa apakalamba.—Yobo 12:12.

Yehova alatemunwa nga ca kuti umuntu amubombela mu bololoke pa myaka iingi. Amalembo yatila: “Ukufika pa bukote, nine wine [ne Yehova], ukufika na ku mfwi ine nakulamupaapa; ine nacita, kabili nakulasenda, nakulapaapa no kulengo kupusuka.” (Esaya 46:4) Mwandini tulasansamuka ukwishibo kuti Shifwe wa mu muulu uwa kutemwa alilaya ukwafwa no kutungilila aba cishinka bakwe mu bukoloci bwabo!—Amalumbo 48:14.

Apo Yehova amona umuntu uwamubombela mu busumino imyaka iingi ukuti aliyemba, bushe abantu bambi na bo tabafwile ukucindika umuntu wa musango yo? Ukumona abakoloci mu nshila Lesa abamwenamo kukatulenga ukusakamana abasumina banensu abakoloci. (1 Timote 5:1, 2) E ico kanshi natumone inshila twingalangilamo ukutemwa kwa Bwina Kristu pa kubasakamana mu fyo balekabila.

Ukutampa Ukwendela mu Nshila ya Bulungami mu Bukalamba

Solomone atulayo kuti: “Umuyo bulungami e mwabo mweo.” (Amapinda 12:28) Ubukote tabulesha umuntu ukutendeka ukwenda muli iyi nshila. Ku ca kumwenako, mu Moldova, umwaume uwa myaka 99 abomfeshe ubulumendo bwakwe ukutungilila amano ya ciKomyunisiti. Ali uwa nsansa ukuti alilanshenye pa kanwa nkati ne ntungulushi shalumbuka isha ciKomyunisiti, pamo nga baVladimir I. Lenin. Lelo ukupwa no kuwa kwa buKomyunisimu kwalengele uyu mukoloci ukupelelwa mu bumi. Lelo ilyo Inte sha kwa Yehova bamulangile ukuti Ubufumu bwa kwa Lesa e bwingapwisha fye amacushi ya bantu, alipokelele icine ca mu Baibolo kabili abele umusambi wa Baibolo uwapimpa. Ku ca bulanda afwile ilyo talabatishiwa ngo mubomfi wa kwa Yehova.

Umwanakashi uwa myaka 81 iya bukulu uwa ku Hungary ilyo alesambilila ififwaikwa fya kwa Lesa ifya mibele isuma ailwike kuti alekabila ukulembesha icupo no mwaume aikele nankwe imyaka iingi. Umwanakashi alipamine no kulondolwela umwaume aleikala nankwe ifyo Baibolo isosa. Alipapile kabili ali uwa nsansa, ilyo asumine ukumupa. Pa numa ya kulembesha icupo cabo, umwanakashi alilundulwike bwangu bwangu lwa ku mupashi. Mu myeshi fye 8 ukutula apo atendekele isambililo lya Baibolo, abele kasabankanya uushabatishiwa, kabili inshita fye inono pa numa alibatishiwe. Mwandini ubulungami kuti bwalenga abakoloci ukulangisha ukuyemba kwine kwine!

Cine cine, Abena Kristu abakoloci aba busumino kuti baba abashininwa ukuti Lesa alabasakamana. Yehova takalekeleshe abatwalilila aba cishinka kuli wene. Lelo, alaya ukubatungulula, ukubafwa, no kubatungilila nangu fye ni mu bukote. Kabili balasuminisha amashiwi ya kwa kemba wa malumbo aya kuti: “Ukunjafwa kufuma kuli Yehova.”—Amalumbo 121:2.

[Futunoti]

[Amashiwi pe bula 9]

“Umutwe wa mfwi cilongwe icayemba, cisangwa mu mibele ya bulungami.”—AMAPINDA 16:31

[Akabokoshi pe bula 8]

YEHOVA ALASAKAMANA ABABOMFI BAKWE ABAKOLOCI

“Ku cinso ca wa mfwi uleima, ulecindika ne cinso ca mukote.”—Ubwina Lebi 19:32.

“Ukufika pa bukote, nine wine, ukufika na ku mfwi ine nakulamupaapa.”—Esaya 46:4.