“Ukunjafwa Kufuma Kuli Yehova”

Abantu Abengi Balepepa Yehova

UKUSESEMA kwa mu Baibolo ukwalosha ku nshita yesu, kwasobeele ukuti abantu ukufuma mu nko shonse bakaya ku kupepa ukwasumbulwa ukwa kwa Yehova. Ku ca kumwenako, ukupitila muli kasesema Haggai, Yehova alandile ukuti: “Nkatensha inko shonse, kabili ifisuma fya mu nko shonse fikesamo; na ine nkesusha iyi ng’anda no bukata.” (Hagai 2:7, NW) Bonse Esaya na Mika basobele ukuti mu nshita yesu, e kuti “inshiku sha ku mpela” inko na bantu bakapepa Yehova mu nshila yalungama.—Esaya 2:2-4; Mika 4:1-4.

Bushe uku kusesema cine cine kulafikilishiwa pali nomba? Natubebete ifishinka ifingatwafwa ukumona nga kulefikilishiwa. Mu myaka fye 10 iyapitapo, ukucila pa bantu 3,110,000 abapya e baipeele kuli Yehova mu fyalo ukucila pali 230. Na kabushe, apali baNte 10 ninshi baNte 6 e babatishiwe mu kati ka myaka 10 iyapita. Ukulingana na avareji wa mu mwaka wa 2004, muli baminiti babili kwaleba umuntu umo umupya uwaleipeela no kuilunda ku cilonganino ca Bwina Kristu ku kuba umubomfi wa kwa Lesa.a

Nga fintu cali mu mwanda wa myaka uwa kubalilapo, pali lelo ‘impendwa ikalamba balisumina kabili bapilibukila kuli Shikulu.’ Nangu ca kuti ukufulilako kweka takuli bushininkisho bwe paalo lya kwa Lesa, kulanga ukuti “ukuboko kwa kwa Yehova” kwaba pa bantu bakwe. (Imilimo 11:21) Cinshi citungulula abantu abengi ku kupepa kwa kwa Yehova? Kabili muyumfwa shani pali uku kufulilako?

Abantu Bamitima Yalungama Balekulilwa ku Kupepa kwa Cine

Yesu ukwabula no kupita mu mbali atile: “Takuli uwingesa kuli ine kano Tata uwantumine, amukula.” (Yohane 6:44) Kanshi, Yehova e waba ne nsambu sha kukula abantu ‘bonse abalemenena ku bumi bwa muyayaya.’ (Imilimo 13:48) Umupashi wa kwa Lesa ulenga abantu ukukabila ifya ku mupashi. (Mateo 5:3) Kampingu wa fulunganishiwa, ukufwaisha ukuti ifintu fiwame, no tuyofi tucitika mu bumi kuti fyalenga abantu bamo ukufwaya Lesa no kusambilila pa bufwayo bwakwe ubwa mutundu wa muntu.—Marko 7:26-30; Luka 19:2-10.

Abantu abengi bali-ileta abene ku kupepa Yehova pa mulandu wa kuti programu wa kusambilisha Baibolo uwaba mu cilonganino ca Bwina Kristu alabafwa ukusanga amasuko ku mepusho ayabacusha.

“Bushe Lesa nga eko aba, mulandu nshi abantu bafyengelwa?” Ico cali e cipusho calungulwishe Davide, kashitisha wa miti ikola uwaleikala ku Italy. Davide tapooseleko amano ku fya mapepo, e co aleipusha ili lipusho lyakosa pa kuti fye atendeke ukutalikana na bambi. Davide alanda ukuti: “Nshaletontonkanya ukuti nkasanga icasuko cisuma kabili ica kunshinina. Lelo Nte uwalandile na ine, ali uwatekanya kabili alebomfya Baibolo ilyo alelanda na ine. Kulya kulanshanya kwalingafwile sana.” Pali lelo, Davide aliwamya imibele yakwe kabili alebombela Yehova.

