Amepusho Ukufuma ku Babelenga

Pa Abena Roma 11:26, umutumwa Paulo asosele ukuti, “Israele onse akapusuka.” Bushe apilibwile ukuti kukaba inshita imo ilyo abaYuda bonse bakasanguka Abena Kristu?

Iyo, te fyo apilibwile. Uluko ulwafumine muli Abrahamu lwalikeene Mesia. Kabili imyaka yakonkelepo pa numa ya mfwa ya kwa Yesu, calimoneke fye apabuuta ukuti abaYuda bonse tabali na kusanguka Abena Kristu. Na lyo line, amashiwi Paulo alandile aya kuti “Israele onse akapusuka” yali ya cine. Mulandu nshi twasosela ukuti aya mashiwi yali ya cine?

Yesu aebele bashimapepo abaYuda abaliko ilyo ali pano calo ukuti: “Ubufumu bwa kwa Lesa bukapokwa kuli imwe no kupeelwa ku luko ulutwale fisabo fya buko.” (Mat. 21:43) Apo uluko lwa bena Israele lwalikeene Yesu, Yehova ali no kulukaana no kubika amano ku luko ulupya, ulo asubile no mupashi wakwe. Paulo aitile ulu luko ukuti “Israele wa kwa Lesa.”—Gal. 6:16.

Amalembo yamo ayaba mu Amalembo ya ciGriki aya Bwina Kristu yalanga ukuti “Israele wa kwa Lesa” apangwa na Bena Kristu basubwa, ababa 144,000. (Rom. 8:15-17; Ukus. 7:4) Pa kulanga ukuti muli ili bumba mukaba na bashili baYuda, Ukusokolola 5:9, 10 kutila Abena Kristu basubwa bafuma “mu mutundu onse no lulimi na bantu no luko.” Abasubwa no mupashi wa kwa Lesa basalilwe ukuba “ubufumu kabili bashimapepo . . . , kabili bakaba ishamfumu pe sonde.” Nangu ca kutila Yehova alikeene abena Israele ukuba uluko lwaibela, abena Israele bamo bali no kuba ifibusa fyakwe. Abatumwa na Bena Kristu ba kubalilapo abengi bali ifibusa fya kwa Lesa. Kwena, balya baYuda, balekabilwa ukushitwa no mulopa wa kwa Yesu Kristu, nga filya fine abantu bonse bashitilwe.—1 Tim. 2:5, 6; Heb. 2:9; 1 Pet. 1:17-19.

Nangu cingati abaYuda abengi mu nshita ya batumwa balipanishe ishuko lya kuteka pamo na Yesu, ici tacalengele ukuti Lesa afilwe ukufikilisha ukufwaya kwakwe. Yehova te kuti afilwe ukufikilisha ukufwaya kwakwe, pantu alandile ukupitila muli kasesema wakwe ukuti: “E fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.”—Esa. 55:11.

Ukufwaya kwa kwa Lesa ukwa kuti ba144,000 bakateke pamo no Mwana wakwe mu muulu kukafikilishiwa. Baibolo yalilondolola bwino bwino ukuti Lesa akasuba abantu 144,000. Tapakabulile nangu umo!—Ukus. 14:1-5.

E ico, ilyo Paulo alembele ukuti “Israele onse akapusuka,” taletila abaYuda bonse bakasanguka Abena Kristu. Lelo, apilibwile ukuti ukufwaya kwa kwa Lesa ukwa kuti ba144,000, uluko ulwasubwa no mupashi, bakateke pamo no Mwana wakwe Yesu Kristu mu muulu kukafikilishiwa. Pa nshita iyo Lesa umwine asala, impendwa yonse, e kutila “Israele onse” nelyo Abena Kristu basubwa bakapusuka, na mu kulekelesha bakateka nge shamfumu kabili bashimapepo mu Bufumu bwa kwa Mesia.—Efes. 2:8.

[Ifikope pe bula 28]

Abasubwa bafuma mu “mutundu onse no lulimi na bantu ne nko”