Watchtower LAIBRARE YA PA INTANETI
Watchtower
LAIBRARE YA PA INTANETI
Cibemba
  • BAIBOLO
  • IMPAPULO
  • UKULONGANA
  • w15 1/15 amabu. 3-7
  • Baliipeele Abene mu Kuitemenwa​—Mu New York

Vidio mulefwaya tamuli

Mukwai yafilwa ukutambika

  • Baliipeele Abene mu Kuitemenwa​—Mu New York
  • Ulupungu lwa kwa Kalinda—2015
  • Utumitwe utunono
  • Ifipalileko
  • BALAPAALWA PA FYO BAIPEELESHA
  • IFYO BACIMFISHE AMAFYA
  • TABASAKAMANA PA FYA KU NTANSHI
  • “AMAPAALO MPAKA KUKABULE INCENDE APA KUBIKA AMAPAALO YAMBI”
  • Ukulunduluka Ukulecitika mu Kuteyanya
    Ilyashi lya Nte sha kwa Yehova mu 2014
  • Bushe Umulimo wa Makuule ku Warwick Ufikile pi?
    Ilyashi lya Nte sha kwa Yehova mu 2016
  • Umulimo wa Bukuule ku Warwick Ulelunduluka Bwangu Sana
    Ilyashi lya Nte sha kwa Yehova mu 2015
  • Ifyacitike Umwaka Wapwile
    Ilyashi lya Nte sha kwa Yehova mu 2017
Moneni na Fimbi
Ulupungu lwa kwa Kalinda—2015
w15 1/15 amabu. 3-7
Amakuule pa Warwick, mu New York

Baliipeele Abene mu Kuitemenwa—Mu New York

IMYAKA inono iya ku numa, ba Cesar na bakashi babo ba Rocio, baleikala bwino sana mu California umo ba Cesar balebomba incito ya kupanga fimashini fya kukafishako, ukutalalika, no kwingisha umwela mu fikuulwa. E lyo ba Rocio balebomba ama-awala ayanono pe ofeshi lya kwa dokota. Balikwete ing’anda lelo tabakwete abana. Kwali cimo icacitike icalengele ukuti baluke. Cinshi ico cine?

Mu October mu 2009, Bethel ya ku United States yatumime amakalata ku filonganino fyonse mu United States, ayakwitilapo bonse abengafwaya ukwafwilishako umulimo wa kukusha amaofeshi mu Wallkill, ku New York. Na bonse abacila pa myaka 35 nabo balibasumunishe ukwipusha ukubombako. Ba Cesar na ba Rocio batile: “Apo twalicila imyaka 35, twamwene ukuti ili lyali lishuko ilya kuyabombelako pa Bethel ilyo tushalefwaya ukupanya!” Ukwabula ukupoosa ne nshita aba abaupana balitumine kalata ku Bethel.

Bamunyinefwe bamo ababomba pa Warwick

Bamunyinefwe bamo ababomba pa Warwick

Ba Cesar na ba Rocio balilolelele ukucila pa mwaka umo lelo tababetile ku Bethel. Na lyo line, balyangwishe imikalile yabo pa kuti fye bafikilishe ubuyo bwabo. Ba Cesar batile: “Twayalwile umuputule twalesungilamo motoka ukuba umuputule wa kwikalamo kabili twatendeke ukusonkesha ing’anda yesu. Iyi ng’anda yali iikulu sana lelo twasalilepo ukuya mu kamuputule akanono. Ico twacitile ifi twalefwaya ukuti cikatwangukile ukuya ku Bethel nga batwita.” Cinshi cacitike ilyo bacitile ifi? Ba Rocio batile: “Pa numa fye ya mweshi umo ukutula apo twakukiile mu kamuputule akanono, balitwitile ukuyabombako ku Wallkill. Twalimwene ukuti ukwangusha imikalile kwalengele ukuti Yehova atupaale.”

Ba Jason, ba Cesar na ba William

Ba Jason, ba Cesar, na ba William

BALAPAALWA PA FYO BAIPEELESHA

Bamunyinefwe na bankashi abengi, bacita nga filya ba Cesar na ba Rocio bacitile pa kuti fye babombeko umulimo wa bukuule mu New York. Bamo balebombako umulimo wa kukusha amaofeshi pa Wallkill, e lyo bambi nabo balekuulako amaofeshi yakalamba mu Warwick.a Abaupana abengi balisha amayanda yabo ayasuma, incito ishisuma, ne fitekwa fyabo pa kuti fye balebombela Yehova bwino. Bushe Yehova alibapaala pa kuipeelesha kwabo? Ala alibapaala icine cine!

