Ifyo Tusambilila Kuli Yesu

Pa fyo Abantunse Bakekala ku Ntanshi

Bushe Yesu alilandilepo ukuti kukaba abakaya ku muulu?

Ee, alilandile! Yesu wine alibuushiwe ku bafwa, kabili aile kuli Wishi ku muulu. Lelo libe talafwa no kubuushiwa, aebele abatumwa bakwe aba cishinka 11 ukuti: “Mu ng’anda ya kwa Tata mwaba apa kwikala apengi. . . . Ndeya ku kumupekanishisha apa kwikala.” (Yohane 14:2) Lelo banono fye e bakwata ishuko lya kuya ku muulu. Yesu alilandile bwino pali uyu mulandu ilyo aebele abasambi bakwe ati: “Mwilatiina, mwe mukuni unono, pantu Shinwe afwaya ukumupeela ubufumu.”—Luka 12:32.

Cinshi “umukuni unono” ukalacita ku muulu?

Yehova afwaya ili bumba ilinono ukulateka pamo na Yesu ku muulu. Twaishiba shani ukuti e fyo afwaya? Ilyo Yesu abuushiwe, alisokolwele ku mutumwa Yohane ukuti aba busumino bamo baali no kuba “bashamfumu abakalateka isonde.” (Ukusokolola 1:1; 5:9, 10) Iyi ni mbila nsuma. Pantu ubuteko ubusuma e cintu cimo ico abantunse bafwaya sana. Finshi ubu buteko ubutekwa na Yesu bukacita? Yesu atile: “Ilyo ifintu fikabumbwa cipya cipya, ilyo Umwana wa muntu akekala pa cipuna cakwe ica bufumu ica bukata, na imwe bene mwe bankonka mukekala pa fipuna fya bufumu 12.” (Mateo 19:28) Ubu buteko bwa kwa Yesu bukalenga ifintu pa calo ‘fikabumbwe cipya cipya’ nelyo ukuba ifipya, kwati ni filya fine fyali pa kubala ilyo abantu ba kubalilapo babili tabalabembuka.

Bushe Yesu atile cikaba shani ku bantunse bonse abashala?

Abantu bapangilwe ukuti baleikala pa calo, ukupusanako na Yesu uwapangilwe ukulaikala mu muulu. (Amalumbo 115:16) E co Yesu alandiile no kuti: “Imwe muli ba pano calo; ine ndi wa ku muulu.” (Yohane 8:23) Yesu alilandilepo na pa fyo ifintu fikawama ku ntanshi ku bantu abakekala pe sonde. Atile: “Balipaalwa abafuuka, pantu bakapyana isonde.” (Mateo 5:5) Pa kulanda aya mashiwi, alelosha kuli yalya mashiwi yambi ayaba mwi buuku lya Amalumbo, ayatila: “Abafuuka e bakekala mu calo, kabili bakasekelela nga nshi pantu umutende ukafula. Abalungama e bakekala mu calo, kabili bakekalamo umuyayaya.”—Amalumbo 37:11, 29.

Kanshi ababa mu “mukuni unono,” abakaya ku muulu, te bakakwata umweo wa muyayaya beka. Yesu alilandile pe subilo lya cinabwingi ca bantunse ba mu calo. Atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16.

Bushe Lesa akafumyapo shani amafya ayacusha abantunse?

Yesu alandile pa fintu fibili ificusha abantunse ifikafumishiwapo ilyo atile: “Nomba cino calo cilepingulwa; nomba kateka wa pano calo bakamupoosa ku nse.” (Yohane 12:31) Ica kubalilapo, abantu babipa abacusha abanabo bakapingulwa no konaulwa. Ica bubili, Satana bakamufumya pe sonde kabili takalelufya abantu na kabili.

Inga balya abantu bonse abaliko kale sana abafwile ukwabula ukukwata ishuko lya kusambilila pali Lesa na Kristu no kukwata icitetekelo muli bena? Yesu aebele icipondo baipaile mupepi nankwe ati: “Uli no kuba na ine mu Paradaise.” (Luka 23:43) Yesu akabuusha ulya muntu ukusanshako na bantu bambi abengi nga nshi. Akamubuushisha muli paradaise pano pene pe sonde no kumupeela ishuko lya kusambilila pali Lesa. Pa numa, akaba pa bafuuka kabili abalungama abakakwata umweo wa muyayaya pano pene pe sonde.—Imilimo 24:15.

Nga mulefwaya ukwishibilapo na fimbi, belengeni ifipandwa 3 na 7 mu citabo citila Bushe Cinshi Baibolo Isambilisha?a

[Futunoti]

[Icikope pe bula 23]

“Abalungama e bakekala mu calo, kabili bakekalamo umuyayaya.”—Amalumbo 37:29