Palameni Kuli Lesa
Uubelela Uluse
‘IMWE, mwe Shikulu muli basuma, mulalekelela.’ (Amalumbo 86:5) Muli aya mashiwi ya cisansamushi, Baibolo itweba ukuti Yehova Lesa alabelela sana uluse. Icacitike ku mutumwa Petro cilalanga apabuta ukuti Yehova ‘alalekelela apakalamba.’—Esaya 55:7.
Pa bo Yesu atemenwe sana, paali na Petro. Nomba pa bushiku Yesu alekelesheko ukuba pe sonde, Petro alicitile ulubembu ulukalamba nga nshi pa mulandu no mwenso. Ilyo Yesu balemupeela imilandu ya bufi, Petro ali mu lubansa lwa mupepi no kwali Yesu, kabili alikeene Yesu, te muku fye umo, lelo imiku itatu. Ilyo Petro akeene Yesu akoola na pa lulimi umuku walenga butatu, Yesu ‘alipilibwike no kulolesha Petro.’ (Luka 22:55-61) Elenganyeni ifyo Petro aumfwile ilyo Yesu amuloleshe. Ilyo ailwike ukuti acita ulubembu ulukalamba sana, Petro ‘atimwike mu filamba no kulila.’ (Marko 14:72) Ico akeene Yesu imiku itatu, uyu mutumwa walapiile, nalimo alemona kwati Lesa te kuti amubelele uluse.
Ilyo Yesu abukile ku bafwa, alilanshenye na Petro. Ukwabula ukutwishika ici calengele Petro ashininkisha ukuti Yesu alimubelele uluse. Yesu talandilepo amashiwi ayabi nelyo ukumupeela umulandu. Lelo amwipwishe fye ukuti: “Bushe walintemwa?” Petro aaswike ati: “Ee, mwe Shikulu, mwalishibo kuti nalimutemwa.” Yesu amwebele ati: “Liisha utwana twapanga twandi.” Yesu alibwekeshepo icipusho, Petro na o abwekeshepo icasuko cimo cine, ne myasukile yakwe ifwile yalilangile ukuti alimutemenwe. Yesu amwebele ukuti: “Cemo twana twa mpaanga twandi.” Yesu na kabili abwekeshepo ukwipusha Petro icipusho cimo cine ukuti: “Bushe walintemwa?” Awe lyena “Petro aiketwe ubulanda” kabili atile: “Mwe Shikulu, mwalishiba ifintu fyonse; mwalishiba ukuti nalimutemwa.” Yesu amwaswike ati: “Liisha utwana twa mpanga twandi.”—Yohane 21:15-17.
Mulandu nshi Yesu aleipushisha pa fyo no kwishiba aishibe? Apo Yesu aleishiba ifya mu mitima ya bantu, alishibe ukuti Petro alimutemenwe. (Marko 2:8) Ico Yesu aipushishe ifi fipusho ni co alefwaya Petro alange imiku itatu ukuti alimutemwa. Amashiwi ya kwa Yesu aya kuti: “Liisha utwana twa mpanga twandi. . . . Cemo twana twa mpaanga twandi. . . . Liisha utwana twa mpanga twandi,” yalangile umutumwa walapiile ukuti Yesu alitwalilile ukumucetekela. Na kuba, Yesu apeele Petro umulimo wa kusakamana abasambi bakwe abacindama nga nshi ababa nge mpaanga. (Yohane 10:14, 15) Petro afwile alitemenwe sana pa kwishiba ukuti Yesu alitwalilile ukumucetekela!
Nge fyo twamona, Yesu alibeleele uluse umutumwa wakwe uwalapile. Apo imibele ya kwa Yesu yalelangilila ifyo Wishi aaba, te kuti tutwishike ukuti na Yehova wine alibeleele Petro uluse. (Yohane15:19) Yehova ni Lesa wa nkumbu, uwaiteyanya ‘ukulekelela’ umubembu nga alapila, tashimunuka. Bushe aya mashiwi tayamusansamwishe?