Yehova ni “Kalambula wa Bamufwaisha”
“Uupalamina kuli Lesa afwile ukusumina ukuti e ko aba no kuti aba kalambula wa bamufwaisha.”—ABAHEBERE 11:6.
1, 2. Cinshi cilenga ababomfi ba kwa Yehova bamo ukuimona abashalinga ukubombela Yehova?
BA BARBARA batile: “Nalibombela Yehova imyaka 30, lelo nshatala ng’umfwapo ukuti nalilinga ukube Nte yakwe.a Nalibomba bupainiya ne milimo imbi iyaibela, na lyo line, nshasumina bwino bwino ukuti ndi Nte ya kwa Yehova.” BaKeith na bo balandile ifyapalako ilyo batile: “Limo ng’umfwa kwati nshalinga ukube Nte, nalishiba ukuti ababomfi ba kwa Yehova bafwile ukuba ne nsansa, nomba ine te fyo naba. Kanshi, ng’umfwa kwati nalicita umulandu, nga naumfwe fyo, e lyo no bwafya bwandi bukula sana.”
2 Ababomfi ba kwa Yehova abengi aba cishinka, aba kale na ba nomba, na bo bene baliculako na matontonkanyo ya musango yu. Bushe na imwe mwalyumfwapo ifyo? Nakalimo mulecula ilyo abasumina banenu balemoneka kwati bena baleikala bwino, bali abasansamuka kabili aba cimwemwe. Kanshi kuti mwamona kwati imwe Yehova tamupenda kabili tamusakamana. Mukwai mwisuswa ukutontonkanya ukuti na Yehova amona kwati tamwacindama. Baibolo itweba ukuti: “[Yehova] tasuulile, nangu kulinge ca makankamike, ukucula kwa mulanda; kabili tafishile icinso cakwe kuli wene; lelo ilyo akuutile kuli wene, alyumfwile.” (Amalumbo 22:24) Ayo mashiwi ya mu kusesema ayalelanda pali Mesia yalanga ukuti Yehova alakutika ku ba cishinka bakwe kabili alabalambula.
3. Cinshi ico na ifwe bene tuculila muli cino calo?
3 Muli cino calo ca macushi, takwaba uushicula, pantu na bantu ba kwa Yehova na bo bene balacula. Cino calo twabamo citekwa na Satana Kaseebanya, umulwani mukalamba uwa kwa Yehova. (2 Abena Korinti 4:4; 1 Yohane 5:19) Yehova tacita ifipesha mano fya kucingilila abantu bakwe, na kuba, abantu ba kwa Yehova bene e bo na Satana afwaisha ukusansa. (Yobo 1:7-12; Ukusokolola 2:10) E mulandu wine kanshi, mpaka inshita yasontwa iya kwa Lesa ikafike, tufwile ‘ukushipikisha mu bucushi’ no kuba no “mute wa kupepa,” kabili tufwile no kucetekela ukuti Yehova alatusakamana. (Abena Roma 12:12) Ukucula takufwile ukulenga twatendeka ukumona kwati nakalimo Lesa wesu Yehova alitupata!
Aba Kale Abashipikishe
4. Lumbuleni ababomfi ba cishinka aba kwa Yehova bamo bamo abashipikishe ubucushi.
4 Ababomfi ba kwa Yehova abengi aba kale na bo bene balishipikishe ubucushi. Ica kumwenako fye, ni Hana, ‘uwaleshikitiko mutima,’ pa mulandu wa kuti takwete mwana kabili alemona kwati nakalimo Lesa alimulabile. (1 Samwele 1:9-11) Ilyo Namfumu Yesebele alemufwayafwaya ukuti amwipaye, Eliya alitiinine no kupepa kuli Yehova ukuti: “Epela; nomba, mwe Yehova, buuleni umweo wandi; pantu ine nshili musuma ukucila batata.” (1 Ishamfumu 19:4) Umutumwa Paulo na o, cimoneka ukuti aali no bulanda sana pa kubo mubembu, ilyo atile: “Ilyo mfwaya ukucita icalungama, icabipa e ciba muli ine.” Na kabili atile: “Iye, ne muntu wa nkumbabulili ne!”—Abena Roma 7:21-24.
5. (a) Bushe Hana, Eliya, na Paulo balambwilwe shani? (b) Bushe Icebo ca kwa Lesa citusansamusha shani nga tuimona abashacindama?