Ba Way baleputula umupaipi

Ba Way

Ku ca kumwenako, ba Way, ababika amalaiti no kulungisha ifipe ifya malaiti na ba Debra, bonse abali ne myaka ukucila pali 50, balishitishe ing’anda yabo ne fipe ifingi ifyo bakwete mu Kansas kabili baile ku Wallkill uko batendeke ukubombela pa Bethel nangu ca kuti te po baleikala.b Nangu ca kuti balyalwile imikalile yabo, ba Way na ba Debra, balipaalwa icine cine. Ba Debra balandile pa mulimo balebomba pa Bethel ukuti: “Limo limo ng’umfwa kwati ndebombako umulimo wa kukuula mu Paradaise nga filya tumona mu fikope ifiba mu mpapulo shesu!”

Ba Melvin na ba Sharon balishitishe ing’anda ne fipe fyabo mu South Carolina pa kuti babombeko pa Warwick. Nangu ca kuti tacayangwike ukucita ifi bacitile, aba abaupana bamona ukuti lishuko ukubombako uyu umulimo uwacindama. Batile: “Twalitemwa sana pa kwishiba ukuti tulebombako umulimo uukalamba uwakwafwilisha icilonganino ca mwi sonde lyonse.”

Ba Kenneth balepituluka mu fipepala fya makuule

Ba Kenneth

Ba Kenneth, abalebomba kale umulimo wa kukuula, na ba Maureen, bonse abali ne myaka ukucila pali 50, bafumine ku California ukuya mukubomba umulimo wa makuule ku Warwick. Pa kuti bakukiile ku Warwick, baebele nkashi umo mu cilonganino ukulabasungilako ing’anda kabili baebele balupwa wabo ukulasakamana ba wishi ba ba Kenneth. Bushe balalanguluka pa fyo bacitile pa kuti baye mu kubombela pa Bethel? Awe nakalya! Ba Kenneth batile: “Tulenonkelamo nga nshi nangu ca kuti tulakwata amafya, mwaliba ifisuma ifingi kabili tulekoseleshako na bambi ukubombako uyu mulimo.”

IFYO BACIMFISHE AMAFYA

Abengi abaipeelesha ukuyabomba ukwaba amakuule balicimfya amafya ayo bakwete. Ku ca kumwenako, ba William na ba Sandra, bonse babili abali ne myaka ukucilako fye panono pali 60, baleikala bwino mu Pennsylvania. Balikwete kampani iyalepanga ifyela, iyakwete ababomfi 17. Bali mu cilonganino umo bakulile kabili balupwa wabo abengi baleikala muli ici cine cifulo. Ilyo babetile ukuya mu kubomba ku Wallkill, balishibe ukuti bali no kusha balupwa e lyo ne fintu ifyo babeleshe. Ba William batile: “Ubwafya ubukalamba twakwete bwa kusha imikalile iisuma.” Lelo, pa numa ya kupepelapo sana, aba babili bapingwilepo ukukuuka kabili tabalanguluka pa fyo basalilepo ukucita. Ba William batile: “Takuli ico twingalinganya ku nsansa isho twakwata pa kubombako uyu mulimo na pa kulabombela pamo na baba pa Bethel. Ine na Sandra twaliba ne nsansa nga nshi ukucila isho twakwete kale!”

Abaupana bamo ababombela pa Wallkill

Abaupana bamo ababombela pa Wallkill

Ba Ricky, abakalamba ba makuule mu Hawaii, balibetile ukuyabombako umulimo wa makuule ku Warwick. Abena mwabo ba Kendra, balefwaya ukuti ba Ricky basumine ukuyabombako uyu mulimo. Lelo, balesakamana ifyo cali no kuba ku mwana wabo Jacob uwali ne myaka 11. Balelanguluka nga cali no kuba fye bwino nga ca kuti bakukiile ku New York kabili tabaishibe nga ca kuti umwana wabo aali no kubelesha icifulo icipya.

Ba Ricky batile: “Ico twalefwaisha sana, kusanga icilonganino umwaba abacaice abalelunduluka mu fya kwa Lesa. Twalefwaya ukuti umwana wesu akakwate ifibusa ifisuma ifingi.” Nomba icacitike ca kuti, icilonganino baileko mwali fye abacaice abanono lelo calikwete aba ku Bethel abengi. Ba Ricky batile: “Ilyo twabwelele ku kulongana kwa kubalilapo muli ici cilonganino, nalipwishe Jacob ifyo ayumfwile pa cilonganino cipya ico twaileko, pantu tamwali abacaice abo alingene nabo. Anjebele ati, ‘Mwisakamana, Tata. Abali no kuba abanandi ni bamunyina bacaice abafuma ku Bethel.’”

