“Ukunjafwa Kufuma Kuli Yehova”

Indupwa Ishaikatana pa Mulandu wa Kwishiba Lesa

“ICIBUMBA ca Berlin.” Ifi e fyo umwaume umo no mukashi wakwe abekala ku Argentina baleita icibumba bakuulile icapaatukenye ing’anda yabo mu fiputulwa fibili! Balipusene ica kuti bafililwe ukuwikishanya; balipatene nga nshi.

Ku ca bulanda, te aba fye babili baba no bu bwafya. Aba mu ndupwa ishingi balakansana, tababa na bucishinka, kabili balapatana icine cine. Ici ca bulanda, pantu uwatendeke ulupwa ni Lesa. (Ukutendeka 1:27, 28; 2:23, 24) Ulupwa ca bupe cafuma kuli Lesa kabili lwaba ni nshila isuma iya kulangilamo ukutemwa kwa cine cine. (Ruti 1:9) Nga ca kuti aba mu lupwa balefishapo imilimo yabo iyo Lesa abapeela, kuti bacindika Yehova kabili kuti baba ca kwafwa ku banabo.a

Kanshi apo Lesa e watendeke ulupwa, tufwile ukuleka amatontonkanyo yakwe ukutumumunga pa kuti twingomfwikisha ifyo indupwa shifwile ukuba. Mu Cebo cakwe mwaliba ukufunda kusuma ukwafwa indupwa ukutunguluka, sana sana nga kwaba amafya. Pa lwa milimo ya mulume, Baibolo itila: ‘Abalume bafwile ukulatemwa abakashi babo nge mibili yabo iine.’ Umulume nga afishapo uyu mulimo wakwe, umukashi alaitemenwa nga nshi ukuba “na katiina ku mulume wakwe.”—Abena Efese 5:25-29, 33.

Ukukuma kuli bucibusa buba pa bafyashi na bana, umutumwa Paulo alembele ukuti: “Mwe bashibo, mwilakalifya abana benu, lelo mulebakusha mu kusalapula no kukonkomesha kwa kwa Yehova.” (Abena Efese 6:4) Abafyashi nga babe fi, pa ng’anda palaba bucibusa busuma, kabili ici cilalenga abana ukulaumfwila abafyashi.—Abena Efese 6:1.

Ifyebo fili pa muulu ifisangwa mu Baibolo fyaba kufunda kusuma ukwakuma indupwa. Nga ca kuti aba mu lupwa abengi balekonka ifishinte fya mu Baibolo, balaba ne nsansa mu ndupwa shabo. Ku ca kumwenako, natulande pa baupana aba ku Argentina abo tulandilepo na pa kubala. Pa numa ya kusambilila Baibolo ne Nte sha kwa Yehova pa myeshi itatu, bonse babili batendeke ukumfwila ukufunda kusuma ukwa iko pa lwa cupo. Balyeseshe na maka ukuwamyako imilanshanishishe yabo, ukulalangulukilana nga kwaba ifyo umo alekabila, no kulaelelana. (Amapinda 15:22; 1 Petro 3:7; 4:8) Balisambilile ukulama icipyu cabo no kulapepela ukwafwa kwa kwa Lesa nga ca kuti ifintu fyayafya. (Abena Kolose 3:19) Tapakokwele, bawishishe “Icibumba ca Berlin”!

Lesa Kuti Akosha Ulupwa

Ukwishiba no kubomfya ifipimo fya kwa Lesa kuti kwakosha ulupwa ukucimfya amafya. Calicindama ukubomfya ifipimo fya kwa Lesa pantu calisobelwe ukuti mu nshiku shino tuleikalamo, indupwa shikasanswa icabipisha. Paulo asobele ulwa kubipilako kwa mibele isuma no kwa bwikashi bwa bantu. Atile “inshiku sha kulekelesha” shikeshibikilwa ku kukanaba na bucishinka, ukubulwe “citemwishi,” no kukanaba ne cumfwila ku bafyashi, kabili alangilile ukuti ifi fyakulacitika fye na pa bantu “abamoneka kwati bali-ipeelesha kuli bukapepa.”—2 Timote 3:1-5.