5 Kwena, twalishiba ukuti Hana, Eliya, na Paulo bonse balishipikishe ubucushi no kutwalilila ukubombela Yehova, kabili balipaalilwe icine cine. (1 Samwele 1:20; 2:21; 1 Ishamfumu 19:5-18; 2 Timote 4:8) Nomba, na bo bene baleumfwa filya fine na ifwe tumfwako ilyo tulecula, baleumfwa ubulanda, ukupelelwa no mwenso. Kanshi, na ifwe bene, limo nga tuleumfwa kwati tatwalinga ukubombela Yehova, tatufwile ukupapa sana. Na lyo line, kuti mwacita shani nga ca kutila ku mulandu wa masakamika, mwatendeka ukutwishika nga ca cine Lesa alimutemwa? Icebo ca kwa Lesa kuti camusansamusha. Ica kumwenako fye, mu cipande cafumako, twasambilile umwalola amashiwi ya kwa Yesu aya kuti Yehova alipenda ‘ne mishishi ya ku mutwe wenu.’ (Mateo 10:30) Yalya mashiwi ya kukoselesha yatulanga ukuti Yehova alasakamana umubomfi wakwe onse apo apela. Ibukisheni ne cilangililo ca kwa Yesu ica nseba. Yehova nga aleshiba ilyo kalya koni kacepesha kapona pa nshi, kuti afilwa shani ukumusakamana ilyo mulecula?
6. Bushe Baibolo kuti yasansamusha shani abaimona abashacindama kuli Lesa?
6 Bushe ca cine fwe bantunse ababembu twalicindama kuli Kabumba wa maka yonse, Yehova Lesa? Ee, twalicindama! Na kuba, muli Baibolo mwaba amalembo ayengi ayatulanga bwino bwino ukuti ico ca cine. Nga tuletontonkanya pali aya malembo, kuti twaba nga kemba wa malumbo uwatile: “Pa kuba ayengi muli ine amatontonkanyo ya kunsakamika, ifya kusansamusha fyenu finengo kupekwa.” (Amalumbo 94:19) Lekeni tulandeko pa mashiwi yamo yamo ayasansamusha aya mu Cebo ca kwa Lesa. Ukuyalandapo, kwalalenga twishibe bwino bwino ukuti twalicindama kuli Lesa kabili akatulambula nga twatwalilila ukucita ukufwaya kwakwe.
‘Icikwatwa Caibela’ ica kwa Yehova
7. Ukupitila muli Malaki, kusesema nshi ukusuma Yehova asesemene uluko lwa baYuda ulwaonaike?
7 Mu myaka ya ba 400 B.C.E., uluko lwa baYuda lwalyonaike icibi. Bashimapepo balepokelela inama shalemana no kushipeela amalambo kuli Yehova pa ciipailo. Abapingushi balefyenga abantu. Mu calo mwali ubuloshi, ubufi, ubupuupu no bulalelale. (Malaki 1:8; 2:9; 3:5) Kuli lulya luko lwapama kabili ulwaonaika icibi, Malaki aseseme ukusesema uko no muntu engapapa sana. Ku ntanshi, Yehova aali no kubwesha abantu bakwe no kubasenamina na kabili. Tubelengo kuti: “E fyo Yehova wa milalo asosa, Kabili bakaba bandi, icikwatwa candi icaibela, mu bushiku umo ine nkacitamo; kabili nkabalanguluka, ifyo umuntu alanguluka umwana wakwe umwaume uumubombela.”—Malaki 3:17.
8. Bushe Malaki 3:17 kuti abomba shani na kwi bumba likalamba?
8 Ukusesema kwa kwa Malaki kwalifishiwapo na muno nshiku pa Bena Kristu basubwa no mupashi, abapanga uluko lwa ku mupashi ulwa ba 144,000. Cine cine lulya luko ‘cikwatwa caibela,’ nelyo “abantu abali cikwatwa caibela,” ica kwa Yehova. (1 Petro 2:9) Ukusesema kwa kwa Malaki kuti kwakoselesha na ba mwi ‘bumba likalamba,’ ‘abaiminina ku cinso ca cipuna ca bufumu na ku cinso ca Mwana wa mpaanga, nabafwala imingila yabuuta.’ (Ukusokolola 7:4, 9) Na bo, baba umukuni umo na basubwa, batungululwa na Kacema umo, Yesu Kristu.—Yohane 10:16.