Jacob na bafyashi bakwe bali pa Ng’anda ya Bufumu balelanshanya no ubombela pa Bethel

Jacob na bafyashi bakwe balabishanya bwino na babomba pa Bethel ababa mu cilonganino cabo

Ifyo Jacob alandile e fyo cali. Bamunyinefwe abacaice abalefuma ku Bethel e bali ifibusa fyakwe. Finshi fyafuminemo? Ba Ricky batile: “Bushiku bumo ilyo nalepita mupepi no muputule umwalelaala umwana wesu namwene amalati nayaka. Naletontonkanya ukuti nalamusanga aleyangala ifyangalo fya pa komputa, lelo nasangile alebelenga Baibolo! Ilyo namwipwishe ifyo alecita, Jacob anjaswike ati, ‘Ndi mubomfi wacaice uwa pa Bethel, kabili ndefwaya ukupwisha ukubelenga Baibolo mu mwaka umo.’” Ba Ricky na ba Kendra baliba ne nsansa sana te pa mulandu fye wa kuti ba Ricky balabombako umulimo wa makuule pa Warwick lelo na pa mulandu wa kuti ukuukuka kwabo kulelenga umwana wabo alelunduluka mu fya kwa Lesa.—Amapi. 22:6.

TABASAKAMANA PA FYA KU NTANSHI

Ba Luis na ba Dale

Ba Luis na ba Dale

Apo amakuule ya pa Wallkill na pa Warwick yali no kupwa, ninshi bonse ababombako uyu mulimo balishiba ukuti umulimo wabo uwa pa Bethel tawakatwalilile. Bushe aba bamunyinefwe na bankashi balasakamana sana pa fyo bakaya mukwikala ne fyo bakalacita? Awe iyo! Abengi bayumfwa nge fyo ba John, abakalamba ba makuule abafuma ku Florida na bakashi babo ba Carmen, ababomba umulimo wa kuitemenwa pa Warwick bayumfwa, abatile: “Twalimona ifyo Yehova atusunga ilyo tulekabila ifintu fimo. Twalishiba icine cine ukuti Yehova tatuleta pali cino cifulo e lyo pa numa akatulekeleshe.” (Amalu. 119:116) Ba Luis, abapanga ifya kucingilila umulilo, na bena mwabo ba Quenia, ababombela pa Wallkill batile: “Twalimona ifyo Yehova aba kapekape ilyo atupeela ifyo tukabila. Nangu ca kuti tatwaishiba ifyo akatusakamana, ilyo akatusakamana, noko akatusungila, twalicetekela sana ukuti akatwalilila ukutusakamana.”—Amalu. 34:10; 37:25.

“AMAPAALO MPAKA KUKABULE INCENDE APA KUBIKA AMAPAALO YAMBI”

Ba John na ba Melvin

Ba John na ba Melvin

Bamunyinefwe abengi ababombako umulimo wa makuule mu New York abalafwaya nga balikeene ukubombako. Lelo, balyeseshe Yehova, nga filya fine atweba bonse ukucita, atila: “Munjeshe muli ici, . . . mumone nga nshakamwiswile ifipunda fya mu muulu no kumupongolwela amapaalo mpaka kukabule incende apa kubika amapaalo yambi.”—Mal. 3:10.

Bushe na imwe kuti mwaesha Yehova no kumona nga ca kuti takamupaale? Tontonkanyeni pa fyo mwingacita pa kuti mukabombeko umulimo wa makuule ukuli konse, nampo nga ni mu New York nelyo ku ncende shimbi ukuli amakuule, muli no kumona ifyo Yehova akamupaala.—Marko 10:29, 30.