Ukulabombesha na maka ukuti tuletemuna Lesa kuti kwatwafwa ukupwisha amafya ya musango yu ayonaula indupwa. Aba mu ndupwa ishingi basanga ukuti balakabila ubutungulushi bwa kwa Lesa pa kuti bengapwisha amafya ayengi mu nshila isuma. Aba mu lupwa nga bafwaya ukuti batwalilile ukuba na bucibusa busuma na Lesa, ico balingile ukucite ntanshi kulakonka ifishinte fya mu Baibolo no kwishibo kuti “nga Yehova takuulile ng’anda, ninshi abakuulako bacucutika apa fye.” (Amalumbo 127:1) Icilenga sana ukuti mu lupwa mube nsansa, kutangishako Lesa.—Abena Efese 3:14, 15.

Mu Hawaii umwaume we shina lya Dennis asangile ukuti ici ca cine. Nangu ca kuti aleitunga ukubo Mwina Kristu, ali sana ne miponto no lubuli. Ilyo abombeleko incito ya bushilika, aishileba ne cipyu nga nshi no lupato. Ebukisha ukuti: “Lyonse fye nalelwa imbuli. Nshalesakamana icalencitikila, kabili nshaletiina ukufwa. Natwalilile fye ukuba ne miponto no lubuli. Umukashi wandi, uwali Inte ya kwa Yehova, ankoseleshe ukusambilila Baibolo.”

Dennis alekaana ifyo umukashi wakwe alemweba ukucita. Lelo, ubuKristu bwa mukashi wakwe bwalengele ukuti aaluke. Mu kupelako Dennis aile ku kulongana kwa Bwina Kristu pamo no mukashi wakwe na bana. Pa numa, isambililo lya Baibolo lyalitendeke, kabili Dennis alilundulwike. Alekele ukupeepa fwaka iyo apeepele pa myaka 28 kabili alekele ukulasangwa na banankwe abalecite fintu fyonse ifyo alefwaya ukuleka. Ukutasha Yehova, Dennis atile: “Ifintu mu lupwa lwandi fyaliwamineko. Bonse mu lupwa twaleila pamo mu kulongana na mu mulimo wa kushimikila. Abana bandi babili balekele ukuntiina, pantu nalisambilile ukulama icipyu kabili nalilekele imiponto. Nomba tulashimike lyashi no kuipakisha amalyashi ya mu Baibolo. Nga ca kuti nshasambilile Baibolo, ino nshita nga nalifwa; nalefulwa bwangu sana.”

Aba mu lupwa kuti baba ne nsansa nga ca kuti balebombesha ukucito kufwaya kwa kwa Yehova. Ificitika fyalangilila ukuti nangu fye ni umo mu lupwa e ulekonke fishinte fya mu Baibolo, ifintu filawamako. Ukubombesha, ukulamuka, ne nshita, filafwaikwa pa kuti aba mu ng’anda bonse babe Abena Kristu. Kabili aba mu ndupwa sha musango yo balishininkisha ukuti Yehova akabalambula pa kubombesha kwabo. Na bo kuti basosa nge fyasosele kemba wa malumbo ukuti: “Ukunjafwa kufuma kuli Yehova.”—Amalumbo 121:2.

[Futunoti]

[Amashiwi pe bula 9]

Kuli Lesa e ko “ulupwa lonse mu muulu na pano isonde lwainikwako ishina.”—ABENA EFESE 3:15

[Akabokoshi pe bula 8]

YEHOVA ALICINDAMIKA SANA ULUPWA

“Lesa alibapaalile, Lesa atile kuli bene, Fyaleni, fuleni, kumaneni pe sonde.”—Ukutendeka 1:28.

“Wa nsansa onse uutiina Yehova . . . Umukashi obe akaba ngo mwangashi uutwala ifisabo mu kati na nkati ka ng’anda yobe.”—Amalumbo 128:1, 3, NW.