Ifyo Abantunse Bengaba Abana ba kwa Lesa

ILYO inkondo yali ku Korea yapwile, papita ne myaka 30, aba ku mulabasa baimishe lulu wa kufwailisha abantu abalufishe indupwa shabo ilyo kwali inkondo. Cinshi cafuminemo? Abantu ukucila 11,000 balisangile balupwa lwabo, kabili kwali ukusansamuka ica kuti abantu balelukusha ifilamba, ukupunda no kukumbatana. Inyunshipepala ya ku Korea yatile: “Abena Korea tababalile abalukusha ifilamba nge fi abengi pa muku umo e lyo na fyo ifya kuti fileifumina fye.”

Ku Brazil, kwali abapelelemo umwana wabo Cézar, ku bo bakongweleko indalama ninshi ali fye akacece. Pa numa ya myaka 10, alitemenwe sana ilyo asangile banyina. Afumine ku balemusunga abali ne fyuma sana no kubwelela kuli banyina.

Ala abantu balatemwa nga basanga balupwa lwabo pa numa ya kupaatukana na bo no kubalufya! Baibolo yalilondolola ifyo abantunse bafumine mu lupwa lwa kwa Lesa ne fyo cabipile. Ilatweba ne fyo pali ino nshita balebwelela kuli Lesa no kuba ne nsansa. Bushe cali shani? Cinshi cingamwafwa ukubwelela kuli Lesa no kuba ne shi nsansa?

Icalengele Abantunse Ukufuma Kuli Lesa Shibo

Uwaimbile amalumbo alandile pali Yehova Lesa Kabumba ati: “Kuli imwe kwaba akamfukumfuku ka mweo.” (Amalumbo 36:9) Yehova e Wishi wa bamalaika ku muulu, e lyo na bantunse pano calo bonse aba cishinka.

Ilyo Adamu, umwana wa kwa Lesa uwa kubalilapo apondweke, nga fintu tulandilepo mu cipandwa cifumineko, calibipile sana pantu abantunse balifumine kuli Kabumba, Shibo uwaba no kutemwa. (Luka 3:38) Ne calengele ni co ilyo Adamu abembwike, alipanishe ishuko lya kuti ena na bana bakwe abali no kufyalwa bakabe abana ba kwa Lesa. Yehova alilondolwele ukupitila muli Mose, icafumine mu kupondoka kwa kwa Adamu. Atile: “Bayonaula—tabali bana [ba kwa Lesa], e kalema kabo.” “Akalema,” nelyo ukuba no lubembu, e kwafumishe abantunse kuli Lesa, uwa mushilo kabili uwapwililika muli fyonse. (Amalango 32:4, 5; Esaya 6:3) Cali kwati abantunse bashala fye ukwabula umufyashi.—Abena Efese 2:12.

Pa kulanga bwino ifyo abantu bataluka kuli Shibo, Baibolo ita abashaba mu lupwa lwa kwa Lesa ati “abalwani.” (Abena Roma 5:8, 10) Apo balifuma kuli Lesa, abantu balacula ku mitekele yabipa iya kwa Satana e lyo na ku fyabipa fimbi ifyaisa pa mulandu wa lubembu no kukanapwililika. (Abena Roma 5:12; 1 Yohane 5:19) Bushe ifi abantu baba ababembu kuti babwelela mu lupwa lwa kwa Lesa? Bushe abantunse abashapwililika kuti baba abana ba kwa Lesa nga filya fine Adamu na Efa baali ilyo bashilabembuka?

Lesa Alebwesha Abana Bakwe

Yehova mu kutemwa alipekanya fimo pa kuti aafwe abantu abashapwililika abamutemwa. (1 Abena Korinti 2:9) Umutumwa Paulo alondolwele ukutila: “Lesa alewikishisha aba pano calo ku mwine muli Kristu, ukukanabapendela amampuulu yabo.” (2 Abena Korinti 5:19) Nga fintu icipande cifumineko cilondolwele, Yehova Lesa atumine Yesu Kristu ku kutulubula pa membu shesu. (Mateo 20:28; Yohane 3:16) Umutumwa Yohane alembele amashiwi ya kutasha aya kutila: “Moneni ukutemwa uko Shifwe atutemwa, pa kuti tuleitwa abana ba kwa Lesa.” (1 Yohane 3:1) Kanshi abacishinka balipeelwe ishuko lya kubwelela mu lupwa lwa kwa Yehova.

Nangu ca kutila abantunse bonse abalonganikwa babwelela kuli Shibo wa mu muulu, moneni ukuti Baibolo itila baba amabumba yabili. Yalondolola ukutila: “Umwabela ukubekwa [kwa kwa Lesa] uko afwaile umwine ukuti kube ubwangalishi pa mwisulo wa nshita shasontwa, ukulonganya pamo na kabili, ifintu fyonse muli Kristu, ifya mu muulu, ne fya pano isonde.” (Abena Efese 1:9, 10) Mulandu nshi Lesa ateyanishisha ifintu muli uyu musango?