9. Mulandu nshi Yehova amwena abantu bakwe ukuti “cikwatwa caibela”?
9 Bushe Yehova amona shani abaipeelesha ukumubombela? Nge fyo tumfwile pali Malaki 3:17, abamona nga filya wishi wa kutemwa amona umwana wakwe. Kabili moneni amashiwi ubusuma ayo abomfya pa kulondolola abantu bakwe, atila, “icikwatwa candi icaibela.” AmaBaibolo yambi pano yatila, “abantu bandi,” “icikwatwa candi icacindama,” nelyo “icibeekobeeko candi.” Mulandu nshi Yehova amwena abamubombela ukuti bantu baibela? Umulandu umo wa kuti, Yehova ni Lesa uutasha. (AbaHebere 6:10) Alapalama ku bamubombela no mutima onse kabili abamona abaibela.
10. Bushe Yehova abaka shani abantu bakwe?
10 Bushe mwalikwatako icipe cimo ica mutengo ico mwingatila cikwatwa cenu icaibela? Mufwile mulacisunga bwino sana. Yehova na o alasunga bwino sana ‘icikwatwa cakwe icaibela.’ Ca cine ukuti tafumyapo ifya kwesha fyonse na malanda pa bantu bakwe. (Lukala Milandu 9:11) Lelo Yehova alikwata amaka ya kusunga abantu bakwe kabili ababomfi bakwe aba cishinka alababaka lwa ku mupashi. Alabakosha pa kuti babe na maka ya kushipikisha ica kwesha conse icingabaponena. (1 Abena Korinti 10:13) E mulandu wine Mose aebele abantu ba kwa Lesa aba kale, abena Israele ukuti: “Koseni kabili talileni, . . . Yehova Lesa wenu e uleya na imwe; takamupoose fye, nangu kumulekelesha.” (Amalango 31:6) Yehova alalambula abantu bakwe. Abamona ukuti ‘cikwatwa cakwe icaibela.’
Yehova “ni Kalambula”
11, 12. Bushe ukwishiba ukuti Yehova ni Kalambula, kukatwafwa shani ukuleka ukuitwishika?
11 Na cimbi icalenga tushininkishe ukuti Yehova alicindika ababomfi bakwe ca kuti alabalambula. Aebele abena Israele ukuti: “ Shi mundabwile kuli ico, e fyo Yehova wa milalo asosa; mumone nga nshakamwiswile ifipunda fya mu muulu, no kumupongolwele paalo, kukasuke kukabule incende ya kubapo.” (Malaki 3:10) Na kuba, pa kulekelesha, Yehova akalambula ababomfi bakwe ubumi bwa muyayaya. (Yohane 5:24; Ukusokolola 21:4) Ico cilambu caumo mutengo e cilanga sana apafika ukutemwa kwa kwa Yehova na bukapekape bwakwe ku babomfi bakwe. Cilanga no kuti ca cine alicindika sana abamubombela. Ukwishiba ukuti Yehova ni kapekape kabili Alalambula abamubombela, kuti kwatwafwa ukufumyapo ukutwishika kwa kuti, nangu tumubombele shani, atumona abashacindama. Na kuba, Yehova atukoselesha ukumwishiba ukuti ni Kalambula! Paulo alembele ati: “Uupalamina kuli Lesa afwile ukusumina ukuti e ko aba no kuti aba kalambula wa bamufwaisha.”—AbaHebere 11:6.
12 Ca cine ukuti tubombela Yehova pa mulandu wa kuti twalimutemwa, tatubombela ena umulandu fye wa kuti alitulaya icilambu. Na lyo line, ukusuubila ukuti akatulambula takwabipa, te kutila ninshi ni fwe bakaitemwe awe. (Abena Kolose 3:23, 24) Pa mulandu wa kuti Yehova alitemwa abantu bakwe kabili abamona abacindama nga nshi, alaitendekelako ukubacitila ifisuma no kulambula abamufwaisha.
13. Mulandu nshi icilubula cabela e cintu capulamo icilanga ukuti Yehova alitutemwa?
13 Icilubula e cilanga sana ukutila Yehova alishiba bwino bwino ukuti abantunse balikwata amaka ya kucita icisuma mu menso yakwe. Umutumwa Yohane alembele ukuti: “Pantu Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Icilubula ce lambo lya kwa Yesu Kristu citulanga ukuti ukumona kwati tatwacindama mu menso ya kwa Yehova no kuti nangu tubombeshe te kuti atutemwe, bufi ubwafiita fititi. Batini Yehova uwacitile icintu cakule fyo, ukutupeela Umwana wakwe uwafyalwa eka, e o twingatila atumona abashacindama kabili tatutemwa?
