Mwaliba Ubusuma Ubwingi!
AMAPEPO YA LUPWA ne sambililo lya Baibolo filafwaikwa pa kukusha abana ukulingana no “kusalapula kwa kwa Yehova no kukonkomesha kwakwe.” (Efes. 6:4) Nga muli bafyashi, mwalishiba ukuti abana balatendwa bwangu ukusambilila. Kuti mwacita shani pa kuti balebikako amano? Natulande pa fyo abafyashi bamo bacita.
Ba George aba ku California, U.S.A., batila, “ilyo abana besu bali abaice sana, ine no mwina mwandi twale-esha ukucita ifintu ifyalekanalekana pa kuti isambililo lya lupwa lileumfwika bwino. Limo twalefwala ifyo abantu balandwapo mu Baibolo balefwala no kucita ifisela pa fyo twabelenga mu Icitabo Candi ca Malyashi ya mu Baibolo. Twalepanga inkonto, bapaanga, imiseke e lyo na fimbi. Twalecita ifyangalo fya kulondolola abalembwa mu Baibolo no kwipusha abengeshiba abo bantu, kabili twalilembele ifipusho fya mu Baibolo pa cipampa ifyayanguka ne fyakosa. E lyo kwaleba ne fyo twalecitila capamo, pamo nga ukupanga ubwato bwa kwa Noa no kutantika ifintu ifyo Baibolo yalandapo ukulingana ne nshita fyacitikilepo. Limo twale-esha ukulenga abantu ne fintu fimbi ifyalandwapo mu malyashi ya mu Baibolo. Pali ino nshita tulepekanya ukutendeka ukulenga ifya kufwala fya bulwi ifyalondololwa pa Abena Efese 6:11-17, kabili cila muntu afwile ukulanda ico ica kufwala asala cimininako. Ifi fyalitwafwa ukuipakisha isambililo lya lupwa.”
Ba Debi aba ku Michigan, U.S.A, bashimika ukuti: “Ine na bena mwandi caletukosela ukwafwa umwana wesu ilyo ali ne myaka itatu ukukutika nga tuli pe sambililo. Bushiku bumo ilyo nalemubelengela ilyashi lya kwa Isaki na Rebeka mu Icitabo Candi ca Malyashi ya mu Baibolo, nabuulile utulubi twa kwangasha tubili no kutubomfya ku kulangilila ifyo Isaki na Rebeka balecita. Umwana wesu atampile ukukutika. Mu myeshi yakonkelepo, utu tulubi twa kwangasha twaletubomfya ku kwimininako abantu na bambi abalandwapo muli Baibolo. Pa numa ya kubelenga ilyashi lya mu Baibolo, umwana wesu alebuula utulubi twa kwangasha nelyo ifipe fimbi ifyo engabomfya ku kucita icilangililo ca mu Baibolo. Alefwayafwaya mpaka asanga ifyo engabomfya! Akabokoshi ka nsapato akasangwile ing’anda ya kwa Rahabu, na katambo kakashika e kali umwando wakashika. Akasoka ka kwangasha akalepeele amamita 1.5 akapombelwe ku kamuti e kali insoka ya mukuba iyalandwapo pa Impendwa 21:4-7. Fyonse ifyalebomfiwa, twalefisungila mu cola icikalamba. Icaweme ca kuti umwana wesu ilingi line aleikala mu ng’anda no kufwailisha mu ‘cola umo alesungila ifya kubomfya pa kusambilila amalyashi ya mu Baibolo.’ Twaletemwa ukumona umwana aleipangila umwine ifisela pa malyashi ya mu Baibolo!”
Ukukusha abana takwayanguka, kabili pa kwafwa abana ukutemwa ukubombela Yehova, palapita inshita ikalamba. Lelo, ilyo muli pa mapepo ya lupwa na pe sambililo lya Baibolo kuti mwasambilisha abana na fimbi ifya kwa Lesa. Mu kucite ifi mwaliba ubusuma ubwingi!