Ba Gary

Ba Gary

Ba Dale, bainjiniya, na ba Cathy, abafuma ku Alabama, balandile ukuti uyu mulimo usuma icine cine. Ilyo balebomba pa makuule ya mu Wallkill, balandile abati: “Nga kuti mwaitemenwa ukusha imikalile yenu iisuma, mukamona ifyo umupashi wa kwa Yehova ubomba.” Bushe mwalishiba ico mufwile ukucita, pa kubombako uyu mulimo? Ba Dale batile: “Icifwaikwa fye kwangusha sana imikalile. Ala tamwakalanguluke ukuti mwalibombeleko uyu mulimo!” Ba Gary abafuma ku North Carolina, balibomba mu mulimo wa makuule pa myaka 30. Bena na bena mwabo ba Maureen, batile amapaalo yamo ayo bakwata ilyo babomba pa Warwick ya “kwishiba no kubombela pamo na bamunyina na bankashi ababombela Yehova pa myaka iingi pa Bethel.” Na kabili ba Gary batile: “Pa kubombela pa Bethel, mufwile ukwangusha imikalile, na kuba e fyo tufwile fye ukucita muli shino nshiku sha kulekelesha.” Ba Jason, abalebomba umulimo wa kubika amalaiti mu fikuulwa, na ba Jennifer abafumine ku Illinois, batile umulimo wa makuule pa Wallkill “mulimo uusuma uo tukalabomba na mu calo cipya.” Ba Jennifer nabo batile: “Tulaba ne nsansa pa kwishiba ukuti Yehova alatasha pa milimo yonse iyo tubomba kabili takalabe imilimo iyo tulebomba. Ukwabula no kutwishaka Yehova akamupaala.”

a Moneni icitabo ca Ilyashi lya Nte sha kwa Yehova 2014, amabula 12-13.

b Bamunyinefwe ababomba pa Bethel ubushiku bumo nelyo inshiku ishingi mu mulungu balaisakamana abene.

BUSHE NA IMWE KUTI MWABOMBAKO?

Ico “umutima” wa Mfumu Davidi walefwaya kukuulila Yehova ing’anda. (1 Imila. 22:7) Ico David alefwaya fye kubombako umulimo wa kukuula itempele ilyali no kulenga abantu ukulumbanya no kucindika Lesa. Davidi abapo pali lelo, bushe nga omfwa shani pa makuule ayakalamba ayabako?

Nkanshi alebombako umulimo wa makuule

Apo bakabila ba mbila nsuma iya Bufumu balefulilako fye e lyo na kabili ne mpela ya cino calo naipalama, ifikuulwa fya kupepelamo Yehova filefwaikwa sana. (Esa. 60:22; Haba. 2:3) Ifikuulwa ifilefwaikwa ni ifi; Amaofeshi ya Bethel, Ifikuulwa fya Kulonganinamo Ukulongana Kukalamba, Amayanda ya Bufumu, Amaofeshi ya Bakapilibula, ne fikuulwa fya kukwatilamo amasukulu ya Bulesa. Pa kuti umulimo wa makuule ubombwe bwino, bakabomba abakuitemenwa abengi abaishiba imilimo balefwaikwa sana. Bamunyinefwe pamo nga, abaishiba ukuceceeta impanga ne fikuulwa, ukupanga amapulani, bainjiniya, abaishiba bwino ifya kushita ifintu, ifya kwangalila imilimo ya makuule, abapima impanga, abaishiba bwino ukukuula, ukukandila indaka, abaishiba ifya kubika fimashini, ukubika imipaipi ya menshi, ukwengelela, ifya kubika amalaiti, ukupala imbao, ifya kwensha no kulungisha fimashini ifikalamba, ukubyala amaluba no lunkoto, na baishiba ukuceeceeta ifikuulwa ukumona nga nafikuulwa bwino.

Nalimo na mu calo mwikala abakwafwilisha pa makuule balefwaikwa sana. Na kuba, na bakwafwilisha pa makuule mu fyalo fimbi nabo balefwaikwa. Bushe kuti mwatemwa ukuyabombako? Nga kuti mwatemwa, landeni na baeluda abo mwaba nabo mu cilonganino. Bepusheni ifyo mwingacita pa kuti mwingabombako uyu mulimo.

Abanono na bakalamba ababombako umulimo wa makuule baliba ne nsansa nga nshi. Kanshi mufwile ukupepelapo. Na imwe bene ‘mu mutima wenu kuti mwalafwaisha’ ukubombako umulimo wa makuule pa kuti ishina lya kwa Yehova licindikwe. Ala nga mwabombako uyu mulimo tamwakamone kwati mwaleicusha fye!

    Impapulo sha mu Cibemba (1982-2025)
    Isaleni
    Isuleni
    • Cibemba
    • Peleniko Bambi
    • Ifyo Mwingasala
    • Copyright © 2025 Watch Tower Bible and Tract Society of Pennsylvania
    • Ifya Kubomfya
    • Amafunde Yesu
    • Privacy Settings
    • JW.ORG
    • Isuleni
    Peleniko Bambi