14. Cinshi citulanga ifyo Paulo alemona icilubula?
14 Kanshi, nga mwatendeka ukuimona kwati tamwacindama, tontonkanyeni sana pa cilubula. Ishibeni ukuti ni mwe Yehova atumiine icilubula. E fyacitile umutumwa Paulo. Ibukisheni ukuti atile: “Iye, ne muntu wa nkumbabulili ne!” Lelo, na kabili Paulo atile: “Kube ukutootela kuli Lesa muli Yesu Kristu Shikulwifwe,” “uwantemenwe no kuipeela pa mulandu wa ine.” (Abena Roma 7:24, 25; Abena Galatia 2:20) Ifi Paulo alandile te kutila aleituntumba awe. Alelanda fye ukutila alicetekele sana ukuti alicindama kuli Yehova. Nga filya Paulo aleumfwa, na imwe ishibeni ukuti icilubula bupe bwa kwa Lesa ubo apeela imwe bene. Yehova alikwata amaka ya kupususha, lelo na kabili ni Kalambula wa bamutemwa.
Ibakeni ku ‘Micenjelo’ ya kwa Satana
15-17. (a) Bushe Kaseebanya alenga shani abantu ukuimona kwati Lesa tabatemwa? (b) Kuti twakoseleshiwa shani ku fyacitike kuli Yobo?
15 Na lyo line, nakalimo kuti mwafilwa fye ukusumina ukuti ukusansamusha kwa mu Cebo ca kwa Lesa kuti kwabomba na kuli imwe. Limbi kuti mwatila kwaliba bambi abakapoka icilambu ca bumi bwa muyayaya, te imwe iyo. Nga e fyo mumfwa, kuti mwacita shani?
16 Nakalimo muleibukisha filya Paulo akonkomeshe Abena Efese ukuti: “Fwaleni ifya bulwi fyakumanina ifya kwa Lesa ukuti mube na maka ya kwiminina ndi ku kulwisha imicenjelo ya kwa Kaseebanya.” (Abena Efese 6:11) Ilyo twalanda pa micenjelo ya kwa Satana, ilingi line tutontonkanya pa fyuma ne mibele yabipa, kabili ico ca cine pantu Satana alabomfya sana ifi fintu ukulufya abantu. Abantu ba kwa Lesa abengi sana, aba kale na ba muno nshiku, balitunkwa no kwikatwa ku fiteyo fyaba mu fyuma na mu mibele yabipa. Lelo, tufwile ukwiluka umucenjelo na umbi uwa kwa Satana, alalenga abantu ukuimona kwati Yehova Lesa te kuti abatemwe.
17 Kaseebanya alicenjela sana na matukuto yakwe aya kufwaya ukuti abantu baleimona kwati Lesa tabatemwa pa kuti baleke ukumupepa. Ibukisheni amashiwi yalandile Bildadi kuli Yobo aya kuti: “Kabili umuntunse kuti alungama shani kuli Lesa? Kuti asanguluka shani uwafyalwa ku mwanakashi? Mona, no mweshi wine taubalika, ne ntanda tashicelebuka, mu menso yakwe: pali bufi umuntunse, mutiti fye, no mwana wa muntu, mwambo!” (Yobo 25:4-6; Yohane 8:44) Kwena ayo mashiwi yafwile yali aya kufuupula nga nshi kuli Yobo! Kanshi mwileka Satana amufuupule. Ilukeni amapange yakwe, beni abashipa kabili koseni no kutwalilila ukuibikilishako ukucite calungama. (2 Abena Korinti 2:11) Yobo ena, nangu ca kutila Yehova alimukalipile pa filubo fyakwe, alilambwilwe pa kushipikisha kwakwe, apeelwe ifya miku ibili pali fyonse ifyo Satana amusendele.—Yobo 42:10.
Yehova “Mukalamba Ukucila Imitima Yesu”
18, 19. Bushe Lesa akula shani ‘ukucila imitima yesu,’ kabili “aishiba” shani “fyonse”?