Abantu bambi balakulilwa ku kuteyanya kwa kwa Yehova ukwa pe sonde pa mulandu wa kufwaisha ukwishiba ico babelako. Lintu uwasambilila ifya malwele ya mutontonkanya umwina Croatia uwikala mu Zagreb, alefwaisha ukucefyanyako amasakamika ukwabula ukubomfya umuti, atandalile umunankwe uwaishibishe sana ifya malwele ya ku mutontonkanya. Icamupapwishe ca kuti, dokota amupeele inambala ya foni iye ofesi lya musambo ilya Nte sha kwa Yehova mu Zagreb, pamo pene ne shina lya kwa Nte uo aishibe. Amwebele ukuti: “Cine cine aba bantu kuti bakwafwa. Nga nakweba ukuya ku calici, uleyasangako fye ifilubi fyabumbwa ifishakwata mweo, takuli no ulelanda, kabili fyonse fyaba mu mfifi ku mupashi. Icalici te kuti likwafwe. Nalitumako abalwele banobe ku Nte sha kwa Yehova, kabili ndemona ukuti na iwe wine e cintu cingacilishapo ukukuwamina.” BaNte mu kuitemenwa, balimutandalile kabili mu kwangufyanya batendeke isambililo lya Baibolo na ulya mwanakashi. Papitile fye imilungu iinono, ulya umwanakashi alandile mu nsansa ukuti ukwishiba ubufwayo bwa kwa Lesa kwamulengele ukwishiba ico abelako.—Lukala Milandu 12:13.

Nga ca kuti abantu baponenwa no bucushi, abengi basanga ukuti icine ca mu Baibolo e cibasansamusha fye. Mu Greece, umulumendo wa myaka 7 aponene pa mutenge we sukulu no kufwa. Pa numa ya myeshi inono, baNte babili bakumenye nyina wa ulya mulumendo no kwesha ukumusansamusha pa kulanda pe subilo lya bafwa. (Yohane 5:28, 29) Ico, calengele uyu mwanakashi ukulila. Bankashi ba mwipwishe ukuti: “Nga mulefwaya ukwisha ifingi pa fyo Baibolo isosa, ni lilali mwingatemwa tukese mutandalila?” Ayaswike ukutila: “Ili line.” Kabili abasendele ku ng’anda ku mwakwe, ne sambililo lya Baibolo lyalitendeke. Pali lelo ulupwa lonse ulwa uyu mwanakashi lulebombela Yehova.

Bushe na Imwe Mulashimikila?

Ifya kukumanya fya musango yu filelangilila fye ifilecitika mu calo conse. Yehova alelonganika no kukansha ibumba lya bakapepa ba cine abafuma mu fyalo fyonse. Ili bumba lya bantu abafuma mu fyalo fyonse balikwata isubilo lya nsansa ilya kupusunsuka impela ya buno bwikashi bubifi no kwikala mu calo cipya ica bulungami.—2 Petro 3:13.

Pa mulandu we paalo lya kwa Yehova, uyu mulimo wakulisha uwa kulonganika abantu uletwalilila ukwabula ukucilimwa mpaka ukapwishishiwe. (Esaya 55:10, 11; Mateo 24:3, 14) Bushe na imwe mulebombako uyu mulimo wa kushimikila pa Bufumu mu kucincila? Nga ca kuti mulabomba uyu mulimo, kuti mwacetekela Lesa ukumwafwa kabili mukasosa nge fyasosele kemba wa malumbo ukuti: “Ukunjafwa kufuma kuli Yehova.”—Amalumbo 121:2.

[Futunoti]

[Amashiwi pe bula 9]

Takuli uwingesa kuli ine kano Tata uwantumine, amukula.”—YOHANE 6:44

[Akabokoshi pe bula 8]

NANI ALENGA UKUTI BAKAPEPA BA CINE BALEFULILAKO?

“Nga Yehova takuulile ing’anda, ninshi abakuulako bacucutika apa fye.”—Amalumbo 127:1.

“Lesa e walemesha; ica kuti uulimba nangu uutapilila taba kantu, kano Lesa uumesha.”—1 Abena Korinti 3:6, 7.