Na kuba ifi Yehova alonganya abana bakwe mu mabumba yabili, calilenga ulupwa lwakwe ukwikatana sana. Tacayafya no kwishiba umulandu aacitila ifi. Ulupwa lwa kwa Lesa lukalamba sana ica kutila kuti twalulinganya ku bekala calo. Mu fyalo fyonse, balasala abantu abanono aba kuba mu buteko pa kuti abashala baletekwa mu mutende ilyo balekonka amafunde. Kwena takwaba ubuteko bwa muntunse ubwaleta umutende wine wine, lelo ubuteko bwa kwa Lesa bwena bukateka bwino sana abantu. Mwi bumba lya kubalilapo ilitwa “ifya mu muulu,” mwaba abana ba kwa Lesa abo Yehova asala ukuba mu buteko bwakwe nelyo Ubufumu bwa mu muulu. Nga baya ku muulu, “bakaba ishamfumu pe sonde.”—Ukusokolola 5:10.

Abana ba kwa Lesa Abakaba Pano Calo

Yehova alelonganya na betwa ati “ifya pano isonde,” e kutila imintapendwa ya bantu pa kuti bakasuke ababa abana bakwe aba pano calo. Lesa umufyashi wabo uwabatemwa alabasambilisha ukuba ne citemwiko ica kutila nangu bafuma mu fyalo ifingi, balikatana. Nangu fye ni balya abaali no lukaakala, abali abaitemwa, abali impulumushi, na bashaleumfwila Lesa, “balabwelela kuli Lesa.”—2 Abena Korinti 5:20.

Nga balya abakaana ukubwelela kuli Lesa pa kuti babe abana bakwe, bena cikaba shani? Pa kuti mu lupwa lwakwe mukabe umutende ne cumfwano, abamukaana, Yehova takabalekepo fye iyo. Kukaba “ubushiku bwa bupingushi no bwakonaulwa kwa bantu bashipepa.” (2 Petro 3:7) Lesa akafumyapo bacipondoka bonse pano calo. Ala abomfwila Lesa bakekala bwino!—Amalumbo 37:10, 11.

Lyena pakakonka imyaka 1000 iya mutende. Muli iyi myaka, bonse abapalama kuli Lesa bakaya balepwililika panono panono pa kuti bakabe nga filya fine Adamu aali. Na bafwa bene bakabuuka. (Yohane 5:28, 29; Ukusokolola 20:6; 21:3, 4) Kanshi Lesa akafikilisha ubulayo bwakwe ubwa kuti: “Ububumbo [e kutila abantunse] na bo bukalubulwa ku busha bwa kubola no kukwata ubuntungwa bwa bukata ubwa bana kwa Lesa.”—Abena Roma 8:21.

Ifyo Mwingacita pa Kuti Mubwelele Kuli Shinwe

Cézar na bena Korea abengi sana abo twacilandapo pa kutendeka balicitilepo fimo pa kuti babe pamo na balupwa lwabo na kabili. Abena Korea balikonkele ifyo babebele muli ilya programu, Cézar na o alifumine ku balemusunga no kubwelela kuli banyina. Na imwe mufwile ukucitapo fimo pa kuti mubwelele kuli Shinwe Yehova Lesa, no kuba mu lupwa lwakwe. Cinshi mufwile ukucita?

Pa kupalama kuli Lesa Shinwe, mufwile ukusambilila Icebo cakwe Baibolo pa kuti mucetekele sana ifyo alaya. Mukasanga ukuti Lesa nga amweba ukucita fimo, ninshi alefwaya ukuti mumwenemo. Mulingile no kumfwa ifyo Lesa alemufunda no kukonka nga amulungika, pantu na kuba Baibolo yeba Abena Kristu ukutila: “Lesa alecita kuli imwe nga ku bana baume. Pantu mwana mwaume nshi uo wishi ashisalapula?”—AbaHebere 12:7.

Nga mwacite fi twalandapo, imikalile yenu ikaaluka icine cine. Baibolo itila: “Mulengwe abapya mu maka ayacincisha ukutontonkanya kwenu, kabili mufwale ubuntu bupya ubwalengelwe umwabela ukufwaya kwa kwa Lesa mu bulungami bwa cine na bucishinka.” (Abena Efese 4:23, 24) Lyena konkeni ifyo umutumwa Petro atufundile ukuti: “Nga abana ba kwa Shinwe, mwilakonkelela lunkumbwa lubi ulo mwali nalo ilyo mwali tamulaishiba Kristu.”—1 Petro 1:14, The Bible in Current Cibemba.

Mukasanga Balupwa Lwenu Abasuma Sana

Ilyo Cézar abwelele kuli banyina, alitemenwe sana ukusanga ukuti alikwata na bakalamba bakwe babili, umwaume no mwanakashi. Na imwe bene nga mwapalama kuli Shinwe wa ku muulu, mukasanga bamunyinenwe abengi sana mu cilonganino ca Bena Kristu. Ilyo muleampana na bo, mukatemwana sana nakalimo ukucila ne fyo mumfwana na balupwa lwenu abo mwafyalwa na bo.—Imilimo 28:14, 15; AbaHebere 10:24, 25.

Tulemukoselesha ukubwelela kuli Shinwe no kuba pamo na bamunyinenwe aba mu cilonganino. Mukomfwa bwino sana nga filya fine Cézar na bena Korea abengi baumfwile ilyo basangile balupwa lwabo.

[Icikope pe bula 8]

Cézar uwa myaka 19 na banyina

[Ifikope pe bula 10]

Citenipo fimo pa kuti mupalame kuli Lesa