Fundeni Abana Benu

Rahabu Alyumfwile Icacitike

NATWELENGANYE ukuti tuli mu musumba wa Yeriko, mu calo ca Kanaani, imyaka nalimo 3,500 iyapita. Muli uyu musumba mulekala no mukashana uwe shina lya Rahabu. Uyu mukashana afyelwe pa numa lintu Mose atungulwile abena Israele ukubafumya mu busha mu Egupti e lyo no kubapisha pa mushili uwauma pali Bemba Wakashika! Nangu ca kutila pali iyi nshita takuli ifilimba, TV, nelyo Intaneti, Rahabu naumfwa pa lwa ifi fipesha mano te mulandu no kuti uko fyacitikile kutali sana no ko ekala. Bushe nawishiba uko omfwile?—a

Ukwabula no kutwishika abatandashi bafwile e bashimike pali ifi fipesha mano. Ilyo Rahabu alekula, aleibukisha ifyo Yehova acitiile abantu bakwe. Nomba aumfwa na fimbi ifya kupapusha pa bana ba kwa Israele. Pa numa ya myaka 40 iyo baendele mu matololo, nabengila mu calo ca Kanaani, kabili Lesa alebafwa ukucimfya bonse abalebalwisha. Lyena Rahabu aumfwa ukuti abena Israele bapangile inkambi bushilya fye bwa mumana wa Yordani ukufuma mu Yeriko!

Icungulo bushiku cimo, kwaisa abeni babili kuli Rahabu pantu nabeshiba ukuti uko abomba kuli incende ya kwikalako abeni. E ico abengisha no kubalanga umwa kusendama. Mu nshita ya bushiku, imfumu ya mu Yeriko yaishiba ukuti abena Israele nabesa mu Yeriko ku kulengula icalo kabili bele ku ng’anda ukubomba Rahabu. E ico imfumu yatuma inkombe kuli Rahabu, ukuyamweba ukuti afumye abaume abeshile mu mwakwe. Bushe nawishiba ifyo Rahabu eshibe kale kale pali aba baume ne fyo acitilepo?—

Ilyo ne nkombe shafumine ku mfumu tashilafika kuli Rahabu, ninshi ena naishiba ukuti abeni abeshile bena Israele abeshile mu kulengula icalo. E ico abafisa mu mutenge, kabili aeba inkombe ishifumine ku mfumu ukuti: “Ca cine, abaume bacisa kuli ine . . . Nomba pa nshita ya kwisala impongolo ilyo kwacifiita, e lyo aba baume bacifuma.” Rahabu abeba ukuti: “Bakonkeni bwangu bwangu.”

Bushe uletontonkanya ukuti cinshi Rahabu acifishila shilya nengu?—Umwine alondolola ilyo asheba ukuti: “Ninjishiba ukuti nangu cibe shani Yehova akamupeela cino calo . . . Pantu twalyumfwa ifyo Yehova akamishe amenshi ya muli Bemba Wakashika pa ntanshi yenu ilyo mwafumine mu Egupti.” Rahabu alyumfwile na fimbi pa fyo Lesa alengele abena Israele ukucimfya abalwani babo.

Ukulingana na AbaHebere 11:31, Yehova alitemenwe nga nshi ukuti Rahabu alicingilile shilya nengu. Na kabili alitemenwe ukuti Rahabu alilombele inengu ukuti: ‘Apo ndi ne cikuuku kuli imwe, lapeni ukuti ilyo Yeriko ikonaulwa, mukaleke batata na bamayo bakabe aba mweo, na bandume yandi na bankashi nandi.’ Aba baume balapile ukuti bakacita ifi fine kulila fye Rahabu akonka ifyo bamwebele ukucita. Bushe nawishiba ifyo bamwebele ukucita?—

Inengu shaeba Rahabu ukuti, ‘Senda iyi ntambo yakashika no kukaka pe windo, kabili ukalonganike balupwa lobe bonse mu ng’anda yobe. Nga wacite fi, bonse abakaba mu ng’anda tabakafwe.’ Rahabu acita filya fine fye inengu shimwebele. Bushe walishiba icaishilecitika?—

Abena Israele bafika ku nse ya cibumba ca Yeriko. Bashinguluka umusumba umuku umo cila bushiku pa nshiku 6, ukwabula ukulanda nangu cimo. Pa bushiku bwalenga 7, bashinguluka umusumba imiku 7 kabili bapunda, ukupunda ukukalamba. Icibumba ca Yeriko cabongoloka, icibumba fye cashala ni cilya apali intambo yakashika iyo bakakile pe windo! Rahabu no lupwa lwakwe bapusuka.—Yoshua 2:1-24; 6:1-5, 14, 15, 20-25.

Finshi twingasambilila ku fyacitile Rahabu?—Rahabu tapelele fye pa kumfwa pa fintu ifyo Lesa alecita ku kucingilila abantu bakwe lelo alyafwile na bantu ba kwa Lesa ilyo akwete ishuko lya kucite fyo. Kanshi Rahabu asalilepo ukubombela Yehova pamo na bantu ba kwa Lesa! Bushe na iwe e fyo ukacita?—Tulesubila ukuti e fyo ukacita.

[Futunoti]

Amepusho:

○ Lyashi nshi ilyacindama ilyo Rahabu aumfwile ilyo ali umwaice?

○ Bushe Rahabu acitile shani kuli balya abena Israele inengu, kabili mulandu nshi?

○ Bushe Rahabu aebele shilya nengu ukuti shimulaye finshi?

○ Twaishiba shani ukuti Yehova alitemenwe Rahabu, kabili kuti wacita shani pa kuti umupashanye?