18 Kwena, kuti cayafya ukucimfya amatontonkanyo ya kufuupula, sana sana nga yalilimba imishila mu mutima wenu. Lelo, umupashi wa kwa Yehova kuti wamwafwa panono panono ukuwisha ‘amalinga ayakosa . . . ayatumpulwa ku kukaanya ukwishiba Lesa.’ (2 Abena Korinti 10:4, 5) Nga mwamona amatontonkanyo ya kufuupula yalefwaya ukumucimfya, etetuleni pa mashiwi ya mutumwa Yohane ayatila: “Ni kuli ici e ko tukeshibila ukuti tuli ba mu cine, kabili tukashinina imitima yesu ku cinso cakwe muli fyonse ifyo imitima yesu ingatuseka, pantu Lesa mukalamba ukucila imitima yesu kabili aishiba fyonse.”—1 Yohane 3:19, 20.
19 Bushe amashiwi ya kuti “Lesa mukalamba ukucila imitima yesu,” yalola mwi? Limo, imitima yesu ilatuseka, sana sana nga tuleumfwa ububi pa filubo fimo ifyo tucita pa mulandu wa kuti tuli babembu. Nakalimo umulandu wa nkulilo yesu, limbi kuti lyonse tuimona abashacindama, kwati nangu tubombeshe shani, Yehova takatemwe ifyo tumubombela. Amashiwi ya mutumwa Yohane yatweba ukuti Yehova mukalamba ukucila fyonse ifyo ifwe tutontonkanya! Yehova tamonamo fye ifilubo muli ifwe, alishiba bwino bwino amaka yesu aya kucita icalungama. Na kabili, alamona bwino bwino ifili mu mutima wesu ne fyo tufwaya ukucita. Davidi atile: “Wene aliishibe mibumbilwe yesu, aibukisho kuti tuli lukungu.” (Amalumbo 103:14) Kanshi Yehova alitwishiba bwino sana ukucila ne fyo twaiishiba fwe bene!
‘Icilongwe Cayemba,’ Kabili “Icitebo ca Bufumu”
20. Bushe ukusesema kwa kwa Esaya ukwa kubweshiwa kwa bankole, kusokolola ukuti Yehova amona shani abamubombela?
20 Muli kasesema Esaya, Yehova aebele abantu bakwe aba kale ukusuubila ukuti bakabwelela ku calo cabo. Ilyo bali muli bunkole mu Babele, ukumfwa ayo mashiwi kwali no kubasansamusha sana, pantu bali mu bulanda nga nshi! Pa kubeba ifyo cikaba ku ntanshi ilyo bakabwelela ku calo cabo, Yehova atile: “Ukabe cilongwe icayemba mu kuboko kwa kwa Yehova, icitebo ca bufumu mu minwe ya kwa Lesa obe.” (Esaya 62:3) Pa kulanda aya mashiwi, Yehova alengele abantu bakwe ukwishiba ukuti alibacindika icine cine. E fyo caba na ku luko lwa bena Israele ba ku mupashi aba muno nshiku. Cali kwati ababikile apasansama apa kuti abantu bonse balebakumbwa.
21. Cinshi mufwile ukucita nga mulefwaya ukucetekela ukuti Yehova akamulambula pa kushipikisha kwenu?
21 Ca cine ukuti uku kusesema kubomba sana sana ku basubwa, lelo kulalanga na fintu Yehova aacindika bonse abamubombela. E ico kanshi, nga mwatendeka ukuitwishika, ibukisheni ukuti nangula tamwapwililika, Yehova amumona abacindama nge “cilongwe icayemba” kabili nge ‘citebo ca bufumu.’ Kanshi twalilileni ukulenga umutima wakwe ukusekelela ilyo muleibikilishako ukucita ukufwaya kwakwe. (Amapinda 27:11) Nga mulecite fyo, cetekeleni ukuti Yehova akamulambula pa kushipikisha kwenu!
[Futunoti]
a Amashina yamo nayalulwa.
Bushe Muleibukisha?
• Bushe twaba shani ‘icikwatwa caibela’ ica kwa Yehova?
• Mulandu nshi cacindamina ukwishiba ukuti Yehova ni Kalambula?
• ‘Micenjelo’ nshi iya kwa Satana iyo tufwile ukuibakako?
• Calola mwi ukuti Lesa ‘mukalamba ukucila imitima yesu’?
[Icikope pe bula 26]
Paulo
[Icikope pe bula 26]
Eliya
[Icikope pe bula 26]
Hana
[Icikope pe bula 28]
Mu Cebo ca kwa Lesa mwaba ifyebo ifingi ifya kusansamusha