Bushe “Lishina Ilishifwile Ukushimbulwa”?

MU MUSUMBA wa St. Louis, mu Missouri ku United States, lwa ku mumana, balikuulako apa kwingilila. Iyi mpongolo iyo bakuulile kale sana, iyalepa amamita 192, e cipumpu calepesha pali fyonse mu United States. Ku lubali lumo ulwa ubu bwingililo, kwaliba icalici ilyo beta ati, Old Cathedral ilishalepa sana.

Akatabo ke calici akalondolola ifyo bakuula ubwingililo bwe calici aka kuti The Story of the Old Cathedral, katila: “Pa muulu wa bwingililo, balipayemfya e lyo pa kati balilembapo ishina lya kwa Lesa mu filembo fya golde ilyo batila talifwile ukushimbulwa.” Nga fintu icikope cilelanga, ifi filembo fya ciHebere fine יהוה (YHWH), ifimininako ishina lya kwa Lesa, filamoneka bwino bwino.

Ilyo bakuulile icalici lya Cathedral kale sana mu 1834, bashimapepo na bantu babo mu St. Louis bafwile balishibe ukuti ili ishina ilyalembelwe mu filembo fya ciHebere, lyalicindama. Nomba mulandu nshi abantu batontonkanishisha ukuti ishina lya kwa Lesa “talifwile kushimbulwa”?

Icitabo ca New Catholic Encyclopedia calilondolola ifyo cali ilyo abaYuda bafumine muli bunkole ku Babiloni no kubwelela ku mwabo mu myaka ya ba500 B.C.E. Citila: “Aba bantu batendeke ukutontonkanya ukutila ishina lya kuti Yahweh [YHWH] lya mushilo sana ica kuti talifwile na kushimbulwa. E ico ponse apaali ishina lya kwa Lesa balelifumyapo no kubikapo ishiwi lya kuti, ADONAI [Shikulu] nelyo ELOHIM [Lesa]. . . . E calengele ukuti mu kupita kwa nshita balabe ifya kushimbula ishina lya kuti Yahweh.” E ico abantu balilekele ukubomfya ishina lya kwa Lesa. Awe basukile balaba ne fyo ishina lyaleshimbulwa pa ntendekelo, ifi fine e fyo balekele no kulishimbula.

Nangu ca kuti te kuti twishibe bwino bwino ifyo ishina lya kwa Lesa lyaleshimbulwa, icacindama ca kutila ukubomfya ili shina kulatupalamika kuli Lesa. Bushe kuti mwatemwa abanenu ukulamwita fye ati “imwe” nelyo kuti mwatemwa balamwita mwi shina lyenu? Nangu ca kutila abanenu balanda ululimi lumbi, kabili tabashimbula bwino ishina lyenu, na lyo line kuti mwatemwa balemwita mwi shina, bushe te ifyo? Na Lesa wine afwaya tulemwita mwi shina lyakwe, ilya kuti Yehova.

Mu ciBemba abantu abengi bashimbula ishina lya kwa Lesa ukuti “Yehova.” Bushe te kuti ciwame bonse abatemwa Lesa balemwita mwi shina pa kuti bapalame kuli ena? Baibolo itila: “Palameni kuli Lesa na o akapalama kuli imwe.”—Yakobo 4:8.